شالو مكاوى يااخوانا

Posted: الثلاثاء,13 أكتوبر, 2009 by استرايكر in اخرى

أصدرت رئاسة الجمهورية في السودان اليوم قراراً بإقالة المدير العام للهيئة القومية للكهرباء المهندس مكاوي محمد عوض، وجاء القرار إثر الانهيار المتكرر للشبكة، بعد دخول كهرباء سد مروي الذي اكتمل مارس الماضي.

Advertisements
تعليقات
  1. حاج أحمد السلاوى كتب:

    ولدنا استرايكر ..
    يعنى حىسه خلاس مشكلة الكهرباء أنحلت ..وما قطوعات تاااااانى ..؟
    والجماعة ديل عينهم للفيل يطعنوا فى ضلو ..ليس هذا دفاعاً عن السيد الباشمهندس مكاوى الذى لا أعرفه وليس لى به أى صلة ..إنما يجب عليهم حلحلة مسالة تضارب المصالح بين جماعة السد والشركة القومية للكهرباء ..اللى كل واحد يدعى أحقيته بتوزيع الكهرباء وبيعها ..
    على أى حال الخطوة دى فى حد زااااته خطوة متقدمة فى تفعيل سياسة الثواب والعقاب اللى كنا ننادى بيها منذ أمد بعيد ..عشان كل واحد فى موقعه ( العمل العام ) يعرف إنو فى رقابة عليهو ولازم يقوم بشغلو على أكمل وجه .. وإلا …….
    بس أرجو وأتمنى الآ يكون الرجل راح شمار فى مرقة ضحية تصفية حسابات بين جماعة السد وشركة الكهرباء ..اصلو إتعودنا على الإقطاعيات ..البترول .. الكهرباء ..الزراعة ..الإستثمار الخارجى ..وهلمجرا ..,كل واحد قاعد يكبِّر فى كومه ..
    نسأل الله أن يلطف بالسودان وأهل السودان ويجنبهم المصايب ما ظهر منها وما بطن …
    وخلونا نشوف آخرتا شنو مع السد السد والرد الرد .
    وكل سد وأنتم بخير … ولنا عودة ولو بعد حين ..بس ترجع الكهرباء .

  2. عمنا السلاوى
    الزوول اتشال من موقعه ليس لمشاكل فى الكهرباء او قطوعاتها المتكررة – لكن وكما زكرت هو عبارة عن تصفيات – وتخدير للمواطن المسكين والانتخابات على الابواب – واهو كلو بتمنو – مجالس المدينة ببتكلم عن خلافه مع اسامة بتاع السودود واسامة مركب مكنة وزير فى شكل مدير ونفوذه بتصاعد كل يوم.

    ————————

    لكن بينى وبينك – انا جد مبسوط من قرار الاقالة – ياخى الزوول ده انا بقيت ما بطيقو نهوائاين .

  3. بداية أزمة
    =========
    وبدأت ملاسنات أخيراً عندما اتهم مدير وحدة السدود أسامة عبدالله هيئة الكهرباء بعدم استغلال 42% من الكهرباء المنتجة من سد مروي، محملاً إدارة التحكم في الهيئة بالفشل في استغلال الكهرباء، وهو ما رد عليه وزير الطاقة الزبير أحمد الحسن بأن إدارة الكهرباء التابعة له استغلت جميع كهرباء السد، وعزا انهيار الشبكة الى عمليات التشغيل التجريبي التي تجريها إدارة السد لعدم المواءمة الفنية مع الشبكة القومية.

  4. ومن المقرر أن يمثل وزير الطاقة والتعدين أمام البرلمان للإجابة على أسئلة النواب بشأن الانهيار المتكرر لشبكة الكهرباء أخيراً.
    يذكر أن المهندس مكاوي محمد عوض تدرج في العمل بالهيئة القومية للكهرباء حتى تولى منصب المدير العام لمدة عشرة أعوام

  5. الاخ استراكير والزملاء صباحكم خير زى الخبر دا … طبعا لازم يشيلو مكاوى ومال هو قايلا لعبة امس يعلنو قطوعات كهربة وماينفذو يعنى دا كلام دا ياناس …. لكن برضو ح يرقوهو لموقع ارفع واكثر حساسية لانو لو قعد كدة ح يغير تصريحاته زى ماعمل الكودة قبل كدة .

