سمسمه الى الصين ..

Posted: الإثنين,7 ديسمبر, 2009 by aflaiga in اخرى

تغادرنا غدا الثلاثاء الى جمهورية الصين الرفيقه سمسمه زوجة افليقا ووالدة كل من حمودى وسروية وعبودى – فى مهمة رسمية تتعلق بتمتين العلاقات بين الصين والسودان !!

هكذا كتب صديقى س فى مستهل مقدمته عن البوست الذى سالته عن كيفية بدايته فالمتاثر بالفراق يصعب عليه الكلام … لكنه قبل ان يبدا الكتابه قال لى  : يا جماعه ما تستهدو بالله مافى داعى للصين ممكن تقعدو تتفاهمو هنا !!!

الاخوه الاعزاء : تغادرنا يوم غد الى الصين زوجتنا الفضلى الاموره سمسمه فى كورس تعليمى ( مش قالو اطلبو العلم ولو فى الصين ) اها نحنا فى الحته دى انصار سنه عديل عشان كده رسلناها الصين تاسيا بقول الحبيب المصطفى ولا شنو يا ود الخلا ؟؟؟ اها سمسمه قايمه بكره وحتغيب عننا فتره نسال الله انو ربنا يوديها ويجيبا بالسلامه ونسال الله انو يجعل الصين بردا وسلاما عليها ويوفقا فى مهمتا ويجيبا لينا سالمه غانمه ..

Advertisements
تعليقات
  1. aflaiga كتب:

    شباب : حين اخطرتنى سمسه بانها ستذهب فى كورس بعد فتره الى الصين منذ ذلك الوقت وانا لافي صينيه ( مش صينيه من الصين !! لا صينيه فى الشارع) وبسال فى روحى يا ربى حنقدر نعيش كيف وسمسمه فى الصين ؟؟ بالله يا شباب اى زول سمسمتو سافرت قبل كده ( وجات راجعه ) يوروينا الطريق الى الصبر كيف والزول سمسمستو مسافره ؟؟ ولو فى زول برضو سمسمتو سافرت ( وما رجعت ) برضو يورينا احساسو كيف قبل وبعد السفر !!! ممكن نستفيد من اخواننا المغتربين مع انو الصوره بتكون معكوسه هو بره وهى جوه اسى نحنا هى بره ونحنا جوه !!!
    ختاما سمسمتى العزيزه تمشى وتجى بالسلامه يا رب وبالله ما تنسينا من صالح الدعوات لانو الدعوات من الصين عندها طعم اخر …

  2. حاج أحمد السلاوى كتب:

    تعرف يا أبو حمودى الفراق من النوع دا بيولد الشوق والريدة أكتر مما هى عليه..ياخ إعتبرها إجازة سغيرووونة من عواطف عشان ترجع وإنت فى شوق بلا حدود..نحنا غايتو إكتشفنا إنو الحكاية( الفراق لمدة قصيرة ) دى مهمة جداً وأكيد أكتشفها ابو عصمت لامن ناس عواطف راحو دبى ..ولامن هو سافر لعصمت فى ماليزيا ..كلامى صاح ..ولاّ فى محلو ؟وشايف جدو ابكرونا قاعد بعيييييد ويعاين يمين شمال ويحسب فى ميعاد الجية التانية متين !
    ومعنى الكلام دا إنك حتكون ماما وحتكون بابا للبزورة..ويمكن كمان أنور وجدى زى ما قالت سهير البابلى .
    على أى الحالات نتمنى ليها رحلة سعيدة وكورس كارب ( بس ما عرفنا نوعية الكورس ) وتمشى وترجع بالسلامة ..والوصية فى الذمة ما تنسى تجيب معاها حصان أو حصانين من الصين لبنتنا الغبشة ..
    وإلى لقااااااااااااااااااااااءءءءءءءءءءءء .

  3. aflaiga كتب:

    حاج السلاوى : ياخى نحنا شوقنا لسمسمه ما داير ليهو تجربه بعاد !!! انت ما سمعتا كنت معاهو اسى ومشتاق ليهو لسه وبشتاق ليك وانت جنبى ؟؟؟ لكن الصين ما بعيده شويتين ؟؟ تعرف يا عمك اسى لو كان دبى ولا مصر شوية الواحد بيقبلا لكن الصين دى كتيره …
    بالنسبه للحسبه !! الغبشه بتكون طلبت زمان طلباتا التى من بينها حصين لانو الصين مشهوره بالحصين . ويا ريت كمان اريل لنونو . ووصفه صينيه تعويذيه للزهراء .
    برضو ما وريتنا شورك وانت كنت معاهو اسى ومشتاق ليهو لسه ؟؟

  4. ابكرون كتب:

