شذرات تتبعها شذرات..

Posted: الإثنين,9 نوفمبر, 2009 by ياسين شمباتى in ادبية
  • قال الشاعر المملوء بحب الوطن (محمدالحسن سالم حميد) فى قصيدته المعروفة ب(الجابرية) مخاطبا بطله (خوفى من مرضى النفوس..الاباليس النجوس..الجواسيس اللصوص..يشغلوك بالقرمصيص,,ولما تبرا الدارة تبشر,,هم يختطفوا العروس)…اظن هوية المختطفين معروفة للجميع..
  • سألنى احد اصدقائى المشاغبين : هل لديك (فالوذج) او (لوذنج) اغير بهما طعم الحياة المر؟؟ عليكم الله لو واحد عندو يدينا (وسيق) لى صاحبى دا..
  • ايام الجامعة كنا نكثر من لعب الورق او الكوتشينة,وكنا نخلطها ببعض المصطلحات السياسية او الاجتماعية السائدة فى ذلك الوقت,,وكنت استخدم اسماء الاتفاقيات للدلالة على الوضع الراهن للعبة,,وخاصة فى لعبة (الهارت) التى يكثر فيها الحقد والضرب وتصل الى الضرب الحقيقى كنت اسال(شنطتى) او اللاعب الجالس الى يسارى عما يريده من نظام لعب فى (الشوتة),,وكنت اقول له: مشاكوس ولا ابوجا؟؟ وكنت اقصد بمشاكوس اللعب القذر الخشن وبابوجا نوعا من المهادنة والسلام ولو من غير فائدة ترجى!!! وفى يوم ما كان ورقه (نار منقد) وجميل خالص فاجابنى بان: نيفاشا عديييييل كدة!!! ويعنى (انفشه) اذا استطعت الى ذلك سبيلا..
  • وها نحن اليوم نرى الشريكين ينفشانها نفش (العهن),وفى الحقيقة انها كانت واهية وقابلة للنفش ذاتو…
  • ويوما اجابنى بانه يريد اللعب على طريقة (ابوجا),,ولكن تبين له بعد اخذ (الديس) انه ورق مشاكوس مافى كلام,,فغضب,فقلت له لقد عدلت رأيى الى (القاهرة)!!!!
  • الخيانة :- كان صديقى مغرما بفتاة غاية فى الجمال والادب والرقة والسحر,,ولم يخبرها بحبه حتى تخرجنا فى الجامعة اياها,وبعد سنين قابلها فى السوق وسلم عليها وهو ينوى ان يبوح لها الآن وليس غيره,ولكن هاتفها رن فاجابت واخبرت المتصل انها تنتظره فى الموقع الفلانى,فسألها اهو اخوك؟لا,, هو زوجى_هكذا ردت_ فغادرها من فوره وهو حانق عليها لانها خانته!!
  • عند انبلاج الصبح يحمد القوم السرى..اسه انحنا عمرنا دا كلو (سارين) وما شفنا لينا صبح,,ياربى تكون المسافى لسه بعيدة؟؟ عموما الحمدلله على كل حال..
  • يا سايق البوباى..الاشارة جاى ولا جاى..العارف يقول…..
  • قيل للحسن البصرى :ما سر زهدك فى الدنيا؟؟ قال: علمت ان رزقى لن يأخذه غيرى فاطمأن قلبى عليه,,وعلمت بان عملى لا يقوم به غيرى فاشتغلت به,, وعلمت بان الله مطلع على فاستحييت ان اقابله على معصية,,وعلمت ان الموت ينتظرنى فاعددت الزاد للقاء الله..اللهم احسن عاقبتنا فى الامور كلها واجعل الحياة زيادة لنا فى كل خير واجعل الموت راحة لنا من كل شر..
Advertisements
تعليقات
  1. طارق أب أحمد كتب:

    ولاى يا دوك حيرتنا و تورت نفسنا هسى نتداخل معاك عن الفالوذج ولا حميد و لصوص العفه لا الكوشتيه (وفى الكوشتينه الوست و لا الهارت ) والجامعه و حبكانات الجامعه وحاجت كتيره شايقانى

    لكن بإختصار شديد كده أقول ليك أنت بتكتب من جوات قلوبنا وكأنك محرك بحث قوقلاوى بنكت فى ذكرياتنا
    أحييك يا حبيب

  2. مُخير كتب:

    العزيز حاج ياسين
    الحبان في كل مكان
    سلام وشوق وإعتذار عن الغياب لبرهة بس العمل وعدم تيسر الشبكة،،،
    ياربى تكون المسافى لسه بعيدة؟؟ إن شاء الله ما تطول ومن سار على الدرب وصل.
    عموماً روعة يا حاج أعجبتني كثيراً رشاقة الأسلوب وسلاسة التناول، واصل إبداعك بس لن نقبل بهذا بديلاً عن القصة، فحاول إن تمكنت أن تواصل في الأثنين معاً والله يقويك ويخدر ضراعك

  3. نادوس كتب:

    حاج ياسين دل حلوة
    بس عليك الله كدى ورينا نكتب ليكم ياسين دي كيفن
    يس
    يسن
    ياسين
    والا نكتبها بالعنجليزي اخير YASSIEN

    تسلم يا سيدي على هذه النقلة الموضوعية اذا انك ابحرت بنا بعيد على شواطي الذكريات وزمن الجامعة والداخليات والغرف التي ينبعث منها صوت محمد الامين الملحمة ووردي عرس السودان وحميد،،، وحتى الشيخ سلمان العودة وعوض القرني موجودين والغريب انني كنت ما اجدهم في غرف الجماعة الحمر يقعدوا يسمعوها ليك ويقوليك والله الزول ده محلل سياسي خطر عديييييييييييل كده،، بس المحيرني انو اولاد الجماعة الحكومة ديل ما كنا بنشوفهم في الداخليات يا ربي كانوا بيسكنوا وين،،، ولكن عليك الله شفت زمن كانوا بيسكنوا في الداخلية كان عندهم شرف على الاقل….
    وكمان رجعتنا لي زمن الحبكانات والكهربي كان ويا سيدة لا،،، ومرض بكري الذي كان دوماً زوقة رفيع وهو شين عديل كده ودوماً ما يقع الشاكوش في راسو لمن اصابه التوحد واطلق عليه مرض بكري..
    لك شذرات موضوعية ومعالجة باتقان

  4. الصادق ود البركة كتب:

    السلام عليكم ورحمة الله
    الحبيب ود عثمان والجمع المفرح المدونون الكرام
    قال أب أحمد (لكن بإختصار شديد كده أقول ليك أنت بتكتب من جوات قلوبنا وكأنك محرك بحث قوقلاوى بنكت فى ذكرياتنا
    أحييك يا حبيب)
    وأنا كمان أثني وأثلث وأربع
    شكراً لك يادوك خاصة قول الحسن البصري رحمه الله ورحمنا جميعاً

  5. سماسم كتب:

    سلام ليك يا شمباتي للجميع

    لكن صاحبك دا هو ما صارحها يحقد عليها كيف … هي ما عليها لوم لأنو لو صارحها من زمن الجامعة يمكن الهاتف الرنة الآن كان يكون دا حقوا هو ؟؟؟؟

  6. مُخير كتب:

    الفاضلة سماسم
    ما يكون الشمباتي لو ما حشر بين النصوص قصة قصيرة جدن، ومعاك كل الحق في أن البطل غير منصف في وضعه اللائمة عليها وكان الأجدر أن يملك الشجاعة للتسليم بعجزه وجبنه في عدم المصارحة وأن يُقّر بخيانته هو لمشاعره وتضييعه لفرصة العمر ربما …. واصل يا حاج ……..

  7. nono كتب:

    شباتي/

    كيكتيل شامل!

    من زمن الجاهلية (الكوتشينة)

    مرورا بي (السدييييييييق ) العاملنوووو شماعة انت سديقك افليقا!!!

    الحصل لي سديقك؟

    ماااابسميه خيانه ده من نوع ….

    ماقادر ابوح
    ماقادر اصرح

    النفش ده خلووو شوية

    (وَتَكُونُ الْجِبَالُ كَالْعِهْنِ الْمَنْفُوشِ)

    نسأل الله ان يحسن عاقبتنا جميعا فى الامور كلها

  8. طارق أب أحمد كتب:

    يا ناس يا عسل النونو وصل

    أصحى يا سهيل

  9. نادوس كتب:

    نونو… نونو….نونو….نونو…..نونو….نونو……………………………………

  10. nono كتب:

    المرشح الاول

    لرئاسة

    الجمهورية

    الامازونيه؟؟؟

  11. حاج أحمد السلاوى كتب:

    يسن الشمباتى ..
    يعنى عشان أفرجو عنك وطلعوك من الحفرة بقيت تهضرب بينا وتفسحنا مرة ذات اليمين ومرة ذات الشمال ..وترحعنا للزمن الجميل ..ونقعد نقول ك يا زمن وقف شوية ..والزمن ماااااشى وما جايب خبر .
    حسه عليك الله التليفون الرنّ دا مش كان ممكن يكون تليفونك إنت زاااااااااتك يا القمت وختيتها فى صاحبك.. ؟
    غايتو ..جنس ..تِملِص ؟

  12. الغبشة كتب:

    سلامات للكل………………..
    احي فيك هذا الخلاط العجيب بتدينا عصائر فرش ومحفوظه ومشكله وغريبه بس للامانه مغذية ومنعشة وطيبة المزاق يديك العافية
    كسرة:ده نتاج عملية اللوز بعد التوسعه والتغير تشوف العالم بمنظار غير.
    عمو السلاوى: ما تخليه يمن شمال فوق تحت دائماً ما بطلعنا من النمطية وده حلو برضو؟؟؟
    سماسم ونونو؟ بس قاعدين للشمارات والحكايات والقصص؟؟؟

  13. nono كتب:

    انتي ياحلوه مااافي؟؟

    فترة النقااااااااااااااه؟

    القومك ش ش ش ش ش ش ش ؟؟؟

  14. الغبشة كتب:

    معقوله يانونو ارقد وافوت على الشذرات دى ؟؟؟؟

  15. nono كتب:

    الراااااااااقده ؟؟؟

    ليييييييييييييها؟؟؟

    شنوووو؟؟

  16. ياسين شمباتى كتب:

    الحبيب طارق..بركة بالطلة,,وينك الزمن دا كلو!!؟؟ دى خواطر سريعة ممكن تكون مرت باى مواطن او انسان عاش فى هذه البقعة من الارض المسماة السودان,,قلنا نحاول نغير (المود) شوية..

    الامير مخير..سلام وحمدالله على سلامة كيبوردك..المسافة طويلة مكتوبة علينا وبنمشيها…الخواطر والتخاطر من احب الكتابات الى قلبى,,لذا اتتبع كاتبيها واعشق المذكرات وقصص التأريخ..انا هين تب,,انت مواصل فى شنو؟؟ بطل الدسديس دا وامرق..

    حبيبنا وولدنا نادوس..سلام..عليك الله انت من زمن (يا سيدة لا)!!!؟؟ دا انا كنت قايلك اكبر من كدة..الجماعة ديل كانوا بسكنوا اولادهم فى داخليات براااااااها,,ما بخلوهم يختلطوا بيكم عشان تخربوهم!!! تشكر على الاطراء وياريت نشوف شذراتك انت كمان..

  17. طارق أب أحمد كتب:

    الليله الشوت ضفارى

  18. ياسين شمباتى كتب:

    الصادق الحبيب..بارك الله فيك,,وربنا يعينك ويقويك فى دراستك..ما جاى علينا السنة دى؟؟؟

    العزيزة سماسم..تقولى شنو بس!؟ دا النوع اللا برحم لا بخلى الناس تترحم,,وبرضو التردد والخجل وضعف الشخصية بعملوا كدة,,ولا يكون المطرطش قايلها فهمتو من نظراتو؟؟كدى النسالو ونرجع تانى..

    الاخت نونو..مرحب مرحب ب(الشباتاب)..كمان جابت ليها كوكتيلات!!! بالغت وشذيت انا..النفش دا بقى امر واقع وملموس كمان,,بس ربك يحسن الخاتمة والعاقبة والمرد..

  19. طارق أب أحمد كتب:

    شمباتى
    يا سيده لا دىكانت فى زمننا نحنا تحديدا باللهى قول الكلام دا تانى لأم أحمد شان تعرف أنا سغيرونى كيف

  20. سماسم كتب:

    انتو يا نونو والغبشة الزول قلب بقى انصار سنة ما بسلم … مشى غادي وجاي …………….. فطانا الشر

  21. ياسين شمباتى كتب:

    ابوى السلاوى..فى داعى تدينى ليها(كاش) كدة!!؟؟ ما شفت سماسم قالت كان ممكن يكون تلفونو هو؟؟جنس احراجات غايتو..وما نحن وانتم الا مجترين للزمن الجميل ليدعمنا قليلا فى زحمة الحياة ورهقها..

