إنفلونزا الحريم ؟؟

Posted: الثلاثاء,22 ديسمبر, 2009 by البشاوى in اخرى

أكاد أشك فى نفسى — لأنى أشك فيك وأنت منى !!!!
الغيرة من طباع عواطف الملازمة لها منذ يدء الخليقة لا أدرى من أين ورثنها لأن أمنا حواء لم تجد عواطف غيرها لتغار منها – ولكن يبدو إن الغيرة هذه من الصفات التى تطورت تلقائيا وتحورت داخل الجينات الوراثية لعواطف وتسربت عبر أجيال النساء وصارت تشتعل نارا تحرق أحيانا وجليدا يقتل الاحساس أحيانا أخرى —
ولقد بان أثر الغيرة فى الحياة اللإجتماعية وشكل متلازمة توائمت مع قصص الحب والريد فى كل المجتمعات البدوية منها والمتحضرة ونتج عن هذا الحضور القوى كثير من التراث الأدبى نثرا كان أو شعرا ويقول البعض ان الغيرة هى الوقود الذى يحرًك الركود فى العواطف وكثيرون أو كثيرات يشتكون من عدم توفر الغيرة عند المحب وغيرهم يشكو عكس ذلك – إنها توازنات نفسية لابد منها فى أى مجتمع فهى ظاهرة تحتمل القبول أو االرفض – ولا أعتقد أنها مشكلة أو مصيبة فى صورتها المعقولة والتى تعطى احساسا بأن المحب لمن يحب مريد ولكن آه —- وأه من هذه الآه إن انقلبت تلك الغيرة إلى شك فى من نحب !

 إنها سوف تكون مصيبة بل كارثة تقضى على الأخضر واليابس ولاتترك مجالا لعودة الحياة لطبيعتها أيا كانت الحلول وبهذا تصير مرضا عصى العلاج ودواءه فراق بائن وهذا أفضل من الوقوع فى المحظور والجريمة – كم سمعنا وقرأنا عن جرائم أرتكبت بسبب الشك بين الأزواج – قتل صريح وآخر غير صريح – وأمراض السكتة الدماغية والقلبية تصيب المشكوك فيه مؤدية حتما إلى هلاكه أوعلى الأقل إلى إصابته بعاهة – وأخف سلبيات الشك لجوء المشكوك فيه إلى إدمان مغيبات العقل من خمر ومخدرات أو الذهاب مباشرة إلى الوقوع فى الحرام (– ماهو أصلا مشكوك فيهو فرقت إيه يعنى مايعمل أى حاجة ويخلى الشاكى دة يشك بى صحو -)
إن الامر سيان عند سعيد أو عواطف – ربما الجانى سعيد أو الجانية عواطف – أعلم أن الكل أو البعض لديه مخزون جيد من الشعر أو النثر تغطى هذا الموضوع —
كسرة ؛–
سمعت فى الانباء عن جهود يبذلها علماء لمعالجة الخلايا الجذعية لإستخراج حيوانات منوية تمكًن النساء من الحمل والولادة بدون الحوجة للرجال – تخيلو عالم خال من الرجال – نحنا حنصيع ولا إيه ؟؟؟

Advertisements
تعليقات
  1. ابكرون كتب:

    يا بش ياخ : هو موضوع ناس عواطف مع سعيد بس حمل وولاده ؟؟؟؟؟؟؟
    ناس عطوفه ديل عايزييييين سعيد ذااااتو (لا بريدك لا بحمل بلااااك)

  2. حكاية كتب:

