شبيك لبيك

Posted: الجمعة,23 أكتوبر, 2009 by عزت in اخرى

قال لي صديق “لو كان الفقر رجلا لكان نتن الرائحه سئ الخلق والخلق ولو كان رجلا ولم يتمكن على الكرار رضى الله عنه من قتله لكان ملكا متوجا يخشى باسه جميع خلق الله حتى البهائم والدواب… فالحضيرى وحمد وعطيه  هى اسماء اطلقها الناس عليه وكثرة الاسماء تدل على …ولا ادرى ما هى علاقة هذه الاسماء التى يحملها بعضهم مع الفقر لكن ما اعلمه ان للفقر سطوه وله صولجان وله حاشية واتباع فمن اتباعه الجهل والمرض والمصيبه وان امراض الاغنياء تختلف عن امراض الفقراء فقلما تجد فقيرا مصابا بداء الملوك وغنيا مصابا بفقر الدم او السل الرئوى.”

image019

و تظل القصص عن الغني و الفقير بطرافتها أو ببؤسها و قتامتها تزين حياتنا و تملأ صحفنا و حيزا من “الونسة” في المجالس فانظر في طرافة ذلك السجال الذي كان طرفاه غني و فقير اذ كان بين بيت الغني و الفقران “زقاق” ضيق ودّ الغني توسيعه فتكلم الى أخونا الفقران؛

“يا خي الزقاق البين البيتين ضيق شديد حقو نوسعو شويه هسة أنا كان جبت لي عفش و الا عيش مشكلة و انت أكان مات ليك زول برضو مشكلة”

فقد تعود الصحفيين في سوداننا باطلاق اسم (محمد أحمد) كناية للمواطن البسيط  الذي يكتوي بنار الفقر و الحكومة فهي باسمه تتغول على مقدراته، و تحكمه و تتصرف في مكتسباته و تظل المسيطرة على حياتة و المتسببة في بؤسة ففى ذات ليلة مظلمة وبينما كان (محمد أحمد) يقطع أحد الميادين عائداً إلى منزله رأى شيئاَ يلمع على مقربة منه .. توقف وإلتقط  ذلك الشئ الذى كان مصباحاً قديماً .. لم يكد (محمد احمد) يبتعد عده خطوات وهو يمسح الغبار من على المصباح حتى إكفهر الجو وإمتدت أعمدة الدخان الذى بدأ يتشكل شيئاً فشئياً حتى  صار مارداً جبارا؛

خاطبه المارد بينما كان يرتجف خوفاً:

–  شبيك لبيك عبدك بين يديك

تلعثم محمد أحمد و خاف و اضطرب و لكن المارد طمأنه بأن لا يخاف فهو في أمان و قد كان المارد حبيسا في هذه الزجاجة منذ زمن سحيق و هو يدين بالفضل لمحمد أحمد الذي خلصه من ذلك المصباح و تعبيرا عن هذا الشكر و العرفان يود المارد تحقيق أمنياته مهما كانت شرطا لا تزيد عن ثلاث.

لم يدر محمد أحمد ماذا يطلب وقتها و طافت بمخيلته العديد من الأمنيات بعضها محرما و البعض أكيد ما ممكن يتحقق أها زي “بت الفريق السمحة ديك الكنت بلحيل دايرا بترجع زي أول بعد ما اتعرست و اتملت بالعيال و الا بقدر امش زي ود الحسن و اغترب و اشتغل و اجي مليان قروش أطلب أجعص بت في الفريق و اتمختر بالبوكس الدبل كابن أبو أربعة شنكل … ما ظنيت…

فقال محمد أحمد ،  انت يا المارد أي حاجة أي حاجة ممكن تجيبا ؟

طبعا يا محمد انت أشر لكن ما تتعدى ثلاثة أمنيات… و أنا داير أقعد في بلدكم دي شوية امكن نلقى لينا شغل و ناسكم ما شاء الله بكونوا بلحيل محتاجين لخدماتي.  دحين أسرع و شوف انت عاوز شنو..

