وزير يغالت وزير والشعب عيشتو تطير ..

Posted: الأحد,27 سبتمبر, 2009 by aflaiga in اخرى

الخبر من عندنا : ( اكد وزير الطاقه بجمهورية السودان  –  1-  ان وزير رئاسة الجمهورية بجمهورية السودان-  1-  ( نفس الجمهورية ) !! غير صادق فى كلامو القالو!!!!!!!! كدى اقرو الخبر ده وبعدين اقرو الخبر  التحت ده وشوفو الفرق شنو ؟؟؟

رفض وزير الطاقة والتعدين «الأستاذ الزبير أحمد الحسن» ونائب المدير العام للهيئة القوميّة للكهرباء «بشرى عبد الله جاد الله» حديث الوزير برئاسة الجمهوريّة، المدير التنفيذي لوحدة تنفيذ السدود، المهندس أسامة عبد الله، الذي اتّهم فيه الهيئة القوميّة للكهرباء بالوقوف وراء عدم استغلال 42% من كهرباء السد. وأبدى وزير الطاقة استغرابه ممّا قاله أسامة، وقال – خلال مؤتمر صحفي عقده أمس بالخرطوم – إنهم في حاجة لاستغلال أي ميغاواط سواء من السد أو من أي توليد آخر. وعدّد الزبير أسباب القطوعات المتكرِّرة للكهرباء في الخروج والدخول المفاجيء والجزئي لكهرباء سد مروي في مرحلة التشغيل التجريبي، وتهالك شبكات التوزيع والنقل الداخليّة، والعوامل الطبيعيّة «الحرارة والأمطار» وزيادة الأحمال. وحدّد الوزير نهاية العام الحالي وبداية العام القادم لوضع حل جذري للقطوعات بواسطة تأهيل الشبكات وإضافة شبكات جديدة غرباً حتى الأبيِّض وشمالاً حتى حلفا وإنشاء ثلاث محطات رئيسيّة إحداها بالفحم الحجري في بورتسودان لإنتاج (600) ميقاواط والثانية بالغاز بمنطقة الفولة بغرب كردفان لإنتاج (500) ميقاواط والثالثة بأم دباكر بالقرب من كوستي بالنيل الأبيض. وأشار إلى أن تكلفة المحطات الثلاث تبلغ «3» ملايين يورو. وأردف: من الحلول شراء كهرباء من مصر واثيوبيا. وحول زيادة الأحمال أوضح الوزير أن طلب الكهرباء ارتفع من 400 ميقاواط عام 2000م إلى 1200 ميقاواط هذا العام. وفي السياق قال نائب مدير الهيئة القوميّة للكهرباء إنهم استغلوا متوسط 91% من كهرباء السد خلال رمضان المنصرم خلافاً لما قاله مدير وحدة السدود، وكشف عن خروج ست ماكينات من السد في التاسعة والنصف من صباح أمس، وأردف أن اثنتين منها فقط عادتا في الثانية بعد ظهر أمس، واستدرك أنّه لا حاجة للهيئة القوميّة للكهرباء لاستخدام كهرباء سد مروي على مدار الـ 24 ساعة يومياً، مشيراً إلى أن الهيئة لا حاجة لها للكهرباء في الساعات الأولى من الصباح التي تصادف أوقات الطلب المنخفض. ووصف استخدام 58% الذي قال به الوزير أسامة بغير الدقيق. وزاد أن الهيئة استغلت 98% من كهرباء السد أوّل أيام رمضان و99% في اليوم الثاني و 100% في اليوم السادس خلال ساعات الذروة. وقال نائب المدير إن الخطّة قصيرة المدى من 2006م إلى 2012م تستهدف دخول خمسة آلاف ميغاواط جديدة، وأشار إلى انتاج الهيئة لـ1200 ميغاواط من غير كهرباء السد، واعترف بعدم صيانة الخط الناقل لكهرباء «ألتي والمسيد» منذ إنشائه في عام 1975م، وأردف: نحن نقدِّر غضب الأهالي. ووعد بحل جذري عبر «عد بابكر». وكشف وزير الطاقة عن بداية خصخصة كهرباء سد مروي كشركة خاصة تتولى إنشاءها وزارة المالية أواخر هذا العام وبداية العام القادم، لكنه قال إن الهيئة القوميّة للكهرباء ستؤول إليها كهرباء السد قبل موعد الخصخصة في أبريل القادم. وبشّر بحل مشكلة كهرباء كسلا، وقال إنه تم إدخال ماكينات بمحطة بورتسودان وتوفير 90 ألف دولار من الصين لحل مشكلة كسلا وحلفا وأروما. وقال نائب مدير الهيئة إن مديونيّة الهيئة على هيئة مياه ولاية الخرطوم وصلت 23 مليون جنيه تباطأت في دفعها منذ أغسطس الذي حُدِّد لتسديدها، وأوضح أن الهيئة القوميّة الكهرباء لن تقطع الكهرباء من آبار المياه إلا أنها لن تتخلى عن حقوقها، ولوّح بإمكانية شكوى هيئة مياه الولاية لرئاسة الجمهوريّة، وأقرّ ببرقراطية بعض إجراءات إصلاح الأعطال والقطوعات.

