ال $ مقابل ال SDG

Posted: الأربعاء,30 سبتمبر, 2009 by استرايكر in إقتصادية

بينما تراجع الدولار في البنوك والصرافات الى دون «جنيهين» و«50» قرشاً مقابل العملة الوطنية  في الشمال ارتفع سعر الدولار الى «جنيهين» و«80» قرشاً في الجنوب مع وجود ندرة كبيرة في الدولار في كافة الصرافات بالولايات الجنوبية.
وكشف قبريال ناتج مدوك – مدير الصرافة بالولايات الجنوبية – عن ارتفاع سعر الدولار مقابل العملة الوطنية في الفترة الاخيرة مع وجود ندرة وشح ملحوظ في الصرافات.
وقال قبريال في حديثه لـ (الرأي العام) ان سعر الدولار وصل في السوق الاسود (2.80) جنيه فيما بلغ في الصرافات (2.78) جنيه، واشار الى عدم توافر الدولار في الصرافات بالكميات المطلوبة، وقال ان الكميات التي تضخ نم قبل بنك جنوب السودان تصب في اقصاها الى (50) ألف دولار مشيراً الى ان هذه الكميات اصبحت متدنية في الفترة الاخيرة نسبة لقلة الدولار، وحذر من تداعيات ذلك اقتصادياً وسياسياً وقال ان تراجع الكميات وارتفاع الاسعار أخيراً له تداعيات سالبة على مجمل النشاط الاقتصادي في الجنوب.
وقلل قبريال من وجود دولار مزور في الصرافات العاملة في الجنوب مبيناً بانهم قاموا بجولة واسعة في كافة الصرافات العاملة بالولايات الجنوبية بالتركيز على جوبا للتأكيد من وجود الدولار المزور وأوضح ان الجولة كشفت عن عدم دخول اي دولار مزور للصرافات مبيناً انهم سمعوا باحباط محاولة لادخال (15) مليون دولار مزور للجنوب عبر الصحف.
ودعا قبريال الى ضرورة مراجعة عمل الصرافات الاجنبية العاملة في الولايات الجنوبية مؤكداً التزام الصرافات العاملة في الجنوب بتوجهات البنك المركزي في سياسة تنظيم وبيع النقد الاجنبي مشيراً الى التزام الصرافات بالكميات المحددة للتحاويل الى الخارج، واشار الى وجود تنسيق تام بين الصرافات في كافة المسائل المتعلقة بضبط وتنظيم العمل في كافة المحاور.

 طيب انتهى الخبر – ونحلل الموضوع –

اين التحويلات الشهرية التى تحول من جانب الحكومة المركزية الى حكومة الجنوب – وهى بالدولار – اليست هى كافية لتدعم الاستقرار الاقتصادى هناك – باعتبار ان اوجه الصرف ليست كمثل الحكومة الاتحادية التى لديها كثير من الاعباء واوجه الصرف على بقية الولايات ناهيك عن الخرطوم التى يساوى الصرف فيها باعتقادى معظم ولايات السودان .

ايضا فات على السيد قبريال انو يورى السبب فى هذا الشح فى الدولار – ويورينا هل مضاربات الناس فى الدولار فى الخرطوم فى الفترة السابقة ادت لارتفاع سعره فى الخرطوم وهبوطه فى جوبا والان يحصل العكس    – فببساطة لو عندى عشرة الف دولار فى الخرطوم – اقوم ارسلا جوبا وابيعا ب 28000 جنيه وارجعا الخرطوم ح اكون كسبان 3000 جنيه. هل هذا مايحدث الان ولكن بصورة عكسية – موسم الهجرة الى الجنوب ؟؟

 

 

 

Advertisements
تعليقات
  1. د.ياسين شمباتى كتب:

    الحبيب استرايكر..سلام..

    طبعا القصة دى حاصلة فى مصر,,حيث انو السعر فى الصرافات اعلى من البنك,,وعاادى فى ناس بتقلب بينهم..
    لكن مسألة الارتفاع فى الجنوب دى انا ما قادر استوعبها اقتصاديا !! كدى شرح اوفى شوية عن الاسباب لو سمحت..