    عواطف غيرتها لشخص بالنسبه لها هو الكل فى الكل بمعنى الديمومه لكن سعيد الغيره لانه الرجل ويحلل له ان يتزوج كما يشاء الغيره من اجل الغيره لكن عواطف غيرتها تصبح حب تملك ولا اتفق مع الطرفان
    الغيره لابد من اتكون من اجل الحب وحمايه مملكه الاسرة واذا اصبحت فى طور الشك ودخل خيط بسيط من الشكك اصبحت الاسرة فى اعصار وضغط يؤدى للطلاق
    البشاوى من هو الاشطر فى القبض على الطرف التانى الذى يلعب بديله عواطف اما سعيد اما الجيران ام الشمشارين ام شركات الاتصالات
    اما ماسمعته فى الاخبار لم نسمعه ولا نريد واتمنى ان اعرف لماذا يبحثون عن المستحيل كل مكلف بتكليف ولقد خلقنا الانسان فى احسن تقويم
    لنا عودة

  3. ابكرون كتب:

    يا بش تاني انا ياهون دي :عشان ناس عطوفه ما يفهمونا غلط بحمل الاخيره دي ما الحمل المعروف داااك وبلااااك دي ما معناها من البلاء اوالبل… ولا بلاااك بيري ….ويعني المثل (القط السيامي بريد خانقو) ما عايز اقحم الحيوان البلهث داك (ان حملت عليه يلهث) ….اااااخ تاني الحمل ده جا ….طيب سلاااام

  4. محنك كتب:

    الرجل لانه يحل له الزواج باربعة لذلك تتولد الغيرة من المراة على زوجها
    لانه سيد المملكة

    لذلك الغيرة طبيعية عنها

    ونحن ايضا نغير عليهن …. ونريد لهن الحفظ والصون وقد كانت غيره سيدنا سعد ابن معاذ مشهورة وقيل اذا ركبت احدى نسئه بعيرا عقره لكى لا يركبه احدا بعدها … وقال بعد نزول اية شهود الزنا … لو فيما ما معناه ساضربنه بالسيف غير مصفح …. اانتظر حتى آتى باربعة شهود …

    وحينها ايضا رد المصطفى بمعنى اتعجبون من غيرة سعد فالله اغير وانا اغير منه

    فالرجال يغيرون على نسائهم وحريمهم ( من هن محارم له ) . وهى محموده فى حدود وايضا روى عنه فى ما يخص امنا عائشة ( غارت امكم ) .

    ولها حدود

  5. ابوالمنذر كتب:

    الاحباب سلام
    واحد شريكو فى الشغل ضربو وهرب , اتعتع ولملم اطرافو وبعد سنين رجع لى مركزو المالى تانى ,ومنها كره الشراكه اكان ذكيه وله غبيه وقال :من كتر ماكرهت الشراكه لو لاقى مرتى ما تشاركنى فى الاولاد
    اهه دحين يا البشاوى بعد المشروع بتاع انفراد عواطف بافراد الاسره حا تظهر شركات تسويق للاسر الجاهزه وبدل نفاسه ومصاريف تدفع مره واحده ليها بى بهمه وتعرس الليله وبكره توزع كروت عرس بتك الكبيره .
    ودالزبير ..
    وين يااخونا قولتى سادومبا جوه الطرمبه والوصيف واقف لمبه
    عمنا السلاوى …
    عودا حميدا واجازه طيبه بين الاهل والعشيره وشكرا للاتصال والسوال لك الود حتى الثماله

  6. محنك كتب:

    وغيرة المراة تعجب الرجل … وقد يكرمها ويتخلى عن ما يثير غيرتها … وكذلك غيرة الرجل تعجب عواطفه وتاتمر بامره الناتج عن الغيرة … وهى مبتهجه …

    مو كدى

  7. البشاوى كتب:

    ابكرون – العلم دة ماكان يتطور من زماااااان كنا شفنا لينا شراكات مالية ولا اى شغلة تانى بدل توم اند جيرى الكلها جرى
    حكاية — لكم الشكر على المرور الراقى واوافق لو كانت غيرة فى الحد المعقول ليها اثر ايجابى
    محنك– آآآآآى غيرةالمرأة تعجب الرجل -بس لما تكون خالية من الترصد والتخيل والوهم
    ابو المنذر– اها زولك شريكو ضربو وشرد ونحنا شركانا زى ناس الحكومة يضربو فينا وينقنقو فينا وعينهم قوية ومصاقرننا يحلنا الحلا بلة

