صوتك عزيز بالحيل اديهو للبيعزك ..

Posted: الأحد,11 أكتوبر, 2009 by aflaiga in اخرى

والانتخابات على الابواب بدات تناوشنى بعض التساؤلات :

يا ربى اصوت ولا ما اصوت ؟؟؟

يا ربى كان صوتت اديهو لى منو ؟؟

قمت سالت جارتنا علويه الحنانه :

افليقا : يا علويه انتى ما سمعتى بالانتخابات القربت دى ؟؟

علويه : كيفن ما سمعت بيها وانا راجيه شنو انت قايل ما راجياها هى بس ؟؟

افليقا : ومالك فرحانه كده انتى سمعتى انها حتكون نزيهه ولا شنو ؟؟

علويه : شوف يا افليقا زمن 99 % والاجماع السكوتى انتهى الاحزاب اسى بقت واعيه ومفتحه ومسنوده من بره وجوه والعالم مفتح عيونو علينا وهو انت قايل المجرس الناس دى كلها شنو ؟؟ ما لمن لقو مافى فرقه انها تتزور بقو يتجرسو ويفتشو فى قواعدم الشعبيه يا ود اقول ليك دى مراقبه مراقبه دوليه انت بتلعب ؟؟

افليقا : اها قولى كده بقت نزيهه انتى حتدى صوتك لى منو ؟؟؟

علويه : هوووووى يا افليقا زمن الاديى بدون مقابل ده انتهى !! انا صوتى زمان كان هين ولين عشان كده يا ما بديهو يا بديهو لاى زول مره لانو امى مرغنيه بدى المراغنه ومره لانو ابوى انصارى بدى الانصار ومره لانو ما بريد الجبهجيه بديهم عشان يفوزو ويتفتنو زى اسى !!! ومره عشان بدور الاحمر بدى ناس اليسار !!

افليقا : اها والمره دى يا علوية حتدى منو ؟؟

علويه : المره دى هووى انا صوتى عزيييييييييييز وما بديهو الا للبيعزنى !! انت ما سمعت هجوره بت كباشى بتقول ما بنمشى لى ناس ما بجونا ولمن يمسكو يقعدو يعذبونا !! ؟؟

افليقا : يعنى الكلام ده يا علويه معناتو انتى عارفه البيعزك منو ؟؟ مش ؟؟

علويه : كيييييييييف وده كلامك ؟؟ انا اى حزب عارفاهو وحافظاهو صم واوريك ليهم واحد واحد ..

كان قلت اليسار شفت اليسار ده زى الحنه لو ما اتطبق وبقى اسود ما بكون سمح لكن احمر كده ما حلو مع الشعب ده .

وكان قلت الجبهجبة ديل مع انهم نظريا اكتر ناس ما بيعزونا لكن فى زمنم الشغل وارى ور شديد والحمد لله  وبذكرنى بالحنه برضو هم عاملين زى السبغه بتظبط الحنه لكن خطره على الشفع وعلى الجسم ذاتو ..

وكان قلت ناس سيدى المرغنى والله صلاتم سمحه وذكرم سمح علا طولو مننا لمن نسينا شكلم ذاتو وعاملين لى زى الحله النسوانا ما بتتحنن الا فى العرس ولمن يجو بيدفعو زى الكثير المنقطع  ..

وكان قلت ناس سيدى الصادق الله يعينم فى بيتم اول شيئ وربنا يعوضو عن حكومتو الجنه انشاء الله بيذكرونى بى نسوان الاهل جنهم حنه ملح ويقعدو يقولو ليك زمان لمن كنا بخيرنا كنا بنديكى حقك دبل !!..

وكان قلت لى ناس الحركه الشعبيه والسودان الجديد ديل غايتو كلامم سمح لكن مشاكلم كتير زى حنة يوم الوقفه زحمه ومشاكل !!..

