و عزت نفسي مابيا علي

Posted: الجمعة,15 يناير, 2010 by عزت in اخرى

في مرة من ذات الليالي لقيت لي فرصة في الرموت أصلو (عواطف) كانت مشغولة و ما كان في نادي و لا كتشينه ثم تانين ما كان يوم اثنين و لا خميس و جات يدي على (قناة النيل الأزرق) فقمت لقيت لي مذيعة ولعة فثبت القناة شوية و قاعد جنبها (ترباس) و (البوني) و الولد بتاع العود العزاف داك الكان مع ناس أغاني و أغاني بتاع رمضان (أحمودي)  و وقفت… أريتا سهرة السرور فقد أستمتعت و اتمليت طرب و “عواطف” فقد غنى و تكلم و أبدع (كمال ترباس) و كمل الاطار مقدمة البرنامج الجذابة، و (دكتور البوني) المليان ثقافة و خفة دم و عطر السهرة (عوض أحمودي) بسلاسة عزفه و نغمات العود الجميلة…

حمدت الله اليوم داك الما عترت لي على فيلم أجنبي و الا كورة بتاعت أبطال أوروبا لكي لا تفوتني هذه السهرة… فقد أدارت مقدمة البرنامج السهرة بسلاسة يحسدها عليها كبار مقدمات البرامج الذين يعدون ورقة أمامهم يسألوا المستضاف منها دون ترتيب و لا مناسبة فقد كانت الأسئلة المعدة مسبقا في رأسها الذي غطاه توب بلون البرتقال مرتبة و تخرج دون عناء و ان عِبت عليها ضحكتها العفوية ذات النبرة العالية قليلا و التي لو استبدلتها بابتسامة لكان مية مية… عموما و لأول مرة أحضر لها لقاءا و هي الحديثة في هذا المجال فقد نجحت في ذلك اليوم و أجادت و يقيني نحن مبشرين بمقدمة برنامج يرجى منها الكثير…. أما البوني فقد كان في غاية اللطف و انسابت منه المعلومات و التعليقات بسلاسة و دعمت البرنامج فاستاذ العلوم السياسية و ان لم يدّعى النقد الفني بل استبدله بالمحاورة الفنية و كانت عن دراية…. لكن (ترباس و أحمودي) أسكت خليهم ساكت… نغم و أداء مع العمة الكم متر مع الوجهه الدائري الصبوح و الصوت التطريبي كما وصفته المذيعة وأمن عليه (ترباس) قائلا ده لأنو بغني لثلاثة لذا يكون التطريب فيه عاليا اذ يختلف الصوت عندما يكون لعشرة أو مائة عندما تكون الموسيقى طاغية.

و عند سؤالها له بأن (عداد) ترباس عاليا أي ان ما ينقاضاه من قروش في الحفلات مرتفعا. أجاب بأنه يقدر الموسيقيين المعاهو و يمنحهم أكبر الأجور كما يندرج ذلك التقييم على فنه الذي يرضى عنه كثيرا و يحب من يقدره و يستجيب لأجره العالي و هو بمنظور الحالة الاقتصادية الآن و تكلفتها من تعليم و حفاظ على نسق معين للحياه يتطلب ذلك الدخل العالي كما أشار بأنه طور موسيقاه و أغانيه و يتكبد من الجهد و المال الكثير  للحصول على الكلمة الجميلة التي يلحنها في جو خاص يتطلب قدرا من الثراء و أضاف (البوني) بأن فئة الفانين لا ضمان اجتماعي و لا معاش لهم فراس مالهم هو غناهم الذي لا يدوم فليهنأ بالأجر العالي و بعدين الداير الرخيص موجود… و أردف (ترباس) أيضا بأنه يركن للمجاني و الخيري كذلك عندما يتعلق بمجاملة… و قيل في هذا المنحي طرفة تقول أن أحدهم جعل يتفاوض مع ترباس كثيرا بانقاص ذلك الأجر العالي و وصل معه الى مبلغ أضطر معه (ترباس) أن يقول له: لكن بدون (يا ريت) اذ كانت أغنية (يا ريت) ذائعة الصيت وقتها و يطلبها الناس في الحفلة عدة مرات.

التحية لترباس و الذي اكتشفت فيه ذلك اليوم طيبة قلب و عرفان لمن ساندوه بالكلمات و الدعم الفي حيث لا يذكر شخصا الا و حياه و تمنى له بدوام الصحة و العافية و الا الرحمة أن كان غائبا عن الدنيا و تمنى لذويه التقدم و النجاح فقد غنى للتجاني حاج موسى و للكابلي و لأبو العائلة و للكثير من الشعراء كما غنى  لبعض الشاعرات البنات أيضا…

صدقني ما بقدر أعيد …

رحلة عذاب دابا انتهت

بس تاني أرجع من جديد

صدقني ما بقدر أعيد

و ختم برائعة التجاني حاج موسى…

جاي تفتش الماضي

بعد ما الماضي ولى وراح

و جفت… الباقية

و (عزت) نفسي مابيا علي

أسلم أمري ليك تاني

و ما عارف شنو…. و حاجات تانية حامياني

تتالت المرات و كترت بعد داك خالس خالس لمن مسخت ففي كل مرة أدير القناة نحو النيل الأزرق و الا زول و الا الشروق و حتى أمدرمان ذاتا ما خلت فدائما ما تجد نفس المنظر…. واحد ماسك العود و بيغني و المذيعة آخر انبساطة كأنما الفنان قاعد يغني ليها و مرات بكون قاعد معاهم شاعر و الا واحد بتاع نكت و الا حاجة فارغة الظاهر عشان يكف العين…. فأكاد أجزم انه و خلال الثلاث أشهر الماضية و التي كان بها عيدا و طبعن في العيد يكثر هذا النوع من البرامج… البت المذيعة تمشي تنقش الحنة و تقمع الأصابع و تحركها في وشنا نحن المشاهدين المغلوب على أمرنا و يتحاورن في مواضيع ما عارفا كيف و تقول ليهو يالا يا أستاذ أدينا غنية و ما يصدق الفنان يقوم يعزل أحسن غنية فيها غزل و يقولا ليها….

