عن الانتخابات انتو احكو ليا

Posted: الإثنين,1 فبراير, 2010 by elturkey in سياسية

أغلب الناس بتتكلم عن الانتخابات الرئاسية والأنا قنعت من خيرا فيها  الى حين الاطلاع على البرامج الانتخابية لكل المترشحين … بس عندى شئ محيرنى …  عايز أعرف شئ فيما يخص الولاة … ياربى لو فاز والى من غير حزب الرئيس وحصل الحصل لعبدالرحمن الخضر فى زمن ولايته للقضارف .. من يحق له الفصل فى ذلك هل يحق لرئيس حزبه تغييره ام هل سيعزله رئيس الجمهورية وفى الحالتين من سيحل محله ؟ أم أن هناك مادة تنص على انتخابات مبكرة ؟ … أرجو ممن يملكون معلومات تفصيلية عن الموضوع امدادنا بالاجابات الشافية مع التطرق لما قد يفوت علينا من  مطبات غير مرئية حتى يتسنى لنا  التكهن بما قد يواجهنا لاحقا … مع فائق الأحترام والتقدير

Advertisements
تعليقات
  1. حاج أحمد السلاوى كتب:

    أخونا الكاشف الصغير عبدالفتاح التركى ..
    إنت مستعجل مالك ؟ والقال ليك منو إنو فى والى من غير حزب الريس حيفوز ؟ ما تشغل بالك المسألة محسومة قبل النتخابات تبدا . . دا الشايفو انا غايتو .. يمكن اكون مزغلل شوية … لاكين الطشاش ولا العمى .

  2. ابكرون كتب:

    غاينو يا اتاتورك اخوك الكبير سلو ده محبط بشكل عامل دقنو البتشبه دقون الجماعة.. .ديلك…..عمو….عمو….عمو… شفته البرايه….أقصد الفيل…؟أركبو….(رمز المؤتمراللاوطني)

  3. زووووووول كتب:

    التركى سلااام
    والله نفس الشعور تخيل انا ليا كم يوم شايل هم الوالى لو ما بقى من جماعة الرئيس الفائز حايعمل تنميه فى ولايتو كيف ورئاسة الجمهوريه حاتتعامل معاهو بى ياتو طريقه وكيف تنتقم الرئاسه من المواطنين الذين قالوا لا لحزب الرئيس فى ولايتهم .
    كسره : الحزب الحاكم ليس بالضروره ان يكون الوطنى او الشعبيه لانو شايف الجماعه كلهم واثقين من اكتساح الانتخابات .
    افتونا اذا كنتم بتأويل الاحلام عالمين يا معاشر المرشحين (بكسر الشين طبعا )

  4. اهلين اهلين بفطاحلة المدونة وشكرا على المرور السريع … بس باقى ليك ياحاج لو العملية كدى نحن مرشحين ومتكشحين مالنا … غايتو انا شايف فى شوية ضباب ياربى النضارة عايزه تغير ؟ كلنا عايزين التغيير بس لازم نسعى ليهو يمكن تصدق ياحاج ولا شنو ؟
    ابكرون : ههههههههههه ياخ الفيل بسرقوهو على قول اكان سرقت اسرق (جمل) مابركبوهو لكن شفت الجماعة حتى شعارهم واضح يعنى الجواب يكفيك عنوانه ديل جايين ناس شفط سااااااااى .

