دال تستأجر مزارع الضباط المتقاعدين بقيمة (صحن فول) في اليوم

Posted: الإثنين,18 يناير, 2010 by ابكرون in اخرى

عودة مرة أخري لموضوع مزارع مشروع الواحة الخاص بالضبــــــاط المتقاعدين والذي منح للضباط  المحالين للصالح العام بعد يونيو 1989 ولمن لا يعلم شئ عن الموضوع  مساحة الحيازة (10 أفدنة) لعدد ألف ضابط في منطقة المحس كترانج .. وقد تسلم كل ضابط عام 2000 ملف كامل بملكية الحيازة تشمل شهادة البحث والقرار الجمهوري الخاص بالتصديق وقرار وزير الدفاع الخ ….وللعلم أن كل مستفيد دفع ما قيمته (60 ألف جنيه ) علي دفعتين  سنه 1991  قيمة المشروع .. وهو ما يعادل (ستون مليونا بقيمة اليوم)…مرت الآن نحو19 سنه ولم يستفد احد من المتقاعدين من قطعته الزراعية التي يفترض أن  تعينه في إعالة أسرته ومعظمهم عاطلون عن العمل وهم في اشد الحاجة  لاستثمارها لصالحهم  ولصالح أسرهم .

      المهم في الأمر الجهة التي يجب أن ترعي وتراعي حقوق الضباط المتقاعدين وهي جمعية قدامي المحاربين  لم توفق عندما رأت  وقررت تأجير المشروع بأكمله لاستثماره من قبل (مجموعة شركات دال) بعد أن فشلت عدة محاولات استثماره من جهات أخري…منح المشروع لشركة دال بحجة أن ذلك قرار جمعية عموميه لم تكن كاملة النصاب وحضرها عدد قليل من الضباط….!

        إذا سَلمنا بان كل ذلك صحيحا أليس من الواجب مراعاة مصلحة هؤلاء المطحونين ظلما بتأجير حيازاتهم وهي أملهم في مكابدة صعوبة المعيشة بقيمة اعلي مجزية..؟ أيعقل أن يكون إيجار (عشرة أفدنه من الأرض الخصبة المروية التي ستنتج خيرا وفيرا)  فقط مبلغ 100 جنيه في الشهر(1200 جنيه سنويا) أي ما قيمته (3 جنيه) قيمة وجبة فول يوميا  !!

      ألا يعلم الزملاء الذين وافقوا علي ذلك قبل  سنوات قليلة أن هذا ظلما ؟ وانه بَيِن ؟ …أيعقل أن يكون إيجار ( درداقة) في الميناء البري في الشهر اعلي من إيجــار مزرعة منتجة؟؟ (دخل ست الشاي يتجاوز ال50 جنيها في اليوم !!) أنا لا الوم  شركة دال لانتهازها مثل هذا العرض والثمن البخس الذي عرضته،  فهو عرض قُدم لها وبين المؤجر والمستأجر (يفتح الله)… بقدر ما استغرب موافقة جمعيتنا ولجنتنا ومن خلفهم وزارة الدفاع بهذا الحيف والجور … ؟ والشيء الأكثر جورا أن يحدد هذا الإيجار لمدة 20 عاما… (شئ مضحك ومبكي)! تستنفذ خلالها خصوبة التربة وتصبح كصحراء بيوضة ويشيخ ويمرض خلال هذه الفترةالطويلة عدد كبيرمن هؤلاء الضباط  ويموت من يموت ويجوع من يجوع…..!

        من هنا ومن خلال هذا المنبر أسال القانونيين وعلي رأسهم القضاء العسكري والقضاء المدني والمحكمة الدستورية ووزير العدل وحقوق الإنسان وكل من لا يرضى بالظلم هل هذا عدلا؟ هل يجوز مثل هذا الظلم؟ هل يجوز أن تؤجر ارض دون استشارة و موافقة صاحبها الشخصية والمكتوبة ؟ وكيف تم الاتفاق وشهادات الملكية عند أصحاب الحيازات ؟ (خلونا من حكاية الجمعية واللجنة)….أليس من العدل أن تعاد الأرض لأصحابها وفورا وتعويضهم عن الضرر؟ وهم أحرار في زرعها أو إيجارها بمعرفتهم ولمصلحتهم بدلا عن هذه المسخرة .أو أن يكونوا شركاء كل بأرضه في هذا الاستثمار بالنصف  علي الأقل….أو أن يعاد لهم مبلغ 60 مليونا دفعوها من قبل (اورنيك توريد مالي 15 مازال في الجيوب)…

     قال تعالي 😦 وَلاَ تَحْسَبَنَّ اللّهَ غَافِلاً عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الأَبْصَارُ ﴿42﴾ مُهْطِعِينَ مُقْنِعِي رُءُوسِهِمْ لاَ يَرْتَدُّ إِلَيْهِمْ طَرْفُهُمْ وَأَفْئِدَتُهُمْ هَوَاء43) صدق الله العظيم …..وفي الحديث القدسي الذي رواه ابوذر عن الرسول صلي الله عليه وسلم  قال : ( يا عبادي إني حرمت الظلم على نفسي وجعلته بينكم محرما فلا تظالموا)

        ختاما اتقوا الله في هؤلاء وحقوقهم أعيدوا الأرض لأصحابها فهم يعلمون أين مصلحتهم … أو أعطوهم حقا مجزيا  يتراضي عليه جميع أهل المنفعة وليس من ينوب عنهم….. وأقول لشركة دال إن هذا ظلم واضح  فكيف  توافقون عليه وإن وافق عليه بني جلدتنا فهو ظلم …. واعلموا أنه ليس هناك حجاب بين دعوة المظلوم وربه ، فاتقوا الله في إخوانكم .

