أهل المريخ وسباق الحمير

Posted: السبت,3 أكتوبر, 2009 by ودالزبير in رياضية

طبعاً يا شباب أولاد عمنا بتاعين العرضه جنوب ديل

عندهم حاجات تمحن

أها البلد كلها وأقفها إستعداد لسيد البلد

المؤتمر الوطني بينافس في بقيه الأحزاب لخطب ود سيد البلد

والأمه المسجل يتقدم د الهادي المهدي ليقود لجنه دعم لسيد البلد

وإحتمال كبير د خليل إبراهيم يحاول يجي يحضر كوره الهلال ومازميبي

وإحتمال مفاوضات الحكومه مع كل الحركات المسلحه تنجح بسبب الهلال

السودان كله على قلب رجل وأحد

الفنانيين الممثلين الجرايد القنوات الفضائيه جوه وبره ما عندها شغله غير الهلال

الناس مركزه تركيز شديد في كوره بكره

الناس في الشارع في بيوت الأعراس في بيوت البكاء

النسوان في سوق سعد قشره

العرائس عند إنتصار جحا ولا غاده شرفي موضوعهم كوره الهلال بكره

كتاب الأعمده السياسيه في الصحف اليوميه سابو مشاكل الشريكين ومؤتمر جوبا

وركزوا في كوره سيد البلد بكره

البلد كلها مشاكلها إتأجلت لحدي بعد كوره الهلال

الكهرباء زاتها بقت ما بتقطع والمويه شغالها إحتفالاً بالمناسبه دي

أها تصدقوا في الجو الهلالي الجميل ده

طلعوا لينا ناس المريخ بمسرحيه جديده

قال أيه

دايرين ينسحبوا من مباره في كأس السودان

وين الكلام ده ؟؟

قال ليك في عطبره!!!

أها تصدقوا عطبره البغنوا ليها ناس عقد الجلاد

عطبره الجابت حسن خليفه العطبراوي

صاحب أخلد وأجمل نشيد وطني

أنا سوداني أنا

ناس المريخ دايرين يطلعوا ليها لينا مدينه إرهابيه

يأخي الناس في شنو وإنتو في شنو؟؟؟

ركزوا معانا وما تشغلوا لينا الناس بسفاف الأمور

أقول ليكم حاجه

شيلو كأس السودان زاتو

إن شاء الله يعوضكم كأس سيكافا

طبعاً بتكونوا عارفين المثل بتاع الناس في شنو والحسانيه في شنو ؟؟

هسه بالله ناس الإذاعه الرياضيه

وناس عثمان حسن مكي في الإذاعه الطبيه

ماعارفين يعملوا شنو ؟؟

كل ما يحاول يجيبوا سيره موضوع سباق الحمير بتاع المريخ المقام في عطبره

يلقوا نفسهم خجلانيين ويرجعوا للموضوع الأساسي بتاع سيد البلد

أها عاد ده إسمه كلام

هسه نحن نودي وشنا وين من شوبير

ولا من مصطفى الآغا

لو سألوا من حال المريخ

نقول ليهم المريخ إنسحب من قدام فريق إسمه الأهلي

الجماعه ديل لو مركزين شديد في الكوره السودانيه

بيقولوا لينا الأهلي مدني

أها نمشي وين نحن

ضفورنا ما راح تشيلنا عشان نشرح حكايه الأهلي عطبره

البيرعاه حسن عبدالسلام أمين خزينه المريخ الأسبق

القصه دي في سودانيين ما بيستوعبوها

فما بالك بإعلام أجنبي

Advertisements
تعليقات
  1. التركى كتب:

    لكن صعبتهخا ياود الزبير انا غايتو ماشى احضر ديربى نيالا لسباق الخيل هناك لا فى طقيع حجار ولا كسير عربات … ياخويا نحن الكورة دى نسيناها من زمن ناس طارق احمد ادم وعبده الشيخ

  2. ودالزبير كتب:

    التركي

    سلام

    إنت يعني ماشي نيالا أوأووووو

    تذكر الجلاله دي ناس الإنقاذ قدوا لينا أضانها بيها أيام التكمين الأولى……….

