الأحباب الإعزاء ..
أولاً لكم العتبى حتى ترضوا لغيابى غير المتعمد عن المشاركة فى المنتدى وقد كان ذلك لأسباب عديده أهمها حالة إكتئاب حاده (الله لا وراكم ليها) ! المهم يا جماعة الخير أنا شايف إنو (المسافات) شوية (إتباعدت) وأنا شخصياً ليا زمن فى ناس لا شفتهم ولا سمعت صوتهم زى زماااان إضافة لبعض الأعضاء الجدد العاوزين نشوفهم ونتعرف بيهم .. عشان ده كلو عاوزين لينا رحلة قريبة ويلا يا أفلايقا وإسترايكر …
سوداننا 
كيفك يا استاذنا الكبير الفاتح جبرا الله يفتح عليك ابواب الخير
كل سنة وانت طيب وربنا يحقق امانيك وتسلم لينا كتير
وينك ماظاهر بنقرا ليك بهناك ونعلق بجاى
طبعا مامصدقة انك تكتب بهنا وتخش علينا والله مبسوطه بيك كتير وبدخلتك
على المنتدى ……………تحيا وتعيش عمر مديد وتناقش معانا يا ابو الكل ……………..
ربنا يخليك للمدونه وكتاباتك السمحة شديد البنتظرها بفارق الصبر عشان اشوف اخر سخريه عندك
لكن صدقنى الكتاب الساخرين البتجيبهم ديل نهائى مابلحقوك فى السخريه انت براك ملك السخريه
تعيش يا جبرا تعيش
لو على اجيب يافطات واعمل مظاهرة واقول تعيش تعيش
احساس بالفرحه مابتوصف
حكاية .. أنا والله السعيد بيك شديد جداً وسعيد بى كلامك الجميل ده وإن شاء الله تكونى معانا فى الخرتوم هنا عشان تجى الرحلة ..وما تنسى تجيبى معاكى اليافطات
الأخ العزيز البروف الفاتح . . .
رحله ساى والله جيتك بي جاي وظهورك بعد الغيبه الطويله دي لو ما خايفين من المدام نعمل ليك عرس عدييييل كده مش بس رحله.
ربنا يديك العافيه ويخليك للأمازون إبناً باراً به ، تبحث عن حلول لمشاكله المزمنة وتكشف عورة أبنائه غير البارين به.
سلام وشوق شديد
محلات ودالزبير ( حسن طحنيه سابقاً ) لعمل اليافطات جاهزين لمدكم بأي عدد من اليافطات خدمه توصيل المتظاهرين لمحل المظاهره خدمه تاجير المتظاهرين حسب طول الحلقوم
حبيبنا جبرا
والله فكره كويسه نعمل رفرش ونطلع من رتابه الشغل ونقابل ناس نحن مقصرين في حقهم
أها الجمعه دي قريبه شديده والناس أغلبها بيكون إرتبط مسبقاً ما نقول الجمعه الجايه والمكان حله ناس أفليقا هناك في فتيح العقليين
رأيكم شنو ؟؟
السلام عليكم يا استاذ نا الكبير
والله نفسنا شدييييييييييييد فى رحلة نتعرف بيها على المدونييين بس رايكم شنو رحلتكم تكون فى مدنى انا شايفة انو احسن تجو مدنى مدنى الجميلة
الاحباب سلام ابونا جبرا انا جديد لنج في الحوش ده بس ماطليت عليك بي غادي لانه صعوبه في التسجيل وكدة ربنا يهون انشالله الواحد يظهر عليكم في الرحله المقترحه يتعرف عليكم كلكم صوره وصوت…
سلامز
و الله يا بروف طلتك هنا دي براها بالدنيا
لو ماف اي سبب للرحلة يكون دا سببنا
و ايدنا معاكم انشا الله
أخونا جبرا ..
حمدن لله على السلامة بيجاى … إفتقدناك مدة طويلة وجيتنا الليلة كايسنا ..
