نبق, أسد ,تمر بلدى .

Posted: الأحد,3 يناير, 2010 by طارق أب أحمد in بيئية

حديث عابر إلتقطته سمعى كان مبعث فرح و حبور منقطع النظير
حديقة الحيوانات بحلة كوكو
((معقوله حلة كوكو فيها حديقة حيوانات))
و عادت بى الذاكره إلى أيام صبانا و تلكم الحديقه الوريفه بنسيمها العليل و الخضره المترفه و طبعا الحيوانات الجميله بكل أنواعها
و طفقت أتخيل مقدار سعاده بدر و بوبو و أحمد لرؤيتهم هذه الحيوانات التى لا يعرفوا عنها سوى الصوره المترسخه من أفلام الكرتون فى سبيستون
و كان الأعلان ((الجمعه الجايه بمناسبه اليوم الأول من السنه الأولى فى العقد التانى من القرن الأول من الألفيه التالته ماشين جنينة الحيوانات )) و أكيد لم تسع الفرحه قلوب الصغار وأنشغلت أفئدتهم و عقولهم بيوم الجمعه المرتقب يصاحبه شى من ريبه فراحوا يتساءلون بين الفينة و الأخرى ((بابا صحى مودينا جنينة الحيوانات , بابا فيها فيل , أسد , فيها قرد ))
و جاء اليوم الموعود و تسلح الاطفال بالنقه و الإلحاح على وجوب الخروج من الصباح
الحديقه
لافته ضخمه على جانب الشارع بكوكو خط عليها –
جامعة السودان للعلوم والتكنولوجيا – كلية الطب البيطرى – حديقة الحيوان حلة كوكو
أحساس بالسعاده, أخيرا هناك من يكترث. مدخل الحديقه به عدد من “درداقات ” النبق . نبق و لالوب فقط أين الفول السودانى و التسالى … بداخل الحديقه الوضع مختلف أولا هى ليست حديقة حيونات بقدر ماهى ميدان لبعض الحيونات ولكن لا بأس أن يكون لدينا ميدان لبعض الحيوانات خير من أن نلعن الظلام. لا يوجد بالحديقه سوى بعض ميادين منجله و مسوره بشجيرات الدمس كما لا توجد أشجار يستفاد من ظلها بل بضعة نخلات صارعن – كما نحن – للبقاء على قيد الحياه بينما أنهزمت أخريات و نكسن العنق نحو الأرض و أسلمن الروح
عند أول الأقفاص حكيت للصغار عن هذا القرد الذى لا يحترم النعمه و كيف أنه سخط لانه جلس على رغيف الخبز ثم الغزال و البومه البدون سبب مشؤومه و صقر الجديان الذى لم يعرفه جل المتلفين حوله ” عجبا ألم يجد من أستبدل شعارنا برمز أفضل من هذا “
ما أجمل الطاؤوس” سبحان الله” و هذا الغرنوق ألم يكن أفضل من الجديان
يا للهول أهذا أسد, لا أصدق !! الأسد يرقد على ( صفحته ) واضعا الكف و القدم الأعليين بين فتحات الأكسبندا يرقد تماما كما الخروف المذبوح بعد نفخه صغير الحجم ليس له شعر كما أعتدنا ان نراه , حتى الصغار لم يصدقوا أن هذا الشئ هو الأسد , حدثت نفسى ” أكيد هذا الأسد لاينتسب للمؤتمر الوطنى “

1.01.2010

ضبع يأكل النبق. النبق الذى يلقيه الأطفال تحرشا به صار غذاء له و لكن من أكل غذاء الضبع المخطط الذى جاع حتى أكل النبق.