حتى هنا انتهى الخبر التانى المنقول من جريدة اخر لحظة ..

غايتو جنس غايتو !!!!

افليقا : اسى يا جماعه انتو احسن ليكم كهربة اسامه ولا الزبير

الشعب : يعنى هو فى فرق ؟؟

افليقا : ابوا كيف مافى فرق ..

الشعب : اها الرفق شنو ؟؟؟

افليقا : ايوا سالتونى .. كهربة الزبير دى كهربة الحكومه .

الشعب : طيب وكهربة اسامااااا ؟؟؟

افليقا : نفس الشيئ لكن برضو فى فرق ..

الشعب : الفرق ويييين ؟؟

افليقا : كهربة الزبير دى شفناها ..

الشعب : وكهربة اسامااااااااااا ؟؟

افليقا : نفس الشيئ مع انو ما شفناها خااالس .ز

الشعب : طيب نحنا نسوى شنو اسى ؟؟؟

افليقا : انتو انتو تطير عيشتكم خلو الناس ديل يتفقو حيكهربونا من وين وبعدين نتكهرب يعنى بقت على الكهرباء انا شخصيا بحب كهربة اسامه وفى نفس الوقت ما بقدر استغنى عن كهربة الزبير اها انتو كييييييييييف ؟؟؟

Advertisements
تعليقات
  1. aflaiga كتب:

    شباب : بالله دى حاله دى ؟؟ اتوقع انو فى الايامات الجايه نسمع فى التلفزيون :
    ايوا علينا جاى كهربة السد العداد بالاقساط واول 100 كيلو مجان والقطوعات بالفان — اوع يغشك علينا جاى كهربة الحكومه قوية ومضمونه بكره بجى الخريف والسد بقيف جدول ديونك والعداد برضو بالاقساط !!!!!
    كهرباااااااااااء السد سيد شباب الكهارب ..
    كهرباء الدمازين لانك زين كهربتك من الدمازين خليك وطنى ..
    اسى يا جماعه ممكن بكره ناس صافات برضو يخصخصو طياراتم وتلقى طياره واقفه فى شارع المطار بره وبيكوركو ليها :
    صافات بورتسودان نفر اركب الجديد وريح بالك ؟؟؟
    ونلقى اعلان عن انو اى طياره ما قامت من الميناء الجوى حيرجعوها ناس المرور ؟؟؟
    يا ناس الله دى حالة بلد دى ؟؟؟؟
    اذا بليتم فاستتروا …

  2. د.ياسين شمباتى كتب:

    الحبيب افليقا..دى فوضى وضربت باطنابها فى البلد..طبعا بقى شئ عادى انو الوزراء(يتنابذوا) على صفحات الجرائد وعلى شاشات التلفاز..لكن نقد هادف ولا توجيه مافى..ما بلوم وزير الطاقة لانو الى حدما بنفذ فى سياسات وزارتو المفروض انها مسئولة عن اى شرارة كهربا فى البلد دى,,لكن وزير السدود بحكم يدو (المطلوقة) نافش ريشو على الجماعة وموريهم النجوم فى عز الضهر..وطبعا هو زول مسنود جدا داخل الجزب,وهو من اولاد (قوش) ان صحت التسمية..

    بعدين كهربة شنو دى الدايرين يشتروها !؟؟ ما قالوا ح يبيعوها لى مصر والدول الافريقية؟؟ولا هى جعجعة وقلة ادب على الفاضى؟؟وللاسف الصراعات دى كلها بتقع على راس المواطن المسكين,,يعنى ممكن كل واحد فيهم يقفل كهربتو بالضبة والمفتاح عشان يقنع الشعب بانو هو الفى يدو الحل والربط,,والمواطن (يآمن) بقوتو…احيييييييى انا من المغسة العلى..

    لك الله يا وطنى الجريح…

  3. البشاوى كتب:

    افليقا
    عادى زى الزبادى تسمع — الشبكة الاوسع انتشارا “” كهرباء مروى سمحة وعاجبانى وياحلة تنورى الليلة تنورى من مروى تنورى الليلة تنورى — وعلى إف إم 100 تسمع أرفع رأسك الروصيرص تناديك – خصم %10 كلما تستهلك أكتر – مكيفات -أوجنرال لاتعمل إلا من خلال كهرباء الروصيرص – أو جنرال صنعت بمواصفات روصيرصية مية المية
    وعلى راديو الرابعة – حليمة داخل الحافلة المتجهة إلى الصحافة تتحدث فى الموبايل ياهيثم ياولدى عليك الله خلى اللعب الفى شارع ناس آمنة دة كلو كهرباء ملعوثة ومتذبذبة جايبنها من قرى أصلهم ناس فقر عشان مايوصلو ا كهربة مدنى المضمونة والمأمونة ويدفعو قرشين زيادة وقعو أبو الرخا دة لامن كتلو حاجة كلتوم يوم المطرة بى الاسلاك الزى خيط العنكبوت دى –
    فى البقالة — أفليقا بالله لو سمحت ياأخينا أدينى إسكراتش مروى يى 5 جنيه وبى 7 جنيه حوَل لى رصيد كهربة مدنى وبى 3جنيه حول لى رصيد كهههههه رررر – أو ازيك ياأبو الشباب والله أهو قلنا الواحد يشغًل أكتر من عداد ظروف البلد مامعروفة —–
    دى حالة دى ؟؟

