مبروك فنجان قهوه لكن مابالغتي معاي

Posted: الخميس,3 ديسمبر, 2009 by ودالزبير in اخرى

بدايه نسوق التهنئه لزميلتنا وأختنا فنجان قهوه بمناسبه زواجها الميمون الذي جرت مراسيمه بالأمس على أخونا الوجيه ( محمد ) أو كما نعرفه نحن في عالم النت الإفتراضي بإسم الحارث وإنشاء الله بيت مال وعيال ..
أها نجي بعد ده لموضوع المبالغه والعمليه الفي النمليه العملتها فنجان وقبل ده لابد ندي العضو الجديد أو من لا يعرف فنجان فكره عنها فهي وأحده من الأقلام النيره والواعيه التي زاملتنا ردحاً من الزمن في بيت أبونا جبرا الأول ( الدانقا ) الصفراء الجميله جيث شكلت فنجان مع صديقتيها معجبه **** وساره ثلاثي رهيب وكانوا من أقلامنا النسائيه المميزه وكأي نشاط في هذا العالم الإفتراضي تفرقت بنا السبل إلا إن علاقتهم ببعضنا هنا لم تنقطع المهم بح صوت أخوانا أفليقا وهو ينادي في الأسواق أين أنتم يا حرائر المدونه وكان رجع الصدى يرتد إلينا خائباً ودارت دوره الأيام وفتر صوت النداء وبالأمس وأنا برفقه أصدقاء من منتدى آخر نشارك أخوانا الحارث فرحته بزواجه الميمونه على عضو برضو من نفس المنتدى وهي الأخت ( سنيوريتا ) تفأجات بأخوانا الفكي أبكرون وهو يسالمني في نص الدائره فقلت ربما كان صديقاً أو قريباً لآحدى الأسرتين فباغتني قائلاً والله فيك الخير بالله جاي تبارك لفنجان طبعاً أخوكم معروف ما بيجمع سريع فزهلت وأرسلت إشارات للذاكره لإستعاده الإسم من جو الجوه وبعد أن وصلت المعلومه في حوالي تلاتين ثانيه قلت في بلاهه لأبكرون وفنجان علاقتها شنو بالعرس ده فرد ضاحكاً علاقتها شنو كيف ؟؟ ما فنجان قهوه هي العروس !! طبعاً زي ماقلت ليكم قبيل أخوكم إستيعابه ضعيف شويه المره دي إحتجت لدقيقيتن ونص عشان أربط بين فنجان قهوه زميلتي السابقه وسنيوريتا زميلتي الجديده الطلعوا في نهايه المسلسل المكسيكي نفس الشخص …..

رجعت لتربيزتي وأنا أردد والله صحي الإنترنت ده عالم صغير … كانت تجلس بتربيزتنا بت خاله العروس وهي زميله لنا بنفس المنتدى الأخت ميمي فتجاذبت معها أطراف وقلت ليها تصدقي سنيوريتا دي أنا بعرفها قبل حوالي أربعه سنوات من قبل ما أكمل قالت لي من منتدى الفاتح جبرا …..

سهيل وشمباتي ومن لف لفهم غايتو ما عارف أقول ليكم شنو لكن إحتياطي كده وعلى رأى الصديق أفليقا في كتابه الشهير الجري والطيران ما بيتلموا للنعامه ( أجري جري الوحوش غير رزقك ما بتحوش )

Advertisements
تعليقات
  1. مشاكل كتب:

    سلامز
    نبارك للاخت فنجان قهوة الزواج السعيد في العيد السعيد
    و ربنا يجعلو بيت مال و عيال

    و عقابلكم يا سهيل و شمباتي
    السنة دي ولا الجاية

  2. الف مبروك للاخت فنجان وبيت مال وعيال انشاء الله.

    —————–

    ياودالزبير لكن جد الدنيا ( النت ) ضيقة – لكن والله مبالغة شديد .