أنا أضم صوتى لصوت بنتنا العزيزة طفشوشة … طفشفش ..طفشانة .. ( وفى رواية اخرى سوبى ) لسببين الأول إنو فعلاً مدنى عروس الجزيرة الخضراء جميلة وتستحق الزيارة والسبب التانى إنو تطمنونا على أخونا الكاشف الشاعر الشفيف النذير ( نيام نيام )واتلسبب التالت طفشانة دى تتعرف عليكم أكتر وأكتر لأنها حبتكم حب شديد جداً ودا باين من مداخلاتها .. بس نصيحتى ليها أن تنسى موضوع الفكى ابكرونا .
أما نحنا طبعن ما عندنا طريقة نحضر معاكم بحكم وضعنا الجغرافى اللى دايما حارمنا من لقاكم والأنس معكم ..لاكين تاكدوا إننا ( شلة الصعايدة المعاى بيجاى ) معكم بكل أحاسيسنا ومشاعرنا ..وعشان خاطرنا .. ما تبخلوا علينا بالصور .
ربنا يديم المحبة بيننا وبينكم جميعاً .
كسرة سغيرووووونة : بعض الأحبة مسجلين غياب لعل المانع خير ..الكاشف البيشاوى ..نيام نيام ..أب احمد ..ولدنا سهيل ..
إضافة لقائمة الغياب .. أخونا من شمال السودان بكرى ود موسى ..والكاشف بشار بن البرد ..
سلام سلام يا اهل السلام..
كل عام وانتم بخير..مصطفى شوارع ولا شنو!!!!!!!!؟؟؟؟؟؟؟؟؟؟؟؟؟؟؟؟؟
بركة بالطلة يا بروف وربنا يزيل عنك كل كرب واكتئاب…ورحلتكم محضورة,,لكن قعد تعملوها ظاااااهرة معانا..
حكاية..مرحب بيك وبفرحتك الجميلة دى..
طفشانة..كيف نطفشى وتزهجى وانتى فى مدنى الجميلة الاصيلة!!؟ ماليك حق والله..
ابوحميد..عامل شنو بهناك؟؟؟
ابونا وعمنا واخونا واستاذنا الفاتح قلبو للناس … جاهزين بي برموداتنا ومارقين للرحلة بس قولو وين ومتين .
والله يا دفعة زي ما بيقولو القلوب شوهد كنت ,قبل يوميين تلاتة بتكلم مع د عزت بالتلقون و فبل ما اقراء موضوع ابكرون عن اللوم والعتاب وقلت ليهو الناس طولو من بعض ومحتاجيين لينا لي رحلة ولا اي لمة عشان الناس تنشط شوية وقلت ليو بس منتظريين الوقت المناسب بعد موسم الكتاحات والبرد والامتحانات والمطر الفي عز الشتاء والله بس تقول في اسكندرية
وخير البر عاجله\
يا ود الزبير محل ناس افليقا مع البرد والتراب ما اظنه مناسب والسلام
سلام يا بروف وللجميع…. سلامتك من الاكتئاب….شنوالخيانه دي يابروف…انا عندي اكتئاب عديل كده وبعيده ما بقدر امشي معاكم الرحله اعمل شنو؟؟؟؟؟.لانه انا بعيده….
الحاج احمد
كيف حالكم تمنى ان تكونو بخير وعافية
شكرا للوقوف بصفى
فى رواية اخرى سوبى —- تلقيك اتخلعت قلت هسى اللمة سوبى على طفشانة شنو
اما بالنسبة للفكى عليك الله اسالو نحن بقينا اصحاب وما شا الله امورى سالكة معاهو
الحبيب أستاذنا الكبير أبوناجي
الحبان في كل مكان
سلام
نحن من على البُعد نؤيد ما يطلبه جبرا، فمعزته تجعل طلباته أوامر وكم نتمنى أن نكون معكم ونسعد بصحبتكم في مثل هذه اللقاءات الودية الرائعة التي تعزز الصلات وتشحذ الهمم وترفع المعنويات وتصلح مزاج أستاذنا أبو ناجي وتخرجه من نوبات الإكتئاب التي لا يسلم منها أحد من الشعب الفضل.