  4. طارق أب أحمد كتب:

    الحراميه لامن يتشاكلوا

    ((ثلاث محطات رئيسيّة إحداها بالفحم الحجري في بورتسودان لإنتاج (600) ميقاواط والثانية بالغاز بمنطقة الفولة بغرب كردفان لإنتاج (500) ميقاواط والثالثة بأم دباكر بالقرب من كوستي بالنيل الأبيض. وأشار إلى أن تكلفة المحطات الثلاث تبلغ «3» ملايين يورو.))
    ثلاثه محطات تنتج أكثر من1000 ميقا و الثمن 3 مليون يورو
    بالحساب البسيط أنتاج هذه المحطات الثلاثه يوميا
    SDG 200,000 = 0.2 SDG X1000X 1000

    قيمة المحطات 3 مليون يورو حوالى 10 مليون سودانى بمعنى أن قيمة المحطات سترجع بالكامل بعد50 يوم فقط

    ((وتوفير 90 ألف دولار من الصين لحل مشكلة كسلا وحلفا وأروما.))

    ياخى عيب عليك موفر 250 ألف ج من الصين ياخى ما تمشى أقرب نقطة تحصيل على الشارع شرطوا عينا وسط الشعوب الأصلن عينا مشروطه

  5. الصادق ود البركة كتب:

    السلام عليكم ورحمة الله
    ده كلام شنو ياشباب الحاصل لينا ده نسأل الله تعالى ان يحسن أمور البلد التي لا يلوح في الأفق ستتصلح …….. وحسبي الله ونعم الوكيل على الكان السبب في النحنا فيهو ده
    كسرة: الضغط ارتفع عند القراءة لأنني هذه الأيام بضع سيناريو العودة لإمازونيا نهائياً عند نهاية العام الدراسي الحالي
    ياسين أمرك عجيب جوالك لايمكن الوصول إليه وقادر تكتب في المدونة

  6. طارق أب أحمد كتب:

    فلم هندى صراع الأخوه
    ((ولوّح بإمكانية شكوى هيئة مياه الولاية لرئاسة الجمهوريّة،))

    الشكوى لغير الله مذله

    طيب لو الكهربا إشتكت المويه لإنهم ما دفعوا ما ممكن المويه تقفل وارقو و تانى الكهربا بح

  7. طارق أب أحمد كتب:

    الصادق ود البركه
    مالو تعال راجع بس أعمل حسابك تدق ليك بير إرتوازى و معاهو جنريتر وكمان دق ليك بير بترول عشان الجنريتر و ماتنسى تزرع ليك كم فدان ليمون و طماطم ولا أفضل يكون عندك طياره خاصه تجيب ليك الخدار من كان طوكيو كان مانهاتن برضو أرخص

  8. طارق أب أحمد كتب:

    من شابه أباه

    (( وكشف عن خروج ست ماكينات من السد في التاسعة والنصف من صباح أمس، وأردف أن اثنتين منها فقط عادتا في الثانية بعد ظهر أمس،))

    قليلات ادب يمرقن و يبيتن بره و يرجعن منهن إتنين بس ديل ما فضل ليهن إلا شراب السجاير

  9. طارق أب أحمد كتب:

    عنتر زمانو

    (( مشيراً إلى أن الهيئة لا حاجة لها للكهرباء في الساعات الأولى من الصباح التي تصادف أوقات الطلب المنخفض.))

    كايس الضلمه يضلم عيشتو

    ما فى قيام الليل

  10. د.ياسين شمباتى كتب:

    الحبيب الصادق..وعجب امر البلد..والله انا اليوم فى مكة جيت احجز للرياض..باذن الله بكون معاكم بعد بكرة المسا..انتظر تلفونى بكرة..

    اب احمد..ما زماااان قلت ليكم ديل(مطاليق) ما صدقتوا كلامى..كل يوم مارقات وراجعات بلا حساب او مساءلة..

  11. انتو يا حبايب ما تشوفوا الجزء المضئ من المسالة…

    الجرايد لقت ليها موضوع، و أفليقا شرك ليكم و جيتو مارقين أها مش أحسن من مافي موضوع….

    زمان واحد زي مصطفى شوارع جنو رحلات و عوازيم….
    عزم الجماعة
    لمن سألوهو بمناسبة شنو
    قال بمناسبة أنو مافي موضوع…!!!

  12. حاج أحمد السلاوى كتب:

    أحباءنا الكرام ..
    هذا زمان المهازل بجد …وحسبنا الله ونعم الوكيل ..الحكومة ووزراءها فى وادى والشعب المسكين فى وادى آخر وملعون ابو الشعب الصابر ومغلوب على امره وحكومة كل واحد أخد ليهو قطاع وقعد يبرطع فيهو وما قادرين أو ما عاوزين ينسقو فيما بينهم ..
    من المفترض إقالة كلا الوزيرين المبجلين وتقديمهم للمحاكمة العاجلة للإضرار بمصالح الدولة ..