  2. aflaiga كتب:

    ستريكر : خلى الجنوب كمان يضوق المدنيه بتسوى شنو ؟؟ زمان نحنا ضقنا الاتنين المدنيه والحرب – خليهم يشوفو المدنيه بتسوى شنو يمكن يرجعو يحاربو تانى ؟؟
    تعرف يا ستريكر انا فكرت ارجع الجنوب بعد كلامك ده ومنها نغشى كونجى كونجى وكبرى كيت وكجيك ملكال وروقة الزاندى لكن سمسمه ما بتخلينى لانو الابنوس سرو باتع !!
    يا ريت لو التركى او ود المهدى يدينا صوره حيه للحياه الاقتصادية المدنيه بالجنوب ويحلل لينا هل يمكن ان يتحول الجنوب بمعزل عن الجلابه الى كيان اقتصادى مستقر تدار فيه العملية الاقتصادية بعيدا عن حرب العصابات وشرور الانتباهه !!!

  3. شمباتى ازيك
    موضوع الصرافات العملوهو ده هو زاتو الجايب المشاكل يعنى بكون فى سعر البنك الاساسى وفى سعر الصرافات زائدا سعر السوق الاسود.
    البحصل فى الخرطوم عموما بتاع الفرق بين السعرين الاسود والبنك – مابكون كبير عشان ياثر على السعر – باعتبار ان البنك المركزى ممكن يتدخل ويضخ كميات منو فى اى وقت وبالتالى ح يزيد المعروض منو والسعر يقل بزيادة الكمية والعكس صحيح لما يتدخل البنك ويقوم يلم الدولار ويقلل من صرفه ويخليها بضوابط وشروط صعبة – تخلى الناس تفتش فيهو فى السوق الاسود وبالتالى يرتفع السعر. دى المعادلة الطبيبعة.

    لكن الحاصل حاليا فى الجنوب ده حاجة مختلفة فالبنك المكزى بالجنوب ماسك الدولار – والصرافات رافعا سعرها والسوق الاسود سعرو اعلى – بينما فى الشمال السعر زى ماهو ( وانحنا بنتكلم عن دولة واحدة هنا ) مع فرضية انو الاقليم الجنوبى بتصلو مساعدات شهرية وبالدولار – فمفترض انو مايكون فى اى سبب لشح الدولار .
    اللهم الا اذا كانت هناك اوجه صرف اخرى وخارجية على الغالب – هنا تكون الحكومة بتستلم فى المبالغ وتقوم بتحويلها خارجيا بدون ان تمر على الداخل – وهذا فى الاغلب هو الراجح .

  4. افلايقا يااخوى – كدى طلع سمسمة برا الموضوع ده – عشان مايطلعونا انحنا كما برا. ( اخوك ماداسيها وراقد رز).
    الجنوب بطريقتو الماشا دى لا حيضوق مدنية ولا ح يضوق حرب – ح يكون زى ماهو فى مرحلة وسط بينهم .
    الجنوب ممكن يكون قوة اقتصادية قائمة لكن السؤال ح يكون معتمد على شنو -وخاصة لو تم الانفصال ؟؟ على كينبا ويوغندا باعتبار الحدود ولا تفتح المطارات للبضائع الغربية ؟؟

  5. د.ياسين شمباتى كتب:

    استرايكر..تسلم على الشرح الضافى..لكن كلامك دا بيقودنا لى انو فى فساد تقيل واشد من العندنا فى حكومة الوسط اذا صح التعبير..على الاقل هم بيعترفوا وبيحاسبوا ناس,لكن ناسنا ديل ما بقولوا بغم!! ربنا يستر ويعدل الحال.

  6. سهيل كتب:

    استرايكر … الجنوب دا إذا حدث إنفصال .. و توقفت عنه دولارات البترول و لو لشهر واحد حتى يتم ترتيب الأمور و تجديد العقود مع شركات النفط الأجنبيه .. حيكون كالجسد بلا روح .. وهو كما قيل دوله بلا مقومات .. و حتى لو في شويه مقومات برضو تماسيحها كتااااار و ما بيخلوها ساي.. ماليه الجنوب حسب التعابير الميكانيكيه يمكن تشبيهها بماكينة السياره .. تتوقف تمامآ إذا تم قطع إمداد الوقود … و شكرآ

  7. طارق أب أحمد كتب:

    سترايكر و أفلى و الشباب
    الموضوع فعلا غريب فأختلاف سعر العمله يجب أن لا يزيد عن قيمة التحويل أو الترحيل و لكن أذا أعملت الجوانب السياسيه و الأقتصادسياسيه نصل إلى عدة مؤثرات قد تقود لمثل هذا التباين