سؤال برئ…. يا ترى ما راي (سعيد) بتاع مقدمات البرامج عندما يتغنى المغني بكلمات الغزل و الابتسامات وكأنما يوجهة لمقدمة البرنامج (الولعة) …. و ما حكمنا نحن ان “قهينا” في المذيعات و الا الفنانات و هن يقمن بنفس الشئ…. غايتو جنس غايتو

Advertisements
تعليقات
  1. الزهراء كتب:

    الله عليك يا دكتور عزت والله كأني حضرت السهره دي من شدة ما وصفتها
    وحقيقه انا تخيلت تفاصيل السهره مع ديكور قناة النيل الازرق دائم التميز والذي أكاد أ<زم بانه يبعث الراحه النفسيه للضيوف مما يساعد في انسياب الحوار وحلاوة سرد المواضيع وتسلسلها
    لله درك يا دكتورنا حيثما حللت والتحيات لعواطفك
    لأني متأكده تماما من انها عندما تمسك بزمام الريموت بتكون متابعه لسهرات النيل الازرق لانك وضحت ميولك للأفلام الاجنبيه والكوره

  2. طارق أب أحمد كتب:

    د. بقاريتش
    أجتمع صاحب (حاجات تانيه حاميانى ) مع المستفيد منها أمام المعنى بها

  3. طارق أب أحمد كتب:

    يا دوك نفس أحساسك تملكنى و أنا أشاهد فيلم حين ميسره ((رغم أنى من أعداء الفيلم العربى عدا عادل أمام )) .هذا الفيلم الذى يعكس واقع مصر حسنى مبارك
    بدأت أسن الكى يورد عشان أكتنب ملاحظاتى عن الفيلم لكن الكهربا قطعت
    أنصحكم بمشاهدة الفيلم لكن أحرص على أن يكون للكبار فقط

  4. حاج أحمد السلاوى كتب:

    أخونا الكاشف أبو عصمت ..
    سؤال سغيروووونى كدا ..طول السهرة دى وإنت قاعد مِقهى فى المذيعة العاجباك ( لدرجة إنو ضحكتها العالية علقت عليها وكنت تود لو أنها إبتسامة.. كان تكون مية المية ..غايتو..يا الكواشف !!! ) عواطف كانت حاضرة معاك .. ولاّ رسلتها تعمل العشا ؟ عشان تنفرد إنت بالسهرة ..وبالمذيعة !
    لاحظت فى تليفزيونات السودان والإخوة فى اليمن إنهم يحبو الغنا والطرب خالس خالس ..تفتح أى قناة تلاقى الجماعة يغنوا.. حتى لو كان برنامج ثقافى أو إجتماعى أو سياسى لازم يكون فى مطرب حاضر معاهم لزوم تحلية الجلسة.. ومرة مرة يقوم هو زااااتو يعلق مع الجماعة لامن يلاقى نفسه قاعد زهجان من غير شغل غير إنو يغنى بين الحين والآخر..
    وبصراحة يا عزت …البونى دا ما أقنعنى بخفة دم فى أحاديثه وبرامجه التليفزيونية خصوصاً مع الكاتبة ..الما عارف إسمها شنو ..أعتقد كتاباته الصحفية فيها خفة دم أكتر من كلامه ( مجرد راى شخصى لا أكتر ولا أقل )..
    أما مذيعاتنا بقن جميلات وآخر أناقة وما عاوز أجيب لنفسى الهوا وأذكر أسماء معينة..لاكين ماشاء اله عينى بااااااااااردة جميلات و كمان نضّامات وما بيفتشن للكلام …وزى ماقلت تفتكر إنوالفنان دا بيتغزل فيها وتقعد تغرود فى عيونها وهاك يا توزيع إبتسامات والمخرجين كمان ما قاعدين يقصروا فى تصيد الإبتسامات دى .

  5. ابكرون كتب:

    عزت : ليك وحشه
    ياخ السهرة دي انا عترته فيها وربنا يكتر العترات دي…..لكن فعلا ترباس قمة والمقدمة للبرنامج قمه ونص وخمسه
    والاغنيه دي للشاعرة : حكمت يس وهي من جيلنا (البكاي) والقصيدة تحكي قصتها الشخصيةواختلافها مع من تحب بسبب الغيرة :

    صدقنـــــي ما بقــــدر اعيـــــــــــد…

    صـدقني مابقدر اعيد ..
    أعزرني مابقدر اعيد ..
    قصة غرام بالشوق مضت ..
    رحلة عزاب دابة انتهت ..
    كيف تاني ترجع من جديد ..

    من عمري اديتك كتير ..
    اخلصت ليك وانت بتغير ..
    والغيره كم فرقت قلوب ..
    وطريقها كان مخضر نضير ..

    من بدري خليتك انا ..
    ونسيتها عشرت كم سنه ..
    ماانت ضيعت الهنى ..
    كل السعاده العندنا ..
    كتبت لي ريدنا الفنى ..
    وبقت النهايه المحزنه ..

    الليله بتقول نبتدي ..
    لازم انا انسى الحصل وليك اجي ..
    يفرح عمرنا وينتشي ..
    انا كنت فاكر حبي ليك لسه ندي …
    انا حبي ليك بدري انتهي وزي الماكان بيناتنا شي ..
    ——————————
    اليك اخي عزت جزء من لقاء معها في الدار اجاره عبد الباقي الحارث :
    حكمت ياسين من الأصوات الشعرية التي تركت اثرا عميقا في الوسط الفني ورغم غيابها عن البلاد لفترة دامت اكثر من خمسة عشر ة عاما مازال اثرها باقيا في ذاكرة ووجدان المستمع السوداني من خلال الاغنيات التي ظل يرددها اجيال من المطربين. الصدفة وحدها هي التي جمعت بيننا ولم اكن أعلم بعودتها الأخيرة حتى قابلتها وكان هذا البوح الصادق؟!!
    * ماهي القصيدة التي عذبتك وانت تكتبينها على الورق؟
    – (صدقني مابقدر أعيد قصة غرام
    بالشوق مضت رحلة عذاب دابة انتهت
    كيف تاني ترجع من جديد).. ويمكن ان يلاحظ الجميع عمق العذاب والآسى في هذه القصيدة ويكفي الحديث عنها.
    * طيب يا حكمت ماهي قصة (الجرح جرحي برأي)؟
    – أرجوك يا عبد الباقي أسمح لي بالتجاوز في الحديث عن هذه القصيدة فهي تفتح جرحا قديما تصعب مداواته.
    * قصيدة كتبتيها ولا تحبينها.
    – (يمة خلتني الظروف.. أبقي فنانة حروف
    يمه السبب عيشة المني
    ده الكان زمان في حينا
    يا حليلو سافر… مننا
    وخلاني اكتب في الغُنَا)

  6. الزهراء كتب:

    والله يا ابكرون قمة الروعه
    لقيت نونو مافيشه وجقلبت حوش د/ عزت
    لكن بالجد قصيدة حكمت دي عزاب رسمي وشعبي
    تكون قريبة نونو
    أطلع يا شمباتي ورينا رأيك في الكلام ده شنو
    حاج السلاوي: جمعه مباركه
    فعلا مذيعاتنا ما شاء الله قمه في الروعه والجمال وبالمناسبه المذيعه لمن تحس بأنها مسجونه في نطاق حوار معين زي مذيعات قناه كده وفضائيه كمان- ما بتقدر تبدع لكن شوف الواحده لمن تحس بأنها مجيهه وبي طبيعتا بتكون مرتاحه نفسيا في الحوار وبتبدع
    ولا شنو؟

  7. نورتو البوست يا أعزاء

    دي زي منوره الشاشة يا أستاذة…… قالا اليوم داك واحد متصل لبرنامج وزنك يا زول (بيبث زي الساعة 6 و نص مساء كدا يا السلاوي) قامت ضحكت و قالت ليهو الشاشة منورة بالناس الظريفين القاعدين يشوفونا…… لكن ما ليهو حق البت من كترت ماهي منورة الشاشة غيرت لقناة الجزيرة لمن “عواطف” جات داخلة…. و عارف المتصلين لمعرفة الوزن الذي تتضعه سؤال للحلقة أغلبهم سودانيين من السعودية و رجال ساكت مافي أمرأة اتصلت …

    و عارف هي عارفة نفسها متمكنة تتونس معاهم ساكت … أها يا محمد عامل كيف و دي أول مرة تتصل علينا و يشيل و يقطع لا لا اتصلت مرات كثيرة لكن الخط ما بيجمع معايا…… انشاء الله تكون اجابتك صحيحة…. مع ابتسامة

    عندنا صاحبنا قيافة كدا مرتو بتغير عليهو شديد و جنها تسمعوا بيعبر عن اعجابة بمذيعة سودانية و ما بتسأل لمن يتكلم عن واحدة أجنبية….

    سألناها ليه؟
    – قالت ناس نيكول تنوري ديل أصلو ما حيلاقيهم لكن ناس قناة النيل الأزرق ديل الاحتمال وارد….. يا ترى لو شافتو بيشوف في وزنك يا زول حتسمح ليهو …؟؟؟

  8. ابكرون كتب:

    الزهرا : غايتو بكره ولا الاحد نشوف لينا بلد…!
    فعلا عذاب رسمي وشعبي والغريبة قصيدة الجرح جرحي برايا
    هيييييي يا الزهرا النونو براها ..؟ بس تشيلوا وتلصقوا فيها……(شفتي التلج ده دقاق كيف ؟)

  9. ابكرون كتب:

    وجايى تفتش الماضى ؟
    —————————-

    خلاص الماضى ولىَّ زمان ،

    وجفت مقلتى الباكية ..

    ونامت من سنين أحزان ،

    وجاى تفتش الماضى ؟

    أرجع بالزمن مرة وأتذكر حكايتى معاك ..

    تلاقى القصة – جد – مره

    هل راعيت شعور مضناك؟!

    كلما تزيدنى فى هجرك

    أقول ليك زيدنى ما أحلاك

    لا شفع التوسل فيك .. ولا حرمانى يوم هماك

    وجاى تفتش الماضى ؟

    وجيت تترجى بالدمعات…

    أسامحك أنسى أغفر ليك ؟

    جفف دمعك الغالى ..

    مسامحك وما عشان عينيك..

    عشان تتعلم الغفران..

    وتصفح لو زمن جار بيك

    وحاول لو قدرت كمان

    تقدر رقة الحابيك

    وجاى تفتش الماضى ؟

    وعزة نفسى مابيه على

    أسلم قلبى ليك تانى..

    سنين الهجر بيناتنا

    وحاجات تانية حاميانى

    ولو رجع الحنين وعاود

    وليك من تانى ودانى

    ولو مكتوب ليَّا تانى أحب

    بحب إنسان يكون تاني
    —————————————–

    غايتو العايز يموت يا البكايين يسمع احمد الصادق بالعود في البكائية اعلاه

    http://nasemalnil.net/vb/redirector.php?url=%68%74%74%70%3a%2f%2f%6e%61%73%65%6d%61%6c%6e%69%6c%2e%6e%65%74%2f%6d%75%73%69%63%2f%61%2e%61%6c%73%61%64%69%67%2f%61%6c%6d%61%64%69%2e%6d%70%33

  10. ياسين شمباتى كتب:

    الحبيب عزت والسمار الانبرشوا تب..
    سلام وجمعتكم مباركة باذن الله..والله يا عزت الاغنيتين رهيبات جدا,,وخصوصا (جاى تفتش الماضى)..طبعا يوم رسلتها لى واحدة كنت بحبها وانفصلنا ورجعت تكابس فى القديم,,فكان ان صددتها هكذا..
    لكن انت شاااايفك مركز على المذيعة اكتر من تركيزك على الابداع الغنائى!!! وما وريتنا المذيعة دى منو؟؟لكن اتوقع انها تكون (نسرين النمر) الشايقية ذات الحس الاعلامى الكبير..
    ترباس طبعا لسانو طويل جدا,,فى لقاء مع (هيثم كابو) على هارمونى قال ليهو انت قالوا(الكوبانى) بدفع ليك عشان تغنى ليهو وبجيب ليك هدايا,,قال ليهو : هو الكوبانى بدفع!!؟؟ مرة جاب لى هدية 24 منديل,,انا ام كلثوم ؟؟؟

    حقيقة النيل الازرق قناة كويسة وينقصها المزيد من الاعلاميين عشان تكتمل الصورة..

