سوداننا مع نيام

Posted: الأربعاء,11 نوفمبر, 2009 by طارق أب أحمد in إجتماعية

الجمعه 11/6 توجه نفر من سوداننا لمعاودة الصديق الحبيب شاعر الدانقا نيام إثر العله التى أصابته الأسبوع قبل المنصرم و لله الذى من عليه بالشفاء الحمد و الشكر أولا و اخيرا
ونترك بقية الحكى للصور

الطريق إلى مدنى

حمدا لله على السلامه

فرحه غامره

أفليقا



إصغاء

سهيل و عبدوش

و أب أحمد

و عبدوش و التركى و سهيل دايمن

ود المدنى و نيام و سترايكر

وأفلى و التركى

أخو نيام على يمينه


يا جماعه كدى إستهدوا بالله و بيتوا معانا

نسأل الله العلى القدير الصحه والعافيه و أن يجمعنا دائما فى ساعة خير

Advertisements
تعليقات
  1. مُخير كتب:

    عن علي رضي الله عنه قال: سمعت رسول الله صلى الله عليه وسلم يقول: “ما من مسلم يعودُ مسلمًا غُدوة إلا صلَّى عليه سبعون ألف ملك حتى يُمسي، وإن عاده عشيةً إلا صلَّى عليه سبعُون ألف ملك حتى يُصبح، وكان له خريفٌ في الجنة”.
    4- عن أبي هريرة رضي الله عنه قال: قال رسول الله صلى الله عليه وسلم: “من عاد مريضًا نادى منادٍ من السماء: طبت، وطاب ممشاك، وتبوأت من الجنة منزلاً”.
    وقال رسول الله صلى الله عليه وسلم: “من عاد مريضًا لم يزل في خُرْفَةِ الجنة(يعني جناها) حتى يرجع…”الحديث. ويخبرنا بما لعيادة المريض من جلال وخطر حين يقول: “إن الله عز وجل يقول يوم القيامة: يا ابن آدم! مرضتُ فلم تعدني…”. فأية صورة من صور الحث والتكريم تفوق هذه الصورة أو حتى تضاهيها؟ وأنى للعلاقات الإنسانية أن تجد لها ضميرًا كهذا الذي تجده في كلما، وقال الإمام الشافعي – رحمه الله – يبين أثر عيادة المريض على كل من الزائر والمزور:
    مرض الحبيب فعُدْته.. … ..فمرضت من حذري عليه
    فأتى الحبيب يعودني.. … ..فشُفيت من نظري إليـه
    الأحباب أهل الدانقا
    نسأل الله أن يجزيكم خير الجزاء على عيادة حبيبنا وشاعرنا نيام ونضرع للخالق جلت قدرته أن يعجل بشفائه وأن يديم هذه العلاقات الطيبة خالصة لوجهه وأن يرد غربة جميع دانقوست المهجر لننعم بصفاء ودكم وصادق إخائكم والسلام.

  2. nono كتب:

    عمنا نياااااام /

    متعك الله بالصحة بالعافية…

    جزالله الاخوه في سوداننا …………..

    عن النبي صلى الله عليه وسلم قال: إن المسلم إذا عاد أخاه المسلم، لم يزل في خرفة الجنة، حتى يرجع، قيل يا رسول الله، وما خرفة الجنة؟, قال: جناها رواه مسلم……….

  3. حاج أحمد السلاوى كتب:

    أخوانى إخوان الدنقا ..
    ما عندى حاجة اقولها غير ..ياها المحرية فيكم ..
    وجزاكم الله كل خير ..يا أهل الخير ..وأنتم الفائزون.
    ولأخونا الكاشف( الصغير )..نقول ليهو شافاك الله وعافاك ..وإن شاء الله فى عدوينك ..وسلامتك وأمازونيا العظمى كوووووولها كرامتك ..
    إنت يا نبع المشاعر ما بيصيبك إلا خير وإنت ما لساك صغير ونسأل الله العلى القدير أن يديم عليك من نعمه دوماً .
    وما تقطعوا الجوابات .

  4. طارق أب أحمد كتب:

    الأحباب سلام
    جدير بالذكر أن حادى الدرب البروف كان أول من رتب لهذى الزياره ولكنه لم يستطع السفر لوعكه خفيفه طارئه

  5. التركى كتب:

    تشكر ياأب أحمد وانت موثقا موثوق به وكذلك على الجهد العظيم الذى بذلته فى جمع شملنا وتحقيق رغبتنا فى تلبية الواجب … متع الله البروف بالصحة والعافية وله الحب والتقدير على هذى الفكرة الطيبة وان شاء الله مجتمعين فى ساعة خير .