ندعو الأخوة إسترايكر وسهيل وعبدوش إلى التحرك العاجل لإجراء التريبات اللازمة.
كسرة: يا أخوانا وين حبيبنا أفليقا، نفترض أنه مشغول مع المعايش من جهة والشحارير من جهة أخرى ولا نملك إلا أن نسأل الله أن يرد غربة أم حمودي وسروية وعبودي كي يعود لدانقتنا هذا الفتى المغوار أو الدينمو على حد وصف زعيم الكواشف الحاج أحمد السلاوي.
كما أنتهز الفرصة لأجدد طلب خالد مدني وألتمس من الأستاذ الفاتح جبرا الموافقة على إعادة نشر مقالاته هنا في ساخر سبيل، كي تستعيد القمردينة ألقها.
الحبايب جبرا و المدونين سغار و كبار و جدد و قدامى
عساكم طيبين
طبعا فكرة تمام لتجديد الصلات و المعارف و الود….. موافقين و مستعدين
أحييكم يا أحباب من “مدني” حيث حليت بها منذ الأمس الأربعاء لاجتماع في هيئة البحوث الزراعية يستمر هذا اليوم أيضا و طبعا لم تفت علي زيارة شخص عزيز حيث تناولت الشاي و الذي منو مع حبيب الكل “نيام نيام” و تجاذبنا أطراف الحديث و اجترينا الذكريات و حملني وصية أن اغريكم السلام “حبيبا” “حبيبا” و بدوري نقلت له تحياتكم و تمنايتكم له بالمداومة في المدونة و لكنه شكى لي خدمات “سوداني” النص كم و الانترنت البطئ و الذي منعه من الطله عليكم….
دمتم في حفظ الله و رعايته
د. عزت
من ود مدني السني عديل كده ؟ والله فيك البركه ، بالله أديهم طله وأبقى عشره عليهم ، وسلم لي عليهم واحد . . واحده ولو لقيت طريقه تغشى لينا البت طفووووشه وتديها تحيه خاصه من المدوناتيه ، وإنت طالع منها بشارع القبه أدعي لينا عند الشيخ ود مدني السني بمدد الأيام وراحة العضام ، و ليك ولنيام في الختام التحية والسلام.
دعزت سلامااااااااااات
واله مرحب بيك فى مدنى والبلد نورت والله
انشا الله تشرفونا ونشوفكم
الاستاذ على سنكل
تسلم ياسيدى على التوصية والاهتمام والله انا فاكرة ما فى زول متذكرنى لكن اهو طلعتو ناس ما هينين وربنا يديم التواصل وانشا الله يارب مدد فى الايام لعلى سنكل وراحة فى العضام
اخونا الكاشف ابو عصمت ..
الوصية فى الذمة ..تمشى كمان وتزور بنتنا طفشانة دى ..أحسن بعدين تطفش زيادة أكتر ما هى طفشانة ..ولازم بعد داك تقدم تقرير للفكى ابكرونا عن طريق الإيميل أو الفيس بوك ايهما أسرع عن حالته عشان يقدر يقضى ليها أمورها ..إن شاء الله ..
انت يا سلولو ويا سنكل من زمن الطفشي البت دي اسمها سوبي الله ؟
سلاااام تعظيم لسوبي
سلالالالالالالالالالالالام ومشتاقييييييين
شفت يا حاج احمد ذى ما قال ليك ابكرون انت من زمن الطفشان والله انت زول قديم خلاص
الفكى : شنو يعنى عامل نايم ولا الايميل الاخير ما وصلك
إنت يا فكي أبكرونا بوليس جوازات ليبي واللا فكي؟ الزوله كاتبه إسمها بخط كبيييير طفشانه. القلبها سوبى شنو؟
عن نيام ( يديهو العافيه) مشى في ليبيا الجوازات مع صاحبو حلفاوي اسمو فرح محمد فرح ، بتاع الجوازات سألو اسمك مين فرد إسمي فرح محمد فرح . . فما كان من العسكري إلا وطلع قلمو و غير الإسم في الجواز إلى فرج محمد فرج ( طبعاُ ليبيا نصها إسمهم فرج ، وليس لديهم إسم فرح ).
