تحت شعار “انسان السودان اولاً”  يبدأ الدكتور كامل ادريس حملتة الانتخابية مترشحاً ليكون الرئيس القادم للسودان . كامل ادريس هو المدير العام (سابقا) المنظمة العالمية للملكية الفكرية (الويبو) . مزودا بالكثير من الدرجات العلمية في الفلسفة ,القانون الدولي ,الادارة ,الشؤون الدولية و العديد من شهادات الدكتوراة الفخرية من كبريات الجامعات الدولية يأتي ممثل شعب العلم و العمل ,الوجة المشرق لبلاد لطالما صدرت علماءها مساهمة في بناء دول الجوار و مكونة مجتمعات يشهد لها بالتحضر في جميع بقاع الارض .

يأتي رجل يشبة السودانين حقاً ..يشبة جيلا كاملا درس في الخارج و الداخل و درس في الجامعات العالمية ..جيل كان الابرز من ناحية الثقافة والتجربة والخبرة ..جيل يحمل ثقافة و حضارة السودان الاصلية بعيداً عن التحزب و بعيدا عن التطرف و قريب لكل انسان بغض النظر عن الجنس اللون القبيلة او المذهب . هؤلاء الرجال الذين استطاعوا ان يندمجوا بسهولة في  الشعوب الاخرى مع تمسك شديد بمفهوم الوطنية ينشد اغاني الاستقلال و يعيش حياته كلها وهو يذكر عزة بلاده و كرامه اهلها الذين طردوا المستعمر و اسسوا دولة من العدم ..بلاد عاشت اطول حروب افريقيا و ظلت رغم ذلك دولة لا تمارس التسول و لا تمتهن العنف ..وطن يحتضنك مهما كانت جراحه عميقه .

انه رجل من العصر الذهبي اذن و ان جادل البعض انه بعيد عن السياسة فانني اجد ذلك ميزة لا عيب . لا نريد كل السياسات القديمة ولا افكار الساسة السابقين . وان كنت لست هنا في معرض ذكر اخفاقاتهم او انجازاتهم لكنني اقول اننا “نستحق افضل من ذلك” كما كتب دكتور كمال ادريس في صفحته في موقع الفيس بوك . نستحق ان نعيش بمفاهيم هذا العصر وننهض كما نهضت اليابان بعد الحرب العالمية و كما نهضت الكوريتين بعد الانفصال وبعد الحروب ..ننهض كما فعلت ماليزيا ..نحلم بالمستحيل كما فعل اهل دبي و حققوه ..نتطلع للافضل لاننا وعلى عكس ما اقنعنا البعض نستحقه وقادرون عليه .

شاغلا مناصب عليا في منظمات عالمية اثبت جدارته اكثر من مره – و ألا لما تم تعينه في منصب تلو الاخر في منظمة لا تعمل بنظام المجاملة ولا الوساطات – كان وما زال الدكتور ادريس رجل مشهود له بالجودة .

انسان السودان اولاً شعار يجمعنا كلنا تحت كلمة انسان لاغيا الفروقات و موحد الانتماء للوطن واضعاً المواطن العامل الاكثر اهمية وفعالية في عملية التنمية التي يأتي بها الرؤساء . انا معك يا دكتور واتمني لك التوفيق رغم كل الاحتمالات المحبطة .

—-

لي عودة مع برنامجة الانتخابي .http://moshahidah.wordpress.com

ملاحظة : مشاهدة مجرد مشاهدة لهذا العالم و قد تكون اقلكم دراية بالسياسة .

———————————————————————

و دمتم سالمين مسلمين

مشاهدة

Advertisements
تعليقات
  1. ابكرون كتب:

    وانا يا مشاهدة معك لنكون معه …عسي ان يختفي اهل الفساد من بلادنا للأبد ويعودوا كالضبوووووب الي أجحارهم….ولن ينعم السودان بالخيرات الا بزوالهم وزوال ظلمهم قاتلهم الله…..

