اعلان بالنشر …

Posted: الأربعاء,14 أكتوبر, 2009 by aflaiga in اخرى

بما انه قد ثبت لى يما لا يدع مجالا للشك انا / افليقا  وكيل نيابة الشوق والريد ان الاتيه اسماءهم قد اخفو انفسهم للحيلوله دون بل شوقنا من شوفتم فانا بهذا الاعلان اطالبهم بالمثول امام قاضى محكمة وحات الخوه الجمعتنا مولانا جبرا عبر تاكيد حضورهم الى اقرب بوست وعلى المدونين المساعده فى العثور عليهم والساده هم :

كشف يوضح كل منهم والتهمه الموجهه له :

العم سنكل السنكلونى – الماده 1 الضرر للغيبه .

العم بشار بن برد – الماده 2 التقله باهمال .

العم ابكرون – الماده 3 شحتفة المدونين باستغلال اشواقهم لقلمه .

العم ود الخلا – الماده 4 الزعل بدون وجه حق .

الخال مخير الامير -الماده 5  تعمد تجاهل الاحبه  .

العم الكنانى – الماده 6 شحتفة ارواح المدونين واخفاء قيم نبيله عنهم .

الشاب خالد مدنى – الماده 7 تشويه صورة العوده الجاذبه للبلاد .

الخال محنك – الماده 5 تعمد تجاهل الاحبه .

كما ينوه وكيل النيابه الاعلى مولانا ستريكر بكل الاحبه الذين ذكرو ولم  يذكرو ان يراسلوه على البريد الخاص بالادمن فى حال وجود اشكالات تقنيه تمنع مثولهم امام محكمة مولانا جبرا ..

مولانا – افليقا

وكيل نيابة الشوق والريد

ع / مولانا جبرا

قاضى اعلى محكمة وحات الخوه الجمعتنا ..

Advertisements
تعليقات
  1. الزهراء كتب:

    سيادة القاضي افليقا:
    حسب المعلومات التي لدينا عن المختفي بشده ابكرون فقد ورد الينا ظهور المدعو بالفيسبوك مما يؤيد التهمه الموجهه له بالاختفاء لتشويق اصدقاءه

    مندوب النيابه الخارجي
    الزهراء

  2. aflaiga كتب:

    الزهراء : يتم اضافة تقرير مباحث الشوق الى ملف القضيه والانتظار لحين ظهور المتهم ومواجهته بالادله .
    بقية مراسلينا بالخارج وين تقاريركم ؟؟

  3. ياسين شمباتى كتب:

    افليقا..والله (مولانا) دى لافقة شديد معاك..لكن برضو فى متهمين انا بتهمهم تحت المادة 139 قتل عمد,,ايييييي القتل الواحد دا..كتلونا بى شوقهم,,ولو ما ظهروا براهو انا ح اعمل (عملة) الزهراء دى وابوح باسماءهم..

    الزهراء..والله دى ما (مندوبية),,لكن ابكرون برد ليك براااااااهو..

  4. الزهراء كتب:

    طلب من المندوب الخارجي بأضافه المتهم (البيشاوي) للمجموعه اعلاه

    وفي انتظار اصدار طلب القبض فورا خاصة ان المتهم ربما يكون متواج بالجوار

  5. aflaiga كتب:

    بالنسبه للمتهم البشاوى فهو غائب لاسباب تقنيه واتصل هاتفيا من رقم غير ظاهر لعدم تحديد مكانه لكنه سيكون معنا قريبا ..
    شمباتى قائمتك دى بقت زى قائمة المحكمه الجنائيه 3 اسامى منها لخبتو البلد خلى الباقى ..

  6. حاج أحمد السلاوى كتب:

    مولانا الدينمو ..أفليقا ..
    أنا خايف محكمتك دى تبقا زى محكمة الهنايات ( مقصودة ) الدولية … لا تودى ..لا تجيب .المتهمين ديل معظمهم من الكواشف ( القواعد من الرجال ) وعارفين كل شىء وعاملين اضان ال…….. طرشه ..
    أكان زعلانين يقولوا زعلانين من شنو ..مش عندنا ديمقراطية ..وإنتخابات كمان ؟وحتى لو عاوزين ينضموا للمعارضة بنسمح ليهم ..حرية رأى وإختيار ..يعنى ياسر عرمان ومنصور خالد أحسن منهم فى شنو ؟..
    لاكين وبعد دا كوووولو يا مولانا أفليقا لازم نوفر ليهم هيئة دفاع كاربة ( ولو إنهم ما محتاجين ) عشان تحقق العدل والمساواة ( وما تفهمونا غلط )للمتهمين ..وكلنا عارفين إنو المتهم (مُدان) حتى تثبت براءته ( قانون الغابة ).
    بنتنا الزهراء .. إنتى مع الجماعة ديل …ولاّ مع التانيين ؟ حددى موقفك ..قبل ما يجيبوك شاهد ملك.. أو شاهد ما شافش حاجة ..