    تصدقي أنا متحرك على الإستاد لكن عمنا السلاوي قال جاي علي غايتو آخرني جنس تأخير …

    ما عارف المدونيين ديل قصتهم معايا شنو في كور سيد البلد دي المره الفاتت وأنا داخل على الإستاد ضرب لي خالد مدني عشان يقول لي في حفل إستقبال لمخير في بيت عزت المرطب أها أخوك بقى جسمه في الكوره وقلبه في بيت المرطب …

  3. التركى كتب:

    التحايا والاشواق ….. ياخ ناس الانقاذ ديل شنو الما قدونا بيهو بس الله غالب … من كل قلبى اتمنى للهلال الفوز هنا وهناك كمان لو فيها طريقة …. غايتو لو اتغلب انت والحاج الا تشدو الرحال …. تصور اللمة ديك فاتتنى انا برضو بس شاركت بالتلفون والغريبة انى كنت فى نيالا برضو … بالتوفيق يارفاق

  4. ابوالمنذر كتب:

    ود الزبير
    المدوناتيه والمدونات بدون فرز

    رجعنالك .. وكيف نرفض .. رجوع القمره.. لى وطن القمارى…

    الشوق غلب والظروف حكامه دايما رافعه الكامه نسعل منكم سعال الضهبان والمقادير ابت ان نظهر ونبان…. اهو كميه من الاسباب الموضوعيه وغير المنطقيه
    فى ان واحد وما دايرين نكتر عليكم يا اهل الجود والكرم ….
    وخالص تحياتى وتقديرى لى عمنا السلاوى الذى اتصل يسأل عن غيابنا ويتفقد احوالنا بلسان حال الجميع له منى الشكر والعرفان ونعد بمواصلة المشوار …
    ياودالزبير…
    وصلتنا الاخبار من عطبره انو سبب المشاكل شافع قال لى ريتشارد ياماسوره فماكان منه الا ان تلب السلك ذالى الشافع فهاجت الجماهير وحصل ما حصل ..انتو صحى ريتشارد بقى ماسوره؟؟؟؟؟؟؟؟؟؟؟؟؟؟؟؟

  5. سلام يا أحباب و انشاء الله سباق الحمير ما يعطلكم…. أصلو من المهم أن تتنوع اهتمامات الفرق الرياضية حتى لا تكون كرة القدم هي الوحيدة في الساحة و يركز عليها الكل… و في النهاية ما تجيب حقها …

    غايتو سيتزامن من ذلك السباق وضع حجر الأساس للمدينة الرياضية مع “أكواريوس” حتى تشتت الأصوات اصلوا الكورة بقت كلها مطبات و سباكين..

    قال “سهيل”
    جاء من يسأل عن اجراءات تسجيل احدى اللاعبين
    قالوا ليهو: الحمد لله خلصت كل الاجراءات بما فيها امضاء رئيس النادي و الكشف الطبي بس فضل ليهو كشف “السباك” ما يقوم يطلع ماسورة..!!

    احتمال يا أبو المنذر الجماعة ديل يكونوا نسوا الكشف الأخير دا…..

  6. نيام كتب:

    ابوالمنذر:
    كل عام و انت بخير .. و حباب سباكين الثقر..
    عزت المرطب:
    صدقت صُدق ..
    ودالزبير:
    جاهزين جاهزين
    جاهزين واحد و اثنين..
    مع تحيات نقابة السباكين ..
    ما تروحش تبيع المية في حارة السآآآآآين آآآآآآهـ..

  7. سماسم كتب:

    أزيك يا نيام كيف أصبحتو

    جاهزين واحد و اثنين.. بس
    تلاتة… أربعة … خمسة
    الليلة ود الزبير يمشى وين بعد اللسان الطويل
    حصلنا يالزووووووول والباقيين

  8. التركى كتب:

    اللهم لا شماتة … رحم الله كرة القدم السودانية عامة وأصحاب المقبرتين خاصة … وتقولى شنو وتقولى منو يابرعى

  9. زووووووول كتب:

    الاخوه بنادى هجم الكاس سلام
    تدعوكم رابطة سباق الحمير للمشاركه فى سباقها السنوى السادس (1987 ،1992 ، 2007 ، 2009 علما بانه اقيم سباق عربى فى التسعينيات برضو ) بس حميركم الجعانه دى ما بتنفع معانا بالله غيروها حتى تجوا تشاركو لانو بالطريقه دى بتجيبوا سمعه للبلد .
    كبجك كبجك كبجك كبجك هردلب (صوت حافر حمار ازرق لكنه كالعاده وقع قل بلوغه الهدف ).
    بعدين بتاعاتنا (ما داير اقول حميرنا ) الاديناها ليكم دى ما بتجيب حاجه فالفرس (اقصد اللاعب ) ايفوسا دا اتجرب كتير وما نفع . والبتاع الاسموا امبيلى دا اكبر ماسووووره دا شارك فى صباقاط !! فى جنوب افريقيا وفى تونس وفى السعوديه وفى الكنغو وما قدر يعمل اى حاجه . اما البتاع كابوندى دا اصلا ما بتاع ولا يحزنون .
    كسره : ماشين صبق ! الحمير بتاع ابو ظبى ولا ما مستواكم يا ود الزبير ؟
    سماسم : احى الثوره بالنص زاتو

  10. زووووووول كتب:

    نسيت بتاعاتنا الباقيه سامى عبد الله وعلاء الدين شلاليت وحموده ايسيان !! اهههههههههههه

  11. زووووووول كتب:

    ود الزبير
    ((القصه دي في سودانيين ما بيستوعبوها

    فما بالك بإعلام أجنبي))
    كدى يا معلم خلينا من القصه دى انت قادر تستوعب قصة الخمسه بتاعة المقبره .
    تانيا المقبره زاتا فيها كم نقطه يا معلم

  12. زووووووول كتب:

    ابو المنذر حمدا لله على سلامتك مثنى وخماس
    ((..انتو صحى ريتشارد بقى ماسوره؟؟؟؟؟؟؟؟؟؟؟؟؟؟؟؟))
    نحن خلينا انت قولك شنو على المواااااااسييييير بتاعة امس دى

  13. ابوالمنذر كتب:

    يا الهلالاب ومعاكم انا ….
    حليل موسى ياحليل موسى .. حليل موسى للرجال خوسه
    طلع موسى بتاع المقبره اى كلام يا راجل ونحن طلعنا اى كلام ياراجل ..!!!
    يا شماتت ابله ظاظا فيه….
    ابله ظاظا مين …
    خماسيه مع الرأفه … وأدت احلام الفرح المفقود لى باقى الشعب الفضل … عشان نبطل نرفع سقف الاحلام من قفة الملاح وطلب البوش وما نحلم بالانجازات فى ظل التشرزم والانقسامات ووهم العنتريات, وتسلط الافراد على افراحنا واحزانا …. كيان جماهيرى ذى الهلال يكون قرار تحديد لون رباط الكداره يتم بالرجوع لشخص واحد…. ومصير جماهير الحزب التاريخى برضو زول واحد … وانفصال الجنوب بى حالو ومئات القتلى يوميا برضو لانو فى زول واحد…
    ودارفور والبلد تدفع كتير برضو عشان خاطر عيون زول واحد ..
    هو .. اتل … اتل ,, وله لعب عيال..؟؟؟
    اتل وكمان بالخمسه…
    – اوعه كده ياراجل ده بيقول اتل,,,,,,,,, اخخخخخخخ…. دخت

  14. ابوالمنذر كتب:

    الزووووووول….
    حبابك يا ابو المواسير وعملتو ازمه فى السباكين ونحن كنا قايلين مواسيرنا قلفنايظ طلعت عشر (بضم العين) لحقونا السباكين بتاعنكم ومافى طريقه يا اخوى نتلم التعيس على خايب الرجاء ونرجع لى كان ابى حقتكم ونرجع لى التوالى حقتنا .. والله يخلى العرضه شمال وجنوب واهو برضو الواحد بلقالو كضمت قصب سكر وفش غبينه فى الحكم وبرضو تنفيس
    ولنا عوده وانا بواجه الخيبه بشجاعه الا الجماعه الزايقين وابو العشاء ديل نكوسن وين ….

