إلى متى تستمر المعاناة ..ايها الناقل الوطنى ..سودان إير ؟

Posted: الأحد,20 سبتمبر, 2009 by حاج أحمد السلاوى in اخرى

إلى متى تستمر المعاناة مع الناقل الوطنى … سودان إير ؟؟؟

أحبتى الكرام .

.ما كنت أود ان اخوض وأتعرض لهذا الموضوع لحاجة فى نفسى ولا من أجل النقد الهدام الذى لا يحل مشكلة بل من أجل الصالح العام..ولكنه الألم الشديد الذى يعصرنى لما عايشته بعد كل هذه السنوات فى رحلتنا الأخيرة التى تحمل رقم 227 والقادمة من مدينة جدة الساحلية مساء الجمعة الموافق الثامن عشر من شهر سبتمبر 2009 مع ناقلنا الوطنى .. ومسئوولونا وولاة أمرنا ( أيدهم الله بنصره) يبشروننا  فى كل عام أن عامنا هذا سيكون خاتمة لكل معضلاتنا الأزلية ( ولكن الواقع المُعاش يقول ..أنكم فى كل عام ترذلون )  والتى من ضمنها خدمات ناقلنا الوطنى الذى تم تخصيصه وصار إسمه شركة الخطوط الجوية السودانية وكنت أفضّل أن لو أطلقوا عليها إسماً آخر لا يحمل إسم السودان العزيز على قلوبنا .. لأننا لازلنا نقول .. بلادى وإن جارت علىّ عزيزة ,اهلى وإن ضنوا علىّ كرام ..

فقد كانت رحلة شاقة بكل المقاييس وكنت أشفق كثيراً على أهلنا كبار السن والعجزة من الرجال والنساء  وهم  يعيشون الماساة المُرة .

فقد بدات رحلتنا ..اقصد مسلسل المعاناة منذ وصولنا إلى مطار الملك عبد العزيز بجدة فى الساعة التاسعة مساءاً حسب الموعد المحدد لنا من موظف الحجز الذى  طالبنا الإلتزام بالموعد  ..ولم يلتزم هو وإدارته الموقرة بالموعد المضروب… ولم نجد أياً من موظفى الخطوط السودانية.. وظللنا نذرع ردهات المطار المزدحم بكل أشكال خلق الله جيئة وذهاباً علنا نجد احداً يدلنا على كاونتر ( منصة ) وزن أمتعة المسافرين السودانيين تلك الليلة …  ولكن باءت كل محاولاتنا بالفشل الذريع ( لا أعرف كلمة كلمة تعطى معنىً اكثر من الفشل الذريع ) ..وفى الحادبة عشرة مساءاً حضر إلينا أمن المطار وأفادونا بأنه لا توجد رحلة للخرطوم فى ذلك المساء وعلينا إخلاء الصالة لوجود رحلات أخرى .  فتساءلت هل وصل بنا الحال أن تتم إفادتنا من قبل أمن المطار وليس من إدارة شركة طيراننا المحترمة  بإلغاء الرحلة .؟.وكيف بتسنى لنا أن نتأكد من ذلك ولم نقابل اياً من موظفينا الأماجد ..واتصلت هاتفياً بأحد الأقارب له صلة ومعرفة ببعض الموظفين أستنجد به أن يتاكد لنا من صحة إلغاء  الرحلة من عدمه   فافادنى أنهم ( موظفى الخطوط السودانية ) فى طريقهم إلى المطار وكان ذلك حوالى الساعة الحادية عشرة والنصف مساءاً ..لماذا طلبوا منا الحضور فى الساعة التاسعة  إذن ؟؟ ..المهم والشاهد فى الأمر أتممت ( شخصى الضعيف ) مهمة وزن الأمتعة حوالى الساعة الثانية صباحاً دون معرفة موعد إقلاع طائرتنا صوب  الديار …ودلفنا إلى صالة المغادرة نلتمس الراحة  جلوساً على المقاعد بعد أن بلغ منا التعب والإرهاق حدا لا يطاق..ولكن خاب أملنا فى معرفة موعد إقلاع طائرنا  الميمون  ..و لم نجد من يخبرنا بموعد إقلاع الرحلة الجديد بعد أن تعدينا الموعد الأول وكان الساعة الواحدة من صباح السيت . عند الخامسة صباحاً حضر أحد موظفى الخطوط السودانية فسالناه عن موعد الإقلاع الجديد  فقال أنه سيكون فى الساعة السادسة صباحاً وأن الطائرة يجرى تعبئتها بالوقود ( لا تنسوا أننا فى داخل المطار منذ التاسعة من مساء الجمعة – الحزينة – ) ….بدأنا فى إجراءات دخول الطائرة عند الساعة السادسة والربع.. صباحاً .