    تصحبك السلامة يا سمسة
    يا حليلك يا افليقا الله يصبرك ( تلقاك تحت تحت فروح ) غايتو عندك كم يوم كده تتمتع بكامل حريتك …لحين عودة وزيرة دفاعكم… ويحق لكم في هذه الفتره تعديل مكان حبل الغسيل وموقع الثلاجة والتلفزيون …. وبرضو شد حيلك للزرزرة……

  5. ابكرون كتب:

    كدي يا افليقا راجع المعلومات والمعطياااات يمكن تكون كذبة ديسمبر

  6. aflaiga كتب:

    ابكرون : اريتا كذبة ديسمبر مع انو ديسمبر ما فيهو كضب لانو نهاية الكضب بتاع ال 11 شهر الفاتو !!! اها قول غيرنا محل حبل الغسيل وموقع التلاجه والتفزيون دى كلها اشياء تشترى اترى لوفقاو عينيك ووضعو مكانهما جوهرتين اكنت ترى ؟؟ هى اشايء لا تشترى وانتم خير العارفين .. بعدين العندو نفس يغسل منو ؟؟؟ حرمت علينا المكاوى !! والطيب والغسيل النضيف – الله لينا من التعب والاكل الكعب والبشتنه ورقاد الواطه … برغم سعى شركة التامين على تعويض الخسائر المعنويه الا انو لا بديل للسكه حديد الا السكه حديد … ( كسير تلج صاح مش ؟؟ ) ..
    الله لا سفر ليكم سمسمتكم وموعودين بقصيده كاربه فى الخسوس مطلعها :
    يا تجاينا لا البعد حار
    والكورس بيسهر عنيك
    بالله يا نايم ساعدنا ببيت بيتين كده عسى ولعل نخدمك فى تجاينتكم ..china

  7. محمدحسن كتب:

    🙂
    بالسَلامة بإذن الله أختنا سمسمه
    وَ الوصيَّة ( الكمَّامات ) عَشان نزلات المَطارات وَ الإنفلونزات
    وَ الأهم ( التحصُّن بالأذكار و الأدعية )
    وَ عَودة سَالمة غـَانمة ( عَالمة ) 😉
    وَ مَا تشفق يا أفليقا
    ـ وَ دِي ( وَصيَّة عُزَّاب ) وَ طَبعَا مَردُود عَليها 🙂 ـ

  8. ابكرون كتب:

    قسما دشداشة الجليد البتكسر التلج قدام السفن ما كسرتو كده …..!!

  9. aflaiga كتب:

    محمد حسن : يا عزابى لم وصيتك عليك زى وصيتك دى انا ممكن اديك مليون وحده ومليون دعاء صبر شوف كمان العزابه بيوصو فى الما عزابه ؟؟!!
    ابكرون : الدشداشه دى ممكن نعتمدا مقياس زى بتاع ريختر فى كسير التلج ؟؟؟ اقرا النصوص من النص ولا عامل رايح ؟؟ اها الباكمبا اليومتا دى موقفا شنو ؟؟
    اها نديكم النجره بتاعة سفر الصين :
    يا جاينا لا البعد حار
    خلى السغار حتى الكبار
    حمودى مين بيلبسو
    سروبه مين بيسرحا
    عبودى مين بيحنسو
    سرويه مين بيمسحا
    افليقا مين بيونسو
    الناس دى مين حيفسحا ؟؟
    الصين بعيد يا سمسمه
    والشوق شديد يا سمسمه
    شوق البعاد يا سمسمه
    يذوب جليد يا سمسمه
    عزاى الوحيد يا سمسمه
    الدنيا اصلو مقسمه
    يوم جنب يا سمسمه
    يوم اخر البلد يا سمسمه
    يا جاينا لا البعد حار
    خلى السغار حتى الكبار
    مين يكوى لى يا سمسمه
    ومين ينوى لى يا سمسمه
    مين يلوى لى يا سمسمه
    ويربط ايدى يا سمسمه
    وحياة عينى يا سمسمه
    بتمسخ على يا سمسمه
    شفتى البعاد يا سمسمه
    سبب السهاد يا سمسمه
    حمانى الرقاد يا سمسمه
    ومسخت على يا سمسمه
    حمودى مين بيلبسو وسروية مين بيمسحا
    عبودى مين بيحنسو وسرويه مين بيسرحا
    افليقا مين بيونسو يا سمسمه ؟؟

    اها يا ابكرون دى بمقياس كم فى الكسير ؟؟؟

  10. حاج أحمد السلاوى كتب:

    غايتو يا أفليقا سعيد ( سعيد بتاع حنة عواطف ) جنبك ما يساوى أى حاجة ..هو لاكين جنس كسير ..اصلو ما حصل.. الكلام دا ممكن يدخلك كتاب جينيس ..
    أريتو حالنا بعد الحال !