فكر محمد أحمد و وقتها كان جعان شديد من بوش الساعة تسعة صباحا ما أكل حاجة… فقال للمارد:

– كدي جيب لي ثلاث جدادات  محمرات و شطة كثيرة و سلطة

استغرق محمد أحمد وقتا طويلا في الفتك بالدجاج بالشطة، فجأة الشطة حرقتو و كان مافي موية  فصاح في المارد:

– موية سريع …

– أها كدا اثنين صاح المارد فاضلة أمنية واحدة… قال المارد

لم يكترث محمد أحمد و من فرط جوعة قرمش العضام و لحس الشطة و هو يفكر الليلة ما جاك بلا يا المارد بس بعد دا العروس و البيت …

و لكن بطنو قبضتو و كان النداء الملح للطبيعة ففتش و لما كان المكان مغفرا و مافي اي حتة يقضي فيها حاجته و المارد جنبه لم يستطيع الا و ان يكورك في المارد:

– حمام !!!!!!!

Advertisements
تعليقات
  1. الزهراء كتب:

    الرائع عزت

    مشكله والله التفكير المحدود ده اخونا طير فرصة المارد من يدو
    شوف الجوع الناتج عن الفقر بيعمل شنو في الزول

    ربنا يكون في عونه

    اخواني الكرام
    لو كل واحد منكم لقى ليه فانوس وفيه مارد حتطلبوا شنو؟

  2. حنين كتب:

    المرطب .
    سلامات
    والله الفقر أمانة ماكعب وزى مابقول المثل (حلم الجعان عيش).عندنا واحد ميسور الحال بيوزع فى الزكاة على المساكين قمنا وصفنا ليهو عربى مسكين عشان يديهو من مال الزكاة فوصلة وأعطاه شوالين عيش.فأخز الاعرابى يفكر كيف يتصرف فى هذة الكمية المهولة والتى لم يكن يحلم بها يوما وأخذ التفكير منه عدة أيام لم يتمكن من مزاولة عملة والذى يتمثل فى رعى أغنامة وإعاشة أبنائة الخمسة بلبنها وبعد اليوم الخامس زهب الى صاحب الجوالات وقال له (ياخى تعال شيل جوالاتك ديل من هنا أنا مادايرم لأنها من يوم ماجبتها لى هملتا غنيماتى وعيالى )…
    لك التحية دكتور عزت …

  3. سهيل كتب:

    سلامات و حمعه مباركه

    والله يا مرطب المارد بتاعك دا انا الم فيهو إلا اخليهو يبكي و يقول لي رجعني الإبريق تاني — هو كان ما سجمان الجابو امازونيا شنو ؟ دا خلي بالك زي الجني بتاع كوبري بورسودان جده

  4. الزهراء كتب:

    يا شمباتي
    امرق من حفرتك وورينا حتطلب شنو من المااااااااااارد

    انا غايتو حاطلب منو حاجات وحيديني كفين وينتحر عدييييييل

    وحيقول لي الحاجات الطلبتيها دي لو ما متوفره في بلدكم دي انا المارق ليها شنو اخير لي فانوسي دا

  5. البشاوى كتب:

    الريس عزت
    والله المارد دة يحوم فى البلد دى الا تطقو ليك انفلونزا الفلس يكوس التخارجو مايلقاها
    عذرا للبعاد نسبة لاعطال فنية — وسنعود بعد قليل-

  6. مُخير كتب:

    المُبدع أبو عصمت
    الزوار وأهل الدار
    تعرف يا دكتور عندك أفكار مُضللة واللهم أجعلها خير، يخيل لي المارد ده لو ظهر لي الجمهور حيقول ليهو ودي لينا كل الأحسبون وراء الشمس، وجيب لينا حكومة قوامها أشخاص عدول همهم الشعب ومشاكلو والأخيرة أديهم مساندة مالية مفتوحة عشان يحلو مشاكل الشعب الفضل من صحة وتعليم وإسكان ومواصلات …الخ.
    عملاً بطلب الزهراء أتخيل أمنيتك الأولى حتكون بيئية بحتة يعني حتقول ليهو ورينا شطارتك ومثلاً سد لينا ثقب الأوزون والثانية أوقف الزحف الصحراوي وأجعل الصحراء الكبرى أشجاراً وأزهارا أما الثالثة والأخيرة فما كعب تكون شخصية كمل لينا البيت كذا طابق وتكون بذلك ما خليت فرقة للحديدة الشديدة. أما أنا فحأبدأ بالإي كلاس 500،والثانية بي إم دبليو سبيشل أدشن والثالثة لاند كروزر جي إس إل 2010 وإن شاء الله أسكن فيهم هههههه 🙂