  13. سهيل كتب:

    تحايا عطره ..

    يا عبدو طممت بطننا .. ياخي خليهم ياكلو من ورا ضهرنا وز يصوتو الواطه .. مامشكله .. بس لمن تعرف بطنك بتطم و بتكره البلد …

    اي زول في الدنيا دي بحب بلدو .. إلا نحنا ..

    قال وزراء قال .. ياخي انا و افليقا كان مسكونا البلد دي رغم عدم خبرتنا ما بسوي سواتهم دي ..

    انا غايتو من انصار إعادة إستعمار السودان إن شاء الله من الصومال .. حيكون افضل من ديل

    لا حول ولا قوة إلا بالله

  14. حاج أحمد السلاوى كتب:

    إنتو يا جماعة الخير اللناس ديل قسموا البلد دى ونحنا ماعارفين ..ولا شنو ؟؟
    أنا ما قادر افهم أو استوعب إنو وزير بكذب مسئول وزميل ليهو فى نفس الحكومة وعلى صفحات الجرائد كمان ..دا معناهو إنو الناس ديل ما قاعدين يجتمعوا او يتلاقوا ابداً.. طيب الحكومة دى ما عندها رليس يشوف الحاجات دى والتصريحات المتناقضة دى ؟..
    غايتو كان الله فى عون هذا الشعب المسكين …
    وربنا ينتقم من كل ظالم وعابث .

  15. زووووووول كتب:

    افليقا سلااام
    انا استأذن يا افليقا

  16. aflaiga كتب:

    شباب : فتيتو الموضوع فت شديد ونجى للجد فى رايى المتواضع وتحليلى :
    ——
    منذ فتره ليست بالقصيره يلحظ المراقب المحلل للاحداث ان النظام صار يدار عبر كنتونات ( النفط – الاتصالات -الطاقه – الكهرباء – الاستثمار – المواد الاستهلاكية – مواد البناء – العربات – الاستيراد – الرياضه ووو الخ ) تشبه كل منها دوله منفصله بيد انها فى النهاية تصب فى مصلحة الدوله او الحزب – وفى الانظمة التى تكون خارجة لتوها من ازمة فى الدوافع العقدية يكون تقسيم النظام لكنتونات تعمل كل منها وفق عقيدتها فى النشاط الذى تاكل منو عيش – وفى الانظمة المتضاربة السياسات بين اقتصاد السوق الحر والقبضه الاقتصادية الواحده على مفاصل الاقتصاد تبرز بعض الصراعات بين اليات الدوله الرسمية وبين مشروعاتها الخاصه لتامين وجود الحزب الحاكم او تامين تمويل الحزب – الصراع الاخير وصراعات اخرى قبله وغيرها ستظهر بعده هى احدى هذه افرازات هذه النظرية ولكن سرعان ما تنتهى بتغليب الكليات على الخصوصيات اتوقع ان تنتهى الازمة بحل توافقى يضمن هيبة الدوله مدوله وولايتها على المال العام بين الاستثمار الخاص للدوله وسعيها فى نظام اقتصاد تحرير وخصخصة الاستثمار – الاشكال هو كيف برزت هذه الازمه للسطح ؟؟؟ التحليل العملى يقول بان النظام الان فى حالة فقدان الرادع الخارج من شبهات التورط فى علاقات مع احد الاطراف ضد الاخر ولو ان الجميع يشهدون لرئيس النظام بانه ومهما تناوشته الاقوال يبقى فوق كل شبهات الاقوال – النظام يحتاج الى ابراز شخصيات لم تتلوث يديها بالمال العام او تظهر اسماءها فى اى شبهات حول قضايا الاقتصاد الجاريه هذه الشخصيات من شانها ادارة الازمات المشابهه بقدر من الحيادية والقوه والحسم بحيث لا يمكن ان تبرز الى السطح مثل هذه المهاترات حيث تكون الشخصيات التى تفصل فى هذه المنازعات بعيده تماما عن حمى وحرب الاستقطاب ..
    يبقى ما بين ظهور هذه الشخصيات وما بين حل هذه الاشكالات امال معلقه على خصخصة كاملة لقطاع الكهرباء تكون فيها الدوله قابضه على السياسات التى تنظم عمل الشركات القادمه اسوة بالاتصالات وهيئتها القوميه التى فى النهاية امسكت بمفاصل القطاع واصبح التنافس بين الشركات بردا وسلاما على الشعب .
    اقصى ما نتمناه ان تعود خصخصة الكهرباء بخيرها على الشعب وفرة وديمومه وزهدا فى الاسعار …

  17. aflaiga كتب:

    الزووووووول : اذنك معاك مش بدرى شوية ؟؟

  18. عباس ركس كتب:

    سلام :
    افليقا يقول ( النظام يحتاج الى ابراز شخصيات لم تتلوث يديها بالمال العام او تظهر اسماؤها في اي شبهات حول قضايا الاقتصاد الجارية . . . )
    سؤال : الشخصيات هذه – التي تطلبها – من داخل الحكومة وحزبها الحاكم ؟؟؟ ام شخصيات وطنية بغض النظر عن الوانها السياسية ؟؟؟؟؟
    طلب : ممكن خيارات !!! ( امثلة ) .

