الجامعات السودانيه ضمن أفضل 500 جامعه في العالم

Posted: الخميس,5 نوفمبر, 2009 by ودالزبير in إقتصادية, إجتماعية, اخرى

الخبر قبل كم يوم وبيقول

(غابت الجامعات ومراكز البحوث العلمية والعربية جميعاً من الترتيب الذي يتضمن أفضل خمسمائة جامعة على مستوي العالم، في حين دخلته ست جامعات ومراكز بحثية من إسرائيل، وثلاث جامعات من جنوب إفريقيا، ويكشف التصنيف الجديد لجامعات العالم أن الجامعات الأمريكية احتلت 159 مركز، حيث جاءت جامعة هارفارد في المركز الأول على جامعات العالم، في حين احتلت الجامعات الكندية21 مركزا، والجامعات الأوروبية 210 مراكز، والجامعات الآسيوية 83 مركزا، منها 32 للصين، وسبع جامعات في تايوان، وخمس جامعات في هونج كونج، و31 في كوريا الجنوبية))

والتعليق من عندنا

ده طبعاً إختيار القصد منه النيل من إنجازات ثوره التعليم العالي

كيف يعني إسمنا مافي لحته خمسمائه جامعه

سيبك من جامعات الحكومه

وخليك من الجميله ومستحيله

طيب الجامعات الإستثماريه البيدفع فيها الطالب زي عشربن مليون في السنه

زي مأمون حميده وكمبيوتر مان وغيرها

كيف ما تخش القائمه دي

العمل التقرير ده زول حاقد وعميل للجنائيه الدوليه

وإحتمال يكون شيوعي زاتو

يأخي معقوله ما شاف جامعه المحيرابا لعلوم الفضاء

ولا سمع بجامعه القلوباب بنهر النيل لعلوم البحار والمحيطات

وما دقشت أضانه جامعه أم صفقاً عراضا لفنون الحنه والدلكه وفنونها

أنا بقترح تكوين لجنه أو سيبكم من اللجنه نحن ننشئ وزاره نسميها وزاره

الرد …. الرد

دي تكون مهمتها الرد على الإدعاءت الكاذبه الزي الفي التقرير ده

ويكون عندها وزير ووزير دوله ووكيل وموظفين والذي منه

نرجع لموضوعنا

طيب لو مدينا القائمه شويه وقلنا قائمه الخمسه ألف جامعه في العالم ممكن نلقي لينا فرقه

لأنو 500 دي أنا شايفها صعبه علينا

ما راي الساده في وزاره التعليم العالي في الحته دي

وما راي السيد مدير جامعه الخرطوم الفصلوا فيها طالب وطالبه عشان عملوا مشكله مع الحرس في المكتبه ..

ولا التقرير ده ما بيكونوا سمعوا بيهو

وقومي ياالمرا موتي

About these ads
تعليقات
  1. الزميل ود الزبير : ياخ دا الكنا خايفين منو ذاتو كلما جامعاتنا كترت كلما جيوبنا فضت واسماءنا بين جامعات العالم اتلاشت.
    انجلترا وقت رفضت الاعتراف بشهادات جامعاتنا بدلما نقعد نشوف العلة وين فضلنا نستنكر ونقول لا الكلام اتفهم خطأ ومن تحت تحت التسويات والترضيات شغالة … فى أكتر من كلية طب الطالب يكون مابعرف شئ اسمه تشريح لحدة مايتخرج وفى اكتر من كلية اشعة يكون المتخرج مااخد اكتر من عشرة صور وكذلك الحال لكليات المعامل الطبية دا غير كلياتنا النظرية من ادارة وتربية وحتى كليات اللغات ياخ تخجل تصور خريجة لغة انجليزية ماتعرف تتفاهم مع مدير أجنبى فى ملاقاة عمل … هسع واحد يقول لى دا شئ استثنائى لا أبدا ديل منهم بالكوم … وبعدين وزارة التعليم العالى دى أصل شغلها شنو ؟ لو حد عارف يقول لي .. قال خمسمية قال ياخ دا حظنا بس لو بدو الخمسمية دى من الآخر …. يخيل لى التنافس بكون بعدد الأبحاث ورجال العلم (مش الأعمال) المرتبطين بالجامعة … أخاف أن يأتى زمن يكون فيه حاملى الدكتوراة أكثر من طلبة الجامعات ولا بحث عالمى لدينا … لك الله يابلدى العزيز