  6. عمنا نيام وكل الدانقوست والحبان

    لا بأس عليك وشفاك الله وعافاك ورزقك موفور الصحة

    وان شاء الله مجتمعين في بيت الله

  7. ابكرون كتب:

    حمد الله علي السلامة لكبيرنا نيام
    والشكر لاهل حوش العمدة علي اللفته البارعه
    واللوم الشديد لطارق ابو أحمد (الكوردنيتر) علي عدم ا اخباري بالزيارة كنت مشيت معاكم للاخ نيام…!!!
    وتكدير شديد لافليقا ( ده شغل عسكرية بقي ! )

  8. حاج أحمد السلاوى كتب:

    أب أحمد ..الدينمو .سهيل ..سترايكر ..البشاوى ..التركى.. عبدوش .. إلخ .. إلخ
    غايتو لاكين إتلومتو جنس لوم مع عمنا الفكى أبكرونا دا …لوم أصلو ما معقول .انا خايف يقوم يعمل ليكم حاجة كدا ..ولاّ كدا تحميكم النوم .. وبضم صوتى لصوتو ..ليه يعنى ما قلتو ليهو إنكم ماشين تزوروا عمكم الكبير شاعرنا نيام ؟
    غايتو .. جنس … غايتو ..

  9. ياسين شمباتى كتب:

    الحبيب الاديب نيام..سلام وحمدالله الف على السلامة,,ويارب ما تنزل بيك مثلها ابدا..
    لكن يا جماعة مشيتوا تضحكوا فى الراجل دايرين تغطسوا حجرو؟؟براحة عليهو..

    عبدوش وخالد مدنى..بركة بالطلة..

    لكن الغريبة لما ضربت ما لقيتكم مع الجماعة فى العربية!!؟ مشيتوا وين؟؟

    شكرا اب احمد على الربط الجميل…

  10. مشاكل كتب:

    سلامز

    سلامات حبيبنا نيام
    كفارة و سلامتك
    و شمباتي كرامتك

    و مشكورين يا جماعة على التوثيق الجميل

  11. ياسين شمباتى كتب:

    فداك نفسى يا حبيبنا نيام,,مع انو انحنا ما بنسوى ولا نرقى لمستواك,,لكن كيتا فى ناس كدة!!!

  12. ابكرون كتب:

    شفته المشاكل دي يا يسن مشاكل ضبحك خروف كرااامه لكن المضحي له يستاهل….
    والله يا سلولو ولا جابو خبري ….اسه اقوم اطلق فيهم سافوته ينكرشوا زي ضكر الكديس ما يحلهم الا التدبيل….وفي ناس زي استرايكر بقتلوهم عديل كان عملوا كده …….

  13. حاج أحمد السلاوى كتب:

    عمنا الفى أبكرونا ..
    خلاس الجماعة أديهم العفو والعافية .وما تخليهم لا ينكرشو ..لا يندرشو ولا تجيهم السافوتة ( سهيل …إنت معاى ؟ ) ..وتانى ما ح يعملوا كدا ..
    دا كووووولو عرفناهو إنت قاعد بيغادى لامتين ؟ ما خلاس تقوم تنسل تمرق تمشى تشوف شغلك ..ولاّ يمكن راجى خروف الضحية الدعول ! والله ما حسادة منى ..مجرد سؤال عابر طاف بذهنى … ( إيه رايك فى طاف بذهنى دى ؟ ).
    خلاس صافية لبن .. مع الشباب ديل ؟

  14. ياسين شمباتى كتب:

    ابكرون..برضو ولدنا وما بنزعلو,,انحنا الكبار..لكن(السافوتة) دى بتعمل كاروشة ولا حسكنة فى الضمير؟؟انا ملخبط صراحة..

    ابوى السلاوى..حسادة ظاااااهرة..ما تزنقوا الراجل,,لسه عندو مهمات ما خلصت!! اييييييي..

  15. الزهراء كتب:

    عمنا نيام
    حمد الله علي السلامه وان شاء الله بالصحه والعافيه وربنا يكرمك بكل ما هو طيب ويبعد عنك الداء وكفاره وسلامتك والف عزيز كرامتك

    اخونا أب احمد
    ربنا ما يحرمنا من ابداعاتك وتوثيقك لكل اللحظات الجميله وان شاء الله دايما مبسوط وربنا يديم عليك رضاه

    لكن يا جماعه بالجد كده بالغتو مع الفكفك ابكرون نحن والله ما بنرضى فوقو تب
    انا كان عارفاهم ما كلموك كنت ضربت ليك عشان يلقوك قدامهم في مدني
    (طبعا دي تلجه كبييييييييره)

    استرايكر: حايم وين بي لغاليغك انت مش مفروض تنضاير بعد ده؟ يااا تلاته في واحد انتا؟

  16. الزهراء كتب:

    ابكرون
    صحي السافوته دي شنو؟ نوع من الانتكاريا؟ شمباتي ساعدنا الله يساعدك

    نونو حاولي قوقليها لينا يمكن نطلع بي فايده

  17. طارق أب أحمد كتب:

    لقد وجدت هذه الابيات الاولي بين قوسين و اعجبتني و سرت النشوة فيا فهاكم من عندي البقية….
    “جرت تتلاحق الأنهار كما تتلاحق الأعراف
    كما تتصافح الأديان
    كما تتمازج الألوان
    هجيناً من سلالات الفخار والعز
    مرور النسمة وأيضاً هزة الإعصار”

    نيام 1/6/2009
    ـــــــــــــــــــــــــــــــــــــــــ
    مشت الشوارع هم
    والفرح الحزين انساب في إسهاب
    علي السوح المبللة شوق في ترحاب
    مع إنسان
    شايل نومو في الأجفان
    وبرضو كمان
    فكة ريقو و الأكفان
    مشاوير التعب أوزان
    و محسوبالو في الحسبان
    بدل فاقد بدل سفرية ايا كان
    وواضح انو زول فلسان
    مهمش في حساباتن
    مهمش في نقاشاتن
    مؤكد في صناديكن
    و خايف من كتير لومن
    ومن بكرة
    وكل ما نق مذياعهم
    نقيق نشرة الأخبار
    سرت الرعشة في جلدو
    و شاف في ليلو شمسو نهار
    سكت صنا
    وزاد محنة
    سرح بفكرو في بكرة
    وسافر في جملة الأفكار
    بلا مقداف
    بلا مشهاد بلا إشراف
    وكان شواف
    شاف الناس علي الأعراف
    ناس تتصفح الأديان
    وناس تتصفح الأوثان
    وناس كيزان
    وناس تحلف تقول فخار
    وناس من نورها و الإبهار
    ضوّت ليلو بشمعة
    فشاف دمعة
    علي خد الصغير تنساب في لمعة
    لعن صبرو
    وحزم امرو
    ونهض تتسارع الأحداث علي فكرو
    متين تتفتح الأنوار
    ويطلع في البرية نهار
    ومن جفنو
    قلع نومو
    وشتت في الطريق خطواتو في إهمال
    وفي إجمال
    كان النهر يتسارع
    علي بعض القري المنسية و الحلال
    يحمل اطهر الأجساد ويطرح في الشواطئ سؤال
    كما تتصافح الأفراح هل تتصافح الأحزان؟
    كما تتصافح الأديان هل تتحاور الأوثان ؟
    وعلي الشارع ترك خطوات
    مع رسم الزمان الفات
    تنظر مرة طول الموجة
    وتبكي علي العزيز الفات
    جرت تتلاحق الخطوات
    كما تتلاحق الأنهار كما تتلاحق الأعراف
    كما يتلاحق الإعصار
    كما تتلاحق الأخبار
    هجيناً من سلالات الفخار والعز
    مرور النسمة وأيضاً هزة الإعصار

  18. الزهراء كتب:

    الشاب اللابس قميص ابيض المعاكم ده منو؟ ما عرفتو

  19. طارق أب أحمد كتب:

    نيام

    تعال نكتب
    (دعوة مفتوحة لكل الناس للكتابة و المشاركة في منتدي الكاتب الرائع الفاتح جبرا)
    ………………………………………….. ……………..
    هبش كوم الوجع لمسك
    قهر بحر الحزن حسك
    رشح ضو الأمل فينا مكان جسك
    جيت من وين؟
    زمن جاي وزمن روح ولا عارفين
    طعم شيتنا
    وخراب بيتنا
    وبومة علي النخل القبيل شاوح
    تنعق فوقنا في ليلا بيتراوح
    هجع سمارو و اتلموا بلا مصباح
    لا عارفين بكان كانوا و لا برجع زمانا راح
    جيت من وين؟
    جيت لميت وليدات الفريق كلو
    صناديد الزمن قلو
    والصابرين قلال بالحيل
    وبعض احيان كتار فلو
    ولا طارين زمن رجعة و ما بخلو
    علي البلد الفلاني السُبْ
    آهـ بلدي المبكيني
    اشوف في الاعوج المقلوب
    ضهر دوكة و قفا دحلوب
    لاقادر اعدلك انا و لا انت بتجيني
    جيت من وين؟
    تعال نكتب
    علي الرمل الدوام سهال بمر الريح
    تعال نكتب
    علي النيل النهارو و ليلو في التسبيح
    ومهما حاول الضهيب يمسحنا
    و يمسخنا
    ويمسرحنا
    ولا نكضب
    تعال نكتب
    غنانا الفات و كت كان الزمن بعجب
    وكت الناس اكانو الناس و كت حرم حبابك تب
    وناس زينين
    ومتسامحين
    ومتكاتفين
    ومتقاودين
    ومضاحكين
    ومتقابلين
    ومتحابين
    صباحاتم مبشارية ومساياتم يا مرحب
    تعال انفض حروف محفورة منسية
    غنا حلفا و هزيع درديب نقز نمولي ومهاجرية
    عساكم انتو يا الزينين
    تسرو البال تغرو العين
    عشان الفكرة و الذكره
    عشان نبني وطن بكره
    تعال آ زين
    تعال نكتب
    ما بنهتم
    إت من وين؟
    وجيت من وين؟
    في زمنا خبوبا طين
    ناسو سمان وكضبو تخين
    يحلفو حرام يحلفو يمين
    “حلفت يمين دي خسرانة و مابتعشي !”
    و متعشيييييييين!!
    باعو الناس و باعو الدين
    تعال آ زين
    تعال نكتب كلام باكر
    عشان اولادنا مطامنين
    يجوك عارفين
    بكان الوجعة و الفزعة
    ويبقو الامة مجتمعة
    صيتم يضرب الافاق
    وصوتم يغلب النزعة
    تعال قرّب
    تعال نكتب!!