  19. عباس ركس كتب:

    افليقا : قبل ما تجاوب – اذا افترضنا من داخل الحكومة ـــــــــــــ انسى !!!!
    وإذا من خارج الحكومة – تفتكر انو الحكومة بكامل ارادتها تسلم هذه الملفات بكل ما فيها من موارد لواحد ما منها ؟؟؟؟؟؟؟؟؟؟؟؟ يعني برضو انسى !!!!

  20. aflaiga كتب:

    ركس الواعى المتابع للخلاصات :
    يا عزيزى اول شيئ مرحب بيك ..
    تانى شيئ المشكله فى اقتناع النظام بانم الفساد صار يزكم الانوف وان اهم ما سيغتال وضع النظام فى الانتخابات القادمه هو الفساد والخدمات والمظالم ..
    لانو البنسعى ليهو هو التغيير والتغيير كما تعلم اخى ركس له عدة مطلوبات :
    الرغبة فى التغيير
    القدرة على التغيير
    القابلية للتغيير
    ولو ناقشنا ديل وحده وحده حنلقى الاتى :
    الرغبه فى التغيير متوفره لكنها تصطدم بمافيا المصالح داخل النظام .
    القدره على التغيير موجوده لكنها ايضا ترتبط بقدرات المفسدين تلك القدرات التى تكونت عبر الزمان فصار للفساد نيابات وشركة وامن وجيش وشعب .
    القابلية للتغير ليست بيد النظام فهى سنه كونيه بيد الخالق عز وجل .
    يبقى اخى ركس السؤال الذى كرحته من سيغير ؟؟؟
    معنى الايه الكريمه يقول ( لولا دفع الله الناس بعضهم ببعض ) وهنا ياتى التدافع الذى هو مجمل حركة الكون فالضغط الخارجى والداخلى والداخلى الخاص فى النظام يفرز بالتاكيد معطيات تغيير شاء المفسدون ام ابو !!
    يعنى يا ركس لو فى بت من بناتك مجنناك جن شديد والكلام حولها كتر عندك واحد من تلاته :
    يا تعرس ليها وتسترا
    يا تتبرى منها
    يا تدفنا وتنسى موضوعا
    اتوقع شخصيا ان تؤدى الاوضاع الحاليه الىاحد هذه الاحتمالات :
    اما ان يقوم المفسدون بتوفيق اوضاعهم برغم صعوبة الفطام
    او تتبرا الدوله منهم للدخول للمرحله القادمه بنيو لوك
    او تقوم عمليات خاصه من النظام عبرها يتم تصفية المفسدين او بعضهم فى رساله للبعض الاخر وهذه الاخيره ستكون شر مستطير لانها ستؤسس لحرب سيكون الخاسر فيها هو الشعب فلا احد يعلم الى اى مدى تنفذ المفسدون ولا احد يعلم امكانية الدوله فى حربهم ..
    مشكور على التداخل الراقى والواعى …
    اعمامنا ابكرون – سنكل – بشار – صالح – قلتو المساسقه قلنا اللمه لمينا القصه وين انتو ؟؟؟

  21. aflaiga كتب:

    ركس : بالنسبه للتسمية ليس هناك نظام فاسد بالكامل وليس هناك نظام صالح بالكامل يمكننى تسمية المئات ممن لم تتلوث ايديهم بالحرام ويمكننى تسمية الالاف فى العكس فقط القابلية – الرغبه فى التغيير …

  22. نيام كتب:

    انت اشتكي الموية لرئاسة الجمهورية و نحن بنشتكي الموية و الكهرباء و الجاز و الزيت و البصل و الحلة و القفة و الايجار و المدرسة و البص و المصنع و المابعرفو شنو لحتة و الله كووووووولكم ما بتعرفوها لانو لو بتعرفوها دي ما عمائل دي يعملها مسلم في مسلم …(قال رسول الله (ص) ” كل المسلم على المسلم حرام , دمه و ماله و عرضه”)

  23. سهيل كتب:

    افليقا ثرو ركس

    اولآ : الشعب السوداني (معظمه) اصبح اسير فكرة ان هذه الحكومه لن تزول إلا بزوال الكون .. و ترسخت هذه القناعه و اصبحت سمه اساسيه من سمات شعبنا الفضل .. ( قلت لي الكبري من وين لي وين) مثلآ ..
    عشان كده القابليه للتغيير بدل ما تجي من طرف الحكومه .. شكلها كده مفروض تجي مننا ( عليك واحد) .. يعني برضو الجماعه ديل (نجحو) في جعلنا نفكر بأن العيب فينا و ليس فيهم و بالتالي الكوره في ملعبنا وهي في الحقيقه لافي كوره لافي ملعب و الحكايه مقلب ..

