الجاى من الشمس الضل ما بلمو ..

Posted: الأربعاء,4 نوفمبر, 2009 by aflaiga in اخرى

صديقى س من اسره كريمه اصيلة المنبت عزيزة النفس نزيهة اليد وعفيفة اللسان ولد وتربى فى ظل هذا الجو فنشا كريما مكرما طيبا شجاعا غواثا للملهوف مبادرا للخير قائلا للحق ولو على نفسه تعلم فى كنف اسرته النشاط والهمه والمبادره ورفض الظلم والعيب وعاش على ذلك حتى التقى بها ..

كان فى حوجه شديده الى زوجه فهو وحيد ابويه يرقد ابوه المريض على شفا الموت ويتمنى ان يرى ابناءه وكانت امه تتمنى ان ترى جديد ابنها الوحيد – بسرعه شديده ارتبط بها وتزوجا – الظروف التى اجتمعا فيها لم تسمح له بان يبحث عنها كزوجه ما بعد الزواج كان يرى فيها عفة نفسه من المزالق كانت ذات دين وخلق لم يبحث عن اكثر من ذلك بل حتى لم يضع الجمال معيارا لارتباطهما .

وبدات الماساه :

لم تكن حوجاته المعيشيه حين ارتبط بها تذيد عن اكله وشربه الذى كانا يتشاركان صنعه ولكن مع اول بدايه تصادم بينها وبين اهله الذين يشبهون سلوكه تماما من حيث الهمه والنشاط ورفض العيب والحال المايل بدا يراها بعين اخرى – كان يقارن بين بيته وبيت اسرته من حيث النظافه والاكتمال والاهتمام – صار يقارن بين حاله وحال بقية الازواج فى متطلبات الزواج – فاكتشف انه قد تزوج ب ( رمتاليه ) تعشق الكسل لم تتعلم فى بيتها كيف يتم خدمة الزوج وتلبية متطلباته ولا كيف يكون احترامه واكرامه فى نفسه واهله وعياله – كان ما بينهما من حب يغطى على كل المنغصات الحياتيه التى تمر بهما سواء تلك الحقيقية او المصطنعه من كيد اسرته احيانا بهما او بها بالاصح فاسرته رفضت هذا الكائن الذى لا يشبههم لا سلوكا ولا اخلاقا ولا طبائع .

صار هو مصدر تندر اهله وبنات اهله اللاتى ركلهن من اجلها او اللاتى يرفضن اساس زواج الغريبه فقد كانت من قبيلة اخرى غير قبيلته ومن قبيله غير محببه لاهله تماما !! بدات معاناته تذداد يوما بعد يوم كلما كبرت الاحتياجات والمتطلبات صار يشاهد يوميا تقصيرا ىف حقه وحق اسرته وعياله بل فى حق نفسها احيانا فهى من النوع الذى من اجل راحته يمكنه ان يركل كل الدنيت ويتخلص من كل الارتباطات التى تعيق راحته .

لم يقصر فى حقها فلم يشهد اى من الاطراف حولهما انها باتت جوعانه او محتاجه او مريضه يوما من ايام حياتهما بل امتد عطاؤه لاهلها حيث شهدو تغييرا كبيرا فى الذوق والرقى ومتطلبات الحياه كانت اكراما منه لها ..

ولكن …

كانت تقابل اكرامه لها باهانته فى احتياجاته .

نسى تماما تعابير الكرم التى تعود عليها فقد اصبح ملقبا ب ( ضل مرتو ) حيث جرجرته الى ان يترك بيته ويغلقه وينتقل الى منزل اهلها حيث يعيش هناك كما تعيش الحيوانات والمساجين .

نسى تماما كيف يعيش الرجل فى بيته وكيف يدير اموره بمنعزل عن الناس .

كانت تقابل كل اكرام له لها باجحاف وعدم حمد وعدم تقدير ..

تدهورت حالته النفسيه والصحيه غير ما مره .

فى النهايه وقف يجرد حساباته وجد نفسه شبح انسان منزوع الكرامه والحقوق والكلمه فى بيته .

هددها غير ذات مره بالطلاق وبالزواج من غيرها كانت تاتى منكسره وتعده بانصلاح الحال ولكنها ما ان تلتفت الى سلوكها الداخلى الذى اعاق حياتهما حتى تعود كما كانت قمة فى الرمتله والعصيان والسلوك غير الكريم معه .

استفتى قلبه فوجد انه ما زال يحبها برغم كل شيئ .