  7. nono كتب:

    افليقا/

    ممكن صووووووووور من المتهمين ؟؟؟؟

    في اي وااااااااااحد عنده علامات مميزه؟؟

  8. الزهراء كتب:

    عمو السلاوي: لكن لقيتك اخطر من القاضي ذاتو علاقتك شنو بالنيابه

    وانا مع الحكووووومه

    اعتمادا على خبرتي المتواضعه اتوقع ان تكون أغلب الاعذار هي مشغوليات الحياه الكثيره

    البيشاوي ما حنطلعوا منن اللسته لحدي ما يبرز شهادات تثبت تبريراته ولا بد من استخراج قوه مسلحه للقبض عليه واحضاره فورا لضروره موضوع الجمعيه

    ولا شنو يا سعادة القاضي المبجل افليقا

  9. ياسين شمباتى كتب:

    الغبشة..شكرا للتصحيح,والله الماستر ظهر..

    الزهراء..على قولك كتلتى كانت براااااها..

    افليقا..ارجو اضافة الآتية اسماؤهم( طارق اب احمد- عبدوووووش بن توووووووش_ ساتنتود)..ولسه اللستة تطول….

  10. ياسين شمباتى كتب:

    اعلمنا (طارق ابا حمد) هاتفيا انه فى جولة حول الدولة ومبسوووووط..وسيعود الينا قريبا..برجاء من حاجب المحكمة شطب اسمه من لائحة الاتهام..

  11. الزهراء كتب:

    السعيد
    بروسيسردوم
    فنجان
    مهيره
    بت بحري
    سمسمه

  12. حاج أحمد السلاوى كتب:

    بنتنا الزهراء ..
    ليست لدينا أى علاقة لا بالنيابة …ولا بالإنابة ..ولا حصل يوم وقفت قدام قاضى أو محكمة بأى شكل من الأشكال.. ولكن العدل الربانى يقتضى سماع الطرفين لإصدار حكم عادل..البينة على من إدعى واليمين على من أنكر ..وما عاوزين نقول يظل الوضع على ما هو وعلى المتضرر اللجؤ إلى القضاء …لأنو العدل والقضاء اللى بيتدخلوا فيهو بالموبايلات دا بقا ما عندنا فيهو ثقة ..
    وخلونا نشوف آخرتا شنو !!!

  13. عباس ركس كتب:

    هييييييييي , انا اسمي مكتوب !!!!! – طيب .

  14. aflaiga كتب:

    الغبشه : لازم تجربى الدكتوراه فى شمباتى يعنى !! ؟؟ حبابك بعد الغيبه .
    موقف التقرير الجنائى لليوم :
    بما ان ركس قد سلم نفسه لاقرب نقطة شوق مبديا حسن النيه نوصى مولانا جبرا بالعفو عنه .
    وبما انو عبدوش قد اتصل بوكيل النيابه مؤكدا وجوده بالخرطوم ودخوله عما قريب نوصى جبرا بالعفو عنه .
    وبما انو الغبشه جات وعملت فيها قاعده من قبيل فى حنكه قانونيه تخصصيه نوصى جبرا بالعفو منها مع الزجر والتوبيخ
    وبما انو اب احمد لافى فى المافى لمن البلد يبقى صافى نوثى جبرا بالعفو عنه والاشاده بجهوده فى رتق النسيج السودانى بس ما يجيب ليهو عروس من هناك !!
    كما اوكلت النيابه مولانا السلاوى وكيل نيابة الانتربول بمتابعة ملفات المتهمين بالخارج وكشف ارصدة الشوق الفى ماليزيا !! المنعتم من مواصلتنا ..
    انتهى التقرير الجنائى لليوم ..

