اعتقال (باقان وعرمان)..الاسباب والتداعيات…

Posted: الإثنين,7 ديسمبر, 2009 by ياسين شمباتى in سياسية

فوجئت صباح اليوم بخبر على قناة الجزيرة الاخبارية مفاده ان الامين العام للحركة الشعبية (باقان اموم) ونائبه (ياسر عرمان) قد تم اعتقالهما !! ولكنى لم اجد ما يفسر لى اسباب الاعتقال او الحجز التحفظى غير دعوتهما الشعب للخروج فى تظاهرات سلمية للاحتجاج على تجاوزات المؤتمر الوطنى كشريك اساسى فى الحكم للقوانين وعدم احترامه للحريات الشخصية ,,ومع انه من المعروف للجميع تطرف امين الحركة الشعبية وتصريحاته النارية تجاه الحكومة او الشريك الرسمى فى الحكم,لكن لكل شئ قواعد واسس ونظم وضوابط..شخصيا لا احب شخصية (باقان) واختلف معه اكثر من اتفاقى,لكن تبقى العهود والمواثيق واللوائح فوق كل شئ..ولن اغلو عليه كما يفعل ذلك الشيخ(العجيب) الصحفى(عبدالرحمن الزومة) الذى ما فتئ يجرح ويسئ له دون ان يرد الآخر عليه,لكنى اقول له اخطأت يا باقان بمناصبتك العداء لجهاز غاشم لا يرعى الا ولا ذمة..كما ان (ياسر عرمان) قد خبا نجمه فى الحركة ولكنه يعتبر من ابناء(جون قرنق) وله قواعد فى الشمال خاصة,ودوما اراءه واضحة حتى تجاه سياسات الحركة الشعبية,قد نختلف معه سياسيا لكنه يحمل هم الوطن بصورة او باخرى..

واقول للقائمين على الامر فى بلادى,,لا تشعلوها فتنة وانتم فى اثيام كربات نحسات وترجون من الشعب ما تأملون..ام انكم واثقون من المآلات ولا تحتاجونه فى شئ؟؟ كما وردنى عن طريق آخر نبأ اعتقال طالبين بمعهد الموسيقى امس مساءا كانا يوزعان اوراقا تدعو الناس للانضمام اليوم للمسيرة السلمية مع مجموعة(قرفنا) من اجل اسقاط المؤتمر الوطنى..وهذين الشابين تم تعذيبهما وضربهما زاهانتهما كعهد اجهزة الامن والقمع فى الدول والحكومات القميئة..

بالله عليكم كفاكم ظلما وتقتيلا واساءة للبلاد واهلها باسم الحق والدين..وفكوا دربنا حتى كلبنا اكل جرجير……

Advertisements
تعليقات
  1. حاج أحمد السلاوى كتب:

    ولدنا شمباتى ..يا متابع الأخبار..
    يعنى باقان دا وودعرمان عاوزين يوصلوا لشنو من المسيرة دى ؟ هم عارفين المؤتمر زى جوع بطنهم وقاعدين معاهو جوة الحكومة والبرلمان ؟؟دى حركات منهم سااكت ..ما لقوا ليهم حاجة يسووها قالوا يطلعوا مسيرة ..دا كووولو عبث من المؤتمر والحركة ومناكفات فى الفاضى ..
    عرفت إنهم مطالبين بإجازة بعض القوانين ..طيب ما يطالبوا من داخل برلمانهم ونوابهم المرطبين ديل قاعدين يسووا شنو ؟
    غايتو فى رأيى الشخصى دى هيصة حاصل فارغ وما تستبعد يكون متفق عليها بين الشريكين كنوع من الحراك السياسى زى ما بيقولوا أخواننا السياسييين ..لا مؤتمر نافع ولا حركة نافعة ..وزى ما إنت دايماً بتقول ..لك الله يا وطنى الجريح ..

  2. aflaiga كتب:

    شمباتى : صباح الخير .. مع انو ما صباح خير ولا شيئ الله يهون ..
    دعنا شمباتى نثبت بعض الحقائق :
    القوانين التى تطالب الحركه بتعديلها هى من اتفق على وضعها والنظير لها
    تغيير القوانين لا يتم عبر الشارع او التظاهر
    تغيير القوانين يتم عبر ممثليات الحركه والاحزاب بحكومة الوحده الوطنيه والمجلس الوطنى .
    الدعوه للتظاهر حق كفله القانون للجميع بعد اخذ الاذن من السلطات التى من واجبها تامين انسياب الحقوق بما لا يتعارض مع حقوق الاخرين
    من واجبات الشرطة والامن توفير الامن للتظاهرات وللمواطنين فى منطقة التظاهر غير المتظاهرين
    ما نستغربه من الدوله ليس بامر جديد فهى هى الدوله من 89 ولو تغيرت بعض النيو لوكات
    الوضع الان فى البلاد نظريا يسير نحو التحول الديمقراطى والانتخابات التى تحتاج لجو امنى مناسب خال من العقيدات والمظاهر غير المساعده على التعبئه الانتخابيه السلميه
    —-
    من كل ما سبق اقول اخى شمباتى كان من المفترض على الدوله ان تسمح لمن يريد التظاهر فى غير القضايا التى محلها غير الشارع بان يتظاهر كما يريد بعد التقنين وتامين التظاهره والجو الذى حولها .
    كان على الحركه والقوى السياسية ان تستنفذ كل السبل الاخرى قبل الخروج للشارع .
    —-
    وقبل وبعد كل هذا وذاك اين معادلة مصلحة المواطن قبل كل هذا ؟؟؟
    هل تمت استشارة المواطن بشان هذه القوانين قبل التعديل وبعد التعديل ؟؟؟
    ما مدى تضرر او انتفاع المواطن البسيط من التعديل او الابقاء ؟؟
    هل تمثل القوى المطالبه بالتظاهر حقيقة راى الشارع الذى تستصرخه فى الخروج ؟؟؟
    الا يمثل الدعاء للخروج فى الظروف الحاليه عبئا اضافيا على شعب صار يتضرر من اليوم العادى ناهيك عن العطله ؟؟؟
    دعنا نناقش الامر بمنظور الانسان السودانى البسيط وليذهب التجمع والمءتمر والحركه الى الجحيم …

  3. حاج أحمد السلاوى كتب:

    نسيت أسألك السؤال السغيروووونى داك …كلبكم دا ( كلب ..ولاّ كلبة ؟ ) بعد ما أكل الجرجير حصل ليهو شنو ؟ زاد نبيحو ولاّ هدأ واستكان …؟ حبيت بس أعرف أثر الجرجير على الحيوان ..يا دكتور ؟

  4. حاج أحمد السلاوى كتب:

    ولدنا أفليقا ثرو ولدنا شمباتى ..
    من أغرب الأشياء أن ينزل تعليقان فى وقت واحد ( 10:28 ) أحدهما للإبن الشفيف والآخر لشخصى الضعيف… ويتفقان فى كثير من النقاط ..غايتو يا أفليقا ..يا إنت قاعد معاى بيجاى ..ولاّ أنا قاعد معاك بيغادى ….حكاية عجيبة فعلاً..إنت رايك شنو يا شمباتى ؟

  5. aflaiga كتب:

    بالنسبه لاعتقال باقان وعرمان قبل كل شيء نحييى هذين المناضلين الذين اثبتا للشعب مدى ضعف بقية الساسه فخروجهم فى التظاهره ومواجهتهم للشرطة ( وان كان لدى ماخذ على ذلك ) فى حد ذاته دليل قوى على ان القوى الحديثه قادره على المصادمه والنزال على عكس القوى القديمه التى فشلت فى اخراج مظاهره سابقه ….
    السلاوى : انا قاعد معاك بى جاى وانت قاعد معاى بى هناك فالاخوه متى اتفقت قلوبهم ائتلفت الهم واحد يا عمنا ..
    نعود لمقال اخونا شمباتى :
    القمع اخى شمباتى سلوك من يخاف من الجماهير
    والقمع اخى شمباتى سلوك من يخاف من المجتمع الدولى والاعلام الخارجى
    والقمع اخى شمباتى سلوك من لا يثق فى ادارته للدوله بشكل طبيعى