  7. ذكرت احداهن نتيجة لسؤال الزهراء

    تخيلت المارد و قد ظهر لمرت “محمد أحمد” المعيشا عيشة السواد و الرماد
    فقال المارد شبيك لبيك
    بعد ما استوعبت الحكاية و كيتا في “محمد أحمد”
    قالت المرأه: كم امنية لي؟
    المارد: لك ثلاث أمنيات و لكن كل أمنيه تتحقق لك راجلك حيآخد عشرة اضعافها
    ما مشكلة؛ اريد ان اكون اجمل امرأه في العالم .
    المارد: لكِ هذا ولكن انتبهي سيكون زوجك اجمل رجل في العالم وتتهافت عليه النساء .
    المرأه: غير مهم طالما ساكون اجمل امرأه في العالم .
    و الثانية قال المارد .
    ان اكون اغنى امرأه في العالم.
    لكِ هذا و لزوجك عشرة اضعاف ماتملكين .
    المرأه: غير مهم .
    المارد: والامنيه الثالثه والأخيرة .
    قالت أن اذهب للمستشفى من جراء أزمه قلبيه خفيفه……

    طبعن “محمد أحمد” يكون شبع مووووووت

  8. ابكرون كتب:

    انا غايتو يا عزت امنيتي الاولي ليهو انه اي زول فاسد ومرتشي وجبهجي في البلد دي يبيدهم في لحظه ……تخيلوا بعد اختفاء الهلمه ديل البلد دي حتكون كيف……ولاحظوا انه دي بس الاولي

  9. سهيل كتب:

    ابكرون : قلتا لي الكبري من وين لي وين ؟؟؟؟؟؟؟؟؟؟؟

  10. ودالزبير كتب:

    غايتو لو في أمنيه وأحده لي هي إنو مايكون في حروب في العالم

    بعد داك الباقي كله هين

  11. التركى كتب:

    الغالى د.عزت والزملاء … شكرا على العبر دى و صحيح الجوع كافر ياخوانا دا كلام دا الراجل تجيه النعمة لقدامو يرفسها برجلليه الاتنين … قالو مرمى الله مابترفع ولو جيت ترفعو برميك معاهو …. الشحادين ديل لسه ماعملو ليهم ماكنة سحب ولا شنو يادكتور ….
    الزهراء : الأمنية الأولى يحقق لى كل أمانى والتانية يسهل ليا رضا والديى والتالتة يخلص البلد دى من الفيه … أها باقى ليك الجان دا مابندم على طلوعه من القلة ؟

  12. زووووووول كتب:

    د/ عزت سلاااام
    والله زولك دا ما فى تحليل غير انو لما فيهو الحضيرى ونقر ليهو الربابه بتاعتو طبعا قالوا يا عزت حمد دا اصلا عندو ربابه لو دقاها ليك الله قال بى قولك وتبقا امنياتك اكله كاربه وحمااام كارب يعنى التلات امنيات تبقا زى الزول الدخل بالشباك ومرق بالشباك الباب زاتو ما جاء عليهو

  13. ولكن لكن مرأة حاسدة حتى في أحلامها وكايسة غتاس حجر الراجل ودايرة تتمتع بالغنى والجمال وتودي صاحبنا الآخرة …
    أحلام الفقراء يا دكتور والمارد واحلام اليقظة وحلم الجيعان عيش كلها حلقات من مسلسل الفقر والجوع والبؤس الذي يعيشه بلدنا الذي يفترض ان يكون سلة غذاء العالم ويصدر فائضه ويصدر ( ماردين ) لبقية العالم الذي يفترض أن يكون حلمه الذهاب للسودان مش الفرار منه كما هو حادث الآن .
    ياخي نحن من سؤ حظنا مصر جارتنا وصاحبتنا البتساعدنا في كل شيء تتغلب عندنا ويكون وشنا مش حلو عليهم وتقلب اربعة في بلد لا يعنيها ولا تعنيه في شيء

    ياخي السودان ده شدة ما بقى بائس حتى الحظ والصيت السمح راح منه

    والله لو جا مارد لى أي سوداني ما كوز تلقى حلمه الوحيد تأشيرة مخارجة من البلد دي
    آسف للاطالة مع تحياتي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s