كبيرنا وحبيبنا الغالى جبره …. منور وليك وحشة … سلامتك من الكآبة وربنا يديك العافية والسرور …. للأسف انا خارج الخرطوم بس لو الرحلة ح تكون نهاية الاسبوع ح أكون وصلت ان شاء الله …. تحياتى وامنياتى الطيبة لكل الاصدقاء والزملاء على أمل اللقاء بكم قريبا .
مرحب بيك حبيبنا جبرا .. الفكره ميه الميه .. فصلو ونحن حنلبس .. اقترح تكوين تيم لمتابعة و إعداد الرحله على رأسهم ود الزبير و البشاوي لتحديد المهام و الإشتراكات و المواعيد و المكان المناسب .. و نحن جاهزين بإذن الله
الأحباب الأعزاء:
والله ما عارف أقول ليكم شنو؟ غايتو سلامى وتحياتى وأشواقى ليكم كووووولكم الناس القدام والناس الجداد والمعانا هنا فى الخرتوم والفى باقى السودان والناس البره ربنا يرد غربتهم والناس الشفناهم وقابلناهم والناس اللسه .. والله أنا لو قالو ليا أمنيتك فى الدنيا شنو أقول إنو نتقابل كوووولنا فى حتة واحده !!
الأحباء الأعزاء :
شنو الحكاية ؟ (لابدين) مالكم؟
تعرف يابروف الناس دى الا احركها ليك بالتلفون بس دقايق وان شاء الله نهاية الاسبوع دا ولا رأيكم شنو ياجماعة ؟؟؟؟
التركي لحدي اسه ما جاني تلفون منك …….خلاص انا حردااااااااان (التكريتي)
ههههههههههههههه ابكرون ياخ انت تلفونك مقفول طول الخط …. تعرف الناس اى واحد بقول انا ماعندى مانع لكن مافيش خطوة لقدام ياخوانا شنو … خلاص تعالو فى الاجتماعيات هناك شوفو فى شنو …. لكم الاشواق
هووووووووووووووي يا ناس الحاصل شنو .. إنت بي ابكرونكم و محتاجين ليكم فكي كااااااارب ..
تقرر الآتي :-
* – قيام الرحله يوم الجمعه القادم 7/2/2010 وذلك لتلافي التراخي في الموضوع
* – تحديد قيمة الإشتراك ب30 جنيه مبدئيآ و تجمع عند كل من استرايكر و افليقا و البشاوي وود الزبير و التركي.
* – التجمع مبدئيآ الساعه 8:30 في موقع يختاره الجميع و يحدد حسب الوجهه.
دا كووووولو طبعآ بعد إذن عمنا جبرا صاحب الفكره
هههههههههههههههه ياسهيل ومنو القال ليك يوم 7 جمعة ياخويا يوم سبعة جمعة مسيحين … الشايلو يتهنى بيهو
ن
نأسف للخطأ .. الجمعه الموافق يوم 5/02/2010
اخونا التركي قال يوم الجمعه عندو عرس ود اختو و عازمنا كووووولنا .. يعني شكلها كده حتكون يوم السبت 6/02/2010 ..
يلا يا شباب همتكم معانا.
يا عيني على الهمه !!!!!
سلالالالالالالالالالالام
يا جماعة دعواتكم شدييييييييييييييييييييييييييييد عليكم الله
لانو بكرة عندى مناقشة رسالة الماستر الساعة اتنين عليكم الله ادعو لى بالتوفيق والتثبت وعدم الرجفان
بنتنا الطفشانة ..سلام
أول حاجة حمدن لله على السلامة ..وإن شاء الله ربنا يطّفش منك الرجفان والخوف ويثبتك فى الكرسى ساعة المناقشة ..لو كنا عارفين حكاية الماستر دى بدرى شوية كنا كلمنا الفكفك أبكرونا أداك شوية حجبات وكان عمل ليك جلسة دعاء خاصة فى الدوحة ليلة الخميس الفات ولاّ كان رسل ليك محاية .. غايتو حصل خير ونتمنى ليك التوفيق والثبات والثبت..وعقبال الدكتوراة كمان ..