  3. حاج أحمد السلاوى كتب:

    وفى هذه الأيام الطيبة المباركة نبارك للأخت فنجان قهوة والأخ العريس البيت الجديد وإن شاء الله يغلبك بالمال وتغليبيه بالعيال …وعقبال المنتظرين وواقفين فى الصف ..وإن شاء الله الما ضاقو يضوقوا …وربنا يسعد الجميع ..

  4. عائشة كتب:

    مبوك فنجان ربنا يسعدك……………….
    جدو السلاوى((وعقبال المنتظرين وواقفين فى الصف……..)) ديل ناس منو؟ ايو عرفت الفى الحفره واخوانو ههههههههههههههههه

  5. ياسين شمباتى كتب:

    ود الزبير..سلام..عبرك نزجى التهانى للعزيزة فنجان قهوة والحارث وربنا يسعدهم ويجمع بينهم على خير ويرزقهم الذرية الصالحة..

    لكن معقول فنجان هى سنيوريتا !!؟؟ الفى سودانيات وسودانى ون؟؟ بالغت جنس بوليغ لكن!!!!

    غايتو انا عامل حسابى يا ودالزبير,,لكن سهيل دا شوفوا ليهو طريقة!!!

    مشاكل..وانت مالك,,صغير ولا صغير!!؟

  6. ودالزبير كتب:

    شمباتي

    عامل حسابك كيف يعني ؟؟ صائم مثلاً

    مشاكل ما عديناهم مع الجقور لأنو لسه صغير يمكن بعد سنتين لو ربنا أدانا عمره بتبدأ ننق فيهو …

    حاج السلاوي

    ذكرتني دعايه رانجو جربتو وأنا ضقتو ولا كيف يا مشاكلز

    محمد
    تصدق أبكرون أمبارح الليل كله يفتش فيك قال لي إسترايكر معقول ما يجي بالمناسبه دي إنت وين إسترايكر ولا راح مع اللوز

  7. ياسين شمباتى كتب:

    ود الزبير..غايتو بس عامل حسابى!!! لكن والله كلام حاج السلاوى دا فات رانجو بهناك!! انا قلت النمررها ليهو عشان الدنيا عيد وكدة…

  8. والله يا ودالزبير – ونحن على طلوع من البيت ومعى المدام – وزى مابقول ولدنا الزووول – اذا افاجا بناس بيبيتو وهم يدخلون – ومامرقو الا الليلة الصباح. فلهم التحية من اركويت والى جرا.

    ——————————————
    استرايكر انتهى خلاص وبدينا نيولووك جديد مع نهايات 2009 – رايك شنو عليك الله.

  9. ياسين شمباتى كتب:

    جبرة الكبرى لو سمحت..والا بنقلع ليك لوزك من جديد..مشتاقين وكدة يا ولدنا,,مالك رافع القزاز ومغلى السعر؟؟ ولا هرشوك؟؟

  10. يا ولدنا انتا ماعارف البير وغتاها – والا اقول ليك خش بهناك عشان نحكى – مافى داعى للنشر هنا.

  11. ودالزبير كتب:

    إسترايكر إتقلت يا رجاله والله يا محمد غايتو أخوك راح يواصل في قصه إسترايكر غايتو كان سنه كان سنتين لأنو محمد إبراهيم ما عندي معاهم علاقه

  12. ياسين شمباتى كتب:

    استرايكر..طالعنى بهناك..

  13. ابكرون كتب:

    سلاااام
    الاخ ود الزبير وقدامي حوش العمده والجدد
    فعلا علاقات المدونة عميقة وعظيمه ودائمة الابنة فنجان او نهاد كانت وما زالت صديقة قديمة لم تنقطع صلاتنا عبر النت طيلة الاعوام السابقة فالف مبروك لها ولشريك حياتها وبيت مال وعيال وعقبال بقية المدونات والمدونين في الحوش

  14. محنك كتب:

    مليون مبروك …. مع الاعتذار للتلب للاقتباس

  15. الصادق ود البركة كتب:

    السلام عليكم ورحمة الله وبركاته
    تحية طيبة للجميع
    الأخت فنجان قهوة
    بارك الله لكما وبارك عليكما وجمع الله بينكما على خير
    عقبال للشباب الباقين ومن عاوز يدبل من الكواشف
    ودمتم

  16. حاج أحمد السلاوى كتب:

    شكسبير ..ولدنا شمباتى ..
    المقولة دى ما من عندى ..وبيقولوها دايماً فى مناسبات الأفراح ( افراح الشعب ) ..وما تفهمونا غلط .. وشكراً ليك يا شمباتى مررتها عشان العيد ..
    – ولدنا سترايكر ( محمد ابراهيم باعتبار ما سيكون ) طيب كان تخلى السنة تخلس وتعملها مفاءجة ( مقصودة ) للأحبة ..كلامى صاح ..ولاّ فى محلو ؟ بس أنا خايف الجماعة مشاكل وإخوانه يحولوك بلشفى ويسموك محمد ابراهيم نقد ..
    -أخونا الكاشف الصغير ..ودالبركة ..يبدو لى إنك مبيت النية .. ربنا يستر ..

  17. مستر راعى كتب:

    ههههههه
    والله صحى مسلسل ومعقول ياود الزبير الصدفه دى صحى بالحيل الدنيا دى ضيقه جنس ضيق والله ضحكتنى لمن عشرقت ههههههههه
    حتى النت ضيق ده شنو عرفنا الدنيا ضيقه كمان النت والله جنس مبالغه
    الله يسعدهم ويحلى ايامهم وبيت مال وعيال
    بس ماعزمتونا ولا احنا جيران بعاد
    تب ماكنت بقصر الا كان وديت 10 خرفان تمام

  18. aflaiga كتب:

    الحبان الحلوين سلامات :
    عاطر التهانى لاختنا و زميلتنا فنجان على زواجها الميمون بارك الله لها فى بيتها وعمره بالبنين والبنات وصالح الاعمال ..
    عاطرالتهانى للعروسين وربنا يسعدم ويهنيهم يا رب ..
    لمن لا يعرف فنجان فهى كما قال ود الزبير احدى زميلاتنا الفضليات فى هذا المنبر ومن قبله فى منبر الفاتح جبرا وهى من الاقلام الواعيه المستنيره المهتمه بشئون المراه والحياه الاجتماعيه السودانيه توقفت عن الكتابه معنا لفتره طويله برغم نداءاتنا المتكرره لها ولاخواتها بالعوده ..
    انابة عن اسرة تحرير الموقع وجميع المدونين نتمنى للعروسين حياه زوجيه سعيده ومديده باذن الله ..
    عقبلا البقيه ( نونو – زهرا – غبشه – ساره – معجبه – مهيره ) ( مشاكل – سهيل – شمباتى – السعيد – عبدوش – ساتنتود – بروسيسر – انقولا ) ..
    بس ما نسمع بيهو من النت كمان نتمنى ان نكون حضورا لنشهد جديد وجميل كل الاحبه ..
    وانابة عن الاسره الصغيره ( سمسمه – حمودى – سروية – عبودى ) نتقدم بالتهانى لاختنا الفضلى الاصيله فنجان ولو ان اللوم حاصل على عدم الدعوه لكن ليس بين الاهل لوم – وتوقعى منا زياره اسريه بعد ان تستقرى فى بيتك بالسلامه وتعمريه بجميل خصالك وطيب معدنك ..

  19. سهيل كتب:

    الف مبروك و عقبال عندنا … ما برانا

  20. سهيل كتب:

    ود الزبير .. اوعك إنت تكون” ابو ضراع” بتاع منتدى السودان الجديد ؟ تعرف يافرده .. بالطريقه دي يوم واحد حيعرس اختو في النت دا.. الله يستر

  21. مستر راعى كتب:

    طيب يا جماعه مانقدم اوراقنا الموضوع سمح بالحيل
    مهرى جاهز خرفان ساى ابل وبقر وكله
    وعندى احسن موقع خرفان جنب المطار تانى مافى عوجه تب
    وكل ناس المدونه جميع خرافكم تانى على
    دمتم اعزاء للمدونه