  2. moshahidah كتب:

    طبعا يا ابكرون انا دخلتة في اجندة اعمالي وكلفت مديرة المكتب والسكرتيرات يعملوا عنو بحث و حنزل عنة تدوينه تلو الاخرى حتى اكون بلغت و ارسل ليه شخصيا و كل البقدر عليه

    يلا انا عايزة -لو ممكن اعوز يعني- الناس العندها مدونات و مقتنعه بيه كلها تبدأ تشارك في حملته الانتخابية ..ما يجي زول شهر خمسه تقول ليه دكتور ادريس يقول دا منو ؟
    الراجل واضح انو ما عندو امكانيات لكن لو الناس الفي النت اتلفوا حولوا امكن يتعرف ..ودا غرضي يتعرف ..يعرف الانسان السوداني انو انسان السودان اولاً .. وانو في حلول غير المؤتمر اللاوطني اللانساني الحرامي ..و في حل حتى لو بعد 50 سنه ولسه في سودانين بالجد بشبهو ابوى وابوك و اعمامنا و خيالانا لسه في رجال زى اجدادنا و رؤس قبايلنا ..لا عساكر ولا ساسة يبيعون الكلام و يتبادلون الشتائم ..

  3. حاج أحمد السلاوى كتب:

    أخى الكاشف الفكلى أبكرونا ثرو بنتنا مشاهدة ما شافتش حاجة( على وزن المسرحية إياها ) .. أراك تحلم أحلام ظلوط فى رابعة النهار يا صديقى العزيز ..مع إنو الحلام مش ممنوعة لكنها قد تجيب ليك كوابيس.. و عشان أحلامك دى تتحقق على أرض الواقع عاوزة ليها شوية بخرات وأدعية وشغل من اللى إنت عارفه داااااك وكمان معاها جكة ..
    يلا شد حيلك وورينا شغلك عشام بنتنا الطفشانة ديييييييك ( بالمناسبة هى طفشت جد جدوما عدنا نقرا ليها حاجة ..أوع تكون لقت ليها فكى تانى ؟ ) تطمئن شوية إنو أمورها حتمشى صاح ببركاتك .وقالوا فى المثل الزارعة الله فى الحجر بتقوم !!
    بنتنا مشاهدة ..عوداً حميداً مستطاب ..بعد الغياب ..
    ولكن كم من الشعب السودان البطل يعرف هذا الرجل اتلقامة فى نظرنا جميعاً ؟ وعلى كل ندعو له بالتوفيق والنجاح لربما يكون أوباما جديد ..!!

  4. اننا “نستحق افضل من ذلك” كما كتب دكتور كمال ادريس في صفحته في موقع الفيس بوك

    شوفتي يا مشاهدة أنا عشان الدكتور دا عندو صفحة في الانترنت حأقيف معاهو مش أخير من جلالكين موضوع أبكرون الما بعرفوا الكي بورد من المونتر

    نحو رئيس اللكتروني للسودان

  5. nono كتب:

    مشاهده …حمدلله علي السلامه……

    الدكتور كامل ادريس؟؟

    شفتووو ؟؟؟

    له ……. شفتوووو …… الشافووو؟؟

    ده مرحله بتاعه تقرير مصير؟؟

    وله ماكدي؟؟؟

    كسره/ اوووعي يكون الشافوووو خلوووووو؟؟؟

  6. moshahidah كتب:

    يا عزت باشا ..الراجل متطور جدا ..

    رجل متعلم ومتحضر حتى برنامجو الانتخابي كلو عن العلم – البحث العلمي -اقتصاد المعرفة و كلمات الكيزان لو قروها ممكن ما يفهموا

    ملاحظة بمناسبة اللغة خلونا نستعيد مفرداتنا الجميلة بعيدا عن وزن مفعلية (منسقية ,مفوضية . مجندية , معسكرية ..كرهونا ) و بعيدا عن مفردتهم المفضلة (تمكين) عليك الله في زول اتمكن من اي شي من يوم ما جونا …احييينا بس ..ما علينا دا ما موضوعنا

    يا نونو
    الله يسلمك ..الله يبارك فيك ..

