سلام الجفا

Posted: الأحد,31 يناير, 2010 by عبدالرحمن أحمد in إجتماعية

ولأن بين الأمكنه إختلاف العاده والتقليد والجو المحيط والفقاعه الهوائيه وهي المسافه التي يسمح بها الفرد للآخرين  

بالإقتراب منه ولأن دخولها يسبب الضيق وألم الكلي الشديد ولأن بين كوستي والدلنج مساحه كما يقول أستاذنا بشير عبدالله بشير ولأن بيني وبين أحبتي ينهض ألف باب ولأن كل هذه  اللأن وجب طرق الباب وقول السلام سلام عليكم أهل الدانقا وأيدينا خضره عليكم بس ردو لي السلام وما تبقوا زي صاحبنا “ص” الاتي فته:-

 س:السلام عليكم

ص:أهلا

س:”في سره” أهلا!!!  الزول دا مالو زي المتغير كده  أهلا حاف ساكت الشي العارفو أهلا دي معناها أقطع وشك  كلام عجيب

مثال2

 س : وينك يا أبوالصادات

ص :مرحب!

أو

ص:…………….

س :لأصحابه”يا ناس شوفو لي حل-بلاش التانيه”

أصدقاء “س”:مالك يا خوي شاكوش تاني وللاشنو- أصلو يا جماعة الخير” س” دا معتاد شواكيش حتي المسامير بدت تغير منه لانه أصبح يشاركها الطرق من علي رأس المدعو فأصبح بينها وبينه عداء دائم بدليل أنها كلما وجدت إلي رجليه سبيلا وصلت.

 س: بس لارد علي لا سلم “رد عليه لكنه قال مرحب !”

أصدقاء”س”: وشنو يعني الفرق شنو؟

س :وكمان ياجماعة الخير يفرق كتير طعم الحلو لو يبقي ……وتمر من غير شنو ما عارف —وهاك يا بكا والناس تهدي والواسطه خشت

طبعاً صاحبنا ” س” دا رهيف لكن كتير من بني جلدتي بني سودان  بياخدو الموضوع دا ما أقل من تقليل شأن وتاني ما يسلم علي البكلمها خلي عليها هي ظاااتها ودا رد فعل حقيقي لسلام الجفا أو لنظام  لارد علي لا سلم , نظام أنا حأضبح الكديسه من مراحل الريده الأولي وأنا أفتكر إنو دا ضبح مبكر.

 – ونرجع للأن ولأن حياة البداوه أشد شسوعاً لإنجرادها وقوة إتصال الذاكره بمواطن الإستقرار فيها كذا تكون عادات السلام بين الشعوب وحتي في الوطن الواحد فزول الباديه يختلف عن زول المدينه وحنية أهل القيزان-جمع قوز و القوز لمن فاتهم الاستماع هي  القري النائيه وبعيده- وليست هي  البويلرت لأغراض التسخين -حنية أهلنا ديل يدللون عليها في سلامهم يقوم ليك فوق ويكرر السلام والمصافحه وكلما تقول خلصت يبدا ليك من تاني مره

-تقوم تجي المدينه أو العاصمه ما كل ناس العاصمه  تلقي حاجه عجيبه السلام بمصطلحات جديده وبسرعة الفلاش فور ويرد وهاك يا هاي وباي وجاو-تلاته نقط-وسلام بنات  الجامعه شي عجيب ما بشبه ناسنا وأهلنا ويا حبايبنا مع السلامه أو علي قولهم جاو-أم تلاته نقاط.

Advertisements
تعليقات
  1. عبدالرحمن أحمد كتب:

    تحياتي لكل الأحبه يا شمباتي ويا حاج السلاوي خلاس بقي عندنا باسويرد ودي بداية المسير إنشاالله نقدر علي كتابات توازي قاماتكم

  2. عبدالرحمن أحمد كتب:

    وقامات كل الدانقوست دوت ساخر سبيل

  3. حاج أحمد السلاوى كتب:

    ولدنا عبد الرحمن أحمد ..سلام
    مبروك الباسورد …ومنتظرين منك الكثير ..
    وبالتوفيق إن شاء الله .