  11. ابكرون كتب:

    إهي اهي ياخ خليتنا نتنخج يا زول….
    والله لكن يا سمسمة ختيرة :
    (( ومين ينوى لى يا سمسمه
    مين يلوى لى يا سمسمه
    ويربط ايدى يا سمسمه ))
    كر كر كر …
    علي باليمين دي مافي شي بقيسها
    لا ريختر لا زعتر

  12. aflaiga كتب:

    حاج السلاوى : ده بس لانو انت المغترب كدى جرب انو عواطف تغترب وبعدين شوف انت حتخش كتاب شنو ؟؟ نحنا عارفينك موحد ووحدوى زينا وبتكره الانفصال ومحفزاتو !!!
    سهيل : اسى جنس الكلام ده ما بيديك دافع انو تدق سدرك ؟؟؟
    ستريكر : كالعاده لابد وراقد رز ؟؟ مع انو دى مناسبه كويسه للنوايا الحسنه ؟؟
    بشاوى : انشاء الله يوم صينك يجى عشان تخش !!!

  13. aflaiga كتب:

    ابكرون : اتنخج سااااى .. هو غير النخج نحنا عندنا شنو ؟؟ الليله انتا بكره انا كل زول عندو نخجه بس مسالة وقت !! والزول الربنا بريدو ينخجو بدرى بدرى !! والنخج ذاتو اصطفا من الله – على الاقل بيكون قادر يعوض لكن النخجه بعد فوات الاوان الا تتنخج تانى !!!

  14. محنك كتب:

    الحالها دى سمسمة واحدة لو عندك سمستين كان مشيت الصين ظاتو

    مليون مبروك للمدام … ما تقول لينا عديل كورس انتخابات

  15. ياسين شمباتى كتب:

    الاخت سمسمة..تمشى وتجى بالسلامة وربنا ينصرك ويصحح قلمك ويكبرفهمك ويعلى مراتبك كمان وكمان..

    الحبيب افليقا..ربنا يصبرك,مع انى اوافق ابكرون فيما ذهب اليه من فرحك الداخلك!!

    بعدين البشاوى لو يوم (جاينتو) جا بدق النحاس وبجيب الكيتة,,,خليهو مستور بس..

  16. aflaiga كتب:

    محنك : هو لو انتخابات انا بخليها تمشى ؟؟ وهو ذاتو الانتخابات دى دايره ليها كورس فى الصين ؟؟ عليك امان الله الانتخابات دى كورس فى معهد 21 اكتوبر بتاع الامتداد الدرحه التالته كتيره عليها !!!
    شمباتى : عليك نور الله يجيب تجاينت بشاوى عشان نمسع انو مشى صحبة راكب ..

  17. محنك كتب:

    عواطفكم دى قوية عايزين يفوتوا عليها فترة الترشيح والطعون …. شفت عمك نميرى خلى اللواء / عثمان عبدالله محمد شهرين مع بعض فى السودان … وبرضو دخل المجلس العسكرى الانتقالى …

    بعد ا الا يدخلوها فى الـ 25 %

    ثانيا هسى يقولوا عليك عدو المراة ومصادرة حقوق الما بعرفوا شنو والجندره …. حتى لو انتخابات مالوا ما تمشى … على الاقل بتكون ناقشة الحاصل جوه وبرهاما من ناحية الكم كيلو كن عواطف وشحتفه وحنبقة العملتهم ديل … جدا صادقين لانو نحنا فى السودان الا يجى يوم شكرك … حتى تسمعوا …

    لكن مدكن شديد يا افلى بعد دا نجى ناخد كورسات

  18. حاج أحمد السلاوى كتب:

    ولدنا الدينمو …افليقا ..
    لحد حسه ما قلت لينا الكورس دا مدته قدر شنو ..وفى أى مدينة ؟ عشان نقدر نقيّم جرستك دى ..وهل هى ماشه براها ولا رفقة مامونة ؟.
    يبدو إنو كورس عن الإستفتاء مش عشان الإنتخابات ..ولاّ أنا غلطان ؟.ز
    سترايكر .. رأيك شنو ..؟
    غايتو ..جنس .. جِرسة ..غايتو .

  19. علي سنكل كتب:

    أفليقا ما تكون بتكب في الجرسلين وتكسر في الثلوج من بره ومن جوه يعلم الله !
    ربنا يعيدك سالمه غانمه يا سمسمه والغربة من أجل العلم جهاد.

    أفليقا أمسك ناس سرويه وحمودي و غنوا ليها :

    لما ترجع بالسلامه وترجع أيامنا الجميله
    يا سنى الروح يا مدامى و يا عواطفنا النبيله
    بتهدي ليلاتنا إبتسامه من زمان بنقول حليله

    تمشي وتجي بالسلامه يا سمسمه.

  20. التلب كتب:

    سلام للكل
    أفليقا كل سنة و إنت طيب و ربنا يكتب سلامة المدام وعليك بالصبر يا أخوى.