  2. الزهراء قال:

    الاخ ود الزبير

    عمو التركي

    سبب واحد يدخل جامعاتنا في التنافس ده مافي- الجماعه ديل كتروا الجامعات وقللوا مستواها التعليمي- الكفاءات التربويه اغلبيتها خارج الوطن في بلاد الغربه السبب عدم تهيئة الجو المناسب لهم للعمل ببلدهم – شي تاني الجامعات دي محتاجه معامل ومحتاجه ورش ومحتاجه كتب وبشرط تكون اصدارات جديده- لكن ويييين؟
    الجماعه ديل بيدرسوا تاريخ -اعني فعلا تاريييخ- ويلا تعالوا نشوف- الطلبه بيعملوا شنو
    التدريس ذاتو بقى تجاره شوية مذكرات وامتحانات سابقه الكالب يقراها ويدخل الامتحان وحتة بخره ليييه؟ داير يتخرج وخلاص

    تجي لبحوث التخرج الطلبه ديل بيتعبوا عشان يلقوا شركات تساعدهم خصوصا الكليات الهندسيه- في النهايه الخيار شنو؟ مشروع بسيييط قدر ما يجيب درجه كويسه ويلا على سوق العمل
    بلا ثقافه بلا لغه اضافيه تؤهله للمنافسه- بلا مهارات تقنيه

    والشاطر يلحق نفسو بي كورسات لعلها تساعد قليلا

    تقولو لي منافسه عالميه

    كر علي يا يمه!!!!!!!!!!!!!!!!!!!!!!!!!!!!!!!!!!!!!!!!!

  3. التلب قال:

    سلام للكل
    يا ود الزبير لا تبتئس يا رجل نحنا ما بعيدين شديد، تحتل جامعة الخرطوم و هي الجامعة الأولى في البلد المرتبة 4371 بينما تحتل جامعة السودان المرتبة 6556
    بالله شوف الاستهداف بتاع الخواجات ده كيف !!
    للمزيد من وجع القلب راجع الرابط التالي
    http://lcwcu.um.ac.id/wp-content/uploads/2009/07/Webometrics-Dunia-2009-Jul-4351-4400.pdf

  4. محمدحسن قال:

    بسم الله الرحمن الرحيم

    جُمعتكـُمُ طَيَّـبة أحبابنا

    وَ أخونا وَد الزبير
    ( التعليق حَقــَّنــَا ) مَا خــَطـَر وَ فـَات الخـَبَر ذاتـُو :lol:
    وَ صَرَاحة إحنا دَايرينَ ( الفــَرَقة ) القال ( زُولنـَا ) هِنـَا :
    [[ طيب لو مدينا القائمه شويه وقلنا قائمه الخمسه ألف جامعه في العالم ممكن نلقي لينا فرقه ]] :)
    وَ طَبَعا أبدَعت يا طَيِّـب :wink:
    ؛

    قبل كمُ يَوم كـُنـَّا بنـَتـَابعَ حلقة جَميلة عَلى ( الجَزيرة ) عَن مَوضـُوع
    [ غياب الجامعات العربية عن التصنيفات الدولية ]
    وَ كانت حَلقة مُفيدة وَ مِنها اقتبس :

    ———————–[ اقتباس ]——————————————————
    أهلا بضيفنا. لو بدأنا بالدكتور أمين محمود من عمان، دكتور معقول ولا جامعة عربية ضمن المائة الأوائل وفقط جامعة عربية واحدة هي جامعة الملك سعود في الترتيب 428 من 500 جامعة، معقول!
    ——————————————————————————————
    وَ المَعقـٌول دِي وَ سُؤالها التـَعجَُّبي الأستهجَانِي الأستنكـَاري السَاخِري كمان
    للأستاذ محمد كريشان !
    مَا حَقـَّتـَنـَا :cool:
    وَ دَا رابط الحَلقة :
    http://aljazeera.net/NR/exeres/88672944-6865-497C-8BF8-8C0CFF738FB5.htm