  4. مشاكل كتب:

    سلامز و سلامز مربع و سلام مكعب يا عبده
    مبرووووك الباسويرد و انشا الله باسويرد مال وعيال

    اول تعليق في موضوع الشواكيش دا
    و لاني معروف في الفيسبوك بمداوي جراح المشوكشين …. فبقول ليك

    الرجال كل المسامير … لا تزيدهم الشواكيش الا ثباتا

    يعني راجل يتهز بي سبب شاكوش دا المفروض نعمل ليه اختبار الحسكنة في الجاقورة كما قال الفكي اب جقدو الشاكوش عشر

    بعدين الناس بقى ما عندها وقت لي سلام ( الحنية ) خاصة مع سخانة الجيب و الجو
    السلام بقى كلو هايات و بايات و سي يوو صبح صبح
    لكن دا في مجتمع الشباب بس و بنات الجامعات السمحات .. لكن الشينات اخير يبقو طيبات و يسلمو بي حنية .. كمان لو عملو ماستر و دكتوراه بنفعم لي قدام .. و السلام

  5. عبدالرحمن أحمد كتب:

    مشاكل سلامزين مربعين

    ما دام يامشاكل عندك حل لمشاكل المشوكشين في وش الكتاب بظهر ليك بهناك أنا عندي ولاد عماً لي كدي بجيبهم ليك تشوف ليهم دواء

    لكن يا خوي رايك شنو البسلم بي بسمه بس

  6. nono كتب:

    abdozc/

    نحيك في منتدي سااااااااااااااخر سبيل(سوداننا)

    مبرووووووك الباسوير وبدايه موفقه؟

    نمشي نجيك بي رووووووووواقه ؟

    نشوف معاااااك حروووف الهجاء(س________ص)

    الشوووواكيش ذي ماقااااااااليك اخووونا مشاكل (سلامز) انتوو هو ( بمداوي جراح المشوكشين)

    هوووووو المساااااح دمع البكااااااااااء؟؟؟؟؟

  7. عبدالرحمن أحمد كتب:

    يا نونو تشكرات كتيرات
    والتحيه والتجله لك – علي طريقة أركان النقاش –

    أما عن مواضيع الشواكيش دي حأشوف مستر شكلة بي غادي كان نلقي دباره للناس المساكين ديل

  8. حاج أحمد السلاوى كتب:

    ولدنا عبد الرحمن ..
    شكلك كدا أخدت ليك كام شاكوش من النوع التقيل ..أوع يكونوا عملوا كدمات ظاهرة للعيان ..
    ربنا يكفينا شر الشواكيش والشواشكجية .. غايتو خليك قريب من صاحبك سلامز دا مع إنو عامل فيها المدافع الأول والأوحد للمشوكشين ومداوى جراح المشوكشين.. ويبدو إنو أخد دروس كويسة فى كيفية تقبل الشواكيش من كترة ما أخد من الشواكيش ايامها ..نحنا عارفين كل حاجة والطير الخدارى بيجيب لينا كل الأخبار الجديدة والقديمة ..

  9. عبدالرحمن أحمد كتب:

    التجربه خير برهان يا أبو الحجاج وأنا قاصد مستر شكلة طبعن
    لكن مرة دايرين يدو صاحبي شاكوش وأنا كنت جنبه
    أها وبعد داكا
    الزول أخدلو جفلتن لا جاي – علي يمين الشاشه
    الشاكوش الما بخجل يقوم يجيني ليك في نص الراس
    لكن برضو لما سالوني قلت ليهم
    ما كتلونا -علي وزن يا نكتلكم يا نديكم شاكوش-
    أها كمان ما أغطي لصحبي وللا شنو

  10. الأخ عبدو الف مرحبتين حبابك ومبروك الباسويرد وعقبال التنى … ياخ كوستى دى لما نقرأ ولانسمع حروفها الخمسة دي فى ناس بتلخبطو مالك عليهم … ابوشريف والقوز والرملة الدقاقة بس شواكيشها كمان صاموتية … بداية موفقة وفى انتظار المزيد

  11. ابكرون كتب:

    عبد الرحمن : تحية وهلا بيك محررا ومعلقا وكل شي في ساخر سبيل نورت بيتك ….سلاااام الجفا ده زكرني سفر الجفا المسلسل
    اكيد بتتذكره

  12. عبدالرحمن أحمد كتب:

    تحياتي تصح أشواقا تهز النبض ياأبكرون ليك كل التحيات
    إلا سفر الجفا دا يخربنا ما سمعنا بي
    كو ما سمعنا به – بيهو –

  13. حاج أحمد السلاوى كتب:

    سلام الجفا دا بيذكرنى قصيدة أخونا الشاعر ……….. ( تقول أهلاً ) وقصتها إنو كان واقع فى قصة حب من جانب واحد وقام قابل الحبيبة دى مرة من المرات فكان سلامها ليهو سلام بااااااارد وسلام جفا وهو كان متوقع غير كدا ( يا ربى كان متوقع دقاقة ؟؟؟؟؟ ).. قام عمل قصيدة مطلعها تقول أهلاً .. وارجو من الكواشف ( اكيد ابو عصمت تكون عنده ) لو أى واحدة يعرف تتمة القصيدة دى يرسلها عبر ساخر سبيل ..
    وبرضو بنقول أهلاً ..بس من غير جفا .

