على بالطلاق ننفصل ..

Posted: الإثنين,2 نوفمبر, 2009 by aflaiga in اخرى

نقلا عن الجزيره : حث رئيس جنوب السودان سلفاكير ميارديت مواطنيه على اختيار الاستقلال في الاستفتاء المقرر إجراؤه إذا كانوا يرغبون في أن يكونوا أحرارا .

حث رئيس جنوب السودان سلفاكير ميارديت مواطنيه على اختيار الاستقلال في الاستفتاء المقرر إجراؤه إذا كانوا يرغبون في أن يكونوا أحرارا، مقتربا لأقصى حد من الدعوة علنا لانفصال المنطقة.

وضمن الجنوب إجراء تصويت حول الانفصال عن السودان في إطار اتفاق للسلام أنهى أكثر من عقدين من الحرب الأهلية مع الشمال، لكن ميارديت كان يلتزم الخط الرسمي وهو تعزيز التأييد للوحدة.
وقال النائب الأول للرئيس السوداني في قداس بجوبا عاصمة الجنوب لإطلاق حملة للانتخابات المقررة عام 2010 والاستفتاء عام 2011 “عندما تصلون إلى صناديق الاقتراع يكون الاختيار لكم، إذا كنتم تريدون أن تصوتوا من أجل الوحدة حتى تكونوا مواطنين من الدرجة الثانية في بلدكم فذلك هو اختياركم”.
حث رئيس جنوب السودان سلفاكير ميارديت مواطنيه على اختيار الاستقلال في الاستفتاء المقرر إجراؤه إذا كانوا يرغبون في أن يكونوا أحرارا، مقتربا لأقصى حد من الدعوة علنا لانفصال المنطقة.

 —-
انا شخصيا اقرا هذه التصريحات بانها على شاكلة :
على بالطلاق كما استعدلتى معاى اوديك بيت ابوك ….
—-
اها انتو قارين  كييييييييييف ؟؟؟؟
Advertisements
تعليقات
  1. سماسم كتب:

    نجن بنقراها أنت طالق طالق طالق بالثلاثة

  2. aflaiga كتب:

    سماسم : العصمه لكن ما فى يد مؤسسة الرئاسه ما فى يدو والماذون قبيل قال على كل الطرفين جعل الستره جاذبه ولا شنو ؟؟

  3. التركى كتب:

    لما قريت الخبر أول مرة مااستغربت فحكومة الجنوب اختارت الانفصال قبل صدور القسيمة … وتقريبا الطلاق حاصل بس فى انتظار اكمال العدة (والعتاد) … الراجل ماقال كدة وبملئ خشدقيه الا بعدما زار الدول المجاورة وملا ايدو منهم … لك الله ياوطنى الجريح بسيف المصالح الشخصية والدعوة للحزب باسم القومية .

  4. حاج أحمد السلاوى كتب:

    الدينمو ..ابو الأفاليق ..
    سترة شنو ..ووحدة شنو .. الناس ديل عديييييل كدا قرروا يفرزوا عيشتهم …عبى الأقل يفضوا لينا الخرتوم شوية ( طبعن أنا عارف إنو ما فى زول حيرجع مدينته ولا قريته ..وحيبقوا لينا فى رقبتنا خاصة بعد ما تدّور الحرب الأهلية عندهم بيغادى ..حوالينا ولا علينا إن شاء الله ) .
    أنا غايتو واقف فى صف الصحفى الطيب مصطفى اللى بيدعو فيهو إلى جعل الإستفتاء عام لجميع السودانيين شمالاً وجنوباً فى مسألة تقرير المصير ..ليه الجنوبيين بس هم اللى يقرروا مصيرنا أكان وحدة أكان إنفصال ..؟

  5. سهيل كتب:

    سلام يا بلد

    والله يا عبدو المتنبي زمان تب ما غلط علي الناس ديل .. بس العصا وينها ؟؟؟

    تعرف يا فرده لمن تكون في مركب و المركب تنقلب و الناس الفيها ما بتعرف تعوم تقوم إنت عاوز تخارج رقبتك .. يلمو فيك الجماعه المابيعرفو يعومو يغطسو حجرك.. بس .. يا هو دا السودان .. فهمتا ؟؟؟

    انا شخصيآ احبذ الإنفصااااااااااااااااااااااااااااااااااااااااااااااااااااااااااااااااااااااااااال على العيش تحت ضغط الوحده.. لماذا يكون الشمال هو المسؤول عن جاذبية الوحده؟ .. و لماذا يكون حق تقرير المصير بيد الجنوبيين و حدهم؟ ..يا سيدي هم عارفين تمام العرفه إنو إذا كان الإستفتاء عام .. كان الشماليين صوتوا للتطور و النماء و السير بسرعه للحاق بالركب و لنصبح في مصاف الأمم المتقدمه بدلآ من غطيس الحجر ..

    تحياتي لكل الشرفاء.