    يلا شوف الانقاذ محلها وين من الكلام ده ؟؟
    حكومه رئيسها مطالب به دوليا !!
    حكومه تقبض على الامن والشارع بيد من حديد
    حكومه تاتيها يوميا الشهادات من المبعوثين بان الاوضاع تسير بشكل جيد نحو التحول الديمقراطى والانتخابات !!
    حكومه تتمدد يوميا فى الخارج لتخرج من عزلتها
    حكومه لميهزها ما يحدث فى دارفور او الجنوب
    هل تحتاج للقمع اداة لتاديب المعارضين ؟؟؟؟
    دعنا نكون منطقيين اخى شمباتى ولنقل الحقيقه :
    ما يحدث الان فى الخرطوم هو نتاج طبيعى لسنه اولى ديمقراطية
    وما يحدث الان فى الخرطوم هو سوء فهم متقدم للديمقراطية فالشرطة والامن عموما لم تصله التعليمات بعد بان يفكوها للاخر !!!
    والمعارضه والقوى السياسية تحاول استباق هذه المرحله عبر اشاعة جو من الديمقراطية القبلى .
    لا الشرطة والامن الان جاهزين لتقبل تمرين ساخن كتمرين اليوم
    ولا المعارضه مستعده لمنازلة الحكومه
    ——
    باختصار اخى شمباتى ما يحدث الان هو معركة فى غير معترك مقصود منها تحويل النزال من التسجيل والتعبئه الانتخابيه الى قضايا انصرافيه اخرى تذيد او تنتقص من رصيد كل فى التسجيل والتعبئه للانتخابات .
    يعنى زى نفرين بيتقاوو فى تربيزه ولمن لقو القصه طويله بدو يشتمو بعض والله انزل ليك يدك دى اكسرا ليك والتانى يقول والله اضغط يدك دى افرتق عضامك !!!!!!!!!!!!

    غدا تعود العرجا لمراحا ويعود باقان ليجلس مع النظام لدراسة تلافى اثار الامس ..

    اما سمعت شمباتى بان العروسه للعريس والجرى للمتاعيس ؟؟؟؟؟!!!!!!!!

  6. ياسين شمباتى كتب:

    الوالد السلاوى..سلام..اتكلموا جو ةالبرلمان مية مرة واتعزلوا الجلسات كم مرة وهتفوا فى الصحف باجازة بعض القوانين وشطب قوانين اخرى مقيدة للحريات التى يكفلها الدستور وبرضو ما فى زول سمع منهم..اها يعملوا شنو اكتر من كدة!!؟ لازم يتحركوا ويحركوا الشعب اللبد دا..لمكن تكون حركة على قولك لكن برضو يفترض ننتبه ونوعى للمؤتمر الوطنى وثعابينه…

    اما بخصوص الكلب فهو تعبان وهزلان ونشفان ومتكى على الحيطة عشان يقدر ينبح!! لكن كان لم فى واحد فيهم بجيب خبرو..

    وانتو وافليقا متلاحمين ومتفاهمين….

  7. ياسين شمباتى كتب:

    الحبيب افليقا..سلام..

    اتفق معك جملة وتفصيلا فى رائك..ولكنى اضيف ان الحركة وغيرها من الاحزاب الممثلة فى البرلمان قد بح صوتها وهى تنادى بتعدل هذه القوانين منذ اتفاقية نيفاشا او السلام..ثم لماذا يجب ان تنادى الكتل البرلمانية والنواب بهذا التعديل؟ أليس من المفترض ان يتم آليا بعد توقيع الاتفاقية وانفاذها !؟؟ ولكنها مماطلة الوطنى ورغبته فى اذلال الشعب وتكبيل حركته وشل فمه..

    اذا تجاوزنا الحركة ونوابها,,ما قولك فيما حدث لمنسوبى مجموعة (قرفنا)؟؟

    وشكلنا متفقين ضمنيا على احتمالية وفرضية حاج السلاوى بان يكون الموضوع كلو لعبة ووهمة فى شكل موزة عشان حاجات تتم فى الخفاء..وما غريبة على الطرفين,,لكن تبقى مثل هذه الاشياء وصمة عار ونقاط سوداء فى تأريخ السودان ومكانته الدولية..

    والله العروسة دى هى عرسها ذااااتو عشان السترة بس!! لكن موضوعها مقضى من زماااااان..

  8. ودالفتيحاب كتب:

    الليله ليلتنا
    الدينو أفليقا
    والعم السلاوى
    والدكتور شمباتي
    هذا الترتيب قصد منه السبق فى الكتابه وليس لقدر الرجال فكلكم فوق أكيد .
    المتابع للمشهد السودانى وقراءة الوضع فى الساحة العالمية والتوقيت يجد أن المسرحية هي هي مع تعدد الشخوص .
    أوكامبو يجعر فى محكمتة ويعض فى صوابعه على البشير ، ومجموعة غير معروفه في دارفور تهجم على قوات حفظ الماسلام ، وباقان وعرمان دايرين يجوطوها في الداخل ،ده كله لان الانتخابات قادمة وراس الصوط لحق الفاشلين لمواجهة الحقيقة لذلك لابد من أفشال هذا الهم عليهم .إذا فعلا باقان وعرمان بنادوا بفك الحريات واحترامها هل هى فقط فى الخرطوم دونكم الجنوب الذى لاينطق فيه أحد بكلمة ديمقراطية إلا أشبع ضربا وتنكيلا .وهل ينعم من هو مخالف للحركة بحرية وهو بينهم ؟ .
    ياناس فكونا من هؤلاء النفر النشاذ ليمضي السودان الي الامام بعون الله وكفانا تبجحا بغير ثمن المهر ….

  9. ابكرون كتب:

    باختصار يا شمباتي
    المؤتمر حزب شمولي وعمره ما عرف الديمقراطية ولا حيعرفها ويكفي كيف اتي للحكم …..قال ايه انتخابات والتذوير بدأ قبل ان تبدأ الانتخابات من الاحصاء مرورا بالتسجيل….ماذا كان يضير هؤلاء الشموليين ان تظاهر غيرهم وتنادوا للاحتجاج علي شي ما ….
    الا يخرجون هم لنصرة البشير او لشجب اوكامبوا هل كان المؤتمر ياخذ اذن من الشرطة لذلك ( انهم يخافون ويرتجفون من الآتي)
    بالله فكونا لا يستقيم ذيل الكلب الاعوج ابدا

  10. ياسين شمباتى كتب:

    ود الفتيحاب..سلام..

    والله كلامك ما كعب,,لكن انحنا ما ممكن نعاين للغلط ونسكت كمان,ولا يمكن نحتذى بالمخطئ,,يعنى اذا كانت الحركة غلطانة وجايطة الشغلة تقوم الحكومة تعمل زيها !!؟ ياخ اقل حاجة عندهم شفافية ولما زول حرامى فيهم ريحتو تفوح بقيلوهو وبحاسبوهو,,ودونك (ين ماثيو) وزير المالية الاسبق بحكومة الجنوب الذى تورط فى صفقة السيارات الشهيرة التى تمت فيها تبرئة ساحة (الكاردينال) لينال بعدها شهرة ووجاهة!! بعدين المسيرة دى طلعوا فيها كل الوان الطيف السياسى,يعنى ما الحركة بس..

    لكن على قولك كلنا فوق بفضل الحكومة المصرة على (رفع) مواطنيها الى اعلى دوما !!!

  11. ياسين شمباتى كتب:

    ابكرون..سلام..