  11. مستر راعى كتب:

    ماقصرت فى الوصف ميه الميه تمام
    لكن انا معاك الالقاء والرقى وطريقه الكلام والجمال والفن والنكهة السودانيه بتخليك مسمر قدام التلفزيون لكن عواطف عندى لازم تحضر عشان تتقدم وتشوف الجديد والمفيد مافاضين نقول ابقى زى فلانه براها تشوف واللبيب بالاشاره يفهم —–وكمان تفتش على البرامج الكويسه وتنادينى احضر طبعا دى حركات عواطف تعمل روحها مابتغير لكن بتكون متابعانى اكتر من السهرة وانا بدورى سعيد بعاين ليها برضو فى حركاتها
    اذا ضحكت نضحك واذا علقت نعلق والباقى على الله
    ترباس رائع واكتر من رائع واحنا شعب بنحب الطرب والفن الكويس مش الهابط وترباس بخليك تحفظ اغانيه والكلمات الجميله
    ابكرون شايفك متابع ومرصد للقنوات
    مبدئيا القنوات زى النيل الازرق والشروق متقدمين وفى فهم مابطال عقبال القناة السودانيه تغييييييييييييييير تغير من ناسها المملين وديكورهم الشين البسد النفس وخاصه المذيع البتكلم اكتر من الضيف بذات البرنامج الكان فى رمضان بعد الفطور والله برنامج يفقع المرارة ويغيظ الواحد– ناس اعلام يقاطعوهم عشان يجيبوا تفاهات ولا دعايه وانت تكون مندمج يقطعوا ليك حبل افكارك
    انت المهم والناس جميع ما تهمنى —————————تسلم ياترباس

  12. الزهراء كتب:

    لو تخاصم أو تجافي تبقي لطبعك منافي
    يا زمن ريدي الخرافي و زول بريدك زيي مافي
    شيلت ريدك في الحناية وشفت فيك أحلام صباية
    أنت يا ريدي ويا مناية وحبي ليكـ والله صافي

    زول بريدك زي مافي وزول بريدك زي مافي

    أنت لو عارف الحقيقة دنيا غيرك ما بطيقة
    أصلي سارح في جمالك وبهوي في عينيك بريقة
    الله يحفظ ليك جمالك ديمة رافل في دلالك
    يا البديع معدوم مثالك وبيكـ تزداد القوافي
    لو تخاصم أو تجافي تبقي لطبعك منافي

    يا زمن ريدي الخرافي و زول بريدك زيي مافي

    شفتو الروعه دي كيف؟

  13. الزهراء كتب:

    أيام صفانا – كلمات محمد بشير عتيق

    أذكري ايام صفانا وأذكري
    عهد اللقا والليالي الفي حبور

    اذكري أوقات صفانا
    والليالي الفيها متبادلين وفانا
    إصطفينا ظروفنا والحظ إصطفانا
    جينا بي كل اقتراح
    من حديث يشفي الجراح
    بي مغازله بي انشراح
    والقمر في ضياه عالق
    والنسيم يهدينا أرواح الزهور

    كنا داخل روضة مافيش حد سوانا
    غير ان القمري يهتف بي هوانا
    من اغاريد فنو يسمعنا اسطوانه
    اما ارواحنا الخفاف
    رافله بي اثواب عفاف
    زي عرايس يوم زفاف
    والنجوم بعيون تسارق في اشتياق
    تنظرنا من خلف الستار

    الرياض مبتهجه ضاحك اقحوانا
    والزهور نديانه تستقبل أوانا
    رانعه يانعه وزاهية في ثوب أرجوانا
    والنهر ليها اقترب
    والطيور تسجع طرب
    وعامله موسيقة قرب
    أنحنا صار مجلسنا عامر في طرب
    في نشوة في غبطة وحبور

    يا أنيس الحسن يا سامي المكانة
    من عواطفك حبي لو فاقد مكانه
    اهدي لي تفاحه بس او برتكانه
    فهي غير شك مرضية
    منها اقتبس الضياء
    بل اضوق طعم الحياه
    انت ملهمني الأغاني
    انت مصدر فني
    و احساسي وشعوري

  14. مواصلة لما تفضل به أبكرون و الزهراء و لكل الأحباب الكلكم مهمين

    ترباس قال….
    انت المهم الناس جميع ما تهمني
    انت العزيز افرد شراعك ضمني
    خايف تفوت والسكه بيك ما تلمني انت الوداد
    نبض الفؤاد بستان نضير
    وصفا وعبير وجمال رهيب
    ودلال عجيب ريّح شقايا وجمّني
    جاييك شعاع نجمه وشراع
    نسيني يا عمري الضياع انا لسه تايه دلّني
    قول ليا قول يا احلى زول
    خلي الحزن يرحل يزول لو كنت جد بتعزّني
    انا ليك وبيك مداح عيونك ومشتهيك
    مهما تجور بنزف واجيك لا بقسى لا بزعل عليك
    لانك انت تهمني

  15. عارف يا شمباتي فعلن المذيعة كملت الاطار بحضورها و جاذبيتها فهي ليست نسرين و لكنها غادة عبد العزيز ….جديدة شوية في عالم التلفزيون و لكنها أدارت الحلقة باقتدار

  16. مستر راعى كتب:

    المذيعة كانت غادة عبد العزيز خالد ؟ والله ماشاء الله
    والحوار كان هنا اكيد مافى امريكا
    ماشاء الله هى زولة اعلاميه لكان بقت مذيعه دى ماعندى عنها فكرة
    حقو يا دكتور عزت تانى تدونا خبر من بدرى …..
    وبرضو احنا بنديكم خبر
    ياجماعة مدونتكم دى ماشاء الله بتغنى عنى اى شى حتى الجرايد يقت مواضيعها متوفره عندكم
    ومن هنا بشكر السيد الاستاذ الفاتح جبرا وكل الاعضاء بالجد ماقصرتو مواضيعكم شيقه وبتخلى الواحد يفرق على روحه
    متابع مواضيعك فى القطيه وخاصة ركن البيئة وياريت يا دكتور بما انك مهتم بالبيئه تورينا رايك فى موضوع النفايات الالكترونيه وضررها على البيئه حيكون شنو وياريت تنورنا بمعلومات نقدر نستفيد منها
    تحياتى لكل اهل المدونه الجوه والبره ………….