  6. عباس ركس كتب:

    سلام يا اهل :
    اولا : هل سلفا كير يدعو باسمه ام بإسم الحركة الشعبية ؟
    ثانيا : هل الحركة الشعبية تمثل كل أو حتى معظم ابناء الجنوب ؟
    ثالثا : هل الاستقلال ( الانفصال ) يعني نهاية المشكلة بالنسبة الى الشمال ؟
    كدي نتحاور في ( الحتة دي ) ونصل لي نتيجة – في رأيي ممكن .
    سلامات يا سلاوي : الصحفي الطيب مصطفى ياهو اللي كان مدير سونا وبعدها مدير التلفزيون ايام (في ساحات الفداء) ولا واحد تاني ؟؟؟
    شمباتي : شايف لي اسم قبل يومين كدة غير الفوارة , انت ماسك ياتو خط ؟ وخليك قريب برضو !

  7. مستر راعى كتب:

    انت يا افليقا بتسال عن راينا احنا ما عندنا راى بسالونا قدام الناس رايكم شنو لكن فى النهايه الراى رايهم شاورهم وخالفهم
    هسع كان سالونى بقول ماعارف الدايرنه يسوه فى كل الاحوال مافى شى بتغير ..
    بعدين كل زول بعمل ليه شويه يلمه ويقول الفى بطنه ومن حق كل زول يتكلم هو بركه قال انفصال لكن ياربى فيه رجعه ولا طلاق بالتلاته
    غايتو فى راىالشخصى كل زول يدوه مصاريفه يتصرف براهو على قول الحبشى
    دمتم

  8. حاج أحمد السلاوى كتب:

    أخونا عبس ركس ..
    الطيب مصطفى ..إلياهو زاااااتو ..وأنا عارفك بتفكر فى شنو !!!! بس فى الحتة تقرير المصير دى … أنا معاهو ..

  9. ابكرون كتب:

    يا افليقا ياخ في ستين !!!!!وبعدين عشان التاريخ يسجل انو فقدنا مثلث حلايب والجنوب وقيمنا في هذا العهد الزاهر يا ازاهر

  10. الصادق ود البركة كتب:

    السلام عليكم
    أنا شخصياً مع فرز الكيمان ويغوروا في ستين داهية
    مش كفاية ما حصل لينا من موت وقتل لشبابنا من سنة 55 وحتى الاتفاق
    انا مش ناسي ما قاله الهالك قرنق في الإنتفاضة أنها مايو تو (2)
    أها في حالة الإنفصال منصور خالد وياسر عرمان ح يبقو مواطنين درجة كم في الجنوب ولا سيرجعوا للشمال ( العرجا لي مراحها)

  11. aflaiga كتب:

    8 تعليقات كلها مع الطلاق !!! يا جماعه انتو خفتو نشوذا سوو القالو ربنا ولا شنو ؟؟ الهجر فى المضاجع الضرب التحكيم ده كلو ما نفع ولا شنو ؟؟؟
    عشان نكون واضحين يا جماعه نيفاشا لم تنص على ما ادلى به سلفا بل نصت على ان يغلب طرفا مؤسسة الرئاسة الوحده ويرتبا الجو لها وتصريح سلفا خروج عن الاتفاق واعتقد انه نابع من استقراء استخبارى لرد فعل الطرف الثانى فسلفا يعلم جيد ان الجنوب اذا ما انفصل فلن يتبقى منه الا ولاية جوبا وسيتوزع الباقى على كينيا ويوغندا وغيرها هذا اذا سمح له اولاد قرنق بالبقاء فى السلطه …
    اقول وبصراحه هنا :
    بعض الشماليين من تجار الحرب والعنصريين سوقو للوحده الطارده .
    بعض الجنوبيين من تجار الحرب والعنصريين سوقو للوحده الطارده .
    بعض الاستعلائيين من الشمال والجنوب سوقو لهذا الحال .
    بعض الذين يحلمون بادارة الشمال منفردا وعجزو عن ادارة الدوله كامله سوقو لهذا الحال .
    وجاييكم …

  12. محمدحسن كتب:

    سلام يا أحباب
    إنت عَارف أخوي أفليقا
    حَاولنا نـَمَهـِّد للمَوضـُوع ( بسلاحَ المُوسيقى ) مِن امبَارح في الليل وَ مَا نـُشر !
    وَ اليَوم
    أخوكَ مِن قبل الظهر بتـَابع في انتظار النشر وَ مَا حَصَل
    عَشان كِدَه مَا بيقى ليهـُو طريقة غير يَضِيف مَوضـُوعَا فِي مَوضـُو امبَارح
    تـَحت نَفس العُنوان وَ حَتَّى السَاعَة مَا سُمحَ بالنشر !
    إن شاء الله خَير أخون استرايكر وَ الإخوة فِي الإشراف عَلى المُنتدَيات 🙂
    الحَاصِل شنـُو ؟!