  6. aflaiga كتب:

    ستريكر : تعرف ذكرتنى شنو ؟؟ رفع المصاحف على اسنة الرماح وجاء هذا واقال صاحبه وجاء ذاك ونصب صاحبه !!! فهمتو حاجه ؟؟

  7. التلب كتب:

    تعرف يا أفليقا أنا كلام أخونا إسترايكر ده ذكرنى المسلسل السورى الجوارح و البطل بتاعو أسامة بن الوهاج (أيمن زيدان) عشان كده حقو الناس تطلع الشارع بعد القرار ده و تهتف بصوت واحد (أسااامة .. أسااامة .. أسااامة)
    بعدين يا إسترايكر أنا برضو زيك مبسوط لقرار الإقالة لأنو الراجل ده لو خلوه 100 سنة ما حيستقيل!!

  8. سهيل كتب:

    كدي البدو شويه .. يمكن نسمع في نشرة الرابعه عصرآ قرار آخر بتعيينه وزيرأ أو مشتشارأ و احد كبار مساعدي رئيس الجمهوريه …

    كدي اصبرو

  9. الزهراء كتب:

    يا أسترايكر
    شايفاك بتكره الراجل ده لي درجة انك مكجنو عديييل

    حقيقه الرجل كان عندو فرصه يبدع في منصبو ده لان الطاقه الكهربائيه الموجوده والغير مستغله ما هينه والوسائل كانت متاحه
    فقط كان لا بد من اتباع استراتيجيه محكمه في طريقة التحكم في المحطات

    الرجل لم يبخل على مهندسيه بفرص التدريب والتأهيل وسنويا كان يقوم بارسال مجموعه معتبره من المهندسين لكوريا ولندن وغيرها للكورسات التأهيليه
    ولكن السؤال(ماذا استفاد المواطن المسكين من هذا؟ ما الحال في حالو)

    بالاضافه الى ذلك فالهيئه لديها نظام تحكم عن بعد للمحطات عبر الاقمار الصناعيه

    يعني ماعندهم أي عذر للقطوعات الطلعت عيننا دي
    خاصة انو المواطن بيدفع مقدما يعني لا ديون ولا فواتير متأخره زي زمان

    لكن نرجع ونقول لعبة السياسه ليها دور كبير في كل هذه التشكيلات الوزاريه والاداريه

    الله لينا نحنا

  10. سهيل كتب:

    بمناسبة المهندسين البيطلعوهم كورسات بره دي : الناس ديل بيطلعو بس ناسهم عشان يجو راجعين من الفسحه للمكاتب الفاخره و الوظائف العليا .. يعني ما للتدريب العام و الفائده .. و إنتو بس يطلعو عينكم

  11. الزهراء كتب:

    اكيد السفريات الخارجيه ذاااتا فيها محسوبيات

    هو تعيينهم ذااتو فيه كلام خلى سفرهم

    عموما اغلبيتهم مستواهم كويس جدا من ناحيه علميه وكده

    وادخلوا وسائل جديده للمراقبه والتحكم ………… فقط المصالح الشخصيه بتخلي اي حاجه تتجه عكس اجتياجاتت المواطن

  12. ود المهدى كتب:

    توقعوا ان يظهر علينا في الايام القادمة في منصب اخر ارفع واخطر والا تبقي هذه بداية النهاية للنظام ولا يكون دا من امور الثعلب.