    والله اصبت كبد الحقيقة..والشمولية ياهو دا حالها,,ياخى ديل بخافوا من اى تجمع,,ايام الجامعة لما كنا نجى فى بص واحد او بصين بوقفونا فى التفتيش ولما يعرفوا انو بص طلاب يقولوا لينا وين التصريح!!! قال ايه اى تجمع ممنوع..عليك الله ديل يقولوا عليهم شنو؟؟ وهم المغسهم اكتر انو كان فى اعداد كبيرة طلعت المسيرة دى وما كانوا متوقعين انو الشعب لسه فيهو بقايا شرار كشرار اكتوبر الاخضر وابريل المشهود,,وام ابريل منهم ببعيد..

    لك الله يا وطنى الجريح…..

  12. محمدحسن كتب:

    الأحباب سَلام وَ صَبَاحاتـُكُم خـَير
    ؛

    عَارف يا ياسين
    نـَاسنــَا ديل كــُلــَّهـُم
    لو خــَـتـــُّوا الرحمن فِي قــَلبَهــُم
    وَ قــَعَدُوا بَرَاهـُمُ
    بلا جُيوشــَاً لا حُرَّاسـَا لا أتبَاعـَا لا وُسطــَاء لا غـُرَبَاء
    مَعَ بَعضــَهـُمُ قــَعدة ( رَاجل )
    يَتــَفــَاهَمُوا بمَسئوليَّة وَ مِصدَاقـيَّة
    كان زمَان ( صَلــَّحُوا ) لينا اتــفاقــيَّة مَحبَّة وَ سَلام وَطنـيَّة
    خــَيرُهـَا يَعُمَّ البَلد كـُلــَّها
    ؛

    لِكِن قِصَص البُطـُولات وَ استعرَاض العَضـَلات
    كــُلُّ وَاحِد فِي مَلعَبـُو وَ بينَ جَمهـُورو وَ حُرَّاســُو
    وَ اللعِب عَلى الطـَاولات وَ تِحتـَهــَا
    وَ شــَدَّ الحَبل وَ التـَعلب فــَات وَ ( الكديسة وَ الفـَار )
    وَ الطرزانــَات دِي مَا بتـَنفـَع !
    وَ المُتــَضــَرِّر الوَحيد يَبقى ( الشـَعبُ ) !

  13. محمدحسن كتب:

    هِيَ البَلد دِي مَا حَقــَّت مِنــُو ؟!
    مَا السُودَان كبَــير وَ الخـــَير الفيهـُو ـ مَا شاء الله ـ كــَتير وَ كبير
    هَاكَ أرضــَك وَ طــَوَّالي أبدأ التــَنميَّة ،
    لِكِن النــَاس الفينــا فــَاهمَة وَ قــُلوبهــَا وَ نــُفوسهــَا صَافــيَّة
    هِيَ المُشكِلة !
    نــَاسنا الكــُبَار المُشكِلة

    وَ يَا بَلد

  14. ابكرون كتب:

    ابكي يا بلدي الحبيب :
    ————————-

    Cry, the beloved country, for the unborn child that is the inheritor of our fear. Let him not love the earth too deeply. Let him not laugh too gladly when the water runs through his fingers, nor stand too silent when the setting sun makes red the veld with fire. Let him not be too much moved when the birds of his land are singing, nor give too much of his heart to a mountain or a valley. For fear will rob him of all if he gives too much

  15. ابكرون كتب:

    بالله عليكم يا ناس الحوش مش نفس كلامنا :
    ———————————————————
    (واتفق المحللون الذين تحدثوا لـ«الشرق الأوسط» على أن نزول المعارضة للشارع يعني توصل الحلول السياسية إلى طريق مسدود، وربما قادت إلى العودة إلى المربع الأول (الحرب). وتساءل الدكتور الطيب زين العابدين الكاتب والمحلل السياسي قائلا إن «حزب المؤتمر الوطني دائما يخرج في مظاهرات حتى دون إذن من أحد، فلماذا يمنع الآخرين من الظاهر؟». وقال لـ«الشرق الأوسط» إن حزب المؤتمر الوطني «مرعوب» من أي تحرك جماهيري، لأنه ضعيف وليس له ثقة في نفسه. ومضى أن الحزب الحاكم ضعيف جدا أمام «أي تجمع سياسي ضده». وقال زين العابدين إنه لا يرى أي سبب لمنع المظاهرة «إلا إذا كان الحزب يريد أن يحكم كما كان قبل اتفاق السلام». واعتبر «تصرف حزب المؤتمر الوطني حيال القضايا العالقة ومنعها المسيرة أمس تصرفا أحمق يدخل يجر البلاد إلى الهاوية».

    واتهم المحلل زين العابدين حزب البشير بأنه لا يريد أن يقدم استحقاقات التحول الديمقراطي مثل تغيير القوانين. وحذر زين العابدين من أنه «إذا لم يتم الاتفاق حول القضايا الخلافية ولم تجر الانتخابات فهذا يعني عدم إجراء الاستفتاء، وكل ذلك يعني دخول البلاد في نطاق ضيق»، وقال إن حزب المؤتمر الوطني نظام شمولي يسعى إلى أن يستبدل بنفسه نظاما شموليا آخر، حسب تعبيره.

    )

  16. مُخير كتب:

    الحبان في كل مكان
    العزيز أبكرون
    أعدت بهذا النص الرائع إلى الذاكرة الخربة جزء حميم من ماضي جميل، ولا أدري إن كانوا في السودان ما يزالوا يدرسون النسخة المُبسطة “simplified edition” لهذه الرواية القيمة “أبكي يا وطني الحبيب”، والتي صدرت في عام 1948وشدت إنتباه العالم إلى مأساة التفرقة العنصرية في جنوب إفريقا وأعيدت طباعتها أكثر من 20 مرة في ست سنوات، وأعتقد أن فلسفة مؤلفها تلامس واقعنا الحالي بل وتعالج مشكلاته، فالسيد آلان باتون مؤلف الكتاب (1903-1988) مواطن وشاعر جنوب إفريقي أبيض ولد في إقليم الناتال وأحب السود وتفهم معاناتهم وتنبأ أن في يوما ما ستخرج إلى الوجود جنوب إفريقيا ملؤها السلام ويستطيع أي فرد فيها الإسهام بما لديه في تنميتها. وللأسف لم يعش ليرى نلسون مانديلا يصافح جلاديه ويضع نهاية لنظام الفصل العنصري.
    تقوم فلسفة باتون على المحبة ويلخصها في مقولته الشهيرة التي تنوه إلى أن السلطة المُطلقة تكمن في المحبة، لأن المرء عندما يُحب بصدق لا يبحث عن السلطة لأنه ببساطة يمتلكها:
    But the one thing that has power completely is love, because when a man loves, he seeks no power, and therefore he has power
    لقد عاشرت شباب من جنوب إفريقيا في سنوات الجامعة وكانوا على إختلاف توجهاتهم يحبون وطنهم ويححبون ويحترمون بعضهم البعض، لهذا توج نضالهم بالنصر،،، كانت تجمع أحزابهم مظلة واحدة تُسمى الحركة الوطنية الموحدة UNM ومن تلك الأحزاب حركات وجماعات إسلامية، (نعم إسلامية) أذكر منها حركة الشباب المُسلم (Muslim Youth Movement)، وجماعة القبلة (مدعومة من إيران) وحركة النداء الإسلامي التي ينتمي إليها إبراهيم رسول الذي كان أول مساعد لنبلسون بعد خروجه من المعتقل وأصبح وزيراً فيما بعد وآخرين، عموماً خُلاصة القول أن الأنموذج الجنوب إفريقي بصلح لمعالجة مشكلة الجنوب، فالإضطهاد والنظرة الإستعلائية التي عانى منها أكثر الجنوبيين جعلتهم يفقدوا الثقة في تغير سلوك كثير من الشماليين.
    من سيشاهد كأس العالم العام المقبل سيكتشف كم تطورت هذه الدولة…

  17. aflaiga كتب:

    شمباتى ثرو ابكرون :
    لا يختلف اثنان ان الهلع الذى اصاب النظام كبير من جراء خروج مواطنين عزل للشارع مطالبين بذيادة مساة الحريات ووقف الاجراءات التعسفيه تجاههم وتوفير مساحة اكبر من الحريات ورفع المعاناه عن كاهلهم – ذلك السلوك المتناقض تماما مع التقارير التى يرفعها محبى الظلام واعداء الحريات فى النظام تلك التقارير التى تدبج بليل عن ان الامور ميه ميه والشارع يبصم بالعشره ولاءا للانقاذ والمؤتمر الوطنى !! وان كل الدوائر الانتخابيه مقفوله ومبصوم عليها بالعشره انقاذ انقاذ !!!
    الشارع فى كل العالم هو مقياس للدوله وسياساتها فاذا قلنا جدلا بان كل من خرج بالامس هو من عضوية اليسار والقوى السياسية الاخرى والحركه الشعبيه فهذا يعنى ايضا فى اضعف معانيه ان لهذه القوى وزن وقواعد تستطيع قول لا والمواجهه .
    هذا ما يجب ان يدركه النظام تماما وما يجب ان يسعى لتقبله مادام قد اقر بالتحول السلمى الديمقراطى فليعلم ان التحول السلمى ليس مجرد شعارات ومصافحه ولقاءات مع القاده .
    التحول السلمى استحقاقات تدفع كاش دون تاجيل للجماهير قوامها الحريات ورفع المعاناه وتوفير سبل العيش الكريم للشعب وترك الفرصه للقوى السياسية الاخرى لتعبر عن رايها وتحشد جماهيرها لتنزيل رؤاها بينهم .
    والا فدون ذلك العوده للمربع الاول الشمولى حيث لا صوت يعلو فوق صوت الانقاذ ……..
    ملخص رؤيتى للقضية :
    هناك سوء فهم كبير لدى النظام عن الحريات ومرحلة الانتقال السلمى للسلطه يتمثل فى ان تعبر القوى السياسية عن رؤاها بادب جم وخجل شديد فى دورها وصحفها فقط دون احداث حراك فى الشارع ..
    الاجهزة الامنيه لم ترتق بعد الى مرحلة التعامل مع الحراك السياسى وما زالت تختزل التحرك فى الشارع بانه تهديد امن قومى يجب ردعه ردعا معنويا وماديا دون حساب الخسائر السياسية .
    لم يتم الاتفاق بين القوى السياسية على الترتيبات الامنيه لمرحلة الانتقال من الشمولية للديمقراطية مما جعل الاجهزة الامنيه فى حالة من الذهول فضلت فيها ان تعود لسيرتها القديمه بدلا عن الدخول فى اللوم مع قادة الاجهزة الامنيه الذين هم بالطبع قادة الحزب الحاكم .
    لم يحدث فك ارتباط بين الدوله والحزب بشكل ميدانى فى قضايا الجماهير .
    القوى السياسة استعجلت اجراءات التعامل الديمقراطى مع نظام لم يكمل بعد استحقاقات التحول الديمقراطى .
    —–
    مقارنة سياسية بين حقوق الوطنى فى الجنوب وحقوق الحركه فى الشمال :
    يستخدم الوطنى كل الته الاعلاميه فى ابراز الجنوب كمستعمرة شموليه لا تصلح ابدا للعمل السياسى الحر بينما سقط هو فى اول تجربة وامتحان ميدانى .
    يصر الوطنى على ان تتاح الحريه لقواعده للمارسة العمل السياسى فى الجنوب بحرية حاكمية مستمده من الحاكمية فى الشمال بينما لا يضع اعتبارا لتنفيذيى الجنوب فى الشمال .
    —-
    ملخص الرؤية :
    لا بد من تدخل طرف ثالث يحكم بين الوطنى والقوى السياسية كان من المفترض ان يكون هذا الطرف هو رئيس الجمهورية الذى من المفترض ان يكون قد نفذ فكا للارتباط بين الحكومه والحزب ليضمن حياديته الكامله كجهة تضمن انسياب العملية السياسية بحياد وامانه ونزاهه واقول انه لا زال هناك متسع من الوقت لتكون مؤسسة الرئاسة هى الحكم الفيصل فى هذه العملية بحيث تضرب الارض بعصاها فتنبجس منها اثنتنا عشر عينا ويعلم كل اناس مشربهم
    ولكن هيهااااااااااااااااات …
    وجاييكم تانى كان الله هون ..

  18. مُخير كتب:

    العزيز ود الخلا
    عادة ما يقول من يوصفوا بالمتمردين
    We Don’t Need No Peace Equal Rights & Justice
    (نُحن لا نُريد اللا سلم فقط مساواة في الحقوق وعدالة)
    عندما فشلت القوة في إحتواء ما كان يوصف بالتمرد تم الجلوس وتوقيع اتفاقية نيفاشا مع الحركة الشعبية، وإذا وجدت الحركة نفسها كشريك محترم يُحسب له حساب لما خرجت إلى الشارع، ولا أعتقد أنها فعلت ذلك لإثارة الفوضى والإطاحة بالنظام، بل لفت نظر الوطني إلى ضرورة تغيير ما تبقى من قوانينن النظام الشمولي، وبلسان متحدث من الحزب الحاكم، لقد تم تغيير أكثر من 30 قانوناً (ربما 33) ولم يتبقى سوى ثلاثة من مجموع 36، لكن المحك في هذه الثلاثة وأهمها قانون الأمن العام، يقول المثل الإنجليزي لا تستطيع إعطاء قطعة الجُبنة والإحتفاظ بها أو الإبقاء عليها في نفس الوقت، الجقلبة الحاصلة سببها أن تغيير هذه القوانين سيحرم الوطني من العصا أو السوط، وهذه الطامة الكبرى في نظرهم لأن المثل الإنجليزي أيضاً يقول عن قيادة العربة التي تجرها الخيول من بيده السوط يملك اللجام
    “He who got the lash got the rein “.
    ومبرر الأعتقال أن الذين تظاهروا لم يحصلوا على الأذن بذلك من الأمن وأنهم فقط أكتفوا بإخطار شرطة ولاية الخرطوم ولم يسأذنوا، طيب تستطيع الشرطة أن تؤمن البُعد السلمي للتظاهرة وأن تمنع ممارسة أية فوضى أو مظاهر غير سلمية، لكن جوهر القضية أن الوطني يبعث برسالة مفادها نحن الحُكام ومُلاك السودان ولا أحد يستطيع أن يفعل ما يُريد دون أخذ الموافقة بذلك منا، وماذا حدث، ردة الفعل تحطيم دور حزب المؤتمر الوطني في الجنوب وإعتقال بعض قادته هناك ويقول قائل منهم لا ندري أين أخذوهم، إذن هاهي الحركة بدورها تستعرض مكاسبها من نيفاشا وتحكمها في الجنوب، السؤال الأهم أين الوطن والمواطن من كل ذلك، لقد تفضل بقولها بعض الأخوة أعلاه الصراع الدائرة رحاه الآن صراع مصالح بين قوى سياسية تضع مصلحتها الحزبية فوق كل إعتبار بما في ذلك الوطن. حتى ولو كانت مزاعم الحركة الشعبية في المناداة ببسط الحريات حق أريد به باطل، فهذا لا يمنع من أنه حق، فالحرية حق إنساني أساسي إن لم يُمنح يُمكن أن يؤخذ بالقوة ويعيد البلاد إلى مربع ما قبل نيفاشا، الجديد في الأمر أنها لم تعد مطلب الجنوب وحده بل الجميع.
    الأخ الفاضل ود الخلا دوام الحال من المال وعلى جزب المؤتمر الوطني أن يستوعب

  19. aflaiga كتب:

    تحليل استراتيجى لما حدث بالامس :
    يجمع كل المطلعين على كيفية ادارةةالشان الاستخبارى ان الامن هو مجموعة الترتيبات والاجراءات التى توضع لتامين اى عمل سياسى او اقتصادى او اجتماعى من شانه حماية الدوله وتطورها —- 1
    يجمع كذلك كل الخبراء الاستراتيجيين على ان الترتيبات دوما تخضع للنظرات السياسية الكليه لما اتفق عليه مكونو الدوله من محكومين وحاكمين وان اى ترتيبات عدا ذلك تدخل فى اطار التسميه الاخرى ( حالات الطوارئ ) —– 2
    وبما ان السودان كمعيار للتحليل ليس به الان حالة طوارئ فيمكننا استنتاج احد الاحتمالين :
    1 – اما ان الدوله تعمل بوجهين احدهما حالة طوارئ داخليه خفيه والاخر حالة معنويه من اقرار التحول الديمقراطى والسلام .
    2 – او ان الدوله فعليا لا تعرف كيف تدير مرحلة الانتقال السلمى للسلطه عبر الانتخابات وتحقيق اتفاق السلام عل الارض .