    ؛
    وَعوَدة إلى ( الطلاق ) فِي تاريخ 10/10/2009
    نشرت الشرق الأوسط لقاء مَعَ الفريق عبدالرحمن سعيد نائب رئيس التـَجَمُّع الوَطني المُعارض ؛ خـُلاصة اللقاء :
    ———————————————————————————–
    إن الجنوب تحت حكم الحركة الشعبية لتحرير السودان، بات أقرب إلى الانفصال عن الشمال وتكوين دولة، مشيرا إلى أن سياسات الحركة الشعبية فشلت في جعل الوحدة جاذبة
    ———————————————————————————–
    وَ الكلام أعلاهُ للسيد الفريق !

    بل وَ أضاف :
    ————————————————————-
    أستطيع القول وعبر المتابعة المباشرة، إنه وضح تماما أن أسلوب الحكم الآن في جنوب السودان لا يميل إلى جعل الوحدة جاذبة. وللأسف فإننا تجاوزنا الآن أكثر من ثلثي الفترة الانتقالية وهي ست سنوات، ولم تظهر خلالها أي بوادر بأن السياسات المتبعة من جانب حكومة الجنوب تدعو إلى وحدة جاذبة.
    ————————————————————————————

    وَ لا تَعليق
    بس شوفوا لينا ( مَوضـُوعنا ) مَا لـُو عَامِل عَارض زي ( الجَمَاعَة )
    🙂

  13. moshahidah كتب:

    ما عارفه لكن اصلا بالمنطق كدا المخلينا دوله واحده شنو ..وشعب واحد ..

    لغه ؟
    دين ؟
    ثقافه ؟
    تقاليد ؟
    عرق و قبيله ؟
    و لا شنو بالضبط ؟

    اذا كانو الكورييين والكوريين منفصلين …
    والباكستان وبنقلادش ..
    و تاني منو يا ربي .؟؟؟

    المهم لو الموضوع انو عندهم ثروه تبقي انانيه ؟..
    لو عشان هم مساكين واقل تطور وخايفين عليهم ..come on وين احنا المدينه الفاضله ؟
    لو عشان نكون دوله كبيره و مليون ميل ..عملنا بيهم شنو ؟
    لو عشان ..ودى الاسوء …نأمن شرهم ويكونوا معانا ما ضدنا وما عارفه منو يدعمهم عشان تقوم حرب و كدا ..دا ما بودى لي قدام …

    اسي بصراحه كدا انا ما بحسهم نفس الجنس ودى ما عنصريه ..لانو بحب ناس منهم والتعامل معهم مريح ..لكن زى ما بحب المصريين ..الشوام ,,اي جنس تاني ..و احساسى بعدم الانتماء ليهم للاسباب اعلاه ..اللغه ,الثقافه …الخ .

    فلو عايزين ينفصلوا احسن نسهل ليهم امورهم ونبقي جيران سكره يشحتو مننا ملح و نرسل ليهم لقيمات لما نعملها …

    ودمتم ..

  14. مستر راعى كتب:

    moshahidah
    كلامك كويس لكن اذا عاينت للجنوبين حالهم حالنا عندهم برضو هدافين ولقافين واهو عايشين معانا لكن الخوف الخوف يدوهم يحكموا يجيبوا لينا ناس عوارض تانى المويه الا بالشحده ومسح الواطه
    لكن صدقنى لو على اى سودانى يدوه حقو فى يده يحكم روحه ويعمل الدايره بلا حكم بلا كلام فاضى (نكون زى ناس هاواى )شويه نشم نفسنا وناخد راحتنا ,والحكم يكون على خفيف يعنى الا الالفه ينظمنا كل زول يتادب ويقعد فى محله
    ونتمنى ناس الشمال والجنوب كل زول ياخد راحته الداير حكم والماداير غايتو حتكون فى دوله بلاد ماوراء الخرطوم ودوله المعارضه الحره ودوله اوعى تهبشنى ودوله اه ونص وهلم جرا
    وكمان ياناس الشرق مادايرين حقكم فى القسمه عشان نشغل جداول الضرب ونعلم اولادنا الحساب الماخمج بالجد بتنا فى سنه سابعه تعد باصابعيها ورجليها شفتو جنس دا ؟قال الية التعليم الجديد
    هسع كدى اليخلونا من الانفصال والقضايا الهامشيه دى ويشوفوا لينا موضوع الكهارب والمويه بعدين الدايرنه سووووووووه
    طبعا تانى الجنوب انوار وملاهى وموضه وعرض ازياء وهوليود السودان واحنا نعاين بفوق الحيطه يجينا الهبوب
    دمتم مواطنين اصحاء صالحين
    بالرغم من انى غير معترف انى مواطن واملك حق الوطنيه

  15. حاج أحمد السلاوى كتب:

    هووووى يا ناس المدونة ..
    غايتو لآ بالوحدة حنرتاح ولا بالإنفصال حنرتاح ..وسيك سيك معلق فيك … وتشوفوا برااااكم وتذكروا كلامى دا الستةالجاية بعد الإستفتاء ..وبعد شوية يجوك الدينكا جاريين يشتكوا من الشلك والنوير من الزاندى ..وتبقا القصة ..لا بريدك ..ولا بحمل براك والجماعة ديل الكورربشن ( الفساد المالى ) الموجود عندهم أسوأ مما هو عندنا ..لأنو لحد حسه من أربع أو خمسة سنوات من توقيع الإتفاقية ما فى أى حاجة إتعملت فى الجنوب .لا شارع ..ولا مستشفى ..طيب القروش دى مشت وووووووين يا ..حسين ؟
    وخلونا نشوف آخرتا شنو معاهم ..وإنا لمنتظرون !!!

  16. مُخير كتب:

    أفلايقا سلام
    أهل الدار والزوار سلامات
    وصلتني نكتة عبر المحمول مفادها:
    الزوجة: عاوز عشاء ؟؟
    الزوج: في خيارات ؟؟
    الزوجة: لا أو نعم 🙂
    السؤال المُلّح هو ليس هل نحن مع الإنفصال أم الوحدة، بل هل يُحق للحركة الشعبية أو رئيسها وشريكها المؤتمر الوطني تقرير مصير الجنوب ؟؟ الإجابة في تقديري ((لا وكلا)) ليس لدى أي منهما هذا الحق، ولكن واقع الحال السيء يقول أن ((نعم)) بإمكان كلاهما أو أيهما تحقيق الإنفصال. والأسئلة اللاحقة ماذا سيترتب عن هذا الإنفصال ؟؟؟؟؟؟؟؟
    سيذكر التاريخ أن فتح الباب أمام فرضية أو خيار الإنفصال قد تم فتحه عندما منح حزب المؤتمر الوطني (عبر مندوبه حينذاك الدكتور علي الحاج(( الذي إنفصل عن المؤتمر الوطني وحالياً قيادي في شقه المعارض الشعبي) الدكتور لام أكول (الذي هو أيضاً إنفصل عن الحركة الشعبية ويقود جناحه الخاص) حق تقرير المصير لجنوب السودان، في لقائهما الشهير بألمانيا.
    وما أود لفت النظر إليه أن المُضحك المُبكي هو أن يكون مصير الشعوب بأيدي السياسيين الذين يمكن إئتمانهم على شيء!!! قرأت مقالاً في صحيفة سودان تربيون الإنجليزية بقلم جنوبي أو جنوبية ( Roba Gibia) حول الصراعات القبلية الدائرة رحاها في الجنوب وعنوانه سؤال لماذا تجتاح الجنوب النزاعات القبلية (Why South Sudan is engulfed by tribal conflicts!) ومؤداه مُرّ الشكوى والبكاء من جور الحركة الشعبية وتفشي المحسوبية والظلم والعنصرة القبلية ..الخ المقال ودونكم الوصلة لمن يرغب في قراءته:
    http://www.sudantribune.com/spip.php?article32834
    وخلاصة رأيي هي إذا لوّح رئيس الحركة الشعبية بتغليب خيار الإنفصال لإبتزاز شريكه في الحكم فعلى كافة القوى السياسية التي إجتمعت في جوبا ومنحت الحركة شيك على بياض أن تدعو الجميع إلى الجلوس وأن يصحى المؤتمر الوطني إلى مغبة وخطورة ماهو آت، وأن ينزل من علياء غروره ويخاف الله في الأغلبية الصامتة من الجنوبيين الذين سيروحوا في الثمانيات إذا ما إنفردت الحركة بالحُكم. والموضوع أكثر تعقيداً مما يعتقده البعض وعلى الجميع التفكير في إمتلاك أعداء الوطن وأصحاب المصالح والأطماع لزمام الأمور في الجنوب، وقتها لن ترتاحوا منه بل سيكون الوضع أسوأ مما هو عليه الآن.
    دونكم الوصلة لمن يرغب
    http://www.sudantribune.com/spip.php?article32834

  17. التركى كتب:

    فى القولد التقيت بالصديق أنعم به من فاضل صديق
    خرجت أمشى معه للساقية ويالها من ذكريات باقية
    فكم أكلت معه الكبيدة وكم سمعت اورو والودا
    ودعته والأهل و العشيرة ثم قصدت من هناك ريرة
    نزلتها والقرشى مضيفى وكان ذاك فى أوان الصيف
    وجدته يسقى جموع الابل من ماء بئر جره بالعجل
    ومن هناك قمت للجفيل ذات الهشاب النضير الجميل
    وكان سفرى وقت الحصاد فسرت مع رفيقى للبلاد
    ومر بى فيها سليمان على مختلف المحصول بالحب امتلأ
    ومرة بارحت دار أهلى لكى أزور صاحبى ابن الفضل
    ألفيته وأهله قد رحلوا من كيلك وفى الفضاء نزلوا
    فى بقعة تسمى بابنوسة حيث اتقوا ذبابة تعيسة
    مازلت فى رحلاتى السعيدة حتى وصلت يامبيو البعيدة
    منطقة غزيرة الأشجار لما بها من كثرة اأمطار
    قدم لى منقو طعام البفرة وهو لذيذ كطعام الكسرة
    وبعدها استمر بى رحيلى حتى نزلت فى محمد قول
    وجدت فيها صاحبى حاج طاهر وهو فتى بفن الصيد ماهر
    ذهبت معه مرة للبحر وذقت ماءا لا كماء النهر
    رحلت من قول لود سلفاب لألتقى بسابع الأصحاب
    وصلته والقطن فى الحقل نضر يروى من الخزان لا من المطر
    أعجبنى من أحمد التفكير فى كل مايقوله الخبير
    ولست أنسى بلدة أم درمان ومابها من كثرة السكان
    اذا مر بى ادريس فى المدينة ويالها من فرصة ثمينة
    شاهدت أكداسا من البضائع وزمرا من مشتر وبائع
    وآخر الرحلات كانت أتبرة حيث ركبت من هناك القاطرة
    سرت بها فى سفر سعيد وكان سائقى عبدالحميد
    أعجبت من تنفيذ الأوامر بدقة لسلامة المسافر
    كل له فى عيشه طريقة ماكنت عنها أعرف الحقيقة
    ولا أشك أن فى بلادى مايستحق الدرس باجتهاد
    فأبشر اذن ياوطنى المفدى بالسعى (منى) كى تنال المجد =================================

    ايييييييييييييييه دنيا

  18. aflaiga كتب:

    مخير يا اقول ليك شنو ؟؟ لا فض فوك ..
    تخيل حتى الطيب مصطفى الذى يذكر الانفصال فى كل صلاة وقبل السجود لم يكن بامكانه ان يذكر ذلك لولا نيفاشا التى مههدت له الطريق ليقول ما يقول !!!!
    نيفاشا فيها الحل كل مشاكل السودان اذا طبقت كما هى دون اهواء او غرض اولا يكفى انها :
    اوقفت الحرب
    اعادت مهدت للانتخابات والتحول الديمقراطى فتبجح من تبجح
    هيات فرصه للشمال والجنوب لان يزيلا كل مرارات الماضى
    لكن تقول شنو فى الاهواء والاغراض .
    جاييكم ..

  19. aflaiga كتب:

    تجربه عمليه لثلاث اشهر فقط :
    اسكتو اصوات الانتباهه
    اسكتو اصوات الصحف الجنوبيه
    اجعلو انسان الشمال والجنوب يحس بطعم السلام
    ازيلو النظرات الاستعلائية بين الجانبين
    حاربو تجار الحرب والسلام
    اجلو الانتخابات لحين اقرار وضع سياسى مريح وصحى

    بعدها افتحو الصناديق للتصويت لن تجدو حينها من يحمل الصناديق
    لان الناس ستكون حينها تحمل معاول البناء والمناجل والمفكات والمفاتيح والسبح والصليب وكل منهمك فى بناء السودان لان السودان بدا يعطى حقيقة ابناءه حقوقهم او بالاصح بدا وكلاء السودان ينتبهون الى انه ( كفاااااااااااااااااااااااااااااااااااااااااااااااااااااااااااااااااااااااااااايه ) ..
    جاييكم يا من قنطتم من وحدة السودان بسبب صداع الانفصاليين ..

  20. حاج أحمد السلاوى كتب:

    الدينمو ..أبو الأفاليق..
    لستة حاجات الطلبتها فوق …عاوزه ليها 30 سنة عشان تتحقق ..مش تلاته شهور .

  21. aflaiga كتب:

    السلاوى : معناتا المشكله فينا وليس فى نيفاشا او السلام !!!!!!!!!!!

  22. ابكرون كتب:

    ليلة الامس في حي الواحة بامدرمان يوجد عدد من الجنوبيين يسكنون في سكن غشوائي في رواكيب بالقطع الخالية وبعضهم يسكنون في المنازل الغير مكتمله خرج وتجمع نحو 30 منهم يصيحون كالهنود الحمر ويزغجون اصحاب المنازل بعد منتصف الليل ولا علم لاحد بالسبب الاساسي او اصل المشكلة ….ثم انقضوا علي نقطه بسط الامن بالحجارة والسيخ والسواطير اطلق عليهم الشرطيان بالنقطة الاعيرة الناريه مما تسبب في خروج اهل الحي ومطاردتهم ….استمر هذا الانفراط الامني لساعة ونص ولم ياتي دعم للنقطة الا بعد فتره
    لكم ان تتخيلوا ان هذا يحدث وسط امدرمان وفي ارقي احياءها وقال بسط الامن قال وما عارف ما ذا سيحدث في مقبل الايام !!!!!!!!!!!!!!!!!!!