  8. علي سنكل كتب:

    البشاوي دايماً جايب لينا سيرة البحر الله يسامحك.
    الغيره ( وخلونا نحصر كلامنا كما أراد صاحب البوست في غيرة عواطف وسعيد ) إحساس وشعور في حد ذاته نبيل ويدل على الحب بل هو من المؤشرات الهامه للحب. فأنت تعرف نفسك بتحب عواطف كيف؟ ما هو لمان تشعر بالغيره عليها إذا ضحكت أو ابتسمت لسعيد آخر غيرك فتقوم القيامي وتعرف نفسك وقعت ، فهي في حد ذاتها حاجه كويسه.
    لكن عينك ما تشوف إلا نور لمان تذداد حبه عن الحد وبالذات عند عواطف ، وكمان تساعدها بشوية نقه ، تنقلب الحياه إلى جحيم.

    آخر ما يموت من الرجل قلبه وآخر ما يموت من المرأة لسانها.

  9. البشاوى كتب:

    هو ياسنكل اخوى نحناماجوة البحر البخلى سيرتو ماتجى شنو ؟كدى خلى ابكرون يقول غير كلامى دة

  10. علي سنكل كتب:

    تنقي . . تنقي طول الليل تغالتي الزول في إسم أمو
    وشايلا الدنيا فوق راسك تفوتي الرادي في نضمو
    كلامك كولو في فارغات
    توب لبني معاهو تطقمي النعلات

    وفي ناس عشه جابو ليهم
    ملايات بمبي كاروهات
    و في جيب لينا لمان ترجع
    و أنا اتوجع

    تنقي . . تنقي طول الليل تغالتي الزول في إسم أمو

    مع الاعتذار لكافة حرائرنا في المدونة.

  11. ابكرون كتب:

    وتجيك يا سنكل في المنام وتقول : اغالط نقتي باصرار واقول يمكن انا الما نقيت

  12. حكاية كتب:

    http://vb.eqla3.com/showthread.php?t=420577
    ياريت يا جماعه تشوفو الموقع ده وشوفو الجماعه ديل بتمهزلوا بينا ولا بشكرونا
    فيه نوع من المحقره بعد ما تشوفوه ورونى رايكم شنو
    دمتم

  13. ابكرون كتب:

    حكاية :
    اتطلعت علي الموقع بتاع شوية العيال الصيع والمؤسف ان كاتبة الموضوع السياحي عن السودان سودانية تستهزأ بوطنها وبني وطنها بين مجموعة من المساطيل السعوديين وتستخدم صور ناس معروفين كمنى ابوزيد وغيرها وتطلق عليها اسماء لزوم خفة الدم والقهقهة……وعلق احد اصحابها عي صورة احد هم قائلا : هل هو قرد ام انسان ؟ ارجو ممن يمسه هذا الاستهزاء والسخرية بوطنه وبنيه ان يتسجل في الموقع ويرد علي هذه السودانية المتسعودة ….وساسجل نفسي ويلا بينا……..

  14. التلب كتب:

    سلام للكل
    حكاية و ابكرون:
    ما أكثر السودانيون المتسعودون، للأسف هم ابنآونا نشأوا في تلك البلاد، الأب سوداني و الأم سودانية لا يرغبان بالعودة مجددا إلى السودان يجتهدان في شتيمة و إساءة بلدهم السودان صباحا و مساء أمام الأبناء فماذا نتوقع من هولاء الأبناء ؟؟ بالله عليكم من المُلام؟ الأبناء أم الأباء؟ حسبنا الله و نعم الوكيل.