1.01.10
ضب كبير , بلى أنه التمساح, هذا المسكين يرقد فى مستنقع ماء آسن لا يبدو من جسمه غير رأسه فى حجم ظهر كف صبى . باغته أحد الأشقياء بضربة طوبه مؤلمه فى قمة رأسه جعلته “يشتت” ألى ناحيه أخرى من المستنقع

1.01.10
أناكوندا – أصله يميل لونها من الرمادى للأسود ليست كما عهدناها صفراء مرقطه “خشيت أن أسأل فأتهم بالعنصريه “
بوبو أى نعم بنيتى أياك و ألأسئله التعسفيه!! دى يا جداده ربنا راضى عنها يا جملا ربنا سخطوا,,النعامه المسكينه من أفراط جوعها باتت لا تأبى أن تأكل فرع دمس أخضر من أيادى الأطفال الذين يلقموها الفروع الطويله خوفا على أيادهم الصغيره
أما كان حرى بذاك القمئ الذى يستزرع ذراع أرض من الرمل و الحصى و الصخر بين السكه الحديد و أسفلت الكبرى, نخلا مصيره الأنتكاس ,أما كان حرى به أن يترك الحيوانات و الحديقه بل و حتى النخل فى شأنهم ,, ألم يخبره أباه بقصة القرد
أواه ياليته و ياليتهم يعتبرون

About these ads
تعليقات
  1. ابكرون قال:

    اب احمد يا شفيف ازيك
    انت بجدك حديقة الحيوان دي ؟؟؟؟ما سمعنا بيها لا الجرايد جابتها لا التفل- زيون لا شئ يمكن خجلانين منها….ياخ كان توثق لينا اللافتة والمدخل وصور اكتر تسلم ….المره القادمه اذا مشيت وما اظن تمشي ……

  2. بضعة نخلات صارعن – كما نحن – للبقاء على قيد الحياه بينما أنهزمت أخريات و نكسن العنق نحو الأرض و أسلمن الروح

    برضو نخل……………..!!!

    عارف زمان القمئ القلت عليهو دا نادانا بعد ما عمل حيط تحت كبري القوات المسلحة قال عايز يعملهم مخازن لتموين الخرطوم يعني الود استفاد من الكبري كعرش…..

    قلنا ليهو دا كلام فارغ حيودي الكبري في داهية و كمان شغل مكلف لازم تعمل خرسانة في الأرضيات و ترفع البناء لحد الكبري …. في شنو ما الواطة قاعدة أمش كسر الاشلاقات دي و الا القيادة العامة الفي وسط البلد و سوي ليك مخازن………………. لم يسمع الكلام الى ان تبين الناس بعد ما شاتوه الغلط الذي ارتكبه…

    و ها هو يزرع قضيب السكة حديد و برضو بالنخل و قبلو الحديقة ……………..أأأأأأه من الحديقة

    التحية لي ناس البطري أو برضو محاولة يحمدوا عليها

  3. ألعزيز أب أحمد كل سنة وانت بالف خير …. الحديقة آنفة الذكر من أفكار دكتور أسامة عبدالوهاب الريس وكيل جامعة السودان سابقا ومدير مدينة أفريقيا التكنلوجية حاليا وقد فكر فيها كالمستشفى التعليمى لطلبة كلية الطب و الاستعاضه بها عن الحديقة البرج وماقصر بس للاسف عينوهو مدير للمدينة التكنلوجية قبل أن يتم رعايتها ومع أن الوكيل الحالى بمساعدة عميدة كلية البيطرة لم يقصرو الا أن اماكنياتهم محدودة وقد عاصرت الحديقة منذ أن كانت فكرة … وآخذ عليه جلب بعض الحيوانات من خارج القطر … الفكرة بصفة عامة مجدية ومفيدة خاصة وأنا أطفالنا لم يعد يدرون الفرق بين الأسد واللبوة …. تشكر اب احمد على التوثيق … مع التحايا

  4. حاج أحمد السلاوى قال:

    العزيز الكاشف الصغير أب أحمد ..سلام
    يا حليل حديقة الحيوانات القديمة اللى أصبحت برج زى بيضة النعام ..طبعن نحنا كنا نسكن على بعد خطوات من الحديقة العتيقة وكنا نسمع زئير الأسد الهصور ( مش زى الجرو القابع الآن فى الحديقة الجديدة ) مساءاً كل يوم واصوات بقية الحيوانات والطيور ..فعلاً كانت أصوات جميلة جداً وعندما أتذكرها الآ ن تصيبنى مغسة شديييييييدة ..
    وإذا الناس ( البنى آدمين ) ما لاقين ياكلوا معقول الحيوانات المسكينة دى يكونوا بيدوها أكل ..أنا خايف يكون الأسد بقا نباتى زى القرد ..يأكلوهو موز كل يوم ..
    عليكم الله يا جماعة الما خِرِب شنو..ولسه الدور ماشى على أى حاجة ..رياح التغيير كاسحة جد ..بس المشكلة للأسوأ …ولك الله يا وطنى الجريح ..إنت معاى … يا شمباتى ؟