بس ما قلتى لينا الرسالة عنوانها شنو ؟ أوع تكون فى الفقرا والمحايات ..وكدا ؟
وربنا سمعنا سمع الخير ..وعاد بعد الماستر إن شاء الله شوفى ليك إسم غير الطفشانة دا ..وبالتوفيق .
بالتوفيق إنشاء الله اختنا طفشانه .. في زمننا كان قبل المناقشه يا جدو في حاجه إسمها كاس الشجاعه .. و الحدق يفهم
يا ناس هوييييي الرحله حنعمل فيها شنو .. يالتركي دور اللعب و سخن الجاز .. انا و البرينسه ( البوكس ) حاضرين
شكلي كده حأعمل الرحله براي .. امشي اشتري لي سندوتشين طعميه و قزازة مويه و شوية تسالي و نبق و فول حجات و امشي البحر .. اشغل مسجل العربيه لما الواطه تمغرب اجي راجع مبسووووووووووووووووووووووووط و ممخمخ .. وبس.
يا عمنا : الشردن خلهن .. أقرع الواقفات
السادة مدونجية الداخل ..
الحاصل شنو ؟ أخوكم سهيل دة صوته راح من المناداة للرحلة ..مافى حد قال ليهو عوك ..
لعل المانع خير ويمكن الناس مشغولين بالإنتخابات ..يا سهيل ..
إنت الإنتخابات دى ما عندك بيها شغلة ولاّ شنو ؟
طفشانة : موفقة ان شاء الله وثابته كمان … أها الساعة اربعة مابشرتينا ؟
أخخخخخخخخخخخ الحبيب سهيل : ياخ تلفونى ضاع ليهو يومين كدى تعال عليا وننظمها على يوم السبت ياقلب .ولا رأيكم شنو ؟؟؟؟
طفشانه:
والله معاك حق ، وأنا أقول طفووووشه دي مشت وين؟ ماستر عديل كده ؟ إن شاء الله تكوني لي حسه خلاس مريتي وقبلو ليك رسالتك بإجماع اللجنه ، يا رب. يبقا طمنينا على النتيجه.
السلام عليكم يا جماعة الخير
انا ناقشت ومعنوياتى فى السما كنت ثابتة
والحمد لله فى المقام والاول، ولكل من ساندنى بالدعاء والتشجيع
شكرا الاستاذ حاج احمد واخونا على سنكل والفكى ابكرونا والاخت المغبشة شكرررررا ثم شكرررررا وربنا اوفقكم انشا الله
شكرا الاخ سهيل برغم ماتمر به من كواريك وجوطة لكن برضو ساندتنى ودعيت لى وانشا الله ربنا اجمع ليك الناس للرحلة دى والله كرهوك زاتو حقو تمش براك
ده اسمو كلام يارجالة ؟
الناس دي مالا مترخرخة كدة ؟
عباس
سلامات ليك وحشة
طفشانة ما شاء الله عيني باردة مبرووك الماجستير و أوع من الدكتوراه باقي الولاد بخافوا الواحد فيهم يبقى راجل “الدكتورة” ده طبعن لو الحالة الاجتماعية ما بطالة……
اذ قالوا في استبيان مرت علي الجماعة استمارة كتب صاحبها في خانة الحالة الاجتماعية “ما بطالة”
طفشانة..سلام..
مبارك الماجستير وعقبال كل ما تتمنين وترجين من خيرى الدنيا والآخرة..
مبررررروك للبت طفوووشه وعقبال العريس ان شاء الله
عقبال الدكتوراه يا
ط
ف
ش
ا
ن
ه
وبمناسبة الماستر حقوا تغيري اتجاه رحلة البروف دي لواد مدني – حديقه أم بارونا – علي شرف ماستر البت طفوشه ///كل الامنيات القلبيه بمستقبل زاهر زاخر بالابحاث والانجاز///
أبكرون: آآآآي عقبال العرس لكن انت عملت المحايات والحجبات وللا لسه نايم في خيرة البت دي
لا خلاص امرها مقضي باذن الله يا عُبد…بس بياضا تعبان…لكن ما مشكله ما دام حتشوف لينا ناس بانت….