  15. البشاوى كتب:

    سنكل— ابكرون
    تغالتى الزول فى اسم امو
    يغلى يكابد الويلات يفور دمو
    وتبقى حياتو زى كابوس يفر منو
    يتاتى يلاهى بالصالحين — يكون دروش – سجم خشمو
    وتانى البيت بقالو سجن اخير عدمو
    وكل اخواتك التانيات والرايحات والجايات والطاشات
    يكونن ليهو زى امو

  16. حكاية كتب:

    صباح الخير
    شكرا ليك ابكرون والتلب انكم اطلعتوا على الرابط بالجد حاجه مؤسفه
    لو بعرف بشتركوا كيف كان نزلت الموضوع واستطلعنا عن الناس البعملوا كده
    حتى لو مافى و طنيه الواحد مابعمل كده
    ويا ابكرون لينا موعد مع اخرين وان شاء الله نلقى ليهم حل ونتصد ليهم
    ممكن اكون ما مع الحكومه لكن بلدى فى المرتبه الاولى
    بعدين شفتوا المسخره زولات سبحان الله زول كلمه عربيه فصحى واندثرت —هسع المفروض يتكلم عربى تمام احنا ولا هم (البقولوا للكيس زمبيل )فتشوها لى فى اللغه العربيه
    تانى حاجه بعض الصور اصلا ماسودانيه لاماكن ومناطق تانيه

  17. حاج أحمد السلاوى كتب:

    أخونا الكاشف الصغير البشاوى ..
    سؤال سغيروووونى كدا ..أنفلونزا الحريم دى علاجها شنو ؟
    أوعك تقول جيب التانية ( عرس تانى ) ..
    الغريبة لسه فى ناس بتعرس وتنبسط ..زى ما قال الفنان الكابلى .

  18. البشاوى كتب:

    حبيبنا السلاوى
    ليس لها علاج واضح – لكن على المصاب عمل احتياطى استراتيجى بحجز صينية وهيطة ومسورة بدرابزين متين خوفا من يجييهو هايس داخل الصينية فى لحظات العلاج الطبيعى الصيناوى

  19. ياسين شمباتى كتب:

    الحبيب البشاوى..سلام وبركة بالطلة..

    شكلك اتعصرت لمن طلعت لينا بعد عينا طلعت ورا شوقك…

    والله دى الانفلونزا الما عندها دوا,,بس ممكن تتوقى منها بالابتعاد عن المهيج,,زيى كدة!! بس الى امد قريب….

    خليك قريب……

  20. سماسم كتب:

    سلام للجميع
    الجابركم شنو؟؟؟؟؟؟؟؟؟؟؟؟؟؟
    التسوي بايدك يغلب أجاويدك

  21. محنك كتب:

    الجابر سعيد وعواطف على انفلونزتيهما

    الدنيا دى ما بتبقا الا باجتماعهما على توافق
    الحياة تكون مرة اذا تباغضا

    واهم شئ ….. الوليدات

  22. حكاية كتب:

    ياجماعه معليش طالعه بره الموضوع لكن الكلام غلبنى
    هابى نيو يير الفوق دى جميله خاصه مع التلوج النازله —سؤال سغيرووووووونى للسلاوى قصه التلج الهنا و الفى دعاية سودانى دى شنو لمن زاتى صدقت اننا بقينا بتاعين تلج وجليد بس اوعى من كسير التلج………..
    كل سنه وانتو طيبين

  23. مستر راعى كتب:

    مساء الخير
    جيت يادوب داخل من رحله فى الخلا
    البشاوى قلت سعيد وعواطف مالهم ؟؟؟؟؟؟؟؟؟؟؟؟؟
    البعرفوا عواطف كرهت سعيد وسعيد كره عواطف
    عواطف غيوره وسعيد عينه زايغه
    عواطف عندها انفلونزا وسعيد عنده جنون البقر
    عواطف شغاله تنق وسعيد شغال يطبل
    عواطف اطلعى من حياة سعيد
    سعيد ارجع لامك
    عواطف خلى سعيد فى حاله
    سعيد ماتتدخل فى حياة عواطف
    سعيد وعواطف حاليا فى مستشفى الامراض النفسيه لانه عواطف مافاهمه سعيد لانه سعيد اتضح مابسمع