  5. مستر راعى قال:

    يا جماعه جنينه الحيوانات دى لمن تحتاجوها يا تمشوا يوغندا يا القاهره تفرجوا عيالكم على الحيوانات لكن البلد دى بالرغم من انه فيها حديقه الدندر وفى كتاب الانجليزى صفحتين نقرى الشفع فيهم مكتوب (الدندر ناشيونال بارك )ماحاجه تضحك
    طبعا يوم الافتتاح استلفوا الاسد مابعرف من غابه منو وكم حيوان كده معاهم ورجعوهم بس تلاته يوم
    لمن كلمت اختى بموضوع الحديقه ساقت عيالها يتعرفوا على الحيوانات لزوم الفهم ولمن فتشت مالقت اسد عاينت للبوه وقالت لبتها ده الاسد قالت يا ماما لا والبت عمرها تلاته سنوات ياماما دى لبوه انتى ماعارفه
    شفتو الفضايح الواقعين فيها ——–
    بدون تعليق

  6. حاج أحمد السلاوى قال:

    أخونا النشيط مستر راعى ..
    حسه كدى خلينا من الأسد والنمر والقرد .. دى حاجات أصبحت فى ذمة التاريخ مع الحديقة العتيقة..
    عاوزين نتعرف عليك أكتر..عشان نعرف نتواصل معاك وأهم حاجة بالنسبة لينا القروب ..الموقع الجغرافى عرفناه من خلال مداخلاتك ..

  7. لمى هلول قال:

    سلامات
    بى جدكم ياجماعة
    بصراحة بالنسبة للحديقة القديمة القام مكاناه برج الفاتح ولا الحديقة بتاعة ابريل
    ماعارفه المهم زمان جدا جينا فى الخرطوم ومشيناها لكن لا اتزكر بالضبط ما احدثته فى نفسى فقد تاهت زكرها واصبحت مجرد اطياف تروح وتاتى ولكن فجعتى الحقيقية انا المره الكبيرة دى كانت يوم ما مشيت حديقة الحيوانات هنا فى الرياض …بصراحة ان اكنت موديه العيال لزوم هم المحتاجين يشوفوا الحاجات دى لكن لقيت نفسى انى انا المابعرف حاجه …وبصراحة لم استمتع جات على كدا فى الكبر دا وخفت عدييل لا حسيت بالالفة ولا حسيت بالحوجه للعلم بتلك الحيوانات وطبعا هذا راجع لكونى رايتها منذ طفولتى فى الصور فحينما رايت تلك الحيوانات لم استمتع شعرت بان الفارق كبيرا جدا وان هذه الاشياء مخيفة ربما للامر ارتباط نفاسنى من يومه اواناا استكشف منحنى شبه خطيير نفسى ..اما ما جعلنى اشعر بذلك كان الفيل بصراحة ما تخيلت ان الفيل بهذا الحجم ….
    واما تلك النعامة فايضا لم اتخيلها هكذا اما الحشرات والنمل والجراد وماشابهها فاحسست بانى وهى لانتفق بتاتا..
    اها رايكم شنو …
    اما العيال فلقيتهم لسه لحمة طرية قابلت للتفاهم
    وبكل سهولة اندمج عندهم الفرق …بل رايتهم يغنون اغنية الاخوان كوالاالتى يشاهدونها فى قناة براعم للاطفال من سن 3سنوات الى 6 نسبة لحيوان كوالا التى م اكنت القى له بالا الا باعتباره منظر ولم اكلف نفسى مشقة البحث من اى الفصائل هو ولكنى وجدتهم يقولون الكوالا -الكوالا-
    اما الصقور والحديات كما يسمونها اهلى فى سنكات فاحسست معها وكاننى فى زمن الديناصورات وقصة هابيل وقابيل والاساطير القديمة عن الطيور مثل العقاب والعنقاء التى كانت تخطف الاطفال كما زكر فى كتاب ا لمستطرف فى كل فن مستظرف ..
    هل ياترى احسستم باللوثة التى انا فيها لانى لم اتشرف برؤية جنينة حيوانات الا بعد ماشاب ودوه الكتاب
    اتمنى لكل اطفالنا الاذكياء جيل اليوم الواعى اكثر منا ان ينال ما يستحقه وان ترى عيونهم الصغيرة البريئىة كل شىء واى شىء ..
    تحياتى للمقال