افليقا : يعنى اسى يا علويه من الاخر كده حتدى صوتك لمنو ؟؟

علويه : ما قلت ليك يا ود ديهو للبيعزنى شنو يعنى ؟؟

افليقا : غايتو يا علويه ما فهمت البعزك ده منو لكن كونك تصوتى دى ظاهره حضارية وكونك تقيمى تدى صوتك لمنو دى برضو ظاهره كويسه لكن البعزك ده ابيتى تورينا ليهو ؟؟

كسره : اها يا جماعه انتو بتدو البعزكم برضو ولا ما عارفينو منو زى علويه ؟؟؟

 

Advertisements
تعليقات
  1. سماسم كتب:

    افليقا لك التحايا
    والله دا سؤال صعب لحدي ما نقرا كويس ونعرف نديهو لى منو يعني أدينا فرصة لحدى الأمتحانتات قصدي الإنتخابات ما تجي بعدين بنجاوب عليهو

  2. aflaiga كتب:

    سماسم : مرورك الراقى حبابو ..
    بس ركزى على البيعزك والزمن ما مشكله .. وقت يجى ..

  3. انتا البوديك لعلوية الحنانة شنو ؟؟؟

  4. حاج أحمد السلاوى كتب:

    ولدنا استرايكر ..ثرو الدينمو افليقا ..
    ياخ مشا يودى سمسمة للحنانة ..لقاها فرصة يخش فى شوية دردشة جانبية وشمارات عن الإمتحانات …اقصد الإنتخابات …
    بكرة تلقاهو قعد يدردش مع آسيا ست الشاى ..برضو عن الإنتخابات ..

  5. aflaiga كتب:

    ستريكر : علويه جارتنا الحنانه الما منانه الرايقه الفنانه الميهى تغيانه .. من اعز جاراتنا فى امبده قبل سمسمه .. لازم تحكها يعنى ؟؟ركز معانا فى الانتخابات علويه خليها ولا ده سؤال الجماعه ؟؟
    تعرف علويه دى انا بعرفا من زمن سمسمه ما بتتحنن ولحدى ما بقت تتجنن !!
    ابوى السلاوى : حمد الله بسلامتك ..
    تعرف المجتمع هو عباره عن شنو ؟؟ ومنو بيشكل فيهو الراى العام ؟؟
    علويه الحنانه – سعديه ست الشاى – ريماز بتاعة الاتصالات – عم حسن بتاع الكوارع – عمر سيد اللبن – ادم النقلتى – يحيى بتاع الدكان الفوراوى –
    يعنى ديل هم منظمات المجمتمع المدنى الحقيقى ولو ادوهم فرصه بتاعة استقرار اكيد حيكونو حكومة ظل كاربه جدا ولا شنو يا ركس ؟؟؟

  6. عباس ركس كتب:

    كلامك مظبوط يا ابو الافلاق الما ساكن الاشلاق ( قبل يومين كدي شايف لي نجر حايم ) .
    بعدين انت القال ليك منو ( علوية ما عارفاهو منو ؟ ) – عارفاهو زي جوع بطنها , وكلنا عارفين – بس المسألة مختلفة من شخص لآخر
    * واحد عاوز حقو في الحين والتو .
    * واحد بنظر ليها من حيث مصالحه الشخصية
    * واحد القصة عندو مبدأ وقضية .
    * واحد جبار خواطر – ما بحرج زول ومع الصندوق شختك بختك .
    * و .. و ..
    منو البيقدر يلم ديل كووولهم مع بعض وتوش القصر !!!!!

  7. aflaiga كتب:

    ركس يا واعى : كنت حاسى بانك قريب ومتابع لانو مواضيع زى دى عاوزه ليها ناس عميقا وغريقا .. القال ليك انت منو انا ما ساكن الاشلاق ؟؟ انا ود الاشلاق وبالحيل مشتاق كل الاشواق !! اها النجر اليومتا ده كان حايم فى بوست اسمو كافى البلا خش انجر ليك نجره نجرتين عبر بيهم عن نخاشيش احاسيس اعماق عماميق قلبك ..
    ونحنا عارفين انو علويه عارفه كلم الما عارفين عرفتا !!
    اها انت اسى عاوز ليك حسب كلامك ده واحد لامى ديل كلهم ؟؟ معقوله بس فى زول لامى كل ديل ( حقو اسى ناو – رضى كل الناس – نفسى نفسى – شريف عزيز !! ) بتجى ديل كلهم يتلمو فى فرد زول ؟؟؟
    هل اتى على الانسان حين من الدهر يدخل فيه الشعب القصر حاكما والحاكم خادما لشعبه ؟؟؟ الاجابه نو اتزنت !!