  15. ابكرون كتب:

    سلااااام
    براحه علي عمك يا افليقا اتي بي مكلبشا
    للمثول امام مولانا القاضي ، وكلتك يا الغبشة ممثلة للدفاع
    وانت يا الفوله ما بتتبله في خشمك (يا كتاب الوش ) اصبري لي يا ممثلة الاتهام

    تحياتي للجميع ولافليقا وبقية الاهل منعنا عنكم الشديد القوي وان شاء الله كلما نلقي فرصه في امازونيا بنتواصل ان شاء الله
    كيه يا السلاوي يسمك

  16. سهيل كتب:

    ابكرون جاء البلد و قاااااااااااااااااااااااااااااااااااااااعد ليهو إسبوع ..

  17. حاج أحمد السلاوى كتب:

    سهيل ..
    أسبوع … بس ؟

  18. سهيل كتب:

    خلاس خليهم إتنين عشان النار تولع زياده …

    يا جدو : وضاح كان معاي قبل شويه في المكتب

  19. مُخير كتب:

    مولانا أفليقا
    الحبان في كل مكان
    السلام عليكم
    الشوق بحر وما يوقفنا منكم إلا الشديد القوي، ضغوط عمل خلال الفترة السابقة حالت دوننا والشبكة عموماً والمدونة على وجه الخصوص لكن عدنا وكلنا لهفة للإستمتاع بحروفكم الما بتشبه حروف الناس وكلامكم الزي شهد النحل.

  20. ودالزبير كتب:

    إقتراح

    أقترح تعليقك البوست ده في رأس الصفحه لأكبر فتره ممكنه

    عشان أي زول جاء صدفه يلقى إعلان النشر ده

    أبكرون شد لينا تلفون أو مر علينا بهناك

  21. aflaiga كتب:

    التقرير الجنائى منتصف النهار :
    بما ان الزعيم ابكرون قد ظهر وظهر شديد كمان نوصى مولانا جبرا بالعفو عنه مع الزامه بدفع تعويض قيمته رحله كاربه قبل السفر .
    وبما انو الامير مخير قد اوضح الاسباب التى ادت للغيبه مع الضرر نوصى مولانا جبرا بالعفو عنه مع الزامه بنفقه قيمتها مقال اسبوعى .
    وبما انو الشفيف ود الخلا قال انو ما حاول يخفى نفسو وشفناهو شفناهو فنوصى مولانا جبرا بالعفو عنه على ان يدفع غرامه مقدارها بوستين من القطع الناشف وواحد فرايحى خلال متبقى شهر اكتوبر .
    وبما انو وضاح كان مع سهيل نوصى مولانا جبرا بانو يتم الشغل كما سيبينه ود الزبير فى توصيته ..

  22. الغبشة كتب:

    اطالب بفتح بلاغ رد اعتبار على وكيل النيابه لاتهامه لنا ووضعنا ضمن قائمه الاعلان بالنشر لعدم ثبوت الجرم وعدم كفاية الأدلة,مع اثبات وجودنا دوماً مع الحبايب.
    افليقيا: الدكتور راضى شن دخلك ياقاضىىىىىىىىىىىىىىى؟؟؟؟؟

  23. ياسين شمباتى كتب:

    سلام…عالم تخاف ما تختشيش!!!!

    ابكرون..حمدالله على السلامة..عليك الله ما لقيتنى حافظ لى سرك بتاع كتاب الوش,,ما زى (نااااااااس) كدة…لكن مالك بتسافر بالضرا !!؟؟ يا اب شرا..

    كما افادنا الحبيب الكنانى انه كان ايضا فى مأمورية طويلة و(مضيناهو) اعلان بالحضور للمثول امام المحكمة الشوقية الموقرة..

    الغبشة..رضينا تب..

  24. حاج أحمد السلاوى كتب:

    الدينمو ..مولانا .. افليقا .. ابو حمودى ..
    ” التقرير الجنائى منتصف النهار :
    بما ان الزعيم ابكرون قد ظهر وظهر شديد كمان نوصى مولانا جبرا بالعفو عنه مع الزامه بدفع تعويض قيمته رحله كاربه قبل السفر .
    وبما انو الامير مخير قد اوضح الاسباب التى ادت للغيبه مع الضرر نوصى مولانا جبرا بالعفو عنه مع الزامه بنفقه قيمتها مقال اسبوعى .
    وبما انو الشفيف ود الخلا قال انو ما حاول يخفى نفسو وشفناهو شفناهو فنوصى مولانا جبرا بالعفو عنه على ان يدفع غرامه مقدارها بوستين من القطع الناشف وواحد فرايحى خلال متبقى شهر اكتوبر . ”

