عضونا الغالي … ممنوع أكل التسالي‏

Posted: الأربعاء,11 نوفمبر, 2009 by mashakel in إجتماعية

جميلة … بيضاء فاقع لونها … لابسه ضيق أو الضيق لابسها … ركبت مواصلات
قعدت جنب شاب .. جهجهت باكاتو .. افتكرها من البنات إياهم .. اتحركت المواصلات
كل تفكيرو في الوقت دا كيف يقدر يحنكها و يدخل عليها من ياتو باب

الحافلة كلها سمعت صوت ( كف ) يخلي الراس يلف .. طااااخ
نزل من الحافلة و هو بيتكلم معاها بي صوت عااالي .. تاني ما تحاولي تعملي كدا .. قليلة أدب
شكلها في نص الحافلة بقى زي شوال الفحم الفاضي .. يا ريت لو أرضية الحافلة انفتحت و بلعتني

هنا كان في وااااحد بس متكل في كنبة شكرا شايف المشهد كلو .. ابتسم إبتسامة خبيثة و قال في نفسو : يا شفت يا مفتح
***********************************************************************************
البت بتتكلم مع صاحباتها زمن الدفارات ( أكرم الله سمعكم ) و كان الناس البشمعوا فيها أكتر من القاعدين و بتحصل حاجات عجيبة جدا فيها
قالت ليهم بصوت واضح : تعالو الدفار دا .. في شباب عبيط بيقوموا لينا تعالو تعالو
مع إنو كان ممكن يركبوا ( الدفار ) البعيدو
و الشباب سمعوا كلامها

قال ليك البنات جاتهم ( دوالي ) من الوقفة

***********************************************************************************

راكبين حافلة من المحطة الوسطى بحري للسوق الشعبي الخرطوم
كان اليوم جمعة و ساعة عصرية كدا .. و نادي ( الزوارق ) قصاد العمارة الكويتية شغال
و النيل ما شاء الله مليان على الآخر بالزوارق و الألعاب المائية
حاج كبير في السن شكلو من المعاشيين الشيوعيين القداام بتكلم مع الشاب الجنبو و واضح انهم ما بعرفوا بعض .. إستفزاهو المشهد
رفاهية .. أي و الله رفاهية
ناس بتعلب بالزوراق و نحن ناس المعاشات كل شهر بلعبوا بي أعصابنا
الشاب الجنبو شال سماعة الموبايل من أضانو عاين ليه و قال ليه
أسي تلقاهم كل خميس في الدي جي
الحاج جاهو شلل ارتعاشي و مصران عصبي و قال

تفاهة .. أي و الله تفاهة

***********************************************************************************

معظمهم قاعدين في كنبة ( شكرا ) و ما شاء الله عليهم ناعميييين .. مندييين .. مرطبيييين .. من أثر الكنداشة طويلة المدى
اللي موافق على القانون يرفع إيدوا
كلهم رفعوا أياديهم
موافقييين
حبة كدا تسمع صوت شخير .. و تاني تسمع صوت بقول : و الله العظيم ولا جايبة راس مالها .. شغالين تجارة الجماعة
ما فضل الا يجيبو كشتينة و يلعبوا حريق أو ويست

و المفروض رئيس المجلس يعلق ليه يافطة كبيرة مكتوب عليها
عضونا الغالي .. ممنوع أكل التسالي

أهو كلو مواصلات
واحدة توديك السوق الشعبي .. و واحدة تجيبك وزير

 

slamz

Advertisements
تعليقات
  1. سماسم كتب:

    مشاكل سلامز

    ما شاء الله عليك يا مشاكل حافظ حاجات كتييييييرة حاصلة في المواصلات باين عليك كنت معاني منها بشدة

  2. مُخير كتب:

    العزيز مشاكل سلام
    الجمهور سلامات
    إبداع يا ولد ما بعدو إبداع ….
    الفاضلة سماسم: كدي فهمينا يعني هسة الجنى رفع رجلو في حديدة وبيحكي ذكريات أيام الشقا وعدم اللقا، ولا الحاصل شنو ؟ طبعن نحن برة!! وما عارفين مرطب جوة غير د. عزت، وممكن ود الزبير بعدما فارق الثغر وإتفرغ لردم الثغور، حتى وجه الحبيب سهيل ما ورانا البوكس حق الشركة ولا الحكومة ولا منو ؟؟

  3. سماسم كتب:

    سلام مخير
    لا .. بس يمكن يكون بقي موظف كبير بركب التاكسي …. يعني وداعاً للزحمات

  4. nono كتب:

    مشاكل

    سلامز

    سلامز

    البنيه مبرووووووووووكه؟

    عقبااااااااااااال الولد!!!