بانت سعاد
طفشانة ..طفشفش ..طفوووووشة ..طافشة ..ومطفوشة ..كفاية ولاّ ازيد ؟
أول حاجة نبارك ليك الثبات عند المناقشة . ..وربنا يسمّعك سمع الخير ويقولوا ليك نجحتى بدرجة الإمتياز وعقبال الدكتوراة .. لاكين أفتكر الأولوية للعرس ..موش ؟ إن شاء الله ربنا يديك إنتى وكل أخواتك من الحرائر شبان الحلال وما عاوز أقول أولاد الحلال ..ألف مبروك النجاح وزى ما قالوا للنجاح طعم حلو ولذيذ ..
ولدنا عبد الرحمن ..أمبارونة حتة واحدة ..محل القرود ؟ يعنى هم ناقصين ؟
أخونا الفكفك ..بركاتك وحركاتك ..والبياض بيزيد كلما زادت النجاحات ..طول بالك وما تفضحنا قدام الأجانب بطلباتك الكتيرة ..روق المنقة ..
يا فكفك ما تذكرنا بانت ياسلااااااااام
كنا ساكنين بانت عزابه في سمستر 3 و4 جنب ميدان المولد طوالي -كانت أيام والله
شاي المغرب من عمك فرج الله
وللا البوش من محطة أبو جبل
كانت أيام يا أبكرون لكن ما قلت لي ناس بانت ديل مالك معاهم
طفشانه:
نبارك ونهنئ ونفرح معك و مع الأهل والصحاب بنيل درجة الماجستير و عقبال الدكتوراه. وشرفتينا بالثبات ثبتك الله يوم لا ظل إلا ظله.
السلام عليكم
الله ابارك فيكم كلكم وانشا الله عقبال نبارك ليكم ماستر ولا دكتوراه ولا اى شى سمح
كلكم شفتو اقتراح اخونا عبد الرحمن انكم تجو ام بارونا والله لو موافقين انا على اى شى
بس انتو تجو. يلا اتفقو لوبقيتو عليها ورونى من بدرى
حاج احمد السلاوى
زيييييييييييييييييييييييييييييييييييييد عشان اعرف مدى قدرتك على الاشتقاق
مبرووووووووووووووووووووك الماستر يا بتنا و عقبال البورفيه – ( كده صاح يا عمك )
انا حردت الرحلههههههههههههههههههههههههههههههههههههههههههههه – ما داااااير
الله ابارك فيك ياسهيل
ارجو شرح الكلمة ال سالت منها عمك
وبعدين مما قلنا مدنى تقول حردناها كويس لمن الاقيك
لا والله يا بتنا .. مدني على العين و الراس و ما بس .. بس الجماعه نايمين خالص
اما معنى الكلمه رغم الخطأ الإملائي فهو = النسب إلى بروفيسور فتختصر عادة في السودان إلى بروف ..و انا قمت نسبت اللفظ إلى الأخيره .. وقع ليك ولا نجي مدني .. وينك ياجدو تدينا درس عصر ( بي حقو )
ولدنا سهيل ..
إنت بس أجمع الناس العاوزين الدرس ونحنا جاهزين ..ومجاناً عشان خاطرك .. يا غالى ..
وطفشفش عاوزة تعرف كل شاردة وواردة ..خلاس أنا اخليهم يجوا ويعملوا الرحلة فى حديقة القرود ديك أسمها شنو .. أمبارونة .. أوكى ؟
عمو سلولو:نخلص من عبدوش تجبنا طفشانه الله كريم علينا….
سلولو والغبشه /هييييي كمان مالكم ومال طفشااانه الله؟
يا جماعة الخير افليقا الحاصل عليهو شنو ؟ يكون طلب العلم في الصين؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ظ
ياعمنا فكفك .. افليقا دا لو مشى الصين بيرجع تقليد ( ني ها)