استفتى عقله فوجد انه لا سبيل غير الفراق !!

اصبح ما يربطه بها هو مجموعه من الذكريات الجميله فى سنتهم الاولى واطفال لا ذنب لهم سوى انهم ولدو وتربو فى كنف هذه الاسره التى هى على حافة الانهيار ..

واخيرا طفق يستفتى من حوله …

اجابه اول زميل له : بالله انت صحيت يادوب عشان تشوف حالك الزفت ده ؟؟ ياخى المره دى مسحت بيك الاواطه لست انت فلان الذى نعرفه خساره كبيره والله !!!

اجابه اول قريب : مش دى الابيتنا عشانا وقلت هى بالدنيا عندك اها خم صر ..

المشكله انها تصر على انها لم تقصر فى حقه وترى انها قمة فى العناية ببيتها وانه يرى كل ماحولهم بمنظاره هو الذى يخلو من العدل ..

والمشكله الاكبر انها احيانا تعترف بتقصيرها قائلة ( انت عارفنى من اول يوم انا ما بقدر على الشغل والتعب ) مع انه يعلم ذلك تماما لكنه لم يطلب سوى حقوقه او تعويض معنى عنها لكنها تصر على العجز عن الايفاء بحقوقه وفى نفس الوقت الاصرار على سلبه حقوقه المعنويه التى اقلها الاعتراف باكارمه اياها وصبره على عجزها تجاهه فى توفير احتياجاته التى برغم مرور زمن على زواجهم لم تتعدى اكله وشرابه وملبسه وعلاجه !!!

دخل فى عزلة نفسيه صار ينظر لحال اصدقائه الذين لم يكونو يرقون الى مستوى همته او نخوته او كرامته ويرى حاله الان كيف صار هزيلا  جسديا ومعنويا صار شبح انسان بعد ان كان بيهدى الضال ويكرم الضيف وحلال المشبوك !!!

تذكر يوما ما وهو فى لحظة صفاء مع نفسه ذلك الراى الذى قاله والده رحمه الله حين اتى بها اول يوم الى المنزل كانت كلمه عابره مرت عليه مرور الكرام لكنه الان فقط يتذكرها وهو على شفا اتخذا قراره المصيرى النهائى :

يا ولدى الله يعينك لكن الجايى من الشمس الضل ما بلمو !!!!!

كسره :

صديقى س الان يقف على شفا حسم امره وهو يدرك تماما انه يمكنه ان يعود س الذى نعرفه ويعرفه الجميع رجاء دعونا نناقش مشكلة صديقى س علنا نهديه الى حل يزيل به همه …

Advertisements
تعليقات
  1. حل مشكلة (س) يا ولدنا تكون فى الاتى:
    انفصاله عنها ليحفظ باقى كرامته – وليحفظ ماتبقى من صحته ليستطيع مشاهدة ابنائه وهم يكبرون وبوجوده ( حتى وان كان على البعد ) من ان ينشاؤ وهو فى رحمة مولاه. او فى اسواء الفروض بغير صحة فلايستطيع ان يمنعهم او يقومهم كما يريد .

    ——————-

    شايفك مكبر اللفة.

  2. aflaiga كتب:

    ستريكر : ما مكبر اللفه الموضوع عند اموله راجعا ..
    قلت لى يفكها عكس الهوا ويسوى شنو مع الهوى ؟؟؟

  3. اسا هو لازم يطلع من مرحلة الهوى – لانو الهوى هو الخلاهو يبقى كده .

    اديك الزيت:
    ينسى تماما حكاية الهوى – ويشيلو برا – ويفكر فى اولادو وبس – وبعد كده فى صحتو ويخلى الهوى يمشى فى ستين هوا.

  4. aflaiga كتب:

    ستريكر : اها المشكله س ده زول ولوف وهو لو بيقدر يجلى الهوى كان جاب ليهو الهواء ده كلو ؟؟؟ برضو حل مقبول نديهو ليهو لو ما لقينا حل من باقى الناس …..
    انتو يا ناس س ده مش قال ليكم على شفا حفره من القرار يعنى الا يعزمكم فى طلاقو رحله !!!؟؟؟؟

  5. المشكلة انو الهوى بتاعو عارف الحتة دى وشكلو ماسكو منها – لما صحبك (س) يوريهو انو بقت مافارقا معاهو – احتمال – ولعل وعسى يرجع للهوى راسو – لكن برضو اسمع كلامى وخليهو ( يكبر اللفة ).