    الغبشة..حمدالله على السلامة ويارب ما تشوفى شر بعد,,عقبال المنطط عينيهو دااااااك..وشكرا على (الكومبلموو)..

    نونو..خبارك عليها مرقداها؟؟؟ خليها التفرفش شوية وتشوف الدنيا..

    الحبيب طارق..شايت على وين؟؟وضافرو مالك؟؟ اضفرو يضفرو البلا…ما قلنا القصيدة دى قديييييمة,,لو قلنا لى (ام احمد) ممكن نقطة الخلاف تزيد وتتسع الهوة ويحدث ما لا تحمد عقباه..

    نادوس..اكتبها هكذا وكيفما اتفق…

  22. ياسين شمباتى كتب:

    سماسم..يفطك الشر والبتشر..لكن سلامة النظر!!!! غايتو جنس حركات وكواسة كلام وشبك..

  23. سماسم كتب:

    فعلا يا دكتور العتب على النظر أنا لما نزلت تعليقي ما عملت ريفرش يعني قبل ما أقرا كتبت فلك العتبى حتى ترضى

  24. شمباتى ازيك.
    شكلو الطلعة من الحفرة جابت نتيجة.

  25. ياسين شمباتى كتب:

    سماسم..ما عليك,,بس رسلى الترضية!!

    استرايكر..انا طلعت من الحفرة,,انت شن قولك فى الحفرة الانت داخل عليها دى؟ شايفك (لبدت) بهناك وما رديت!! احسن ليك ترد قبل ما اقوم عليك..

  26. ودالفتيحاب كتب:

    الليله ليلتنا والمحبه حقتنا ،من الفتيحاب للفوارة قف نرفع ايدينا تصفيقا كان فكيتوها شويه بنصفّر ،نتكلم على ياتو زمن حتى نكون من أصحاب يأجوج ومأجوج وهم ديل زاتهم وين .نراقب بحزر ،والكلمات تفضح السراير .

  27. طارق أب أحمد كتب:

    ما طال في بحرك في مي

    محمد الحسن سالم (حميد)

    ما طال في بحرك في مي
    تمرك مفدع بالجريد
    شدرك أمد حد السمي
    طينك معتق بالطمي
    نبنيك أكيد نبنيك هوى
    منو وجديد نبنيك أكيد
    يا إيد أخوي علي إيد أبوي
    علي إيدي أنا علي إيد وإيد تجدع بعيد
    في اللجة من راس ميضنة
    حيكومة الفقر الدمار الكضبن والصهينة
    واللي ناقص أيامنا كأس
    اليالطيف سوس البحر نرم قفاهو حجر حجر
    من ها الرصيف الماقدر قدام شريحة الموج يقيف
    الأرزقية وناس مو يا نسقيها كاس أسقتنا يا
    نوريها كيف عشق الحياة سنانا فوق حجر القصاص
    سوانا ناس ضرب البحر جوانا أحر من الرصاص
    يا ضوء حبيبين القسا طول ما إنت غرقان في السي
    تبت يدين ما ترمي ساس ما تبني مجدك من جديد
    تفتح شبابيك الخلاص تدخل نسيمات النشيد
    بيت القصيد يستقبلا ومستقبلا
    والحاضر الماضى التليد
    يا بلدي يا فردة جناحي التاني وكت الناس
    تطير لي عالما واوجعة الزول البيجيك
    ما يلقي فيك غير الهجير
    ناسا تواتي مسالما كل البشاشات القبيل
    يلقاها ميتة مسمة
    والجاتا جاتا من الأرض ما جاتا من تال السماء
    ما أعتي غبنك يا ولد وأعدل قضيتك وأعظما
    لا ترجع السيف الجفير والدنيا فايرة مصادمة
    مالم تجيب تار البلد ريح العوارض تهزما
    وترد مع إبليس الأخير دعا الضلال من جنتك
    يـــــا آدما تأكل من الشدر الحلال يقشاك
    نعاس في ضل رما تختاك هضاريب الصعب
    كربة لياليك المظلمة
    يا نيل قبل خاطرك يطيب أرضك تفزع باللهيب
    تكشح تواريب الغضب صعب المراس
    نوبة وزنوج وبجة وحلب
    رطانو عربان مو أشو ومولدين
    نلقاك أو تلقانا ضوء ضلمة لياليك العجاف رشت نهاراتنا
    النشاف
    آمنا بيك وموحدين في إيدنا فاس وقلم رصاص
    شتلة وكمنجة ومسطرين وطبنجة في خط التماس
    حراسة من كيد البكيد ضد الرصاص والإنتكاس
    نبنيك أكيد وأشد بأس…….