  5. حنين قال:

    والله ياجماعة حاجة توجع القلب .
    زمان كانت إدارة الجامعات السودانية بتعمل توأمات مع الجامعات الاجنبية والتى تمدها بخبرات ومقررات وبعثات دراسية وتتيح لها الفرص لبعض المقاعد لمساعدى التدريس والمحاضرين وهلم جرا لكن أسى ناسنا مامعترفين بالجامعات الاجنبية (يعنى المعاملة بالمثل…)

  6. مستر راعى قال:

    البلد دى الجامعات فيها بدون حسيب ولا رقيب زى ستات الشاى على قفا من يشيل
    جامعه الخرطوم الام الان اصبحت فى تعداد الاموات فى نفس مستوى بصات ابورجيله — قبل 20 سنه كانت الجامعه ست الناس واليوم مداس الناس بفلوسهم شفتو المعادله دى كيف ماضرورى تدفع كم المهم اتخرجت من جامعه الخر——تبع البرستيج والاتيكيت وتقيف اختنا لولا تعدد ولدى متخرج من كليه الهندسه ويارا من الطب وايفا من القانون وكلهم من جامعه الخر——
    ولدى كان ماقرا مامون حميده قال مابركب العربيه الاشتراها ليه ابوه ياى ياى
    عليكم الله كان ختونا الاوائل ولا الطيشه فارقه شى كله محصل بعضه ولا احنا زاته فى الخرطه التعليميه حرام يضمونا وكتر خيرهم اتذكرونا على قول فيروز,,
    والله ياود الزبير ماطالبنى حليفه فى واحده من الجامعات الجديده البلفلوس دى جوها اساتذة من حته تانيه يراجعوا طريقه التدريس لقوها غير مؤهله وبتخرج الطالب بدل من 5 سنوات بتختصرها فى 3 طيب مايخش دبلوم احسن وبالرغم من كده مواصله عينك يا ود الزبير تقول شنو
    وقالوا ليك الاستاذ الزائر جا مارى لقى مكتوب يوم الابداع والفن قال ليهم ده ابداع حرام عليكم انتو فى وادى والابداع نايم
    اما مشكله الطالب والطالبه حاليا دخلت دور انهم فى وضع غير لائق طبعا شماعه يا جماعه حرام كمان جنب المكتبه الداخلين ومارقين منها هو الداير حاجات زى دى بتغلبوا يدسى —دى القاعات بتشهد فظائع دايره ليها امن عام خلوه القاعات العربات المظلله فى شارع النيل على قول عادل سيد احمد بتعمل فى شنو فندق متحرك ….
    وحاليا يمكن الطلاب يعملوا اضراب
    فى واحده من الجامعات جات طالبه داخله بباب الجامعه اتشكل معاها الحرس واداها كف شفتو لوجينا من ناحيه شرعيه هل يحق له ان يلمسها بيده بكف )دى دايره ليها محامى اها زملاءها جوا جاريين دقوا الحرس وكانت نهايه المسكينه رفد من الجامعه بل من كل الجامعات عارفين ليه لانه تبع واحد من الانظمه واركان النقاش
    عارفين ربنا بحبها قدر شنو (منظمه هولنديه اتبنتها وسافرت هولندا والان فى امان الله
    كسرة:
    كسره بدكوه بلا جامعاتنا بلا لمه العنده عيال يسفرهم بره اخييييييييير

  7. الصادق ود البركة قال:

    السلام عليكم ورحمة الله
    الإخوة المدون الكرام
    مساكم فل الفل
    قلنا قبل ماننوم ناخد لينا غشوة للمدونة نروق بالنا بموضوع فرايحي فإذا بي أجد موضوع يجيب الغم ويجلب الكوابيس …الظاهر إننا ومنذ عشرين سنة راجعين لي وراء لك الله ياوطني (زي ماقاعد يقول شمباتي)
    المراجعة للنفس مطلوبة أها الحل شنو ؟؟؟؟؟
    كان الدولة رفعت ايدها من العلاج لناس محمد أحمد حتخلي بالها من الجامعات ؟؟؟؟؟؟
    ناس جامعة الملك سعود قاموا على ناسهم بسبب مركزها رغم انها الجامعة العربية الوحيدة ضمن ال500 ودمتم

  8. لمى هلول قال:

    سلامات
    موضوع عجيب
    دا الواحد بقى ما بيقدر اساا يتكلم فيهو
    من وين ولا من وين يبدا
    ولا مافى داعى العروس تطلع مداعى
    جامعات قال
    انحنا بقينا بنخت حكاية الحرس الجامعى اكثر من الاستاذ
    وبالله دى بلد شنو وحال شنو الفى كل حته قال ايه حرس
    بتاع امن وكل ما الحرس يشوف مهاموا الغامضة
    يقولوا وضع مخل او زى فاضح
    انا غايتوا لمن بسمع قصص زى دى بحس كان السودان عامل زى السعودية الناس لابسين نقاب وعبايات ومنفصلين الرجال من النسوان
    وفجاة كانما فى ناس بتخترق الجو دا ويجوا الحرس يلموهم
    يعنى الفهم ماراضى يركب
    بصراحة ..يعنى هما عايزين شنو الواضح ولا الفاضح ولا السلطة ولا التعليم ولا
    التربية ولا الاخلاق ولا شنو الحاصل الخلى الجامعات بايدى الحراس والحراس عايزين سبب والسبب قلة ادب والادب ماليو تفسير والتفسير عند القران والقران مافى زول بيقراوا …

    انا اويد القراة خارج السودان فى هارفاد …(رايكم شنو )
    الظاهر اناو الطموح الجاى هارفارد ياخوى هارفارد
    هارفارد وبس
    تسلم على الموضوع

  9. حاج أحمد السلاوى قال:

    أختنا أو بنتنا لمى هلول … سلام
    الحاصل شنو ؟..لميتى كل حاجة مع بعض ..لا خليتى الجامعات ولا الحرس الجامعى ولا الزى الفاضح..ولا النقاب والعبايات فى السعودية وختمتيها بجامعة هارفارد ..
    حقو كان تمسكى نقطة نقطة وتفنديها واحدة ..واحدة ونحنا كوووولنا متفقين معاك فى إنو الحال لا يسر عدو ..ولا حبيب ..وعاوزين نشوف حل للموضوع دا .
    إقتراحاتك إيه فى القضية ….
    مع تحياتى لك ولجميع الأحبة .

    • قبل كم سنة قرأت تقرير عن الجامعات وكان ترتيب مصر الأخير يعني تقريباً سنتين ، طيب الحاصل لينا شنو . تصدق اليوم قعدت جنبي طالبة بتتدرس مختبرات في حافلة الثورة بحري عندها إمتحان بكرة ومنهمكة في ترجمة نص biology

      شفتها مترجمة كلمة one)واحد بالعربي الفصيح قلت ليها دا شنو يا بتي دي دايرة ترجمة .يا جماعة نشوف طلبتنا منذ العام 1990م إخترعوا شنو في مشاريع التخرج البلد ملانة هايس وموبايلات وعبايات وسبسبة شعروحدائق عامة تسرح فيها الكلاب الضالة يا إخوتي التعليم بقى بس خروج من الصباح وعودة في المساء وموبايلات وكلام فارغ بالمواصلات العامة وأقساط دراسية والله أنا شايف إنو الخواجات كلامهم صاح طيب نشوف المنهاج أغلب الطلبة بقولو بندرس تقنية معلومات والله أنا ما عارف دي حتودينا وين والله إذا إهتمينا بالزراعة والإنتاج العضوي وبعنا موية النيل سنكون أفضل نحن نقفذ بزانة مكسورة ثورة التعليم عايزة منهج يحقق هدف التنمية وليس عطالة مقنعة .
      يا حاج معليش يا لورد سلام لك وللجميع إن شاء الله أكون في التراك وما مطشش