  14. عبدالرحمن أحمد كتب:

    كوستي يا التركي حكايتها حكايه ناسها وسمكها وبحرها الابيض
    -وبين كوستي والدلنج مساااااااااحه ومسافه
    -كوستي يا نفاج غرب البلد لجزيرتها ووسطها وشرقها برا ونقلا نهريا
    -وبرضو هي -كوستي طبعن- نفاج لقلوب ناس كتييره لكن نصيحه مني لناسك البتلخبطوا ديل يشيلوا شيلتهم الناس ديل شواكيشهم بررررررررره – ما يسمعونا ناس كوستي كمان-

  15. الزهراء كتب:

    أخونا عبد الرحمن
    نورت دارك وشرفت اهلك بي قدومك
    ومبروك الباسويرد وعقبال الباسريييد

    لكن نصيحه مني ليك يا عبدو ابعد لي من مشورة مشاكل ده وركز مع ابكرون
    ومشاكلك كلها قصدي شواكيشك كلها حتتحل
    اقعد عافيه اخوي والى الامام وبالتوفيق

  16. الغبشة كتب:

    عبدالرحمن:اهلاً
    اهلاً
    اهلاً
    ؟؟؟؟؟؟؟؟؟؟؟؟؟؟

  17. nono كتب:

    اهلا اهلا هلا اهلا اهلا اهلا

    اهلا اهلا اهلا اهلا اهلا

    يا غبشه ……. وحشتينا …. نورتي….. ليالينا

    و اتلموا ….الحبايب ……..و اتلموا ………الحبايب

    و اتلموا ………………………….الحبايب

  18. الغبشة كتب:

    ماتخلى الجفا يانونو وتظهرى بهناك؟

    يا عبدالرحمن:اهلاً اهلاً وبعده سهلاً عشان ماتزعل ومرحب بيك مبااااااارك الباس ويرد………………………. لكن تصدق كل يوم تلقى حاجه تزيد يقينك بانو شريعتنا سمحه تلزمك بالرد على السلام وماتفرض عليك السلام وانما تجعله سنة حميده وان اكثرت منها ادخلتك الجنه وبالاكثار تقرب وتحبب بين الناس…..
    وعدم السلام بجيب ملام…………………وبجيب جرس لما يكون من الحلوين؟؟؟؟؟
    …………………رسل لى سلامك خلينى بيه انعم…………………….

  19. nono كتب:

    الغبشه/ كيفك

    ماتخلى الجفا يانونو وتظهرى بهناك؟؟؟؟

    شنووو يابت امي تخميني كده تديني سطر واااحد ؟؟؟

    هسسسسسع المجااافي منووو؟؟

  20. زووووووول كتب:

    عبدوووووسلاااااام
    اولا احيك تحية جفا فاقول :
    اهلا آآآآآآآآآخوى
    لكن يا معلم سلاام بنوت الجامعه دا اسكت خليهو اخر يا قبل واخر يا شنو ما عارف مع انو ما خايلا فى بنوتنا ديل نهائيا .
    وجاييك برواقه

  21. علي سنكل كتب:

    مبروك البسورد يا عبد الرحمن وبدايه موفقه ( بداية بكاء ) ، عشان كده عجبت شيخ البكايين الفكي أبكرون.
    يا حاج السلاوي القصه إنها كانت معاهم في الجامعه وكتب فيها الشعر وما أدتم أي قرصه لحد ما عرسوها و ساقوها لندن و هو اشتغل وودوه بعثه لندن. قابلها في مناسبه بتاعت سودانين وجرى ليها هاشاً باشاً عشان يسلم عليها مفتكر إنو قلبها يحن في الغربه . وكانت المفاجأه إنها إختصرتو بالرد البارد ” أهلاً ” فكتب :
    تقول أهلاً
    وعاد أهلاً منو البرضابا
    في بلداً ولو هولك ولو هولي
    و أنا الفي بلدنا في وصفك بشيل حولي
    و في أوصاف محاسنك جف مدلولي

    وشنو تاني يا بقا ريتش؟

  22. زووووووول كتب:

    هيييع ابشر يا سنكل

  23. علي سنكل كتب:

    وين إنت مختفي يا زووووووول كيف أحوالك يا راجل ؟ ليك وحشه. ما أفتيتنا في حكم مباراة الجزائر و مصر القابض ؟

  24. زووووووول كتب:

    استاذنا وحبيبنا سنكل سلاام
    بس شوية مشغوليات يا عمنا لكن معاكم حتى الكاس .
    بصراحه اعجبتنى ابيات الرجل الكبكابه المذكوره فى تعليقكم اعلاه ولو البتاعه دى موجوده كامله حقو تنشرا لينا هنا ولو ما حافظها كلها اتصل بصديق وجيب لينا عقابا .
    اما الكره وبطولة امم افريقيا فقد كنت وما ذلت اعجب بالمنتخب المصرى حامل اللقب لثلاث اعوام متتاليه لكننى اعترف وابصم بالعشرين بان الحكم كوفى كودجا بونافونتور (اسم زى الليل ) مرتشى وبالدولار كمان حيث لا يستحق المدافع رفيق حليش بطاقة صفراء فى ركنيه حاول ايداعها فى الشباك قبل ان يمسك بها الحضرى . اما المدافع بلحاج فيستحق الطرد من انغولا زاتا وكذلك الحارس شاوشى .
    لكن الفراعنه دقو كفر صاح يا سنكل وقولى انا خليهو قولك انتا شنوووووووووووووووو؟؟؟

  25. زووووووول كتب:

    وما زلت عفوا بالزاى

  26. علي سنكل كتب:

    زووووووول والله ما حافظها كلها ، طال الزمن ووهن العظم وضعفت الذاكره ، لكن القصيده للشاعر الكبير كامل عبد الماجد إبن الجزيره البار. وغالباً تكون منشوره في ديوان كامل ” سيد الإسم ” متذكر منها الزياده دي بس:

    بدورك كنت تحضني
    تسالمني وتقول لي البلد كيفن
    حبابك عشره يا زولي

    طبعاً سيد الإسم دي كلكم بتتذكروها غناها أحمد الجابري:

    محبوبي وقتين يبتسم
    الدنيا يا ناس تنقسم
    الفرحه تملاها وتزغرد فيها والشوق يرتسم

  27. ابكرون كتب:

    قالوا في نخيج هنا طولناما اتخجينا
    دي ياسنكل كلمات كامل عبد الماجد:

    تقول أهلاً
    وعاد أهلاً منو البرضابا
    في بلداً لا هولك ولا هولي
    و أنا الفي بلدنا في وصفك بشيل حولي
    و في أوصاف محاسنك جف مدلولي
    حبابك عشره يا زولي
    بدورك كنت تحضني
    وتقول لي البلد كيفن
    ————————————–
    زووووول لكن لقيتك إهي….
    بعدين كامل ده عنه قصيده تجنن اسمها(اسه فيك انا شن أسو)
    في آخر مقطع بقول :
    الـــــورد لــــو جيتــــي جنبو بقطفك مـــــا بتقطفــــــي
    والعســـل بهجــر مناحلــــــو ويرشفك مـــــا بترشفـــي
    قلبــــــي فـــارش ليك أزاهـر خشــــي جــــوا وشرفــي
    إلا بــس شيـشـك عـليهــــــو إجتيـاحـــك خـفـفـــــــــي
    وفــــي الدخـول خليك حنينـه نبضـــــو أوعـى توقفــي

  28. عبد الرحمن و زواره سلام

    و مبروك للبكايين بواكير مقالاتك في ساخر سبيل و خليك قريب زي ما بقول شمباتي

    انت يا عبد الرحمن (س) دا صاحب أفليقا برضو و الا تشابه في الباس رييد (حلوة يا الزهراء)

    و الله اشتقنا لأفليقا و صاحبو (س) الله يرد غربتك يا سمسمة…!!!

    و شكرا يا أبكرون لتلبية عزيزنا سنكل و السلاوي و نزلت ليهم “أهلا”

    ما ألقى عندك “شفتك أمس غلبني لي وهجك أمس” عشان أفليقا

    تحياتي ليكم كوووولكم

  29. عبدالرحمن أحمد كتب:

    الزهراء
    آمييين يا الزهراء والباسرييد دا ودرناه زي الشفره الوقعت في البحر وسيدها الحافظها فقد الذاكره0 لكن يا مشاكل وقعت مع الزهراء وقعه سوده وصوني ان أختاك عديل كده بعدين أحكي لي أما عن أبكرون والرمله البمبيه والكديسه البيجيه لزوم الحجاب وكده ولزوم الترشيح للرئاسه أنا معاه معاه
    ــــــــــــ
    الغبشه
    !!!!!!عجبي من ؟؟؟؟؟إستفهاماتك لكن برضو الزعل ما قاعد يزورنا تب
    ـــــــــــ
    زووووووول
    أبو سبعه واوات أهلاً أخوي دي ياها ذاتها ست الاسم لكن الناس مرات بتعمل كده ودي حاله متأخره
    ــــــــــــ
    عم سنكل
    وبالبكاء المر كانت بدايتنا زي صاحبنا القال -وآ حر قلباه من سلمي00000000000- وسلمي هذه الله يجازيها خلت الزول ما فاهم حاجه000لكن لقيتك مرجع وبرضو بتقول أهلا
    ــــــــــــ
    أبكرون
    يا سلاااااام القصيده دي بالذات كانت عندي إلا أفتشها في الأضابير بتاعتي وللا أقول لك ما أنشرها هنا وريح شقاي وجمني