    دعونا نتناول الاحتمال الثانى وهو الاقرب للحقيقه بمعيار ما نسمع ونشاهد من تداعيات فى المستوى القيادى الاعلى من الدوله ومن خطاب الدوله الاعلامى تجاه ما يحدث على اراضيها :
    اذا اسقطنا مفهوم اس العمل الاستراتيجى الذى يتكون من ترتيبات واجرءات فيمكننا وصف اتفاق نيفاشا والدستور بانها هى الترتيبات —— 1
    ويمكننا وصف التزام الشريكين والقوى السياسية بان يتم الاتفاق على تداول السلطه عبر الانتخابات والياتها وتطبيق اتفاق نيفاشا وبخاصة الاستفتاء والمناطق الثلاث بانها هى الاجراءات —— 2

    يقر الواقع الاستراتيجى بانه من المفترض ان يتم تفصيل الترتيبات الامنيه بشكل يجعل هناك جدول زمنى ووصف واضح للمهام والاجراءات وادارة الدوله والشارع وفق ما تم الاتفاق عليه وذلك باختصار يمكن تلخيصه فى :
    * تعديل القوانين العدليه و الجنائية والامنيه بشكل يجعل تعامل الاجهزة مع العملية السياسية نابعا من روح الاتفاقات ****
    * اعادة التاهيل والتدريب العدلى والجنائى والامنى بما يتوافق مع ما تم الاتفاق عليه من اتفاقات ( العقيده الامنيه والجناية والعدلية ) *****
    * المواءمه بين جهد المؤسسات والاجهزة المرتبطه بادارة الشارع السياسى بشكل يجعل كل منهما يعمل فى بوتقه واحده وفق وسائل متحده لتحقيق اهداف موحده ****
    * ضمان اتفاق الاراده السياسية للحاكمين والقوى السياسية مع كل ما سبق من اليات لتوفير دعم سياسى لما يحدث فى الشارع وتسخير كل اليات الاعلام والمخاطبة الجماهيريه لقواعد كل طرف ودفعها فى اتجاه تحقيق الاهداف الكلية لما تم الاتفاق عليه ****
    —-
    وهذا بالضبط ما كان من المفترض توفره لتلافى ما حدث بالامس .
    فالمراقب لما حدث امس وما يمكن ان يحدث كردود افعال عليه لاحقا يرى ان عدم الالتزام بما تم الاتفاق عليه وعدم بناء قاعدة قياسية لتحديد الاخطاء وتفصيل المهام والواجبات هو ما تسبب حقيقة بما حدث بالامس ..

    ومن هنا ادعو مؤسسة الرئاسة بتكوين لجنة تحقيق عاجلة عادلة يكون من مهامها :
    * اولا امتصا اثار ما حدث بالامس واعتباره خطا عابر نجم عن عدم وجود توصيف واضح لمستحقات العملية السلمية .
    * حفظ الحقوق ورد الاعتبار كل من تضرر سواء من الشرطة او المتظارين ولو عبر اليه تجمع بين الجنائى والسياسى والتقديرى .
    * تكوين لجنة امنيه عليا من كل الاطراف لوضع منفستو وخارطة طريق للترتيبات والاجراءات الامنيه التى تنظم انساب العملية السياسية بشكل يضمن حرية واحترام الشعب .
    اللهم قد بلغت اللهم فاشهد ……

  20. ابكرون كتب:

    افليقا : كلام جميل وتحليل يطابق معظم الواقع لله درك
    المخير :اكيد يا عمده : سينبلج الضياء يوما في بلادنا يزيل كل هذه العتمة السوداء كما حدث في جنوب افريقيا كما تنبأ به (الان بيتون)….
    اما عن الامن المستتب : سبق ان كتبت في مكان وبوست ما خلال اجازتي الشهر المنصرم عن حادث الهجوم علي وحدة بسط الامن الشامل في حي الواحة مربع 5 الساعة 2 صباحا…من عدد كبير من ابناء الجنوب وان افراد الوحدة كانت لديها 5 طلقات للدفاع عن نفسها والحي … هذا دليل علي علي ان الامن مستتب !
    حودادث القتل التي تزايدت والسرقات الليلية اليومية دليل آخر علي استتباب الامن..!
    دخول جندرمة خليل وقطعها ل 3000 كلم الي وسط ام درمان وترويع العاصمة دليل ( صغير جدا) علي استتباب الامن…1
    عجبي

  21. nono كتب:

    مسكين هذا الكوب ؟

    جعلناه محور القضية؟

    فتساءلنا هل نصفه فارغ؟؟؟

    أم أن نصفه هو الممتلئ ؟؟؟؟

  22. nono كتب:

    فالنقلب الكوب ؟؟

    رأساً على عقب ؟؟

  23. مُخير كتب:

    إبنتنا الصغيرة نونو: لا ينبغي…ولا يجب .. ولا يمكن…ولا يجوز أن نقلب الكوب، كل المطلوب أن نتشقلب نحن رأساً على عقب لنرى الرُبع المملوء في أعلى الكوب، ونطنب في الثناء على السلطان لما من به علينا من كوب مملوء وأن ندين ونشجب الفراغ الذي لا مكان له سوى في رؤوسنا الفارغة…

  24. ياسين شمباتى كتب:

    محمدحسن..سلام..مافى لعب على الطاولة,كلو تحتها !! بعدين منو البدى ارض للتنمية!!؟؟ ممكن يدوها اجنبى لكن سودانى الا يدفع دم قلبو وضرائب وزكاة وجبايات بكل انواعها حتى يدوهو شئ ينميهو..

    ابكرون..والله بكى لما نزلن دموع الدم ومافى زول قال ليهو استغفر ولا الله ياجرك…والله (الطيب) مرق النصيحة,وقعلا الانظمة الشمولية والديكتاتورية بتحاول تكبت وتخرص اى صوت يخالف صوتها ورزمها..

    اقيف دقيقة,,خليك من تحليل الطيب,,انت تحليلك وينو؟؟

    ود الخلا..سلام..بالله عليك وين الامن والامان البتتكلم عنهم ديل!!؟؟خليل ما وصل امدرمان وماتوا سودانيين ابرار؟؟ احداث الاثنين دى حصلت فى العراق ولا الصومال؟؟ وين الامن الاقتصادى والغذائى والصحى ولاتعليمى!!؟؟ بعدين الآية الذكرتها دى قالها قبلك عبدالباسط سبدرات لما سالو المذيع فى قناة النيل الازرق عن سر الاستوزار الطويل,,فما كان من المذيع الا ان ضحك…هى كلمات حق اريد بها باطل وتدليس الامر على الناس وتزيين الحكم وسلطانه بدعوى انه اختيار ربانى!!! فليتقوا الله فى انفسهم ولا يتلاعبوا بالدين وعباراته..