  5. زووووووول كتب:

    حاج السلاوى سلااام
    اريتا زغليلتك زغليلت السرور يا جد عبدووووشتووووش

  6. زوووووول ياغالى ليك وحشة ياجارى وانا جارو ….. ياخ نقول توارد خواطر
    … انا غايتو ماقدرت افند الوضع وعلى قولك أفتونا ياناس وأكيد ماشرط يكون الحزب الحاكم الحالى … لك التحايا

  7. زووووووول كتب:

    تخيل يا التركى الجرائد المعارضه تتعرض لتجفيف اعلانى يطير دقيقا شوف الميدان مع اختلافى مع خطها وشوف راى الشعب (وبرضو نفس الشئ) وشوف الايام (نفس الشعور ) .
    طيب دى جريده امال الوالى يكون كيف . اقول ليكا يا التركى الزوول ال بفوز بمنصب والى من غير حزب الرئيس سجم حبوبتوووووووووو. ولا شنوووو يا نونو

  8. علي سنكل كتب:

    التركي إزيك أنا ما داير أكون محبط ( بكسر الباء ) ، لكن الجماعه ( المؤتمر ) ما بدو معاهم زول حاجه لا رئاسه ولا و لايه، وتشوف عينكم.

  9. abdozc كتب:

    يا التركي الله يكضب الشينه المنكوره وتطلع كضااااااابه وناس المؤتمر يقولو ليك علي طريقه الهيلاهوب ما كضااااابه

  10. زووووول : للأسف الجرايد أغلبها استسلم وبعضها باع القضية زى مايقولو اخوانا واحدين كدة .. بس ماننسى أنو الرئيس مفروض يكون رئيس جمهورية السودان مش رئيس حزب وبس وكمان الوالى متولى أمر رعايا الولاية مامصالح حزب الرئيس … اعتقد أنو الناس يمكن تفطن لحقها الانتخابى وواجبات الدولة عليها خاصة لو ادوهم الحق فى أختيار من يرغبون بالطريقة الصحيحة …. يعنى مع فورة غالديمقراطية دى يمكن نشهد اعتصامات ومظاهرات والذى منه .
    الحبيب سنكل : نحمدو وبطلتك ازددنا سرورا …. انا أتوقع انو فى كم ولاية لومالرئاسة ذاتها بتكون فى حق الله … أو على الأقل ح يكون فى تنافس وتنازلات ولنقل مزايدات .
    عبدو : هم ناس المؤتمر القالو شوية ياخويا بس ربنا يستر .

  11. حاج أحمد السلاوى كتب:

    يا جماعة الخير أنا عاوز أعرف الناس ديل كيف حيقدروا يزوروا الإنتخابات دى كيف ؟ مناديب الأحزاب كوووولها مش حيكونوا موجودين ساعة التصويت وساعة حساب الصوات للمتابعة ولاّ حاجة تانية ؟ وده الحصل لامن مشينا سجلنا ..لقينا كل الناس قاعدين وشايفين كل حاجة ..ممكن حد بس يدينا تصور أنو التزوير كيف حيتم ؟ والمراقبين الدوليين والإقليميين ( خلينا المحلييين ديل ) مش مفروض يكونوا شايفين البيحصل شنو ..؟ ولاّ يكونوا برضوا ضوقوهم موية السكر ؟
    أفيدونا ..أفادكم الله .. باقى نحنا ما بنعرف اللولوة واللخبته ..مش كدا .. يا…. ابكرونا .. ؟

  12. فى أعتقادى ان كلمة تزوير مبالغ فيها بعض الشئ اذ أن المراقبين المحليين وان امكن تمويههم والمراقبين الدوليين لا أظنهم سيحاسبون من استقبلهم واضافهم بكرم سودانى فياض على (هفوات) صغيرة فى تنفيذها عظيمة فى نتيجتها … يمكن أن نقول سياسة الترغيب والترهيب بدلا من التزوير … أما التزوير فى الانتخابات فيمكن أن يحدث بسهولة خاصة عند نقل الصناديق الى مركز الفرز وقد أثبت كثيرا أن هناك صناديق جاهزة يمكن تبديلها وأخرى يمكن اختفاؤها بقدرة قادر …. ماعارف انتو كان عندكم ولا لا لكن فى منطقتنا اول ماتسجل بنادوك ناس اللجنة الشعبية (طوع الحزب الحاكم) ويسجلوك مع رقم هاتفك قال ايه لو ماجيت ينادوك والسمعتو انهم ح يستفيدو من صوتك لو ماجيت أو ينادوك ويوجهوك عشان تصوت وفى رواية أخرى يساوموك وقد سمعت أن بعض اللجان استلمو الديباجات من اصحابها … والله أعلم

