النبى بتعرس فوقى ؟؟؟

Posted: الثلاثاء,29 سبتمبر, 2009 by aflaiga in اخرى

هو : يا مره مالك الليله سرحانه وبالك شارد كده فى شنو ؟؟

هى : عليك الله اسالك سؤال تجاوبنى عليهو بصراحه ؟؟

هو : اسالى طوالى واجاوبك بصراحه ؟؟

هى : النبى بتعرس فوقى يا راجل ؟؟ كان لقيت فرقه ؟؟

هو : ايواااا .. كان لقيت فرقاااا ؟؟ طيب ما براكى قلتى ..

هى : قلت شنو ؟؟

هو : لقيت فرقه ؟؟ هو انا لاقى فرقه معاكى انتى عشان القى فرقه مع تانيه ؟؟؟

هى : كيف يعنى ؟؟

هو : يعنى المقومات البتخلى الزول يعرس تانى شنو ؟؟

هى : ما عارفه شنو يعنى ؟؟

هو : ما عرافه كيف اسى انتى عرستينى بى ياتو مقومات ؟؟

هى : يعنى !! كنت وجيه وشباب وسغيرونى ومرطب ووضعك كويس وصحتك تمام وما عندك مشاكل وبتخاف الله !!

هو : واسى الفضل شنو من ديل ؟؟ لا وجيه لا سغيرونى لا شباب لا صحه وبقيت بخاف الله وبخاف منك انتى كمان !! اها البخلى وحده تانى تعاين لى شنو ؟؟؟

هى : يعنى انت عندك نيه لكن الظروف ما مساعده ؟؟

هو : شوفى انا لا عندى نيه لا الظروف ما مساعده ؟؟

هى : يعنى ممكن يكون عندك نيه لو الظروف اتحسنت ؟؟؟

افليقا : السؤال الاخير ده متروك ليكم للاجابه عليهو وهل تعانى من هذا السؤال دوما ؟؟؟

Advertisements
تعليقات
  1. والله يا ولدنا بس دخلنا عشان نثبت الحضور بتاعنا فى البوست الجميل ده ومارقين طوالى.

  2. سهيل كتب:

    شهرآ ما عندنا ليهو رقبه … لكن ما بنخليهو ليكم ترتعو فوقو براكم … جاييكم

  3. سهيل كتب:

    شهرآ ما عندنا ليهو نفقه == شعرآ ما عندنا ليهو رقبه … واضح

  4. aflaiga كتب:

    ولدنا وسهيل العزابى مرحب بالمرور : سهيل ممكن نغير ليك السؤال ممكن تعرس ؟؟ اساسا ؟؟

  5. سهيل كتب:

    يا سلام عليك و انت دايمآ بالك مشغول بهموم الغلابه امثالي … عندك لي عروس؟؟؟؟؟؟

  6. البشاوى كتب:

    سهيييييييييييييييييييييييييييييييييييييييييييييييييييييييييل
    آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآى فى عروس

  7. البشاوى كتب:

    ولدنا الحبيب أفليقا
    إنت فى زول مسلطك علينا ؟ فى داعى للبوست البيجيب الهوا دة ؟ يوم مع الصنايعية ويوم مع المدبلاتية حكايتك شنو ؟
    هى : يعنى ممكن يكون عندك نيه لو الظروف اتحسنت ؟؟؟
    الاجابة ::: شنو ؟- دقيقة خلينى أتذكر مالو الكلام يجى ويفوت دة راس شنو دة؟
    عزيزى\ سابقا كان فى مقولة إنو أى راجل فى نيتو عرسة تانية بيفكر فيها لامن يموت لو ساعدتو الظروف بيعملا والا يموت بى مغستو – لكن الان المقولة بقت انو أى عواطف عندها فوبيا إنو سعيد يعرس فوقا خاصة بعد ظهور الموديلات الجديدة بأشكال وأحجام وأفهام وثقافات مختلفة لاتتوفر فى السكند والكوامر القاعدة وماسكاها فوبيا الضرة — ونحنا يانا نحنا بقينا نفكر فى البيخارجنا مش البيوكرنا واعتقد انو فرص المخارجة ذاتا بقت شبه معدومة الا بالموت وطبعا اسباب الموت بقت اكتر من اسباب الحياة -فى زمنا دة لذلك طلبى الواضح جدا جدا — إن كنت صديقى ساعدنى كى أخرج من هذا اليم

  8. البشاوى كتب:

    ودالخلا
    والله الوليد دة علا نعقد ليهو وهو ملخوم فى شغلوا بس نجى نسوقو على المطار ومعانا العروس جاهزة بى الباسبورت والتذاكر — غايتو عزت لسة بطاقتو سارية المفعول

  9. التركى كتب:

    الحبيب افليقا …. طبعا السؤال دا أنا رديت عليه عمليا قبلما الظروف تتحسن كمان وتانى توووووووبة وعقبال الكواشف …
    ياسهيل افليقا وبيشاوى ديل يدردقو فيك كدة لمن تلقى ود الخلا بعمته والدكتور ببطاقته قدامك ….