  8. مستر راعى قال:

    يالسلاوى طوالى نتعرف
    اى حاجه انت دايرها احنا جاهزين ليك طوالى
    اول حاجه مبدئيا انا من جيل A
    متزوج واب لشفع كتار
    عدد الزوجات -واحده
    السكن-الخرطوم
    مكان العمل- متجول غير ثابت
    المهنه الاساسيه –راعى بس افرنجى( دى المهنه الاولى وانا طالب) –خريج كليه التجاره جامعه الفرع بالمساء
    الهوايات –القراءه والتعليق والسخريه (واحب موقع الفاتح جبرا كتير+عزيز نيسين وكل الساخرين )
    بكره -تفلزيون السودان واخبار عشره وخاصة كلمه الفعاليات وانجزنا وقمنا وسافرنا الخ الخ
    تانى مافى شى باقى الاسم
    مستر راعى

  9. يا جماعة نحن أمة نظريات ومظاهر … يا أخي أمشي السوق الشعبي وشوف الناس …القروش دي بلموها لي شنو؟ دي حديقة مجانية والله الأسيد الداير ين تستوردوه أرقى مننا .. الناس في شنو وإنتو في شنو…بالمناسبة الإخوة الحسانية أذكياء بس الناس ما فاهمين المثل:

    المك نمر إعتقد أنو أذكى منهم … وقدم مطالب تعسفية.. وعامل فيها ود قبيلة وكدى الجماعة زعلو وصروها ليهو… ويوم إحتاج لهيم عمك قدم تنازلات … لكن الجماعة حاولو يردوا الإهانة وقالوا ليه عندنا سباق حمير … يا ترى من أكثر ذكاءً النمر أم الأسد؟
    الشاطر يفهم وبلا لمة

  10. حاج أحمد السلاوى قال:

    الأخ / الإبن العزيز صديق محمد محمد يحى الفولانى ..سلام
    أرجو أن تعذرنى .. لأنى بصراحة كدا أنا طلعت غير شاطر وما قدرت افهم شى من مداخلتك الأخيرة أعلاه ..فهلا تفضلت على وشرحت لى إنت قاصد شنو بالضبط ؟ معليش نحنا الكواشف ديل فهمنا تقيل شوية ..يمكن عوامل الزمن ليها أثر فى الموضوع ..
    ولك خالص تحاياى العطرات .

  11. مُخير قال:

    الرائع أب أحمد
    الحلوين جوة وبرة
    السلام عليكم
    المقال رائع ومكتوب بمزاج وبإسقاطه على واقعنا المشلهت تتضح الرؤية، لكن على أية حال أخير من عدمها وياليت يفتحوا الباب لتطويرها بالعون الذاتي والتبرعات، يعني أن يتم مناشدة السادة أصحاب المال والأعمال بالتبرع للحديقة، مثلاً العندو غزال صغير ولا أي نوع من الطيور النادرة تقديمها للحديقة، ورويداً رويداً تتحسن محتوياتها فالثروة الوحشية للبلاد لم تنضب بعد، وللحديقة دور تثقيفي وترفيهي هام للأطفال، وأعلاه نداعيات من الكواشف ودميعات على الحديقة التي كانت. علقنا في مقال سابق أظنه لدكتور عزت عن أن الواجب كان يقتضي تخصيص جزء من عائدات أرض الحديقة لتأسيس أخرى بديلة وعيب كبير أن السودان بمساحته الكبيرة وثروته الحيوانية الهائلة لا يمتلك حديقة تستضيف ما يتوفر على أرضه من حيوانات برية ناهيك عن إستيراد لامات من أمريكا اللاتينية ولا جمل أبو سنامين من آسيا الوسطى أو نمر بنغالي.