  23. سهيل كتب:

    افليقا : نفسي اقدر اتفاءل زيك كده .. الله اعلم

  24. aflaiga كتب:

    ابكرون : لا يعلو على القانون اى شخص جنوبى او شمالى خلينا واضحين يا جماعه هل اقرت نيفاشا بان يتفلت من يتفلت ؟؟ هل قررت نيفاشا ان ينفرط عقد الامن ؟؟ نيفاشا شارك فيها كل الامنيون والعسكريون والشرطيون من الطرفين ووقع عليهم عبئ التامين الذى هو احدى عوامل جاذبية الوحده – فى زمن الرسول كان هناك من يتذمر من صلح الحديبيه وكان هناك من يستغله لمصلحته وكان هناك من يضع الشيطان فى التفاصيل .. بالله عليكم لا تعلقوا كل الاخطاء فى نيفاشا وليس كل من عجز من الاجهزة الامنيه عن القيام بدوره يرمى العبئ على نيفاشا هناك لجان مشتركة بين الطرفين للتامين ولحفظ حقوق الطرفين فى عاصمه امنه ابحثو عمن قصر فى واجبه .. بعدين بعض اخواننا الجنوبيين ديل اصلا لمن تقوم بيهم بيتفلتو ولمن يشوفو القوه القانونيه الجنائيه بيتلمو ولمن تفك الصباح بيكونو عسولين عديل كده ومحرجين عن عمايل امبارح ..
    اكرر على الجميع وقف مظاهر الاستفزاز عشان نقدر تعيش حلوين كان بى وحده او انفصال …. مع احتفاظ كل مواطن شمالى كان او جنوبى بحقه فى الدفاع عن نفسه بالقانون او بما يملك من قوه لا تتعدى رد الاعتداء الى المغالاه فى الرد ..

  25. aflaiga كتب:

    ود الخلا : فى ذمتك يا امين الا يعز عليك ان تورث ابناءك دويله سودانيه بلا جنوب ولا شرق ولا غرب وربما بلا شمال ؟؟!!! يعنى الورثك ليها كامله بى مشاكلا ارجل منك فى شنو ؟؟؟ راجع نفسك اول بعدين اقطع من جسمك وارمى للكلاب وانت عارف الكلاب لمن تبدا تاكل ما بتقيف على المرمى فى الواطه بس ولا شنو ؟؟؟
    ايه يعنى شكله فى الخرطوم ماتو فيها نفرين وايه يعنى اعتداء فى الكلاكله ماتو فيهو عشره مش احسن من زمان كل يوم خيمه عرس شهيد وكل يوم ماتم فى بيت من بيوتنا …
    ما ترك قوم الجهاد الا وذلو والجهاد الان جهاد النفس عن الهوى وعدم التفريط فى الحقوق ..
    قد يقول قائل اننا قد هننا ودعونا الى السلم فى نيفاشا ونحن الاعلون لكن اليس دفع الضرر باغلب من جلب المصلحه ؟؟؟
    اخوتى للحرب تجار يريدون اشعالها من جديد ففوتو عليهم الفرصه
    اخوتى للانفصال تجار يريدون ان ينفردو بحكم مية ميل مربع كما يهوون ففوتو عليهم الفرصه .
    وجاييكم

  26. aflaiga كتب:

    شباب :
    دعونا نتامل بصدق ماالات الحاضر والمستقبل :
    هل قراتم نيفاشا بترو ودون عجله بل هل قراتموها فى الاساس ؟؟؟
    هل كان احدكم يتخيل ان تاتى الحركه الشعبيه الى الشمال وتعيش بيننا بقادتها وجنودها وساسييها هكذا كما تعيش الان فى سلام الا من بعض التفلتات التى يغذيها من نعرفهم وتعرفونهم قاتلهم الله اينما حلو ؟؟؟
    الخص رؤيتى لما يحدث الان فى الاتى :
    * لم تاخذ ثقافة السلام فرصتها كما ينبغى .
    * ما زال بعض الناس يدعو بدعوى الجاهليه والعنصريه .
    * فى الحكومه اعداء للسلام وفى الحركه ايضا .
    * فى الحكومه من يسقط صراعاته على نيفاشا والسلام وفى الحركه ايضا .
    * فينا من لا يتخيل ان يعيش الجنوبى كمواطن درجة اولى اسوة به هو .
    * فى الجنوبيون من الجمته عقدة النقص عن الرؤية السليمه .
    * فى الجنوبيين من لم يعتد بعد على اكل العيش المدنى الحر ولم ينس الغابه .
    * فى الشمال من لم يصصدق ان تووقف تجارة السلاح والملح وتجارة الحرب وتتحول لتجارة مواد البناء والتعمير !!
    * فى العالم من يسعى كى لا نستقر وننعم بالسلام .
    ارايتم كيف ان اعداء السلام كثيرون ولكن بالمقابل :
    * فينا من هو متسامح متصالح مع نفسه واخوته فى الغرب والجنوب والشرق والوسط والنيل الازرق .
    فينا من ولاؤه للوطن اعلى من اى ولاء سوى الولاء لله .
    فينا من يريد اقامة دولة مدنيه متحضره والانطلاق بالسودان من كبوته .
    فينا من يعلم جيدا من هو العدو الحقيقى
    وفينا من هو مستعد بان يقبل التضحيات من اجل سلام عزه لا ذلة فيه ولا استسلام
    بقى فقط ان نستتى انفسنا من الداخل هل نحن انفصاليون بالفطره ؟؟؟
    ان كانت الاجابه بلا رجاء لاتعطو الفرصه لمن يبث سمسمه بينكم واخوتكم فى الجنوب فالله سوف يسالهم عنا ويسالنا ..
    وكفى …..