  22. بت بحري كتب:

    التحية لكم/
    مبروك اختنا فنجان قهوه رغم انني من المشاركين في زواج الاخت فنجان
    انا فرحنا فرحتين المفروض اكتب ليكم من يوم 3/12..
    الاولي لزواج اختنا فنجان الاخري لمصادفه الغريبه التي اتقيت باحد الزملاء في زواج الاخت فنجان من مدونة الاب الروحي الفاتح جبرا المدونه الصفراء دار الحديث عن المدونه الانقطاع الطويل اخبرني عن وجود موقع جديد وجود منتدي ساخر سبيل………وجود جمعيه زاد المسير وفقكم الله لذلك قال لي …….ان كل من تبحثي عنه موجود في المنتدي وقد فشلت في التسجيل في منتدي ابونا الفاتح جبرا وعرجت الي المدونه وقد استمتعت بقراءه المواضيع النيره حقيقه سبب الانقطاع الدراسه خارج الامازون التحقت بوظيفة بعد التخرج….. التحية لابونا جبرا والاخوة …….عبدوووووش…. افليقا…. ود الزبير…. استريكر ….ودالخلا …. يس شمباتي ….الفكي ابكرونا …..عمنا حاج السلاوي الاخوات الغبشه ……معجبة ….. مهيره….. ساره ..سماسم …سمسمه….نونو… ..سهيله…. وكل من يسال عننا الواحد يوعدكم ماينقطع منكم….. ….
    نسية لقصر الاجازه كنت بتمني الالتقاء بكم جميعا دمتم جميعا…

  23. سماسم كتب:

    مبارك للأخت فنجان قهوة وبيت مال وعيال

    كما نرحب من جديد بالأخت بت بحري ونتمني المواصلة لأنو الحرائر بقوا يتعدوا في الأصابع

  24. الزهراء كتب:

    التحيه لجميع المدوناتيه

    واشواق دفاقه فايته الحد يا اهلنا

    والف مبروك زواج اختنا فنجان قهوه وربنا يسعدك ويرزقكم الذريه الصالحه ويبارك ليك في زوجك وبيتك ويجعلو زواج ميمون بأذن لله
    وعقبال كل الحرائر والاحرار

    شمباتي الدور عليك -انا حاكون وزيره العريس وكده من هسي مجهزه المسطرين للحنه
    أبقى مارق

  25. nono كتب:

    الزهراء حمدلله علي الثلامة

    مبروك فنجان …..
    الزهراء؟؟
    لو انتي احد الحرائر ؟؟؟

    عقبالك ؟؟؟

    ماتنسي المحااااااره معا المسطرين؟؟

    حنني ؟؟

    بحننك؟؟

  26. nono كتب:

    اختنا بت بحري…..

    سعدنا اكثر بي طلتك مره اخري انشالله كل احبابنا في المدونه الصفراء يعودو من جديد….

    العشره مابتهون الاعلي ؟؟؟!!!

  27. الزهراء كتب:

    نونو
    ليك وحشه يا غاليه
    قلت بدل اقول عقبال لي زباين الفكي ابكرون ازينا وادلعا واقول الحرائر

    عقبالك يا راقيه

  28. علي سنكل كتب:

    ألف مبارك لبنتنا فنجان قهوه ، بيت مال وعيال وعقبال باقي حرائر الدانقا. ونتمنى أن تعودي لنا ومعك شريك حياتك.

  29. لمى هلول كتب:

    اخوانى واخواتى رغما انى جديدة
    لكن الاخبار السمحة بتفرح الكل ….مبروك فنجان …وبيت مال وعيال
    تقبلوا تهانى القلبية الخالصة

  30. الزهراء كتب:

    اخت لمى هلول
    والله ما حاسينانك جديده
    ما شاء الله انتي دخلتي فينا تووووش وكاننا بنعرفك لينا سنين
    ربنا يديم الافراح بمدونتنا الغاليه
    وعقبال الباقين

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s