    نجيك بي روااااقه………

  5. حنين كتب:

    مشاكل.
    سلامات.
    إنت اليومين دى بتفطر وين

  6. زووووووول كتب:

    مشاكل سلااااام وتعظيم سلاااااامز سلامممممز
    اولا مبروك البكارى وزى ما بقولوا اهلنا فى غرب السودان البكر دائما ما يكون ذكيا وزكيا عكس اهلنا فى الشمال الذين يرون البكر زووول عوقه ساكت .
    المهم موضوعك فى تنك التنك وبصراحه قصة الجماعه القاعدين فى كنبة شكرا دى جميله جدا نسأل الله ان نجد موطئ قدم فى الكنبه اياها وعليك امان الله اخر يا نعم واخر يا يس واخر يا اجماع سكوتى وطلاق لا ننوم ولا نشخر وجايييييك تانى يا مبدع

  7. ودالزبير كتب:

    زوووووووووول

    عوقه يعني شنو ؟؟؟

    مشاكل سلامز

    قلت لي المواصلات كان بيحصل فيها شنو يازول جيب أضانك أحكي ليك عن الكان بيحصل في القطارات لمن السفر كان بالقطارات

    وش وش وش وش وش وش

    هاهاهاهاهاهاها

  8. التركى كتب:

    الأخ مشاكل رائع رائع رئع ….. ماتتخيل الحالات البعيشها الزول وهو بقرا كلامك دا (ماتعرف تضحك ولا تبكى ولا تستنكر) وكملت الحكى بكراكتير البص يازول الف مبروك عليك الباسويرد والف مرحب بك قاصا ومتتبعا دقيقا .. بس جماعتنا ديل لو منعوهم أكل التسالى بجيبو معاهم ترمس … لك الود ولنا عودة

  9. مشاكل كتب:

    سلامز

    مشكورين جدا يا جماعة على التعليقات .. و الشكر الجزيل لي استرايكر مرقنا من القوقعة .. و نوتز الفيسبوك

  10. زووووووول كتب:

    ود الزبير سلااام
    عوقه فى معاجم اللغه تعنى :
    حاجه اى كلام وقيل تعنى دلاهه وقال بعضهم معناتا زوول طنوقه وقيل هو الهبنقه وقيل هو المهوس وقيل غير ذلك المهم ان مقالة صديقنا مشاكل تبعد عن هذه المعانى بعد المشرقين وللامام مارش زى ما قال ود الخلا .
    كسره :
    كنت فى طريقى الى احدى ضواحى امدرمان وكان الجو خريفيا رائعا . جلست على المقد البراهو خلف الكمسارى وعن شمالى كرسى النص وعن شماله مقعدين متجاورين (كلامى دا زى الزول ال بأشر على اضانو اليمين بأيدو الشمال ) المهم اخوكم سارح كدا وفجأة نظرت عن يمينى فرأيت عجبا ………………. المهم وما اكتر ليكم البنت نزلت فى محطتها وعندما اكتشفت معرفتى لما حصل افادتنى عن طريق لغة الوجه انى زووول طيره ومبارى السيره وكانى بها تقول جميلتك واعلى مافى خيلك اركبو وبصراحه لا زلت مزهولا .
    كسره : وقع ليكم ؟؟
    كسره : حليل زمن الحياء

  11. مشاكل كتب:

