بتفاءل بيك يا انتا ..

Posted: الثلاثاء,13 أكتوبر, 2009 by aflaiga in اخرى

قبل فتره من الزمان كان عندى محل اتصالات وفيهو زول شغال معاى وكان فى بت من الحله بتجى تضرب طوالى عاوزه تكلم واحد اسمو علاء !! وكلما الزول الشغال معاى يضرب ليها ما بتلقى علاء – قام يوم لقتنى انا قاعد فى الكاونتر وطلبت مكالمة لتلفون علاء :


هى : الو وووو – علااااء ؟؟ ما معقوووول !!
علاء : ايوا اهلا مشتاقين وين انتى يا كعبه ما بتتصلى مالك ؟؟
هى : والله تقول شنو كلما اضرب ليك ما اتوفق  الم فيك غايتو جنس عوارض !! الليله الحمد لله اتوفقت وتوجهت نجوى مخاطبة ( اللاااه عسل انتا اتخيل لميت فيهو ؟؟ ) .. !!

اها بكريتو  جات تضرب لقتنى انا والزول الشغال معاى قاعدين بره خشت الدكان تتصل قام زولى المعاى خش وراها عشان يعمل ليها المكامله قامت جات مارقه بره قالت لى :
هى : عليك الله يا انتا تعال اضرب لى انا بتفاءل بيك كلما تكون فى وتتصل لى  بلقى علاااااء ..
قام اخوك ابدا ما خذلا وضرب ليها التلفون قامت فى نهاية المكالمه قالت لى علاء :
هى : علاااء عليك الله هاك اشكر هناى ده .
علاء : هناى منو ؟؟
هى : هناى ياخى الود القلت ليك بتفاءل بيهو ..هاك كلمو
علاء : ازيك يا استاذ .
افليقا : مرحب بيك وعليكم السلام .
علاء : ياخى مشكور والله هنايه دى بتشكر فيك طوالى وما عارفين نجازيك كيف ؟؟
افليقا : ياخى ولا يهمك عادى نحنا اصلا فى الخدمه والمحل مفتوح للناس كلها ولى خدمتم ..

علاء : لالا ياخى ما تتواضع ساكت حقيقى انتا مبروك !! انا هنايه دى ما لامى فيها لى زمن .

افليقا : ياخى حمد الله على السلامه وربنا ما يفرقكم تانى ..

علاء : مش قلت ليك انت زول راقى عليك الله ادينى تلفونك !!!!

Advertisements
تعليقات
  1. الزهراء كتب:

    أفليقا: طوالي كان تدخل في دور بتاع فكي وبركااتك يا شيخ افليقا كان جابت ليك جكاسي الحله كلهن

    ويا بخت من لم كل علاء بي هنايه البتفتش فيهو

  2. aflaiga كتب:

    الزهراء : يا متابعه ..
    بالله لقيتنى كيف فى لم الشمل مش ختير ؟؟ ده طبعا قبل ما تتفاءل بى سمسمه !!
    اتخيلى الود والبت جادين شديد ما اضل الا يعملو لى شهادة تقدير ووشاح .. طبعا هناية بتكون كلمت الهنايات كلهم انو لا بديل لاتصالات افليقا واسال المجرب !!!
    طبعا دى ما المشكله الكبيره المشكله الكبيره يا مشاكل انو علاء برضو يكون كلم !!!

  3. aflaiga كتب:

    الغريبه الود الكان شغال معاى لقاها فرصه كلما تجى بت تضرب يقول لى اخش انا ؟؟ ولا بتتفاءل بيك ؟؟لحدى ما رفدتو بسبب شمار التفاؤل مشى فتح محل سماهو التفاؤل للاتصالات …

  4. حاج أحمد السلاوى كتب:

    الدينمو .. افليقا ..صاحب “س” العرس القرمبوزة ..
    كالعادة عندى سؤال سغيرووووونى كدا .. هناية دى كانت قرمبوزة ..ولاّ كرمبوزة .. ؟
    إنت اضرب لى وانا اضرب ليك..
    إتفاءل بى .. وأتفاءل بيك..
    التفاؤل دا ما خشم بيوت ..يعنى ممكن نتفاءل بيك إنو السودان دا ممكن يتصلح… بعد كدا !!
    طيب ياخ ما تمشى تمسك الكهرباء ..ولاّ الكورة ..ولاّ ..أى حاجة عشان تتصلح .. يا قدم الخير ..
    غايتو بختك .. يا سمسمة

