أها خموا وصروا أفراح عرسوها!!

Posted: الخميس,15 أكتوبر, 2009 by ودالزبير in اخرى

قبل يومين تم عقد قران الفنانه أفراح عصام نجمه برنامجي نجوم الغد وأغاني وأغاني على الملحن أحمد المك إبن أخت الفنان المرحوم حسن عطيه والجدير بالذكر إن أحمد المك كان قد تبنى الكثر من الأصوات الشابه ومنهم عافيه حسن التي إعتزلت الغناء مؤخراً وإتجهت للمديح والعمل الطوعي الإنساني … كونت أفراح لنفسها قاعده كبيره من المعجبين ولا يزال الناس يتحدثون عن مشاغله السر أحمد قدور لها في برنامج أغاني وأغاني بإطلاق لقب أفراح الشعب عليها
أها بعد ده خموا وصروا أهو الأفراح صادروها

للناس المابعرفوا أفراح نهديهم اللحن ده وللباقين نقول آحسن الله عزاكم

قصرنا معاكم يا شباب

About these ads
تعليقات
  1. ودالزبير قال:

    أغنيه مجنونه عمل خاص لأفراح من كلمات حسن الزبير والألحان للزوج أحمد المك علماً بأن كثير من النقاد قد إنتقدوا هذه الأغنيه وإعتبروها غير مناسبه لصوت أفراح

    غايتو أنا شايف إنها أغنيه كويسه ومناسبه ونص وخمسه زاتو

    • الزهراء قال:

      انا ما عارفه الناس البينتقدوا ديل بيسمعوا بي ياتو اذن موسيقيه
      الاغنيه دي بالذات القدرت افراح تبدع فيها وشكلها كده اتدربت عليها بما فيه الكفايه مما نتج عنه اظهار طبقه جميله من صوتها
      حقيقه انا ماعجبتني في اغاني واغاني بقدر ما عجبتني في اداء اغنية مجنونه
      التحيه ليك يا افراح ومبروك وبالتوفيق

  2. التركى قال:

    ود الزبير يامتابع … شكرا على التوبيك …. لكن والله ود البنا ابدع فيها عدييييل كدة بس كمان ود المك بالغ ربنا يسعدهم ويديم محبتهم وزواجهم … البت يحبوها ميه ويتزوجها واحد … عقبال العزابة

  3. الغبشة قال:

    هل هذا يعنى انها اصبحت احزان الشعب لبعض الشعب؟؟؟؟؟؟؟

  4. حاج أحمد السلاوى قال:

    أخونا ودالزبير ..
    حتى أنت ..يا بروتس ..؟
    شكلك كدا كنت حاضر العقد ببطاقتك ..
    غايتو … جنس … غايتو .

  5. ودالزبير قال:

    التركي

    تصدق يا مؤمن خبر عرس أفراح طغى على خبر إقاله مكاوي عند الناس

  6. ودالزبير قال:

    الغبشه
    (هل هذا يعنى انها اصبحت احزان الشعب لبعض الشعب؟؟؟؟؟؟؟)

    مؤكد الكلام ده حصل لأنو زمان كل زول كان عنده عشم ولو بنسبه صفر في الميه أها هسه الكلام ده خلاص إتقطع ولو إنو في كلام إنو الموضوع عقد بس

    يعني في شويه أمل زي أمل الهلال في كوره مازيمبي يعني يغلب أربعه صفر

  7. ودالزبير قال:

    حاج السلاوي

    وين يا عمك

    لو كنت حاضر كنت فركشتك الزواج دي وعملت زي المسلسلات المصريه ( الجوازه دي مش ممكن تتم )

    يأخي أنا ماعارف الربيع بيتلم مع الخريف كيف ؟؟؟؟؟؟؟؟؟؟؟؟؟

  8. ودالزبير قال:

    الزهراء

    كلامك ميه ميه

    أفراح في أغاني وأغاني كانت باهته بس البركه في عمنا السر قدور

    في الأغنيه دي إتجلت وأبدعت عديل كده

  9. الزهراء قال:

    نقطه مهمه يا اخوانا حزن الشعب على زواج افراح يمكن ما عشان عشمانين في نظره منها لكن احتمال يكونوا شايفنها كتيره على ود المك وما شايفين اي حاجه مشتركه بينهم غير الالحان
    الله اعلم
    لكن ما مفروض الناس تحكم بالشكل ولا بالعمر ولا غيرهم
    القصه وما فيها ان قلب افراح اختار فقط ود المك ربما كانت ترى فيه ما لا تراه في غيره من السعيدين
    افرحوا معاها وفرحوها

  10. ودالزبير قال:

