الزعمطه والقرمصيص

Posted: الإثنين,26 أكتوبر, 2009 by ودالزبير in اخرى

كثيراً ما تستوقفنا أسماء لمحلات قصد أصحابها لفت الإنتباه لها

من باب الدعايه أو من باب الخيال الجميل

وأحياناً يستفذك إسم لمحل من ناحيه إنه لا يتناسب مع طبيعه عمل المحل

كأن تجد من كتب على محله ( مفرمه الشريعه )

أو جزار يوم أحد

أو مطعم المجاهدين

قبل فتره وأنا أمر بشارع بري وده الشارع البيؤدي لمسجد سيده سنهوري

وجدت صالون بإسم ( زعمطه )

إسم قد يراه البعض مبتكر وجديد وجرئ

يعني الزول يخش بإرادته عشان يتزعمط

وممكن تقيف تحلق من باب الفضول ويكون جذبك الإسم

غير بعيد من هناك وفي الرياض بعد كافتريا لذيذ

محل بإسم ( القرمصيص )

قلت قطع شك سيد المحل ده ما جادي أبداً

المحل للعطور البلديه السودانيه ومستلزمات الأعراس
برضو في الرياض محل بتاعت أقمشه نسائيه إسمه ( كرور)
مكتوبه بالإنجليزي لكن ياها كرور الواحده دي

برضو بتلقى محلات عصائر ومدايد في منطقه الصحافه زلط بإسم ( مديده العريس )

في سوق سعد قشره محل تياب سودانيه إسمه ( بتجينا )

قرب يتم الجمله كده ( بتجينا ولا على كيفك )

كثيراً هي الأسماء الغريبه والملفته التي تقابلنا يومياً

دعونا نوثق لظاهره الأسماء الغريبه في السودان وخارج السودان كمان

Advertisements
تعليقات
  1. العزيز ود الزبير

    أول حاجة تورينا “سيدي بيه” دا منو…؟؟

    عارف وفي الطريق للمعرض من ناحية شارع الستين هناك صيدلية لازم يوم أزورهم و أسال سيدا مناسبة الاسم اذ كتب في لافتة أنيقة

    “صيدلية المواجهة الشريفة”

    فهل يا ترى باشارة لمواجه الموت بالشرف أم ماذا !!

  2. ودالزبير كتب:

    عزت ههههه

    والله عندك حق كل ما أجي ماري بهناك أقرأ إسم الصيدليه دي وأستعجب وأستغرب

  3. التركى كتب:

    ود الزبير : ياخ انا المواجهة الشريفة دى مارضانى مرض لانها جنب بيتنا الكبير وتقريبا كل اسبوع بشوفها وسألت البت الصيدلية بس عملت مشغولة وماورتنى ليه سموها كدة …. وعندنا واحدة فى الصالحة اسمها رضا الوالدين وواحدة اسمها يشفين والأغرب تلقى محل مكتوب عليه تلاجة لبيع التلج للجمهور .. دا كله كوم والمتفرنجين كوم تانى الاسم ماتعرفو اجنبى ولا عربى ابتداء من ريجينسى وأكدنيز (طبعا قاصدين بيها البحر الابيض) وحيييي أنا من بيبى سنتر المقلوبة دى… لاحظتو الأسماء الجديدة لفندقى السودان والفندق الكبير والعجب فندق الميريديان ؟؟؟ هو ياخوانا أسماء الأحياء هينة ولا مقطوعة لينة التقول نحن مافى السودان فى قارة آسيا …

    د.عزت : انا لسه مامشيت على سيدى بيه لكن لو حصل ح أخش آكل ويكون شرطى لدفع الحساب انهم يجيبو على سؤالك دا ..

  4. سهيل كتب:

    سلامات

    برضو يا ود الزبير الإسم بعد مرات ما بيتناسب مع المحل .. مثلآ في ترزي جنبنا إسمو ( تعبان) .. المحل عباره عن متر و نص عرض و زي تلاته متر طول .. سقف بلدي و ممر بين مكنتين سنجر زي نص متر كده .. معلق يافطه كبييييره كاتب عليها ( محلات تعبان) لاحظ محلااااااااااات دي..

    برضو يا عمك في محل ما متذكر موقعو وين غسمو ( إحدى الحسنيين) .. طيب ورينا ياتا فيهن !!!

    بمناسبة الدعايه و الترويج للمحل : واحد مصري بيبيع بلح و جنبو محل سمك ماشاءالله المحل شغال شغل جد و بتاع البلح قرب يقفل من عدم الزبائن .. قام كتب في اليافطه بتاعت المحل ( إذا اسمكتم فأبلحو) ……..