  28. moshahidah كتب:

    ياسين شمباتى
    ——————-
    جمبل جدا خالص .اعلق على شنو ولا شنو ..كلو جميل ..خاصه الكوشتينه والاتفاقياات..
    كتر من الشذرات

  29. ياسين شمباتى كتب:

    الحبيب ود الفتيحاب..كلامك اتحكر فى الاعماق,,وحضروا لينا (قعدة) فى محل يومداك على شرف ابننا نادوس..

    اب احمد..يا بلدى يا فردة جناحى التانى..ثلاثى مبدع فى بلادى(حميد-صديق احمد- مصطفى سيداحمد)..وبدون عنصرية او جهوية عند صديق احمد احلى كتير..

    مشاهدة..شكرا على المرور,,لكن نرجو الاستزادة منك..والشذرات قبلها كان غى تداعيات,وما معروف الجاى يكون شنو..

  30. الزهراء كتب:

    شمباتي: لك التحيه ذكرتني المولينكس خلاطه ذات كفاءه عاليه

    منوعات الظهيره- عاد الختافين المعروفين ديل لابد نشوف ليهم حل والحل شنووووووووووو؟

    سايق البوباي لاعرف يمشي شرق لي طرمبلة شل ولا يتجه غرب لي طرمبة اجب خلوه يلف صينيه مادام مافي استوب

    يعني مالاقاني زول يبوح بي مشاعرو في السوق والله صحبك ده بس الديك المابعرف الوكت… ها الحاقد ليها شنو بعد ده

    ولا شنو يا ابكرون؟؟ كر كر كر

    نونو: طبعا لسة بتترجمي فالوذج بي الوافي شكلك صح؟
    ما تتعبي نفسك اسالي منها ناس العياده

    الا رحم الله الحسن البصري ووهبنا ولو قليل من حكمته لنتزود بها في هذا الزمان القاسي

  31. نادوس كتب:

    اها امسكوا يا سيدا لا
    ونحنا قبلهم ناس دكتور عمر ديل بطان بالنسبة لينا انا قلت ليكم حاج السلاوي ده ابننا براكم قيسوا على ذلك

    يا سيدة لا
    الشاعر الدكتور عمر خالد

    يا … سيدة … لا
    فايتانا وين مستعجلة؟
    شرط امتحان ما انت كمّلت الحَلا
    لازم علوم ما بالسماحة مؤهلة
    يا ساحرة نايرة ومذهلة
    دار النشاط الليلة صبحت قاحلة
    حزنت لياليها وصبيحاتها وتبكي أصائلة
    ما كنتي نورها ونسيمها وبلبلة
    وكنت الضياء البرشح سناها مجمّلة
    وكنت الندى الحاضن زهورها مدللة
    فايتانا وين مستعجلة؟
    فوتِّك منو العاد بقبله
    كل القلوب تخضع تجيك متوسلة
    تتبع خطاك في ابتهال
    وتزرع دروبك وتشتلها
    فايتانا وين مستعجلة؟
    السلة * تبكي مولولة
    الليلة صبحت أرملة
    جفت دروبها وبهجته
    وبنت العناكب مدخله
    ما كان عشانك يا ملاك
    نحن بنجيها وندخله
    كنا بنصفق للجمال
    وكنا بنصفق للحلا
    لكن يمين حالفين ورآك
    لا نجيها يوم لا ندخله
    حادين عليك يا مذهله
    فآيتانا وين مستعجلة؟
    القمرة وكتين خنَّقت
    روَّحنا ليها بنسألها؟
    قلنا ليها أيه سبب الغياب؟
    ساعات ظلامنا الطولا!!
    قالت خلاص بي أرضكم مَالَيْ صلة
    أنا كنت مشتاق للعيون البطبيعة مكحلة
    بفدي الديار وأجمِّله
    فايتانا وين مستعجلة؟
    غلطات كتيرة الكمبيوتر بْعَّمله
    يمكن سها
    ويكمن نسى
    وجاط النِمَرْ بي أكملها
    ما قالوا بعرف كل شئ
    ليه ما عرف ست الحلا
    لو كان عرف كان النتائج عدَّله
    وعشان عيونك يا فمر كان خت اسمك أوله
    الجامعة بعدك كوم رماد
    لا تنفع آداب لا اقتصاد
    لا فيها طب لا صيدلة
    وحقوق كمان … حقوق شنو
    والله .. أكبر مهزلة
    مالو العميد
    مالو البليد
    مالو لو رفد المصحح والمعيد
    لو خلا ست الناس تعيد
    نومه الضهر تبقى له ضر
    الجاهلة كيفن ما بتمر