Advertisements
تعليقات
  1. مستر راعى كتب:

    سلام وتمام يا ابكرون
    المواجع دى تعبتنا والظلم ظلمات ربنا موجود الكل ينهب ويسرق وبسرقوا فى منو فى المواطن المطحون الطحنه الزمن الشين وخلاهو بين ايدينهم
    لو فى عدل ودال بتفهم اكيد بتعرف السعر الاصلى لكن يا زول دال بتكون حددت سعر ولمن وصل للجنه بقى سعر تانى يعنى هم هبل ليهم دى الهيكومه بقى فى حد بعرف يلعب زيهم
    الظلم البنسمع عنه غلبنا وماعارفين نسوى شنو
    انت عارف اى قضيه حتى بتصل للقضاء والمحاكم اخرتها بتخش جوه الدرج وتتنسى مع الزمن
    لذلك ربنا يعوض ويرفع عننا البلاء وصدقنى البلد اذا مافيها ناس صالحين الا كان لحقنا تسونامى وكترينا وهاييتى
    اللهم اعفى عنا ولا نسالك رد القضاء ولكن نسالك اللطف فيه
    بس يا ابكرون ما يكون الظلم ده وصلك شد حيلك ماتخلى حقك لو حفنه تراب ان شاء الله تديها المساكين ….

  2. ابكرون كتب:

    الاخ مستر راعي
    عمت مساءا….. كيفك اخي؟ اخي المواضيع الجافة دي انا ما بنشرها في المدونه وبرسلها للجميع في الايميل ….طبعاانت معزور ما عندك معانا ايميل وما رسلنا ليك …معليش انا ما عارف النزل الموضوع في المدونه انت ام الاخ استرايكر …..؟؟؟؟؟ مع تحياتي لكما…..
    اخي المشروع ده انا سبلتو لكن حلفته ليهم لن اسكت وهو الثالث…….!

  3. ودالفتيحاب كتب:

    كلام غريب لهذه الدرجة المهاترة والمتاجرة بحقوق الناس ، لكم الله ياقداما العسكريين ، ويا أبكرون لن نسكت معك فى نفس الخندق ، وفى كل المنتديات نفضح حنانهم ، والله ليس بغافل عما يعمل الظالمون
    إنما يؤخرهم ليوم تشخص فيه الابصار .
    لك كل ودى وتقديرى وطولنا منك ياخى انت عارف المعزه وإت شاءالله الوليدات بخير ،

  4. علي سنكل كتب:

    لا يا أبكرون يتنشر في المدونه وفي كل حته ، عشان الناس تعرف حقيقة ناس ” لا لدنيا قد عملنا “. والعجيب في الموضوع أن الضباط باعوا دهب نسوانهم عشان يدفعو تمن الحيازات الزراعيه دي ، يعني مش هبه من الدوله التي شردتهم وأضاعت حق أسرهم وأولادهم في العيش الكريم.
    دي همبته و قلع حق لا يسكت عليه يا أبكرون زنحن معك بأعلى صوت لو الحق يرجع لأهله.
    في هذا الزمن . . . تف يا دنيا تف.

    طفشانه : أبكرونا فكي مويه ساكت ، لو أصلو بقدر يعمل ليكي حاجه خليه يرجع للضباط أراضيهم. قلت ليك فكي مووووويه.

  5. حاج أحمد السلاوى كتب:

    الفكى ابكرون ..
    أول سؤال ..لجنة أو هيئة قدامى المحاربين والعسكور الذين أحيلوا للصالح العام موجودة لسه ولاّ قبضوا الفيها النصيب وزاغوا من قدامكم ..أنا رأيى أول حاجة تشوفوا الناس القاموا بعملية التاجير ديل وين وتمسكوهم وترفعوا عليهم قضية لأنهم هم الباعوا أراضيكم ..ناس دال ديل تجار وما بيهمهم إنو الأراضى رخيصة ولاّ غالية وعاوزين يكسبوا ..
    يعنى ممكن بكرة يبيعوكم إنتو زااااتكم لأى شركة تانية وترجع السودان وما تقدر ترجع الدوحة ..الشركة تقول ليك والله نحنا إشتريناك من جمعيتكم بتاعة قدامى الضباط ..
    غايتو …يا العساكر ..بتسووا جنس حاجات ..

  6. طفشانة كتب:

    نحن معاك يا ابكرون وانشا الله ترجع الحقوق لاصحابها
    سنكل : يا محبط انا بنيت الآمال جايى انت تقول لى موية وشنو مابعرف داك

  7. محنك كتب:

    السيد ابكرون

    اشمعنى ضباط الجيش
    هل هم الوحيدين الذين خدموا ونزلوا المعاش … وهل هم اولى من الخريجين الزراعيين … ان هذه الاراضى اعطيت لكم عن طريق المحاباه وليس عن استحقاق … ككما انكم لم تحسنوا استغلالها وقمت بتاجيرها بهذا المبلغ عن رضى … وقام المستثمر بالصرف عليها من حر ماله ملايين الدولارات وقد تكون دراساتها الاستثمارية قد كلفت المليون دولار … وقد انتجت وساهمت فى الاقتصاد وهو المطلوب … عليه اتوجه الى الدوله بنزعها وتخصيصها نهائيا لشركة دال وكفاية محاباه
    يجب ان يحابى المستثمر فقط …

    او كل المواطنين السودانيين وكل المعاشيين

    والجاتك فى ارضك سامحتك وبختك ياخى المعاشى الملكى بياخ اقل من ايجار دال المدفوع لكم وتتمتعون بمعاش ضابط على مستوى فاحمدوا الله يا اخى …

    ولست بمظلوم انت

    انا قد اشتريت بحر مالى فى ام درمان فنزعتها الدولة بدون تعويض لمطار امدملا ولما اشترينا كان المطار فى بحرى فتعوضنا اله لانه لا فائدة من الجرى ورا الحكومة فى هذا المجال .