    وجاييكم

  5. ودالزبير كتب:

    التركي

    يشفين وما شابهها من أسماء جات في موجه الأسماء بتاعت الأسلمه يعني يستبشرون وسفريات الهدى الإسلميه وملحمه بدر الكبرى وثانويه حات إبن أبي بلتعه وكدم

    سهيل

    ذكرتني بالترزي المسمي محله ( وفصلناه تفصيلا )

    يأخي ده بالغ عديل في الإسم ده

    و

  6. الزهراء كتب:

    التحيه والتجله لكم ايها الجمع الكريم

    الواجعني وهارد كبدتي في شارعنا محل سيراميك اسمو سالي
    ما عارفه العلاقه بينو وبين الاسم ده شنو

    الحاجه التانيه مطعم سوليتير بس بذكرني الكشتينه

    وفي مره كنت متضهبه ورأيت ياافطه بنفسجيه رومانسيه رهيييبه مكتوب عليها بوتيك البنفسج

    ودخلت واحلم برؤية احلى البلوزات والاسكيرتات وادوات التحميل والاكسسوارات

    ومجرد ان فتحت عيناي اشوف ليك البناطلين والقمصان الرجاليه الماااخمج

    ولكم ان تقدروا كمية الاحباط الجاتني

  7. حاج أحمد السلاوى كتب:

    أخونا ..شكسبير ..اقصد ودالزبير …وكل القبيلة العامرة
    تعرف يا ودالزبير لو علقت لافته فى محلكم العامر :” سيدى بيه …إدارة شكسبير ” حتلقوا رواج ما بعدو رواج …كدا بس جرب الموضوع دا ..وادينى رايك ( حقنا بعدين بناخدوا … وجبات سفرى ) .
    طبعن قصة إختيار أسماء المحلات التجارية وغيرها تخضع لعوامل كتيرة أهمها جذب الزبون ..بس بعد مرا ت النتيجة تكون عكسية ..
    فى سوق بحرى كان فى واحد عنده تلاجة فواكه ( لا أدرى إن كان موجود ولاّ هرب بجلده ) ..كاتب لافته : ثلاجة البشرية .
    محل حلاقة إختار إسم : ” وزيناها للناظرين ”
    والموضوع ما قاصر على بلدنا الحبيب بل يكاد يكون موجود فىكل البلاد العربية ..ففى مدينة جدة الساحلية هناك أسماء غريبة برضو :
    محل كبير للملابس والحذية : “وقف وشوف .”.
    محل أدوات منزلية كهربائية : “من غير كرتون .”.
    محل ملابس وأحذية وخلافه :” سمينا بنفسك”.
    محل لبنانى لبيع المعجنات والفطائر : ” المنؤشة ” .
    وكان إتذكرنا حاجة تانية بنجيكم راجعين ..

  8. ودالزبير كتب:

    الزهراء

    طيب رأيك شنو لو دخلتي محل في شارع الستين جنب صيدليه مكه المكرمه اليافطه بره مكتوبها بخط أخضر كبير ( ياسمين )

    تصدقي ده محل لبيع أدوات السلامه

    حاج السلاوي

    كده بالمناسبه السعيده دي النسعلك إنت شكسبير دي جبتها من وين

    صاحبك بتاع تلاجه البشريه داك ما كان يسميها ( المشرحه )

  9. حاج أحمد السلاوى كتب:

    حاج السلاوي
    ” كده بالمناسبه السعيده دي النسعلك إنت شكسبير دي جبتها من وين؟”

    أيووووووووووة ياشيخ دالزبير .. لقد سألت سؤال تسهل الإجابة عليه.
    أحدى إبداعات عمنا الكبير الرئيس المفدى والقائد العظيم شهريار بن عفرار بن القذافى ..أقدم روؤساء قارة إفريقيا..هى أنه قال أن شكسبير.. الروائى الإنجليزى الشهير أصله عربى وكان يدعى شيخ الزبير ..فقام هؤلاء الفرنجة … يعنى الخواجات وحوروها إلى شكسبير نكاية فى العرب ..وهكذا صرنا ننادى كل من كان اسمه الزبير ب شكسبير ..ودى الحكاية من طق طق لسلامو عليكوم ..
    دلوقت رايك شنو ..؟نواصل بعد الفاصل ؟

  10. ودالزبير كتب:

    السلاوي

    مادام القذافي قال كده يبقى كلامه صح ميه الميه

    لووووووووووووول

  11. الزهراء كتب:

    حاج السلاوي وود الزبير
    دي زي قصة الحاج يوسف القالو انو اصلا جدهم امريكي من حته اسمها سان جوزيف
    وجا داير يدخل الاسلام وقام عرس واحده من المنطقه المقصوده وسمى روحو يوسف وبدل سان جوزيف بقت الحاج يوسف

    نقلا عن العلامه الميروني بن عنتبه البمبوني

  12. حاج أحمد السلاوى كتب:

    شكسبير ..
    القذافى دا القالوا كتييييير وما بينقلب ..دا عاوز يحرف القرآن الكريم ويبدل فيهو ..الزول دا أخير نختاهو ..مش طلع أكبر مانيكان رجالى ( موضة رجالى ) ..تلقاهو فى الإيميل ..