    قصدك شنو بشفتوهو ..لانو صورو منتشرة في الانترنت والاخبار لما كان مدير الويبو

    ويا جماعة هاكم :
    http://www.kamilidris.net

    دا موقعوا بداهو الشهر الفات للمزيد من المعلومات بجيكم راجعة بلنكات مقالات عنو ضدو او معاهو عشان اكون موضوعية ..حلوه موضوعية دى مش

  7. عبدالرحمن أحمد كتب:

    أول مشاهده لي للدكتور كامل كانت في تلفزيون السودان- في برنامج الزول دااااك – أيام كان في منظمة الملكيه الفكريه لكن الإحباط إنه حيفوز عمك فلان يا مشاهده زي ما حيفوزو علي البرادعي بنسبة 99.99%
    بس خليكي مشاهده والله يسترنا

  8. ود المهدي كتب:

    يا مشاهدة نحن معكم والدكتور انشاء الله يفوز لو ما بالرئاسة يخش البرلمان ويعمل تغيير
    ياحاج سلاوي اما سمعت قول الشاعر :
    والعيون المسهدات غير تلك التي غفت *** واعذب الاحلام هاتيك التي ما تحققت
    يعني حلمنا دا اكبر من الحلم العربي ولا شنويا فكي؟

  9. الغبشة كتب:

    غداً نكون كما نود………………
    وغدا تجف مدامعى……………….
    حتى لو مافاز بكره حيفوز فكره بس الحكايه دايره دعم وتفاؤل وتوكل على ربنا قبل ده كلو………………
    اول مره اعرفه سمعت برنامج حلو الكلام فى اذاعة البيت السودانى تلك الاذاعة الرائعه تمت استضافة الدكتور فى تلك السهره وكانت حلو الكلام حقاً……………..

  10. الزهراء كتب:

    لكم التحايا اعزائي
    حقيقه الرجل يعتبر من الاعلام المهمه في بلادي وانه لشرف كبير ان نقف معه حتى نرى بلادنا تسير بطرق علميه ومعرفيه وعشان نحاول نلحق بالدول التي تطورت بالعلم وحتى لو النتيجه محسومه نحن برضو بنقول ربنا فوق كلام اي زول وبس خلونا كلنا نصلي وندعي ونتمسك بالامل ونوكل امرنا لله سبحانه وتعالى مع الاجتهاد في سبيل فوز الدكتور كامل في الانتخابات

    مشاهده: احييي انا مية مره على حال البلا وحال البلا وحال السواد الفيه الناس في بلدي
    كسير مجاديف للمشاريع الاقتصاديه
    وظائف وشغل الا بالواسطات
    غلاء اسعار والمواطن بقى مرمطون والله
    واتشده في حالو وفي كيف ياكل ويشرب ويعيش اولادو
    والمرتب ما كافي والقصه جايطه

    نسأل الله ان يحل قيودنا ويفك كروبنا وما ضاقت الا لتفرج
    ويا مقلب القلوب ثبت قلوبنا على الايمان

    ويبقى الامل احبتي في سودان جديد اخضر جميل مليء بالسعاده والراحه

  11. مشاكل كتب:

    سلامز

    قلوبنا مع الدكتور كامل إدريس

    و سيوفنا مع المشير البشير

    و اصواتنا للبحر

  12. moshahidah كتب:

    سلام يا اخوان …
    كنت اناقش الموضوع مع زميلي في المكتب و قال لي انو الشعب غير واعي
    و اقول انا ان الشعب يائس و بائس
    و العيب كل العيب على المثقفين الذين يفترض بهم ان يعلنوا عن مرشحيهم واسباب اختيارهم لهم
    من واجب المثقف الذي منحته الحياة فرصة التعلم والقراءة و ربما السفر ان يكون القائد للمجموعة البشرية التي ينتمي لها .