  30. عبدالرحمن أحمد كتب:

    د0عزت أبو عصمت
    كل تحياتي وكل الأشواق لئلك -بالشامي-
    يا دكتور قلنا نبدأ بالبكاء لأنه زباينه كتاااار وبعد داك من يضحك أخيراً يضحك كثييييراً

  31. الزهراء كتب:

    عاد يا عبد الرحمن ود احمد الجفا كعب تب والسلام المسيخ ما حبابو
    وبالذات لما يكون من زول مهم(زول بي واو واحده) , وبالاخص جفا الحبيب بيكسر الخاطر وجبر الخواطر صعب
    والابتسام مع السلام بيشرح القلب وبيوصل نغمة الريده والمحبه جووه الدواخل
    ونحييك والصباح نديان وبالبسمه والمطايبه بيتبدل الحال وبيعم الفهم الراقي للتحيه

    نحييـك ما بتحـيينـا
    ونرضيـك مـرة أرضـينـا
    احكـم فـينا بالدايـرو
    ده ريـدك وانقـسم ليـنا

    خـلاص اخـترت ناس غـيرنا
    وهـم أغـروك تخـليـنا
    بقـيت لامن تشـوفـنا كمـان
    بتهـرب من تـلاقـينا
    كأنـك ما عـرفـتنـا يـوم
    ولا طـليـت في عـيـنـينـا

    نـلاقـيك والصباح نعـسـان
    وتـتحـاشـانـا يا زيـنــة
    زمـان الحـال ده ما حالـك
    ولا طـبعـك تجـافــينـا
    اتـاريـك كـنت خـادعـنـا
    سـرابـك مـوجـو غـاشــيـنا

  32. عبدالرحمن أحمد كتب:

    نحييك يا الزهراء وانت حيينا
    وأنا حامسك في ولا طبعك تجافينا دي قوي يعني يا انت معودنا السلام وتقوم تجي تقطعها معانا ليه بس
    كل الشكر للاغنيه الجميله يا زهراء

  33. ابكرون كتب:

    يا عُُبدالرحمن لا تفتش اضابير لاشي هاك كلام كامل الحلو:
    ——
    أســــــه فيك أنــا شن أســو
    يـا سـلام لـــو جـيـتـي أبــدر وهـل تـفـيــد بـالله لــــــــو
    يــاتــوغيـمـاً نــازلــــة مـنــــو ويـاتـو مخمل ويـاتو جـــو
    والكــــواكـب أيــــه لــزومــه وإنتـي ماليــه الدنيــا ضـو
    ***********
    عـلـــــمي الغصـن الطــراوة ومــن نـــداوتك هـشــشـي
    وعـلـــمي البـــــــان التـثنــي والـتمايــل وادهـشــــــــي
    وعـلـــمي الطــاؤوس يـعـدل فـي اختيـالــو وفـي مشــي
    الـجمــــال لـمـيـتـي كـلـــــــو للمعـــاك ماسـبتــي شــــي
    وقـلبـي تــاه من يـوم عـرفتك الإتـــــــــوه مــا تـفـتـشـي
    ***********
    النسيـــــم لـــــو مـــر جنبـك بـــي أريـجـك عطــــــري
    وخلــــي بعدك لينا يوصــــل أوع يرجــــــع حــــــذري
    والـــــورد من فيض نداكــي أدي بـرضو اتـذكـــــــري
    عمـــري ليك أنا واهبو كلــو هاتــــي نظـــرة وإشتـري
    وإن ودر فـي دربك إنتــــــي يعنـي أيـــــــه ما تـودري
    ***********
    الحريــــــر شافـــــك تحيـــر وصــد زعــلان حنســـــي
    إنتــــي أنــعم منــــو ملمـس إلا جــاملــــي والبســــــي
    وطيفــي لو جاك في الأماسي هــدهــديــــو وونســـــــي
    أحكـــــي ليهـو وقولــي ليهـو وسيبــي عنـدك واحبســي
    وخلــــي من أنفــاسك ينعـــم وبــــي ودادك حســســــي
    ***********
    الجمـــــــال العهــدو ولـــــى جيتــــــي تـــاني ترجعـي
    والـدلال القــالـــــوا قـــــــــل جيتــي في الكون تزرعي
    وقلبــــي من الريـد تخلــــــى جيتــي تـانــي تـلــوعـــي
    البريـــــق الفـــي عيـونـــــك كفــــي عـنــي وأقـرعــي
    مـابـراي تصلينـي بيـهـــــــو شـتـتـيـهــو و وزعـــــــي
    والوصـــال الضانــــة بيهـــو ضنـــي بيهــــو وامنعــي
    مــا الكــلام الدايـــر أقولـــــو مــن عيونــي بتسمعــــي
    ***********
    يــوم تدخلـي علي المحافـــل الحضـــور بتجهجهـــــي
    الـعيـــون تبراك جحافــــــل وكــــل زول بتوهـــــــي
    القمــــر فـــي ليــــل تمامــو بشبهــك مــابتشبهـــــــي
    والنجــــــوم ماتشــابـي ليهـا خلــــي تنزل ليكــي هـي
    أنضميهـا وزينـــــي بيـهــــا جيــدك النـــــادي البهــي
    الفــــراش لـــو ركٌ فـاكـرك زهـــــــرة أوع تنبهـــــي
    خلــــــي يرشف مـــا رحيقك مــــافي زول ما مشتهـي
    ***********
    الـــــورد لــــو جيتــــي جنبو بقطفك مـــــا بتقطفــــــي
    والعســـل بهجــر مناحلــــــو ويرشفك مـــــا بترشفـــي
    قلبــــــي فـــارش ليك أزاهـر خشــــي جــــوا وشرفــي
    إلا بــس شيـشـك عـليهــــــو إجتيـاحـــك خـفـفـــــــــي
    وفــــي الدخـول خليك حنينـه نبضـــــو أوعـى توقفــي
    ————————-
    الزهراء غايتو انا حاوريك في الميل شن تسوي ، كان سويتي زي عمك كامل ده بتموتي سااااكت