  6. التركى كتب:

    الحبيب افليقا :: ياخ سين دا خشا طريق اتجاه واحد وبعدين الغلط بدأ مما فكر يقارن بينها وبين أهل البيت دى اسرة مختلفة تماما وشخصين التقو رب صدفة وعزمو على مواصلة مشوار مش ساهل ابدا عشان كدة كان من الأول يفرزو عيشتهم طيب دا ماحصل يتريثو فى حكاية الاطفال دى لحدة مايلقو الطريق البوصلهم لهدفهم برضو ماحصل يقعدو فى الواطة دى ويشوفو النقص وين ويسدو … ليه اصلها (بهيمة) مالازم تكون عندها عقل وعارفة انو الطريق دا آخره فراق عمر وشتات عيال … من رأئي انو يشوف شئ غير ابغض الحلال ولو أدى الى هجرها … الله يكون فى عونك ياس

  7. طارق أب أحمد كتب:

    أفلى مالك قلبتها شات مع صاحبك

    ياخى الأصل إنو الجايه من السما بتتلقاها الواطه ((الأخ الجرايحى المعنى أن الآتيه من السماء تتقبلها الأرض) و المكتوب على الجبين لازم تشوفوا العين صاحبك سين إختار ودى قسمتو لازم يتعلم يشوف الأشياء الإيجابيه فى ص ويبدا برنامج إعادة نأهيل لىها و يحرص على مراقبة سلوك الأطفال معها وتدريجيا سوف تحاول ص أن تكون قدوه حسنه للعيال و تتغير لا شعوريا ما من سين و لا صاد لا يطمح لغير الأفضل للب و النون

  8. مستر راعى كتب:

    يا استرايكر كون فاعل خير شوف ليهم حلول ماطوالى طلاق
    فى حلول يبدا بيها وتاخد هى فرصتها وبعد كده الطلاق واجب
    اول شئ يرحلها بعيد عن اهلهاوتفرض عليها اوامرك وخليك اسد تدى الكلمه صداها يرجع فى الحله وثرثر ليها كده اسبوع اذا فشل اشتغل ليها غيره واعمل روحك سرحان وقرفان شوف تعمل شنو تلقاها تتخبط ساكت عشان ترضيك
    تانى ممكن تتفاهم معاها وتسردوا حياتكم من البدايه وتشوفوا الايجابيات والسلبيات وخليها توقع ليك على انها تتصلح
    تانى حل اهجروهم فى المضاجع —
    الحل الاخير قرصه وضان توديها بيت اهلها شهر عقاب
    اذا مانفع ده كله
    بعده تبقى هى زوله داير تخرب بيتها بيدها واحسن يطلقوا ولا اطلقهم انا
    وغايتو ممكن س يضحى عشان وليداته ويخليها فى البيت بس عشان مايتبشتنوا ويتربوا قدام عينه
    بعدين فى الجامعه بدوك بديل وملحق وتلحق لمن تنجح واذا فتروا بفصلوك لكن ده اخر حل
    كسرة :
    نسوان الزمن ده اذا طلقتها بتخلى ليك العيال وبتفوت عشان ماتشم نفسك وتعرس تانى وهى بتمشى تشتغل وتشوف حياتها
    الله يلصلح حال س وص

  9. aflaiga كتب:

    الحلوين المارين بى هنا كلهم حبابكم :
    صديقى س جرب كل الحلول التى اشرتم بها :
    هجر فى المضاجع
    ضرب وانب ووبخ
    حكم من الاهل ( والاهل طبعا اصحاب مصلحه فى انو بتهم جنبهم شايفاهم وجنبها السخل بتاعا ( س ) تانى عاوزين شنو ؟؟
    طلق مرتين ورجع
    وبرضو ما نفع الحال كما هو عليه …
    فى كل مره يعود صديقى س الى زولته تظن واهمة هى واهلها انه ضخص ضعيف وغير قادر على الفراق وزيها ما بلقى وانو هى اخر بنات حوا .. مع انو صديقى س لو اشر بيدو الف بت ضفرها براس زولتو تتمناهو لكنه كريم ابن كريم شهم ابن شهم لا يحب الفشل ولا يعجبه ان يبعثر ابناءه ليتربو فى الشمس !!!
    اها شن قولكم ليهو ؟؟؟
    اوعو تقولو ليه اتكل عى الله واشتغل رقاصه لانو خلى الشغله دى ليهو فتره بعد جربا وما نفع شوفو ليهو شغله تانيه !!!!