  13. مشاكل كتب:

    سلامز

    يا اخونا ما تتعبو كيبورداتكم ساي

    الموضوع محسوم … لعبة و بتنتهي

    ياتو مرشح من غير المؤتمر الوطني ممكن يفوز ؟؟

    غايتو في الخرطوم دي الا بدر الدين طه … و دا برضو زولهم .. بس زمان شوية

  14. حاج أحمد السلاوى كتب:

    ولدنا مشاكل ..سلامز مربع وسلامز مستطيل..و متوازى أضلاع ..
    إنت طابور خامس تابع للمؤتمر ولاّ شنو ؟؟ روق المنقة شوية ..وخلى الناس تحلم ..
    وزى ما قال الفنان وردى… مسكين البدا يأمل … !!

  15. مشاكل كتب:

    فعلا فعلا

    و زي ما قال الفنان الأسمر الملك محمد منير

    لو بطلنا نحلم … نموت

    دي شغلانة خسرانة

  16. مشاكل ياخى انا بالذات فى الموضوع دا متفائل جدا مع أنى للان ماحددت منو البستاهل التصويت …. للآن قدرت اتطلع على برنامج المرشح كامل ادريس وشكله مقبول الى حد ما وفى انتظار البقية …
    حاج السلاوى : ياحاج انت مالك رميت البشكير من هسع يمكن تصدق ولو مرة فى العمر ونحقق جزء من أحلامنا … لك الأحترام والتقدير

  17. حاج أحمد السلاوى كتب:

    أخونا التركى ..
    عاد بس كيفن مع الجندرمة دى ..باقى ليك فى طريقة ؟ الناس ديل شغالين للإنتخابات دى من قبل تلات سنوات ..والباقين بادوبك بدوا يلملموا أطرافهم ..لاكين نرجع ونقول .. الله فى .
    ما قلت رايك فى رسالة الطعن المقدمة من الدكتور الأستاذ ؟
    وخلونا النشوف آخرتا شنو !!