  12. طارق أب أحمد قال:

    أبكرون أكيد حمشى تانى و تالت ما تتصور فرحة الصغار بما شاهدوه – على قلته – و بالمناسبه الصور من كاميرا لينا و هى فى أول خطواتها فى دنيا التصوير
    بقاريتش
    بضعة نخلات صارعن – كما نحن – للبقاء على قيد الحياه بينما أنهزمت أخريات و نكسن العنق نحو الأرض و أسلمن الروح…………..واقفات…… أيضا كما أبناء بلدى
    ووو برضو نخل……………..!!! و التحيه مجددا لناس بيطرة جامعة السودان
    التركى
    أحيى معك دكتور أسامه الريس و حقيقة يا خساره يا ريت لو خلوهو يكمل مشروعه
    بالمناسبه أنا أيضا لم أستطع التمييز بين دا أسد أم لبوه ,,,الشى شكلها و تصرفاتها لبوه لكن القفص مكتوب عليهو أسد

  13. طارق أب أحمد قال:

    حاج سلاوى
    أيضا نحنا فى الأملاك كنا نسمع زئير الأسد ساعة المغربيه وهذه شهاده تحمد لناس الإنقاذ بان حارس الأسد فى الزمن داك ما سرق طعام الأسد (( وش أهبل و الحدق يفهم))
    مستر راعى
    يعنى كان فى إفتتاح و أستلفوا ليهو أسد و كدا طيب ليه ما عملوا للأفتتاح دا لمى هلوله ((لمه و هلوله))
    مرحب بيك بيناتنا و خاصة نحنا ناس جروب A
    لمى هلول
    عبرت عن ما أعنيه بالظبط فرحة الأطفال برؤية الحيوانات لا تعادلها فرحه و الغريب أن الحيوانات تعرف هذا الأحساس ولهذا فهى لا تخاف منهم
    مالك ذكرتينا سنكات و صيف سنكات و حولية ستى مريم و المطر الدعاش و رملة الخور جوار السكه حديد بالله ما تكتبى لينابوست للناس الما بعرفوا سنكات

  14. ابكرون قال:

    (لم أستطع التمييز بين دا أسد أم لبوه ,,,الشى شكلها و تصرفاتها لبوه )

    هههههههه شكيتك يا اب احمد دي قويه!!!!!

  15. طارق أب أحمد قال:

    صديق الفولانى
    هو السوق الشعبى ما زاتو جنينة حيوانات بس الفرق هنا أنو البمشى السوق الشعبى هو ,,,,اللامؤاخذه حى و ان لم يدرى

    صدق أول مره أعرف سبب مقولة الحسانيه فى شنو (لكن الدغاله ما عندهم)
    الأمير مخير
    والله كلامك عين العقل الشباب من خلال المنتديات الأسفيريه و الأتحادات الطلابيه و جهات كتير ممكن ثساعد بس هم اليقولوا عوووك
    أيضا نوضوع التبرعات بند مهم و فعال .الحديقه ليس بها طائر واجد من طيور الزينه من قئة الببغاوات فما دون مع أنها موجوده بكثره فى كثير من المنازل

  16. ياسين شمباتى قال:

    طارق يا صديق..سلام..
    حلييييييييل جنينة الحيوانات,,هى ما كانت فى يدهم معقولة يقدروا يرجعوها بعد ضيعوها ؟؟وكتر خير (الفاتح) وبرجو..والله يا طارق ياخوى البلد دى خلااااااااص بقت تناتق لى خراج الروح,,ربك يستر فى مقبل الايام ما نبقى زى الصومال او افغانستان بسبب عمايل الجماعة ديل..