  13. nono كتب:

    لفت انتباهي اسم محل تجاري!!

    قووووووووووووول كلامك؟؟

    لو قلتوو!!!!!

    بعدين يجي النطيط؟؟

  14. ود الزبير والحبان

    حكاية أسامي المحلات دي حكاية عجيبة غريبة، وأحسن حاجة يكون اسم المحل ليهو دلالة بطبيعة شغل المحل عشان الناس ما تتلخبط، وأكتر حاجة بتغيظك وتفقع مراراتك الاسم يكون اجنبي ومكتوب بالعربي

    كده بالمناسبه السعيده دي النسعلك إنت شكسبير دي جبتها من وين؟؟؟

    على قول واحد بلدياتنا شكسبير دا أصلاً دنقلاوي واسمو شيه سبير (شيخ زبير) والبقرة بالرطانة اسمها تي Tea والشاي بالانجليزي اسمو تي Tea ومن هنا وضحت العلاقة بين الشاي واللبن

  15. ود المهدي كتب:

    صالة و مطعم مشهور بالعمارات اسمة كافي كانجي – ماعارف دي رطانة ولا كود
    ومحل بتاع فول في الهجرة امدرمان كان اسمة ابو صليب ودي عندها اكتر من قصة للكواشف – بعد ان انتقل الي شارع الوادي واظن ناس المحلية هرشوهو غير الاسم ل انو صهيب – الغربية سيد المحل اسمة محمد-
    ولنا عودة

  16. الزهراء كتب:

    ايضا اخوتي
    بالاضافه لما ذكر اعلاه

    توجد بعض المحلات يكون الاسم فيها حروف وارقام
    زي محلات طع 100
    اكتر حاجه لفتت نظري كافتريا في التقانه كان اسمها
    pink panther تيمنا بمسلسل الاطفال المشهور (النمر الوردي)
    الغرييييييييييبه انو الكفتريا داخل جامعه ما مدريه اساس

  17. سهيل كتب:

    يا ود الزبير إنت مستغرب من شنو ؟؟ ما يا ها دي الإنقاذ و شغاله عفيص — يعني ما جابت حاجه من عندها-
    وبرضو السوق الشعبي -تخش تلقاهو كلو ” وطني”

    كدي تعال يوم المنطقه الصناعيه — هاك عينه من الأسماء ( عاااالم المسامير – تمساح للبلالي – دقشه – اب ضراع – اب دقن – غبيش – مان كوبر (يعني راجل كوبر) – الجربوع – ووووو

  18. bakriMusa كتب:

    مكوجي السلام !!!!!
    أكيد ده فاتح في شارع نيفاشا!!!

  19. سهيل كتب:

    انا ماقادر اربط بين ” جبل الرحمه” و الإسبيرات … ولا الصياد و الزجاج

  20. الزهراء كتب:

    كيب تقولوا شنو لو شفتوا
    مس كول للاتصالات

  21. الزهراء كتب:

    ود الزبير
    السويتا فينا ما غلبت منها
    خليتنا نمشي في الشارع مشعلقين عيوننا في اليافطات واسماء المحلات
    يوم واحد بضرب ليه زول يكون وقف فجأه قدامو ويجي زول تاني لابس ابيض يوديه لي زول تاني يقطعوا ايصال

  22. د.ياسين شمباتى كتب:

    ود الزبير والسمار..سلام..

    طبعا اخوانا هنا ما بعرفوا للتمسة دى جيهة,,تلقى فندق اسمو(جزهرة مشاعر العاصمة المقدسة)!! او (زهرة القصر الابيض)!! او حتى (ميناء جدة الاسلامى)!! نفسى اعرف وجه(اسلمتو) شنو؟؟

    لكن حلاق(زعمطة) دا بقى مشهور حتى انو عملوا معاهو لقاء فى النيل الازرق..وبنجى كان حيين.

  23. مخير كتب:

    [جمبنا جامع مكتوب عليهو مسجد الهدى الاسلامى 0000 ياربى فى مساجد تانيه ما اسلاميه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s