وبدأت حلقة مسلسل العذاب الثانية ..وكانت معاناة من نوع آخر ..نوع من سؤ الإدارة فمن المعروف عالمياً أن كل مسافر حجز مسبقاً على أى رحلة.. له مقعد محدد سلفاً ببطاقة صعود الطائرة لكننا فوجئنا يمسافرين  معنا وصلوا إلى الطائرة  ييطاقات صعود بدون أرقام جلوس ( تذكرت حينها بصات الديم والعُشرة والحاج بوسف ) وحدث هرج ومرج بين الركاب وكاد أن يحدث ما لا يحمد عقباه ..كيف حدث هذا الأمر ؟ الله أعلم . ولا أدرى كيف تمت تسوية الأمر .. ..( يجب معاقبة الموظف الذى اصدر هذه البطاقات وفصله من الخدمة ) واكتشفت أيضاً أن طاقم الضيافة عاجز عن تقديم يد العون للمسافرين فى حالات الطوارى وذلك حين سقطت أحدى المسافرات ( من كبار السن ) عند بلوغها مدخل الطائرة ( من شدة التعب ) ووجدت طاقم الطائرة يتحلقون حولها وهم فى حيرة   من أمرهم فيما عليهم أن يقوموا به.. فقمت وبمساعدة الركاب الآخرين من مساعدة الراكبة من النهوض من على أرض الطائرة … حينها تنفسوا الصعداء …؟ واقلعنا فى السابعة إلا خمس دقائق صباحاً من مطار الملك عبد العزيز الدولى ووصلنا الساعة الثامنة والربع إلى مطار  أمازونيا الدولى  .

.وبدات الحلقة الثالثة من مسلسل العذاب  مع موقع إستلام الأمتعة ..التى كنا نخشى فيها عدم وصولها معنا على نفس الرحلة وكان لزاماً علينا الإنتظار متحلقين حول الحامل الكهربائى للأمتعة وهو يدور بيننا فى حلقة مفرغة حيث يتم فحص الأمتعة إلكترونياً بجهاز واحد فقط ( تخيلوا كم من الزمن يستغرق الأمر !! ..ولحسن  حظى جمع الله شملنا مع أمتعتنا بعد مرور ساعة ونصف من الزمن ..وغادرنا المطار فى الساعة العاشرة  صباحاً ..وانتهت رحلة  دامت إثنا عشرة ساعة بالتمام والكمال كان نصيب الطيران منها ساعة وعشرون دقيقة فقط .