    سلامز مربع

    يا مخير نحن زي ما نحن .. بنعافر في المواصلات مرة مرة حسب العرض و الطلب

    سماسم .. لو قلت ليك كنت بعاني من المواصلات ناس شمباتي ديل ح يفهموني صاح ؟؟

    حنين .. بفطر وين ؟؟؟ ما بعيد منك

    و الله يا الزول انت فاهمني صاح .. احتمال نلقى لينا موطئ سنتميتر في القعدة و تمشي معانا باسطة و الدنيا لينا باسطة

  12. زووووووول كتب:

    ود الخلا سلام
    اولا بالتبادى يا ود الخلا ممكن تتصل بصديق ود الزبير ممكن مشاكل زاتا ممكن .
    لكن بصراحه حاجه كدا اسكت خليها وكما قال صلى الله عليه وسلم (الحياء لا يأت الا بخير ) وكما قال الشاعر :
    اذا لم تخش عاقبة الليالى ولم تستح فاصنع ما تشاء
    واصلا دا اخر زمن يا سديقى والقادم احلى فكونوا معنا ونواصل بدون فواصل

  13. زووووووول كتب:

    كسره : اليله الزووول ضارباهو الهبوب عديل كدا وفايق ورايق

  14. nono كتب:

    ياييييييييييييييييي !!!!

    ياعموووو شنووو المسطلحات دة

    (الفونقا)

    هناااااااااااك عم الفكفك قااااال

    (السافوته)

    براحة علينا !!!

  15. زووووووول كتب:

    نونو سلاام
    والله الفونقا دى اخير منها السافوووووووووته ودى مفهومه على الاقل لكن الفونقا دى عصيده وملاحا فى بريطانيا يعنى ال داير يفهم يتصل عالمى وخليك سودانى .
    كسره : يا ود الخلا والنونو بتعرفوا الفنقوقا ؟؟

  16. nono كتب:

    الفن!!!

    قووووووووووقااااااااااا !!!

  17. مستر راعى كتب:

    سلام يا اهل البيت
    مشاكل حكيت مشاكل تب حاصلة –بس عارف زمان لمن جات ثورة الدمار الوطنى ماكان فى مواصلات اها اخر زول بنزل من الحافلة بجوا كابسين عليه الواقفين فى الواطة وبترفع فوق وهم يخشوا من تحته غايتو ايام لها ايقاع
    وكمان الركوب من شباك الحافلة وتجرى بورا الحافله تشمع فى الباب ولمن تركب تلقى واحدة خاته شنطتها جنس مصايب
    صحى زمن كنا شعب هالك لا محالة لكن انقذونا بفضل الله ومنتظرين بصات عمنا الضحاك وماشفنا شئ
    يا جماعة افليقا وين مختفى يا ولدنا كتابتك حلوة ما تنقطع وكلكم كمان ماشاء الله كتابين ——-هههههه ماتفهمونا غلط كتاب الكاف مضمومه بابره وخيط

  18. ياسين شمباتى كتب:

    الصديق الحبيب مشاكل..سلام ومحبة وين ما رحت..مبارك الطلة وياريت ما تنقطع..وما بصدقكم…..خليها كدة بس..وما تنقطع من الفيسبوك كمان..

    مخير..الولد دا مرتااااااح,,بس اصبروا ليهو شوية كدة..

    زووووووول..تفسير ولو فى الايميل…

  19. الصادق ود البركة كتب:

    السلام عليكم جميعاً
    مبروك يامشاكل الماقاعد يعمل مشاكل الباس وورد
    العقبال للباقين

  20. مستر راعى كتب:

    كيفك ود الخلا
    اداوى شنو والله موجوع عليهم جنس وجع الجماعة ديل لو بيدى اوديهم النار بدون حساب
    وحاليا عندى حق دستورى فى الانتخابات لكن محايد لانه مافى زول بستحق التصويت لكن متاكد بلقى اسمى صوت براهو كم مرة عاد الحاوى حقهم ماختير
    ياود الخلا مافى شئ عاجبنى لا هسع لا زمان اخير زمان هسع البركه بقت مافيشه ربنا مامبارك لينا وحكامنا من عاميلهم التقول مكشحنهم بتراب وده دليل على شنو على الظلم
    عليك الله هسع غنماياتى وبهايمى ديل لو اتعثروا الرئيس مسئول هههههههه يموتوا عطش فى بلد النيل ساكن جنب النيل ومالاقى قطرة مويه
    للحديث بقيه ———————————————–