  17. طارق أب أحمد كتب:

    آآها قلت لى بت عبد العزيز خالد
    هو ليه الأبداع و المؤتمر( أكان وطنى كان شعبى ) ما بتفقوا

  18. حاج أحمد السلاوى كتب:

    زمااااااااااان كنت أغيظ عواطفنا وأقعد أتفرج على البرنامج بتاع عرض الموضة (fashion) واقول ليها شوفى الشماعات دى كيف .. الواحدة ماشة زى السوط تتقصع فى المشية… وإنتو السودانيات الواحدة بس تجيب ليها ولد ولاّ إتنين تبقا زى الفريزيان الهولندى …تقوم هى تولع من الغيظ وكان ليها مراد تجيب عصاية وتضربنى بيها..حسه الوضع إختلف صارت لامن يجى برنامج الموضة تنادينى بأعلى صوتها حصِل حصِل شوف صاحباتك العصايات وصلوا..يعنى خلاس الغيرة انتهت بالتقادم ( يعنى تقدم العمر..نحنا الإتنين طبعن ) وطبعن دا بعد ما عرفت إننا خلاس رضينا بالعندنا وما فى طريقة تانى لمثنى وثلاث ورباع ..هو العمر بعزأة ؟؟؟؟
    أبو عصمت ..لحد حسه ما جاوبت على سؤالى ليك ..كنت بتشوف البرنامج ( وبتتفرج فى المذيعة ) براك ولاّ عواطفك كانت جنبك ؟ وما تتهرب من الإجابة …ومن زمااااان عارفك معجب بالمذيعة دى وذكرتها قبل كدة فى واحدة من مداخلاتك ..مع سبق الإصرار والترصد .زغايتو … جنس …غايتو .. يا الكواشف لاكين هو جنس طيارة عين …دا شنو دا ؟ إنت بس أقعد وأنكت لينا الحاجات السمحة دى ..
    الفكى الكاشف المتصابى ابكرونا ..شنو الجاى تفتش على الماضى وحركات الشباب دى ..أُمال ناس شمباتى وعبدوش ومشاكل يقولوا شنو ؟ أركز وبطل الحركات دى وشوف ليك سبحة جرها ومصلاية أقعد عليها ..

  19. مشاكل كتب:

    سلامز

    سؤال صغنن

    عواطف ماسكه بزمام الريموت كنترول بس ؟؟؟؟؟؟

  20. مشاكل كتب:

    سلامز مربع

    شايف فواصل البكاء و العويل على الزمن الجميل لسه مستمرة من قبل الكواشف .. و طبعا ابو البكايين الحبيب أبكرون – البكايين ديل ناس شمباتي – و الدكتور عزت و حبيب ألبي أبوي السلاوي

    يا مستر راعي .. لو منتظر التلفزيون القومي يجيب ليه برامج و أفكار جديدة .. انتظر هيفاء وهبي في قناة الرحمة

    شمباتي .. نظام لسه بتشوكش البنات … و جاي تفتش الماضي
    ياخ حرام عليك ياخ … القوارير ديل بتشوكشوا بالله .. كنت فاكر العكس هو الصحيح و ياريت كلامك يكون صحيح

  21. مشاكل كتب:

    سلامز مكعب للزهراء

    تبكي بس .. عين دمعة و عين مس

  22. عارف يا السلاوي نحن عاملين حسابنا و عندنا “ديجتلين” طريقة مضمونة النتيجة انت أول ما داير عواطف تقوم تعمل ليها زغللة في العيون فلا تقعد في القناة أكثر من ثواني و تمشي للبعدا….و هكذا أول ما تجي كورة تنتظر شوية أكيد حتمشي للديجيتال التاني….مع نرفزة “زغللتا عيونا”…..بس دة في حالة انك ماسك الرموت…. علة لو معاها الا اتخارج أنا

    دي طبعا اضطرارية لكن في الغالب توجهاتنا مختلفة فبينما أموت في الأجنبي و الكورة لديها اهتمامات أخرى ناس دكتورز، و اوبرا و تكمل بالعربي من مسلسلات و أفلام و الذي لا أطيق الصبر عليهم كثيرا……………

    تحياتي للعواطفات لي حدهن بصبرهم علينا و على ثقالاتنا مرات….

  23. طبعن يا مشاكل الكلام الفوق دا كووووولو في غير التلفزيون القومي … البركة في ناس الشروق و ناس النيل الأزرق و ناس زول بواو واحد العاملين تعاقد فيما يبدو مع أخوانا الاثيوبيين و بعض برامجهم ما بطاله…………….. لكن كوووولهم أعيب عليهم دعياتهم المكثفة و التي يبدو انهم بيملوا بيها برنامجم الفاضي و لمن يفترونا يجيبوا ليهم واحد و الاواحدة تغني……………فهل يا ترى نحن شعب يحب الغنا و لماذا الغنا في كل وقت………….!!!!!!

  24. ابكرون كتب:

    يا سلولو : هههههه يا سجم انا دفعة ابواحمد(بنتلاقي) غايتو جنس حساااااده……انت بس خلي خيالك مع عطوفةواقعد في الغربة ابكي واتنخج :

    كنت جد .. ناوى الرحيل

    إلاّ شايل ذكرى منِّك

    خفت فى الغربة البعيدة

    المسافات يبعدنك

    العيون الشايلة سيرتك

    بكرة يبكن .. ويفقدنك

    والأماسى الحالمة .. ترحل

    والمشاوير يتعبنك
    اهئ اهئ اهئ
    ———
    مشاكل : الريموت ماسكنو لعزت بقاريتش ام الي عزت نفسي؟
    غايتو بتاعين النيل الازرق ديل يوم بقتلوا ليهم زول (بواو واحدة)…..
    واحده حاسده وبغرانه قالت بشبهن بنات اللعب ناس باربي واخواتها(لفظها كان بنات ام لعاب هههه)

  25. مستر راعي تحياتي بس نديك خبر كيف…… الا بعد الحكاية تخلس نقوم نكتب ليك عنها لكن كان عايز الحكاية فريش الا عبر ايميل القطية رسل لي رسالة عشان اقوم اسجل عنوانك و نختك في الميلنق ليست للتراسل ……يعني نظام انت أكتب لي و أنا أكتب ليك… و ما تنسى الموقع الجغرافي عشان نعرف شايتين وين….

    قاعدين نجمع في معلومات عن النفايات الالكترونية و منشاها و منو الداير يدبسنا بيها لكي نخرج مقالة من اللي هو تنفع الجميع………….. لكن باقي ليك ناس حكومتنا السنية بيعاقبوا زولم …ما ظنيت…

    تحياتي و انت تتابع ما في المدونة….و التحية لكل من خط فيها حرف…….أبقى قريب زي ما بقول شمباتي

  26. حاج أحمد السلاوى كتب:

    الفكى الكاشف أبكرونا ..
    يعنى قالوا ليك أبو احمد صغير … برضو من الكواشف السُغار؟ ولّا بتطمن فى روحك ؟

    وقالوا العارف عِزو مستريح ..ونحنا عارفين البينا والعلينا ..