والأن وبعد ان أطلت عليكم  بالتفاصيل المملة .. بدأنا نتساءل ( مع  بعض من الأخوة المسافرين ) من هو المسئول  عما حدث ؟..وإلى من يمكن تقديم  شكوانا ؟ ( افاد البعض الذين فقدوا الأمل فى الإصلاح انه لا فائدة من تقديم شكوى .. يعنى هو الماشى صاح شنو داخلياً حتى ينصلح الحال خارجياً..فالشكوى لغير الله مذلة ) ..البس مجرد حجز مقعد وشراء  بطاقة سفر بمثابة  عقد بين طرفين يتحمل كل طرف فيه واجباته .. ولا يحق لأى من الطرفين الأخلال به  ألا بموجب إتفاق وتراض بينهما ؟ لماذا مُنعت  خطوط  طيران الشرق الأوسط والخطوط الكينية والخطوط الإثيوبية وغيرها من خطوط الطيران الأخرى من العمل بجانب الخطوط السودانية  فى نقل المواطنيين السودانيين من مدينة جدة إلى الخرطوم وشركتنا الوطنية غير فادرة على سد الفجوة ؟ وجميع المسئولين يعلمون أهمية محطة مدينة جدة بحكم وضعها الجغرافى والدينى … هل  هو الحسد أم  تخطيط  من قبل إدارة الشركة بزيادة معاناة المواطن المغلوب على أمره ؟ .. ولسان حالهم يردد ..وراكم وراكم حتى وأنتم خارج حدود الوطن والزمن طوبل .. ويريدون منا أن ونرد عليهم بقولنا عذبنى وتفنن فى الوان عذابى ..ولكن إلى متى  تستمر المعاناة ؟ وما فائدة عملية التخصيص مادام أن الوضع كما هو عليه  حين كانت مؤسسة حكومبة ( ميرى ) ؟ وما هو دور الشريك الأجنبى فى مسلسل المعاناة .. أم أصابته عدوى التسيب  هو الآخر ؟ وجوابى على ذلك أنه ما دمنا ننتهج سياسة عفا الله عما سلف ..وغياب سياسة الثواب والعقاب فى تسيير امور حياتنا… فلن بنصلح حالنا  وسنظل ندور  وندور  فى حلقة مفرغة إلى يوم الدين .. لقد آن الأوان أن بطالب المواطن بحقه كاملاً  طالما هو ملتزم بواجباته .. ولا ارى غير أن ندير لهذه الشركة ظهرنا ونعلنها مقاطعة تامة ( وها هو الفقير إليه تعالى يعلنها أمامكم مدوية ..معلناً بداية المقاطعة ..) حتى تستقيم الأمور وتعود إلى نصابها فى تقديم خدماتها بصورة  افضل ..

أم هنالك حلول  ووسائل أخرى ينبغى علينا إتباعها .. أما آن لمثل هذه المعاناة أن تتوقف..؟ نرجو المساعدة ..

 

Advertisements
تعليقات
  1. محمدحسن كتب:

    بسم الله الرحمن الرحيم

    أستاذنا و أخـُونا الكبير السلاوي
    وَ لأهل سُوداننا
    كـُل سنة و أنتم طييبين و في خـَير و سَعَادَة
    🙂

    وَ طَبعَا
    حَمد الله عَلى السلامة
    وَ سَلامة السََلامة مَع نـَاقِلنا الدَولي وَ السَلامة
    وَ أسفــَا يا هُو دَا شعَار خـُطوطنا السُودَانيَّة قبل الخصخصة وَ بَعدَها وَ مِن زمان :
    [ كــُفـُوف الرَاحة المِرتـَاحَة 😆 ]

    فـــَكــَفــَّارَة 😉 أستاذنا السلاوي
    وَ يحلـِّهَا الحَلة بَلــَّه

    • الوجع راقــــــــــــــــــــــــــــــــــــــــــــــــــــــــــــــــــــــــــــــــــــــــد كتب:

      بدون شك وبدون ادني مسؤلية لايوجد ناقل ولاتوجد خدمات لمن تشتكي لمن تحكي او تقصص لايوجد احد مسؤل عن الخطوط السودانية يعني بدارجي (ماشي علي حل شعرها ) والمصيبه والهم الاكبر لقد اصبحنا اضحوكة قيرنا خارج ارض الوطن الطيارة جات لا لسه الطيارة يااخوان اصبرو شويه احتمال ممكن تكون ما اقلعت وبعدين معاكم ياناس الخطوط والاعجب من ذالك يتم اخبار المسافرين بموعد الرحله المحدد وياتي يوم الرحله ويتم وزن العفش وتسليم المسافر البورت كرت صعود الطائرة وللاسف ينادي ممسل الخطوط اي الشخص المسؤل يا اخوان نرجو من الجميع الذهاب الي منازلهم لحين اشعار اخر عن موعد الاقلاع هههههههههههههههههه اتخيل لو انك مريض او عندك شغل او ماشي لاي مكان وانتي تعلم بانك سوف تصل في الموعد المحدد كل ذالك سوف يتلاشي وتفقد الامل يناس حراااااااام ممنوع العطف مع الخطوط السودانية وسكتنا كتير لابد من حل لكل المشاكل من المفترض بان السيد مدير الخطوط يبطل النوم الكتير وخجل علي الفوضه وعدم النظام والهمجيه ياخي اخجل لوعندك طياره واحدة ممكن تتحكم في موعيدها لكن الوجع راقد في اي دوله في العالم المسافر مسؤلية الحطوط التي تنقله ياريت تقدر معني المسؤلية الكلام كتير ومسيخ بس ارجع وقول وروررررررب الوجع راقـــــــــــــــــــــــــــــــــــــــــــــــــد والحقو روحكم يناس الخطوط السودانية