    السلة *: كنت تحب لعبة السلة

    الشاعر كان في سنة أولى كلية الطب بالجامعة وهي في سنة أولى آداب

  32. ياسين شمباتى كتب:

    الزهراء..لكن لقيتك ما جديدة كلو كلو,,انتى من زمان منوعات الظهيرة!!؟؟ والله كانت فقرات البرامج فى ذلك الزمان من احلى واروع ما يكون,وتلتها منوعات العاشرة وكانت هناك سينما سينما وجريدة المساء وعزيزى المشاهد و……….الخ..
    اما بخصوص صاحبى المطرطش دا فانا ذاااتى محتار فى عمايلو دى!!! ربنا يديهو البت الراسية الترسيهو وتمشيهو دغرى..

    نادوس..والله صحى(مالو العميد مالو البليد),هو ما اظنو بليد,بس ما اظنو واجه الجمال المذكور دا,والا كان رفدهم جد جد..لكن انت مغرم شدييييييد بى (سيدة) دى!!! الخبر؟؟؟

    ود الخلا..سلام..انت كنت ياتو فيهم!!؟؟ تشكر على المرور..

  33. ياسين والصحبة الكريمة………سلام
    والله روعة وجمال..
    وتلاقت قمم يا مرحبا (ناس شركة مواصلات العاصمة وابو رجيلة واللبن الفي الوجبات الثلاثة وناس الفيس بوك والانترنت الما حضروا الزمن الجميل داك ولكنهم ملمين بتلك الحكاوي )..
    فعلا تلاقت قمم يا مرحبا
    ياريت الناس الحلوين … يمتعونا بالسرد الجميل
    ياخي الشريكين كرهونا حياتنا

  34. طارق أب أحمد كتب:

    ود الباشا
    Detour رائع نواصل بى جاى

  35. أب احمد
    تحيات يا حبيب
    وتحيات لأم أحمد
    لكن السيدة لا دي حبيناها وما شفناها
    غنينا ليها لكن ما عاصرناها
    كدي رجعنا للزمن الجميل
    سؤال سغيروني
    الحاج سلاوي كان معاكم؟؟؟

  36. أب احمد
    انت مع ناس ( بيارة السوكي باظت….)
    ولا مع (ميت سي سي لل…)
    يا حليل ناس الفوت بول ناس مازدا في الآداب
    وناس الباسكت بول ناس الاقتصاد
    ولا عزاء للأطباء والصيادلة
    ممكن تكون مع غزوات الشمباته
    والله أيام يا زمان

  37. محمدحسن كتب:

    أحبابنا سَلام 🙂
    وَ مَشكـُور عَلى ( الأطايـب )
    الفـَاتحة للمَزاج وَ الشـَهيَّة يا شمبَاتي 😉
    ؛
    وَهاكَ ( الشذرَة ) دِي عشان ( العِـين ) :

    # ==> [ الصادق المهدي: فوز البشير في الانتخابات يعني انفصال الجنوب ! ]
    http://akhirlahza.sd/portal/index.php?option=com_content&view=article&id=389:2009-11-14-07-48-00&catid=1:2009-11-06-04-44-30&Itemid=50

  38. ياسين شمباتى كتب:

    الحبيب ودالباشا..سلام..ِكلك ناوى تعيد فى السودان ما دام قمت على الذكريات والايام الطيبة..