  10. نادوس قال:

    معليش يا جماعة
    ما عرفت اتقن حكاية الدخول في المنتدى الحقنا يا السلاوي

    حكاية الجامعات دي حكاية طويلة
    وتذكرني مثل الشيخ ود بدر البيقول (الابه ديكو مكشن)،، دحين يا السلاوي يا اخوي مكشن دي بطان الزمنن ده بيعرفوها،،،
    اقولها وبالفم المليان زي وكت تكون عاوز تنطق كبده (بضم الكاف ونفخ الجضوم)،،، انو لا يوجد اي تعليم في السودان والله وبالله وتالله اي زول بيدفع ليهو قرش في ولودوا شان يقرأ في جامعات السجم الرماد ديك ضيع قروشوا ساكت..
    تعرف ليه جامعة الملك سعود في المقدمة؟؟؟ اقول ليك ليه!!!
    قبل ثلاث اسابيع كنت في مؤتمر دولي ضم ناس من مختلف دول العالم والتقيت وتعرفت على بروفسير سوداني مقدم ورقة في المؤتمر والزول طلع بلدياتنا وبعد شويه بقينا بعد كل حقلة نقاش نجلس مع بعض وتشرب الشاي او نتاول وجبه في قاعة المؤتمر وفي مره سالتو اسع يا بروف كيفن بتدرس الجماعة ديل؟؟
    قال لي : يا زول هو منو القال ليك انا جاي ادرس؟؟؟
    في تعجب قلت ليهو ونان جاي تسوي شنو في جامعة دي؟؟؟
    قال لي انا جاي اكتب ابحاث وتتنشر في دوريات عالمية…
    لان الابحاث بيها تقيم الجامعات
    شفتو كيف يا جماعة نحن بنضيع الدهب المجمر من تحت ايدينا موش قلت ليكم الابه ديكو مكشن.
    والله الموضوع ده انا مستعد اكتب عنو سنين لمن المغصة الفوقي دي تمرق لكن ما ظنيتها بتمرق الا تمرق روحي قبلها…

    اها حكاية اللبس دي بس اكتو خلوها ساااااااااااااااااااكت،، بعد رمضان التقيت خارج السودان مع واحد صاحب اخوي جاي من فرنسا، وقال لي تعرف انا سنوياً بمشي اعمر واقعد طول شهر رمضان بين المدينة ومكة شان ما الواحد يحافظ على صيامو… واردف قائلاً… لكن اقول ليك شئ والله انا شايفو في السودان ده اخطر من الفي فرنسا… الكلام منسوب لصاحب اخونا.
    اها انا كل ما انزل اجازة بمشي الجامعات لان لي اصدقاء يعملون مدرسين فيها يا حليل التدريس الخلا ناس …. و….. اساتذه في الجامعات، المهم بشوف ليك حاجات والله مرات بخجل من نفسي ومره قلت لصحابي استاذ باحدي الجامعات يا زول انتو قادرين على جنس ده كيفن؟؟؟؟
    والعارف يجاوب

    ولي رجعات
    والابا ديكو مكشن

  11. نادوس قال:

    ود الخلاء اشكرك على الترحيب الحار
    لكن والله يا اخوي اخوك ممغوص مغصة جد بهالموضوع،،، والعجب العجيب لو حضرت سهرة خيمة الشروق يجو ليك اصحابك يتشدقوا بالحديث اننا قرينا وين وكيف وابتعثنا وين وين والله قبل اسبوعين حضرتك ليك اعادة لواحدة من السهرات دي فقطعة ليك مرارتي بعد ان كنت ناوي اجلس بمزااااااااااااااج واحضر السهرة
    وكمان الاسبوع الفات جابو ليك وزير كل الحكومات وهو السبب الاول في افشال تعلم الابتدائي والمتوسط والثانوي وبرضو بيتشدق بالحديث لمن قمت قفلت ليك التلفزيون وغلبني النوم..