  13. علمت (آخر لحظة) أن قراراً قد صدر في وقت متأخر من مساء أمس الأول بإعفاء المهندس مكاوي محمد عوض من موقعه مديراً للهيئة القوميّة للكهرباء، على خلفيّة الصراعات والخلافات القائمة بين الهيئة وإدارة السدود التي يديرها الوزير أسامة محمد عبد الله.
    وأفادت متابعات الصحيفة أن قياديّاً بارزاً بالمؤتمر الوطني سجّل زيارة للمهندس مكاوي في منزله ليلة صدور القرار وأبلغه بفحواه، وقد استقبل المهندس مكاوي القرار بروح رياضيّة وقدم قائمة تضم أسماء ثلاثة من المهندسين المؤهلين رشحهم لاختيار واحد منهم بديلاً له في موقع المدير العام.
    وحاولت (آخر لحظة) أمس رصد أي ردود أفعال للقرار الذي لم يكن قد أُعلن بصورة رسميّة، إلا أن المهندس مكاوي ظل يعمل بصورة اعتياديّة، بل اجتمع بقيادي ودستوري كبير يوم أمس، تكهنت بعض المصادر بأن يكون القرار هو الموضوع الذي تمّت مناقشته، مشيرة إلى أنه ربما كانت هناك محاولة للإبقاء على المهندس مكاوي في موقعه إلى حين اختيار بديلاً له، رغم تمسك مكاوي بتنفيذ القرار وإشارته إلى أنه سبق أن تقدم باستقالة مكتوبة من موقعه في السابع من أغسطس الماضي.
    وكشفت متابعات(آخر لحظة) عن أن بيان الهيئة القوميّة للكهرباء الأخير حول قطوعات مرتقبة لإجراء صيانات فنيّة في وحدات انتاج الكهرباء المنتجة من سد مروي اعتباراً من منتصف ليل الأحد «أمس الأول» كان هو السبب في هذه التطوُّرات المثيرة، إذ قامت شركة (لامير) الألمانية بإرسال رسالة بريد الكتروني (ايميل) لمدير الهيئة القوميّة للكهرباء أبلغته من خلاله بأنّها ستقوم بإغلاق تام للإمداد في الأوقات المحدّدة، الأمر الذي دعا مدير الهيئة الى استنفار المهندسين واستدعائهم ليكوِّنوا حالة (تواجد اداري) ومن ثم أصدر بياناً بذات المعلومات، الأمر الذي لم تقبله جهات أخرى لم تسمِّها مصادر (آخر لحظة) التي أشارت إلى أن إدارة السدود لم تتسلم حتى الآن سد مروي من المقاول المنفذ للمشروع، مضيفة أن (التسليم والتسلم) لن يتم دون أن يحدث الإطفاء التام الذي لابد أن يتم رغم محاولة جهات ما لإفشال بيان الهيئة بعدم الإطفاء وتكذيبه باستمرار التوليد. وتشير متابعات (آخر لحظة) وسط دوائر الكهرباء والطاقة إلى أن الصراعات المكتومة ربما قادت خلال اليومين القادمين الى استقالة وزير الطاقة الأستاذ الزبير أحمد حسن الذي كان وزيراً للماليّة خلال فترة بناء وتشييد سد مروي.

  14. الحبيب استرايكر : تفتكر الزبير ح يستقيل غايتو الا كن اختلف مع اسامة وحسب مصدر موثوق انه اسامة دا اقوى رمز السيادة ذاتو يشيل الكل وهو متربع على كرسية … ويبقى المواطن هو الخسران اولا واخيرا … اللهم نجنا من الأسامين (أسامة عبدالله وأسامة التعاون) …. وفيك يامروى أسباب أزايا

  15. نيام كتب:

    التركي:
    فيك يامروي شفنا كل جديد
    استرايكر:
    هسع نلقا لينا زول نمزمزو وين لمان كهربتنا تقطع..

  16. سهيل كتب:

    ياتركي .. كلو هين إلا أسامه بتاعنا .. ربنا يقويهو و يزيدو

  17. نيام كتب:

    سهيل:
    بالغت فووووكا…4:26 وكأنا علي موعد
    امسك الخشب

  18. سهيل كتب:

    أووووووووووووووو عمنا .. وين إنت .. اها رايك شنو

  19. aflaiga كتب:

    الجماعه : انتو اقعدو لى فى صلاح بتاعنا – واسامه بتاعنا – وعلى بتاعنا .. اووووو هوا .. لمن ما تلقو بتاعكم ذاتو !!! هييييع ..