    غايتو انا كان ادونى فرقة بعمل ليهم حديقة رهيبة ملأى بالاسود والنمور وبعض (اللبوات) والافاعى والحمير ايضا,,بس اليطلقوا لى يدى فى مجلس ال……

    الفولانى..سلام..شنو يا ؟؟؟؟؟؟؟؟؟؟
    قول بسم الله وارفع رجلك من الابنص شوية……

  17. حاج أحمد السلاوى قال:

    أخونا العزيز صديق الفولانى..سلام
    ابداً الموضوع ما عاوز ليهو أسئلة وأجوبة ..والأمر فى غاية البساطة ويتلخص فى إنو أى فرد من الزملاء الكواشف أو الشباب بيطرح موضوع أو قضية معينة معينة يرى أنها يستحق النقاش والمداولة حوله وإبداء الرأى .. فتجد من يؤيده ومن يعارضه وكل يبدى أسانيده التى تؤيد دعواه ..يعنى المسألة ديمقراطية بحته .. فيها حرية راى وليس فيها مساءلة ما لم تتعد حدود الآخرين أو تسىء إليهم بأى صورة من الصور وهذا هو المعمول به فى كافة المنتديات الإسفيرية .
    فيا أخى العزيز ..اكتب ما شاء لك وقول رايك وما تعتقد أنه الصواب بكل صراحة ..ومرحب بيك مرة اخرى مع إخوانك فى هذا المنتدى ..بس يا ريت تورينا موقعك الجغرافى وإلى أى القروبات تنتمى ( الشباب أم الكواشف ) ..

  18. الششششكر كل الشكر الي من ساهم واجتهد في تصميم هذا العمل ،من مناظر خلابه وطبيعه جزابه
    ونتمني من الله عزوجل ان يكون هذا العمل في ميزان حسناتهم

  19. وداربجي قال:

    لله رجال اخلصوا في عملهم واجتهدوا في خدمة وطنهم وعكس المناظر والطبيعة بالصورة والتفصيل الدقيق حتي تصل بالصورة المطلوبة والواقعية الي الزين لم يشاهدوا حظيرة الدندر سواء ان كانو من داخل السودان اوخارجة وتاكيداً للمتشككين بان السودان ليس دولة سياحية وتكيداً لهم بان السودان حفاه الله بطبيعة خلابة ومناظر جزابة وبصوره جمالية لاتوجد في جميع اغلب البلدان
    ووفقنا ووفقكم الله في خدمة السسسسسسسسودان

  20. ياسين شمباتى قال:

    الفى شنو!!؟؟

  21. طارق أب أحمد قال:

    سترايكر عزت مذكر ين كلام أمس
    شمباتى
    الفينا مشدوده

    عمر البكرى و ود أربجى

    أتمنى أن يطسب لكم المقام و ما تكون علاقه أنتخابات و بس

  22. عمر قال:

    اولاً سلام عبر الشرائين والاورده والقلب الزي ينبض داخل الجسد الي كل الاخوة في المنتدى وسلام خاص الي كل العاملين في محمية الدندر وسلام خاص الي( الاخ طارق اب احمد) وبقول ليك انا يوميا بطل على نافزة المنتدى اكثر من مره واتمنى ان كون عضواً فعالاً في هذا المنتدى

  23. عمر قال:

    من المفترض ان تكون لحديقة الدندر فروع في جميع انحاء السودان اي توفير البيئه المناسبه لها وان لاتكون الحيوانات حصرياً في الدندر فقط وهذه الطريقه تذيد من عدد السياح الوافدين للسودان وايضاً عندما تكون السياحه متوفره في جميع انحاء السودان سوف تذيد من الاقتصادالسوداني والتنميه ورجو النظر والاهتمام بها وارجو الرد من الاخوه في المنتدى

  24. ياسين شمباتى قال:

    الاخ عمر..سلام…
    مرحب بيك انابة عن الكل وعن صاحب البوست..وياريت تكون مداوم ومشارك على طول..وخليك قريب..

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل الخروج / تغيير )

Twitter picture

You are commenting using your Twitter account. تسجيل الخروج / تغيير )

Facebook photo

You are commenting using your Facebook account. تسجيل الخروج / تغيير )

Google+ photo

You are commenting using your Google+ account. تسجيل الخروج / تغيير )

Connecting to %s