    لكن الجماعة ديل شغالين بي فهم جحا حين قال (بطن امي بعد ما جابتني ان شاء الله تنسد)

    اللهم لا تسدها علينا اكثر من ذلك

  12. مستر راعى قال:

    يا نادوس انا نفس حكايتك شفت عمنا ده قربت اجيب شجرة ليمون لكن الحل الامثل ماسد المفسديون لكن الانتقال لقناة ارحم فيها حوار صادق ينبع من القلب مش من الخشم وتجيك ريحه زفارة الكلام تقفل مناخيرك
    طيب هم اذا بعثوهم لنار جهنم ولا قروا فى الجحيم مايبعثوا باقى خلق الله —
    النضحكك فى وزير سابق المهم هسع زينا واحد
    بسفر الطلبه للخارج بعثات لكن بتقرا شى واحد بس شفت المغصة مش على كيفك المهم البعثة بتديك 8 الف دولار عارف لمن تصل الدارس كم؟؟ الفين لانه السته دى مسافه تصلك فى الغربة بتكون اتبخرت ونفسى اعرف فن التبخر ده كيف وكيفيه الابداع فى علم السلب والنهب
    للحوار بقية
    نفسى ناس خيمة الشروق جيبوا لينا ناس جداد شويه يحوا ليما ماساتهم بس مادايرين واحد يقول لينا منصبه شنو ووضعه شنو دايرين قصص من واقعنا المؤلم وياريت يلتفتوا بس للشارع
    كسرة:
    هسع لو جابوا شماسى وحكى معاناته مع الشوارع وبكسب قوته كيف مااخير ولا ده تبع هموم واحلام بس

  13. نادوس قال:

    مستر راعي
    يا حبيبي نان لو جابو ليك شماشي والا شمباتي ما عاوزين امداد كهراباء شان يشوفوهم من الغباشة والرواشة والسواد العليهم،،،،
    يا ولدي ما تتكلم كويس يعني انت عاوز يفتحوا الاستديو للشعب كلو،،، هو منو فضل من الشعب وما بقى شماشي متوسد الواطه ومتغطي السماء ……………………………………………….وسلم لي عليهم يا مستر راعي

  14. ودس الناس قال:

    سؤال لجميع الاخوة السودانيين
    السبب الرئيسي نحن في سبب تدني التعليم وعلى رأسهم المسئولين الكانوا درسوا الجامعات مجاناً وبمستوى اكسفورد عندما كان مستوى جامعة السودان بمستوى اكسفورد والان اليوم هم في السلطة يقول ليس لدينا ميزانية للتعليم العالي وهل اصلا في ميزانية للتعليم العالي او الواطي لو كان نسبة الميزانية 2% للتعليم العالي والباقي في كروشهم حرام عليهم هؤلاء في السلطة لايهم شيء في السودان إلا كراسيهم وبطونهم ولكن لو يوجد وطنية حقيقية كيف سوف يكون مستوى التعليم في السودان او الجامعات ولكن السبب الرئيسي الشعب السوداني الغاشم الذي لا يعرف اين مصلحته وكلها اوكامبو وامريكيا واسرئيل والغرب وذلك يصب في مصلحة الحكومة وجاري وراء سراب الشعب السوداني شعب غشيم وشعب جاهل لا يعرف مصلحته اين وهؤلاء (السلطة) لا يعرفون عن الدين شيء إلا شعار
    واخيرا إنا لله وإنا إليه راجعون وحسبي الله عليهم

  15. ابوماجد الكاظمى قال:

    طبعا اى وزير يحاول الاصلاح فى حكومة الانقاذ مصيره الى الفصل التام من حكومة الانقاذ وبعد الاعتذارات وضمان الولاء ربما يرجع ثانية (يوسف عبدالفتاح)رامبو مثالاً او الاغتيال ان كان يشكل تهديداً (مجذوب الخليفة) (الزبير) مثالاً .!!!!!!!!!! هل يا ترى يفكر وزير التعليم فى خطوة اصلاحية فى عهد نظام البشير ؟؟؟؟؟؟ لا اظن ذلك
    ألا لعنة الله على الظالمين والمفسدين فى الارض
    (وإذا قيل لهم لا تفسدوا فى الارض قالوا انما نحن مصلحون ) البقرة

  16. حاج أحمد السلاوى قال:

    ولدنا صديق الفولانى ..سلام ..
    أبداً إنت ماك مطشش لاكين بقينا نحنا المطششين…لأنو لحد حسه ما عارف كيف مداخلتك الأخيرة دى نزلت كيف فوق جنب تاريخ مداخلات 7 نوفمبر وكان من المفروض تنزل كآخر مداخلة حسب التاريخ والوقت … ودى ملاحظة فى كافة مداخلاتك السابقة برضو ..دى عاوزة فتوى من ولدنا الأدمينستريتر أبو ابراهيم .
    أما بالنسبة للجامعات الفكة (على قول أخونا جبرا ) إنت تقترح شنوالمفروض يتعمل عشان الحكاية تستعدل والتعليم حاله ينصلح وتعود الجامعات كما كانت ؟ لأننا كلنا متفقين إنو هناك خلل واضح فى المسالة التعليمية .
    وعندى سؤال سغيروووونى ..كيف كانت الدراسة فى أيامكم ؟ أحسن من اليوم ؟

  17. عمنا السلاوي سلام اليك ولكل الحبان
    أنا المحيرني إنو الحكومة دي القاعد يخطط ليها منو؟ أ كانعرفناه الحال بنصلح دي عامل ذي الطالب الما بعرف يكتب بحث . أعتقد جازماً أن التخبط واضح ويا حليل معهد بخت الرضا ومعهد إعداد المعلمين والمعلمات بأمدرمان في تقديري إنو الما لاقي شغل يشتغل مدرس ودي المشكلة كان في السابق تعاون مع بريطانيا في في اللغة الإبجليزية وتوأمات كما ذكر الأخوات لكن إنت عارف حكايتنا جايطة مع العالم كله وحديثنا أصبحمثل تكوينا للإتحاد الأفريقي ونحن الآن في الذيل بدون أي مستوى قس على ذلك ، لايمكنأن ننفصل عنالعالم وندعي أننا سنأتي بعلوم جديدة الحكومة دي كل شيئ عندها حرام طيب كيف نلحق الفات تجاربنا أصبحت فاشلة في كل شيئ ودي مسئولية كبيرة تقع على عاتق المسئولين هالساعة إذا كان في واحد جدع وقال نخلص التعليم من نكسته أعتقد كلنا حنصوت لكن منو البقول البغلة في الإبريق رحم الله الأستاذ الفكي عبد الرحمن والرواد الأوائل في مجال التعليم حيث كان التأهيل في بخت الرضا وبريطانيا وغيرها

  18. احمد قال:

    السلام عليكم ورحمة اله وبركاته …. اما بعد :

    نحن نعاني من مشكلة عويصة في السودان ان الفرد السوداني قايل نفسو احسن فرد في العالم الغلط فينا نحن ولافي الدنيا ولافي الحكومة ولا في منو بالضبط !!

    الملاحظ ان غالبية البلاد دائما تتطور لاتتخلف بعكس السودان! الناس بيمشو لقدام ونحن نرجع للوراء سواء في التعليم اوغييره , في الوقت الاحالي الجامعات السودانية تعادل الشهاداة العربية بالشهادة السودانية بخصم 6 في المئة بالضافة للقدرات والتحصيلي ,هل يعقل هذا الكلام ياجماعة!!!!

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل الخروج / تغيير )

Twitter picture

You are commenting using your Twitter account. تسجيل الخروج / تغيير )

Facebook photo

You are commenting using your Facebook account. تسجيل الخروج / تغيير )

Google+ photo

You are commenting using your Google+ account. تسجيل الخروج / تغيير )

Connecting to %s