  20. طارق أب أحمد كتب:

    نيام
    عضو ذهبى تاريخ التسجيل: Mar 2009
    المشاركات: 232

    القمر القديم
    بمناسبة الرحول المرتقب لابو الافاليقا الشهير ب (دينموكييف)

    1. على الأثنين,18 مايو, 2009 في 1:35 م | رد طارق أب أحمد
    افليقا
    كدى اول شى قول لى
    أنت القمر القدر القمر الفى محطة الأقمار ده لسه شغال و لا بدلناهو بى الدش الستين سنتمتر
    كسره: الناس البره ما تقول أب أحمد سحلب ,,,,,أبو حمودى راحل بيت الحيكومه فى الأقمار
    ضمه
    أبو الأفاليق مبيضه ليك فى قمر أنت و أقمارك ضمه فى الأقمار
    فتحه
    أها تانى بتجو الخرتوم بتين
    على الأثنين,18 مايو, 2009 في 2:32 م | رد aflaiga
    اب احمد :
    القمر القديم فى بكانو واقف ضمه
    شالو الناس كتار خلوك يباس يا يما
    خرتوم الحبش صارت غميسه وغمه
    قنا نشوف هوا البلد البدورلو مشمه
    جيتكم حبابا المنيا يوت نتلما

    القمر القديم فى بكانو واقف ضمه
    شالو الناس كتار خلوك يباس يا يما
    خرتوم الحبش صارت غميسه وغمه
    قنا نشوف هوا البلد البدورلو مشمه
    جيتكم حبابا المنيا يوت نتلما
    ـــــــــــــــــــــــــــــــــــــــــــــــــ (نيام)

    القمر القديم فى بكانو واقف ضمه
    كيفن بتنسي بلد الخؤول و العمة
    ما بنساها حاشا علا زولا رمة
    او مقطوع من شدر عريان و عدمان ذمة
    يا افليق اخوي حرم ماك الكديد وضلمة
    لمام الجفال ماعون حديث اللمة
    الولد البسر الديمة رافع الهمة
    اصيلا ود اصيل وماك محدث نعمة

  21. طارق أب أحمد كتب:

    21/5/2009
    aflaiga
    شمباتى : احسبونيه بتاع حنانك وهو الخش الاحسبونيه بيسكن الشقيلاب ؟؟ طيب البيسكن كافورى خش الجنه ؟؟؟
    وقمت انا رديت على نيام :
    نيام :
    بقول فوق قول نيام والليله قولك يمه
    من زمنا قديم قلتيلى صحبه مهمه
    صحبتى ناس نيام ذايدانى همه وهمه
    صحبة واحدم بتساوى صحبة امه
    —–
    البيت الجديد يا يمه مفروش بيهم
    والبيت الجديد يا يمه مفروش ليهم
    راجين جيتم شان نتملى بى جيهم
    راجين جيتم كان جونا ولا نجيهم
    اصلو الحاله وحده وربنا يعافيهم
    اخوانا لنا ونحنا اخوان ليهم
    ——
    فى بحر الشقيلاب قلنا يوم نتلاقى
    شقلب من شوى القلب المشوق يتلاقى
    ما شقلب شليق تبرانا اى شلاقه
    شقلب حالنا شوقم والوليد اتشاقى
    حمودى الوقف برشاقة الاشراقه
    قال كل يوم رحيل ما دام كده بنتلاقى !!
    —–

    تسلم نيام وان عدت عدنا ..
    قام شمباتى الحراش قال لىنيام عود ليهو فهمو حاجه !!!
    قمت انا قلت لى شمباتى :
    ——
    شمباتى الرحول اصلك قبيل ما حاضرو
    لا عارف اصولو ولا كتبت محاضرو
    خليك فى البقيع جنب النبى ومخاطرو
    خلنا فى الرحول لم العفش وعصرو

  22. طارق أب أحمد كتب:

    نيام

    ممنوع التدخين
    يا بروف ارجوك لحدي كده نحن كويسين
    و خلاص كفاية تدخين
    حبينا فيك الخفة والدم الشربات
    والله الضغوط خلتنا في حيرة وآهات
    وفي كتابتك عشنا ضحكات و ضحكات
    شوف العلينا واحكم كان داير اثبات