    محمدحسن..تسلم يا عزيزى..طبعا الصادق والبشير وكل قادة الاحزاب ديل متكسبين وبيعاينوا لى مصلحتهم,,يعنى اسه الصادق لو جابوهو رئيس وزراء بيرجع فى كلامو وبيعتبرها (رضوة),,لكن البشير دا مافى ناس عاقلين يقولوا ليهو خاف الله؟؟

    رطل السكر بى الفين جنيه من القديم!!! اها الناس تطعم الحياة الماسخة دى بى شنو!!؟؟ شكيتك على الله يا البشير انت وبطانتك كلها كان دايرين تكتلوا الشعب المسكين دا…

  39. محمدحسن كتب:

    آمين الكريم ود الخلا آمين
    😉

    وَ مَا أكتـُم عَليكـُمُ سِرَّا الطيبين ود الخلا وَ يَاسين وَ أحبابنا جَميعا
    هُناكَ ( مُلاحظة )
    أو عَلها احسَاس ( مَا )
    أو ذاكَ الهـَاجس أو هِيَ الأحلامُ ؛
    أنَّ ( ثـــَورَة ) مَا عَلى وَشكِ أنْ تــَتــَفـَجَّرَ !
    ؛

    وَ مَعَ ( تـَقـَلـُّبات ) الإخوَة في تِلكَ ( الثـَورَةِ ) القدِيمَةِ
    وَ انقلابَاتِهــِمُ عَلى بَعضِهــِمُ البَعض
    بدأت تـــَفــُوحُ مِنَ الجَميع ( رَوائِحُ الفِتـنــَةٍ ) !
    وَ تــَتــَجَلـَّى الحَقيقة فِي ( صَحافتِنــَا ) وَ أعمِدَة كـُتابهـَا مِن ( ضـَرب ) تحت الأحزمَة وَ نـَـَسفٌ للخـُطوط الحَمراء وَ .. الخـَضراء !

    لِكن وَ يا يَاسين وَ يا وَد الخلا تـَبقى لنا بإذن الله وَ بيننا ( الشذرَات )
    وَ كم جَميلٌ أن تـَكـُونَ ( هِيَ ) لله 😎

  40. محمدحسن كتب:

    ؛
    وَ هذِه عَلهــَا تـَصدُقُ أن نـَجدَ فيهـَا ( مَلامحَ شــَذرة ) :
    ==> [ الجيش الشعبي.. حريّة الاعتداء ! ]
    http://akhirlahza.sd/portal/index.php?option=com_content&view=article&id=189:2009-11-09-09-28-33&catid=36:2009-11-06-04-24-33&Itemid=61

  41. ياسين شمباتى كتب:

    الحبيب محمدحسن..مساك طيب..عليك الله هى فى بلد عندها سيادة بكون فيها جيشين!!؟؟ ويعيث احدهما فى الارض فسادا ولا يجد من يحاسبه؟؟طبعا الحكومة طلقت يد جيش الحركة الشعبية فى المواطنين وهو ما قصر..
    اما عن مليشيات الاحزاب فحدث ولا حرج..هل تعلم انه داخل المؤتمر الوطنى توجد مليشيات؟؟ انه (لبنان) سوداء اخرى..لا نتشاءم ولكنها قراءات الاحداث..

    نسأل الله اللطف والعافية..

  42. محمدحسن كتب:

    وَ صَباحَاتكَ عَامرة بالخير وَ السَعَادة يا شمباتي 🙂

    و الله حكايه يا يَاسين
    المليشيَا جُوَّاهَا مِليشـَـيَّات!
    وَ المليـشِـيَّات فاكره نفسهــَا ( أحزابا ) وَ حَرَكات !
    وَ النـَاس جَاريه للمَـنفـَعَة العَامَّةِ إن ( خــُـصَّت ) .. تـَبصُم تــَسَجـِّل تـَصَوِّت !
    وَ الكـُل بـيَلعَب ( بديلـُو ) وَ لِسَانـُو ( ينـبَح يهوهِو ) رَافِع عَلينا سِلاحُو !
    وَ البَلد مَا ليهـَا كبيراً لا وَجيعـَاً يَـنـــشـَاف ضـُلـُّو !
    وَ مَحمَّد أحمد رَمَى ( طـُوبَة وَلدُو ) في مَعطـُوبة بَلدُو !
    وَ عَم عَلي ( طـَلع ) زيتـُو !
    وَ خـَلينا مِن ( قانـُون سِروال ) مَرتـُو !
    وَ الساقيَة لسِّه مُدَوِّره ؛

    😉

    إلى ( شذرة ) اُخرى وَ الأستاذ [ محمد سِليمَان إدريس ]
    :
    رَأيتُكَ قد عَزمْتَ عَلى المَآب .. فهَلْ فكرتَ فِي الأمْرِ الصَوَاب ؟!