  8. ابكرون كتب:

    محنك : ياخ مزارع اشتريناها بحر مالنا اقري الموضوع كويس
    اقراء السطر الرابع…..هل انت دفعته ما يعادل 60 مليون في 10 افدنه ؟
    ياتو دوله دي دي البتحابينا وهؤلاء الضباط احيلوا للتقاعد الاجباري او ما يسمي بالصالح العام بعد الانقلاب المشئوم….؟اتستكثر علينا 10 افدنه بقروشنا ….والحرامية ينهبون آلاف الافدنه وببلاش …….عجبي

  9. مرتضى صالح كتب:

    والله ياستاذ الواحد بقى محتار فى البلد المليانه عقول(العقول مليانه شنو مامعروف) المهم الناس دى بتفكر كيف الله اعلم يعنى لو جيت ماشى فى الشارع تحتار . ابدا ليك من وين من النفق الما عندو تصريف ولا شوارع الاسفلت البيعملو الليله وبكره يتفرتك ولا الكبارى ولا المصارف فى الخريف ولاناس النفايات ولا المويه وما ادراك مالمويه نقول شنو بس الله غاااااااااااااااالب وشكرا لمساحة التفريخ والتفريغ

  10. محنك كتب:

    لا ابدا ولكن نحن الغوا وظائفنا وادونا الحد الادنى للمعاش وما ادونا ولا فدان واحد

    طيب ليه ما استثمرتوا اراضيكم براكم ؟

    اذا اللجنة غير مفوضة يمكنكم اللجوء الى القضاء … وسيحفظها رئيس القضاء مثل ما حفظ قضية الكاردينال للكاردينال

    لو كانت الحيازة حكر فلن يجدد لكم ومدته 20 سنة فقط يعنى
    20 سنة * 12 شهر * 100 جنيه 24000 جنيه
    60 مليون زمان كان دولارها 100 جنيه وهسى الدولار 2500 جنيه اضب الستين * 25

    وتكون خسران خسارة كبيرة

    تنازعوا وبعد عشرين سنة حيدوها دال او اى مستثمر من غير احتجاج لانه ما ملك حر

  11. ابكرون كتب:

    محنك قال :… عليه اتوجه الى الدوله بنزعها وتخصيصها نهائيا لشركة دال وكفاية محاباه
    يعني عشان نزعوا اراضيكم للمطار ينزعوا من الناس التانين ……ياخ دي حقوق اسر واطفال وناس ماتت وناس ضحت وحاربت من اجل البلد دي…..شردوا بس لانهم غير موالين للانقلابيين الذين سرقوا البلد في ليله …. وبعد ده الارض ما هدية من جزاريهم ….اشتروها و الإيصال مالي 15 الفي الجيوب ده كان بتاع شنو؟؟؟؟؟؟كلام غريب اخي ومؤسف…..

  12. محنك كتب:

    كلنا عندنا ايثالات مالية حكومية من المجالس …. وحق ناس واسر واطفال

    على الاقل انت حقك موجود وممكن تبيعوا الان

    لكن نحنا نقول شنو

    تبيع يا حاج

    هههههههههههههههههههههههه

  13. علي سنكل كتب:

    طفوووووش :
    أنا ما دايرك تدفقي مويتك على الرهاب ، أبكرونا بتاع المدونه ده أنا أول زول سمع بيهو و مشى ليهو و أداني بخره طلعت فشوش والزول الكنت عايز أبكرون يجيب ليهو ترقيه ماااااااات وشبع موووووووت.
    أسمعي كلام الببكيك. لمن أشوف ليك أبكرون بتاع الدباغه الأصلي ( بتاعنا ده تايوان).

  14. محنك كتب:

    انا لا اتحدث عن راى شخصى ضابط خدم عشرة سنة وبقى رتبة رائد وتم احالته … وآخر معلم علم اجيال واشتغل 30 سنة خدمة ومعاشاتهم ما متساوية

    السودان فيه ظلم كتير فى كل مكان اراضى زراعة تجارة اصحاب مصانع قلعوها منهم كدى انا برسل ليك قضية التوم مبارك الذى كتب عنه احد الكويتين عشان تقول الحمد لله
    برسلها ليك بهناك

  15. ابكرون كتب:

    يا خ اسالهم ليه ما استثمروا اراضيكم…..ده ما عنده دخل بمشكلتنا…. نحن كان عندنا تجمع او جمعيه هي العرضت استشمارها دون مشاورة الجميع وحتي دون حضور النصاب القانوني للجمعيه ……..بعدين قيمه 60 الف سنة 91 بتعادل 60 مليون باليوم ودي ما عايزه غلاط

  16. طفشانة كتب:

    على سنكل
    ابكرونا لو سمع كلامك دا بقطع رقبتك الزول ال كنت داير اجيبو ليهو ترقية امكن كتلو هو المهم انا ما عايزة اخسرو وما بتكللم عنو كلام ما برضيهو لكن انت برضو اعمل حسابك ياخى.

