فى كل اللقاءات الجماهيرية التى كان يشهدها السيد الرئيس كان هناك من يهتف بادب جم ( ضاقت يا ريس ) فكان السيد الرئيس يبتسم ويعد الجموع بقرب الفرج – هذه المره نهتف دون لقاء جماهيرى ( بالجد ضاقت يا ريس ) ويقوم الريس يسالنا ضاقت كيف يا شعب انتو بتقولو فى شنو ما المستشارين ديل بيقولو كل الامور ميه ميه ايه الحاصل وبنفس الادب الجم بنقول للريس :
الشعب : اول شي يا ريس الناس صرفت مرتب سبتمبر مقدما عشان تلحق العيد صاح ؟؟ اها الناس نزلت من العيد ومرتب سبتمبر ما كفاها لى تالت يوم فى العيد
الريس : اها وعاوزين شنو ؟
الشعب : تطلع يا ريس قرار بانو مرتب سبتمبر الصرفتو للناس ده كان هدية منك ومنحة عيد وتدى الناس مرتب سبتمبر زى ما هو وخاصة ناس المعاشات .
الريس : برغم انو ده بيخلق مشكله فى الميزانيه لكن انا عندى اغلى منكم اعتبرو منتهى .
الشعب : تسلم يا ريس – تانى شيء يا ريس المرتب ذاتو بقى ما بيكفى الناس ولا اسبوع فى الشهر والغلا ذاد تعرف يا ريس رطل السكر بقى ال واربعميه جنيه ؟؟
الريس : اها وعاوزين شنو ؟؟
الشعب : يا ريس كل ما تذيد المرتبات الاسعار تتضاعف خلى المرتبات زى ما هى وامسك لينا السوق حجم سعرو المطلوق فينا ده والناس البتاكل فى لحمنا دى وقفا فى حدها شوية .
الريس : مع انو ده بيعمل لى مشاكل اقتصادية وازمات فى ادارة السوق لكن انا ما عندى اغلى منكم وتانى فى شنو ؟؟
الشعب : ناس المرور يا ريس معذبين الشعب عذاب شديد قطع ناشف .
الريس : لكن يا شعب ده ما واجبم انتو عاوزين ما ترخسو وما تعملو رخص وتسوقو ساكت ؟؟
الشعب : يا ريس والله انحنا كان علينا عاوزين نرخص ونعمل رخص ونسوق بوعى ومسئولية لكن الزروف صعبه يا ريس هم بيتعسفو فى مهامم شوية ونحنا اخلاقنا ضايقه من الفلس والشوارع كعبه والعربات كترت .
الريس : اها نسوى ليكم شنو ؟؟
الشعب : والله يا ريس خليهم يفكوها شوية بس ويقدرو ظروف الناس الما عندها امكانيه .
الريس : حاااضر عيونى ليكم دى بسيطه تانى فى شنو ؟؟
الشعب : والله يا ريس تقلنا عليك لكن نسوى شنو ما عندنا غيرك نشكى ليهو بعد الله – فى كمان ناس المحليات يا ريس ديل مشكلتم برااااها ..
الريس : انتو برضو ناس المحليات معذبنكم ؟؟
الشعب : نحنا برضو ؟؟؟ انت قصدك شنو يا ريس ؟؟
الريس : والله انا كل شهر بدفع رسوم النفايات والعتب ومافى خدمات البعوض مكملنا !!
الشعب : سجمى انت برضو يا ريس زينا ؟؟
الريس : يا زول ناس المحليات ديل لا بعرفو رئيس لا بعرفو كديس !!!
الشعب : لالا كان كده يا ريس شوف لينا مرتب سبتمبر بس ..
الريس : اها تانى فى شيئ ؟؟
الشعب : تانى ؟؟ تانى شنو الله يعينك على ناس المحليات كده كفاية .
الريس : ( متحدثا مع مستشاريه ) طيب انتو كيف تقول الشعب ده بتاع مشاكل ؟؟ ياخى ديل ناس بسيطين جدا مشاكلم دى انا من جيب الساعه بحلها ليهم انتو بس لمونى فيهم كل فتره كده وانا بتصرف معاهم .