  21. البشاوى كتب:

    العزيز مشاكل
    الله يديك العافية — حكيت المابيتحكى – عالم المواصلات دة عالم تانى خالص واللى مامتعود عليهو – بيتعب شديد خالص لما يركب مواصلات بعد غيبة —
    كنبة وشكرا دى ذاتا بيت القصيد فى كل البوست دة — اسألو منها خالد مدنى دى كيف ؟؟؟؟

  22. طارق أب أحمد كتب:

    باشمهندس مشاكلز

    مبروك الطله القويه دى

    بس عايز أعطف على موضوع التسالى دا

    ياخى الناس البتحب التسالى مالا ما بتعنل حساب لى الناس التانيه

    صوت طرقعة التسالى مستفز و مهيج للأعصاب

    ريحة التسالى …… بالذات فى المكاتب المكيفه

    و الأصعب الوساخه من يد ((المتعاطى)) إلى المكتب أو السياره أوالفصل و المدرج

    مالو الناس البتحب التسالى لو الواحد ختا الكرسى فى ضل العصريه قدام بيتو و جاب الشاى والضمنه و التسالى

  23. طارق أب أحمد كتب:

    ودعنى أحدثك عن المواصلات أيام زمان أيم بص الشركه و ابورجيله مؤخرا
    الباص يسع50 راكب جلوس و العدد محدد كتابة على جانب الباص 50 جلوس 10 وقوف و أيام الصيف يمنع منعا باتا وقوف الركاب تحسبا من السحائى

    الباص له محطات محدده يصلها فى مواعيد محدده تضبط عليها ساعتك من الفجريه و حتى بعد إنتهاء الدور التانى فى سينما غرب و البى إن أو كولوزيوم السينمات التى نذهب إليها أيام الخميس و معانا الأبونيه و هو Prepaid Transport Cardيجدد كل شهر بعد دفع 45 قرشا فى مكنب المواصلات جوار ميدان الأمم المتحده المكتبه الخضاء حاليا و لا هى مكتبه و لا هى خضراء
    و بالرغم من أن المشوار كان بى قرش أو فرشين يمكن للطالب أن يملح بعد أن يقول للكمسارى (نازل المحطه الجايه)

    و الكمسارى أو المفتش يرتدون اليونى فورم الكاكى النظيف و يستملون الصفاره بتاعت الكوره لحركة الباص
    أبواب الباص تقفل توماتيكى قبل التحرك

    و البصات بلو بيرد أمريكى فيات أيطالى مرسيدس برازيلى

  24. حاج أحمد السلاوى كتب:

    أب احمد ..
    إنت أتاريكا عجوز كدا ..,ونحنا مانا عارفين ؟

  25. طارق أب أحمد كتب:

    ود الخلا

    (( وبارك الله في ذريتهم ))
    الأستاذ الجليل محمد سعيد معروف والد زوجة البشاوى و أبنه قنصل أوكرانيا

  26. محمدحسن كتب:

    سَلامات مشاكل 😉
    [زمن الدفارات ( أكرم الله سمعكم ) ]
    🙂
    ؛
    وَ حــِلـيل الزمَن الفـَات بسُرعة عَلينا
    بَعدَها طـُوَّالي ( السِيَاحي ) وَ تذاكرُوا
    وَ فجأة إذ ( بفيضـَان ) الحَافِلات وَ الهَيسَاتِ وَ الأمجَاد
    وَ ( رجَالات الحَركة ) وَ كشاتهـُمُ وَ .. ناسَ الركشات !

    لكِن ( تسالي المَجلس ) بينضــُوقوا يَوما 🙂 ؟!
    ؛ .. لكَ التحَايا مَشاكل

  27. gordan music hall
    يا ابوالحجاج عديل كده
    طيب المزك دا مصلح من جيلنا اتحفنا يا ابو الحجاج

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s