  27. سهيل كتب:

    افليقا : ان كانت الاجابه بلا رجاء لاتعطو الفرصه لمن يبث “سمسمه “بينكم واخوتكم فى الجنوب فالله سوف يسالهم عنا ويسالنا ..

    شنو يا معلم ؟ هسي سمسمه الجابه هنا شنو ؟؟ وماهو وجه الشبه بين السم و السمسم (ه) ؟؟ .. ولا دا يمكن زي صاحبك حمدي بدرالدين لما سافر لندن و اشتغل في هيئة الإذاعه البريطانيه .. لما جا يقرأ الاخبار قال هنا امدرمان بدل ما يقول هنا لندن … يا عيني

    إنت يا افليقا .. ما قريت كلام بتنا مشاهده كويس ولا شنو ..

  28. ابكرون كتب:

    لا احب الطيب مصطفي ولا الحزب الذي ينتمي اليه والذي اتي به ولا حزبه الجديد السلام وشنو ما عارف…..ولا اتفق مع افكاره الا هذا الجانب المتعلق بالوحدة والانفصال…..
    دوله كيوغسلافيا انفصلت الي 6 دول كان يجمعهم الكثير وكذلك تشيكوسلوقاكيا والاتحاد السوفيتي والنتيجة دول قويه وحره ومتطورة فما الخوف علي دولة السودان الشمالي بدون الجنوب والذي يفرق بيننا اكثر وكفانا نصف قرن ونيف من الزمان من حروب وعدم استقرار لا لشي سوي ان المستعمر اختط خط الحدود الحاليه وجمع بيننا

  29. ود كبيدي كتب:

    والله يا جماعة الانفصال أفضل للجنوب وللشمال لعدم الرجوع للحرف وزهق الأرواح لكن إذا حصل إنفصال المشكلة تكون هناك مشالك جوار ويبقى الوضع زي فلسطين وإسرائك في علاقة الجوار لكن في النهاية ما يبقى لنا غير الدعاء لوطننا السودان بالاستقرار.
    آممممممممممين

  30. moshahidah كتب:

    زي ما قلت يا ابكرون
    “والذي يفرق بيننا اكثر وكفانا نصف قرن ونيف من الزمان من حروب وعدم استقرار لا لشي سوي ان المستعمر اختط خط الحدود الحاليه وجمع بيننا”

    لخصلت الفي نفسي كلو …مع انو كلام افلقا الشاعري اعلاه ..خلاني للحظه اراجع نفسي واقول امكن مع الزمن زي ما حصل للامريكان نبقي واحد “سود بيض” من ناحيه ثقافه ولغه و غيره ..لكن ليه ؟ عشان شنو الصراع حب للمال ..للكتره و العزوه ..حب فيهم وشفقه ..ولا خوف ..مافي سبب وجيه واضح لي ..

    ———————–

  31. مُخير كتب:

    الحبيب أبكرون
    الفاضلة مشاهدة
    الأعزاء في كل مكان
    السلام عليكم
    القياس على ما حدث في يوغوسلافيا غير دقيق، والفارق ما بين أوروبا وإفريقيا أكبر من البحر الأبيض المتوسط ويقاس بعد سنوات ضوئية. وأعجبني المثل الذي ضربه أفلايقا عن أجزاء الجسد والكلاب فهو بليغ ويحكي القصة برمتها.
    القوى الدولية ذات الأطماع تسعى جاهدة إلى تقسيم الكونغو كينشاسا (زائير سابقاً)، أي لم يتم الإكتفاء بفصل الكونغو برازفيل والآن سواء كلاب أوروبا أو الكلب الأمريكي تلهث وراء الثروات المعدنية المهولة غير عابئة بمعاناة البشر في الكونغو، عن شخصي لا استنكر خيار الإنفصال إذا أراد الجنوبيون ذلك، بل أحترمه حينها، لكن الظروف الراهنة تدفع بالجميع لإختيار الإنفصال لأنه في تقديرهم أفضل من الواقع الراهن. المطلوب تصحيح الأوضاع الخاطئة وتوفير أساسيات العيش الكريم للجميع وبسط الأمن والحريات بعدها من شاء فلينفصل ومن شاء فليتحج هذا هو الموضوع بإختصار مع خالص ودي وإحترامي للجميع وآرائهم

  32. يا افلايقا – لو وقفنا الحاجاات الانتا طلبتها فوق دى – برضو ماعلق بالنفوس ما ح يمشى ساكت كده او يروح .
    الانفصال هو الحل الوحيد – وبعد كده نشوف اليحصل شنو !