  17. طفشانة كتب:

    على سنكل
    فى الوقت الحالى اعمل حسابك شدييييييييييييد لانى شايفة محنك وابكرونا قربت تولع بينهم لو مشيت غلط اى غلطة بولعوها فيك
    عليك الله عاين ليهم مسخنين كيف ؟؟؟؟؟؟؟؟

  18. محنك كتب:

    انا فى صفك يا حاج ابكرون من ناحية التكلفة وانه الان ما بتجيب ستين امات افتكرت انو زمان ستين فى 25 فرق سعر الدولار بتكون مليار ونص

    ودخلها فقط 24 مليون

    كان الله فوى عونكم 60 مليون تجيب بيت يدخل ايجار ما اقل من 500 جنيه فى السنة 6 مليون فى عشرين سنة 120 مليون

    دا اخرت الجرى ورا الحكومة هى بتدى ساكت

  19. ابكرون كتب:

    هيييي يا طفوشه :انا اساسا الموضوع ده ما نزلتو في المدونه ….ومجرد نقاش وخلاص انتهينا
    سنكل ده يا طفوشه ناسي علاقتي التفاعلية مع مدني وبانت والبيان والدباغه وشنو ما عارف………شكيتكم لي الله انتو ما متابعين الكوره دي ؟؟؟؟؟؟؟

  20. علي سنكل كتب:

    لا ما متابعين الكوره ، و لا بتاعين كوووووره.
    إنت يا أ بكرونا ما شايف الحاصل ده ؟ و اللا شنو ؟ ما تفتح نيرانك في الناس الكفار ديل البياكلو مال اليتيم !

  21. الغبشة كتب:

    فكفكون:تنشروه فى اى حته لازم الناس تعرف البحصل وتعمل حسابه لو قدرت لاى شى ممكن يحصل لقدام،ده اذا قدرنا نعمل حسابنا.
    ياعمو ديل مدودرين الامه كلاها ما عارفه فى شنو بعشوم ذئب ثعلب كلب مستاذئب كلب اجيب ما فاى زولعاوز يقول الحقيقه معقول يقولوا ليك عاوز ناجر ارضك او اجرناها بكده ربك يعييييييييييييييييييييييييييييييييين .
    كسره:طفشانه خلى كسير التلج….قريتى كلام الزهراء عليك بالتلات تسعات.
    والى لقااااااااااااءءءءءءءءءء

  22. ابكرون كتب:

    شكرا مولانا الغبشة تسلمي ….يمكن تكون كلاب لهب….الخوف بس يقتلوها ويعلقوها ضأن ….زي ما حصل زمان في الثورات….
    التسعات الثلاثه بقن اربعه(التسعه في الكوتشينه بسموها طويله….زي زول)

  23. مشاكل كتب:

    سلامز

    الظلم ظلمات يوم القيامة .. بعدين ( الجماعة ) يجو شايلين حق الناس ديل على رقابهم .. الله يصبرهم على كدا بس

    بعدين ناس دال ما عندهم دخل في الموضوع .. لقوها باردة و شربوها … أسألو جمعية قدامى المحاربين التجار الجد جد ..

    كسرة
    لو مشروع الواحة و مشروع العيلفون كان لي اسي نايمين في البيت .. مشوها كدا .. يعني اول مرة تمشوها .. ما اهو ليكم عشرين سنة .. بس بقت على دي .. هاهاهاهاهاهاها

  24. مشاكل كتب:

    لو( ما ) مشروع ….

  25. محنك كتب:

    طفوش

    ابكرون ومحنك … فى بلد واحد بالمهجر وهو صديق عزيز بس حبيت ابين وجهة نظر مختلفة وهى الحكومة دايره سبب لقلع حق الناس …. لكن المره دى شركات وجمعيات وكده هى العملت العملية

    لكن ما اظن دال تغير موقفها لكن الجمعية لو بقت شاطره تلزم دال بان تؤول كل المنشآت الزراعية التى تقام على الارض الى الجمعية او اصحاب الارض … حتى يعوضوا التعب بعد 20 سنة

    ويمكن اعادة استصلاح الاراضى بدل كمائن الطوب الطمى دا ما يوزعوه على الاراضى دى ينفعها

  26. محنك كتب:

    شفت يا ابكرون الجاك بهناك …. الحمدلله البركة فى الارض

  27. مستر راعى كتب:

    فكينا ابكرون انشر هنا مالو عشان الكل يعرف
    لانه الناس البطلعوا على المدونه كتيرين شديد لذلك لابد ان تكون هى نقطه انطلاق واصلاح
    ماتكون خايف يقفلوا المدونه دى الحاجه الوحيده المابقدروا عليها
    وانت عارف ربنا يمهل ولا يهمل وهو البدى الرزق بعدين الحق حق
    احنا البدو والعرب مابنسيب واطاتنا تضيع ساى الا يحصل دم والارض زى العرض الاتينن سوا
    بعدين ما معقول حقك يقالعوك فيه الناس ديل مالهم زاتوا حيرونا
    هسع قلت تانى خرفانى ابيعهم من منازلهم اخير لى زى الناس البدفعوا ليهم ملايين عشان يمكيجوا ولا فى زول بسالهم من نفايات ولا زكاه ولا ضريبه ارضيه ….من داخل منازلهم فقط دحين بتى كان دايره تعرس بدفع ليها اتنين مليون لقشريه وزفتيه ,,,,تظبط روحها براها وباقى القروش تستنفع بيهم
    هسع ديل ليه مانزعوا بيوتهم وبدخلوا فى الشهر اكتر من ميه وخمسين مليون والله ماحسد لكن مقارنه بس … عشان العروس بعد ساعتين تغسل وشها والاتنين مليون تنزل فى الحوض مويه ملونه …
    شفتوا مفارقات البلد دى قدر شنو الشباب زاتو احتاروا
    عارف يا ابكرون واحد صديقنا صور ليه بترينات فى خطوبه جايبنها اهل العريس للعروس البترينه زى حقت الصايغ طويله وفيها رفوف ولمبات وقزاز وفيها طقمين دهب وتحت 25 مليون والبترينه التانيه زيها وفاظات القزاز كلها مليانه مكسرات تقول لى بده فى اليوم حق وجبه فول فى ناس عايشه وناس دايشه ..والسودان زى ماجات الاحصائيه نسبه الفقر 4% بالشقلوب والبلد بعده ده فقرانه عدمانه التعريفه
    خلينى المره الجايه احكى ليك لقطه فى منطقة عمل حيكومى عشان تشوف احنا وين
    يا سنكل ماتزعل مننا لو كتبنا حاجات عن السودان لكن بنواسى فى اخونا الفكى ابكرون بعد ماسحبوا منه حيجباته وبقى ما عنده عروق ولا بخرات
    ابكرون :
    نزل الموضوع وخلينا نعرف الماعرفنه وبرسل ليك الايميل بتاعى بس ارسله ليك وين بالدى اتش ال ولا شى تانى ————-تصبحوا كلكم على خير ونشوفكم طيبين

  28. ابكرون كتب:

    هلا يا مستر :
    لا يا مستر انا ما رافض انزله هنا بس تعودته المواضيع السياسية الجافة دي بنزلها في سودانايل وبرسل الرابط بالايميل للاخوان بالمدونة..
    ماتهم من سنكل ده الزول الوحيد الما بزعل ويخت في قلبه زي الناس الفي بااااالي هههههههه
    انت البوديك تعاين للفترينات دي شنو ده ياخ مرض قلب ونوع من الشو وما عارفين انهم بدخلوا ود الاحد ده بقطعة دبلان ومخدة طوبه….1
    الموضوع نزلته كلو وهو جاري من 2006 شي سودانيز اونلاين شي سودانايل حتي قبل ما ادخل قمردينة جبرا…..
    عموما الايميل بتاعي تلقاه في الرابط النزلته للاخوان قبل يومين وهو :
    http://www.sudanile.com/index.php?option=com_content&view=category&id=206:2009-03-21-19-00-02&Itemid=55&layout=default

  29. الزهراء كتب:

    صباحاتكم بركه
    والله حاجه جد مؤسفه
    لي متين الظلم والقهر واكل امول الناس بالباطل الى متى سيستمر هذا النهب عينك عينك
    يا عمنا ابكرون كان الله في عونكم وربنا ما بيضيع حق زول بس الانسان يسعى لاسترداده ويجاهد بكل الجبهات ولو مارجع يفوض امره لله العلي العظيم فهو يمهل ولا يهمل وهو بصير بالعباد وهو غفور رحيم ولكنه شديد العقاب وادعوا واكثروا من الدعاء فدعوة المظلوم مستجابه

    هذا بعض من كثير وياما ضاعت علينا اراضي ومشاريع دفعنا عليها دم قلوبنا وعلى عينك يا تاجر
    شي اراضي سكنيه وشي مشروع مدرسه خاصه اتقلعت عينك عينك وياويلك لو مشيت تكوس حقك يدخلوك بي حمد ويمرقوك بي خوجلي
    لكن والله حق المظاليم ما بيضيع
    صحي يمكن ناس دال ما عندهم مسئوليه مباشره عن الحاصل لانو الشغل ده شكلوا من فوق
    المهم لابد الناس تتجه للاعلام وتنشر الموضوع في كافة الاصعده ولو فوضتوا ناس وقدروا يمشوا لي اسامه داؤود صاحب المشروع ويطرحوا المشكله والمستندات فيمكن يتفهم القصه ويقدر يتخذ اجراء ايجابي

    واخيرا لله الحمد من قبل ومن بعد ويارب ابعد عننا ما يضرنا وانفعنا بما علمتنا وارفع عنا الظلم
    آمبن

  30. آآآآآآآآآآآآآآآآآآآآآآآآآآآآآآآمين يا أحباب
    و كان الله في العون

  31. مُخير كتب:

    العزيز أبكرون
    الحبان في كل مكان
    سلام
    دولة الظُلم ساعة ودولة الحق إلى قيام الساعة، وأهلنا بيقولوا كان أكلت اليتيم (أي أطعمته) لا تلحس أصبعك، يا خوي البياخد حق الناس بيشوفوا هنا في الدنيا قبل الآخرة ، غايتو يشيلو شيلتهم، وإنت يا جنابو تذكر دعاء علي الكرار كرم الله وجهه ورضي عنه وأرضاه (( اللهم أجعلني مظلوماً ولا تجعلني ظالم)) فالظلم ظلمات يوم القيامة وربنا يهدي الجميع ويصلح الحال آمييييييييين

  32. علي سنكل كتب:

    مستر راعي:
    إزيك يا أخي وكما قال لك الفكي أبكرونا أنا آخر من يزعل ، وديموقراطي للطيش و” راي خطأ يحتمل الصواب ورأي غيري صواب يحتمل الخطأ “.