  8. عباس ركس كتب:

    افليقا ملك الاحاسيس :
    الاجابة : يس اتز نت ( ايوة كدة بس )
    راجع ارشيف البروف زماااان – الشعب كان حاكما والحاكم كبة الجرسة !!!!

  9. الأخ افليقا والزملاء لكم التحايا
    تعرف ياغالى بقولو فى جاه الملوك نلوك مما جابو سيرة الامتحانات بدو يضربو عيون المواطنين بوهية شئ رمى اعمدة وتوصيل اسلاك وشئ حفر آبار مياه وحاجات تانية زى تغيير لعب الشطرنج من اماكنها وانا مبسوط جدا لانهم عرفوا أخيرا انو الناس الغلابة ديل ممكن يأثرو عليهم وفيهم مع العلم أن نتيجة الانتخابات قد اعلنها (الود الشقى) نافع من قبل …. كنت اتمنى أن اجد برنامجا مغريا لأحدد وجهة صوتى لكن للأسف الحال من بعضه وعليه سنرى من ابلغ حديثا ليستأثر بنعمة اصواتنا التى لا تسمع …

  10. aflaiga كتب:

    التركى الواعى : عليك الله مش نعمه انو المواطن اصبح طرف فى معادلة الحكم والله دى نعمه مفروض نصلى ليها شكرا لله – تعرف من اهم فوائد المنافسه انو الشعب حيلقى تخفيضات وعروض مغريه … مش قلت ليك صوتك عزيز اديهو للبيعزك ..

  11. نيام كتب:

    صوتك حديث بكرة
    عناوين الصحف تتري
    باسمك نكتب التاريخ و للذكري
    اقول ليك انحت الاحرف علي اسمك ولو نكرة
    عشان ما انت صاحب الحق و الفكرة
    انقش اسمك المسكين و بالسكين في وجه الجوع
    و مافي خنوع
    خنوعك ضيع اولادك
    وصنف كل حسبوني من اسيادك

  12. ود المهدى كتب:

    سلام يا عبدو
    بس قول زي ما قال ود شريف ايام زمان الله يرجعها لينا تاني
    يا محمد احمد همتك
    صوتك امانة في زمتك
    ما تخلي سادن قمتك

    وانا افول ليك
    التسوي كريت في الاصوات تلقاه بعد الانتخابات
    والزول القاصدو التركي ده معناهو عاوز حكومة مشكلة من جميع الوا الطيف السياسي وكل لون يراقب لون والشعب يراقب قوس قزح ولو في لون بهت الشعب يضربة من نفس اللون وكدة الموضوع ممكن يمش لي قدام . ولا شنو؟

  13. ياسين شمباتى كتب:

    افليقا..سلام..

    النصيحة البعزنا لسه ما لاقينو,,لكن الما بعزنا عارفنو!! اييييييي..ودا ما بنديهو صوت تب..وما دايرين كلام (الجن البتعرفو) الغطس حجرنا داك..ويلا نفتش مع بعض,,والبلقى(عزيز وبعزو) يكلم اخوانو..اتفقنا ؟؟؟

    استرايكر..احييك على الاسئلة الواعية….سلام..

  14. حاج أحمد السلاوى كتب:

    ولدنا شمباتى ..
    حمداً لله على السلامة ..بركة الشفت الشمس من جديد .. الناس كوووولها كانت تسأل عليك ..

  15. aflaiga كتب:

    شمباتى : البعزك والبعزنا واحد والما عزاك ما عزانا ولا عفا الله عما سلف ميه ميه … بس لو شايف ليك خيارات كويسه كدى ورينا ولا فى الحلقه الاخيره ؟؟ بالنسبه للمشى لعلوية بكره بجى الهريف واللوارى بتقيف وتمشى لى علويه الدايه ذاتو مش الحنانه ..

  16. الزهراء كتب:

    شمباتي: حمد الله على السلامه والمدونه نورت

    المابعزنا ما حنعزو ولا بنديهو صوتنا ولو فتشنا ما حنلقى جانب مريح وكان قلنا دايرين العصير مشكل مستحيل والبعزونا بنقول ليهم شتتو السكر حتلقونا

    افليقا ما تتحسس اصلا استرايكر ده بيفك القمبله ويلبد وشمباتي لقاها جاهزه وشاااااات طوالي

    استرايكر شكيت محنك يا ولدي

  17. ياسين شمباتى كتب:

    الوالد السلاوى..الله يسلمك ويسال منهم الخير..تلفونك مقفووووووول..