  20. aflaiga كتب:

    وزى ما قال الشاعر : وحده منى ووحده منك والتانيه منى والثالثه منك – الله يكفينا شر التالته الثابته … وقع ليكم ولا اعمل نايم ؟؟

  21. الزهراء كتب:

    يا اخوانا من زمان مشاكل الكهرباء دي موجوده يعني كذبة ابريل بتاعة اول امس دي هي القشه التي قصمت ظهر البعير؟
    وخلت الجماعه يستغنوا عن مكاوي؟

    عفيت منك يا اسامه عبد الله

    الغريبه انا متفائله بي اسامه دا جدا

    اما اسامه التعاون يا التركي الله ينجينا من مواسيرو

  22. حنين كتب:

    أسترايكر والسمار .
    سلامات .
    والله ياجماعة خبر جميل وتحس إنو فى ناس بتحاسب ناس وعموما طفح الكيل بين ناس الكهربا وناس السد وبقت الوكادات والحفر ظاهر للجميع والمتضرر الوحيد هو المواطن وفى النهاية أسامة بلع عمك مكاوى .
    من خلال معلوماتنا المتواضعة عرفنا إنو السد أدخل تكنلوجيا حديثة فى مجال مراقبة الشبكات والوصول السريع للاعطال والكنترول وبداية المشكلة على ماأظن إنو ناس الكهربا بعتو مهندسين للسد للتأهيل والتدريب على الآليات الحديثة ولمن فترتم إنتهت رفضت إدارة السد بأرجاعهم بعدة حجج منها أنهم بمعرفتهم هذة لا يمكن للهيئة أن تستفيد منهم لأن الكهربا لا تملك المعدات المتطورة التى تم تدريب المهندسين عليها للأستفادة من خبراتهم .
    لنا عودة…

  23. الاخوة الاحباب السلام عليكم
    حنين : (السد أدخل تكنلوجيا حديثة فى مجال مراقبة الشبكات والوصول السريع للاعطال والكنترول) تعرف ياحبيب لو توقعاتك دى صحيحة تكون كارثة …. ياربى هو السد دا أنشأوه سنة كم عشان يحدثوهو ؟ عليك الله لو فى محاسبة مش يحاسبو القايم بيهو …. الناس دى قبل انشاء السد ماكانو عارفين انو بنيتهم التحتية مابتستوعب الكهرباء دى ؟ يعنى دربو الناس على طائرات ايرباص وهم عندهم سيسنا ودى سى ناين مش ؟ نعم العقل والتخطيط ….

    محبى أسامة التانى : صرح وزير البنية التحتيةباستخدام كل من ثبت أنه ماسورة فى تفادى غدر الخريف القادم فلا داعى للقلق وأهو عندنا كم مستورد ممكن نحسن بيهم مجارينا .

  24. ياسين شمباتى كتب:

    الحمدلله..قولوا واحد..

    لكن دا ان اثبت شئ فهو يثبت انو الصراع داخل اروقة المؤتمر الوطنى ومراكز القيادة اصبح عنيف جدا..وزماااااان قلت ليكم انو اسامة دا ح يكسب لانو من المقربين من الرئيس,,وكمان يعتر من (اولاد) قوش والاستاذ على عثمان…وما افتكر انو اقالتو عشان تقصير او تلميع من اجل الانتخابات..

    والساقية لسه مدورة…..

  25. زووووووول كتب:

    سترايكر وجميع السمار سلااااام
    لا ارى مبررا للتهليل لاقالة مكاوى بجة كراهيته علما باننى لا اعرفه ولم التقيه حتى يوم الناس هذا لكنه و يشهد له الجميع وتشهد له مكاتب هيئته . نقل الرجل الهيئه القوميه للكهرباء من هيئة رديئه وجيعانه الى اعظم مؤسسه فى البلد ونقل موظفيها ومهندسيها من افقر طبقات البلد الى افضلها . بعث منسوبيه للتدريب بخارج السودان وداخله وهو من القلائل الذين يهتمون بالتخطيط الاستراتيجى وقد حدثونى بان هيئته تملك خطة استراتيجيه لعشرة اعوام قادمه وهذا ما تفتقر اليه الهيئات التى صارعته واطاحت به .
    احسب ان القطوعات التى شهدتها البلاد خلال الفتره الماضيه ستختفى الى الابد بعد ان ذهب مكاوى الى داره مقالا من الرئيس ذلك لان القطوعات اتت اكلها . وارجو ان يراقب الجميع معى هذا الامر .
    كان مكاوى على حق حينما وقف كالجبل فى مواجهة ادارة السدود وكان منطقه سليما جدا ولا غبار عليه فالهيئه القوميه للكهرباء هى الجهه الوحيده فى البلد التى تؤول اليها مسؤلية توزيع الكهرباء سواء كانت من الروصيرص او من محطة محمود شريف لكن يبدو ان كهرباء امبراطورية السدود كهرباء خمسه نجوم لا يسمح بالاقتراب منها .
    كان على ادارة السدود ان تنهى دورها فى موضوع الكهرباء بمجرد دخول التوربينات الى الشبكه وان تترك امر سداد القروض لوزارة الماليه الاتحاديه .
    كسره : سنندم كثيرا حكومة وشعبا على ذهاب الباشمهندس مكاوى محمد عوض عن ادارة الكهرباء حد يراهن ؟.