  27. والله يا دكتور الاستاذة منى ابو زيد مكسرة كل الناس ما براك جمال وفهم وثقافة وخفة دم والبوني الرجل الرقيق المثقف مكمل الناقصة لباقة ومداخلات راقية
    وانت بكتابتك لهذا البوست لا يسعني الا ان اصنفك أنك راقي مثلهم واكثر
    مع تحياتي

  28. حاج أحمد السلاوى كتب:

    أخونا عبد المنعم ..
    دكتور عزت قال المذيعة إسمها غادة عبد العزيز ..وليست منى أبوزيد ..
    الظاهر إنك مكسر فى منى أبوزيد شدييييييييييييييييييييد ..غايتو خلى بالك عواطف ما تقرا الكلام دا .

  29. الزهراء كتب:

    احلى تحيه مسائيه للكواشف والما كواشف
    وتحيات بالكوم لي عواطفاتم القاعدين وما جايبين خبر الحاصل بي جاي
    حاج السلاوي: لكن عواطفاتكم كيف دايرم يبقوا زي عصايات الموضه القلتها اذا كان ما عندهم وكت اصلا للرياضه والجيم ولا غيرو الواحده يوما كلو في المطبخ عشان ابو العيال بياكل كسره ما بياكل قراصه وبيحب سلطة الروب ما بيريد سلطة الاسود.. بنات الموضه ديلاك فايقااات ورايقات الراجل يرقعنو بي قطعة بيتزا ولا فطيره جاهزه دا لو ما دخل عملا براهو وده لو اصلو كانت عندها راجل حارسا-
    مشاكل يا بتاع المشاكل انت مساك زين
    انا ما ببكي انا بجيب الببكي ناس شباتي وباقي البكايين واتفرج
    بالمناسبه الكلمات دي مهداه لي بنات منتدانا القدام والجداد وبهديها لي عواطفات كلهم

    حسنك يفوق حد الخيال
    كيفن محاسنك اعدهم
    السمحه يا ستهم

    حسدوك هم يا ستهم
    لما الصفات عددتهم
    لو ما الظروف وخوف الملام
    في هواك كان كلمتهم
    كان قلت إسمك للأنام
    وبُحت بي سر الغرام
    وعشت الليالي العشتهم

    شافوك هم يا ستهم
    غنوك معاي في سرهم
    عرفوا الجمال وأحلى الخصال
    كل المعاني الردتهم
    قالوا المحال رقه ودلال
    والجيد طويل وعيون غزال
    والبسمه فيك يا ستهم

    وين الحروف يا ستهم
    صعبن عليّ ما عرفتهم
    ارجع وأقول دونك تحول
    سجع القوافي الشفتهم
    لو قلت زول ما زيو زول
    مابوفي زول او ليك اقول
    والله ستي وستهم

  30. مس راعى كتب:

    مساء الخير
    مس راعى تحييكم كتير ياناس سعيد
    طبعا شايفه مستر راعى خاشى فى ساخر سبيل ويقرا وقبضته مبسوط يضحك وفاتح ليهو صفحة, من بعيد اخدته لى لمحة منها
    وجيت سالته بتضحك مالك قال مافى شى اتذكر ليهو نكته
    جيت افتش واعاين لقيتكم ماشاء الله عاملين حزب لتجمع الرجال وكمان حزب قوى ومتنمر وشى شعر وشى اغانى وشى زكريات وكمان كلكم قبضتكم لكن هو شايفاهو عامل دبلوماسى
    اهو من اليوم التلفزيون شفرناه مافى تلفزيونات وبكره ببيعو فى الدلاله لجارتى الارملة , تانى بس نقرا قران ونرتل ونشوف تانى البحصل شنو
    انا فاكره فى حاجات مهمه لكن برضو اكتشفت انه فى موقع ظريف وكمان فى ناس يتنفس فيه عن نفسها لذلك تانى حاكون متابعة معاكم على طول
    واكيد من هنا ح أكون حزب نسائى قوى واتعرف على كل ناس عواطف والا تشوفوا ليكم مدونه تانى وحيحصل احتلال صهيونى من قبل حواء وكل القيادات النسائيه ولازم يحصل تفكك للجيش الشايفاه
    ومن هنا بقول لعواطف خلى بالك من سهرات التلفزيون ومن المعصعصات
    ياجماعه دايرين شنو؟؟ انتو الاخترتو عواطف ورسلتو ليها جوابات وشعر وهايمين بيها فجاه تخلوها عشان مذيعه ,,المذيعه مجرد نظره وماعندها شغله غير روحها زى ماقالت زهراء معليش يا زهراء ماسلمت عليك ,,,كل سنه وانتى طيبه
    عشان كده من اليوم بنجيب طباخه وسوبر نانى للعيال ونمشى النادى الرياضى والجمعيات الخيريه ونزيد فى النيو لوك بتاعنا
    طبعا ده كله هزار منى لكن عواطف الحكيمه بتحضر مع سعيد التلفزيون وتشاركه رايه وتشوف مشاكله وتقيف معاه وادم مابعيش بدون حواء ووراء كل رجل عظيم إمراة واكيد ديل إحنا مش كده يا زهراء .
    ماتقولوا بديت أهدى خوفا لكن لازم نظهر شويه غيرة لو من دون مبرر
    يامستر راعى قلت داير تعرف شنو ؟؟؟
    لكن برضو بهديك انت المهم وناس الجميع ما تهممنى
    بالجد مستر راعى ماكلمنى بوجود موقع جميل كده بحكى لى قصص الفاتح جبرا لكن اليوم اكتشفته انه داسى منى كنز
    متعكم الله بالصحه ومزيدا من التقدم
    اقطعوا على راحتكم يا رجاله مافى زول بكلم بس المهم ماتعملوا التانية دى فيها موت بقى
    فى امان الله

  31. الصادق ود البركة كتب:

    السلام عليكم ورحمة الله وبركاته جميعاً دون فرز
    لو كان هذا في غير هذا لكان أحسن

  32. aflaiga كتب:

    الاحباب الحلوين بدون فرز : سلام عليكم ومشتاقين جد جد ..
    منعتنا عنكم ظروف العمل وعدنا لنجد الجميع كما هم تفردا وابداعا
    وجدنا عزت يحمل اصالة البكا ويؤطر لها فى اسلوب بديع
    ووجدنا ابكرون يتمرد على عواطف كلما جدع عزت باص ملعوب
    ووجدنا السلاوى قابضا على الجمر والجمره بترطب بالواطياهو
    ووجدنا اب احمد بعناده القديم وابداعه المستمر بس حين ميسره للكبار ذاتو صعب
    ووجدنا ود البركه متمسكا بالبركه كلما حصلت حركه !!
    ووجدنا مستر ومس راعى حضورا انيقا
    ووجدنا الزهراء تبثنا اصلة بت البلد كلما احتاجت الاصالة لوجودها
    ولم نجد الكثيرين ربما لنفس اسباب غيابنا
    اسال الله ان يبارك تجمعكم هذا ويديم خوتكم وان ييسر لنا العوده عما قريب

    شفتك امس غلبنى لى وهجك امس
    بالله القصيده الرائعه دى لو عند زول يدينا ليها ويا ريت فيديو بصوت عابده الشيخ ..