  25. ياسين شمباتى كتب:

    العزيز مخير..حليل النسخ المبسطة وكتب الادب الانجليزى,,فقد الغيت من مقررات التعليم والوزارة من غير ما سبب واضح,,امكن عشان بتاعت خواجات وكفار وكدة !!! ولتبكى يا وطنى الحبيب..

    افليقا..ما دا القلناهو ذاااااتو,,الجماعة اتغاظوا لما لقوا العدد الهائل دا فى الميدان وناقم وغاضب عليهم,,وعشان كدة برضو آذوا وتعرضوا لمناديب القنوات الاعلامية..بعدين الطرف الثالث اللى هو كان مفروض يكون السيد الرئيس اوضح بما لا يدع مجالا للشك انه غير حيادى وانه غير اهل لان يكون حكما وفصلا,,فهو لا يفتأ يصرخ باسم المؤتمر الوطنى ويؤكد فوزه فى الانتخابات رغما عن الجميع..ودا ح يقودنا لا اراديا لحوجتنا لطرف ثالث مزيه,,والكلام بجيب ليهو كلام بعد دا وعدم وطنية وعمالة وارتزاق!!!

    ود الخلا..عليك الله ورينى النصف الممتلئ دا وينو وفيهو شنو!!!!؟؟؟؟

  26. ياسين شمباتى كتب:

    نونو..جبيتها من الآخر,,وهذا ديدن من لا يملكون رايا سديدا او منطقا يخرص الآخرين..

    مخير..والله اتشقلبنا وبرضو ما شفنا ش,ياربى المشكلة تكون فى عيوننا بعد دا ولا شنو1!؟؟؟ غايتو انا عندى نظارة طبية..

  27. سلام لكل الحضور الكريم

    لقد اوضح الإخوة والأخت وجهات نظرهم وتحليلاتهم وتقريبا كلها متفقة أو تصب في اتجاه واحد وهو : اعطاء هذا الشعب الحرية في أن يعبر وأن يقول رأيه (وهذا حق أصيل من حقوقه لا يجب أن يستجديه)

    الأخ العزيز ود الخلا لا يشكك احد في وطنيتك أو حبك للوطن (وحب الوطن لا يعني بالضرورة حب الحكومة أو حب حزب المؤتمر )
    وإذا كانت الحكومة تفترض إن كل الشعب السوداني يقف خلفها فلماذا الخوف من قلة ضئيلة مارقة لا يحبها الشعب ولماذا لا تفضحهم بقيام المسيرة الهزيلة حتى يعرف العالم أجمع حجم المعارضة الضئيل.
    ولمنع وقوع شغب من هذه القلة (كما يقولون) يمكن التحوط بوضع قوات الأمن ، قوات الدفاع الشعبي، قوات الإحتياطي المركزي، قوات النظام العام، وقوات شنو وشنو ما عارف في وضع استعداد لفض الشغب إذا حدث.
    ألا تكفي كل هذه القوات من بسط الأمن وتوفير جو من الطمأنينة؟
    ولكن أن تغلق المدارس والجامعات وتمنع الناس من العمل في هذا اليوم وتطرد الصحفيين والإعلاميين ومراسلي الإذاعات العالمية وتقمع المسيرة من البداية . إنه الضعف بعينه إنه العجز . لماذا تخشى من مسيرة يصفونها بالهزيلة ؟؟

    عندي سؤال أخير من هم المشاركون في المسيرة ؟ هل هم الحركة الشعبية فقط أم كل الأحزاب صغيرها وكبيرها ؟ ومع إختلافنا مع هذا الحزب أو تلك الحركة فالأصل أن نمنح الجميع الفرصة للتعبير عن نفسه ثم نترك الإختيار لصناديق الإنتخابات لتأتي بما يختاره هذا الشعب المسكين المعذب.

  28. ياسين شمباتى كتب:

    ود الباشا..سلام..

    صدقت فى قولك,,لكنها الفئة الباغية التى قتلت الشعب وتصر على القضاء على كل فرد تبقى..

    ود الخلا..ورينا ولو بسيط من البتعرفو دا عشان نساند الحكومة ونلعن سلسفيل المعارضة..

  29. مشاكل كتب:

    سلامز

    شهدنا بالأمس الأول تحركات محدودة لبعض منسوبي الحركة الشعبية و بعض أحزاب المعارضة فيما سمي بالمسيرة السلمية
    معارضة يرثى لها
    معارضة تشكي لطوب الأرض تردي أوضاعها الداخلية و الخارجية
    معارضة تتآكل و تأكل من ميراثها القديم
    معارضة لم تستطع أن تقدم للشعب السوداني – و قد أخذت وقتها بالكامل في سدة الحكم – حل واحدا لمشاكله سواءا في الأوضاع المعيشية أو البنيات التحتية
    معارضة لا تعرف في المعارضة سواء التصفيق و الغناء
    معارضة لا يهمها انسان السودان بقدر ما يهمها المنصب و الوزارة و تقسيم الثروة و السلطة
    فهل هي جديرة بأخذ ثقة المواطن السوداني ؟؟
    هل هي جديرة بقايدة وطن الميلون ميل مربع ؟؟
    هل هي جديرة بحكم شعب متعدد الثقافات و الأعراق ؟؟
    اقولها بملء الفم … لا و ألف لا

    فمن جعل كراهية الإسلام و المسلمين منهجا له و ناكرا كل التشعريعات الاسلامية جاب و خسر
    من جعل الطائفية مطية لنهب اموال الشعب السوداني و متلذذا بجهلهم و طيبة قلوبهم لا محالة منكسر
    و من جعل العروبة و القومية شعارا له فبشرهم بتيار إسلامي جارف يجعلهم كهشيم محتضر

    فتحالفات الشتات مهما ظهرت ضخمة كبيرة فهي واهية ضعيفة لا قوة لها ولا حول
    تحالفات لا تقوم على مبدأ الا كره المؤتمر الوطني و حب المناصب و الأموال هي تحالفات بلا ادنى شك تحالفات غارقة في بحر الوهم و الأحلام

    فما هكذا تغير الحكومات الظالمة .. فلم تستطع المعارضة أن تغير من رأي الشعب فيها بكلام حماسي لم يخاطب العقول و اكتفى بالقلوب .. مسيرات لم تتعدى دور الأحزاب ملئت الدنيا ضجيجا و وسائل الإعلام خطبا و حديثا عن تغير الحكومة … فلنضحك سويا مع مسرحية المعارضة .. و لنبكي على وطننا الحبيب

    فهذه الاحزاب عاجزة عن حصر عضويتها في مساحة ألف متر مربع .. فهل تقوى على تجميع الشعب السوداني معها في مشوار الألف ميل .. دعوها فإنها أكبر من إمكانياتكم الفكرية و المادية و البشرية

  30. سهيل كتب:

    سير سير يا بشير .. الرهيفه التنقد

    افليقا : اختلف معك في شجاعة باقان و عرمان .. فهم تعكزوا على حصاناتهم البرلمانيه .. و لو علموا بأمر إحتجازهم من الشرطه مسبقآ لما خرجوا .

    نحن يا فرده مشكلتنا إنو مافي ضمان ان المسيره قد تكون سلميه .. قد يحدث ما حدث يوم الإثنين الدامي (موت قرن) و الخسران هو المواطن البسيط .. العندو عيال في مدرسه بعيده و العندو طبليه في السوق العربي و الأهلو ساكنين في الضواحي و عايز يطمئن عليهم .. الناس البتتكلم و هي آمنه مطمئنه مش زي الناس الجوه ميدان المعركه .. ولعلك طالعت في موقع الشرق الاوسط اليوم كلام باقان العنصري عن ان الشرطه ليست قوميه إنما هي شماليه ( كميه من الحقد الاعمى) لإستثارة الخلايا النائمه للزج بكل ما هو شمالي في الجحيم.. نحن في وضع يتطلب النظر بحرص إلى ان الاخوه في الحركه و من والاها إذا عمت الفوضى لن يميزو بين ماهو خبيث و طيب و إنما سيأتون على امننا و امن كل ماهو شمالي .. انا لست إنقاذيآ و لا احب المؤتمر الوطني .. لكن إحساسي بأن وضعي الامني لن يتحقق إذا تسلم المعارضين الآن لمقاليد الامور و جلسو على راس السلطه في البلاد.