    تزعل في شنو
    و تزعل من منو
    كل الناس صحاب
    كل الناس أهل
    والماهم قراب قربم جبرا

  33. ودالزبير كتب:

    الحبيب أبكرون

    عندي سؤال محتاج إجابه

    هل فعلاً كان هناك إجتماع للجمعيه وتفويض من الأعضاء لإبرام هذا الإتفاق المجحف

    سؤال تاني لماذا لم يجد هذا الموضوع سبيله للصحف في الخرطوم وهناك المثير من الكتاب المناؤين للنظام ويمكن أن يتبنوا حمله قويه لإيقاف هذا العبث

    مرحب أختنا زهجانه

  34. abu shosh كتب:

    الاخ ابكرون دعني اسالك بضعه اسئله عسي ان نفهم
    1/ منذ متي اعطيت الارض لكم
    2/ هل هي ملك حر ام ايجاره
    3/هل للضباط اي علاقه بالزراعه
    4/من الذي اجر الارض لدال (الم تكن لجنتكم المنتخبه)
    5/هل تدري بانكم ولجنتكم لم ولن تستطعيوا عمران الارض للاسباب الاتيه
    ا) ليس لديكم اي مقدره ماليه لانشاء طلمبات مناوله (المشروع يبعد هن النيل حوالي 22 كيلو )
    ب)نزع الارض من قبل الغابات
    ج)تهديد المواطنين بقريه الفرع والعسيلات لكم ووقف العمل اكثر من مره
    والان لنري كوبكم من الناحيه الاخري
    1)دال استاجرت الارض الموجره اصلا وكان بامكانها ان تذهب للوالي او البشير ويتم نزع الارض ولا تطالون لا بلح الشام ولا هنب الواحه
    2) بايحلر دال بدات في حل مشاكل المواطنين
    3)تم ارجاع الارض الي زراعيه بعد ان كانت مسجله كغابات
    4)للايحلره فتره محدده وبعد ذلك سوف ترثون ارض زراعيه مستصلحه
    اكتفي بهذا وان عدتم عدنا

  35. ابكرون كتب:

    نبتدئ من الآخر من (لفظ ان عدتم عدنا) …! من انت اولا وهل تمثل شركة دال وهل بعثوك للرد عنهم …وهل بيني وبينك اوبين اصحاب الارض اصلا مشكله لتستخدم اللفظ ان عدتم عدنا ….
    وحسب علمي انت ليس عضو بالمدونه وداخل فقط للموضوع ….وكان الاحري بك الرد في سودانايل وهو الموقع الذي نزل به الموضوع رسميا
    ثانيا انا لا يهمني ان تتبع الارض للغابات او اي جهة او اي بشر علي الكره الارضيه انا مشتري ولم امنح الارض مجانا وهناك قرار جمهوري بذلك وقرار وزاري ….نحن دفعنا مبالغ كبيره قصاد الارض…… ومشكلتنا الاساسية مع لجنتنا كما ذكرت في الموضوع …. وليس كل ملاك الاراضي زراعيين فانا حر ما دام دفعت ثمنها ازرعها او اتركها بور او ابيعهاوقد منحت الاراضي المجان للاطباء والبياطرة والمعلمين والحرامية وغيرهم ….
    لعلمك ليس بامكان الوالي او البشير او دال نزعها لان اصحابها وعددهم الف يملكون شهادات بحث ودفعوا ما قيمته 60 مليون من كل فلينزعوها ويردوا لنا مبالغنا وبيننا القانون ومن قبل ذلك رب لا يظلم…..
    ثالثا في دولة الظلم اي شي ممكن تنزع وممكن تحرق وممكن تدافع عن الظلم لكن الي حين….!!!!!!

  36. ألفاتح جبرا كتب:

    أبو الشوش :
    أنا قريت الموضوع ده متأخر شوية بس عاوز أقول حاجه وهى إنو الملكية الفردية دى (يعنى الحق أو الملك بتاع أى زول … حلالو يعنى وجايبو بى عرق جبينو) مافيش أى جمعية أو حكومة أو أى قوة فى الأرض تتصرف فيهو بدون إذنو أو موافقتو … يعنى لو الجمعية دى فيها ألفين نفر وقام أخونا أبكرون ( أو أى واحد) قال ما موافق خلاس الموضوع إنتهى ! وهذا ما لزم توضيحه (شرعا) والمسألة لو عاوزه ليها أسانيد (نجيب) !! هذا مع سلامى وتحياتى

  37. ابكرون كتب:

    شكرا جبرا علي المؤازرة والتوضيح
    العالم دي حتي اصحاب الكوب متشربين بفكر الجماعه اقلع صادرانزع ….شئ غريب يااااخ…..!!!!!