  2. محمدحسن كتب:

    ؛
    نِسينا حَاجة ( صَـغيرُونـَه ) وَ كِده :
    سَلامة وُصـُول ( العَفــَش ) تــَامِي وَ لامِي
    🙂
    أصلُ دَا الإنجَاز الوَطني القـَومِي الصَح لسُودان إير
    وَ دَاير ليهُو ( كرَامة ) عَديل كِدَه
    😎

    .. وَ تـَحيا المُقاطَعة

  3. أولن حمد الله بالسلامة يا حاج

    ثانين هناك دائما فائدة و كما قالوا وراء كلو حركة بركة فانظر للفوائد غير المنظورة التي يمكن أن تخلفها سوداطير

    1. في الغالب سوف تذهب شنطك الى ستعافورة خاصة في موسم الذروة فيهي ذريعة ممكن اعتمادها للتعذر للزوار الذين يسألونك وين هداياهم قيمكنك بقلب قوي دون أن يهتز لط طرف ان تعتذر بأن شنطة الهدايا ما جات !!

    2. تخيل أن ناشطا من جماعة أبو مفتاح الارهابية المحدودة كلف بزرع قنبلة موقوتة بالطائرة السودانية لتصفية مسئول المنظمة الذي انشق عنهم و ذلك خلال السفرية 320 التي سوف يلتحق بها من محطة تالية للخرطوم.

    يقوم يحضر الناشط الي المطار قبل وقت كاف من موعد وصول الطائرة حتي لا يفوته موعد وزن الشنطة الملغومة و يفوت هذه الفرصة الذهبية ليخلصوا من المسئول و يحضر المسئول قبل دقائق من موعد “البوردينق”، لكن لا الناشط و لا المسئول استطاعوا الحصول علي البوردينق كارد” لأن الطائرة ما جات من الخرطوم و لا توجد لدى سلطات المطار أي أخبار عن تحرك الطائرة من الخرطوم. ففقد الناشط عقله و صار يزرع المطار جيئة و ذهابا و يمشي و يجي راجع الي الشنطة و التي برمجت علي الانفجار بعد عشرة دقائق من تحليق الطائرة، ماذا يفعل… فقام و أبلغ عن نفسه و عن قنبلته تفاديا لهذا الاحراج، فنجى الركاب …

    أنظر كيف استطاعت شركة الخطوط من انقاذ الموقف، انها فائدة كبيرة نجنيها من عدم انتظام مواعيد السفريات.

    3. استفادة غير مباشرة للتأخير استفدت منه أنا شخصيا أيما فائدة عندما كنت سألتحق بالطائرة السودانية من محطة دمشق التي كنت قادما لها من أوروبا. أتاح لي التأخير قضاء يوم كامل بدمشق تسوقت خلاله و تعرفت علي مدينة دمشق الرائعة و خدمات الفندق خمس نجوم لحساب الخطوط الأخرى و التي لو علمت من قبل لرتبت لي سفرية أخرى و وفرت بعض الدولارات. و غيرها من أمثلة لا تخلو مذكرات مسافر الا من قصة عن التأخير حتي صار يتهكم عن حروف الاختصار SD الي” Sure Delay ” و ما استقبلت قادما علي متنها الا و ولاحظت عيونه المتورمة من النوم المتقطع في المطار الذي استقل منه الطائرة..

    4. لا بد أن تخرب حجتك من جراء الشتيمة و الشكل الذي سوف تعتمدة عند عودتك من الحج فلا بد و انك حتعيد الحجة بخطوط أخرى حيث سيكون لا رفث و لا فسوق و أهو ثواب جديد…

    5. موضوع للونسة أها هسة حاج السلاوي حيحكي لزواره من مصايب سوداطير و يرتاح من الونسة في السياسة كم يوم كدا…!!!