  10. aflaiga كتب:

    سهيل : معقوله بس انت تكوس عروس – انت العروس تكوسك انت هين ولا لين ؟؟ انت ماك هوين سهل قيادك كدى وكلنى انا اجيب ليك شافع بى امو مش عروس !! اها قصرنا معاك .. اقعد لف ودور لمن يقولو سهيل معرس جنيه بسم الله ..

  11. زووووووول كتب:

    افليقا سلااام
    الليله معاك بلا استئذان لانو سترايكر استاذن وطوطو ضنبو من بدرى .
    هو : يعنى المقومات البتخلى الزول يعرس تانى شنو ؟؟
    انا : والله القصه دى يا هو !! لا دايرا ليها مقومات ولا يحزنون ولو ما مصدق تعال شوف :
    عمنا سين كان مزواجا ومطلاقا فى نفس الوقت وفقيرا ايضا . كنا نسأله : انت يا عمو حكايتك براها طاقه وصليبها طالع ايه حكاية الدبيل والتليت واستبدال الموديلات دى
    وكان يجيبنا بكل ثقه :(انتو يا اولادى ما متوكلين ولا شنو ؟ على الطلاق المرا دى انتو مصعبنها ساكت والله على غنمايه وشوال عيش الواحد يعرس لكن القلوب يجيبوها ليكم من وين .
    كسره : هاك المقومات دى يا افليقا

  12. الصادق ود البركة كتب:

    السلام عليكم ورحمة الله وبركاته
    يحكى أن واحد أخونا عرس الأولى وماتت وبعد داك عرس التانية وماتت هي الأخرى بعد كم سنة في واحد من الجماعة الزينا (أنا والبشاوي) جاء يعزي في التانية وبعد الفاتحة قعد جنبو وسألو (انت ياخوي بتلقى النسوان البموتو ديل وين؟؟؟؟)
    البشاوي وود الخلا مالكم مستعجلين على توريط سيهل؟؟؟؟
    بصراحة في كل الكلام الفوق كنت بهظر والله يخلي لينا عواطفنا وبقية العواطف اللاتي كافحن معانا حتى الآن وانت ياسهيل أنوي بس ونحنا نساندك لمن تقول بس

  13. طارق اب احمد كتب:

    بصراحة في كل الكلام الفوق كنت بهظر والله يخلي لينا عواطفنا وبقية العواطف اللاتي كافحن معانا حتى الآن
    وانت ياسهيل أنوي بس ونحنا نساندك لمن تقول بس

    عالم جبنه
    أها نويت لكن كيف اقول ليك (( بس)) هو إنت كديسه

  14. زووووووول كتب:

    سهيل سلااام
    كدا مظبوط يا سهيل وان شاء الله تكتب ليكا النيه

  15. هههههههههههه – يا سهيل – رقاد جد لكن.
    قلنا ليكم تسجيل حضور ومرقنا – اسا فى داعى .

  16. سهيل كتب:

    افو يا استرايكر .. راجي التور يقع .. ماقلتو مع السلامه .. المتاوقه ليكم شنو .. غايتو جنس غايتو

  17. الغبشة كتب:

    بالله ياسهيل تانى ماتدخل الاماكن الماعندك ليها نفقه وتقعد تنقنق لينا ساى خلى اسايد الشى يحكوا وخليك متفرج وبس سااااااااااااااااااامع ولا اجيك بالدرب؟؟؟؟؟؟؟؟؟؟؟؟؟؟
    افليقيا:خلينا من التدبيل والتطبيل للتدبيل ماممكن كل ما نقول الشيره دى اتقفت تفتحها تانى، هسى سمعت عزت مشى عقد قريب؟ ساعد الشباب عشان عزت يمشى ويشهد .
    والى القاااااااااااااااءءء
    كسره والله الشوق ليكم بحووووووووووووووووووور وبحوووووووووووووووووووور وطولت منكم ليكم السلام كيمان كيمان وبلا فرز.