  38. حاج أحمد السلاوى كتب:

    الأخ ابو شوش ..سلام
    أولاً لست من الضباط المحالين للصالح العام أو الغير عام امثال أخونا الفكى ابكرونا صاحب الوجعة ولكن استفزنى تعليقكم المثير للجدل اعلاه والذى تحدثتم فيه وكأننا نعيش فى غابة لا قانون يحكمها أو سلطان .
    وكما قال الأخ صاحب الوجعة أنهم دفعوا مبالغ نظير شراء هذه الأراضى فليس لك الحق فى أن تسأل إن كانت لهم علاقة بالزراعة أم الصناعة أو أى شىء آخر ..ثم تساءلت عن قدرتهم شراء مضخات للرى .. ألا تتفق معى أنهم لو اجتمع كل مجموعة مع بعضهم البعض ألا يستطيعون شراء مضخة مياه ؟..
    ( دال استاجرت الارض الموجره اصلا وكان بامكانها ان تذهب للوالي او البشير ويتم نزع الارض ولا تطالون لا بلح الشام ولا هنب الواحه )واظنك تقصد عنب اليمن ..هكذا يقول المثل .
    بربك قل لى من أين أتيت بهذا الكلام الغير مسئول ؟ وكـأننا بلد إقطاعى يُذل فيه اصحاب الأراضى الذين يمتلكون المستندات اللازمة لما شروه من أراضى بحر مالهم..وهل من حق الوالى مصادرة أراضى الغير بغير وجه حق ؟ فما لكم كيف تحكمون ؟ألا يعد ذلك ظلماً واضحاً برأيك .. أم أن الغاية تبرر الوسيلة ؟
    إتقوا الله يا عباد الله ولا تبخسوا الناس أشياءهم ..فليأخذوا الأراضى ويعيدوا إليهم أموالهم ..
    أما عبارة وإن عدتم عدنا يُشتم منها رائحة الوعيد والتهديد بالويل والثبور ..فهل عدنا قانون الغابة و إلى مقولة القوى ياكل الضعيف .. أم ماذا تقصد بها .. أثابك الله .
    وكا ذكرت لك آنفاً لست أحداً من مالكى هذه الأراضى ..ولكن أحقاقاً للحق ونصرة للمظلومين ( وما أكثرهم فى زماننا هذا )ومداخلتك أعلاه هى التى دفعتنى دفعاً أن أسطر هذه الكلمات فى حق أإخوةً لنا فى الدين والوطن .
    والمثل السودانى عندنا يقول الله ما شافوهو بالعين.. لاكين عرفوهو بالعقل .
    .اللهم اجعلنا من اصحاب العقول …آمييييييييييييييييييييين .
    ولا اقول لك إن عدتم عدنا ولكنى أقول..سنقارعك الحجة بالحجة دون تهديد أو وعيد..

  39. ابكرون كتب:

    بصوا شوفوا يا يا شباب السلاوي حقاني كيف يديك العافيه طول ما الجداده حافيه

  40. محنك كتب:

    ابكرون اثبت انه اشترى ولكن بامتياز الخدمة بالقوات المسلحة … هل سالت اى محامى نجيض فى السودان عن المخرج … لانه مثل هذه الشركات لا تجازف بسمعتها …

    فلو الطعن فى قضاء لجنتكم التنفيذية وعدم اكتمال النصاب يمكن اللجوء لمسجل الجمعيات فى الرعاية الاجتماعية ول غير مسجلة قرارها باطل ولو كان النصاب غير مكتمل قرارها باطل

    ولكن بما انكم استلمتم ايجاراتكم قبل الزراعة ثم بان الان الاستصلاح والانتاج فحجتكم غير قوية
    كان من اول مره ترفضو الايجار وترجعوه لدال

    الان يمكنكم مفاوضة الشركة بتعديل السعر كجبر ضرر … كما هو فى حالة المضاربات والسلم

    وانا لا ادافع عن دال ولا اتهمها … فالسبب اولا واخيرا لجنتكم التى قامت بالتاجير وهى الاولى بالانتقاد ولك الحق فى الحصول على محضر الاجتماع او صورة معتمده منه

  41. ودالخلا كتب:

    من أجمل الأشياء يا صديقي أن ترى شخصا يبتسم أو مُبتسم … والأجمل من ذلك كله أن تعرف انك سبب ابتسامه، فهذا هو نصف الكوب !!
    ومن السهل جدا” وقوعك في حب من تُحب، ولكنك لن تجعل الحياة تدور، والحب هو الشيء الوحيد الذي يجعل الحياة تستحق أن نحياها وأوله حب الله، وثانيها الحب في الله
    ومن أعظم متع الحياة … أن يكون لديك أصدقاء حميمين كهؤلاء… وأن يكون لديك مكان تذهب إليه، كهذا المكان، فان كان لديك ذلك فأنت تمتلك منزلا وعائلة، لانه لديك من تحب ، وليس عمرك ياسديقي هو السنوات التي مضت منه، ولكنها السنوات التي عشتها منه وهذا هو النصف الآخر من الكوب !!
    ولكن أن تهمز هنا وتغمز هناك، فليس هذا هو الحب الذي نرجوه ونأمل، وما كنت احسب أن الأمر سيصل هذا الدرك، وما كان لذلك المقطع أن يختفي، كنت أرجو أن يكون باقيا” ليري الآخرون أثر فأسك يا صديقي……

  42. ابكرون كتب:

    الاخ المحنك : عندما عرضت علينا هذه الارض لم نكن بالقوات المسلحة كنا مدنيين انهيت خدماتهم للصالح (الخاص) يعني ما كان في امتياز دفعنا ثمنها ولم نراها حتي الآن . بل كنا نفر غير مرغوب فيهم من قبل حكومة انقلاب…!
    محنك الإنتقاد واضح موجه بالدرجة الاولي لمن راجع الموضوع وهو بالنص مذكور :
    ( أنا لا الوم شركة دال لانتهازها مثل هذا العرض والثمن البخس الذي عرضته، فهو عرض قُدم لها وبين المؤجر والمستأجر (يفتح الله)… بقدر ما استغرب موافقة جمعيتنا ولجنتنا ومن خلفهم وزارة الدفاع بهذا الحيف والجور …)
    كلام واضح مافي داعي لتكراره….
    في النهايه هذا حق ولن نتركه ونحن وراءه ووراءهم والزمن طويل فان ذهبنا فابناءنا من بعدنا……
    وبالله خلاص عرشنا ورفعنا والشكر أجزله لكل من شارك واثري النقاش

  43. ألفاتح جبرا كتب:

    أبكرون أخوى .. الله فى .. وجبر الله كسركم … خلاس يا جماعة الفراش إترفع لحدت ما (دال) تاااانى تكتل ليها زوووول !