  24. حكاية كتب:

    يامستر معليش غبرت الحته
    اتنفض بره وتعال البيت نضيف
    ده كلام عواطف

  25. حاج أحمد السلاوى كتب:

    بتنا حكاية ..سلام
    دعاية سودانى المليانة جليد دى أنا ما قادر افهم بيقصدوا بيها شنو بالضبط ..بمكن تكون دى ثامن المستحيلات البقولوا عليها؟ جايز ..وكل شى وارد .
    -أما التلج الفوق دا (ترويسة ساخر سبيل ) نطلب من ولدنا سترايكر إنو يزود التلج شوبة عشان نعرف نكسره بصورة افضل .. مش كدا يا .. فكفك أبكرونا؟
    – كلماتك جميلة يا مستر راعى ..بس عاوز أعرف إنت راعى شنو؟ومسئول عن ياتو رعية ؟
    – ولدنا شمباتى .. قرب تعال لا تبتعد..وإنت شيتن ما جربته ولا ضقته شن عرفك بيهو ..؟ وعواطف ياها عواطف وسعيد ياهو سعيد وما فى شى حيتغير والكواشف كووووولهم عارفين لا نحنا بنبقا براهم ولا هم بيبقوا برانا..وسيك سيك معلق فيك..
    كلامى صاح ..ولاّّ فى محلو ؟ وسجن سجن.. وكسير تلج كسير تلج.

  26. محنك كتب:

    حاج احمد نهارك سعيد
    وكل الشباب

    يعنى يا حاج الما بكسر التلج ببقى براهن

    يا اخوى مافى حل غير سعيد وعواطف يكونوا فى بيت …. بعد داك انفلونزا صداع حمى كلو بجى وكل زوول حسب تحملوا …. او بندوله …. او حتى دكتور … بس يا يتحمل الانفلونزات … يا اما العزوبية التى هى كل الامراض واس الامراض … على الاقل سعيد وعواطف ليهم الف حل … بالتراضى او تنازل طرف او دخول الاجاويد …. لكن الشر ( العزوبية ) دا حلو وين الا عند عواطف

  27. خالد مدني كتب:

    البشاوي والاخرين سلاااام وحب شديد…
    علاقة سعيد وعواطف دي من اعقد المعادلات الكيميائية والفيزيائية كمان لانو عدد العناصر الداخلة فيها كبير جدا جدا … سعيد وتاريخو الذكوري وامو واخواتو واصحابو واولاد حلتو والجكس القديم داك من جهة وعواطف وامها اخواتها وصاحباتها وخالاتها وعماتها والخ من جهة اخري … فهل يستطيع زواج عاقل احتمال كل هؤلاء في بيت واحد ؟
    لكن بعجبني حاج السلاوي … ما حصل يوم فرنب او عنكب طوالي رافع الراية البيضاء وماشي جنب الحيطة لكن يا عواطفو ختي في بالك انو ده النوع الممكن يقلبها في بطن ليل … وللا ما كده .

  28. حاج أحمد السلاوى كتب:

    ولدنا ودالمدنى ..
    فشر نرفع الراية البيضاء ولا نمشى جنب الحيطة..نحنا ماشين وسط الشارع ..وعواطفنا زااااتها عارفة الكلام دا..وسيبك من كلام الفكفك القاعد هناك فى الدوحة ..