    تانيآ : ناس حكومتنا الرشيد ديل اكتسبو خبرات رهيبه في الفساد .. لذلك لا يمكن لأجعص خبير مجاراتهم .. اي نعم فوق كل ذي علم عليم .. لكن ديل حيرو الشياطين ذاتا ..

    تالتآ : للأسف الشعب الفضل (معظمه) مالاقي طريقه و كان لقى مابقصر .. وقع ليك و لا نعيدو ..

    كسره : انا شخصيآ بفكر ابيع نصيبي في السودان .. اصلن كده كده نحن و البنغالا واحد داخل امازونيآ .. و ياريت لو قدرت ابيع قبل الإنفصال عشان نصيبي ما ينقص …

    خلي بالك دا اثر الوقعه

  24. د.ياسين شمباتى كتب:

    الاحباب الكرام..ديل بعد دا نقلع حقنا منهم قلع,,كان نضمى كان بسلاح,,النصيحة دى نمرقها بس..الغريبة فى واحد من الكيزان كنت بتكلم معاهو قبل كم يوم قال لى انهم _اى المؤتمر الوطنى_ راجين الحرب الاهلية تقوم عشان يصفوا حساباتهم المتبقية مع الاعداء!!! بس ما ورانى الاعداء ديل منو,,هل هم المعارضون ام الشعب؟؟ وانا ارجح الاخير..

    للاسف كل (كوز) ادوهو منصب او وزارة اعتبرها اقطاعية وصار يامر وينهى كما يشاء..ويا افليقا خيار (الدفن) شكلو هو الرسوا عليهو الجماعة ديل..

    والاغرب سمعت قبل مدة انو الصافى جعفر قال( آن له ان يترجل عن صهوة هذا الجواد)..ياربى هو كان جواد ولا نعجة حلبها حلب جد وخلاص قنع منها..

    شكيتكم للنام ولا اكل الطعام شكية لا تتعطل ولا تتبطل..

  25. aflaiga كتب:

    شمباتى ثرو الواقع واطه سهيل :
    يا شباب روقو المنقه الشعب عزيزى شمباتى لم يقنع من خيار التغيير ولم يركن الى ان العيب فيه لكنه اخى شمباتى مسكوهو فى العزيزه ( قوتو ) فاصبح فى الشارع الشكل الزمان بتاع دقو لمن يودوك الحراسه مافى خلى مظاهره ولا شغب سياسى – وده راجع لانو شعبنا بقى شعب يوميه رزق اليوم باليوم فتاخير يوم بياثر فيهو شديد – ودونك الاحداث التى تغلق الاسواق واثرها فى الرزق اليومى الذى هو بيد رب العباد لكنه سلط عليه من لا يخافه ولا يرحم عباده ..
    القصه يا شمباتى مرتبطه بوعى الشعب الفضل ..
    لو قريت الاحداث صاح حتلقى انو الشعب رضى السياسيون او ابو سيكون عماد معادلة الحكم سواء ان انقضت المعارضه على الحكم لمصلحتها او تنازل المؤتمر الوطنى عن قبضته او احتكم الاثنان للصناديق ..
    يعنى كده كده الشعب حيعود ليهو القو القديم فى الاختيار او التدلل على الحاكم بس شوية صبر وانى ارى من خلال النفاخ انها ستفرج …

  26. حاج أحمد السلاوى كتب:

    أبو الأفاليق ..وكل السمار الكرام
    السؤال الآن هو من الذى سيحمى المواطن المغلوب على أمره .. من ظلم الحكومة..
    ابسط مثال على ذلك ما بعيشه الإنسان السودانى اليوم فى ظل التوجه الحضارى.. إذا كان المواطن بيدفع حق الكهرباء مقدماً وما بيلقا كهربا .. ينقطع عنه التيار الكهربائى بالساعات الطوال..ويدفع كافة الجبايات المفروضة عليه من المحليات الجائرة والظالمة ( بعلم الحكومة السنية ) دون أن يجد المقابل لذلك.. الذباب يعيش حوله ..البعوض و الحشرات الطائرة والزاحفة تشاركه حياته ..المستشفيات ملأى بالمرضى ولا يجدون ابسط العلاج..كل الطرق لا تزال ترابية ( اقصد غير مسفلتة..ما تفهمونا غلط )..ثم نصبح ونسمع أو نقرأ مثل هذه المهاترات من مسؤلينا الكرام فى أمور تهم حياة المواطن العادى..والأدهى من ذلك ألا مساءلة ولا محاسبة على أى تقصير .الم نقل من قبل أنه من أمِن العقوبة أساء الأدب ..وأنه قد آن الأوان لتفعيل سياسة الثواب والعقاب ؟ دا يسموهو شنو فى الشرع …أليس هو اكل اموال الناس بالباطل…؟ أليس هو الظلم بعينه ونحن الآن ندعى أننا دولة أسلامية وذات توجه أسلامى حضارى ..أين الحضارة وأين الإسلام ..هل أصبح الإسلام شعارات تطلق للتخدير الوقتى والإستهلاك المحلى ؟
    ونحيل ما يجرى الآن على الساحة من تصريحات متناقضة لبعضها البعض فى شأن الكهرباء إلى السيد رئيس الجمهورية بصفته راعى هذه الأمة وقائدها … وهو مسئول عنها أمام الله..ليعيد الأمور إلى نصابها وينال كل مقصر فى حق هذا الشعب جزاءه ..
    ويا جماعة الخير دا بيقودنا تاااااانى وبيرجعنا للبوست القديم اللى تحدثنا فيهو عن فشل الحركات الإسلامية المعاصرة فى إدارة شئون البلاد والعباد فى الدول الإسلامية ..ويوضح تماماً فى أن الغالبية العظمى ( حتى لا ندخل فى دائرة التعميم ) هى مجرد جماعات تدعى الإسلام كشعارات فقط ولكن الحاصل إنو لديها مطامع دنيوية تسعى لتحقيقها ومآرب شخصية لا يمكن الوصول إليها إلا عن هذا الطريق الملتو ولبس هذا المسوح …ولا يسعنا إلا أن نقول حسبنا الله ونعم الوكيل فى مثل هؤلاء..وليعلموا جيداً ـن الله يمهل ..ولا يهمل وسيعلمون أى منقلب هم منقلبون..ولا حول ولا قوة إلا بالله العلى العظيم .. اللهم عليك بالظالمين أنى كانوا.. وحيث كانوا .