احد المستشارين : ( فى همس بينهم ) اسى فى داعى تمرقو الريس ده من القصر اها خمو صرو بكره يصرف الناس ديل مرتب سبتمبر ونبقى فى ازمه اقتصادية ..
مستشار اخر : ما مشكله بنخلصا منهم فى حاجه تانى كدى خلي دى تعدى ..
سوداننا 
فى المواصلات الصباح وانا جاى كان الهام هذا البوست من رجل معاشى طاعن السن يتحدث مع معاشى اخر :
الاول : اسى يا عثمان يعنى معاش الشهر ده ادونا ليهو قبل العيد اسى من يوم واحد وفرحنا العيال يعنى نقعد اربعين يوم بدون قروش ؟؟
التانى : اها نسوى شنو يا نعيد يا نعيش باقى الشهر والعيد فرحه الميه جنيه الادونا ليها يوم الوقفه دى غايتو فرحت الشفع شوية ( اتخيل مية جنيه فرحت الشفع ؟؟ )
وقبل ان يكملا الحديث تدخل احد الساس يسوس قائلا :
انتو اختصرتو مطالبكم كلها فى اكل اشرب بس وين الحريات والافق السياسى ورفض الشموليه وقانون الامن الوطنى والرقابة على الصحف ووووووووو .
فاجابه احد المعاشيين : يا ولدى ده كلو ما بياكل عيش ..
—-
اعجبنى الحوار جدا فقمت بتنزيل البوست اعلاه رغم انو كترنا الطله الاسبوع ده لكن حقيقى الموضوع بتاع ضيق المعايش ده مهم جدا جدا ..
أفلايقا والأحباب في كل مكان
السلام عليكم ونهاركم سعيد
أفلي ياخ شغلانة ناس نيام دي جد جد صعبة
والنجر متعب بس حالة شعبنا أسعب كثير من النجر
ويا ريت شاعرنا يتجلى ويجدعنا من سهلو الممتنع
في هذا الخسوسهاكم النجرة دي:
استحكمت حلقاتها وضاقت جد
ولا اسم مخرج لدى ها ده الريس
ولمن تضيف… وتضيق… فرّاجها فوق
علّ بس سؤال غيرو … مش كويس
منو غيرو إله الرحمة والعطا الرزّوق
ندعوه يهون لينا عيش شعبن تعيّس
ويوفر ليهم لقمة وهدوم ويلبيل حلوق
الاحباب افليقا ومخير..سلام..
والله الريس الشايفاهو عينى دا لا بحل لا بربط,,,وانحنا خلاااااص اتعصرنا تب..وعليك الله يا افليقا لما تلاقيهو ولا واحد من الشعب البتعرفهم انت يلاقيهو قول ليهو فى رسالة من مواطن سودانى بقول ليك :-
يابارى القوس بريا ليس تحسنها لا تفسدنها واعط القوس باريها
وشكرا جزيلا لحدى هنا…
الرواسي
شعر: حاتم حسن الدابي
بدر مدر يا رواسي نحن بعاد لحقنا القيفة
انت مدبج ونحن نقاسى فى برد امشير والموج والزيفة
مركبك الماليها مطارق تمشي تقيف تسرح بى كيفه
مرة مغارب ومرة مشارق وانت تخاف الريح وحفيفه
ساوها زينة وفوقها بيارق وانت مدبج توب وقطيفة
فيها المات والضاربو الفالق والسالمين فى حالة مخيفة
كل الناس ترزح في كفة وانت وناسك فوق الدفة
الدا يشين والراسهم لفة والشاخصين فى المدى للضفة
صوف افضالك فوقهم جوة فوق الموية وريقهم جفة
من العطش النص اتوفى وباقى النص الفضًل جيفة
….
ضاقوا المر والحال استعصى الشغال واللاحق الحصة
الواصال للرحم اتقصة والهداي مو لاقى الفرصة
الرساي سافر ما وصى خلى محمد واحمد وحفصة
الاطفال العرفو القصة سدت جوة حلوقهم غصة
من الجوع الدم اتمصة واصبح كل الحلم رغيفة
…..
كل الراكب شاف احلامو دون احساس ماتت قدامو
فنُ الكتاب وكسر اقلامو لا الوالدين لا جار ما لامو
ناس الحلة القعدوا وقاموا اصر والح يمشى كلامو
هزموهو اخوانو البى الجوع نامو وكم خريج ما لاقى وظيفة
…….