    الزهراء

    لا يفوت على فطنتك وعلى فطنه القارئ إننها نكتب بلسان الضحك والهزار لا أكثر ولا أقل فلم نكن ننتظر من أفراح شئياً لكنك ربما لمست وتر عند الناس يتحدث عن فارق السن الكبير وإنه زواج مصلحه لا أقل ولا أكثر ونفس الشئ حدث عندما تزوجت لبنى أحمد حسين من الراحل عبدالرحمن مختار

  11. الزهراء قال:

    (لا يفوت على فطنتك وعلى فطنه القارئ إننها نكتب بلسان الضحك والهزار لا أكثر ولا أقل فلم نكن ننتظر من أفراح شئياً)
    الاخ ود الزبير
    اكيد انا ادرك جيدا ان الموضوع هنا موضوع في اطار غير جادي وهو انما للمزح فقط

    لكن عندما سمعت بهذا الخبر تناقشت فيه مع العديد من الناس بما فيهم عواطفات ولمست فيهم عدم الرضا عن هذا الزواج وايضا عندهم نوع من التحسر على صغيرتهم المبدعه

    لذلك حاولت اعكس بعض مما لمسته من مناقشاتي مع محبي افراح عصام

  12. التركى قال:

    الزميل ود الزبير الأغنية التانية ايقاعها جانى خليجى خليجى عشان كدة عايز الناس تسمع الأغنية على اللنك دا
    http://www.facebook.com/fmuren?ref=profile
    لكم التحايا

  13. aflaiga قال:

    ود الزبير : الغنيه لو مناسبه مع صوت افراح افراح ذاتا مناسبه لود المك وود المك عريس ..
    تانى شيئ يا ود الزبير عليك الله مش احسن الوحده يعرسوها بعدين يجيبوها لينا فى التلفزيون عشان الناس تسمع وهى قنوعه بانو القسمه حاصله من بدرى ولا الابداع قبل العرس ما بيظهر غايتو انا سمسمتى مبدعه فوق الارض وتحت الارض ويوم العرض ذاتو .. شفت القناعه دى كيف ؟؟؟؟ لمن بى غادى مش ؟؟

  14. الزهراء قال:

    يا افليقا لكن الواحده كان عرست وقالت دايره تغني راجلا ما بخليها تغني في الحمام حتى خليها من تمشي تغني في التلفزيون

    عشان كده بيعملن تفتيحه الواحده تمشي تنشهر وتبقى مشهوره (بفتح الواو) وفرصه ذاتا تجيب العريس معاها من تلفزيونا السجلت فيه دا وبعداك تعرسو ويكون امام الامر الواقع

    (هوي يا راجل انت لمن عرستني ما عارفني فنانه جاي هسي تقول لي ما تغني؟)

  15. سهيل قال:

    ود الزبير : يا فرحه ما تمت — ما تشيلو هم — بكره بابكر صديق بيجيب ليكم قنبله جديده تعيشوا و تحلموا بيها شويتين و يقوم يعرسها ليكم السر قدور الدور دا — يا راجل إحتسب و خلي إيمانك قوي– خيرها في غيرها – و خليك مكنكش في نجوم الغد لأنو افراح بقت من نجوم الأمس — و الجديد شديد

    كسره : قلت لي فارشنها وين؟

  16. الصادق ود البركة قال:

    السلام عليكم الأعزاء المدونين وبعد
    قال النبي صلى الله غليه وسلم (سيكونن من أمتي أناس يستحلون الحرير والحر والخمر والمعازف) وقال عبدالله بن مسعود رضي الله عنه (والله إن الغناء)
    ثلاث مرات وذلك في تفسير قول الله تعالى( ومن الناس من يشتري لهو الحديث ليضل به عن سبيل الله)
    ودمتم

  17. سهيل قال:

    كلامك سمح يا ود بركه — لكن الفهم شنو ؟ نعتزل البوست ولا نسوي شنو بالضبط

  18. حنين قال:

    سهيل .
    طول بالك .
    ود الزبير والجماعة البكايين .سلامات .
    والبركة فى أمة محمد وربنا يخلف عليكم بالخلف السمح …
    والله ياأفليقا عجبتنى قناعاتك وربنا يسعدك بى سمسمتك دنيا وآخرة…

  19. الصادق ود البركة قال:

    السلام عليكم
    سهيل ماتعتزل البوست وعلق زي ما عاوز بس لابد من التوضيح الذي ذكرت لأن الموضوع حول مغنية والغناء ودمتم

  20. ابوالمنذر قال:

    ودالزبير….
    والله وحدوا بينا العرسوهم وراحو
    شالو من تلفزيونا بهجتو وافراحو
    ……. ياحليل الراحو
    انت الزول ده ما شاف الخديره ام صوتا سمح الغنايه ديك موش هو ملحن ومفروض الاذن قبل العين تعشق دائما…..
    ياخى الله يهنيهم وربنا يخلف وكل نجم وانتو طيبيييييييين