    عدم الإستقرار السياسى و الأقتصادى ما يدفع برؤوس الأموال زائد الأموال المنهوبه أن تكون مودعه خارج الأقليم وهذه إن أودعت فى الشمال ستؤدى الى أنخفاض القيمه نسبه لزيادة المعروض

    فكرة أن الجنوب قد أختار خيار الأنفصال و ما نعلمه عن إحتمال حرب أهليه قد تنشب تؤدى إلى أن يحفظ الجنوبيين أموالهم و أولادهم فى الشمال الأمن

    الأقتصاد فى الجنوب (( التجاره و المشاريع الخدميه يسيطر عليها اليوغنديين سيطره تامه و هؤلاء لا يكترثون لسعر الدولار طالما تتجاوز أرباحهم الثلاثه أضعاف أو يزيد

    الفساد المالى يزيد من معدلات التضخم فالذى يهبر مليون ج س لا بد أن يودعها لأى بنك فى الخارج لذلك لا يهمهه قيمة العمله الصعبه المهم وجودها

    فى الشمال يمكنك قياس نسبة التضخم ليس بالدولار إنما بالسلع و الخدمات مقابل الدولار مقارنتة بمثيلاتنا من الدول و هذا موضوع لآخر

  8. التركى كتب:

    الغالى استرايكر والزملاء الاحباب
    افليقا : اخلى ود المهدى يواصل بعدما وضح الزميل استرايكر مافيه الكفاية وساحكى عما رأيت هناك قليلا من كثير ..
    فى أخر زيارة قمت بها لجنوب السودان رأيت الحركة كلها (رسميا وشعبيا) فى اتجاه الانفصال ورأيت الاقتصاد (الجنوبى) فى ايدى الآجانب أو عملائهم … ارتفاع الدولار بطريقة فاحشة شئ طبيعى فى (بلد) ينفق اربعين فى المائة من ايرادته فى التسلح وعشرين فى المائة منها فى الحسابات الشخصية بالخارج بمعنى أن ايرادات البترول البنتكلم عنها دى اكتر من نصها لايمر عبر الخزينة الا (ترانسيت) وماتبقى منها مقسوم بين رفاه (المختارين) وترضية البعض الآخر …. هل تدرون أن ولاية واراب مكاتبها من حاويات (كونتاينر) واستراحتها عبارة عن (قطية) بينما الكل يركب لاندكروز مظلل بميزانية مفتوحة للوقود والنثريات … فى رائي قيام دولة بالجنوب اصبح وشيكا ويعلمون جيدا أن العقبة الكبرى الكادر الادارى مع العلم أن جلهم يتدرب الآن خارج السودان على البيروقراطية واسرار الادارة بل ان الفكرة سحب ممن اكتسبو خبرات فى الوزارات بشمال الوداى … حكومة جنوب الوادى لاتقف كثيرا عند الادارة الاقتصادية (على الاقل حاليا) والفكرة أن يفتح طريق عبر اثيوبيا بعد اغرائها بالذهب الاسود الذى سيئول معظمه اليهم بعد الانفصال … وأخيرا أعتقد أن ارتفاع الدولار بالجنوب فى الاونة الأخيرة لعبة سياسية مشتركة لم يراع فيها مصلحة المواطن بالطرفين … بس برضو الجنوب جنة دنيوية والكل يتمنى ليهو الاستقرار ويارررررب نرجع تانى وتانى

  9. يجب ألا ننظر للجنوب بأنه لو إنفصل ما يقدر يمشي نفسه لانه الكلام وبصراحه فيه نظره استعلائيه علي الجنوبيين كما نحن لا نحب هذه النظره من مصر فالاحري الا نرضاها لاخواننا في جنوب بلادي
    …….
    لكن القول لو بقي
    نحن دايرين الوحده لكن الجنوب لواختار الإنفصال دا خياره وربنا يجعلنا جيران غير متشاكسين
    لو خلينا النظره الاستعلائيه وعاملنا الجنوبيين معامله الاخوه سيكون للوحده طعم جميل نتذوقه في حدوثها والا فلنبكي علي وطن اتشتت
    والله يجازي اللكان السبب

  10. ود الخلا يا قبيله

    عجبني كلامك –والداير غير كدا الليمشي يشوف لي وطن غير—
    اصلا ما مفروض نفرط في الوطن الواحد وبنفس القدر نعمل علي إزاله الاسباب البتجيب الفرقه
    والله يجازي اللكان السبب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s