  44. abu shosh كتب:

    سلام للجميع
    اولا اعتذر عن الفهم المغلوط لعباره ان عدنم عدنا فالمقصود بالجمله الرد علي ما كتبت
    ثانيا لم يرسلني احد لارد عنه انا مهندس زراعي واستفزني الموضوع لاننا كسودانين دايما ما نتعامل بالعاطفه في مواضيع كهذه واود توضيح شي واحد وانا سالت صاحب الموضوع ولم يرد
    هل العقد الذي بينكم وحكومه السودان هو عقد ايجاره ام عقد شراء ؟؟؟؟؟
    هل لجنتكم شرعيه بمعني انكم من انتخبتوها ؟؟؟؟؟؟
    للعلم فقط في هقد ايجاره الارض تنزع الارض لصالح الطرف الاول لدواعي كثيره منها عدم الاستثمار
    هل فكرتم يوما ما لاستثنار الارض ام جل تفكيركم هو الحيازه فقط
    وشكرا

  45. ممكون وصابر كتب:

    والله العظيم ده ظلم مبالغ فيه انا واحد من ابنا المعاشيين المفرض اكونو عندهم ملك ولا طين زي ما بقولو والوالد عليه رحمه الله كان بحلم باليوم الاستلم فيهو الواطه حقتو !!!!!! بس بدون مقدمات وبدون ما نعرف سمعنا انو دال اجرت الاراضي كلها برضو فرحنا لانو شركه كبيره وحتدفع كويس ما قايلين الشغله منتهيه كده 100 جنبه للشهر؟؟؟؟؟؟؟ والله اخير عدمه وبالجد حسينا باحباط شديد جدا لانو الناس الخدمه البلد لاكتر من 40 سنه بستاهلو اكتر من كده ولو شفتو حالم تستغربو والله ممكن تلقي لوا عديييييييييييييييل كده حق المواصلات ماعندو والله بدون مبالغه وبرضو تقول لي 100 جنيه في الشهر مناسبه ؟؟؟؟؟ علي العموم الفات القليل وفضل الكتير كلها كم سنه كده ونستلم وما زال الحلم قائما !!!!

  46. المشاريع الزراعية حق أصيل للضباط المتقاعدين – وكفاية حسد – ربنا يهديكم

  47. ابكرون كتب:

    بابكر مشكور بارك الله فيك
    ممكون : الحمد لله قال القضاء كلمته وحكم لصالحنا بارجاع الحيازات لاصحابها من شركة دال الذين تقدموا بشكوي للقضاء وعددهم نحو 300 ضابط وارجو ان يكون المرحوم والدك من ضمنهم او ورثته………………..

  48. ابكرونا انا والدى من هؤلاء الضباط عليه رحمة الله ونحن من ضمن ال300ضابط الذين قدموا الدعوى ضد شركة دال.وربنا ينصرنا عليهم وعلى من يدعون انهم فى يوم من الايام كانوا اصدقاء لوالدى هؤلاء الضباط الذين تواطوا مع شركة دال وانا للاسف اعرف انهم اصدقاء لوالدى للاسف الشديد لكن لابد ان ينتصر الحق.اخوك محمد كمال خضر

  49. ابكرون كتب:

    الاخ الخضر تحياتي واطلب من الله الرحمة للوالد
    اخي لقد كسبنا موضوع الدغوي الحمد لله وتم الفرز من مجموعة دال وما عليك الا ان تتصل بالمحامي احمد ابوقسي بعمارة المحامين بشارع السيد عبد الرحمن لمعرفة ماتم وما هو مطلوب …………تحياتي

  50. الاخ ابكرون تحياتى واحترامى نعم انا فى اتصال دائم بالمحامى ابوقسى وكل ماطلب منى قمت بتنفيذه من رسوم وغيره بس دايرين منكم تستعجلوا لينا الموضوع سريع براك عارف الظروف بقت صعبة (اكيد فهمت قصدى).

  51. الاخ ابكرونا بعد اذنك داير اتواصل معاك اذا فى طريقة هذا عنوانى على الفيس بوك محمد كمال الخضر.

  52. ابكرون كتب:

    شكرا يا محمد كمال بامكانك التواصل وايميلي موجود هنا osssm5@hotmail.com وبالمدونة
    وان شاء الله لو في تطور في الموضوع بفيدك

  53. ابكروووووووووووووووووووووووووووووووووووووووووووووووووووووووووووووووووونا شنو النوم ده مافى خبر جديد بلمناسبة على حسب عنوانك نحنا جيران انا ساكن الواحة غرب

  54. اقترب الفرج اللهم لك الحمد مافضل كتير عشان الحق يرجع لينا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s