  21. ودالفتيحاب كتب:

    ولدنا أفليقا
    نتضامن معاكم فى هذا الهم الجميل ، أولا للفراق سبعه فوائد 1-تجديد العهود 2-وتعلم الصبر 3-والاحساس بالغربه الداخلية 4- والاعتماد على الزات 5- اكتشاف المهارات المنزلية 6 – الاحساس بقيمة العواطفات ليلا ونهارا 7 – مولد الشاعريه كان كسير تلج ولا حرقة بجد.
    وداير أقول ليك ده كله يهون وانت تنتظر قدوم الطائر الميمون يتهادا فى مطار الخرطوم عودا من الصين يوم الفرح العظيم وهو يحمل فى جوفه سماسمكم فى شوق اليكم وأسأل مجرب يبدل البعاد بالقعاد لتلك اللحظات الطيبات والى ذلك اليوم ننتظر معكم وتكون أخرجت المعلقات الخمسة عشر مش السبعة .
    نسأل الله عز وجل أن تعود اليكم بالخير والسلامة تتأبط شهادتها وشوقها اليكم .

  22. ودالزبير كتب:

    أفليقا

    كلمها لمن تجي تجيب لينا معاها حصين من الصين

    هسه الزول يعزيك ولا يهنيك

  23. الصادق ود البركة كتب:

    السلام عليكم
    الاخ أقليقيا والسمار الكرام
    وللإخت سمسمة ذهاب وعودة موفقة للبلاد العجيبة ديك
    وبعدين بدل الجرسة دي ما كان تشوف ليك واسطة كاربة إن شاء الله يدوك إجازة مرافقة ومنها شهر عسل جديد طبعاً حمودي وأخوانو توديهم ناس حبوبتهم

  24. ياسين شمباتى كتب:

    ود الفتيحاب..والله من قبييييييل داير اجيب سيرتك بس قلت مافى داعى لشيلة الحال!! عليك الله الولد دا اديهو دروس جنباوية كدة فى الايميل..

  25. مستر راعى كتب:

    ياحليلك يا افليقا قربت دموعى تقع فى الواطه لكن اصلا هى قاطعه مع المويه
    وانتى ياسمسه تمشى وتجى بالسلامه
    اها ياجماعه المره دى العكس تسافر المراه ويجلس الرجل والله تمام برضو الواحد لمن تغيب زوجته عنه بعرف مقدارها كويس
    انا ام العيال لمن تسافر بشيل شنطتى وشفعى وعلى بيت اهلى بقدر كمان على العيال وخدمتهم وكده مابحس بالفراق شديد لكن برضو كنت عايز احسسها بمكانتها وانه عملها برضو مهم وقرايتها صحى هى قاريه كتير وانا يادوب بفك الخط لكن بت ناس تمام مامتعقد ليها فى الحياة بالرغم من انى راعى والراعى واعى …
    لكن طول المسافه بخلى الواحد يفكر فى انها كانت مونساه وبتفكر معاه وبتحضر ليه حاجاته وتستقبل ضيوفه بالجد كنت بفقدها كتير واكيد بفقد روحها الحلوه وضحكاتها واقتراحاتها للمرقه والفسحه وطريقتها فى الحياة
    لكن صدقنى لمن حسيت انى كده قلت ليها يا بت الناس يا انا يا السفر لكن عارفين اختارت منو؟؟؟؟
    مابقول ليكم
    فى الحلقه القادمه
    افليقا ماتزعل دى استراحه بسيطه كل واحد بشوف شوقه للتانى قدر شنو وحتى اذا كانت فى مشاكل حتنساها مع اول لحظه فراق

  26. حاج أحمد السلاوى كتب:

    أخونا مستر راعى ..
    حتى أنت يا بروتس… واقع كسير تلج ؟
    غايتو.. جنس ..ما بعرفوا شنو داااااااك !!

    الحاج الفكى ابكرونا ..ماوريتنا تجربتك ..نحنا فى الإنتظار .
    أخونا المرطب ..ابو عصمت ..ونحنا متين ..يا مولاى ؟

    بنتنا سمسمة ..أكيد كل الحرائر يحسدوك على ما أنعم الله به عليك من بعل شفيف ..محب ..حنون ..بصراحة..مافى بعده ..
    وتمشى وترجعى بالسلامة ..لاكين ما تطولى ..من أجل خاطر ولدنا الدينمو .

  27. حاج أحمد السلاوى كتب:

    يا جماعة الخير .. سلام
    هناك ثلة من الإخوة والأخوات والأبناء والبنات مسجلين غياب ..نريد أن نطمئن عليهم ونأمل أنهم بخير وعلى ما يرام ..الغبشة ..الزهراء ..سماسم ..خالد مدنى ..حنين .الكنانى ..سترايكر ..عبدوش … مشاكل ..ساتنتود ..والكاشف بشار ..والكاشف نيام نيام ..والكاشف الصغير التركى ..وغيرهم ..طمنونا الله يطمنكم ..