  18. Art Leather كتب:

    مجهود رائع بارك الله فيك و أتمنى لك المزيد من التقدم

  19. عارف يالحاج هي من أكثر الطعون موضوعية هو ما تقدم به الأستاذ و للذين لم يقراوها هاهو الطعن الذي تقدم به:
    ___________________
    قدم الأستاذ الجامعي المعاشي بجامعة الخرطوم الدكتور معتصم عبدالله محمود المسجل بدائرة شمبات الغربية، بطعن للمفوضية القومية للانتخابات في أهلية ترشيح المواطن المشير عمر حسن أحمد البشير لمنصب رئيس الجمهورية، ذاكراً (6) أسباب للطعن. فيما أقر عضو المفوضية د.مختار الأصم بتسلم المفوضية للطعن، وقال في حديث لـ(السوداني) ان المفوضية سترد عليه اليوم من خلال مؤتمر صحفي، فيما ذكر عضو المفوضية الفريق الهادي محمد أحمد إن المفوضية تسلمت عدداً من الطعون، مشيراً الى ان الطعون أما أن يتم تقديمها للمحاكم او المفوضية، وقال في حديث لـ(السوداني) إن المفوضية تسلمت عدداً من الطعون ولكنه لا يستحضر بالضبط أسماء مقدميها، وأضاف “صحيح هناك طعون قدمت وانا لا إستحضر بالضبط الأسماء”. وإعتبر د.معتصم أن الطعن في البشير جاء لأنه “قام بالتضليل بأن إنقلاب 1989م قامت به القوات المسلحة وأنه لا يتبع لتنظيم الجبهة القومية الإسلامية آنذاك”، واعترافه عقب إنشقاق حزب المؤتمر الوطني في 1999م بأنه كان منظماً، وتابعاً للدكتور حسن الترابى، وإعترافه بذلك لدى مخاطبته المشاركين في الملتقى الثاني للإعلاميين السودانيين العاملين بالخارج في الخرطوم. وقال أن اعترافه ايضاً خلال ذات اللقاء بوجود المعتقلات السرية التي تسمى بيوت الأشباح، ووعد بانتهاء عهدها، معتبراً أن ذلك التصريح يحمل المشير عمر البشير المسؤولية القانونية عن الممارسات غير الإنسانية التي جرت في تلك المعتقلات السرية، لسكوته عنها، مستدلاً بخطاب الدكتور فاروق محمد إبراهيم الأستاذ بجامعة الخرطوم بتاريخ (13/11/2000) إلى رئيس الجمهورية عمر البشير، عن تعذيبه وآخرين في تلك المعتقلات. واستند د.معتصم في طعنه علي أحاديث منشورة للبشير في عدد من الصحف وقام بتوثيقها. وذكر د.معتصم أن البشير، يعد مسئولاً عما حدث من فصل تعسفي وتشريد للعاملين بالدولة بدون الرجوع لمجالس المحاسبة وديوان العاملين، مستدلاً على مشاركته في ذلك الفعل الذي إعتبره منتهكاً لحقوق الإنسان بذكر فصل العالمين الوطنيين المخلصين متمثلين في “البروفسور سمير إبراهيم غبريال، والبروفسور محمد الأمين التوم”، واللذين كانا يعملان بجامعة الخرطوم حتى عام 1992، مشيراً الى توثيق ذلك الإعتراف بتجاوز الإجراءات المطلوبة للفصل العام في حالات سابقة، معتبراً ان ذلك يدل على عدم الحياد والإستغلال للسلطة للتخلص من المعارضين مما يجعله غير مؤهل للترشح لمنصب رئيس الجمهورية.

  20. قالت المفوضية بتاعت الانتخابات انها سوف ترد بالأمس على الطعن ضد أهلية البشير للترشح….

    يا ربي ردوا و الا لسة …..
    الرد الرد

  21. حاج أحمد السلاوى كتب:

    أبو عصمت ..وكل الأحبة ..
    الدكتور معتصم دا ختا ليك ناس المفوضية فى جنس ورطة لا يعلم بيها إلا الله ..وحيردوا يقولوا شنو ؟ .
    الدكتور دا طبعن زميا كورة زماااان ايام الشباب وهو من أهالى شمبات القدامى وكان يلقب بالشبح لطول القامة وضعف بنيته الجسمانية.. لكنه كان من أذكى الطلبة فى بحرى الثانوية إلى أن تخرج من كلية الهندسة الكهربائية من جامعة الخرطوم وعمل بها أستاذاً ..الذى لا يعرفه الناس عنه أنه كان من أتباع الجمهورى محمود محمد طه قديماً..
    بس كل ما ذكره صحيح ولا إختلاف عليه ..بس مين يقنع الديك ؟
    وخلونا النشوف آخرتا شنو ..وحترسى على شنو ؟

  22. ابكرون كتب:

    يا ساده البشير بالدوحة
    وساركوزي بالدوحة
    وطوق الجنائية حول للمحكمة للمراجعة
    وسلفا دعا قادة المعاضة الكبار امس لجوبا واتخذت قرارات
    والدكتور معتصم طعنه حول من المفوضية اليوم للمحكمه
    وواحد + اتنين = اتنين
    وادرك زمبهار العصر وتنح عن الكلام المباح

  23. الزهراء كتب:

    سلاماتنا اخونا التركي والسمار الكرام
    لكن د/ معتصم تعامل بذكاء -لكن هل المفوضيه سترد ؟؟؟؟ ما اظن وحتى لو ردت اعتقد الرد واضح واحيي د/ معتصم علي هذه الخطوه الجريئه
    حقيقه الجماعه مجهزين للانتخابات ليهم فتره لكن لا اظن انهم عاملين حساب كل المفاجآت البتحصل والتي ستحصل
    وبالرغم من انو الشعب قنعان من نتيجة الانتخابات لكن لازم الناس تجتهد علي قدر قدرتها ويكون عندها امل في ربنا سبحانه وتعالي