    وبعدين القوانيين العاوزين هم يمرروها دي بتخص منو ؟ اكيد ما نحن .. النواب البرلمانيين عندهم مصلحه .. اما محمد احمد المسكين تب ما عندو مصلحه .. بس يجرجروهو عشان يتبهدل زي ما حصل امبارح ..

    الله يجيبك يا 2011

  31. مشاكل كتب:

    اللهم آمين

  32. حاج أحمد السلاوى كتب:

    يا سادة يا كرام …الشىء الأغرب إن هؤلاء القوم طلعوا المسيرة من أجل القوانين اللى بيقولوا إنها لسه ما أجيزت لكن ظهرت أجندتهم الخفية هى إسقاط النظام … كيف تسقط نظام إنت شريك أساسى فيهو ؟ دا لعب عيال وهيصة ساكت لا أول ليها ولا آخر .
    هل سمعتو بوير الدولة الجنوبى ف وزارة الداخلية الكان عاوز يطلع معاهم فى المسيرة ؟ حسه لو كان طلع وقبضوا عليهو مع الجماعة كان يسووا فيهو شنو ؟ ويحاكموهو بأى قانون ؟ حاميها حراميها ..وكوووووولهم فاسدين ومفسدين ..وربنا يستر من يوم الخميس الجايى .

  33. محمدحسن كتب:

    أحبابنا سَلام 🙂
    وَ كـُلَّنا ( مُعَاند ) الكريم وَدَّ الخلا
    وَ حَبيـبنا ياسين ( الغـُربَة ) مِن الهَمَّ الفيها وَ العَلى البَلد خـَلت الخـَوف أكبَر
    فكانَ الصُوت للحَق وَ إلى الحَقيقة أعلى ،
    وِ الحَمدُ لله أن حَفظنا وَ نسألُهُ أن يَحفظنا
    مِن مَصير إخوتنا فِي العِراق وَ الصُومَال تـَحديدَا ـ وَ نسألُهُ لهـُمُ الهدَايَة ـ
    عَشان كِدَّه الوَاحِد بقى عِندُو ( ترمُومتر ) استشعَار للخـَطر
    وَ دَا البيخِلـِّي نـَاسنا الطيـبينَ ـ أحبابنا سَاخر سبيل كـُلَّهـُمُ ـ يُثـُورُوا عَلى أقـَّل هَبشـَة !
    وَ مَوضـُوع الأمن مَوضـُوع هَام وَ خـَطير وَ حَتـَّى يُنصَف
    يَحتـَاجُ إلى احصَائيَّات مِن الدَولة !
    وَ ( الخـَلطُ ) يَخدُثُ وَ يتـَكـرَّرُ دَائما بَين أمن المُواطِن وَ الوَطن
    وَ أمن الحُكومَات وَ الأنظمَة
    وَ أحادِيثُ الديكتـَاتـُوريَّاتِ وَ الديمُقراطيَّة
    وَ هـُنا تـَسقــُط الدُول فِي ( مُستـَنقـَعَاتِ الفِتنة ) مِن فوضى وَ اضرابَاتٍ وَ تـَمَرُّدٍ وَ قــَمع وَ عِصيَان !
    وَ مَا بينَ الحَادِث فِي ( إيران ) وَ ( اليَمَن )
    وَ بيَن حَال العِراق وَ الصُومال
    نـَعُوذ باللهِ وَحدَهُ مِن شيَاطين الإنس وَ الجــِنـــَّة !

  34. حاج أحمد السلاوى كتب:

    ثم ماذا بعد الإتفاق الذى حدث بالأمس بين الشريكين ..هل أدت المسيرة أو التظاهرة غرضها وأهدافها المرجوة.. أم كانت المسالة مجرد مناورة متفق عليها ؟..السؤال هو ..لماذا اختلفوا وعلى ماذا اتفقوا؟هل كنا بحاجة لكل هذه الهيصة لكى تعود الأمور إلى طبيعتها ..؟ ما هو دور الأحزاب الأخرى ..احزاب الوسط فى هذه المرحلة وما هىى مكاسبهم فى هذه الجولة الأخيرة بين المؤتمر والحركة ؟وأسئلة كثيرة تتقافز إلى السطح بعد العشاء الأخير ..اقصد الإجتماع الخير بين الشريكين الكبيرين اللذان اصبحا يتحكمان فى مصير أمة المجاد..فهل من مجيب ؟
    السؤال المهم والهم هو : ..متى يبدأ الحراك الجديد القادم ؟ الإجابة تجدونها عند عرمان وباقان .
    وكل مسيرة وتظاهرة وأنتم بألف خير وألف إتفاق .
    وبرضو ما زلنا منتظرين نشوف آخرتا شنو !!

  35. محنك كتب:

    السلام عليكم جميعا

    اظن والله اعلم ان الاحزاب دى قبه بس من الداخل ما عارف مؤيدنها كم ….بعضها معتمد على الاغلبية المكنيكية واستغلال اشواق الناس وتاريخ البعض الاخر ….

    مافى تنظيم ومافى احد عارف عضويته كم …. وبعضهم تعرض لانسلاخات مبرمجه ومبررة ايضا هل يعقل ان تراس بنت الصادق المهدى المولودة 74 المهندس مادبو والمهندس مسار خريجى السبعينات من جامعة الخرطوم . فلذلك قالوا نشوف عضويتنا مجتمعين كم عشان نقنع الحركة بالتوافق فى الامتحانات لاسقاط الحكومة … او نجيب عاليها سافلها فى يوم وتكون انتفاضة ظلوت …

    اها بعد تاكد للحركة انو تجمع جوبا نمر من ورق اراد ان ياكل كعكة الشعب السودانى بملعقتها وشوكتها وسكينها … او ان يسلبها مكتسبات نيفاشا …. قام القوم التانين رجعوا تانى للاتفاق مع الحكومة …. وما بعيد يدخلوا فى تحالف انتخابى مع الوطنى لانه الهم هو الثروة والسلطة وعارفين انو انتخابات ما بتجيبهم

    بس يا سلولو

  36. aflaiga كتب:

    ما قلنا العروسه للعريس والجرى للمتعايس !!!!!!!!
    سءال صغير جدا :
    اذا كانت مشاكل البلد كلها ممكن تنتهى فى قعدة سغنتوتيه للشريكين فلماذا لا يقعد الشريكين كمان يومين تلاته متواصلات وينتهو من كل القصص ونخلص ؟؟؟؟؟
    سؤال ما سغنتوتى :
    هل قال الشريك الحاكم للشريك الاخر كما قال المسطول للحلفاوى الميت وجنازته خاشه المسجد وهو يرفض الدخول متشبثا بالباب :
    يازول زح كرعينك انت خاشى يصلو عليك مش تصلى !!!!!!!
    ام قال له كما قال المسطول للمجنون الذى توهم انه بالونه وركب اعلى البرج ورفض النزول :
    يا زول ما تنزل قبل انفسك اسى بى الابره دى ؟؟؟؟؟؟؟
    هناك جائزة للاجابه الصحيحه عباره عن مقعد امامى فى مظاهرة الاثنين بعد القادم ….