  18. الغبشة كتب:

    بالمناسبه سيظل هذا السؤال دائم ومتواجد مادام سعيد هو سعيد وعواطف هى عواطف ولا ما سألت عواطفك هذا السؤال فاحسن شى سعيد يشوف ليه جكه وكم بخره من ابكرون يلحق بيها نفسوا…………….ولا ماكده ياسعيد؟؟؟؟؟؟؟؟؟؟؟؟
    وتانى بنجيكم والى لقاااااااااااااااءءءءءءءءءءءء

  19. حاج أحمد السلاوى كتب:

    حسه با أفليقا ..فى داعى للبوست البجيب الهوا دا..
    الرجال معروفين عينهم طايرة ودايما عاوزين يجددوا وكتير منهم بيتسى عواطفو الوقفت معاهو من البداية ( كسير تلج عدييييييييل … ) وربت الوليدات والبنات وبعد داااااك يشوق ليهو بنية سغيرونة ..يمكن تكون قدر بنته ..يقوم يتعلق بيها وينصب شركه حولها..الكلام دا صاح ..يا جماعة الخير ؟ ..
    غايتو جنس غايتو !!!

  20. د.ياسين شمباتى كتب:

    افليقا و(المتاوقين)..سلام…

    غايتو عليكم جنس حركات!! الداير يعرس ما يعرس,,مالو يعنى؟؟ والما قادر يعرس(سهيل) ما يسكت ساى ويلم ضنبو,,مالو يعنى؟؟ والخايف و(يملس) للعواطفات (السلاوى) مالو يعنى؟؟ الحكاية ظروف يا ناس..

    الوالد السلاوى..اصبحت كيف؟؟

    رسالة عاااجلة لى نونو..انتى وين؟؟؟

  21. البشاوى كتب:

    انت يالشمباتى مالاوى ضنبك برضو شنو يعنى ؟ وافليقا الله يديهو العافية اصلو ناوى يطبق فينا قانون الخلع بتاع المصريين – لامن يلقانا كلنا مؤجرين بيت لى عزابة مدونة سوداننا

  22. سهيل كتب:

    هاكم دي … جاتني هسي

    الزوج: الله يا أم احمد عارفه كم سنه نحن متزوجين؟

    الزوجة: ليش السؤال، ملليت مني، عايز تتزوج علي، والا حاسي انك حتموت؟

    الزوج: ما كنت اقصد شي، وعلى طاري الموت، إذا أنا مت حتعرسي بعدي؟

    الزوجة: أكيد ..لا .. مستحيل ..

    الزوج: ليش مستحيل .. انا مسامحك .. ماعند مشكله

    الزوجة: وانت حتتزوج إذا أنا مت ؟

    الزوج: امممممممم، بصراحة ما عارف ..

    الزوجة: إذا أنا مت عرس يازول انا مسامحاك .. بس تنتظر لغايةما ينشف قبري. دي وصيتي ليك

    الزوج: بعد عمر طويل .. يقول في نفسه: كلها أسبوع و ينشف القبر

    الزوجة: تعاهدني على تنفيذ وصيتي

    الزوج: إن شاء الله

    وبعد شهرين انتقلت الزوجة إلى رحمة الله تعالى، وبدأ الزوج يزور قبر زوجته يوميا قبل الذهاب إلى المسجد لصلاة المغرب، وكان دائما يجد القبر رطبا، استمر الحال شهورا.

    وذات مساء بعد ان انتهى من زيارة قبر زوجته.. يحدث نفسه فيقول: ان زوجتي ام احمد امرأة مؤمنة، كل القبور يابسة إلا قبرها، لذا فلن أتزوج عليها وسوف أحج نيابة عنها هذه السنة.

    وجاء موعد الذهاب إلى الحج فقرر أن يزور قبر زوجته قبل الذهاب إلى المطار .. ذهب إلى المقبرة .. وكانت المفاجأة ..

    لقد وجد اخ زوجته خليفة يسكب ماء على القبر .. فأمسك به … وسأله الزوج: ماذا تفعل هنا؟

    خليفة: إن أختي أم احمد أوصتني أن اسكب ماء على قبرها كل يوم، وان لا أتوقف حتى تموت أنت.

    الزوج: ولماذا ؟

    خليفة: لقد قالت لي أختي انك لا تحب أن ترى قبرها يابسا.

    الزوج: فعلا … إن كيدهن عظيم .. حتى وهن ميتين ..