    ختاما تحياتى والى لقاااااااااااااااااااااااء

  33. سلام يا أفليقا ياخ معقول من ديك و عيك

    و سلام كثير يا مس راعي………… خلاس يا مستر راعي بقيت “راعي بي قيدك” و القطر بقا فيهو مفتش……!!

    غايتو يا أفليقا ما لقينا ليك “شفتك أمس” فنديك دي و انشاء الله الشهرين قربن يتمو

    انا والاشواق فى بعدك
    بقينا اكتر من قرايب
    ما بنغيب عن بعض ابدا
    زى اعز اتنين حبايب
    كنت فاكر الشوق يغيب
    لحظة واحدة عن فؤادى
    مع الزمن يتلاشى وجدى
    قلبى يسلا فى بعادى
    وشوقى قال لى مستحيل
    مرة يتحقق مرادى
    ولازمنى ذى خلى الوفى
    واصبح زى خلى الما بعادى
    اى لحظة بعيدة عنك
    و ضايعة من ايام زمانى
    وكل يوم كلن لى فى قربك
    اتمنى لو احياه تانى
    وروحى لو غنيتا ليك ما
    تصور كا اعانى
    وحبى ابلغ من غناى وحبى
    اسمى من المعانى
    كم رسالة يا حبيبى بسطرا
    اشكى ليك بالبعد يا ناسينى
    واحلا كلمة منى ليك بضمنا
    باغة من شوقى وحنيني
    بين حروفا اشوف خيالك
    وانت تتبسم لعينى
    وقبل ما اختم كلامى
    بتمنى لو ردك يجينى

  34. حاج أحمد السلاوى كتب:

    – ولدنا أفليقا..حمدن لله على السلامة ..وكانت ليك وحشة شديييدة .. سماسمك جمعت ولاّ لسه بيغادى ؟
    – ابو عصمت المرطب ..أنا والأشواق فى بعدك دى أتعبتنا بيها جنس تعب .. ورجعت بينا سنين عديدة للخلف ..الفنان محمد ميرغنى دا أكتر من رائع ومميز فى كل شىء ..مش كان أستاذ ؟ عشان كدا .
    – مستر راعى ..غايتو شد حيلك .. بعد ما عواطف عرفت درب المدونة ..وحسب معلوماتى هنالك العديد من العواطفات المتابعات المواضيع والمداخلات.. ونحنا زااااتنا بعد كدا بنعمل حسابنا مادام القطارات بقا فيها مفتشين زى ما قال أخونا الكاشف ابو عصمت ..وكمان مفتشين على مستوى .. ناقشين كل حاجة .. مش أى كلام .وربنا يستر .

  35. ابكرون كتب:

    سلام
    والله يا افليقا ليك وحشه عين واصابتكم انت في الجنوب وسمسمه في الصين وصديق عبد الرحيم في القولد….وهناي داك في الجفيل ….ان شاء الله هانت شفته التشتت بالعسكرية (التشظي) كعب كيف …! الله يجمع….
    تعال هنا ده منو الشفتو امس وجهجهك ده…..؟؟ اليك جزء من الشوفه الطلبتها :

    شفتك أمس
    غلبني لي وهجك أمس
    من نور طلتك
    شافت عيني عين الشمس
    صدق أمس
    شفت السماء
    كان بعيد
    وصدق المثل
    القال
    كل أيام الله عيد

  36. ودالزبير كتب:

    عزيزنا عزت وضيوفه الكرام

    لك ألف تحيه يا دوك وأستميحك عزراً أن أعيد نشر كلام كنت قد كتبته على الشبكه العنكبوتيه في العام 2008 عن غاده عبدالعزيز خالد
    بالأمس وفي برنامج ( فن وسياسه ) الذي يبث على قناه ( الشروق ) إستضافه المذيعه نسرين سوركتي ( ملكه جمال المذيعات السودانيات ) الإعلاميه الشامله غاده عبدالعزيز خالد في برنامج حواري إستوقفني ولم إستطع التزحزح من أمام الشاشه البلوريه فكلاً من السيدتين تجبرك على الإنصات لها فقد اعتدنا على المثل الذي يقول سماحه جمل الطين وإن كل جميله لابد أن يكون رأسها فاضي إلن أنهما كسرتا هذه القاعده فغاده والتي تشكل هذه الأيام حضوراً لافتاً عبر قناه النيل الأزرق في برنامج مساء جديد كانت قد لفتت الأنظار إليها عبر برنامج من أمريكا والذي قدمت حلقاته مع الجاليه السودانيه العامله هناك وهي نشطه من خلال كتابتها الصحفيه ومشاركتها الفاعله بموقع الأونلاينز إضافه لكل ذلك فهي إبن العميد عبدالعزيز خالد رئيس ماكان يعرف بإسم قوات التحلف المعارضه للإنقاذ .
    المهم الحلقه كانت إستثانيه من حيث الأسئله والإجابات تطرقت غاده لرأيها في مايدور في الساحه السياسيه السودانيه وقالت إن الأجواء غير ملائمه لإجراء إنتخابات العام القادم لعدم تساوي الفرص بين الجميع .
    ثم عرجت عن غياب الحريات الصحفيه وقالت إن مستوى قياس الديمقراطيه في بلد يتم عبر مراقبه مدى الحريه الصحفيه في ذلك البلد .
    علمنا من تلك الحلقه إن الأستاذ غاده والحاصله على درجه الماجستير من الولايات المتحده كانت أطروحتها حول التغطيه الإعلاميه الغربيه لمشكله دارفور وذكرت غن هناك كثر من التهويل وتغيب الحقائق قد تم حول تلك القضيه .

    الحلقه كانت ذاخره وحافله بالكثير من المواضيع الجيده وكانت تستحق المشاهده .
    شكراً نسرين سوركتي وشكراً الإعلاميه القادمه بسرعه الصاروخ غاده عبدالعزيز خالد .