    يحكى ان شاب بتاع هلس شديد وكل يوم يسرق من ابويه قروش ويمشى يقيل مع فلانه بتاعة البتاع فى بيتا وفى يوم جا البيت يشيل حاجه يمشى يبيعا يمشى يقيل بيها وما لقى قام لقى الديك فى الحوش ففكر ان يخمش الديك يبيعو ويمشى يقيل مع صحبتو بيد انه فى الطريق فكر فى ان يدى صحبتو الديك ويريح نفسو من مشوار السوق – المهم مشى لصحبتو بينما هما جالسان طرق الباب احدهم فخافت صديقته ان يكون الطارق هو زوجها فادخلته صاحبنا الدلاهه فى دولاب الملابس واستقبلت الطارق الذى كان احد الزبائن وبينما هى تجلس مع الزبون التانى طرق الباب وخافت ان يكون هو زوجها هذه المره فادخلت التانى مع الاول فى الدولاب فى الظلام الدامس فاستغل الدلاهه الموقف ودار الحوار التالى :
    الدلاهه : تشترى الديك ده ولا اكورك ؟؟؟
    التانى : يا زول ديك شنو انا ما عاوز ديك ..
    الدلاهه : يا زول تشترى ولا اكورك ؟؟
    التانى : خلاص بشترى بى كم ؟
    الدلاهه : بى عشره الف ؟
    وقام التانى بشراء الديك برغم ارتفاع السعر !!! وبعد برهه من الزمن :
    الدلاهه : تدينى ديكى ولا اكورك ؟؟
    التانى : يا زول الديك انا مش اشتريتو منك تانى فى شنو ؟؟
    الدلاهه : تدينى ديكى ولا اكورك ؟؟؟
    التانى : خلاص هاك ديكك بس اسكت ..
    الدلاهه : تدينى ديكى ولا اكورك …
    وبهذه الطريقه تم بيع الديك للتانى اكثر من مره وفى النهاية خرج الدلاهه مستمتعا بديكه ونقوده …. وفى المساء عاد الدلاهه مبسوطا ليجد والده فى المنزل مستاء يلعن حظه :
    الوالد : والله الليله انا قافله معاى شديد تتخيل فى زول باع لى ديك عشره مرات ؟؟؟
    الدلاهه : هو بالله ده انتا ؟؟؟؟

    السؤال التالت : من باع الديك لمن وكم مره ؟؟؟
    وكل اتنين وانتو بخير ……….
    الاتنيييييييييين الاتنين الليله وين ؟؟
    وطلعنا متحابين زى العنب والتين الليله وين ؟؟

  37. محنك كتب:

    افليقا يا خطير

    لو عارفين انو سفرة المدام سجارة كان سفرناها كل اتنين

    تكتب لينا هنا ابداع والله نكورك

  38. التلب كتب:

    سلام للكل
    إبداااااااااع يا أبو الأفاليق، و لا أزيد….

  39. semsema كتب:

    salam alikuom
    mohank : take aire
    my hasband is already artist

  40. nono كتب:

    ثمثمه …..

    جى جه ؟؟؟

    تشى هو ؟؟
    تشون تيان

    نوان هه ؟

    شيا تيان ؟

    يان ره ؟
    تشوه تيان ؟

    ليانغ شوان ؟

    دونغ تيان ؟

    هان لنغ ؟

    يو شيوه ؟

    تسوى دى ون دو؟

  41. nono كتب:

    ثمثمة///

    If I was to leave my husband dear,
    And my two babes also,
    O what hae you to take into
    If with you I should go?

  42. محنك كتب:

    good evening madam aflaiga

    i know him well

    اشارت صحيفة آخر لحظة انو باقان وعرمان متنافسين عشان ترشحهم الحركة لرئاسة الجمهورية يعنى سلفاكير حيكون النائب الاول لاحدهما …. شفتو عشان كدا نحن سجلنا ………. هسع القاتل الحاقد عرمان يبقى رئيسنا من هسى احسن يقعد فى علبه وناس الحركة لو ما جاديييين حقو يرشحوه

    وايضا اشارت لضعف احزاب مزة جوبا

  43. اول انقليش اول زا تايم .

  44. التلب كتب:

    الأخت سمسمة يمكنك إستخدام لوحة المفاتيح العربية بالضغط على الرابط التالى http://www.arabic-keyboard.org
    حيث يمكنك كتابة النص العربى بالنقر على لوحة المفاتيح العربية التى ستظهر. و من ثم نسخ النص و إعادة لصقه فى مكان التعليق فى المدونة أو اى مكان أخر.
    ملحوظة: المسألة دايرة صبر عشان كده طولى بالك عند كتابة النص.
    مع الأمنيات بالتوفيق و سلامة العودة للوطن عشان أفليقا ده يبطل الجرسة

  45. حاج أحمد السلاوى كتب:

    أخونا التلب ..
    ياخ جزاك الله خيراً ..انحنا زااااتنا إستفدنا من المعلومة الجميلة دى ..
    تانى ما فى زول عنده عذر ويقول ما عندى كيبورد عربى ..

  46. التلب كتب:

    يديك العافية يا حاج السلاوى و كمان نديك خيار تانى، حيث يمكنك كتابة النص العربى بالنقر على الحروف الإنجليزية الموجودة فى لوحة المفاتيح الخاصة بالكمبيوتر بتاعك و دى خدمة جديدة من العم google. و للقيام بذلك قم بالضغط على الرابط التالى http://www.google.com/ta3reeb
    و من ثم يمكنك أن تكتب النص العربى باستخدام الحروف الإنجليزية. مثلا إذا كنت ترغب بكتابة كلمة (سلام) ما عليك إلا أن تكتب (slam) و تضغط enter أو space لتتحول الحروف الإنجليزية أتوماتيكيا الى العربية و تصبح (سلام).
    ملحوظة: لكتابة حرف العين إضغط على الرقم 3 . لكتابة حرف الحاء إضغط على الرقم 7 . لكتابة حرف القاف إضغط على الحرف k.

  47. ياسين شمباتى كتب:

    ود الخلا..سلام..
    والله يانى من يومى,,والعناد ما كعب اذا كان فى جانب الحق,,واعود واكرر انه لا امن ولا امان مع هؤلاء المتدثرين بالدين المسيئين اليه,,وبرضك انت عارف انو فى انفلات امنى كبير جدا فى البلد..بعدين يا جماعة ارجوكم افهموا انا ما عايز الحركة ولا غيرها من الاحزاب القديمة المعتتة,,لكن بالجد ليه ما ننظر لى حزب جديد او قائد جديد؟؟ بعدين التحول الديمقراطى دا بجى كيف!!؟ ياربى بنصبح نلقى البلد اتغيرت وجانا زول كويس؟؟ ما لازم نجرب ونتعب ونتحمل بعد داك نتيجة اختيارنا وترشيحنا…لكن ديل لا والف لا ليهم,,ويارب نصبح نلقاهم عمى ومكسحين ببركة الشهر الحرام والبلد الحرام..
    واقول ليك(يانا الزمان يا ناس)….هذا وودى..

    محمدحسن..ونعوذ معك منهم بالتحديد,,ولقيتك ناقش الشغلة تمام..ومصيرنا اكيد لى فوضى بالشايفنو دا,,وما حكامنا بافضل من حكام اليمن او الصومال فى شئ,فكلهم جاء بالعسكر بليل او تدثر بالدين والديمقراطية ثم لما ان تمكن قلب لشعبه ظهر المجن..وابقى واصل..

  48. ياسين شمباتى كتب:

    الوالد السلاوى..
    والله شكلو الموضوع كلو لعبة ومسرحية!!! والغريبة انو (باقان) ذاااااااتو طلع يصرح بالصلحة والمراضاة..والغريب برضو انو ح يناقشو موضوع الاستفتاء والمشورة الشعبية القال عليهم وزير العدل انهم ما ممكن يطرحوا الا بعد حدوث الانفصال!!! وعجبى منهم شديد..

    افليقا..وعملوها ظاااااااهرة..والديك دا طبعا اسمو(الشعب السودانى) الفضل!!!

    محنك..كلها احزاب ملعوبية وفوضى,,لكن برضو لازم الكل يعرف انو الشعب لسه فاهم وواعى للبحصل حولو..وليهم يوم..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s