يا الفكيتها وقلت لها سيرى وعارف انو الدنيا دميرى
لا فى ضفاف لا شفنا جزيرى لا فى الحيرى ولا في الطيرى
كسرت جناحها وقلت لها طيرى اتملكت الكانت ميرى
يا السودت الناصع وجيرى ايد الحق صابونى وليفة
……
قبلك كم متعلم وقاري عكس الريح فكولو الصارى
مشدوهين متعشى وحارى ريسها شلته والبحارى
كم سنوات علاما البارى واقفى وهم شايفنها جارى
بقينا هلاك والقيف متضارى لا حجار لا دوحة وريفة
…..
حسك عينك ما تتمادى وتنسى الراكب عندو ارادة
الاهوال الشافها وخاضها كان فى مدرسة و لا عيادة
شفنا الايد الكان اجوادة يا مبتورة يا شحادة
وياما رقاب كانت سدادة علًمت الله من التعريفة
……
يا ريسنا قدر مديرك فك الدفة وادها غيرك
احفظ نفسك وارضى ضميرك وقف اوع تواصل سيرك
كان طاوعتنى شن بيضيرك عرض اكتافك وفك البيرك
لا هنى شكرا وكتر خيرك وكل انسان في الارض خليفة
———————————-
——————————
————————
لاهنى شكرا وكتر الف الف خيرك
ستريكر : بالله نزل استفتاء حول الاتى :
هل لديك امل بان يقوم الرئيس باصلاحات فى الدوله ؟؟
1 – اعتقد
2 – لا اعتقد
3 – لا اعلم
4 – عشم ابليس فى الجنه
وانا اضيف يا فلقا
عشم الكلب فى ماء الابريق
لانو الموية موجودة بس المفتاح عند النجار …………. والباقى معروف
شششششششششششششششششششششششششششششششششششششششششششششششششششششششششش
والله يا افلى ما قصرت يا هو فعلن زولنا البنعرفو تعرف عمك دا كان يكون أحسن جار أحسن صاحب ,أخو , رئيس تيم بتاع كوره ,لكن رئيس دى صعبه شديد
كنت متخيل القفله تكون (( وقامت سمسمه صحتنى و قالت لى أنت ما متعشى لبن و بسكويت معانا أبو الكباس دا جاك من شنو))
السلام عليكم ورحمة الله
كنت متخيل القفله تكون (( وقامت سمسمه صحتنى و قالت لى أنت ما متعشى لبن و بسكويت معانا أبو الكباس دا جاك من شنو))
ها ها ها ها أضحك الله سنك يا أب حمد زي ما ضحكتني بعد نص الليل
يعني احتمال أبو الاقاليق نوم الجماعة وخرج ضرب ليهو صحن شية مدنكل من وراء ضهرهم وفضحه أب كباس الجاهو
وزي ما قال شمباتي
(يابارى القوس بريا ليس تحسنها لا تفسدنها واعط القوس باريها)
أستاذنا أبو البش يديك كل العافية والتحية عبرك للشاعر الرائع ود الدابي
الاطفال العرفو القصة سدت جوة حلوقهم غصة
من الجوع الدم اتمصة واصبح كل الحلم رغيفة
…..
كل الراكب شاف احلامو دون احساس ماتت قدامو
فنُ الكتاب وكسر اقلامو لا الوالدين لا جار ما لامو
ناس الحلة القعدوا وقاموا اصر والح يمشى كلامو
هزموهو اخوانو البى الجوع نامو وكم خريج ما لاقى وظيفة
ياخي ده الكلام وكتر خيرك
عزيزى ود الخلا..سلام..
اول شئ الما بعرف يعترف بعدم عرفتو ويبعد بعيد..بعدداك ما نفتش انحنا ذااتنا عن واحد (براى) بى صحو,,انتو التحول الديمقراطى دا بجى كيف!!؟؟ ياربى بننوم ونصحى نلقى التحول حصل؟؟ ما لازم نجرب ونجرب حتى نلحق بركب الامم السبقتنا فى الشورى والديمقراطية دى..