  24. nono كتب:

    بالامل ……….؟

    صيرت…………..؟

    قلببببببببببي…………..؟

  25. لا حولالالالالالالالالالالا لما سمعت بالطعن فتشت عليه لما لقيتو وقريتو تعرفو ياجماعة الموضوع بقى خطير جدا يعنى المفروض يسقط حق الترشيح عن السيد المشير وربنا يجيب العواقب سليمة … بس مااأعتقد انو المفوضية ترد قبلما تسمع قارا المحمكة الجنائية المقرر اعلانه اليوم حول قضية الابادة الجماعية سؤال الحاج الصغنونى ليه اعلامنا مامتطرق للموضوع الهام دا باريحية ؟؟؟؟ يعنى كدة وووب وكدة ووبين …. ويايوم بكرة ماتسرع تخفف ليا نار وجدى

  26. ياسين شمباتى كتب:

    التركى..سلام..
    حقيقة الانتخابات متوقع انو يكون فيها مفاجآت كبيرة,,خصوصا اذا نظرنا للاحداث عن قرب وتمعن وقرينا اسماء المرشحين لمناصب الولاة والمجالس التشريعية,فى اسماء جديدة كتير طبعا بحكم العدد وفى شباب وكثير من المتعلمين المستنيرين الممكن يقودوا عملية التحول السلمى الديمقراطى..
    لكن المحيرنى ومجننى ليه المؤتمر الوطنى خايف من ترشح عرمان للرئاسة!!؟؟؟ وهل كان هناك اتفاق خفى تحت المائدة الا يترشح ممثل للحركة للرئاسة!؟؟ وهل سيقاطع الزطنى شريكه وحليفه الحركة الشعبية اذا لم ينسحب عرمان؟؟ اسئلة حائرة طائرة تمسى على الحكومة والشعب المسكين..

    اما عن الطعن فهو لعمرى قانونى وموضوعى,,لكن البكلم (بوبى) منو؟؟وشكلو الجنائية ح تسحب اتهامها وشكلو فى صفقة عقدت سرا_كالعادة_ والامور ح تمشى لى قدام فى صالح الوطنى طبعا..وفى انتظار الرد,,بس يارب يكون زى رد السد!!!

  27. ابكرون كتب:

    التركي : ان شاء الله العواقب ما تجي سليمه …ياخ في 60
    بعدين المفوضيه قررت اليوم وامرها انتهي هنا… وشاتت الامر للقضاء والقرار عند القاضي….والقضاء حيثبت للعالم كلو انو نزيه وعادل ولا قضاء غير مستقل….ويا خبر بكره مجان واليوم بفلوس

  28. ابكرون كتب:

    ادخلوا صوتوا في زول شايفه ورا ورا

    http://sudantribune.com/index.php#

  29. محنك كتب:

    ابكرونا حبيبنا

    اولا الجماعة ديل حركة شعبية عشان كده عرمان ومؤيد الشاريع العلمانية الصادق هم الاعلى

    ثانيا ما كل اهل السودان عندهم نت والواحد بصوت بالجهاز ولا يمكن استخدامه فى التصويت يعنى الاسرة العددهم 10 عايزين يصوتو لمرشح ما او مرشحين يكون السبق اكل النبق