  29. حكاية كتب:

    صباح الخير
    قلنا نعاين لقيت نفس الموضوع خلاص ياجماعه السيد والسيدة ديل اخدوا حقهم
    شوف لينا شئ تانى يامسئول المدونه بشتركوا كيف فى المواضيع ورونى عشان تانى حابقى ليكم جريده حائطية
    السلاوى التلج ده ليمهو لينا للصيف الوقت حاليا زاتو مامفهوم شنو لا لامى شتا لا ربيع لا صيف جوطه
    عواطف وسعيد استهدوا بالله ويا دار مادخلك شر هسع خليتونا نندخل فى خصوصياتكم ساى

  30. حكاية كتب:

    يا السلاوى مدخلاك واسطه خير دايره اشترك فى منبر استاذنا جبرا لكن كيف؟؟ يعنى حرام استاذنا يعلق براهو دايرين نخش مداخلات معاهو اهو هسع بهناك معلق 7 مرات ماممكن لازم نقيف معاهو ولا شنو ياالبشاوى
    معليش ياجماعه داخلين على طول بدون اشارة

  31. Admin كتب:

    حكاية : راجع الايميل مرة اخرى .

  32. ســـلام شيبا وشبابا …. يادفعة انت تغيب تغيب ولما ترجع تكتب عن عواطف والغيرة شنو الحكاية كان محجور عليك ولا شنو ؟ …… ياخ الغيرة الغيرة دى اجمل منها مافى بس فى حدود مالدرجة انها تخليهن يكوسن نلقيح صناعى …. جاى مستعجل هسع بعدين النشوف اولها … لكم اتحايا والاشواق

  33. البشاوى كتب:

    مستر راعى — رحلة الخلا الكنت فيها دى بغرض الصيد ولا اجراء بحوث – ولا بى فهم الخلا ولا الرفيق الفسل ؟؟؟
    عموما ريحتنى للاخر بى تعليقك الكتبتو دة ودة الكلام الفيهو الفايدة – اكيد بعد دة حأطلع رحلة خلوية
    السلاوى ؛ أجب بصراحة – ود المدنى قاصد شنو ؟ وكمان رفع الراية البيضاء ولا اللونا لون زينب مابيحلك ولو جبت فندك وهرست التلج هرس برضو مابيحلك — خلى الشمباتى فى الطراوة شوية
    شمباتى لك الحب ياعزيزى دى ماعصرة شخصية لكن الاستهداف الواضح لقبيلة سعيد من قبيلة عواطف (يعنى شئ عام ) دفعنى لهذا الكلام
    حكاية — ماتتحسسى ساكت دى ماخصوصيات بل عموميات والكتابة هنا تنفيس عن ضغوط سياسية واجتماعية واقتصادية او اضافات علمية وثقافية – وقولى الدايرة تقوليهو بلا تردد —
    ود المدنى – امانة ماك خبرة – عفيت منك
    افليقا وين ياجماعة –
    ود ابراهيم – انت ضقت قرصة الدبيب خايف من مجر الحبل ؟؟؟؟

  34. الطاهر كرجة كتب:

    حكاية العالم دي بدون رجال كان حصلت الضحك شرطنا ده كلام عجيب في زمن اعجب

  35. ودالزبير كتب:

    بشه وضيوفه سلام

    قريت ليك قصه طريفه قلت أحكيها ليكم بعد إضافه التوم والشمار

    قال ليك في نجار عجوز عنده منشار حديد وقاعد يقطع في خشب جنب النهر أها قوم يا المنشار وقع من الراجل في النهر وقف صاحبنا متحير لحدي ما طلعت من النهر حوريه جميله شقراء قالت ليهو مالك يا عمو ؟؟ قال ليها المنشار بتاعي وقع في النهر قالت ليهو ولا يهمك هسه بيجبوا ليك قامت غطست وطلعت بمنشار برونز قام سألت عمك ده منشارك قام عمك قال ليها لا ده ماهو قامت غطست وجات راجعها بواحد فضه وبرضو عمك قال ده ما حقو وفي المره التالته جاءت بمنشار دهب وعمك مصر إنو ده ما منشاره لحدي في المره الرابعه جابت منشار عمك الحديد المصدئ قام عمك فرح وقال ليها ده منشاري فقامت غطست وجابت التلاته مناشير ديك البرونز والفضه والدهب وقالت لعمك دي هديه عشان أمانتك عمك شال الهديه ومشي وبعد فتره كان مع زوجته في مركب في نفس النهر قامت موجه رمت زوجته في النهر فظهرت الحوريه وقالت ليهو ما عندك مشكله هسه بجيبها ليك غطست وطلعت شايله هيفاء وهبي قالت لعمك دي مرتك قام عمك قال ليها أيوه ياها زاتها قامت قالت ليهو يخس عليك يا عمو ليها تكضب علي دي ما مرتك فقام قال ليها يا بتي والله خفت تغطس تاني تجيبي أليسا أقول ليك ما هي تغطسي تجيبي نانسي عجرم أها لمن المره الرابعه تجيبي مرتي وتقومي تديني التالته ديل هديه ما بعرف أقبل بيهم وين وأنا زول صحتي على قدري فقلت أخد الموضوع من آخره وأقنع بهيفاء دي ومرتي أتمنى ليها ليله سعيده مع التماسيح ..

  36. عبدالرحمن أحمد كتب:

    جمعه مباركه…………….
    سعيد وعواطف قصتهم قصه واخرها لسه….
    سنه الحياه يا وللا ما كده جدو السلاوي
    نحن غايتو لسه ما عقدنا شراكه مع عواطف الموضوع باين عليه كبير يا البشاوي

  37. aflaiga كتب:

    يا بيشو سلام عليك :
    طبعا انا سمسمه محذرانى قبل ما تسافر ما اخش حتات مشبوهه زى دى وانا زول بحافظ على الوصيه عشان كده ما خشيت من يوم سافرت اى حته مشبوهه !!!
    اها لكن كلام ود الزبير ده جاب الكلام :
    وانا ماشى فى شارع البرلمان جنب العماره المهجوره مرقت لى جنيه :
    الجنيه : افليقا مالك ماشى زعلان وسرحان كده ؟؟
    افليقا : والله يا جنيه من سمسمه سافرت وانا كده .
    الجنيه : ما تزعل لو عاوز اجيبا ليك اسى ممكن اجيبا ليك من الصين .
    افليقا : ما بتقصرى لكن انا المزعلنى فراق سمسمه لى امها فلو ممكن تشيلى امها توديها ليها الصين تكونى ما قصرتى كلو كلو ..
    الجنيه : بسم الله الرحمن الرحيم – وقومى يا الجنيه اختفى …………….
    ؟؟؟؟؟؟؟؟؟؟!!!!!!!!!!!!!!!؟؟؟؟؟؟؟؟؟؟؟!!!!!!!!!!!!

  38. سماسم كتب:

    صباح الخير

    مبالغة يا افليقا اتخلصت من سمسمة كمان عاوز تتخلص من امها

  39. semsema كتب:

    سماسم : حاسس بشوقي لامي طبعا

  40. لمى هلول كتب:

    احبائى الغاليين بساخر سبيل
    قبل ان تنطفىء شمعة العام الحالى احببت ان اسطر معكم بعضا من الكلمات
    سعدت جدا بالتواجد بينكم وكل م اوقعت عينى على بوست خرجت منه بالكثير الكثير
    ولا استطيع ان ابدى سعادتى بشىء وحيد وجدته هنا ارجو ان لا يفقد يوما من هنا
    وجدت ان ساخر سبيل يتميز بالحيادية التامة فى كل قضاياه مما يتيح لنا مكانا مريحا
    وشعورا بالفخر وتلمس الطريق ونحن نحاول الرد لاننا بين كلمات واحرف متمكنة
    وناضجة معصورة معتقة..
    هابى نيو ااير
    وميرى كريسماس
    وعيد استقلال مجيد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s