    خليفة: فعلا إنهن مزعجات .. حتى وهن ميتات …..

    اها فهمتوا حاجه و لا الغبشه تجيني بالدرب احسسسسسسسن؟؟؟

  23. د.ياسين شمباتى كتب:

    البشاوى..انا ما الويهو كان لاويهو,,عزااابى احمد الله..وما داخل فى حسابات (الطبيق) دى,,لكن صدقنى كان عرست مرة بعرس تانى!!

    سهيل..عفيت منها ام احمد,,شايقية بس..

  24. محنك كتب:

    آآي بس تكون …. حسب آخر فتوى زواجية سمعتها شايله حيلها عندها كل شى وعايزة ……… واحد ساكت يسد الخانة الفاضية فى السجل المدنى

  25. aflaiga كتب:

    سهيل : والله ام احمد مفتحه كيف طلعت مفتحه اكتر من ( اب احمد ) !!!! ما شايقيه !!!! مع الاعتذار لاختنا الراقيه ام احمد ست الاسم ..
    شمباتى : كدى عرس اول بعدين عرس تانى ..

  26. سهيل كتب:

    اعمل حسابك يا شمباتي .. الراجينك كتااااااااااااااااا

    البشاوي : مالك ياخوي شغال هزاز .. ولا تكون ضارب لمبة صوت

    وين بشار و ابكرون … شنو يعني ماعايزين معانا ولا كيف.. ظهرتو ظهرتو .. ما ظهرتو بنرسل ليكم وفد رفيع المستوى للإعتقال و التحيق .. و إحتمال يودي الدروه … نمره كامله عد

  27. مشاكل كتب:

    سلامز

    غايتو جنس غايتو

    تاني و تالت و رابع بتاع الساعة كم في السخانة دي

    سخانة جيب و سخانة جو .. انتو ناقصين ؟؟

  28. الزهراء كتب:

    زوووووووووووووبعه في فنجان
    الاخ الصادق بركه
    ابونا حاج احمد السلاوي
    ابننا استرايكر- التاوق وعمل ياااك ورجع
    الله يكملكم بي عقلكم
    ويخليكم لي عواطفات
    وقووومي يا الكتاحه

  29. سهيل كتب:

    مشاكل : يا إبني .. إنت المصحيك لي هسي شنو ..؟؟

  30. طارق أب أحمد كتب:

    عارف يا سهيل أخوى العدو بتاعى مسجل غياب قاعد مع أختو لأنها وضعت و كدا ,,,,لكن عامله فراغ دستورى فى البيت ما يعادلو إلا كمبيوترك يكون ضاربو فيروس و محتاج فرمته

  31. الصادق ود البركة كتب:

    السلام عليكم
    يـــا أب أحمد قالوا قي المثل ( الخواف رب عيالو )
    والحمد لله أخوك موحد

  32. د.ياسين شمباتى كتب:

    حبيبنا اب احمد..ربنا يكتب السلامة..

    حبيبنا سهيل..انا بس داير الراجيها..انت كيف؟؟

  33. سهيل كتب:

    شمباتي : خليها بالنيه

  34. د.ياسين شمباتى كتب:

    سهيل..سميناها رضينا..

  35. سهيل كتب:

    عاشت الأسامي

  36. البشاوى كتب:

    سهيل
    نشغل هزاز جرسكم يضرب نشغل الجرس جرستكم تقوم وتكوس الحجازين – نحنا لو بارينا افليقا دة كتاحتنا بتقوم – يوم يجيب هوا الحكومة الكبيرة ويوم هوا الحكومة الصفيرة والاتنين مابنقدر على الفسح معاهم
    الجماغة اتصلو عليك ولا لسة ؟؟؟؟؟

  37. طارق أب أحمد كتب:

    نشغل هزاز جرسكم يضرب نشغل الجرس جرستكم تقوم

    واقفين تحننوا راكبين تجننوا

    يا للي فتحت البتاع
    فتحك على مقفول
    لأن أصل البتاع
    واصل على موصول
    فأى شئ في البتاع
    الناس تشوف على طول
    والناس تموت في البتاع
    فيبقي مين مسؤول ؟

  38. aflaiga كتب:

    اب احمد : فيبقى مين مسئول ؟؟؟ ااانا سالو ؟؟ ومين سالو ؟؟ هذا سالو .. اانا سالو ؟؟ ومين سالو ؟؟ ولا زول سالو !!!

  39. سهيل كتب:

    اب احمد ثرو افليقا : مين سرق الروب ؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s