    وَ مَهْمَا كَانَ مِن يَوم عَصِيب .. وَ لَيْل جَنَّ فِي ظُلَمِ الضـَبَاب !

    وَ مَهْمَا لَمْ تجد حَظاً سَعِيدَاً .. وَ مَسْئُولاً يَعُـــزُّكَ فِي الخِطَاب !

    وَ مَهْمَا كَانَ مِن شَخص حَسُود .. عَنِـيد الطَبعِ مَخبُولِ اللبَاب !

    يَسُوسُ الأمْرَ طَيشَاً وَ ارتجَالاً .. بمَا لَمْ يَرض مَفهُومَ الشَبَاب !

    وَ يَهْدِمُ كُلَّ بُنيَان رَفِيعٍ .. لِتـَحوِيلِ العَمَارِ إلى خَرَاب !

    فلا تحزَن وَ كُن رَجُلاً قوِيَّاً .. عَزِيزَ النـَفس مَرهُوبَ الجَنـَاب !

    لأبْن الفـَارِضِ المَشْهُورِ فِينا .. مِنَ الأمثـَالِ ضَربٌ فِي العِتـَاب

    يَقُولُ بحَسْرَةٍ بَلَغتْ مَدَاهَا .. لِكَشْفِ القـُبحِ مِنْ تحتِ النِقـَاب !

    تـَمُوتُ الأُسْدُ فِي الغابَاتِ جُوعَاً .. وَ لَحمُ الضَآنِ يُرْمَى لِلكِلاب !

    وَ ذُو جَهْل يَنـَامُ عَلى حَرير .. وَ ذُو عِلْمٍ يَنـَامُ عَلَى التـُرَاب !

    وَ مِنْ هَذا أقـُولُ بِأعلَى صَوتي .. وَ مَا بَيـنِـي وَ ذَلكَ مِنَ حِجَاب !

    إذَا ابتـَلَعَتْ بُطُونُ النَاس شَوْكـَاً .. لَشَحَّ فِي المَؤُنـَةِ وَ الشَرَاب !

    وَ كَمَّمَ كُلَّ ذُو رَأيٍّ سَدِيد .. فـَلَمْ يَقوَ المُجـيبُ عَلَى الجَوَاب !

    وَ كَشَّـرَ فِي وُجُوهِ الناسِ وَجهٌ .. دَمِيمُ الشَكلِ مَشْدُودَ الآهَاب !

    فلا تـَـنأى إلى بَلَد بَعيد .. وَ لا تـَبـنِي عَلى مَتن السَرَاب !

    فمَنْ يَسْلُكْ طَرِيقـَاً هَامِشِيَّاً .. يُرَوَّعْ فِي الذَهَاب وَ فِي الإيَاب !

    نـُرِيدُ الصَبرَ أنَّ الصَبرَ فـَرضٌ .. عَلى مَنْ لَمْ يَجدْ كَأسَ الرُضَاب !

    لَنَا فِي كُلِّ عَام غـَائِبَاتٌ .. لِتـَخلِيص النـُفُوسَ مِنَ الصِعَاب !

    فإنْ جَاءَ الغِيَابُ كَمَا يُرَادُ .. فوَيْلٌ لِلحُضُورِ مِنَ الغِيَاب !

    وَ وَيْلٌ لِلجَريد مِنَ الحَديد .. وَ وَيْلٌ لِلطُيُورِ مِنَ العُقـَاب !

    وَ عِندَ اللهِ وَعدٌ بالعَطَايَا .. لِكُلِّ الصَابرينَ عَلى المُصَاب !

    وَ إنْ جَارَ المُسِيءُ عَلى قوَامٍ .. لَهُ حَدُّ الحَقِيقَةِ وَ النِصَاب !

    فعِندَ اللهِ مِيْزَانٌ وَ عَدْلٌ .. لِمَنْ مَزَجَ الخَطِيئَةَ بِالمَتـَاب

    وَ نَحنُ وَ كُلُّ ذِي رَأيٍّ سَلِيب .. نـَتــُوقُ لِحَقــِّـنـَا يَوْمَ الحِسَاب

  43. ياسين شمباتى كتب:

    الحبيب محمد..سلامات..

    والله الاستاذ/محمد سليمان نكأ جراحنا التى نحاول جهدنا لأمها والتئامها..وصدق شديد فى حتة (الكلاب والضأن) دى..تسلم يا حبيب..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s