  4. طارق أب أحمد كتب:

    حمدا لله على سلامة وصولكم
    لا زال لسان الوالد و الوالده يلهج بالشكر و الثناء و طيب الدعوات على وقفتكم و مساعدتكم لهم فى هذى الرحله
    كما أسل

  5. حاج أحمد السلاوى كتب:

    الإخوة الأعزاء جداً ..محمد حسن ..أبو عصمت ..طارق ..
    كل التحايا العطرات من أرض الوطن الجميل بساكنيه الحُنان …ولكم الشكر على مروركم على الموضوع اعلاه ..
    الأخ محمد ..لبست هناك أى كفوف ..ولا راحة..هناك معاملة غاية فى الجفاء والغلظة المتعمدة ..ويشعرونك بأنك عبء غليهم وعليك أن تقبل بما يقدمونه لك من خدمات متدنية .. وهم يظنون أنهم يحسنون صنعاً ..قد خاب مسعاهم وبئس الخدمة ..
    أخونا الكاشف ابو عصمت .. سودان طير يسيئون للشركة وللدولة التى يمثلونها بطريقة مباشرة وغير مباشرة فقد أصبحت مدعاة للتهكم والسخرية تماماً كما قلت… ففى الجارة أم الدنيا أطلقوا عليها إسم ” ستهم ” تجى وقت ما تجى وتروح وقت ما تروح .. بسبب تاخيرها الدائم وعدم إنضباط مواعيدها.. لا ضابط ..ولا رابط ..أما الإستفادة من تاخيرها قد يكلفك احياناً أخرى أضعافاً مضاعفة ..فقد يكون على حسابك ..وهنيئاً لك التعرف على مدبنة دمشق ..بس لا تعتمد على هيك مصادفات …والشوق للقياكم بلا حدود ..
    أخونا الكاشف الصغير .. اب احمد .. لا تحمل الأمر أكبر من حجمه ..وما قمنا به لا بتعدى حدود الواجب علينا.. وللوالد والوالدة كل التحايا ..فقد أستمعت إلى بعض ذكريات الوالد الجميلة.. وحمداً لله على السلامة.. أما الدعوات الصالحات الطيبات فنحن فى أمس الحاجة إليها.. فهى زادنا فى ه>ه الزائلة .

  6. د.ياسين شمباتى كتب:

    الوالد الحبيب السلاوى..الف حمدالله على السلامة..وعجبنى ليك عشان قديت اضانى انت وود الفتيحاب عن التزام الخطوط السودانية طوال العقد المنصرم..ما قلنا ليكم عمرو (ديل الكلب ما ينعدل)..اسه يفترض انك ترفع ضدهم دعوى للضرر والااضرار والاخلال بملزمات العقد الضمنية,,لكن مين ح ينصفك..بس كتر الدعاء عليهم انو ربنا ياخدهم فى لمحة عين ويبعدهم من طريق عباده..وما الذى حدث بجدة عقب الحج الفائت ببعيد..
    كمان ماتنسى جهجهة ود الفتيحاب الاستمرت زهاء اليومين وكلها مساسقة على المطار..بعدين شريك اجنبى منو!!؟؟؟ قالوا شركة اسمها اليمامة زولا شنو كدة,,وما تستبعد تكون حقت واحد من الجماعة!!!
    اللهم اصلح حال البلاد والعباد,,وولى علينا خيارنا ولا تولى علينا شرارنا..

    ما جانى رقمك الجديد,,ابعتو على ايميل لانى بكرة الفجر طالع الفوارة..تحياتى للجميع..وما تطول الغيبة..

  7. حاج أحمد السلاوى كتب:

    ولدنا شمباتى ..كل عام وأنت بخير ..

    كنا نأمل أن تسير الأمور على مايرام..ونحن ندعم خطوطنا الوطنية ..ويبدو أن الشركة ما عندها وجيع ..وسايبة وما فى زول جايب خبر والأمور ماشة بالبركة..وكل زول بيعمل لمصلحته الخاصة ..لا نفعت لامن كانت مؤسسة حكومية ..ولا نفعت لامن خصصوها..وفى رأيى الشخصى يسيبو الشغلانة من أساسه لأنهم ما قادرين ولا حيقدروا يعملو حاجة..وفى ناس عايشه على العبث دا..
    غابتو عملنا العلينا وبعد دا يدبروا حالهم ( كما بقول الشوام ) والحل فى ايديهم إما ……..وإلا ……..
    ( الرقم : 0912605475)

  8. محنك كتب:

    الاخوة الكرام : كل عام وانتم بخير ومبروك العيد

    الحاج السلاوى بركة الوصلت حصلت العيد … انت عارف 12 ساعة دى عوم ساكت بتقطع البحر المالح ويكون على الرحلة دى فى ناس من بورتسودان …… ولكن حتى من السودان يجيبوك المطار الساعة 12 ظهر وتقلع الطائرة الساعة 6 مساء . هل تصدق الركاب حاجزين على رحلة واحدة مكتوب ليهم ايجو المطار بازمنة مختلفة اى والله .. فى تلك المرة التى طلقت فيها سودانير مثل شيخنا السلاوى كتب لى موظف الحجز اجى الساعة 12 ولكن امن المطار اوقفنى فى الشمس ساعة كاملة وجاء آخرون مكتوب لهم الساعة واحدة … هل يصدق احد ذلك اخيرا عرفت انو ناس الخرطوم مكتوب لهم 12 وناس مكتب ام رمان احتاط وكتب 1 …. والمواطنين كلهم احتاطوا بساعة كاملة الا العبدلله الدقيق فى مواعيده

  9. البشاوى كتب:

    الحاج سلاوى سلام وشوق كتير
    الف الف الف حمدا لله على السلامة وبركة اهلك الشافوك طيب —
    ماتُتُور نفسك يا السلاوى على سودان طير ساكت خلي فيهو شوية نفس يقوم على باقى الحاجات يعنى لازم تعمل توازن مدروس لى قومة النفس دى عشان تقدر تكمل اجازتك بصزرة متوازنة يعنى مايحصل ليك انكتام نفس من الشوط الاول وكدة —
    الف حمدا لله على السلامة وجايين عليك بعد ماعرفنا موقعك الجغرافى

  10. bakrimusa كتب:

    اخونا الحاج سلاوي
    كل عام وانتم بخير
    حمدالله على ا لسلامه

    ضيعوك .. ودروك .. انت ما بتعرف صليحك من … عدووك
    الله ياخد ليك حقوقك .. ويجازي الظلموووووك !!!!!

    وذي ما قال ليك البشاوي ( ماتُتُور نفسك ) من الشوط الاول كده
    خلي (شويه) لي ناس جهاز شئون تعذيب السودانيين في الخارج .. معليش كل شئ يهووون منشان الوليدات ولمة العيد والناس ..
    نحنا عيدنا هنا انتهى (بانتهاء مراسم الدفن) ومصاقرين (القومي) و (البلو نايل ) وهارموني ..والكبسه !!!!
    الشعب السوداني كوولهم بقوا فنانين .. حتى ناس حوه الطقطاقة ظهروا من اول وجديد ..

    كل عام وانتم بخير واجازة سعيدة
    اها العودة كيييف !!!!؟؟؟

  11. محمد السلاوي كتب:

    السلام عليكم ورحمة الله وبركاته ،،

    كل عام وانتم بخير ،، أعاده الله علينا بالخير واليمن والبركات .. وتظل الكلمات هي نفسها في كل عام ولكن احساسنا الصادق يعطيها طعم مختلف .. عيد سعيد ..

    وتهنيئة خاصة للحاج أحمد السلاوي (أبو السلاوي) العزيز … كل عام وهامات المستحيل تمارس الركوع أما فيض أمانيك الجليلة .. عيد أنيق …
    وحمد لله علي السلامة والعود أحمد ونتمني لك اقامة طيبة واجازة سعيدة في (سوداننا) مع الشعب السوداني الفضل ..

    بالنسبة لموضوع الناقل الوطني البقي ما وطني وبقي ملي بطني أكيد سودانير تحرص علي الشعب السوداني وتعلم عنه الكثير وما خفي اعظم . ومنها ما ذُكر من السادة السمار الكرام ما خلو شئ .. وأضيف إلي ذلك أن الطائرة السودانية هي الطائرة الوحيدة في العالم التي لا يعلم (المختطفين) موعد تحليقها وهبوطها بمقتضي الحال لذلك لا نسمع كثيراً عن اختطاف الطائراااااااااااااات السودانية فهذه محمدة تحسب لسودانير ولا شنووووووووو!!! ودي يحلها الشربكه !!!!! والمهم جيتو أما جيتو كيف ومتي ولماذا وهلمجرا … دي ما معانا ….