  15. زووووووول كتب:

    على الطلاق يا ابو منذر انت ارجل واحد لانو الشئ الحصل امس دا يخلى الواحد يزوغ زى ود الزبير ويخلى الواحد يكتب بوست من تلاته كلمات زى سترايكر لكن نحى شجاعتك وندعوك لخلع الجلباب الازرق وان تركب معنا فالكاس قادم لا محاله . او تبقى على الازرق بشرط ان تتخلى عن احلام البطوله القاريه .
    كيف عاملين مع بورتسودان وهلال الساهل (هاك هداف الممتاز دا )

  16. حنين كتب:

    ياود الزبير .ياخى صاحب الفراش بحرسو يعصرو
    الزوووووول يجى يشيل الفاتحة مايلقى البيشيلا معاهو .أها نحن عرفنا رقبتنا مشغولين بى صبق الحمير والناس بيخططو يلعبو فى كاس أندية العالم فى دبى وبيتطلعو لى فوق لحدى ما لاقتم حديدة قطعت رقبتم . وبعد ماراسم أتقطع ووقع فى الواطة ظل يتحدث وهو مقطوع (إنعل أبو الكورة زاتا )
    عمنا حاج أحمد السلاوى بالله إنت مشيت الاستاد حضرت الكورة ؟ القون الخامس دة جا كيف ؟ ولا ماشفتوة …

  17. ودالزبير كتب:

    عيوني انا.. بشيلهم ليك.. بدس الفرحة في جواي..
    عشان باكر تجي والقاك.. مضمخ بالعبير فرحك.. مجرتق باشتياقي اليك..
    يضوي علي الجبين ريدك.. هلاااااااااال سعدي

  18. ودالزبير كتب:

    لم أكن أتصور أن الكره يمكن أن تفقد المرء وقاره حتى تلقيت بالأمس رساله من عضو هنا بمناسبه هزيمه الهلال والرساله اللغم من كلمه واحده ( زوووووووط ) وهي كلمه لها ما بعده لو تصورتها بالحركه التمثيليه المصاحبه لها .. الكلام ده لو جاء مني ولا من أي زول ما محسوب على التيار اليميني كان بيتبلع لكن أصلاً ما توقعتها منك يا البالي بالك لكن راح نعمل بمبدأ الستره ولن نفصح عن صاحب الرساله .

  19. ألفاتح جبرا كتب:

    والله يا ود الزبير الزول الرسل ليكا الرسالة ده غلطان ثم غلطان كمان يخت ليك خمسة واوات !!

  20. ودالزبير كتب:

    هاهاها ها ها

    بالله شفت الكلام ده كيف؟؟

    بس خليهو تاني يجي يتكلم لي في الدين عشان أطلع زيتو زاتو

  21. ودالزبير كتب:

    مهداه لكل مريخاب عشان نوريهم إن الأيام دول

  22. زووووووول كتب:

    والله غلتان شديد يا ود الزبير ما كان يعمل ليكا فيها خمسه واوات لانو تلاته بس كفايهولا شنو يا بروف .
    بلدياتنا كان سكيرا وكان ابنه يسرق القش من مزارع جيرانه (اعوذ بالله ديل احسن منهم ناس الهلال ) .
    جاء احدهم يشكو الابن لابيه الملطط
    ــ يا اخ ولدك دا قاعد يجى يقلع زراعتنا ويسرقا
    ــ الله ينعل ابوهو دا ولد تعال يا ولد يا حسن
    ـ يحضر الولد اها شنو يا ابوى
    ـ بالله يا حسن القش بتاع عمك حسنين دا ما تقلعوا قليع قبو قب من فوق لا فوق سامع .

  23. aflaiga كتب:

    ود الزبير ثرو جبرا : القال ليكم منو انو زوووووط ما اسلاميه ؟؟؟ اسى يجيكم زول ناطى يقول ليكم انو سمع فى الحديث انو المؤمن اذا اعجبه شيئ كبّر و زّوط !!!! ولا اعتقد انه هناك ما يعجب المؤمن مثل هزيمة الهلال امس فى اليوم المبارك فى الليله المباركه التى تجلت فيها قدرة الله خمس مرات !!!!!!
    يا جماعه والله لا خير فى زيد ولا عبيد !!!