    كان السجار من طبعك وادمنت فيه سرور
    سجارة واحدة وانقص حكم الجميل مغفور
    نار السجار حرقتنا يا قلب والع نور

    أصلو الجحيم في سجارك بطل وكيف يرضيك
    حتى المحال ان درت بنطوعو ونهديك
    ارواحنا حولك هايمة حارساك دوام تحميك
    بيك ضحكت أيامنا والفرحة تمت بيك
    مع الاعتذار للاستاذ وردي

  23. طارق أب أحمد كتب:

    نيام 2/6/2009

    العدل في الظلم احسان

    “مُرُورَ النـَسمَة فِي الإعصَار
    جَرَت مِنـَّا القـُلُوب حَزنانهَ مِن هَمَّا تقِـيل بالحِيل ؛
    زي طَعمَ المَرَارَة الكـَان وَ زي مَا كان وَ يَاهُو الكان وَ كانَ الكان!
    فمَا تـَحزن وَ مَا تـَقلقَ وَ مَا تـَشفـَقَ
    وَ سِيبَ الهَم وَ مَا تـَهتـَم
    وَ لَو هَدُّوكَ مِن ظـُلمَاً
    لَو حَرَمُوكَ مِن رزقـَاً
    أوْ رَفـَسُوكَ مَا تـَلعَن!
    لو شـَبَح الظـُلُم عَشـَّش
    لَو أعلَن مَعَاهُو العِز”
    دا مقياس النبوات كان
    انا انسان
    اشوف في الظلم و اتناوم دا ما برهان
    واقيس الجوع دا ما قدري ودا ممكن كان؟
    اقول يمكن صباح باكر يكون اسهل والاقي مقاسي في الحرمان!!
    اشوف السوق
    الاقي السوق في جنو واجنّ كمان
    تجارة الحسبنة الزرقاء
    ناس تحلف دقيناتم كثيفة خلاص
    و اجباهن زرق بالحيل من اثر السجود يمكن او الافلاس
    اهل الجنة يمكن اقول او اهل الناس
    دا ما شغلي و لا المقياس
    مقاسي انا وانقي مقاس
    القا العدل في الجوع نفسو في الانفس و في الانفاس
    لا انسان لانو الحزب
    لا انسان لانو الدين
    لا انسان عشان النشأة و التكوين
    لا انسان عشان الفرشة و التلوين
    لو شبح الظلم عشش علي الاثنين
    نبقا كفاية متعادلين
    حتي الظلم لما يصلنا متساوين
    ياهو العدل و التمكين

    • طارق أب أحمد كتب:

      عذرا الابيات التاليه لمحمد حسن و أكملها نبام فى التعقيب أعلاه

      مُرُورَ النـَسمَة فِي الإعصَار
      جَرَت مِنـَّا القـُلُوب حَزنانهَ مِن هَمَّا تقِـيل بالحِيل ؛
      زي طَعمَ المَرَارَة الكـَان وَ زي مَا كان وَ يَاهُو الكان وَ كانَ الكان!
      فمَا تـَحزن وَ مَا تـَقلقَ وَ مَا تـَشفـَقَ
      وَ سِيبَ الهَم وَ مَا تـَهتـَم
      وَ لَو هَدُّوكَ مِن ظـُلمَاً
      لَو حَرَمُوكَ مِن رزقـَاً
      أوْ رَفـَسُوكَ مَا تـَلعَن!
      لو شـَبَح الظـُلُم عَشـَّش
      لَو أعلَن مَعَاهُو العِز
      مَا تـَيأس وَ مَا تـَغتـَم!
      وَ دَوَّامَه بتـَشيلَ النـَاس تـَجيبَ النـَاس وَ تـَاخد النـَاس
      وَإنسَانـَاً بيتـبَسَّم!
      لأنـُّو بيدعُو مِن قـَلبُو
      رَاجِي الرَحمَة مِن رَبُّو
      عَارفَ الدُنيَا دِي المَقلَب
      نِهَاية حَقَّ
      بدَايَة حَقَّ
      وَ كـُلَّ الكان بيتجَسَّد بمَشهد حَقَّ عَلينا حَقَّ !
      مُرُورَ النـَسمَة فِي الإعصَار
      جَرَت مِنـَّا القـُلُوب حَزنانهَ مِن هَمَّا تقِـيل بالحِيل ؛
      زي طَعمَ المَرَارَة الكـَان وَ زي مَا كان وَ يَاهُو الكان وَ كانَ اللكان!

  24. ياسين شمباتى كتب:

    الحبيب طارق..حتى نيام(ارشفتو)!؟؟ لفتة بارعة وجميلة..وربنا يزيل كربو ويعود لينا بالاحلى والاحلى..