    ثالثا ما كل الاحزاب تقدر تزور

    رابعا يا خبر بفلوس

    لكن الملاحظ انو الاحزاب المنقسمة فى الرئاسة
    الامة مبارك والصادق ( وباق المنشقين مع البشير جماعة مسار وودالهادى المهدى )
    الجبهة القديمة او الحركة الاسلامية ( البشير ونيال ) وفى العاصمة فى الوالى ثلاثة ( الخضر بدرالدين وحمدون مرشح الشعبى )
    الحركة فى حكم الجنوب سلفا واكول
    الاتحادى وعى الدرس ونزل براه وتحت تحت اظنو مطبع مع الوطنى لانو عبدالحكم طيفور دا ما وطنى بالجد نزله الوطنى فى المتمة بالرغم من انه المنطقة تضج بكوادرمثل كمال مدنى / هاشم عثمان / معتمد ابوحمد ياسر الحويج ( خاله كان نائب الدائرة وتنازل للمرحوم مجذوب ) النقرابى /وقس على سبيل المثال غير الما فى الواجهه

  30. الغالى شمباتى : ليك وحشة يادكتور …. أتمنى انو يصدق حدثينا وتحصل المفاجآت فى الانتخابات ولو على مستوى الولايات … أما انسحاب عرمان فأعتقد أنه متفق عليه ولو بعد حين والمؤتمر الوطنى ماكان فى حوجة لترشيخ شخص فى رئاسة الجنوب لأن وزير خارجيته السابق وذراعه الخفية قدم نفسه كمرشح (يعنى لعبها صاح كالعادة) وبكدة الحركة بقت فى نفسها وعرمان ورقة ضاغطة لكنها غير رابحة .
    أبكرون : ياخ خليها تجى سليمة بس لكل متمنى نسبة فى (سليمة) ولا شنو ياشيخنا … أنا غايتو ماعايز شئ يستعمله الناس ديل ضد المرشحين الا بعد أعطاء الفرص المتساوية ان كان هناك مايستغل ضدهم والتعامل بالمثل .
    محنك : أعتقد أن اللفئة التى ستلعب دورا كبيرا فى حسم الانتخابات هى الفئة الوسطية (الماعارفا للآن تدى صوتها لمنو) لأنى برى انها اكبر ممن قررو أعطاء أصواتهم لفلان أو علان .

  31. ابكرون كتب:

    قف وتامل مذا يقول هذا الرجل عن الاخرين ::::::

    http://www.youtube.com//v/BEdxRrl9agI&feature=player_embedded

  32. أنا خايف بعد الانتخابات يقولو الما صوت لحزبنا يشوف ليهو بلد غير بلدنا ( باعتبار انهم كاسبين الانتخابات) … دا أسلوب دا هسع ياخوانا وماخفى أعظم

  33. ياسين شمباتى كتب:

    ابكرون والتركى..سلام.
    وهسه كلامو دا ما واااااااضح,,وشكلهم بعد الانتخابات ممكن يضبحوا الناس فى بيوتهم جهارا نهارا..خسئوا وخسئت اهدافهم..

  34. ياخ رئيسهم زاتو في التلفزيون عند مطالبته ببرنامجة الانتخابي قعد يقول عملنا و عملنا

    و نسي انه كان يجب أن يقدم برنامجة ….. حأعمل ليكم و حأ طلع عينكم و كدا

    الناس ديل ضمنوا !!!!!!

  35. حاج أحمد السلاوى كتب:

    ياخواننا ..والله إنتو متفائلين جداً..برنامج إنتخابى وبرنامج تليفزيونى ..دا كووووولو كلام فى الهوا ساكت وما فى زول حيقدم أو يعمل حاجة ..والناس ديل ( بعد الفوز المضمون … طبعن ) المرة دى حيستعملوا الكرباج فى جلد الآخرين ..مش جابتهم الإنتخابات ؟ المهم جداً إنو يكون فى معارضة واعية وفاهمة إيه معنى المعارضة ..مش معارضة ساكت وبس من أجل المعارضة ..من المفروض أن يكون أمام كل وزير فى الحكومة القادمة وزير من المعارضة يرصد ويشوف الزول دا بيعمل فى شنو ..بيحابى منو .. بيوزع رخص لمنو ..بيوزع أراضى لمنو ..وهكذا ..
    وخلونا النشوف آخرتا شنو !!