  27. د.ياسين شمباتى كتب:

    افليقا الحبيب..سلام..

    والله فعلا تحليل انو الشعب بقى ملهى فى قوتو ورزق اليوم هى السبب فى ابتعاده عن الاحتجاجات العلنية والتظاهرات والاعتصامات التى كان مشهورا بها..وفعلا الجبناء ديل ضيقوا عليهو فى اكلو وشرابو وصحتو..لكن اشك فى انو ممكن ترجع ليهو سيادتو وهيبتو وحقوقو المسلوبة عن طريق صتاديق اقتراع,,للاسف الحل بقى فى الكنا بناباهو زمان….الله يستر من الجاى..
    اسه كمان شايف المؤتمر الوطنى بيهاجم فى الحركة وبقول انها بتنفذ فى اجندة خارجية وانها استلمت اموال من دول معادية لتصرفها على مؤتمرها فى جوبا..يعنى معقولة بس كل يوم النبذ والعولاق دا بين اهل الحكم!!؟؟؟

    اسالك يا الله ان ترينا فيهم عجائب قدرتك وان تاخذهم اخذ عزيز مقتدر..

  28. aflaiga كتب:

    ود الخلا : الكثير من الانبياء دعو قومهم ليلا ونهار ولم يذهم دعاءهم الا فرار . فاصبر وادع ربك مع الذين .. ولا صبر مافى ..؟؟؟
    شباب : لمن يغالتنى فى انو الفرج قريب اقول له :
    1 – الانقاذ فى مستوياتها العليا جدا جدا تدرس منذ فتره عن عدو الانقاذ الحقيقى ولما توصلت له درست كيف تحاربه ولما توصلت لكيف تشرع الان فى اعداد العده للحرب القادمه وهى اشبه بحروب الرده لا يعتقد احد ان القه سهله الفساد اخوتى له امن وجيش ونيابه وشرطة ووزراء ودعم خارجى وداخلى وقبلى !!!! الانقاذ الان فى اعىل مستوياتها تدرس كيف يتم القضاء على الفساد دون الاضرار بالدوله ككل فشوية صبر يا جماعه يا جات فى الامير يا جات فى البعير يا جات فى الفقير …
    2 – لمن يظن الان الانقاذ كدوله من مصلحتها استشراء الفساد فهو واهم لكن هناك خلل رئيسى فى الشغلانه وهو عظم فضل افرد على الدوله والشخصنه والقداسه فى بعض الاحيان فمن المعروف انه فى علم الادارة حين يتعاظم دور الفرد على المؤسسه يتملك الفرد احساس بانه اعظم من ينجز وانه احق الناس بالغفران حين يخطى او انه لا يخطى ابدا وهى احدى كشاكل الانقاذ فالانقاذ بناها البعض بجهدهم الشخصى احيانا وهذا البعض لعظم فضله على الدوله وغياب المؤسسية احس بانه اكبر من الدوله وان سلوكه فوق الشبهات والمحاسبة .
    3 – لا الوضع العالمى ولا الداخلى يبرران للانقاذ ان تستعدى الشعب لان كل القراءات الواعيه تقر بان الشعب فى طريقه لان يكون معامل اساسى فى معادلة الحكم ولو بعد حين .
    —-
    نكرر شوية صبر مدعوم بالوعى وعدم بيع المواقف قبل ان يسخن سوق صوت الشعب الذى فى تقديرى الشخصى سيصل للاعلى مستويات الاثمان فلا تبيعو وعيكم ولا تركنوا للياس فلا بد لليل ان ينجلى ولا بد للصبح ان يشرق ول طال السفر سواء من الانقاذ نفسها او من خارجها … شيلو الصبر والا يذكركم ما يحدث باخر ازمات كل الانظمة التى تم تصحيح مسارها او تغيرت ؟؟؟

  29. aflaiga كتب:

    ود الخلا : بركه الما بقيت نبى كان الدعوه استحمت !!! التانيين ديل منو انا معاكم طبعا لو انتو معانا !! شوف يا عزيزى اى زول مع الشعب الغلبان ده نحنا معاهو ..
    فى سؤال محيرنى ومهم جدا عشان ننهى قصة الاقتصاد اول ولا الدين ؟؟ عاوزك تعمل بيهو بوست خاص :
    عليه الصلاة والسلام لمن جا لقى الفقر والفساد ماليات البلد بدا بى ياتو فيهن الدعوه ولا رفع مستوى معيشة الناس وسد ابواب الفتن . علما بان عليه الصلاة والسلام هو اول من انشاء حزبا للبوليتاريا واسلمها وقاد بها الدنيا فكان اغلب متبعيه من فقراء القوم وعبيدهم ..

  30. سهيل كتب:

    “ود الخلا : بركه الما بقيت نبى كان الدعوه استحمت !!!” . بااااااااالغت فوكا..

  31. aflaiga كتب:

    ود الخلا : منو القال ليك حزب الرسول ما كان عندو معارضه ده اكتر حزب اتهمو رئيسو ( مجنون – شاعر – ساحر ) واكتر حزب اذو رئيسو ( حصار – قتل – اباطيل – افك – حروب – نفى – مقاطعه ) ..
    لكن اهم شيئ فى الحزب ده انو اعضاؤه ( قمة الايمان – قمة النزاهه – قمة الشرف ) برغم انو كان فى منافقين ومخذلين ومفسدين ..
    تعرف يا قبيله نحنا ما مختلفين كتير فى الاهداف وهى راحة الشعب السودانى لكن بنختلف فى الوسائل انت مصر تريحم بعد تصلح دينم وانا مصر اقفل ليهم ابواب الفتن بعد داك تصلح ليهم دينم دى المشكله هنا …
    شعبنا بقدر ما لديه استعداد فطرى للهداية لديه نفس القدر من الاستعداد للغوايه !!! وشعب ارهقته تجارب السنين فاصبح كالمريض النفسى يحتاج لمعامله خاصه تدمجه فى مجتمع الناس من جديد وتعيده شعبا ابيا حرا ..يعنى الفيهو من العيهو ما من الفيهو !!!

  32. التركى كتب:

    الغالى افليقا والاخوة الكرام
    مع انكم بتتكلمو فى شهرا ماعندنا فيه نفقة ( لأننا لا عندنا كهربة ولا موية هنا) بس كدى النساهم معاكم فى حساب ايامو …. فى العيد ناقشت مسئول بالكهرباء وقال لى بالحرف الواحد (كل السودان كفايته 350 ميقاواط ونحن حاليا بننتج 250 منها) !!!! بعدها دار حديثنا حول ماتبقى من المائة ميقاواط هل ستكفى لضواحى العاصمة ناهيك عن بقية اجزاء السودان … وكانت المفاجأة بانه يقول نعم لأننا لا نستخدم كل ال 250 ميقاواط حاليا ؟؟؟ !!! للأسف جاريته فى الحوار لاستدرك بأن أكثر مسئولينا ليسو بمؤهلين بل غير مدركين بما أوكل اليهم من مهام …. لا أعتقد بأن المسألة ستنتهى بتغيير الرؤوس أو التخلص من الفاسدين (وهم كثرة) المسألة تبدأ من تغيير المفاهيم اولا …. ودا بشمل المواطن والراعى المستهلك والمزود … رأيكم شنو تجتمعو كم مواطن وتشتكو وزارة الكهرباء لانها استحصلت المبالغ ولم تمدكم بالكهرباء ؟؟؟ او على الأقل تطالبو بتعاويض عن المعدات اتلى عطبت بفعل التيار الكهربائي المتذبذب (بالمناسبة اعلمنى المسئول اياه أن ذلك ممكنا) … لكم التحايا والاشواق

  33. محنك كتب:

    نحن من زمان ملا حظين الايدو فى الموية يضرى ويطلق فى الهوا والايدو فى النار يخت الجبايات وما يخاف حد

    مثلا :

    الوزير المركزى والولائى وكان ما اخاف الكضب والبعد خلانا ما متابعين … يقولوا ..

    التعليم مجانا واجباريا لمرحلة الاساس

    المدارس والمحليات
    يا ولد جيب ويا بت جيبى …. الماجاب منو ( يله امشى بيتكم ) رمن سمعنا انو فى طفل انتحر عشان يريح اهله من القروش .
    والمحليات اعزكم الله تبنى فى السوق الواحد امثر من موقع للحمامات الجبائية … وحمامات المستشفيات والاماكن العامة براكم شايفنها …

    وفصل فى مدرسة ما يبنوه خمسة سنة وساحتفل يوم يبنوفصل سنة 3 فى المدرسة الطلعتها منها بتى واديتها مدرسة خاصة تدرس فى رابع الان
    فى احدى مدارس محلية الكلاكلات المسماه على اشهر شخصياتها رحمه الله

    كفاككم والله ازيد اليوم يوم الكتابة الكتيرة من بكره يبدا شغلنا الزى نملة هاشم صديق

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s