شايفنى كيف ؟؟

Posted: الثلاثاء,3 نوفمبر, 2009 by aflaiga in اخرى

صديقى – س – دوما ما يعشق ان يتجول كدارى فى الشارع والسوق العربى بالتحديد عشان يشوف كل فتره الناس شايفاهو كيف وفى احدى الايام جاءنى مبسوطا بسبب جولته فى ذلك اليوم وقال لى بنشوه غامره :

س : تعرف  يا افليقا الليله حسيت بانى زول محترم ومالى محلى جدا اتخيل ؟؟

افليقا : كيف يا س ؟؟

س : اول شيئ جيت ماشى جنب برج البركه قام الزول تاجر العمله قال لى ( صرف صرف يا محترم ) طوالى جانى احساس انو شكلى زول عندو صرف مع انو عمله سودانيه ذاتو ما كان فى جيبى خلى صرف …!!!

افليقا : والله دى حاجه كويسه اها وتانى ؟؟

س : جيت ماشى فى برندات البرج جنب الصراف الالى قامت واحده اموره كده  قالت لى لو سمحت يا شاب الباب ده ابا يفتح ممكن تفتحو لى – اها فى اللحظه ديك حسيت بانى شاب جد جد مع انو المره الله يسامحا شابكانى يا ابونا يا ابونا لمن يوم قلت ليها انا ابوك ؟؟ هو ابوك بيقول لى يا ابنى !!! ببو يشقك ..

افليقا : اها وتانى ؟؟

س : جيت ماشى فى شارع القصر وعاينت لى البوابه مسااافه قام العسكرى قال لى انت يا حيوان امشى من هنا – وفى اللحظه ديك حسيت بانى لسه  مواطن محترم !!!

افليقا : واها تانى ؟؟

س : جيت جنب موقف الاستاد قام بتاع التاكسى قال لى اتفضل يا محترم امدرمان ؟؟ فى اللحظه ديك برضو حسيت بانى محترم وشكلى زول بيركب تكاسى مع انو ده الشبط التلتين يتقطع فى المواصلات خلال سنه !!

افليقا : اها وتانى  ؟؟

س  : اها الاهم من ده كلو جيت راجع البيت المره قالت لى حباب ابو الرجال جيدن جيت – اها فى اللحظه ديك عرفت طوالى انو المره دى عاوزه حاجه !!!!

 

 

Advertisements
تعليقات
  1. التركى كتب:

    ههههههههههههه لكن مبالغة أها وصحبك دا ماصحا من النوم وقت سمع صوت المرة ….. دا يكون مش محترم بس وكمان شجاع … ياخ الدنيا بين عيدين المرة تطلب شنو ولا شنو تانى .

  2. مهيرة كتب:

    السلام عليكم الراي والفهم
    افليقيا : لسة ساقيتك مدورةمع صاحبك س ويومياتو المضحكة المبكيةمن دولاب الحياة في حياة المواطن في امازونيا ولامن تكون المعاناة كثيرة وان تاتي احيانا الراحة والدعة وهذه الاخيرة بعيدة المنال الآن و اصبح اغلب الشعب الفضل كالح وكادح وما لاقي غير انو يسخط من كل شئ وان اقتربت رياح التغيير لكن ؟؟؟ هل الي الافضل ام الاسوأ وهل نحن ملزمون بالتصويت للاختيار ام ماذا؟؟

  3. البشاوى كتب:

    افليقا
    سين دة مالو التقول بعرفو من زمان ؟ مرة زى عمايل س دة دخلت بالعربية توش فى الشارع مابين الولاية سابقا وجنينة السيد على — وناسى انو بقى زى شارع على عبداللطيف — كمية من البنادق والعساكر اتلمو فينى التقول سايق دبابة —
    قلت ليهم ياجماعة اخوكم ضيف جاى الخرطوم لى عزاء وما عارف الشوارع دى والعربية شدة من احد الاخوان — الجماعة سامحونى وقالو لى تانى ماتسوق براك فى البلد دى لانو ممكن تروح فى ستين داهية بالطريقة دى —
    فى اللحظة ديك حسيت انو البلد دى مامحترمة ابدا !!!!!!!!!!!!!!!!!!!!!!!!!!!!!!!!!!!

  4. البشاوى كتب:

    افليقا
    سين دة مالو التقول بعرفو من زمان ؟ مرة زى عمايل س دة دخلت بالعربية توشلسيد على — وناسى انو بقى زى شارع على عبداللطيف — كمية من البنادق والعساكر اتلمو فينى التقول سايق دبابة —
    قلت ليهم ياجماعة اخوكم ضيف جاى الخرطوم لى عزاء وما عارف الشوارع دى والعربية شدة من احد الاخوان — الجماعة سامحونى وقالو لى تانى ماتسوق براك فى البلد دى لانو ممكن تروح فى ستين داهية بالطريقة دى —
    فى اللحظة ديك حسيت انو البلد دى مامحترمة ابدا !!! فى الشارع مابين الولاية سابقا وجنينة ا!!!!!!!!!!!!!!!!!!!!!!!!!!!!!!!!

  5. ودالفتيحاب كتب:

    الدنمو أفليقا
    لكن صاحبك أكيد محترم ،لانة شعر أنو محترم ،ولو ماكن محترم فهو محترم .

  6. لمى هلول كتب:

    سلامات كميات بلا فرز
    صاحبك دا على حسب قناعاتى
    ماعارف زى روحوا محرقاهوا شديد
    وما لاقى ليهو بر يتكى عليهو
    صاحبك دا عندو ازمة حنان وازمة استحمال
    اما عن الحنان الظروف قارصة شوية فى بيتوا
    من ست الحنان مافى قاب خاص بيناتم
    طبعا دا حسب العرف السودانى البيقول
    الراجل والمرا عيب يحبوا بعض بعد الزواج
    وازمة الاستحمال الظروف مجتمعة قارصه عليهو شديد
    والوضع ما مطمن داخل البيت التزامات رسمية بدون عواطف ومشاعر
    وخارج البيت عسكر وبندقية وشمال بدون جنوب
    اها س ماعندوا غير انوا يرجع الزمن الجميل
    بس تنبيه لسين ما يبقى ام العيال سبب
    مقال رائع وممتع

  7. مستر راعى كتب:

    ههههههههههههه
    س : جيت ماشى فى شارع القصر وعاينت لى البوابه مسااافه قام العسكرى قال لى انت يا حيوان امشى من هنا
    عارف يا حيوان دى جميله شديد لانه بتاكد مافى فرق بينا وبين الحيوانات سوى اللغه ولو اتعلمنا لغه بعض صرنا قبيله من قبائل الغاب والله يرحم ناس الغابه (لو فى الشارع ولا البيت ماقالوا ليك يا حيوان اعرف انه فى شى ناقص)
    برضو مفروض لمن الشحاد يوقف س ويشحده يتاكد انه زول جيبه مليان وبدى الشحاحيد
    ولمن تكون لابس (فل سوت)وياجروا ليك عربيه بتلاته مليون عشان وسامتك ومخك مافى يبقى برضو انت زول )طبعا دى دايره ليها وقفه استحمه كويس استعمل ديانه وساونا وظبط حالك واعمل لروحك لوك جديد تشتغل فى اجعص شركه بس سماحه ساااااااااااااااااااااااااى ولا شنو —-

    كسرة:فاكر يا افليقا انه رصيدك انتهى لكن ماشاء الله شكلك دخلت شبكات تانى وبدوك رصيد مجانى
    دمتم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s