خطاب الرئيس امام البرلمان . فى امل ولايحتمل ؟؟

Posted: الجمعة,2 أكتوبر, 2009 by aflaiga in اخرى

نقلت الانباء ان السيد رئيس الجمهورية سيقوم بالقاء خطاب هام للشعب السودانى من داخل البرلمان .. عشان ما نطول ماذا تتوقع فى خطاب السيد الرئيس امام البرلمان ؟؟

شخصيا لا اعتقد ان الخطاب سيخلو من الاشاره للقضايا التاليه ولكنى اتمنى ان يشمل الخطاب اجابات شافيه للقضايا التى تلى التاليه :

اولا القضايا التى سيشملها الخطاب :

* موقف اتفاقية السلام فى نيفاشا .

* موقف التفاوض فى قضية دارفور .

* موقف سير التحول الديمقراطى والانتخابات .

* موقف الخدمات والبنى التحتيه للدوله .

* مهددات الامن القومى السودانى .

* سياسة الدوله تجاه قضايا المواطن خلال العام 2010 م .

* التركيز على اهمية دور البرلمان فى الفتره القادمه .

* موقف العلاقات الخارجية للسودان فى ظل التحولات الدوليه والاستقطاب الخارجى .

* موقف الدوله من الحركات المتمرده بدارفور .

* سير العمل السياسى داخل حكومة الوحده الوطنيه .

اما ما اتمنىان اسمعه فى خطاب الرئيس فهو التالى :

* العام 2010 م عام محاربة الفساد .

العام 2010 م عام الخدمات .

العام 2010 م عام رد كرامة الشعب والوفاء لمواقفه مع الدوله والرئيس .

العام 2010 م عام السلام الشامل .

العام 2010 م عام فك الاحتقانات السايسية ورفع الظلامات عن الشارع .

واخيرا وليس اخرا اعلان الاستقلال من داخل البرلمان طبعا حتقولو لى استقلال شنو عن منو او منو عن شنو ؟؟ يعنى الرئيس حرام عليهو يعلن الاستقلال ولا التحرير ما كل الناس عاوزه تستقل ولا تتحرر !!! ما اقصده هنا هو اعلان الاستقلال من سلطة الحزب واعلان ترشيح نفسه كمرشح مستقل لرئاسة الجمهورية عشان نضمن انو حيكون انتخابات نزيهه ونشوف الحزب ممكن يرشح منو غير الرئيس ولا يمكن يرشح الرئيس برضو ؟؟ مش فى النهاية حق الحزب ؟؟ والحزب حقو !! وروح واحده فى جسدين ؟؟!!

اها انتو متوقعين شنووووووووووو ؟؟؟

Advertisements
تعليقات
  1. حاج أحمد السلاوى كتب:

    ولدنا أفليقا ..وكل الأحبة ..سلام
    متوقعين نفس الوعود اللى وعد بيها قبل عشرة سنين ..وما تحقق منها شى..وخاصة ما يتعلق بحياة المواطن السودانى العادى لكى يحيا حياة عادية كريمة بدون منغصات.. وهو قايم بكل واجباته ودافع كل ضرايبه بكل ما تحويها من أشياء مستحقة واشياء غير مستحقة من جبايات وخلافه.. و فى نفس الوقت ما لاقى واحد فى المية من حقوقه لأنو مغلوب على امره ..
    ولو فى زول متفائل ومتوقع حاجة غير كدا … يطالعنى الخلا ..

  2. سهيل كتب:

    الناس ديل (ناس المؤتمر) نرسل ليهم البشاوي و اب احمد (لزوم الحنك) و كمان ننتهز فرصه وجود جدو سلاوي بيننا مدعمآ بود الزبير و افليقا ( مفاوضين اشاوس) يشرحو ليهم فكره ( الدمج) … عسى و لعل وعسى في حق الله واجبه ..

    كان عجبتهم الفكره انا حتجيني جلطه و البشاوي حيندهش( مسكين ليهو سنين يخربو طعم الدهشه) و جدو سلاوي حيفنش نفسو و اب احمد حيركب الصينيه .. اما ود الزبير حيشتغل بتاع ترمس و افليقا حيخش المنطقه ( ياتو منطقه ؟ مامعروف) ..

  3. aflaiga كتب:

    شباب : فى كل دول العالم المتحضر يكون خطاب الرئيس نابعا من القاعدة حيث يقوم قبل فتره من الخطاب خبراء مراكز البحوث بعمل دراسات للراى العام وتوقعات الجماهير ومن ثم يقومون بتحليل المواقف لجميع القوى السياسية ويبحثون عن اهم الاسئلة التى تحتاج لاجابات ومن ثم يقومون بصياغة الخطوط العريضه لخطاب الرئيس ومن ثم يقوم الرئيس بافراغ كاريزماه الخاصه فى الخطاب فيخرج الخطاب علميا عمليا محملا باشواق الجماهير ولو جاء دون تلبية عملية للوعود وفى الدول التى يعتبر فيها الرؤساء خدما للشعوب يقوم الخبراء بتنظيم كم خبطه سياسية وكم مفاجاه من العيار الثقيل تمثل اختراقا لاجواء السياسية والامنيه والاقتصادية اى مثلا :
    قبل الخطاب بى يوم يقوم خليل يوقع اتفاق مع الحكومه ويجى القصر ويحضر الخطاب مع الرئيس !!!!!
    يقوم الجيش يقصف مواقع متقدمه للجيش التشادى ويتغول فى العمق التشادى !!!
    يقوم والى الخرطوم يعلن وقف رسوم النفايات لبقية العام !!!
    يقوم وزير الداخليه يصدر قرار بوقف حملات المرور فى الفتره المسائيه !!!!
    يقوم مدير المياه يحرك كم مية فنطاز مويه للمناطق المقطوعه عنها المويه مجانا !!!
    يقوم جهاز الامن بعلن عن احباط محاولة تخريبية بالجد جد !!!
    يقوم تجمع الاحزاب عشان ياخد ليهو نومه تانى !!!
    وقومى يا المرا موتى …

  4. التلب كتب:

    سلام للكل
    غايتو يا افليقا بتحلم ليك جنس أحلام!!! أصحى يا معلم

  5. aflaiga كتب:

    التلب : اولا : ما الاحلام الا تيراب الحقيقه ..
    ثانيا : على ربنا ما بعيد الكلام ده واعتدنا هنا ان نخاطب اعماق اعماق الناس عسى ولعل ان ياتى حديثنا بقبس من نور يضيئ لشعبنا دربه .
    يعنى انت متخيل انو ما ممكن ؟؟
    شباب : انا شخصيا اتوقع بشريات كثيره من عند الله مع بداية العام 2010 م بدات ملامحها تلوح فى الافق لمن يرى جيدا فما الضيق الشديد الا لفرج .
    والاهم من ده كلو انو شعبنا قد وصل لمرحلة من الوعى اصبح يميز عبرها كل الالاعيب والحركات القرديه وما بيتاكل حنك ودى اهم فائده من الفتره الشموليه العشرينيه .
    والاهم انو شعبنا اكتسب الوقاية من كل السواتر التى يتدثر بها الحكام سواء حرية او دين او ديمقراطية او غيره .
    ارى مستقبل واضح لشعبنا ينتظر فقط ان تستمر العملية السلمبة كما هو مسارها الحالى الى الانتخابات .
    المهم الصوت امانه فى العنق والادلاء به ممارسه حقيقية للحق الوطنى .

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s