  10. ودالزبير كتب:

    أفليقا

    سلام

    أظن لو طلقه مره وأحده رأسها بيجي في الدرب والله أعلم

  11. أفليقا فى طريقة يرسلها أهلها لمدة غير محددة حاليا قبلما يرمى عليها اليمين ؟ .
    أعتقد انو آخر حل بس لازم يفكر كويس جدا فيما سيفعله بالاولاد وللاولاد ….

  12. الغبشة كتب:

    افليقيا: يخارج نفسو الفيه عاده ما بسيبها وطالما قلت مرات بتتراجع وتقول بتتصلح وترجع بعد حين لنفس الموال طوالى سين يسيبها ويشوف موال تانى
    الله يعين س, شوف فى ناس بتفهم انو حبك ليه واجتهادك فى رعايتهم وراحتهم وخضوعك لمطالمبهم ما حب ضعف شخصيه وزى ديل لما تعرفهم تفارقهم.

  13. مستر راعى كتب:

    حيرتنا يا افليقا بعد كده جرب فكى ابكرون يمكن ينفع
    بعرف لى واحد متزوج ليه 14 سنه زوجته فهمته يادوب قبل سنتين وبرضو صابر وقال كان ماضيق اليد كان عرس تانى …طيب يا افليقا خلى س يعرس وشوف البحصل ويسكنهم مع بعض

  14. طارق أب أحمد كتب:

    مستر ر راعى
    قصدك تقول لى س لو غلبك سدها وسع قدها
    و التانيه لو برضو خستكت معاهو ؟؟؟
    يشوف ليهو صينيه ناصيه و يقوم يغنى
    الأتنين الليله وين
    ما كنا متحابين زى الصارقيل و الطين

  15. الامير كتب:

    السلام عليكم
    كثير من المشاكل الزوجيه تأتى نتيجه عدم تفهم كلاهما الحقوق والواجبات..وكذلك ضعف الوازع الديني..

  16. سماسم كتب:

    ود الزبير :
    هو يقولوا ليك طلق مرتين تقول طلقة واحدة بتجيب راسها والله دي شكلها راسها ظلط

  17. ود كبيدي كتب:

    أحياناً العاطفة تؤدي إلى ما أدت به إلى هذ الرجل المسكين المغلوب على أمره لكن لو كان هناك وازع ديني قليل جداً في قلب هذه المرأة لما كان الحال بهذه الطريقة فالإختيار الصحيح منذ البداية أهم شيء وأهم شيء ذات الدين على الأقل بتنصفك كما في الحديث.( أظفر بذات الدين تربت يداك ).

    أما عن الموضوع بصراحة عايز ليه وقفت عقل ويترك العاطفة لان مافي شي غير العاطفة غطس حجرو . فالحل الوحيد هو تغيرررر في نمط التعامل والتصرفات و الهجرررررر لمدة طويلة إذا جاب فائدة أوكي أما إذا ما جاب فايدة يستخير ويتزوج والله يكون في عونو.

  18. حاج أحمد السلاوى كتب:

    الدينمو .. أفليقا ..
    غايتو صاحبك ” س ” دا ذكرنى أخونا سعيد راجل عواطف ( من عجائب الصدف إنو أول حرف فى إسمه برضو س – أوع يكون ياهو زااااتو وصفاته ) صاحبنا المكسر فى عواطف الكانت محننة وأبت تخرت الحنة وتقوم تفتح ليهو الباب ..
    أنا فى رأيى الشخصى ( المتواضع) أقول يجب تحكيم الشرع وليس العُرف ( وهو ما سائد فى مجتمعنا السودان ) فى مثل هذه الأمور .. فلكل طرف واجبات وحقوق حفظها لهما الشرع فلا يجوز للرجل أن يهمل والديه وأهله من أجل عيون عواطف وعليها أن تحترم اهله.. ولا الرجل يسىء إلى أهل زوجته ..أما غير ذلك من الإجتهادات فلا مكان لها ولا تساوى شيئاً..وأين المودة والرحمة ؟

  19. الزهراء كتب:

    السمار الكرام
    عمو أفليقا: لو أستغربت في عمو دي أسأل سمسمه

    والله س ده فتر عدييل من القصص المؤثره
    الخلاصه المفروض يتوصل ليها س انو الزوله دي ما لا تكن له ادنى احساس بالمحبه – لانها لو كان بتقدروا على الاقل ما كانت وصلتو المرحله دي -ياخي النسوان بيتسابقن لاسعاد ازواجن وعشان يشوفوهم في اعلى مراحل السعاده
    حقيقه س حاول كتير معاها حسب الروايه وما قصر بعد ده يقعد مع نفسو ويحسب سنسن عمرو الضاعت في الهم والغم ويقدر الفقودات التي نقصت من شخصيتو ومكانتو قدام الناس وبالخط العريض يكتب ويقرر ويعترف بان الزوله دي استغلت حبه لها وفي نفس الوقت كان حبها مزيفا لانها لم تثبت له العكس
    وبلاش ضياع زمن كفايه الراح صاحبك ده طوالي يعمل ليها بالنسبه لي هاجر فتره طويييله كده- ان استعدلت كان بها وان ما استعدلت طوااالي يبقى مارق على الماذون ووالله الشفع يتربوا احسن تربيه الحبه ما بتجيهم

  20. محنك كتب:

    صديقنا ( س )

    عليه ان يفكر ويوازن … لازم يكون بعيد من اهل مرته وباولاده … اول حاجه … ثم يفكر كم عمره وكم عمر اصغر ابناءه …. ليتحمل قليلا حتى يفهم الجاهل منهم واظن دا قريب اعنى عمر 9 سنة للبنت و 10 سنة للولد .. حيث يكونوا ليسوا فى حاجة لها … ثم يخيرها بين البقاء مع ان تصلح حالها او تمشى وتخلى اولادها هنا … بعد دا عمرها ببقى كبير ما اظن تتسوق بسهوله …. وهو يمكنه ان يخطط برواقه للزيجة الثانية حتى لا تفشل … او من هسى يزبط اموره … لو فى امكانية يدقها بى اختها من باكر وييمسك بحبلها الوحيد ويتركها مع اهلها ويجيها فى ليلتها دى بتكون اشد الادب . ما فى قانون بطلق مره راجلها شايف شغله واهو يلقى الاهتمام من التانية وهى راسها بجى … وامها وابوها ما دايمين

    والله شنو

  21. محنك كتب:

    اوع ا افلى يكون عواطف ( س ) عارفه الطريق لكلامنا دا يبقى حا تكون عارفة لما ( س ) يتخذ قراره انو دا راى منو وتقول الله يجازى الكان السبب مع انو عليه بالطلاق بالتلاته انو هى السبب

  22. حنين كتب:

    أبو الافالق والجماعة .
    سلامات .وآسف للتأخير .
    والله أنا من رايى نرسل الزهراء لزوجة (س) عشان تكمل لينا الصورة من الجانب الاخر وبعد كدة بنقدر نساعدم فى الحل يمكن يكون التقصير فيهو هو ويمكن يكون ما بعرف وبعد كدة نجى نضع الحلول الواقعية والتى توصلهم بأذن الله الى بر الامان.

  23. لمى هلول كتب:

    سلامات يالغاليين من بلادى
    اليكم فلسفاتى علها تنفع ..
    س بالرغم من الوصف الجميل الموصوف من التربية والهمة والعيلة والاشياء الظريفة دى الا انه للاسف لم تعلمه الحياة الدردرة والرجولة الحق وهذا حال كثير من الاسر المنمقة فى التربية ..فلا يستقيم عندى فهم لتربية الراجل الا ان اقترن بالفهم الحقيقى للرجولة فالاخلاق مطلب جميل ولكن الرجولة هى المطلب الاهم وس هذا زكر وليس رجل رغما انه كان يقوم بصفات الرجال ومستلزماتهم من كرم و……….الخ
    وتلك هى مشكلة س تعود على حياة مثالية ان كانت امراته رمتالية فالخطا هو وجودهما معا …
    والخطا الثانى ل(س) هو عاطفته وول انه تزوج بامراة غير رمتالة ستظل هذه حالته وستكون لديه مشكلة اخرى ولكن ربما يصبر عليها
    المشكلى الثالثة 3
    هنا تعلق كل من س وزوجته باهلها جدا الى حد الغيظ
    فاسرتها برمتلتها ترى ضرورة وجود ابنتها معها وهو ايضا يرى ضرورة تمسكه بالعائلة ولكن على سبيل ماتربى وليس على سبيل ما تفرضه العلاقة الزوجية
    فالعلاقة الزوجية بينهم لم تجد المكان لتنشا وسط ما يضعه س وما تتمسك به الرمتالة زوجته …
    المشكلة الرابعة 4
    س لم يضع حدود لزواجه وسكت منذ البدء وخلط بين امور كثيرة خلط بين متطلبات الزوجة ومتطلبات الزواج فالعاقل لا يخلط بين متطلبات الزواج والاكراميات سواء من اهل الزوجة للزوج او العكس ولكن ان تخلطهما معا فبالتاكيد ستفرط الزوجة لانه ليس لها من افهمها منذ البداية حقها ومستحقها …
    فاعتبر زوجته احدى مهماته التى كان يؤديها لينال الزكر الصالح كما كان متعودا من الجميع …وهو بالاصل لايجيد شيئا لذا تبهدل حاله لانه ليس لديه ما يقدمه.