  28. مُخير كتب:

    أمك ولدنا أفليقا ما إنبرش وهرس التلج هرس
    ورجع مويتو جزيئيات وذرات ذرات
    وناس سلولو وأبكرون الكلام عجبهم جنس عجب
    ومش براهم معاهم ناس علي سنكل المشككين
    يا خوانا الجرسلين ده مُفيد في الشتاء والله يكون في عونك يا أفلي، وبيني وبينك الصين ما بعيدة، في عصر ثورة الاتصالات، يعني ممكن ترفع تقارير يومية عبر المسنجر وكل المطلوب حبة صبر وكثر من الدعاء والصلاة إلى حين العودة.

    تعرف يا فردة … لمن كُنا في سنة أولى فراق ،،، الوضع كان أسوأ لأنو سمستنا أخدت الشحارير معاها وخلت بعدها الدار خلا … وإتخيل نحن في الغربة ومشت لأهلها وهم برضو في غربة ، وبعد مكالمتين في اليوم الثالثة جات في المساء … أخوك لايص في المطبخ وبعدما سخن جزء من المؤونة الفي الثلاجة كان كايس ملح وبهار وحيث أنني جاهل بطبوغرافيا المنطقة شديت سلك فإذ بمن ترفع السماعة خالتي (وهي في الحقيقة كذلك وأم زوجتي)، قالت شنو يا ولدي الخفة دي هسة ما كنت بتتكلم معاها ما تشد حيلك؟؟ قلت والله لا جرسة لا حاجة بس كنت حأسأل عن محل الملح،،، ضحكت وقالت لي كان إفترضت كواستو صعبة في المطبخ، مُش أرخص تشتري جديد بدل المكالمة الخارجية، غايتو نجدتني بنيتي وقالعتها في السماعة …
    غايتو العشرة ما تهون إلا على أولاد الحرام …
    وكل التحية لمن يمرقونها ويعبرون عنها كي يعطوا العواطفات نذراً يسيراً عرفاناً لكثير عطائهن وصبرهن.

  29. ابكرون كتب:

    مخير يا امير المهدية الأشوس :
    هههههه ضحكتني بقصة الملح دي ….لكن والله انت ما جلسرين دي حالة فازلين عديل كده….في ناس (لا لا ولالا ) طبخوا الحنه بدون زيت صندليه…لكن عفيت منها (ام القدح) بتاعتك …
    غايتو المسكينه سمسمه ولدنا دي كانت قرت الردحي ده يمكن تبطل الكورس ده

  30. مُخير كتب:

    ههههههة

    أبكرون الكلام جاب الكلام،،، لكني ما نسيت الملايقة بالحنة، يا ربي النار كانت مولعة بطلح ولا شاف؟؟، وعصيدة المُلاح يا تُرى كانت دلكة ولا موص ساكت؟؟ غايتو جنس الخلطات دي ناس الكيمياء ما درسوا تفاعلاتها ……

    أهة يا الخبير جرسلين أفليقا على فازليني كانوا في الشتاء، نان ما كعب التمسح الفي القيف والناس في عز الصيف … يا ربي أكون قاصد ناس شمباتي وسهيل ولا شنو ؟؟

  31. nono كتب:

    ثمثمه…..

    رحله موفقه ….

    تمشي تجي بالثلامة؟

    ابوحمودي شد حيلك ياود امي ماتجرس الوليه !!؟؟

    انت عارف قلبه رهيييييييييف؟؟

  32. سماسم كتب:

    سمسمة ثرو أفليقا
    ربنا يوصلك بالسلامة ياسمسمة وان شاء الله تجينا سالمة غانمة بلإذن الله وربنا يصبركم يا افليقا

  33. nono كتب:

    ثماثم…..

    حمدلله علي ثلامتك

    بركه علي الطله البهيه…..

    عقبالكم كده نسمع بيك في اي بعثه علمية خارج الامازون…..

  34. ياسين شمباتى كتب:

    مخير..يا ابو الملح انت,,والله قوية ما فاتك فيها الا (هناى) داك الما بجيب اسمو اللايق التقلية بالحنة!! استغفر الله..