  25. انتا يا ود احمد – ياسين عرفناهو انتا المصحيك لحد اسا شنو ؟؟؟

  26. حاج أحمد السلاوى كتب:

    يا أيها الكواشف …إتحدوووووووووووا …
    واحد منكم يتبرع ويشرح معنى كلمة السافوتة لإبنتنا الزهراء ورصفائها من الشباب… تواصل أجيال …
    بس لا يفسرها كما فسر أحدهم الماء بالماء ..كما حدث ذات مرة من المرات ( والمرات كثيرة ) أيام عهد الرئيس الراحل جعفر نميرى ..كان الدكتور جعفر محمد على بخيت ( وزير الحكومة المحلية ) لديه العديد من الكلمات الغير معروفة لدى العامة من الناس .. وكان داخل قاعة المجلس الإشتراكى آنذاك ( يعادل المجلس الوطنى اليوم )يستعمل كلمة الشمولية ويرددها فى مناسبة وغير مناسبة ..وفى من الأيام وقف أحد أعضاء الإتحاد الإشتراكى قائلاً : نرجو من السيد الوزير أن يشرح لنا معنى كلمة الشمولية ..هنا وقف الدكتور جعفر محمد على بخيت وقال : الشمولية تعنى اللانمطية …. رد عليه النائب البرلمانى : شكراً سيدى الوزير …وجلس.(حتى لا يتهم بالجهل السياسى ) .
    أب احمد ..ما شاء الله عليك ..نرشحك مع دكتور عزت لإدارة دار الوثائق المركزية بالخرطوم ..ويديكم طولة العمر ..
    ولدنا يسن بن( الشباتى) ..ايوة إتفسح..فرصة..الحفرة بقت بعييييييييدة … لاكين لامتين؟ ..الحج وبيخلص ..وبعد داك كل قرد يطلع شدرته ..حقو تشوف ليك برج سغيرووووووونى ترجع بيهو ..للفوارة .

    – كسرة ..هامة .. أخونا الفاتح جبرا .. أبو ناجى ..حارمنا من إطلالتك ليه ؟سطر وااااااحد يصبرنا أسبوع كامل ..
    وما تقطعوا الجوابات ..

  27. nono كتب:

    شباب ربنا يخارجكم من الفكفك والله باااااااااااالقتو ؟

    انا قلته هوووو ماااابحب التوسيق عشان كدة ما ظاهر في الصور؟؟

    لكين يا الزهراء يااختي ياقووووووووووقلو ليها شنو هو قال

    ساااااااااااااااااا…..؟؟؟

    لا لا لا…. الا نخش نحنا التلاته واااااااااااااسطة خير عشان يخلي موضوع السااااااا ؟؟

    بالمرة يا ظريفة موضوعنا داااااااااااااااااك ؟؟

    يمشي ! نضرب عصفورين بي حجر !!!

  28. حاج أحمد السلاوى كتب:

    ولدنا سترايكر ..
    دا أسمو قيام الليل ..

  29. محمدحسن كتب:

    و الله ما شاء الله على الأحباب
    سلامات أخونا الكبير أستاذنا نيام
    وَ باركَ الرحَمنُ في أهل القمردينة وَ رُوح الأخوة الجَميلة في الله وَ لله
    وَ مَشكـٌُور كتير عَلى المَوضوع البُشرى المُؤثقة
    المُفرح لنا وَ المُطمئن أخونا الكبير طارق 🙂

  30. ودالزبير كتب:

    حمد لله على السلامه يا صنجاتنا

    ( واللوم الشديد لطارق ابو أحمد (الكوردنيتر) علي عدم ا اخباري بالزيارة كنت مشيت معاكم للاخ نيام…!!!
    وتكدير شديد لافليقا ( ده شغل عسكرية بقي ! )

    إنتو الصيوان الفي الصور ده شنو ؟؟ أوع يكون نيام عزم معتمد مدني معاكم

    نيام نيام

    مشتاقون يأخي

    كرسيك فاضي

  31. زووووووول كتب:

    الاخ والعم نيام سلاام عليكم ورحمة الله وحمدا لله على السلامه
    الاخ التركى سلاااام
    كان ينبغى ان نكون مع الركب الميمون فى معيتكم بمدنى السنى وداخل الصيوان (الازرق ) وذلك حسب اتفاقنا مع الدينمو التركى لكن ظروف قاهره حرمتنا فقد توفى قريب احد جيراننا ورجعنا من المقبره فى ساعة متأخره فلكم وللتركى العتبى حتى ترضوا

  32. زووووووول : الزول الجميل فى طبعه دايما هاااادى … كلنا لها وانا لله وانا اليه راجعون …. وان شاء الله المرة الجاية تكون فى مشية خير وبركة

  33. ياسين شمباتى كتب:

    استرايكر..ايواااااا,,عامل فيها عارف,,امشى رد على السؤال بعدداك تعال اتفاصح..

    ابوى السلاوى..اها انجهونا !! والله اشتقت للفوارة وللراحة والنوم..بعدين ما تفسرها شديييييد كدة!!!

    زوووووووول..بركة بالطلة وعظم الله اجركم فى فقيدكم.