  5. الزهراء كتب:

    افليقا: لقيتك ختري في لم الشمل
    لكن كان ترفع سعرك زياده وتشتت السكر وتعلق يافطه ( افليقا للاتصالات وتجيك السيره بالحافلات)

    ودا بيزنس رهيب طبعا وبعداك تستعين بي سمسمه في الحنه ( حنه عن سمسمه وحياتك حتكون مسمسمه)

    وممكن تستعين بي النا طبعا حريفه في تزيين الشيله وعربات الزفاف ودي ممكن تكون خدمات ما بعد البيع قصدي ما بعد لم الشمل
    ولا رايكم شنو؟

  6. وعقبال هناى وهناية.
    ولا شنو يا شمباتى ( ربنا يمرقك من حفرتك دى ياخى – فاقدنك الايام – ده رافع لينا القزاز وداك عامل فيها مدير كبير وشنو مابعرف داك – غايتو وجنس غايتو )

  7. سؤال سغيروني كدا

    علاء : ايوا اهلا مشتاقين وين انتى يا كعبه ما بتتصلى مالك ؟؟

    دي سمعتها كيف يا أبو الأفلاق… البت كانت فاتحة الاسبيكر و الا كنت ماسك ليها السماعة..؟؟

  8. حنين كتب:

    أفليقا ياختير والجماعة الشغالين مساء .
    سلامات .
    إنت ياأفليقا أى زول عندو إتصالات بيتصنت على مكالمات الجكس بتلفون الكاونتر.مالك ياخ…

  9. حنين كتب:

    عزت يا أبو الخواطر .
    كيف حالك والله مشتاقين

  10. الزهراء كتب:

    يا اخوانا افليقا دا ما تحكوها معاه للدرجه دي وبعدين افليقا ده شغال في شركة اتصالات ما جربندي ساكت اكيد عندو مهاراتو الخاصه

    المهم نشوف الهنايه السعيده قصدي النهايه السعيده

    الله يجيبك يا شمباتي لي استرايكر شكلو عندو ليك شمارات تقيله

    د/عزت : منور والله يا حاج مالك طولت من الكتابه نحن في انتظار الجديد

  11. ألفاتح جبرا كتب:

    وأنا من زماااان أقول الود أفلايقا ده … وشو صباح خير … وشو صباح خير !!

  12. نيام كتب:

    افليقا:
    ما عشان كده يا هناي انا شلت تلفونك..تصدق بنتفآل بيك .. ياخ انت مبروك خلاص ..ياخ ما تشتغل وزير للكهرباء يا هناي عشان تكون هناي حق الكهرباء..

  13. aflaiga كتب:

    الحلوين كلهم : البوست حقيقة يشير الى حاله اخرى يمكن تلخيصها فى اعتياد العيب وتلاشى الحواجز فى المجتمع وما صار اليه حال شبابنا من تفلت ثورة الاتصالات التى عمت البلاد لم يصحبها ثقافة توضح الاستغلال الامثل وفى سودانيز اون لاين كان هناك موضوع قبل ايام يتحدث عن احدى الشركات فتحت بابا للفتن عبر الاتصالات المجانيه ليلا وغرف الشات فى الهاتف لكن نعود ونقول ان التقنيه سلاح ذو حدين ولا شنو يا جماعه .
    حنين : الحوار افتراضى يعنى افليقا لا سمع كلام علاء ولا حاجه الخصوصيات متوفره فى مراكز الاتصالات الا لمن اراد العكس ..

  14. ود المهدى كتب:

    يا عبدو لمن كنت في محل الاتصالات كان بتفاء ل بيك علاء وهناية بس – والان بقيت في سوداتل يعني السودان كله متفاءل بيك وكل التلفونات رابطة الحبايب وعشان كدة البلد دي كلها في حالة ربط شديد – وانا اقول شركات الهاتف بقت تخفض في اسعار المكالمات بالليل مالا – اتاري متفاءليين بيك يا انتا
    خلاس نخلي ناس الكهرباء يستلفوك شوية وتبقي متعهد الحكومة

  15. aflaiga كتب:

    مهدى : اسى لو جبتونا معاكم فى ال un مش ممكن نحل ليكم كم مشكله عالمية متعلقه بالتفاؤل وهو انت قايل اوباما ادوهو الجائزه ليه ما عشان اتفاءلو بيهو !! الكهرباء دى كمان يصلحوها كيف يا مهدى ؟؟ يعنى نقطعا ونخلى الاتصال مجانى بالليل ( يعنى ضلمه وحنك مجان ) ده ما هناى عديل كده !!!