    افليقا…بالضبط كدة,,فى الحلقة الاخيرة..بعدين هى علوية الداية دى يمشوا ليها كم مرة؟؟ كفى الناس المشوا وعرفوا الحقيقة المرة وعرفوا العمايل البى تحت تحت..

    الزهراء..نور الله عليك فى الدارين…وربنا يجمعنا على الخير وفى الخير..

  18. الزهراء كتب:

    شمباتي:
    الحنانه والدايه خلوهم ما دايرين تمشوا الغسال
    ما غسال الهدوم! بتاع القروش

  19. ياسين شمباتى كتب:

    والله يابتى ما عارفين دربو بس!!!!

  20. aflaiga كتب:

    فى قراءة متقدمة من شخصنا الضعيف كتبنا هذا المقال قبل فتره متنبئين بحال الانتخابات .
    واليوم ننشط الموضوع والانتخابات تدخل مرحلة الدعاية قبل ان تطلع دعاية ساكت والخص الموضوع فى كم سؤال :
    هل تتوقع فوز البيعزك ؟؟؟
    ما هى السيناريوهات المتوقعه لتحالفات الانتخابات ؟؟؟
    هل تحلم بان يخرج الشعب فى ذات صباح ربيعى وهو فى ابهى حلته ويصوت بسلام ويعود فى المساء ليستمع فى نشر العاشرة لعمر الجزلى وهو يعلن فوز البيعزك وتنهال التهانى والتبريكات على الفائز فى جو من الالفه والمحبه ؟؟؟
    من يا ترى هو من يتحسب لاحداث فوضى فى الانتخابات ؟؟؟
    هل تتوقع تدخل قوات الامم المتحده بموجب الفصل الكم ما عارف لكبح جماح اى تفلت من اى طرف ؟؟
    هل تتوقع ان يحصل بيع فى وسط الوطنى يا داك باع ديل يا ديل باعو ده ؟؟؟

  21. زووووووول كتب:

    افليقا سلااام
    قبل فتره قصيره جدا ابان غيابكم بدواعى الاصابه دارت مناظرات بين اصدقاء سوداننا بعد نشر ابكرون لمقال رائع يخاطب صاحبه: الرئيس عمر البشير وينبهه على مواطن القصور فى اداء حكومته فتناولناه تعليقا لكن اصحابك شمباتى ومخير والسلاوى وسنكل واب احمد والتركى لموا ليكا فى الزووول جدع جد فكلنا كان يغنى على ليلاه كما غنينا بالامس فى ذلك الموقع السياحى الفخم . احم احم انت ما بتقصر وود الزبير ما بفسر . المهم وما اطول عليك رايت ان انقل بعضا من تعليقاتى ودفاعى عن افضل السيئين فى سباق الرئاسه السودانيه واعنى المواطن !!(اول مره اعرف انو مواطن ) عمر ود حسن ود احمد ود البشير فالى هناك :
    ابكرون والتركى
    موضوع انتخابى جميل صدق صاحبه فيما يلى امر الصحه التى باتت تجارة رائجه وكانت قبلها متاحه لكل خلق الله مجانا
    اما التعليم فلا تزال المدارس الحكوميه تقوم بواجباتها . لكن قضية المدارس الخاصه اصبحت مثل الموضه كما ان المقارنه بين عمر
    بن الخطاب وعمر البشير تبدو معدومه تماما اذ لا يوجد وجه شبه لا فى العداله ولا فى الاهتمام بامر الشعب ولا فى التواضع
    بل اننا نظلم اعدل من حكم منذ فجر الاسلام ان ادخلناه فى مقارنه مع عمر البشيرونتمنى ان تسير الدعايات الانتخابيه بمثل هذه
    المقالات وبعيدا عن اسلوب الفانوس حرق القطيه والمكرفون صن اضان الشدره!! وغيرها من دعايات العصر الحجرى فى 1986م
    اقول قولى هذا ولا اجد حرجا فى التصويت لعمر البشير عندما اقارنه مع عرمان ونيال والمهدى وكامل وفاطمه عبد المحمود ولا
    شنوووووووووووووووووووووووووووووو يا ابكرووون ويا مخيروالتركى ؟؟
    واضيف : ويا افليقا زاتوووووووووووو

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s