  24. ألفاتح جبرا كتب:

    أنا دايمن بقول إنو كورتنا دى كورة بتاعت صدف ساااكت … يعنى ممكن الهلال أو المريخ يلعب مع (برشلونة) يديها تلاته ويجى يلعب مع سارديه … سارديه يديهو ستة !! أنا بفتكر إنو المسألة ما مسألة تربيه جسمانية المسألة مسألة تربية (عقلية) الكورة دى بقت عاوزة ليها (مخ) يعنى بقت (برمجه عديل كده) ومرحلة (الشليت) دى مرحلة الناس إتجاوزوها زماااااان … وإلا شنو يا جماعة؟؟

  25. حاج أحمد السلاوى كتب:

    الأخ ودالزبير .. شكسبير….وكل الأحبة ذوى اللوان الزرقاء والحمراء ( هو اصلو فى حاجة غير اللونين ديل .. ؟ )..
    أنا هلالابى منذ نعومة أظفارنا فى امدرمان القديمة.زوكانت الكورة فى كل العالم آنذاك على نفس النمط اللى كنا نشوفه ايام صديق منزول وبرعى وكل العمالقة القدامى …لكن الحصل بعد كدا إنو الكورة تطورت واصبحت مدارس متعددة ..الأوروبية والبرازيلية وأخيراً الأفربقية بعد ان احترف ابناؤها خارج القارة ولا ننسى الكرة الخليجية المتنامية..وبقينا نحن كما نحن نلعب بنفس الوتيرة القديمة ..إحتفاظ بالكورة ..محاورة الخصم لإستجداء تصفبق وإستحسان الجمهور بغض النظر عن مصلحة الفريق ككل.. ونردد نحن الأسسنا الإتحاد الإفريقى ..ونحنا …,نحنا ووقفنا محلك سر والناس تتقدم فى كل شىء .. حتى الكورة .. وصارت الكورة علم بدرس وناشئين بعلموهم أصول الكورة من الطفولة .. غير ما نحن عليه الآن يجيبوا لاعب يلعب موسم أو إثنين ويلهط ما قدر الله له أن بلهط ويروح فى عالم النسيان ..هذه مع الأسف كورتنا اليوم وحتى لو قدر الله لنا الإنتصار أول امس فى تلك المباراة لما تمكن الهلال من إحراز الكاس ..لأن فرقنا الرياضية زى فورة الأندروس سرعان ما تروح فى الهواء بعد ثوان معدودة ( فى ناس ما بيعرفوا الأندروس دا شنو ..سهيل ..مشاكل ومن لف لفهم ..) .
    من المفترض الآن أن يجلس العاغرفين ببواطن أمور كرة القدم فى هدؤ لمناقشة الأمر برمته من طقطق للسلامو عليكوم ثم يضعوا الحلول المناسبة للخروج من الهيصة الحالية والصرف البذخى العبثى فى الفارغة عشان نعرف نلعب كورة عصرية وما أظن نعدم الشباب اللى بيعرفوا يلعبوا بس ما لاقين التوجيه الصحيح بعيداً من تجار المصالح الكروية المهيمنين على الوسط الكروى ..
    أتينا بمدربين اجانب ( الهلال والمريخ )ولكن أين اللاعب الذىيفهم توجيهات المدرب ؟ وبأى لغة يتفاهمون ويستمعون للتوجيهات ..يجب تهيئة اللاعبين وخلونا من الهرتك والمرتك الحاصل اليوم .ز
    الإخوة الأعزاء ..هذا رايى فى وضعنا الكروى السىء الذى نعيشه بكل اسف ..ويجب علينا بعد اليوم أن نخرج رؤوسنا من الرمال ومواجهة الأمور بعين العاقل بعيداً من العواطف ( لا تفهمونا غلط …) والمجاملات..وإلا سنظل دوماً فى ذيل القوائم ..ولا تغرنكم الإنتصارات التى تحدث من وقت لآخر ..فهى لا تعنى أننا لعبنا كويس ..بل تعكس ضعف الفريق المنافس …
    وكل منافسة والجميع بخير ..

  26. ود المهدى كتب:

    هلردلك يا ود الزبير (اظن ما حصل من الثقة الزايدة -وكترت الار- وانو الجماعة نسو المثل البقول – وقد تسبق العرجاء –

    وازيدك من الشعر بيت
    تري الرجل النحيل فتذدريه وفي اثوابة اسد هصور
    ويعجبك الطرير فتبتليه فيخلف ظنك الرجل الطرير

    بعدين مش في ناس اخدو سبعة ولا كم ما عارف

    القصة دي ما نافعة لانو القصص الاهم منها ما مظبوطة وبالتالي تخلي الكبار صغار وتصيب الكبار بالصغار والمحصلة زي ما شفتو لا مالا جمع ولا ادبا ابقي ….. ربنا يشفي كل مريض وينبه كل غافل… والسلام

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s