  33. حاج أحمد السلاوى كتب:

    الأحبة الكرام أبناء الكرام ..
    لم أفاجأ صباح اليوم بتصريح السيد وزير الخارجية دينق ألور الذى كما يقول المثل وافق شن طبق ( أى موافقة لرأى زعيمه سيلفاكير ) والذى قال فيه بالحرف الواحد 😦 لماذا استمر فى دولة تقمعنى بإسم العروبة والأسلام ؟)..
    إذاً فليذهبوا إلى الجحيم غير مأسوفاً عليهم إن كان هذا خيارهم الذى ارتضوه ..لماذا نغصبهم على وحدة لا يريدونها وهم يشعرون أنهم مكرهون عليها ..فما هو تعليقكم يا أبو الأفاليق على مثل هذه التعاليق( جمع تعليق)؟
    ولكن وكما قلت لكم سابقاً أنهم حيبقوا لينا فى رقبتنا حتى فى حالة الإنفصال ..لن يستطيعوا الإستغناء عن الجزء الشمالى ..فليس لديهم مقومات إقامة دولة منفصلة إلا إذا أعادوا الإنجليز مرة أخرى إلى جنوب السودان ليحكموهم ويسيروا لهم أمور دولتهم المزعومة ..ولكن الإنجليز لن يحضروا وسيرسلوا الإسرائيليين بدلاً منهم ( الإسرائيليين أصلهم موجودين فى الجنوب ).
    المهم والشاهد فى الأمر أنهم أجمعوا امرهم على فرز عيشتهم ..ومبروك وسعيد عليهم ..بس يحلوا عننا بمشاكلهم ..
    الدينمو .. أفليقا ..أراك متفائلاً أكتر من اللازم ..كدى خت الكورة فى الواطة ..و أبو الطيب المتنبى زماااااان قال شنو ؟
    وخلونا نشوف آخرتا شنو !!

  34. سهيل كتب:

    ينصر دينك يا استاذ “نفيسه” قصدي جدو سلاوي.. قال كافور الإخشيدي قال

  35. ياسين شمباتى كتب:

    الحبيب افليقا..ما ياهو دا العارفنو عن الراجل من زماااااااان,,انفصالى عدييييل كدة,,عكس دكتور قرنق الذى كان يأمل فى سودان جديد وموحد..

    المهم فى الامر انو مهما حصل فهذا هو المتوقع حدوثه منذ امد بعيد..حقيقة ما عايز البلد تتمزع وتتجزأ,,لكن هل سمعت قبل كدة باى اقليم فى العالم خيروهو بين الوحدة والانفصال اختار الوحدة؟؟؟؟انا غايتو ما سمعت وما قريت عن هكذا حدث..

    اما (الطيب مصطفى) الذى سألت عنه ياركس فهو هو الرجل الالعبان الخبيث النفس والطوية..قاتله الله حيث كان..

    ركس..سلام..انا فى محلى ذااااااااتو..وينك انت؟؟

    التركى..طبعا الطيب مصطفى قال انو فى سودانيين لسه عايشين بعقلية (منقو قل لا عاش من يفصلنا)!!!! شفت العجايب دى!!؟؟طيب الشهداء ديل راحوا ساااااااى كدة ولا شنو الرأى!!؟؟ عجبى منهم…

  36. الزهراء كتب:

    السمار الكرام

    وحدة شنو نحن ناقصين والله ديل يدوهم فرصه فينا ولا يخلوهم يشاركونا الا نموت بي مغستنا
    ما قلنا حاجه اتعلمووا واتظارفوا لكن ما مفروض يكونوا اكتر من جيران بالنسبه لينا
    ولا الدين بيجمعنا ولا الثقافه ولا درجة الوعي والفهم ولا العادات والتقاليد

    لذلك ما مفروض الناس تتقهم مره اخري شمالنا وبنقدر عليهو اليقدروا هم على بلدهم
    وكمان بيطالبوا بالانفصال وهم المحتاجين لينا سبحان الله- لكن هم يا اخوانا مدفورين من جهات خارجيه لها المصلحه العليا بالانفصال وزي ما قال ابوي السلاوي ده مخطط اسرائيلي بحت. للسيطره على منابع ومجاري النيل والاستيلاء على الثروات الموجوده في السودان وغير ذلك المنطقه استراتيجيه جدا لاقامة قاعده اسرائيليه للتجسس والامور الفارغه بتاعة اسرائيل التي لا تحصى ولا تعد

    لك الله يا وطني العزيز

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s