  34. الصادق ود البركة كتب:

    السلام عليكم أحبتي الكرام
    وحمداً لله على سلامتكم يا نيام أجر وعافية إن شاء الله
    أحبتي جزاكم الله خير على مافعلتموه
    دكتور ياسين في
    الحج فوائد وفوائد منها أصبحنا نقرأ تعليقاتكم دوماً
    شكراً لكم أخوتي

  35. ياسين شمباتى كتب:

    الحبيب الصادق..بارك الله فيك يا طيب,,عليك الله قول كدة للوالد السلاوى,,نبشنى نبيشة جد..اها السنة دى ما معانا ؟؟

  36. حاج أحمد السلاوى كتب:

    د. شمباتى …
    لا .. ما معاكم ..متابعة فقط .

  37. ودالفتيحاب كتب:

    جمعة مباركة لك الاخوة الكرام والاخوات الكريمات
    ألف حمدلله على سلامتكم عمنا نيام أن متعكم الله بالصحة والعافيه ولقاء الاحباب فى دياركم العامرة .
    ونخش على سؤال الزهراء والسؤال عن السافوته :
    السافوته على علمى البسيط انها حركه فى اللعب وهى أن يحضر واحد ريشه حمام ثم ينزع منها جزء من الريش حتى تصبح رفيعة وبكل هدوء يدخلها فى أذن جارو ويحرك هذه الريشه بسرعه مما يسبب رعشه خفيفة لاتحتمل .هذا والله أعلم .

  38. حاج أحمد السلاوى كتب:

    -اخونا الكاشف الصغير ..ودالفتيحاب ..
    تجيبها يمين ..تجيبها شمال ..السافوته ياها السافوته ..بس طلعتا مخضرم وواقع من السما سبعة مرات ( صعيدى … ؟ ).
    وما ضرورى تكون ريشة حمام أو دجاج ..ممكن تكون أى حاجة زى خيط ..ورقة صغيرة ملفوفة ..وتلقا زول ( ابو واو واحدة ..بس ) نايم او مسترخ على الآخر وتدخل له الخيط أو الورقة فى أضانه أو مناخيره ( بس أعمل حسابك وابعد بسرعة من جنبو ) فيحصل ليهو نوع من الدغدغة الخفيفة ( ما فى زول يسال دغدغة يعنى شنو ) فيقوم مخلوع ومنزعج من الحركشة الظريفة الحصلت ليهو دى .كنا بنعملها للزول العاوزين نصحيهو من النوم … لأنو مش حيقدر ينوم بعد كدا ..
    – أها يا الزهراء عرفتى السافوته يعنى شنو … بس إياك أن تجريبيها .
    – نونو .. الحمدو لله بقا عندنا ناس كُتاااااار موسقين ..يعنى بيقوموا بالتوسيق للأحداس البتحصل ..ونحنا نشكرهم على التوسيق دا ..طبعن التوسيق مهم جداً عشان الأجيال الجديدة ..وربنا يديم أخواننا الموسقين ويديهم الصحة والعافية عشان يوسقوا لينا دايماً الحاجات المهمة..ومنتظرين أخونا المرطب عزت عشان يدينا توسيق زيارته لأندونيسيا ..طبعن دا حيكون توسيق ما حصلش ابداً .
    سؤال سغيروووونى كدا .. فى زول فيكم ما بيحب التوسيق ؟ يبقا زنبو ( ذنبه ) على جنبو ولو إنو فى ناس ما عندهم ذنب خالص … على أى حال نصيحة أخوية .. أى زول عاوز يوسق حاجة يمشى لأبو عصمت أو اب احمد ..لاكين الما عاوز ( يوثق) يمشى ل سهيل أو عبدوش … إتفقنا ؟

  39. حاج أحمد السلاوى كتب:

    أخونا ..ودالخلا ..سيد القبيلة ..
    إنت آآآآآزول كنا قاعدين سوا ..ولاّ شنو ؟

  40. ابكرون كتب:

    جمعة مباركه للحلوين
    الساااافوته كل ما ذكر كضبا كاضب
    السافوته مادة كيمائية لونها ابيض به شويه عكره تشبه حلاوه قطن تستخرج من الثلاجات القديمة واظنها نتاج لفريون الثلاجات ….المهم عندما تدعك هذه المادة القطنيه مع البشره تسبب كاروشه وحكة شديده ….كنا ايام الجهله نضغها في رقبه احدنا وتعالوا شوفوا البحصل ليه…..والله اعلم

  41. ابكرون كتب:

    سوااااافيت ..
    —————-
    (سلام تام لأصحابنا الزمان،،)
    سااافوته
    ( ما ذهب اليه أخونا )
    سااااافوته
    ( فنقول )
    ساااافوته
    ( كما قال،فنقول )
    سااااافوته
    ( ويفض لينا الأشتباك ده؟؟ )
    سااااافوته اخيره يا راجل اي اشتباك وفكرتي عن الشئ مختومة بالله اعلم ….!