  34. الزهراء كتب:

    تسلم اخ عبد الرحمن
    يافكفك: ايا عمي العزيز لك التحيه والف سلام مصحوب بكل طيبه ومباشره
    وسلام مباشر ولا سلام مكاشر
    علا سوات عمنا كامل دي مابنقدر عليها – كدي النسأل نونو باقي لي بتسويها الله يستر
    القصيده رائعه وجميله وربنا يديك العافيه يا سيد القبيله

  35. nono كتب:

    الـــــورد لــــو جيتــــي جنبو بقطفك مـــــا بتقطفــــــي
    ***************************
    والعســـل بهجــر مناحلــــــو ويرشفك مـــــا بترشفـــي

    ***************************
    قلبــــــي فـــارش ليك أزاهـر خشــــي جــــوا وشرفــي
    ******************************
    إلا بــس شيـشـك عـليهــــــو إجتيـاحـــك خـفـفـــــــــي

    *****************************

    وفــــي الدخـول خليك حنينـه نبضـــــو أوعـى توقفــي

    ________________________________________

    يا الزهراء يابت امي جنس ده ما لاشفناه بالسمع لاسمعناه بالعين؟؟؟

    اصلا هيييييييييييييييي داخله غزه عن طريق (رفححححححححححححححح) وله الحااصل شنووو

    شووفي يا الزهراء كلام عمك (سيد القبيله) (يابت القبيله )علي قووووول عمك ( ود القبيله)؟؟؟؟

    الفيها خير ربنا يسويييييييها!!!

  36. عبدالرحمن أحمد كتب:

    ,,,,وطيفــي لو جاك في الأماسي هــدهــديــــو وونســـــــي,,,,,,,

    <<>>

    معقول يا دكتور كامل عاد حبس القلب ما كفايه وكمان حتي الطيف كلام عجيييييييييب
    كلام يسكر وين أمن المجتمع

    الزهراء والنونو دافناتنو سواااااااااااا وللا شنو
    دويتو رهييييييييييييييب

    أبكرون ياشفاف ريحتني من التفتيش وجبتها مقشره ممكن أعكسها

  37. ابكرون كتب:

    نونو كلامك الفوق ده :

    مـابـراي تصلينـي بيـهـــــــو شـتـتـيـهــو و وزعـــــــي

  38. الغبشة كتب:

    مشكور يافكفك اردت انت تمتعنا برائعته فادهشنا اسلوبه واشفقنا على نفسنا من التمنى فما بين السطور اعجب من السطور وماعليه واقعنا…………………………………(( حمده فى بطنه)) اوعكم من جنس ده تانى؟؟؟؟

  39. ابكرون كتب:

    الغبشة : مرات عزف اوتار الكمان بتكسر الزجاج ….خاصة لمن يكون الزجاج رهيف وحساس…..فما بالك لو كان العازف كامل عبد الماجد……
    شكيتك لي الله يا عمنا كامل بتنا الغبشة دي ما بتقدر علي دوز قدر ده من عزف الغجر المنفرد…. دشدشتهاياخ ….!

