الخرد – 4 – ..النساوين والعربات ..

Posted: الأربعاء,23 سبتمبر, 2009 by aflaiga in اخرى

فى ركن من اركان الخرد تقبع راكوبة يتجمع بها عدد من المتزوجين من الصنايعيه ولا يسمحون فيها بوجود اى عزابى لكن العزابه يصرون على الجلوس غير بعيد من الراكوبه يتنصتون لاحاديث اعمامك ( المعشقين ) كما يحلو لهم تسميتهم دعونا نستمع لحوار رواد الراكوبه وجيرانها من العزابه :

الاول : تعرف الصباح وانا مارق المره جرت لى نور طويل طوالى مسكت فرمله وعرفت انو الليله فى كلام تانى خاصة انو امبارح كهربتا ما كانت مزبوطه .

الثانى : ومالا جاره ليك نور من الصباح ؟؟ .

الاول : شبكتنى ليك عاوزين فرش للمقاعد ومنشات للمطره وتلبيسه للكراسى ومراجعة سمكره وبوهيه للحيط  لانو العيد قرب بعدين الشفع ديل ما ناوى تكسيهم السنه دى ؟؟

التانى : يا زوووول والله دى لسته بتاعة طلبات تخليك تقوم بى نمره اربعه تانى ما تجى راجع البيت كلو كلو ..

ويتدخل فى الحوار عمك حسنين وهو راجل قديم تزوج من النساء اربع وليس فى ذمته الان ولا وحده :

حسنين : شوفو يا شباب النسوان ديل زى العربات اى وحده منهن بتنفع فى جو معين وعندها طريقة سواقه معينه ومميزات معينه .

الاول : كيف يعنى يا عمك الكلام ده ؟؟

حسنين : يعنى عندك مثلا فى نسوان زى الحديد الكورى صرفن بسيط  طلباتن بسيطه لكن غاليات وعمرن بسيط مع الدقداق بتاع المشاكل والازمات البتمر بالحياه لكن لو انت زلو مقتدر وحياتك مسفلته ميه ميه بتقعد معاك زمن طويل . وفى نسوان زى الحديد الالمانى خشنات ودشنات لكن عمرن طويل وسعرن معقول وما بيستهلكن اسبير كتير وبيعيشن معاك وعندهن ضمان متين . انا شخصيا جربت اليابانى والالمانى لكن عندى نيه فى الكورى الجديد ده لو ولقيت لى فرقه ما باباهو بس اليد قصيره ..

الاول : اسى يا عمك العزابه البيتصنتو فى كلامنا ديل بتنصحم بى شنو ؟؟

حسنين : والله ديل ما فاضين من الايجارات والشد وبقو ما عندهم قدره يميزو الحديد من بعض لكن لو عندهم قدره بنصحم بالكورى ..

اها يا شباب انتو من انصار شنو ؟؟

Advertisements
تعليقات
  1. دا سؤال يا أفليقا…

    مافي واحدين عندهم بيوت كبيرة و قراشات واسعة !!!!

    لكن للشباب غايتو نصيحة تشوف ليك ضل للعربية قبل ما تسعاها و كان لقيت العربية بي ضلها يبقى مية مية و طبعن ما مهم الموديل…. أهو “لتسكنوا معهم”

  2. aflaiga كتب:

    عزت : يا حكيم – والله العربيه البى ضلها دى ميه ميه – لانو زمن نبنى قراشنا قشه قشه ده انتهى زماااااااان .. وبرضو اضيف انو الواحد لو بقى عشره على قراشو ممكن يلقى الصباح عربيه مقرشه من تلقاء نفسها والعربات عندها تقييم للقراشات قبل ما تقرش فى قراش ضلو بارد لكن خدماتو تعبانه وفى قراش ضلو تعبان لكن خدماتو ميه ميه ولا شنو ؟؟

  3. افليقا يارائع كل سنة وانت (مقرش) …. تعرف الواحد فى البداية يقول ليك ياخ انا عايز شئ يرفع رجلى ديل من الواطة بس … وبعد شويتين يبدا يقول ليك ياخ الدفار دا مانفكو باتنين هايس لكن بينى وبينك نحن ناس كورى تركيب (جياد) ساى

  4. محنك كتب:

    الايجارات والشد دى خطيرة جدا ….. ياربى دى زيتها الراجع فى قراش المايقوما

    والله يا ابو الافاليق النسوان ديل جننتهن …. بس بلدنا ما فيه حديد امريكى …. واعمامك ديل ما بتمر عليهم السيارات الفخمة خالص …. دى شغلها فى الوكالة

  5. مشاكل كتب:

    سلامز

    نحن من انصار الهلال

    عندك واحدة زي الهلال كدا تفرحنا و تخلينا مبسوطين طوالي

    بعدين مع مساسقة الدنيا دي العرس دا الا بالبلوتوث لكن بالانفرورت صعب شديد

  6. عزت انت قاصد القراش ولا حاجة تانية – واهم حاجة يكون منور وفاتح كويس وبقبل ليهو كم عربية فى نفس الوقت – الضيوف ماكتار وبجوك فى اى وقت.