  42. حاج أحمد السلاوى كتب:

    عمنا الفكى أبكرونا .. ..سلام ..
    لعلك تقصد يا سديقى مواد العزل الحرارى للثلاجات والسخانات ومجارى الهواء …المادة الصوفية الزجاجية ..ودى فعلاً لو لامست أى جزء من جسدك حتكون فى حالة صعبة من الكاروشة والحرارة المنبعثة من جسمك ..وتسمى بلغة أولادجون الفصحى Fibre-glass insulation material .
    ويا عمنا أبكرون السافوته هى فعلاً ما ذهب إليه الكاشفان الصغيران ودالفتيحاب وود الخلا … ومن المعانى الأخرى لكلمة سافوته هى لامن زول يقعد يذكرك بموضوع بصورة متكررة ومزعجة لحد ما تزهج منو وتقول ليهو ..ياخ ما تعمل لينا سافوته فى أضاننا .

  43. طارق أب أحمد كتب:

    السلاوى الخلوى ابكرون

    السافوته هى إحساس مترف بالإنبثاقيه المتشنكله فى شمأمانات الزعاعيط
    و تعرف أصطلاحا بالبرى و مفردها برايى و مؤنثها برايه و تجدها فى سائر مذيعات التلفزيونات السودابي و برامج نجوم الغد كما تنتابك هذه الحاله حال أستماعك للصادق و عمك بتاع الجزم و الكدايس داك
    أضف إليها مآلات الكوره السودانيه و الأقتصاد السودابى ألخ

  44. طارق أب أحمد كتب:

    باشمهندس مشاكلز

    مبروك الطله القويه دى

    بس عايز أعطف على موضوع التسالى دا

    ياخى الناس البتحب التسالى مالا ما بتعنل حساب لى الناس التانيه

    صوت طرقعة التسالى مستفز و مهيج للأعصاب

    ريحة التسالى …… بالذات فى المكاتب المكيفه

    و الأصعب الوساخه من يد ((المتعاطى)) إلى المكتب أو السياره أوالفصل و المدرج

    مالو الناس البتحب التسالى لو الواحد ختا الكرسى فى ضل العصريه قدام بيتو و جاب الشاى والضمنه و التسالى

  45. ياسين شمباتى كتب:

    اب احمد..ابصم معاك بالعشرين!!!

  46. طارق أب أحمد كتب:

    شمباتى

    على الزعاعيط ولا التسالى

  47. الشباب (شيبا وشباب) سلام
    شاعرنا الجميل نيام
    ربنا يديك الصحة والعافية
    نحن في انتظار روائعك يا جميل
    معاكسة بس
    الأخ أو العم أو الجد حاج احمد السلاوي
    ياخي أخونا ابكرونا (لاحظ اخونا دي) انت بتقول عمنا ابكرونا !! ممكن تفسر

  48. حاج أحمد السلاوى كتب:

    أخونا ود اللباشا ..
    دا موضوع شرحه يطول ..لاكين بجيك راجع وأفسر ..وإنت ما تقصِّر.

  49. سهيل كتب:

    جدو سلاوي : لكن البت نونو دي ماااااا جننتها عديل كدا في عملية التوسيق دي .. دي تاني كلمه فيها حرف (الثين) ما بتجيبها .. يا عمو حرام عليك .. البنيه الثكريه العثوله ما بتثتحمل جنث ثواتك دي ..

  50. طارق أب أحمد كتب:

    لحين عودة أفليقا من رحلة العمل فى الجنوب هاكم بعض مما كتب عن المبدع نيام

    aflaiga

    نيام سنكل :
    بباب الفرعون الامازونى ، وقف نيام واصطحب اخاه سنكل ليفقه فرعون قوله ، فالقى سحرة الفرعون عصيهم فاذا هى حيات تسعى متخمة بدم الشعب فارتجف نيام وجاء صوت الشعب مطمئنا بان الق شعر وعيك تلقف عصيهم المتخمه بدمنا فالقى نيام عصاه شعرا فانسابت الكلمات تلقف كل غث وزبد ، وارتجف الفرعون الامازونى ، لا لقوة فى جسد نيام او لاستنصاره باخيه سنكل بل لان من يخرج هذا القول لهو عالم بان الشعب يوما اذا ارد الحياه فلا بد لليل ان ينجلى ولا بد لعصى السحرة ان يتلقفها وعى شعبنا الصامد … من يومها اصدر الفرعون امرا بتفتيش العقول ومصادرة الوعى ولكن هيهات فلم يصل الطب حتى اليوم الى رنين مغنطيسى او اشعة مقطعيه تقوم بتقييم الوعى الوطنى … ومن يومها صار الفرعون كلما ذكرت الثقافه يتحسس مسدسه … اى اخى نيام كلما تحسس الفرعون مسدسه تحسس وعيك وثقافتك وخلى الدماغ صاحى …

  51. بشار أحمد بشار (إبن برد ) كتب:

    حبيبنا نيام : حمْدِن لالك بالسلامي .

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s