    يعنى محكمة الهنايات بتاعتك دى طلعت أى كلام …ولا ودّت ولا جابت كما توقعنا من البداية..كوووووولو طلع براءة ..والبعض سلّم نفسو واخد العفو ..
    أحسن تشوف ليك شغلانية تانية غير محاكم التفتيش دى ..وخليك فى إتصالاتك التفاؤلية ..
    المحاكم والقضاء فى السودان بقا ليهم شأن آخر … يكفى إنو أى متهم ( أى زول ) ممكن يتصل بوزير العدل مباشرة عن طريق الموبايل ويحل مشكلته دون محاكمة وضياع وقت ..عصر السرعة ..تقول لى اوكامبو ؟…
    وخلونا نشوف آخرتا شنو …وما تودوناش فى ستين …….

  25. ياسين شمباتى كتب:

    الوالد السلاوى..الله يديك العافية ويبهجك زى ما ابهجتنى..اريتا محاكمنا زى دى,,دى محكمة السرور الما بتغلط على زول..ونحن فى انتظار سماع ممثل الادعاء وسماع اقوال الشهود..محححكمة..

  26. مُخير كتب:

    الزينين سلام
    – الغيبه عنكم أكبر عقوبة وضرر يمكن أن يطال أمازوني حُر .
    – نوصيات الحبيب حاج أحمد سلولو في السلك ولن يملك مولانا جبرا إزاءها إلا جبر الخواطر وإرضاء الكواشف بإعلان العفو التام عنا.
    – ولو بلدنا حكامها زي قضاة مدونتنا لما هان علينا الوطن أو تغربنا وتشردنا.

  27. ياسين شمباتى كتب:

    صباح الخير سعادتك..كما علمنا ايضا ان الابن الصديق ساتنتود (معصور) عصرة جد عجبتنا ليهو..

    ووصل البلد مساء اليوم الحبيب ودالفتيحاب وازدانت جدة بنوارتيها..لذا نرجو النظر اليهما كشاهدى ملك..

    الاحباب سنكل وبشار..حقو تقدموا افاداتكم برااااااكم,,وانا بشهد معاكم تب..

  28. الزهراء كتب:

    يعني يا شمباتي اشتغلت انت مندوب خارجي وقعدتني كنب
    ماااااااشي يا دكتور

    اتقدم بطلب لسيادة القاضي اقليقا وجميع اعضاء محكمه الاشواق

    بأعفاء سنكل وبشار حتى يتم حضورهم بالسلامه ونستقصي بعدها عن اسباب غيابهم المستمر

    في قوانين الاتهام(المتهم بريء حتى تثبت ادانته)

    وبالتالي هم ابرياء فقط نترجاهم ونطلب منهم الظهور في اسرع فرصه

  29. ألفاتح جبرا كتب:

    الاحباء الأعزاء … أبكرون فى البلد ؟؟؟؟ رحللللللللللللللللللللللللللللللللللة !!

  30. محنك كتب:

    الاخوة الاعزاء يسال عنكم كل خير ….
    انا بقرا كل ما يكتب بس بالصراحة كسل ساكت عدم التعليق …. وزاد عندنا الشغل شوية بس رسيناه وفرجت شوية ….. ان شاء الله نوكون معاكم دوما يا رائعوووووون

  31. مُخير كتب:

    مولانا أبو ناجي
    الحلوين في كل مكان
    حبيبنا أبو حمودي
    البركة في جمعتكم راكة
    والأحبة في رحلتكم مشاركة
    والتعاسة لسكتكم تاركة
    وكان نيام ما جاء حأواصل نجاركة

  32. ياسين شمباتى كتب:

    الزهراء..جمعة مباركة..قلنا نشوف لينا شغل اضافى بالمسا وكدة..

  33. الاحباء الأعزاء … أبكرون فى البلد ؟؟؟؟ رحللللللللللللللللللللللللللللللللللة !!