  40. nono كتب:

    الغبشه/

    واشفقنا على نفسنا من التمنى ؟؟؟

    علي وزن ؟؟؟

    و ما نيل المطالب بالتمني… و لكن تؤخذ الدنيا غلابا ::

    كسره / شنوو ياااااافل غبوووووششش

    الدنيا ده مسعبااااااااااااااااااااها كدة فكيييييييييييى الزرارة الاخيره ؟؟

    الي اللقاءءءءءءءءءءءءءءءءءءءء

  41. مشاكل كتب:

    كتبت هذه القصيدة في طالب في جامعة الخرطوم اسمه “عبدو” وكان بحب واحدة لدرجة الجنون
    وكان خجولاً فلمّا حكى لزميله في الداخلية عن قصة هذه البنت نصحه زميله بأن يفاتحها في الأمر ،
    فرد عبدو :-
    “حفضل أكهربها ليك لو جا ملاك يخطبها حترفض وأحسن أكون تقيل أنا زول جميل وقيافة ” …
    وفضل صاحبنا “عبدو” يكهرب لحدي ما بطاريتو نزلت وفي النهاية جا مغترب وخطب البت ..
    وصار عبدو يكيل وهنالك مصطلح في جامعة الخرطوم متعارف عليه “إذا أحب طالب زميلته
    وتزوّجت من غيرو” شاكوش بمعنى آخر “.. بقولوا “أدتو شريط”..
    لأنه بيكون مشغل شريط أغاني حزينة.. ينتهي يقلبه بالجانب الآخر.. و هكذا..
    و كأن البنت أعطته له..
    على أي حال نرجع لي عبدو الذي وقّعه الله مع صاحب بشّع بيهو وألّف فيهو القصيدة دي ..
    يمكن نضحك إحنا على الكلام ده ، لكن الكهربجي بتعانا داك يكون حاسي بي شنو!!

    في الليلة ديك
    القصة ذاتها بقت عليك
    يا عبدو وأدوك الشريط
    يوم قولنا ليك
    أنضم معاها وكلّمها
    لكن أبيت تسمع كلامنا
    بقيت لميض
    وقلتَ.. أحسن أكون تقيل
    أنا ما جميل
    باكر بعد باكر
    بكهربها ليك بي نظرة كتيل
    وبقيت تقيل
    لامن سقوك موية الغسيل
    يوم جيت تنطط زي زمان
    وتباري بقعور الشجر
    كايس كراسي الخيزران ..
    وقعدتَ يا زينة الرجال
    كهربجي قال
    رفعوا الستار
    والبت تجي و تمشي و تلف
    مرات تقيف
    ومعاها كان زولاً حريف
    والوقفة كان وقفة ولف
    صاحبنا بالاحساس عرف
    وسألتَ والناس كلّموك
    ملعون أبوك دنيا أم قدد
    بقت البقت
    ووقعتَ في شارع الزلط
    تبكي وتجعّر
    والعيون اتورّمت
    يد القميص.. ضهر القميص.. كم القميص
    حتى الفنيلة اتشرّطت
    يا عبدو عيب
    قوم يلا صلي على الحبيب
    الواطه صبحت داير ننوم
    يا أخوانّا لأ أنا عايز أموت أقع البحر
    يا عبدو عيب
    الدنيا حر .. والموية بتسخّن عليك
    ثلاثة ساعات في الطريق
    وزولنا قاعد يسب ويكيل
    ودموعو سايلات بالكفوف
    وشرايطو تلمع في الكتوف
    بقى فيلسوف
    شي كلام عن الدنيا أم قدود
    وعلاقة بين يوم السبت وعين الحسود
    ومقارنات بين الجمال
    والجهل وسوء الإختيار
    قال شينة قال …!
    قال شينة قلنا كلام صحيح
    وخطيبها زاتو ولد قبيح
    بس ياخي قوم
    الواطة ليل.. دايرين ننوم
    قام تاني جاب سيرة البحر
    وقام تااااااااااااااااااني جاب سيرة البحر

    إهداء الى ولدنا المشوكش

  42. عبدالرحمن أحمد كتب:

    يا سلامز
    سلامز
    عساك طيب
    عساك بخير
    ماعونك لين
    جزلانك يدين
    لعنك ما قاعد تورد زي وردة عبدو القام تااااني جاب سيرة البحر أكيد عبدو دا أخد النصيحه دي منك عشان كده نصحوني -صحبك مشاكل دا أختي دربه –
    وانت ياخوي قول النصيحه ما قلت ليهو انضم معاها وكلمها
    أنت قلت ليهو هي لاقيه زيك
    وبعدين مش نحن بنقرأ كهرباء سوااا
    قوم كهربا وأنا من بطاريتي حاديك مدد
    ومدد يا حلو العيون -مع الإعتذار لشمباتي – بالمناسبه يا حاج السلاوي شيخ شمباتي دا ويييين مسجل غياب كده

  43. عبدالرحمن أحمد كتب:

    لكن ما قلت لي
    إنت يا مشاكل
    مشكلتك شنو
    مع
    البحر
    دا

  44. حاج أحمد السلاوى كتب:

    ولدنا عبد الرحمن ..
    ولدنا التانى شمباتى دا قاعد ليهو فى حفرة .. أقصد شغال ( مش حفرة دخان ..بالك لا يمشى بعيد ) والإرسال الهوائى والتليفزيونى عندو شبه معدوم ونحنا ما قاعدين نقابله إلا فى الويك إند لامن يطلع من الحفرة …عشان كدا حقو تعذره لحد ما ربنا يتوب عليهو ويطلعوا من الحفرة دى .
    إتفقنا ؟؟؟
    ويا حليلك يا خال يا ود المدنى ..وينك مختفى .. أخبار السمسم شنو ؟

  45. حاج أحمد السلاوى كتب:

    المقصود خالد ود المدنى ..المعذرة .

  46. ياسين شمباتى كتب:

    الحبيب عبدالرحمن..سلامات يا راقى..
    مبارك الباسويرد وانطلاقة قوية ومشجعة واكيد اكيد الجاى احلى واحلى..طبعا الموضوع دا اوفيناهو حقو بهناك,,لكن جايين للترحيب وكدة..وشكرا للسؤال والافتقاد..

    مشاكل..سلامز..
    مداوى شنو!!؟؟ كان ما قاعد معاك بهناك وشغال اقشقش ليك سااااااااى,,قال مداوى قال..وتحياتى لى صديقك عبده..

    الوالد السلاوى..سلام..
    غايتو جنس غايتو!!! لو قبضونى ناس الهيئة تكون انت السبب..اسواق وتحايا بحجم روعتك..

  47. عبدالرحمن أحمد كتب:

    بركة الشوفه يا دكتره والخروج من عنق الزجاجه أقصد الحفره – زي ما قال أبو الحجاج بالك لا يمشي بعيد – وويك إنداً جميلاً خليك باين

  48. ياسين شمباتى كتب:

    عبدوز..
    الله يابرك فيك..اريتو كان مشى بعيد,,دا واقف لط !! ولازم تبين عشان نفتو غادى غادى..

  49. الطيب ابوصالح كتب:

    يااخوي ذكرتني مالك بشواكيش بحر ابيض والحاله اخر شواكيشي من جزيرتها اصحابي قالوا لو كان من كوستي كان مسكت طريق القطر الحمد لله موضوعك ظريف الا رجعني للالم علي بالاطلاق يا عبده ماخذ شاكوش من كوستي الله يخفف عليك

  50. الطيب أبوصالح
    ــــــــــــــــــــــــ
    المفرده كوستي دي بقولها دايماً أستاذ بشير عبدالله بشير -أستاذ الرياضيات الختيير جداً -وخاصةً عند الإختصارات 9/9 مشت وين:كوستي 798/798 برضو مشت وين ………وبين كوستي والدلنج مساحه ………وهكذا دواليبك
    أما عن الشواكيش فأنا بحولك لسلامز مستر شكله وكان لميت في سكة القطر زاااتها لومني

  51. ابو حميد كتب:

    عبد الرحمن أحمد/سلام
    اخدته بي نصيحتك مشيت العياد ليه صديقك( مشاكل سلامز ) مدواي جروح المشوكشين لكين باين عليه د/شاطر العياده مليانه مافي طريقه اخش ليه قلته تاخد ليه معاه ميعاد من (غير ميعاد ) نظام واسطه وكده…

  52. ابو حميد كتب:

    عبد الرحمن أحمد/سلام
    اخدته بي نصيحتك مشيت العياد ليه صديقك( مشاكل سلامز ) مدواي جروح المشوكشين لكين باين عليه د/شاطر العياده مليانه مافي طريقه اخش ليه قلته تاخد ليه معاه ميعاد من (غير ميعاد ) نظام واسطه وكده…

  53. يا أبوحميد
    د.سلامز اليومين ديل شغال مشاكل مع ياسر عرمان خليهو يهدي شويه بعدين نشوف حكاية الحجز دي قول ربنا يسهل

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s