  26. حاج أحمد السلاوى كتب:

    أخى الزووووووول ..
    كلامك دا يوحى بوجود إقطاعيات داخل الدولة الواحدة … أليس السد والهيئة القومية للكهرباء مؤسستان تابعتان لحكومة السودان ..فلم الصراع إذن ؟ اين التنسيق واين دراسة الجدوى ؟..ام أن كل ذلك يتم بعد قيام المشاريع ..خاصة العملاقة منها ؟نعمل المشروع بعدين نشوف مدى نفعه من ضرره .
    و معنى ذلك أن إقالة السيد مكاوى ما هى إلا تصفية حسابات بين أهل الإنقاذ ومن والاهم ..( يعنى هى بقت على مكاوى ..بس ؟ ) ..
    متى ينتهى أكل أموال الناس بالباطل ؟ المواطن يدفع قيمة إستهلاكه الكهربائى مقدماً ويظل معظم أيام الأسبوع بلا كهرباء ..تتعطل أجهزته الكهربائية ولا تعويض ولا يحزنون ..والشكوى لغير الله مذلة ..
    والسؤال الحائر الآن ..هل ستنتهى قطوعات التيار الكهربائى وينصلح الحال بعد إقالة السيد المدير السابق المهندس مكاوى أم سنظل ندور فى نفس الساقية ..أم سيأتى شخص آخر ترضى عنه إدارة السدود ؟
    غايتو ربنا يصلح الحال ويرحم عباده المغلوبين على أمرهم ..والإنتخابات جاية عما قريب ..والحشاش يملا شبكته .

  27. ياسين شمباتى كتب:

    الحبيب زوووووول..سلام..

    كلامك كلو منطقى,,ومافى زول بينكر مهنية واحترافية مكاوى,,بس المواطن استفاد شنو من دا كلو!!؟؟ الهيئة مبانيها جميلة والموظفين اتدربوا كويس ورواتبهم بقت طيبة_زى ناس الزكاة_ لكن المغلوب على امره المواطن حالتو طين,,الكهربا بتقطع والعداد غالى جدا وبتدفع دم قلبك للكهربا,,اها كويس كيف يعنى!!؟؟ والرئيس خفض الكهربا ومكاوى التف حول القرار ورفع رسوم العداد وضحك على الرئيس قبل الشعب!!!

    غايتو انا براهن..كم لى كم؟؟

  28. زووووووول كتب:

    الاخ شمباتى سلااام
    طيب يا عمك اوريك المواطن استفاد شنوووو
    كانت الكهرباء فى المدن الكبيره فقط حتى ان مواطنى عاصمة ولاية نهر النيل الدامر نسوا حاجه اسمها كهرباء وتدلت سلوكهم ولمباتهم من الحوائط لكنهم نعموا بها بعد مجهودات مكاوى الجباره حتى ان اهلنا فى تلك الايام كانوا يتداولون نكته مفادها ان الكهرباء موجوده فى السودان فى منطقتين هما القصر الجمهورى وشركة اسمنت عطبره . كان هذا هو الواقع قبل مكاوى لكن بعده صار ت كثير من مناطق الرحل حتى تنعم بتيار كهربائى وتشقها الاعمده وانظر يا شمباتى استهلاك الكهرباء فى السودان قبل عشره اعوام وانظر اليه الان ولا يجرمنكم شنئان قوم على الا تعدلوا

  29. nono كتب:

    زوووووووووووول كيفك

    (ناس الامل عطبرة ) اسمنت عطبرة

    بكره مكاااااااااااوي مركممم

  30. aflaiga كتب:

    الزول : مع انو الزول بلدياتى جدا والحق يقال هو مهندس كفؤ ومقتدر وقاعد فى محلو ميه ميه .. بس كمان يا زووول الواحد لمن يقعد فى محلو ما معناتا يهبش اهلنا ديل مشهورين بانهم مستورين بس لمن ينفعلو بيسوو حاجات عجيبه حتى لو ادى ذلك الى المجازفه بحماتى ..