  21. ودالزبير قال:

    سهيل

    ( خليك مكنكش في نجوم الغد لأنو افراح بقت من نجوم الأمس — و الجديد شديد )

    يازول إنت ما شفت الموسم ده أحسن زول بيغني فيهو الود ( شول )

    أيوه يا سهيل تصدق شول ده بيغني أغاني الجعليين بس تقول على اللحو

    أها باقي ليك الموسم ده راح يكون فيهو زي ناس أفراح تاني؟؟؟

    الصادق ودبركه

    جزاك الله خيراً وبارك الله فيك وشكراً على المرور

    سهيل تاني

    تعتزل البوست ولا تعتزل النساء ماذا دهاك يا إبن أبا بلتعه

    حنين

    شكراً على هذه التعزيه الرقيقه

    ختيت لينا حاجه في الكشف ولا مارق سااكت

    أبو المنزر يا حاقد

    لو للصوت المفروض ود المك يتزوج آمال النور على الأقل مناسباً ليهو عمرياً

    نختم بحبيبنا أفليقا

    قلت لي الخواف ربى عياله

    أحييك وأحي كل العواطفات في كل بقاع الأرض

  22. سهيل قال:

    اها لما ود امك يعرس افراح .. شول يعرس منو ؟؟؟ عشه الفلاتيه !!!!!!!!!!!

  23. الزهراء قال:

    عاد الليله افراح بالجد ابدعت في سهرة النادي الالماني
    وما شاء الله عيني بارده عرفت تختار الاغاني الجايه مع امكانياتها وخامة صوتها
    والابداع والرقي اكتمل بالصوت المعبق بنكهة الحقيبه منار الصديق
    واكتمل الجمال والرقي في رماز ميرغني

    يسلم عمنا السر قدور وربنا يديك الصحه والعافيه

    ود الزبير نزل لينا الفيديو

  24. سهيل قال:

    الليله النجم كان اسماعيل عبد الجبار بتاع الكمنجه

    اعملي حسايك يا الزهراء يقوم ود الزبير يفك فيك حاجه ولا يعتزل النساء (قصدي ا لبوست)

  25. الزهراء قال:

    اكيد ماننسى الفرقه الموسيقيه الرهيبه وانا حقيقه بعتبر النجم هم عوض احمودي الراجل ده ما شاء الله امكانياته عاليه

    انا غايتو تغولت على بوست ود الزبير لانيحقيقه اعجبت بتلك الحلقه ايما اعجاب وتاني بقول افراح ابدعت شديد

  26. ودالزبير قال:

    الموضوع بقي جد جد يا جماعه والليله في جرايد الخرطوم لقينا الإعلان ده

    مبروك المك وأفراح
    آل صالح باشا المك وآل محمد عطيه الريح وآل محمد احمد عبده
    وآل المرحوم صالح مصلح
    دعوه غداء متوجه بالمحبه نزفها لكم بصاله أمسيتي يوم
    4\8\2010 رنين الأوتار بانغام الفرح ستكون في إنتظار
    تشريفكم لنا . معكم تمتد زغاريد أفراحنا بصاله المعلم
    ليله الزفاف يوم 7\8\2010
    يبدأ أحتفال الزفاف الساعه السابعه مساء
    أحمد المك & افراح عصام

  27. حاج أحمد السلاوى قال:

    شكسبير ..سلام
    هو داشنو يا خوى دا ؟ هولسه أفراح الشعب دى ما عرسوها ؟ نحنا حسه قايلين يقولوا جابت ليها توأم ..تقول لينا العرس لسه الشهر الجايى؟
    غايتو زى ما قال أخونا الكاشف ابو عصمت .. يوم ما جا خبر الخوبة .. إن شاء الله يدقها بالعود ..
    وإنتو يا الباقين موتوا بغيظكم .. خطفها ..خطفها ..خطفها .. بس من غير حصان .
    أها يا جماعة الماشى الصالة منو .. والما ماشى منو ؟

  28. DAKEEN قال:

    دايرين تونا – هاكم التونة دي ،،،،

  29. ودالزبير قال:

    حاج السلاوي

    هاكم صور العرس

    وخليك قريب عشان نجيب ليك صور التيمان

  30. حاج أحمد السلاوى قال:

    شكسبير ..
    غايتو فى ناس يكونوا ممغوسين من أيام الخطوبة لحد ايام العرس ..
    ابو عصمت .. إن شاء الله يدقها بالعود ؟ غايتو جنس حسادة !!

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل الخروج / تغيير )

Twitter picture

You are commenting using your Twitter account. تسجيل الخروج / تغيير )

Facebook photo

You are commenting using your Facebook account. تسجيل الخروج / تغيير )

Google+ photo

You are commenting using your Google+ account. تسجيل الخروج / تغيير )

Connecting to %s