  7. aflaiga كتب:

    تعرف يا ستريكر حجم القراش ده بيخوف العربات خوف شديد تتخيل العربه من يشتروها بتقعد تعاين للقراش ولو بقى الزول من النوع البيقرش فى الحوش الوسيع وا رماد العربيه الجديده وخاصه لو جات لقت فى عربيه معفرته ولساتكا مرفوعه بحجار فى الحوش !! لكن اصلا هى اكان عارفه انو الحوش ده فيهو عربيه معفرته البيجيبا شنو ؟؟ مصيرا تتعفرت هى برضو ولساتكا تترفع وتتغتا بالمشمع !!!

  8. البشاوى كتب:

    ابو الافلاق
    تقعد تلقط فى كلام الصنايعية دة لامن تودينا الورشة عدييييييييييييييل
    انا اعتقد انو العزابة ديل لاقين الايجار راقد وبدون انبوبة غاز ولاجمرة خبيثة ولا نور طويل ولا اقساط مدارس مابيفكرو لافى المانى ولاكورى
    لكن نحنا الاتورطنا فى اللى تسكن معها ( المانى واسبيرو نار ) بنقدر نقايض بى كورى خفيف كدة وبى اقساط انشاءالله يدفعونا فرق مامشكلة

  9. طارق أب أحمد كتب:

    أفلى كيفك

    لو عايز ر رأيىى أبعد من الكورى ا السغيرونى دا مش لإنو ما بتحمل إنما لإنو ريكوندشند وما يقولوا ليك أورنيك جمارك دا إدنرش هناك درش السنين أما لو مصر كورى أحسن تقع الكورى السودانى عندوا ضمان و كمان عزت ممكن يجيب بطاقتو و يقيف أقصد يقعد معاك فى البيعه

  10. الزهراء كتب:

    اهااااا خلاص بدينا
    غايتو يالرجال الله يديكم العافيه تلقونا انشغلنا وتدوروا من ورانا
    لكن كان جينا للجد كان الكوري كان الالماني كلو بيعمر حسب الشارع البتودونا بيه
    والله لو الشارع مرييح ومسفلت كويس وما فيه حفر ومطبات اكيد فراملنا بتكون عمرا اطول والتقسيمه نااااعمه بالاضافه للقماشات الحتكون زي تموت تخلي لا بلي انقرش ولا كتينه قطعت حتى الكهربا بتكون اخر السطا والكت آوت زي الباسطه
    نحن معاكم بس خلونا معاكم بالسكه السمحه وكل واحد فيكم يدلع عربيتو ويكون مستور معاها عشان تنستر معاه
    واقعدوا عافيه

  11. aflaiga كتب:

    اسطى معلم الزهراء : كل سنه وانتى طيبه .. لقيتك بتاعة حديد كده !!
    زمان كان لمن تجى تشترى عربيه العربيه تقول ليك :
    شوف ما فى داعى نخسر كتير انا بمشى معاك فى الدقداق ولو غيرت الزيت كل شهرين ما مشكله ولو راجع ما مشكله ولو ربطت لى اسبير سكند ما مشكله بس المهم تدور ونبدا مشوارنا !!! واول ما ندور ونبدا مشوارنا تقوم الكواريك :
    الزيت ده تم شهر وما اتغير ..
    الاسبير ده ما اصلى ..
    الفرش ده اتقطع ليه ما جددتو ..
    انا تجيب لى اسبير سكند ؟؟
    انا تجيب لى تلبيسه من الخرد ؟؟
    انا تربط لى شنو ما عارف داك ؟؟
    لمن السواق يزهج ويربط ليها هبابات يعفرتا فى الحوش ولا يقايضا بى كورى ..
    وتقعد تفتش ليها زول نازل ليهو من عربيه ولا زول راكب ليهو عربيه وتقول ليك مالو حيازة اكتر من عربيه ما مشكله المشكله العدل بين العربات !!!
    اها جنس ده يسوو فيهو شنو ؟؟؟

  12. عدل شنو و بتاع شنو أسمع كلام ناس الزهراء

    انت بس وديها بشوارع سمحة و دلع العربية حتريحك خالس خالس و شوف كان تبدلها

  13. البشاوى كتب:

    اها ياعزت قول سمعنا كلام الزهراء نلقى الشوارع السمحة وناعمة وين ؟ وانت عينك الشارع يسفلتوهو الليلة بكرة مطرة واحدة تلحقو امات طه ويتملى موية مطر مخلوطة بى موية صرف صحى وانت ماشى تلاقيك حفرة جوة الموية تكسر فيك ضلعة وتكسر ضراع العربية – نلقاها من العربية ولا من البيسوو الظلط

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s