    ولو قدر لنا سنعود …

  12. محمدحسن كتب:

    بسم الله الرحمن الرحيم

    مساءكم خيرات يا أحبابنا
    وَ عَودة مَع سُودان إير ؛
    وَ دِي قصّة حَصَلت مَعَ أخوكم وَ كانت برضـُو ( يَوم جُمعة ) أستاذنا السلاوي.
    وَ احتمال تـَكـُون هِيَ السَبب وَراء الحَصل مَعاكمُ أخونا الكبير السلاوي
    🙂

    فِي رحلة سُودان إير المُغادرة الخـرطـُوم إلى رياض السعُودية
    مَوعِدُ فتح الميزان وَ مَوعد إقلاع الطائرة ما قادِر أذكرهُمُ لِكن متأكد كانـُو قبل الفجُر.
    وَ الحَاجة الما هَنساهَا إنـُّو بَعد التأخير فِي مَواعيد الرحلة
    إلى مَا بعد عصر الجُمعة
    اكتـَشفت إنـُّو الطيَّارة الكـُنـَّا مُستـنيـنـَّها تطير بينا الرياض
    ( مَشت ) مشوار رحلة ( عَلى الطائر )
    خـَتفت رجليها وَ لا نقـُول جَناحيهَا بسُرعة لجَدَّه 😯 !
    وَ كــُلـُو ( رزق ) !
    وَ الحَركة بَركة !
    ـ وَ الهُبل فِي عِشق الوَطنِي كــُتار الزمَن دَا 😎 ـ
    طبعَا الكلام دَا بإستثاء مَا بينَ الخَطـَّين
    كلام نـَاس الخـُطوط ذاتهم وَ ( سَمح الكلام ) من خـَشم سِيدُو 😐 !
    ؛

    عشان كِدا وِ من يَومهَا حكايات الإير ( بتاع بلدنا )
    بقت عِدنا تـَحصيل حَاصِل
    حَالهَا مِن حَال ( مُواصلتنا ) ؛
    لمَن المَاشة عَلى الشارع دِي تـَتـَصَلح فِي الأوَّل
    الطَائرة هَواء بـتـَنصَلِح
    … وَ لا شــُنــُو
    😆

  13. بشار أحمد بشار (إبن برد) كتب:

    الأخ سلولو وجميع المدونين كل عام وأنتم بخير .
    يا السلاوي لمن السودانيين يركبوا الخطوط السعودية والأثيوبية والكينية وغيرها الجماعة ديل بيفضل ليهم شنو يلهطوا ؟؟؟ كابيش؟؟؟

  14. الصادق ود البركة كتب:

    السلام عليكم ورحمة الله وبركاته
    أخونا الحبيب أبو وضاح وجميع الأخوة المدونون
    كل عام والجميع بخير وتقبل الله منا ومنكم صالح الأعمال
    أولاً حمداً لله على سلامة الوصول للبلد ونورت أكثر وبصولكم ليها وإن شاء الله لقيت الأهل كلهم بخير
    ثانياً أنا طلقت سودان طير بالتلاتة منذ 1999م لم وصلت العيال مطار الملك خالد الساعة سته صباحاً للإقلاع ( من بعد نص الليل وزنت العفش) وودعتهم ورجعت البيت أنوم شوية المهم قمت الساعة 12 صليت ثم اتصلت على ناس البيت في بحري قالوا ما وصلوا لسه ( الزمن داك الموبايلات ماكانت منتشرة )
    رجعت نمت لحدي العصر واتصلت قالو لي هسع الناس ديل دخلوا البيت عاينت الساعة كانت حوالي الساعة 5
    ثالثاً حولنا سفرنا للخطوط السعودية كانت أحسن كثير لكنها الآن تشبه سودان طير بنسبة 80% من حيث التأخير وكمان هي الخطوط الوحيدة التي فيها أمن يفتش السودانيين قبل الدخول للطائرة وده بعد التفتيش حق ناس الأمن والسلامة المعتاد
    رابعاً الأخ بكري موسي انت وين أراضيك تلفوني لو أنت داخل المملكة
    0506417460 ودمتم

  15. حنين كتب:

    عمنا الحاج السلاوى والباقيين.
    ياخى كيف حالك وحمد الله على سلامتك والله مشتاقين وحاولت أتصل عليك لكن (الموبايل ليهو رافع …)
    وكفارة على المعاناة الزايدة وربنا يجعلها فى ميزان حسناتك بس إنت أصبر عليهم وعامل بيهم ربنا وأنتظر وعسى تكون المعاناة دى لى خير راجيك وزى ماقالو ليك الجماعة ناس المرطب إمكن يكون ربنا منع بهذا التأخير شر واقع بيكم .مرحب بيك بين أهلك وماعندى تلفونك داخل البلد ونتمنى ليك إقامة سعيدة وكل سنة وإنت طيب .