  31. ياسين شمباتى كتب:

    زووووووول..هو ماديها ليهم مجان؟؟ ما دافعين حقها تالت ومتلت,,وبعد دا يقطعوا فيها ليل ونهار..واسال ناس حلفا عملوا فيهم شنو فى رمضان..

    واستحلفتك بالله فى زول يشترى حاجة ويأجروها ليهو!!؟؟ زى عدادهم بلا خجلة الناس مشترينو من قديم الزمان وجوا استبدلوهو ودفعونا ايجار..خلينى بس من مغستهم..

    ماقلت لى الرهان وقف على كم؟؟؟

  32. ياسين شمباتى كتب:

    العزيز ودالخلا..سلام..

    والله انا انصفت المهندس مكاوى واثبت ليهو كفاءتو ومهنيتو وانو قدم لادارة الكهربا والموظفين وخزينة الدولة الكثير..لكن ماذا استفاد المواطن!!!؟؟ هنا مربط الفرس..

    اما بالنسبة لى اقالتو بدون مساءلة فما اظن اننا عشمانين فى كدة,لانو القبلو العملوا الافظع من كدة مافى حد هببوا ليهم..وزمااان انا قلت انو حيشيلوهو ارضاءا لاسامة وللجهات التى تتبناه وترعاه!!! واظنهم معروفين للجميع..

    نسأل الله ان يصلح حال البلاد والعباد..لكن زيد لينا (الطرادة) دى شوية ولا رجعنا لى عهود السبعينيات والستينيات عشان نتصرف بيها..

  33. البرنس كتب:

    المشكله ياجماعة مافى شيل مكاوى لانو الحال ماحيتغير بس الحيتغير انو الحيجى هو من حاشيت اسامه

  34. طارق أب أحمد كتب:

    تم تعين المهندس مكاوي مدير للسكة حديد بعد ما خطف أسامة عبدالله وزارة الكهرباء وسوف يناط به تأهيل السكة حديد لي ترجع لسابق عهدهاوتم عمل دراسة ممولة من المساعدات الالمانية مع بيت خبرة سوداني بتكلفة قرابة ثلاثة أرباع الملياردولار لانجاز التاهيل وتحت الاشراف المباشر لرئاسة الجمهورية و بعض الكوادر الاسلامية التي كانت قد زارت باكستان والهند ومن المقرر أن تدخل شركة البترول الهندية التي أشترت نصيب تلسمان الكندية شريك في هذا المشروع ويمكن أن تشتري أسهم لها بسكة حديد السودان التي يتم تعديل القانون لكي يسمح للأجانب الاستثمار في هذا المجال

    منقول من سودانيزاونلاين

  35. ياسين شمباتى كتب:

    النصيحة يا طارق مكاوى رجل مهنى وبعرف فى الكهربا تمام,مع تحفظنا على استثمارو الشدييييد وعصرتو للمواطن..واكيييد ح يدخل ليهم قروش كويسة من السكة حديد..
    لكن اسامة دا فهمو شنو فى الكهربا !!؟؟؟ ودا بيثبت للمرة المليون انو فى 3 مراكز ثقل فى المؤتمر الوطنى,,احدها يتزعمه (على عثمان وقوش) ومعرووف انو اسامة من اولاد قوش..ودقى يا مزيكا…

  36. طارق أب أحمد كتب:

    شمبااااا

    بتدور تقول معسكر شايقى
    (وش لئيم و كدا)

  37. سهيل كتب:

    هوي يا هندي إنتا .. مالك معانا ..

    غايتو مكاوي الدور دا ما عندنا ليهو حاجه .. السكه حديد ما عندنا معاها شريعه ..

  38. aflaiga كتب:

    شمباتى ثرو اب احمد ثرو سهيل : عليكم الله اقفلو السيره دى لانها نتنه جدا وجابت ليها 3 مراكز يعنى 3 قبائل يعنى انتن من كده فى شنو ؟؟؟ اتركوها فنها منتنه ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s