    المشكلة الخامسة 5
    س لا يستمع الا لاهله ونظرتهم ولا يلقى بالا لزوجته التى كان من المفروض ان يعرف ان الاولوا شرط اخرته نور لانه من عائلة منمقة وكريمةة فى نفس الوقت …

    الحل
    ان يهيىء س بيتا اخر لا يضمه الا هو وزوجته فقط واطفالهم
    ياتى بحكم من الطرفين وتحدد اشياء يكون هو فارضها ومقتنع بها وقادر على تنفيذها بحزافيرها ..
    يخرج الاصول من الزوجة واهله خارج اى قرار بعد الان ..
    ينقطعوا عن الاهل لمدة محددة حتى يرى كل وواحد صورة الاخر بشكل اوضح على ظل ما تكشف من صور غير حميدة لكل منهما بدون اقنعة
    يتناقشونم بهدؤ وحرية وانقطاع تام عن كل مايحيط بهما
    يجعلون الاطفال همهم ليصبح هذا الخيط هو الخيط الاساسى الذى سيقربهم مرة اخرى بمشيئة الله
    على س ان يتصرف كرجل وليس كرجالة
    وعلى هذه الرمتالة ان تعرف ماذا كانت وهى من الان فى ظل هذا الزواج الغريب عليها وعن عاداتها ..
    فى الختام
    ان لم يفلح الحل وكله بيد س لان الرمتالة لا يهمها وحالها كحال عادت ريما لعادتها القديمة …فعليه ان يترك بيت زوجته فورا ويبدا فى حياة جديدة ولكن ليس بعاطفة بل حياة بمواصفات اخرى اهم بند فيها ان لديه اطفالا من اخرى

    وختمة اخيرة
    ابصم بالعشرة ان س سيظل على حاله لانه ولد ناس وهؤلاء الناس خطاهم الاكبر انهم يربون ابنائهم فى مكان لا يوجد به ناس …

    اسفة على الاطالة

  24. محنك كتب:

    يا افلى

    لازم تزرينا صديق صديقنا الاسمه ( س ) عمل ايه مع عواطفو ( ص ) ام نخليها برضو ( س ) عشان يكون فرصة الاتحاد قوية

  25. نادوس كتب:

    يحكى ان رجل انعم الله عليه بالحكمة وافاض عليه بالعلم فصار يعلم كل كبيرة وصغيرة في امور دينه ودنياه،، وكانت له زوجه اجاركم الله منها،، وكان هذا الرجل صابر عليها زمن طويل وعلمه في زيادة وحكمته تترسخ وصار علم على كل لسان من ناحية العلم والحكمة وكذلك صار على كل لسان من شدة جرم زوجته عليه وفي حقه،،، فاشار اليه احد خاصته بان يتزوج ويرتاح من جور هذه الزوجه ويتخلص منها الى الابد،،، فاخذ بمشورته وتزوج وتخلص من الزوجه الجائرة،،، ولاحظ بعد فتره قلت همته في العلم وعدم تمكنه منه،،، وقل علمه وحكته،، وفي ذات ليله جلس يفكر في الامر ونام نومه عميقة وفي تلك الليله جاءه الخبر اليقين،، بان الله عوضة عن زوجته الجائر العلم والحكمة،،، وعندما قل صبره لها وتزوج غيرها وتخلص منها انقلبت المعادلة الى راحة زوجيه ومتعه وقلت علم…
    اعلم اخي س وافليقا ان الله سيعوض اخونا س بصبره على زوجته خير في الدنيا والاخره،،، وان استبدل هذا التعويض من الله فعليه ان يفعل لكن صدقني سيكون خسر شئ من حتى!!!!

    وللحديث بقيه

  26. mon amie كتب:

    اخ سين انا سمعت بمأساتك متاخره لكن لو المشكله لسه قائمه ما تطلقها عرس فيها بس تكون واحده قاعده في الضل عشان ما تتكرر المأساة وتقوم تركب الزلط

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s