  35. الغبشة كتب:

    السلااااام عليكم………………………..
    رنا يرجع سمسه بعد مايوصلها بالسلامه ويخلي ليك اجنة التلجة بتاعتك؟؟
    عمو السلاوى:اهيلن بيك نحن بخير بس شوية مشاغل ومشكور على وصية سمسه بس يارب ما تناسنا انا ود االزبير برضو قال داير

    شمباتى :تعرف افليقيا ده شكلو سمسمه تمشى بهنا ويعمل
    امى مسافره وحاعمل حفله
    بس ياريت ماتجيش على غفله………………

  36. مُخير كتب:

    الحبان سلام
    – يا خوانا الراجل أخونا (الصغير) طبعن ما بين القوسين يخص الكواشف فقط، جاء لعندينا وفك آخرو وفضفض تقوموا تشيلو حالو ، حتى أنت يا الغبشة ؟؟

    – بنتنا سمسمة خسمتك بالنبي أكان الجرسلين دي يجهجهك ويخليك تتراجعي، دي تداعيات عاطفية، أمشى لا قدام أبنية !!!

    – نضرع للعاطي الكريم يحشر حرائر دانقتنا في القفص البلاتيني ويمطرهن بوابل من الحموديين والسرويات عشان نعرف شكل الجرسلين الستاتي كيف !!!

  37. aflaiga كتب:

    اول يوم عزوبيه :
    امبارح طبعا فى المنام عفوا فى المطار !!! من اسى ؟؟ قمنا مشينا ودعنا سمسمه وانشاء الله ما اخر وداع – وخليت ناس النظافه بينشفو فى ارضية المطار من سيل دموع حموده وسرويو !! عفوا سروية وحمودى – معليش يا جماعه ما عارف مالى من امبارح لسانى انعقد !!!
    المهم انحكى ليكم اول يوم عزوبيه :
    الليل غايتو قضيناهو شيئ بى بى سى عربى وشيئ قران وشيئ فرجه فى الالبوم بتاع الصور من ايام الجكيس لحدى ايام الحنيس مرورا بايام التفعيص وايام التشريق السته ورمى الجمرات والوقوف بى مهله !! المهم الليل عدى لن يعود وجاء دورك يا صباح – اها صحينا الصباح لقيت حمودى جنب عبودى وسورية جنب افليقا ولخبته شديده وشفنا مااسى بعد النوم ما كان بى نظام وكراااسى !! اها قمنا من الصباح ودار الحوار التالى :
    عبودى : يا بابا انت ما عارف انو انا بشرب الشاى بالعيش مش بالبسكويت ؟؟
    سروية : يا بابا القصه بتاعة الشعر دى بى قدام مش بى ورا وبعدين يا باندا يا شريط ده شنو ده انت ما بتعرف ولا شنو ؟؟
    حمودى : الليله الاربعاء يا بابا يعنى السندوتش فول وبيض مش مربى وطحنيه والقروش الف مش خمسميه انت وين ماما تجى تريحنا من اللخبته دى ؟؟؟
    افليقا : يا سرويه شوفى لى البنطلون البنى والفنله الرماديه عبودى جيب الشبط ده حمودى شوف لى الانسولين وين ؟؟ ديل شنو انتو ما بتعرفو حاجات بابا وين ؟؟؟
    —-
    وده كلو طبعا حاجات ماديه ناهيك عن الحاجات المعنويه غايتو يا سمسمه كنتى ماسكه بلاوى الله يجيبك بالسلامه ..
    فى ركن بعيد كانت تجلس ام سمسمه وهى تبتسم منتشية باللخمه الفيها الراجل وكادت ان تهتف ( سمسمه سمسمه حتى القبر ) على وزن ثوره ثوره حتى النصر ..
    غايتو الناس دى بتسوى فى جنس حركات !!!
    ولسه اول يوم ما انتهى تقول لى الصين فيها حصين ؟؟؟

  38. سماسم كتب:

    اهههههههههههههههههههههههههههههههههههايه
    أبشر يا افليقا دي المناظر لسه الفلم ما بدا انا موش دعيت ليك قلت ليك الله يصبركم عشان جنس اللخمة دي
    ربنا يرجعها ليكم بالسلامة وما يفرقكم من بعض

  39. aflaiga كتب:

    سماسم : ومتكيفه كده مالك عندك نيه تورى ابو العيال حركه حركتين زى ديل ولا شنو ؟؟ غايتو بدون ما توريهو انا ممكن اكلمو ومافى داعى للسفر !!!
    ذكرتينى واحد بتاع تاكسى وقفوهو اتنين عتاوله نص الليل :
    الجماعه : يا عمك ماشين مشوار القماير كيف معاك ؟؟
    التكاسى : يا جماعه مافى داعى نخسر بنزين ومشوار دقونى هنا وشيلو قروشكم !!!!!!!!!!!1
    اها يا سماسم : ابو العيال دقوهو هنا وشيلو العاوزينو مافى داعى للسفر ..

  40. حاج أحمد السلاوى كتب:

    الدينمو ..أفليقا ..سلام
    سؤال سغيروووونى كدا …كورس سمسمة دا مدته كام سنة ؟.