    بس قبال الرحلة يا جبرا و قبال ما “المكسرات الجايبا معاهو” تكمل، نمشي ليهو في بيتو أصلوا باقي المرة الفاتت لامنا….يالا يا أبكرون قاعد متين في البيت….؟؟

  34. الحبان مليوووون سلام وأشواق

    جمعة مباركة

    نسبة للعصرة السالف ذكرها عن طريق الأخ الدكتور شمباتي (ما عارف عاجباهو في شنو) لم نتمكن من متابعة ما يكتب أولا بأول، الواحد لمن يلقى ليهو فرقة ويقبل على سوداننا بيكون في مواضيع كتيرة جديدة، وطبعاً صعب جدا انك تفوت ليك موضوع ما تقراهو ولو بعد حين ونسبة لكثرة المواضيع المقروءة بالإضافة لضيق الزمن تكمن صعوبة اضافة تعليق على احدى المواضيع…

    وربنا يجمعنا كلنا ودايماً تامين سالمين لامين

  35. الصادق ود البركة كتب:

    السلام عليكم جميعاً
    أنا بصراحة بسأل عن فنجان قهوة وينها ؟؟؟؟؟؟؟؟؟؟؟
    شمباتي انت ياخوي من تخرج من الحفرة يمسك الكيبورد وهات ياكتابة حقت كل الأسبوع وبصراحة لفت نظري إنك كاتب الساعة واحدة وأربع دقائق صباح الجمعة .
    السلاوي دي أسمها محكمة الأخوة التي جمعتنا (مع اعتراض على كلمة وحات)

  36. ياسين شمباتى كتب:

    الحبيب الصادق..والله بجى خرمان خرمة جد,,عشان كدة بستلم الخميس والجمعة على حسابى,وبعتبرهم ايام(المطالعة) وكدة..

    الحبيب ساتنتود..والله تكتر تقلل بجيب (الصور) ديك هنا,,اخير ليك ترضى بالعصرة بس..تحياتى واشواقى..

  37. ساتينتود كتب:

    الحبيب شمباتي
    شايف اللهجة اتغيرت كيف؟
    ياخوي العصرة سمحة بس طولت شويتين

  38. ألفاتح جبرا كتب:

    أبكرون لا يمكن الوصول إليه يا عزت !!

  39. ابكرون كتب:

    جبرا سلام تعظيم يا عظيم
    ابكرون يمكن الوصول اليه بسهولة ، رقم الجوال في اخر ايميل
    تحياتي……
    ———————————-
    الاعزاء
    شكرا جزيلا للجميع بالداخل والخارج علي الكلمات الطيبات
    ومعليش يا ود فتيح لتضارب الاجازات وان شاء الله الايام تجمعنا
    والشكر موصول للعقد الفريد الوهاج وننجم شويه ونقظي المواجب خارج العاصمة وبالعاصمة ونتلاقي ان شاء الله……
    وحاضرين يا عزت تشرفونا في اي وقت…..ويا ود الزبير حالبي الدعوة ان شاء الله
    الامير المخير حامل الراية الخضراء تحية انا الايام دي مختفي من (كتاب الوش) واسفيريا عموما ….الزهراء نجهتني تحياتي لها وللجميع
    ونتلاقي ……

  40. الكناني كتب:

    سعادة القاضي المقيم ( افليقا)
    الموقرون اعضاء المحكمة
    لجنة الدفاع عن الغائبين ( ود الزبير ، دز يس)
    السلام عليكم ورحمة الله وبركاته
    اصالة عن نفسي اتقدم امامك مقراً ومعترف بالخطاء الكبير في عدم تواصلنا ، ولا اسوق لكم مبرراتللغياب ولكن ارجو ان يكون شفيعي المرور الدائم علي المدونة وتصفح والتزود بها لهجير المعارك المناط بنا خوضها ( المدافرة في سبل العيش) طيب ده مبرر كافي لأنه يحمل الحب في طياته
    ولكم العتبي
    اها الرحلة كيف ؟
    ودمتم

  41. ود المهدي كتب:

    ابكرون حمدلله علي السلامة – المهمة سريه ولا شنو معتم عليها كدة – لكن البلد ضيقة وما في حاجة بتندس فيها-
    يا احوانا السعيد ما ظاهر خالص وباين عليهو مشغول شديد – والدليل اتصلت بيهو الصباح لقيتو ناسي التلفون في البيت.
    الرحلة الرحلة – الجمعة قربت وكلو جاهز – كلمو لطفي والكاشف وتعالو من بدري.

  42. ياسين شمباتى كتب:

    الحبيب ساتينتود..كدة مظبوط,,وياريت تطول شوية عشان نستفيد انحنا..

    ابكرون..ما وريتنى الحصل شنو على (الاسمنت)؟؟

    الكنانى..حمدالله على السلامة..وربنا يديك الصحة والعافية دايما..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s