  36. ودالخلا كتب:

    سلام ياقبيلة،،
    صديقي حاج احمد السلاوي عمدة القبيلة وحادي الركب سلام،،
    ياااخ (زي مابيقول ليك واحد أخونا كان أسدا” في الخلا وروار) خليهم يتفاؤلوا وهو التفاؤل بقروش يااخ، تفاءلوا خيرا” تجدوه، لكن بيني بينك الناس القدامنا ديل لا حايقدموا ولا حا يأخروا في الموضوع شيئ، وذلك ببساطة لأن فاقد الشيئ لا يعطيه، فهم فاقدي الأمانة والصدق وطهارة اليد وعفة اللسان، فأنظروا في برامجهم الأنتخابية المطروحة كووووولهم من أقصي اليمين لأقصي اليسار ما فيهم وااااحد كدا عاقل ورشيد يوجد في برنامجه الأنتخابي مشكلة البلد الأساسية والرئيسة وهي أن تكون هذه البلدة أو لا تكون في الأساس بعد داك نجي للموضوع التاني في كيف تُحكم هذه البلدة بعد تثبيت وجودها علي خريطة الكرة الأرضية.
    فأنظر أخي للبرامج الأنتخابية التي تتحدث عن أشياء فارغة لا تمت لهموم الجماهير بشيئ يتحدثون عن أعادة برامج تلفزيونية محذوفة ونسبة تمثيل للمرأة بأكثر من 40% في الوزارة وتقنين الفوضي والمجون بألغاء القوانين والتي هي أصلا” غير مفعّلة، وآخرون يتحدثون عن العقاب والثواب ومن فعل هذا وكيف فُعل ذلك، والبقية تتحدث عن فساد من في الأساس أسس وأصل له وغض الطرف عن أنتشاره؟؟؟
    فمشكلتنا الأساسية يا أصدقائي هي الجهل بفن الأدارة، فنحن نجهل التخطيط ومن ثم نسيئ الأدارة ادارة الوطن والموارد والدولة، والأنتخابات حتي، وما هذه الأمثلة التي نراها الا أبلغ دليل علي التخبط وعدم التخطيط وفساد القلوب وطمع النفوس والآنانية وحب الذات والبعد عن الدين وهي لعمري مجامع مساويئ الأخلاق!!!!!
    فما زالت يا صديقي التركي أحزابنا السياسية قاصرة ودون سن الرشد، ولا زال ساستنا وكبراؤنا دون سن التكليف.
    أخوتي الأكارم ان صمتي لا يعني جهلي بما يدور حولي، ولكن ما يدور حولي لا يستحق الكلام!!!

  37. محنك كتب:

    لو فاز المؤتمر عايرة وادوها سوط …. ولو فاز غيرو حيمسح باستيكة ويرجعنا لورا عشان يبدا جديد باتجاه تانى

    مركبنا فى نص البحر لكنه فاقد البوصلة

  38. طارق أب أحمد كتب:

    صباح الخير عليك يا وطن ما عندو ذرة حظ

    محنك

    فكر معاى لو فاز أى حزب غير المؤتمر حيعمل شنو مع كل السلك الأدارى و التنفيذى المسير دفة الأمور فى البلد بدأ من وكيل الوزاره أو رئيس الهيئه و حتى الخفير محسوبين على المؤتمر الأنتهازى و سيعملون على تقويض أى نظام لا يخدم مصالحهم

  39. mon amie كتب:

    يااخواني انتو بتقدروا البلا قبل وقوعو ليه؟ اخونا ياسر ادوهو فرصه امكن اكون افضل واخير للبلد من هذه العصابه الصعاليق اللملام ديل ياخي بس شوف مستوى الالفاظ البقولها رئيس الدوله في منبر عام العالم كله بشاهدو ومن المفترض كل كلمه تكون محسوبه عليه, ياخي الشخص الجاهل ما بقولها ياخي ده فضيحه.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s