  16. فأل الخير افليقا : تعرف دايما بتلقى فى المواصلات عشرات من عينة علاء وآلاء ولا هى اسمها شنو قلت لى … الظاهرة دى بقت زى المقصودة مماتركب المواصلات تبدأ التلفونات ترن والضحكات تعلو ومرات ضرب مواعيد وكلام مبتذل (فى نظرى) … وسؤالى ليك : انت شمباتى وسهيل ديل ما جبتهم الدكان يتصلو لييييه.

  17. aflaiga كتب:

    التركى : حباب وعيك – ده المقصود نقاشو من البوست كلو ..
    تعرف فى المواصلات دى فى هركات اجيبه !! يعنى مثلا كنبة ورا هى كنبة العشاق والحبّيبه – اما ما نسمعه ونحنا راكبين او ماشين فى الشارع فده كوم براهو – تتخيل فى واحده مره فى الموصلات ما فضل ليها الا ترقد فى الكرسى اثناء ما هى بتتكلم مع زولا – القصه دى لو استمرت كده حنشوف كراسى خاصه بالعشاق مفصوله فيها تكييف وشاحن عشان البطاريات وحفرة وحمام كمان !!
    بالنسبه لسهيل وشمباتى لقونا قفلنا الدكان بس لكن لو لمينا فيهم زمان كان عرسنا ليهم انشاء الله ست الشاى القدام الدكان !! لكن برضو لابدين ليهم ومدينهم فترة سماح تنتهى بنقوم عليهم ولو اتجرسو معناتا فى مشكله فى الهارد وير ..

  18. ياسين شمباتى كتب:

    افليقا يا لذيذ.سلام..والله دى قصة عجيبة!! انا من كترة الضحك جانى شد عضلى فى عضلات بطنى..لكن انت خايف من (علاء) مالك!!؟؟ ما تديهو رقمك,,والله الايام دى سوقك واااااارى..وخلى (هناى) يدينا رايو فى النقطة دى..

    استرايكر..والله الشوق اكتر,,وما رفع قزاز لكن الظروف الانت عارفها..طالعنى بهناك..

  19. ياسين شمباتى كتب:

    التركى..مديدة حاااااااارة..اسه فى داعى؟؟بعدين مية مرة قلت ليكم ما تختونى مع سهيل فى (قالب) واحد,,فى فرق كبير فى (السرعات) وكدة..باقى لى شوية..

    افليقا..افقدوا زولكم دا…

    سهيل..اصبر بس..

  20. الزهراء كتب:

    عارف يا افليقا انا من اول القصه شكيت انو علاء ذاااتو يكون زايغ من هنايه دي
    وقمت انت يالشفت جريت سبحتك ولميت ليها فيه وكرفستو في الموضوع

    اكيد طلب رقم تلفونك عشان داير يحنسك تفك اسرو زي ما ورطتو

    اخونا التركي:
    ذكرتني بي قصة القرمبوزه القاعده تتكلم في التلفون في المواصلات ومنسدحه ومنشرحه ومنبرشه للآآآآآآآآآآآآآآخر
    الحافله وقفت والزول الجنبها نزل وجا عمك كبيير بارم شنباتو قعد جنبها
    القرمبوزه: معليش يا عمو زح عل كرسيك شويه
    عمك اب شنب: يا بتي انا قاعد في محلى ما جيت عليك
    القرمبوزه: معليش يا عصام دا راجل كده مضايقني في كرسي بتاعي
    عمك اب شنب: يا بت الناس انا ضايقتك متين خلى عندك احترام انت وشنطتك المضايقني
    القرمبوزه: خليك منو يا عصومي اها قلت لي نتلاقا وين؟ انت واحشني شديد
    عمك اب شنب: استغفر الله العظيم
    القرمبوزه: ياعمو ما تروق انا ما قدر بناتك احترم نفسك شوييه :آي يا عصام هسي لو كنت معاي اقلاها كان ضربت الراجل المضايقني ده

    عمك عاين للبت مساافه لقا الوش لون واليد لون والحاله بالبلا
    وما كان منو الا ان يهب واقف ويقول

    (امشي يابت والله الطشك كف اخلي كل كريم يرجع علبتو)

    محن اخر الزمن اها في داعي للبشتنه دي بسبب مكالمه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s