  41. aflaiga كتب:

    السلاوى : كورس سمسمه ده شهر ونص ؟؟ اتخيل ؟؟ يوم ونص الواحد بقى اه ونص !!!
    صديقى س كانت زوجته فى مرحلة الوحم قامت صحتو نص الليل :
    هى : عاين يا راجل انا عاوزه لى كبدة جمل اسى دى ..
    هو : يا سلاااام ياخى طيب ما بالمره اجيب ليك معاها قزازة ؟؟؟

  42. حاج أحمد السلاوى كتب:

    أفليقا ..
    عاوز أعرف ..بس كيف بقيت اه ونص ؟

  43. حاج أحمد السلاوى كتب:

    أقصد واحد وخمسين ونص .

  44. البشاوى كتب:

    ياربى — دة ابو الافلاق ولا مهند ؟؟؟؟ انا مالى برة الشبكة — صلح الانتينا يا استرايكر وخلى سهيل يراجع السلك

  45. البشاوى كتب:

    ياربى — دة ابو الافلاق ولا مهند ؟؟؟؟ انا مالى برة الشبكة — صلح الانتينا يا استرايكر وخلى سهيل يراجع السلك – ابكرون رسل البطاطين والكستور بقى علينا تلج زى التلج وبرد كمان– شفتو الوقود النووى بيعمل ايه؟؟؟

  46. ابكرون كتب:

    البشاوي :زولك ده الظاهر استخدم القنبله الجيتو شايلنها لي الخميس الفات
    يكون اتمسح بيها….تكون حديجه وقعت من البلكونه ؟

  47. البشاوى كتب:

    ابكرون ؛ المهندس دة ماهندسة — لكن يا أبكرون أخوى فى زول عاقل بيجى شايل الصاطور يديهو الجزار فى يدو ويتكى ليهو رقبتو — دة شغل فلاشات ورتينزات قوية بشكل

  48. aflaiga كتب:

    البشاوى ابكرون : شكيتكم لى الله .. يسلط عليكم ( واحد مرتو مسافره ) غيرى لانو انا ما بقدر عليكم ؟؟

  49. محنك كتب:

    الحق يا دكتور شمباتى صاحبك دا ما فى ليه روشته

    حقا للمراة مكانتها التى لا يمكن ان يسدها الرجل

    لكن كمان ما يعصروا على الرجاله شوية

    فلاليقو …. هو صين ولا جلسرين

    عشان كده مرات نعمه يكونوا اتنين

  50. حاج أحمد السلاوى كتب:

    – أخونا محنك ..
    إنت ما عارف إنو أبو الأفلاق من الموحدين ؟ أبو الفلاق راجل وفى جدا وبيتوتى جداً.. ما زي جماعة أخواننا تانين عينهم طايرة ..وما يملاها إلأ التراب… غايتو أكان سمسمة قرت كلامك دا شيل شيلتك .
    – البشاوى ..سهيل يا جماعة خِفوا على الراجل دا شوية ..هو لسه ما طلع من صدمة سفر عواطفو ..واحد منكم شق عصا الطاعة وأعلن العصيان المدنى وغير المدنى.. والتانى لسه ما دخل بيت الطاعة .. وقاعد يزازى برة برة.. دا شنو دا ؟.
    – ألفكفك جدو ابكرونا .. خديجة دى تطير عيشتها ..هى مالها كل يوم واقعه من البلكونة ؟ عرسو ليها عشان تروق وتقعد فى الواطة .

  51. semsema كتب:

    salam likm kolkm asfa ashan alkitapa english
    thiati wa ashkor algamie
    lana awoda

  52. سماسم كتب:

    بركة بالطلة ياسمسمة كيف جو الصين معاك

  53. الغبشة كتب:

    بركه الوصلتى طيبه ربنا يرجعك بالسلامه وما تنسى الحصيييييين

  54. الزهراء كتب:

    سمسمه العزيزه
    حمدا لله على سلامة وصولك للصين- والبلد اظلمت بمغادرتك
    وربنا يرجعك لينا بالسلامه ولي سيد جرسه وللاعزاء سرويه وحمودي وعبودي
    كان عارفه كان جيت سقت سرويه معاي البيت عشان سيد جرسه يتجرس كويس ونخليهم عزابه براهم.