  16. كبيرنا وعزيزنا الحاج السلاوى … الف حمدا لله على السلامة وجيدا جيت … من ناحيتى انا قاطعتها لى اكتر من عشرين سنة ومابركبها الا مطرا وخطوط داخلية وبس ….. أعتقد انو لو لقيت ليك كم نفر كدة وقدمتو عريضة مع محامى (نجييض) يمكن يعرفو حاجة أو على أقل تقدير يفتحو باب التنافس مع الخطوط الاخرى … لك الود ولسوداننا حرية الطير فى السما

  17. سهيل كتب:

    جدو : حمدلله على السلامه .. الجاتك في طيرك سامحتك ..

    انا اخوي عشان وجع الراس دا العيد قبل الفات جا راجع هو و عيلو من الرياض سايق و شايل معاهو زي 250 كيلو كده و زياده ..

    د.عزت : غايتو طيارتكم دي يوم يلم فيها ارهابي زهجان يلحقا امات طه يحير فيها بن لادن ذاتو .. ودا حيسموهو امير الفدائيين ( عشان بالو طويل) – تفجير على نار هادئه

  18. الزهراء كتب:

    حاج السلاوي
    الف حمد الله على السلامه
    وسودان طير ياهو حالا ما بتجيبو من بره
    وزي ما بقولو اخواننا المصريين عندما سئل احدهم عن موعد قدوم الطائره فرد قائلا:( السودانيه! دي ستهم تيجي على كيفها وتروح على كيفها)
    لكن اخر ايام في رمضان حتى الخطوط السعوديه كانت زحمه وجهجهت ناس كميه
    البركه في جيتك بالسلامه وان شاء الله تاني ما تشوف الشفتو دا
    والبلد نورت

  19. aflaiga كتب:

    عمنا السلاوى : حبابك البلد منوره بجيتك ..
    يعنى اسى لو عملت زى ما قال سهيل مش احسن :
    عفشك فى عربيتك قدام عينك وسايق على مهلك وواصل لى اهلك
    كدى المره الجايه حاول تعال بعربيتك الكاديلاك الفى السعوديه شوف كان تنقدر ؟؟
    بعدين يا جماعه يعنى البلد دى كما عذبتكم تعرفو حلاتا كيف ؟؟ بلد سادى يتلذذ بعذاب محبيه !! عشان ييامنو !!

  20. aflaiga كتب:

    السلاوى : ايه رايك الرحله تكون فى خلا المطار الجديد ؟؟ عشان لو حصل ليك تانى تاخير تلومو تقول ليهو انا ماكل سمايتك ومرحل فى خلاك ؟؟

  21. حاج أحمد السلاوى كتب:

    السُمار الكرام ..كووووولهم ..
    شكراً لمداخلاتكم التى أزاحت عنا كل تعب الرحلة الجوية ..ولو قعدنا ممكن نتكتب مجلدات عن ناقلنا الوطنى اللى أعتقد إنو كل واحد فبنا عاش معه قصة معاناة من كل نوع . … لكن المشكلة تكمن فى أنه لا توجد أى بادرة فى بداية إصلاح الخلل وهنا بيت القصيد..

  22. مُخير كتب:

    حاج أحمد السلاوي
    السلام عليكم وحمداً لله على السلامة وعيد مبارك
    لو لم تفعل سودانير سوى أن أحضرتك إلى السودان لكفاها
    ولو القصور والسجم والرماد في الناقل الوطني وبس لكفانا
    ولو ربنا استجاب للدعوات الكثيرة خلال هذه الأيام المباركات لكفى
    ولو تفتح عمل الشيطان الفكوهو بعد رمضان فنوقف اللولوة ونقول لك مُجدداً نزلت سهلا وحللت أهلاً في ديارك وإن شاء الله إقامة طيبة وإجازة ممتعة

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s