اسه انا من هنا برشح نفسى لمسكة القوس دى,,اها رايكم شنو؟؟ما قلنا دايرين الاحزاب السجمانة الكانت زمان,,لكن فى احزاب جديدة ممكن يكون فيها خير..
الغريبة يا شمباتي كلامو بتاع أول أمبارح في المؤتمر لمن رشحوه لكي يكون الرئيس القادم كلام عجيب خلاس اذ قال أنو كان متوقع بعد مسيرة العشرين سنة أن تكون قد شبت قيادات تستطيع أن تقود البلد و يقوموا يرشحوها ….فقام رضى و قال (هذا ابتلاء و مسئولية) ربنا يقدرنا عليها و قام ابتدأ يحذر من الأجندة و المابعرفوا و استلم عملوا
هوي يا شمباتي : إنت متعشي بشنو ؟؟؟؟؟؟؟
الحبيب افليقا والاخوة الكرام السلام عليكم ….
تصور وانا بقرا فى موضوعك جونى ناس المحلية عشان يشيلو قروش النفايات طبعا بعدما قريت رد الريس اديتم من غير نقاش او مماطلة …. هسع ياداب عرفت شغل المستشارين البقو اكتر من الهم على القلب ديل ….
شمباتى : أعتقد انو التحول الديمقراطى وشيك بس لازم الناس تكون مستعدة ليهو عشان ما ينط عليهم حرامى تانى من القيادة اياها أصلو الديمقراطية السودانية حيطتها قصيرة جدا …. والسؤال هو الى اين يجرى السودان ؟
عزت المرطب..طيب وكت ابتلاء هو متبالى بيهو لشنو!!؟؟ وقبل كدة قال انو كرسى الحكم دا قطعة من الجحيم,اها الجابرو شنو على القعاد (فوقو)؟؟..
بعدين هو قاصد انو مافى زول غيرو مؤهل ولاشنو بعد العشرين سنة دى؟؟وهو ذااااااتو مؤهلاتو شنو للحكم دا ؟ عليك الله يا عزت قول ليها خلاص فترنا منهم..
سهيل..انا ما متعشى لكن حارى!!!
التركى..تديهم وانت خاتى الخمسة فوق الاتنين..
والله اهم حاجة جاهزية الشعب للتحول دا ,,وقبل كدة كان فى بوست عن الموضوع دا..وانا بشوف انو من واجب المتعلمين والمستنيرين توعية اقاربهم واهلهم وجيرانهم عن الانتخابات والتحول ومجرى الديمقراطية المتوقع..ربنا يسهل القاسية ويزيحهم من طريقنا..
د.شمباتى : تعرف ياغالى الديمقراطية الانا العايزه على أقل تقدير تكون زى الخبر دا (لايزال معارضى بنك النقد الدولى يحتلون مبنى الحزب الحاكم باسطنبول) لا بوليبس يضرب ولا عربات تتكسر … وهاك خبر من (عندنا) وزير العدل يقول (الجرايد شالت حالى) عمره مايعترف ولا يستقيل … لك الود
الحبيب التركى..والله هى الشورى والديمقراطية,,وحتى الاسلام فى تركيا..اما ناس قريعتى راحت فعمرهم ما يعترفوا بالغلط..لكن اول ما الواحد يطلع برة مركب الحكم يقوم ليك عليهم ويعمل فيها الهو الوحيد الكان نزيه,وياما نصح الرئيس والوزير فلان والمسئول علتكان لكن ما سمعوا كلامو..
اما وزير العدل دا فخليهو براهو,,دا قال انو الناس البتكلموا عن سر استوزارو الطويل ما مؤمنين بالله!!! لانو الاستوزار دا من الله وما مفروض يسالوهو !!!!! احييييي انا من مغسة بلدى..
يا راجل استغفر الله … وحدووووووووووووووووووووووووه
لا تسألوا عن اشياء إن تبد لكم تسؤكم .. كده كويس كان عرفت التفاصيل حتموت كمد ..
برضو الحمدلله .. في بلاد بره ناس المافيا لمن واحد فيهم أو في الدوله يعرف عنهم معلومات كتيره .. بلحقوهو امات طه .. عشان كده قرط علي كده و خلي مسااااااااااااااااااااافه بينك و بين امات طه..