  37. حاج أحمد السلاوى كتب:

    أخونا شكسبير ..
    لاكين غايتو .. جنس .. غايتو ..وجنس تكسِر فى الإعلاميتين الجميلتين إنت وصاحبك .

  38. ود الزبير سلام

    هسة ما عرفنا الاستضافة كانت أمبارح و الا في 2008 عشان نعرف التاريخ كويس و نقوم نطلب اعادة… أصلو فترنا من كلام ناس “نافع” و “باقان” الما بنزل من الزور …..

    و أمبارح أنا برضو حضرت لي نقاش (و معاي عواطف يا حاج السلاوي) في “الشروق” و قعدن يتناقشن “منى أبوزيد” و “رشا عوض” و مذيعة كده ما بعرفا لكن ذات حضور اعلامي …. و من انبساطة “(عواطف) انو في بنات بتناقشوا بالمفهومية دي لفتت نظري للتطقم بتاع “منى” الكبدي الفي التوب مع الكبدي الفي شنو ما بعرفو…. و لمن جبت النظارة قالت لي كمان داير تتأكد يا حاج….!!! قمت نزلت النضارة بسرعة

    كان الحديث عن الاعلام و المرأة و هل أنصفها فقلت لعواطف “يعني أكان ما أنصفها معناتا هم براهم مقصرين لأنو بين كل عمود في جريدة و عمود كاتبة شابة و المذيعات أشكال و ألوان دا غير المسؤولات في كل مكان…!!

    تحياتي

  39. ابكرون كتب:

    عزت : تتذكر الايميل بتاع الاسود لمن سالتكم كل واحد يحدد هويتاو اسد من الاسود….وانت اخترته اسد معين ….هههههه…دي اكدتها لي :(قمت نزلت النضارة بسرعة)

  40. مستر راعى كتب:

    صباح الخير يا جماعه
    خلاص شكلى بنزل من القطر اشوف لى قطر تانى الموضوع مابسلم بقى يا عزت والسلاوى
    ولا جيبوا لينا مواضيع بعيد عن عواطف خلوها كورة وسياسه وبعيدا عن الفن النسائى والذكريات …
    خلاص اكتشفونا وكنت ماخد راحتى على الاخر لكن تانى الا بعد مراجعه وتكتيك
    اخير خرفانى كان قلت شى جنبها مابتوصل للمس
    تحيـــــــــــــــــــــــــــــــــاتى لكل الرجاله وكل عواطف متابعه
    يا عواطف خلى سعيد يسعد حتى لو بالكتابه وحتى هنا ماريحونا
    كسرة:
    غايتو الفى مكانى بس الا يضحك وقدر مايسالونى اضحك خاصة لمن عرفتها دخلت بجاى وانا مافى
    اللهم ارحم عزيز قوم اكتشفته عواطف بجاى

  41. عارف يا أبكرون الحكاية ما فرص و هي ذاتا بقت فاهمة الحكاية و عارف في ظل عدم وجود رفيقة لها دائما ما تنسى و تلفت نظري للحاجات السمحة بالله شوف البت دي لابسة كيف…. غايتو البركة في النظرة الأولى

    لكن يا مستر راعي كويس انو المدام تتابع معاك و أكيد هي حتكون مطمئنة لمن تعرف انو المستر دمو خفيف و متابع معناتا عندو حس و زول راقي و ما حتنكد عليها زي الكاره زاتو البي هناك داك…….!!!!

  42. مُخير كتب:

    يا عزت دانقتنا الما بي لينا بإبداعاتو
    الحلوين في كل مكان
    سلام ومحبة وإحترام
    يعني يا أبوعصمت راقدين رُز وما فتأتوا تتبرشوا، كان جلسن شوفوا حلاتن، وكان وقفن وووب غلاتن، وكا نضمن ما حد فاتن، وما بتفتروا في تعديد صفاتن، ده يسموا شنو ؟؟ غايتو يا عزت يوم حتخرب ليك بيت زول….
    يا الكواشف بقيتوا ما بتتهبشوا ولو نجحتوا في ترويض عواطفاتكم بفعل عامل السن (حاج السلاوي) و/أو الخبرة (عزت/أبكرون)، لكن نحن لسة بالرغم من أننا دخلنا في العقد الثاني (11 سنة زواج) بس ما بنقدر نفرفر جنس فرفرتكم دي، خصوصن فيما يتعلق ببنات أمازونيا لأنو ده الكلام البجيب الزعل، لو ناس ننوسة بنت عجرم وبيونس نولز أو غيرهن فلا ضير، بس أمهات تياب ديل بيبوظ أعصاب النسوان قبل أعصابنا الله يدينا خيرهن، ديل زي ما قال أستاذ الكابلي:
    ما نور و زهور و عطور واستلموا المجال، صوت منساب بلور و شبه ناس قلال، خفة روح عصفور و إشراقات خيال، خلى قلوبنا طيور و حال أرواحنا حال….
    و مشينا بعيد شايلين العيد
    في قلوبنا و في دروبنا ورى البسمة الرنانة
    يا شوق يا نغم ياقلوب فرحانة
    ياذوق يا فهم يا عيون سرحانة

  43. حاج أحمد السلاوى كتب:

    أخونا الشفيف الأمير مخير بن خيار القوم..صفوة الأخيار ..سلام
    ياخ لسه بدرى عليك ..إنت يادوبك فى بداية طريقك ..وممكن نناديك ..يا عريس ..إيه رايك ..؟

  44. ابو حميد كتب:

    حاج السلاوي عشان ماتقول عليه بخيل اها جينا بي جاي تراني مابراي مالشغله كلها غنا وهيام وحب وغرام . الناس كلها واقعه وغرقان لشوشته ..غايتو ربنا يعيننا كلنا .. قال غاده عبدالعزيز خالد ونسرين سوركتي

  45. ياسين شمباتى كتب:

    جيييييييتكم..

    عزت المرطب…غادة برضها ما بطالة!!!!

    مشاكل..اسه عليك الله الحارقك شنو؟؟ انا كنت لما بمشى فى المين رود المحاضرات بتتعطل لحدى ما اختفى,,لانو مافى واحدة بتقعد فى كنبتها,,خليها بس مستورة وما تحرجنا وتخلينا نستعرض مواهبنا هنا…احم احم..اما بخصوص البكا فربنا عالم بالبكاى منو,,اخير انا وااااضح وصريح,,كعب الكاتمنو فى الجوف والحشا وبمرقوهو فى الشعر والخنفس!!!

    مس راعى..مرحب مرحب وفشى غبينتك تب..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s