    الاخ افليقا- ربنا يصبرك خلي بالك من شغل البيت كويس واحرس العقاب حتى رجوع سمسمه بسلام باذن الله
    ربنا يخليكم ويحفظكم

    الجماعه الحاسدين ديل ما تشتغلوا بيهم كتير ناس عمو ……. يا سمسمه

  55. ود المهدي كتب:

    شباب : حين اخطرتنى سمسه بانها ستذهب فى كورس بعد فتره الى الصين منذ ذلك الوقت وانا لافي صينيه
    تعرفوا يا شباب افليقا دا راجل حساس بطبعة والكلام دا كلة (جرسلين وكسير تلج) وهلم جرا الكلام دا كلة عشان سمسمة تمشي مطمئنة وتقدر علي الغربة والوحده هناك في الصين وطبعا افليقا هنا معاه بقية الاسره وناس حمودي وسروية وعبودي ما ح يخلو ليه فرقة عشان يحس بالفرقة والغربة والوحشة – لكن المسكينة في الصين ح تلقي الوضع صاني صنة شديدة ومافي برنامج بعد الشغل زي هنا – وهو حب يواسيها ويديها (مورال سبورت) ولا شنو يا عبدو؟
    عودا حميدا انشاء الله

  56. ياسين شمباتى كتب:

    محنك..زولك دا داير ليهو فكى كااااارب,يعرف البيهو والعليهو..بس ما تطلع حركات مكاتب وكدة!!

  57. سماسم كتب:

    تاني عملتيها يا سمسمة؟؟؟؟؟؟؟؟؟؟؟؟؟؟؟؟؟؟؟؟؟
    ربنا يرجعك بالسلامة

  58. AFLAIGA كتب:

    سماسم : لكن لقيتك حفاره جنس حفرى اسى يعنى لازم تجددى المواجع ما تخليها مستوره ..
    تعرفى مشى الصين تلات مرات ورا بعض عقوبتو شنو ؟؟؟ اقول ليك اساسا المره عندها تلاته تلاتات فى كل المجالات – والراجل عندو اربعه اربعات فى كل المجالات ولا شنو يا بشاوى ؟؟؟

  59. AFLAIGA كتب:

    شفتو بركات مشية سمسمه اليوم تم اختيارى فى قرعة الحج الجماعى فى المؤسسه يعنى افليقا انشاء الله حيبقى حاج افليقا دعواتكم ويا ناس السعوديه جاكم افليقا سخسيا انكربو – شمباتى جهز القزاز – سلاوى جهز الناس العزاز …ههههههه شفتو ليكم نية حج زى دى ؟؟؟
    اللهم باعد بينا وبين خطايانا والهمنا حجا مبرورا يا رب ..
    بشاوى : اوع تقول لى دى بركات ابو الانفاس ؟؟؟ دى بركات ابو الاسمام ..

  60. طارق أب أحمد كتب:

    Simsima
    教育问,即使在中国
    在中国使用的空置时间学习自卫战斗技巧
    你不能相信这个人
    哈吉 Aflaiga

    الترجمه
    سمسمه
    أطلبى العلم ولو فى الصين
    أستفيدى من أوقات فراغك لتعلم تقنيات الدفاع عن النفس الكاراتيه
    الحاج دا ما مضمون
    حاج أفليقا
    مبروك الحج

  61. حنين كتب:

    أفليقا .سلامات .
    لكن قرعه الحج دة دايرا ليها بوست براها ماتقرنا مع بوست ليهو تلاتة سنة .
    ياخى ربنا يتم ليك الحجة على خير والف مبروك

  62. AFLAIGA كتب:

    اب احمد :
    00–00–//////00011111
    يعنى بااااااالغت بالعربى ههههههه
    الدفاع عن النفس فى لغتنا انا وسمسمه يعنى الدفاع عنى لانو انا نفسها ( شفت كسير التلج ده كيف ) مبااالغه موش ؟؟؟ الله لا ودى ليك عزيز الصين ..
    حنين : ليك على اول ما نبدا الاجراءات انزل البوست على طول – اما بخصوص التلاته سنه فدا بكا قديييييييييم
    ابكرون : هاك دى عشان تياامن بكسير التلج :
    يا سمسمه ما قلنا لا كفاية البعاد
    شفتى الحصل فى المره ديك من غير ميعاد
    الدمع انساب زى مطر من مقلتى وحتى الولاد
    ببكو الفراق لمن حصل ضد المراد
    اصلو المراد جنبك نكون ما بنحمل اايمه البعاد
    افليقا صاين للعهود من دربو اصلا تب ما حاد
    كيف ما يصون والبيننا حاميهو الوداد
    كل يوم تغيبى الشوق بيذيد والشوق اليكى تملى ذاد ( ذاد دى توريه ) القريب اذداد والبعيد ذاد من ذواده
    سرويه كرهت قصتا ( دى برضو توريه ) القريب حكايتا والبعيد قصة تسريحة شعرا البقت وحده
    حمودى صار اخلاقو نتشه من الفراق
    عبودى راق لمن عرف انو الميعاد
    قرب يحين لى رجعتك
    لى بسمتك لى دخلتك
    يا امنا ما للعيال بل كلنا
    يا امنا يا حضن دافى يضمنا
    لو قلنا ما اشتقنا ليك بلا يخمنا
    هههههههه ابكرون مرارتك بتكون انفقعت مش ؟؟؟ اها دى بمقياس كم ريختر ثلجى ؟؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s