    على الاقل المصريين عندهم حركة كفاية رغم كل شئ تقف و تردد ان لا للتوريث و لاءات اخري كثيرة تخصهم

    نحن ماذا لدينا قروب قرفنا في الفيس بوك ومجموعات اخري صغيرة
    صحف اغلبها بين الاحباط او مولاه الكيزان
    تلفاز حكومي
    قنوات فضائية للطرب فقط !!!!

    اين كتابنا _اين رجال الاعمال

    تذكرون التفاف اوبرا و رجال هوليود الكبار حول اوباما بالمال و الصوت والتأثير

    بالامس علمت ان د.كامل ادريس لا يعوزه المال كما اعتقدت .

    لكن لا ارى ان العاملين في حملته شايفين شغلهم كويس

    على اي حال …متى يكون المثقف السوداني مسؤول ؟ ومنتى يكون للمال سلطة ليس فقط على رقاب المشترين !!

  13. الاخت المشاهدة : لك التحايا …. البروف كامل مر من الغربال وعقبال عنق الزجاجة …. قرأت برامجة ولا أعتقد أنها تختلف عن الخطب السياسية وكانت خطوة جريئة جدا انو يتطرق لموضوع ذوى الاحتياجات الخاصة … أتمنى ان تكون خطبته السياسية قابلة للتنفيذ وبصراحة للآن كفته هى الأرجح على الأقل بالنسبة لى …. وقد عبت عليه مدح الكادر الصحى لما يبذله من جهد ونحن نرى كيف ان الأطباء قد تكدسو بالخرطوم ولم يفلح نفس الكادر فى جعل الاقاليم جذابة لهم بل لم يعط الفرصة لأطبائنا المميزين بالخارج فرصة التنافس او اقله فرصة تقديم خدماتهم لبنى وطنهم …
    الشعب السودانى مكبوت وليس عن عدم وعى وانما بخطة مرسومة يستفيد منا اصحاب الكراسى الوثيرة ولو تسابقت البرامج التلفزيونية الى توعيته بحقوقه وواجباته مثلما تفعل عند ترويجها لقيادى احزابها لكان أكثر وعيا وأرفع شانا .

  14. ياسين شمباتى كتب:

    مشاهدة..سلام..
    كلنا قلبا وقالبا مع الدكتور كامل من حكم ديمقراطى وشورى حقيقية ووعى علمى ومنهجى حقيقى..

  15. حاج أحمد السلاوى كتب:

    ولدنا شمباتى ..حمدن لله على سلامة الظهور الأسفيرى العلنى ..
    أخوك عبدالرحمن كان بيسال عليك ومشتاق ليك ..وقال عندو حاجات كتيييييرة يوم تهريجك .. اقصد تخريجك عاوز يفتها … رايك شنو ..؟ ما عاوزين الموضوع يصل حد الإبتزاز ..
    يلا إجتهد شوية عشان الدكتور كامل ..وربنا يوفقه ..حتى ولو بالتزوير ..

  16. ياسين شمباتى كتب:

    الوالد السلاوى..سلام وشوق خرافى..
    والله العلنى دى حلوة جدا,,اما عن عبدالرحمن فشاااايفو بيلعب بالنار,,لكن بنتفاهم لانو عندى كرت رابح برضو..ويارب نفرح بى دكتور كامل وبالسودان كلو اليوم داك…

  17. مُخير كتب:

    المشاهدة سلام
    الحبان في كل مكان سلامات
    معذرة لم أجد فرصة للتعليق على بوست الحبيب أبكرون حول الجلاكين، وفي هذه العجالة حأعلق على الموضوعين، مع كامل إحترامي وتقديري للدكتور كامل الذي يحظى بتقدير كبير من الجميع وقد يصلح رئيساً للجمهوريةولكل المرشحين الآخرين، غير أنني أتمنى وأدعو الله أن يحكم السودان رُجلاً يمتلك ناصية الفكر وبُُعد النظر، وحكمة الفلاسفة، ودهاء السياسيين، وعدالة الصالحين، ولا يتناطح عنزان في عفته ونظافة يده ولسانه، له حضور ملموس في المحافل الدولية وعلاقات متميزة مع كل القبائل والأحزاب والعشائر داخل الوطن وبالقدر نفسه مع قادة معظم دول العالم، إعتلى سدة الحكم صبياً فخبر دهاليز السلطة وظل حاضراً وفاعلاً في الساحة السياسية على مدار نصف قرن، وحتى الآن يتمتع بحماس الشباب وقوتهم، وحنو الآباء وحزمعم، وحكمة الأجداد وهيبتهم، فليس أقدر منه على إخراج هذا الوطن من مأزقه التاريخي الراهن، أتمنى من الله جل وعلا أن يتيح له فرصة كي يسدي دين الوطن ويعيد الأمور إلى نصابها، والله يحفظ السيد الصادق المهدي ويهدي شعب السودان إلى منحه الثقة اللازمة لإصلاح ما أفسده الدهر.

  18. moshahidah كتب:

    التركي ..

    اتمني فعلا ان يكون السيد ادريس اهل لثقتنا ..
    حاليا لا اجد علية غير شبهة تزوير تاريخ ميلاده ليقبل مدير للمنظمة و رغم انه عمل يدل على عدم النزاهة لكنة خيار رجل كان صغير وقتها واقل خبرة ..و احنا مش عايزين ملاك ..التزوير دا بعملوهوا الناس عشان يتهربوا من اللازامية وغيروا

    شمباتي ..
    مرحبا بك في مجموعة المؤيدين

    مخير ..
    طبعا انت مخير في اختيارك ..(^_^)

  19. حاج أحمد السلاوى كتب:

    أخى العزيز الأمير مخير ..حياك الله وأبقاك ..وكل الأحبة داخل وخارج أمازونيا العظمى ..سلام
    أولاً أحترم رايك ورؤيتك الواعية وآمالك العراض فى خروج أمتنا من أزماتها المتلاحقة يوماً بعد يوماً وأحترم تاييدك للإمام فى مسعاه للرئاسة مرة أخرى بعد غيبة طويلة عنها ..سعى لها كثيراً ونالها مرتين ..فى شبابه وفى منتصف العمر تقريباً ..فماذا قدم السيد الإمام غير النظريات الإقتصادية وبعضاً من المصطلحات الجديدة فى عالم السياسة والإقتصاد ولعل الإخوة الكواشف يذكرونها ونعيدها للشباب ..توسيع المواعين السياسية ..السندكالية ..وهلمجرا ..وممالا يحضرنى الان ..وفى فترة توليه الثانية سعى أولاً لإستعادة ما سلبهم إياه المشير الأسبق المرحوم جعفر نميرى من أملاك ..
    هذا لا يعنى أننى أرى أن الآخرين خيراً منه بل هم سواسية فى فترات حكمهم السابقة ..لذا نريد أن نرى وجوهاً جديدة بعيدة عن الطائفية والحزبية التى تعمل للمصلحة الحزبية فقط ..
    وفى النهاية كل له رؤيته وتحليله الذى يمليه عليه ضميره فى إختيار من هو الأصلح لإدارة دفة حكم هذه البلاد ..وأتمنى أن يوفقنا الله جميعاً لإختيار ذلكم الشخص ..
    ولولا إختلاف الاراء لما كانت هنالك إنتخابات أصلاً ..
    وللمعلومية نصف عائلتنا لها صلة قربى ونسب ببيت المهدى من جهة آل شرفى..أمدرمان ..وادنوباوى .

  20. ايمانا من جمهورية امزونيا بالمساواة والتنافس الشريف فقد أعلنت أتاحة كل امكانيات الدولة لمرشحى الرئاسة بمافى ذلك السفر عن طريق ال(فى آى بى) … بينما الناس تحاول هضم التغيير المفاجئ تناقلت وكالات الانباء مقتل المنافس الرئيسى لمرشح الحزب الحاكم من طرف معتوه بصالة كبار الزوار. صحا المرشح (الواثق) من نومه ليفتح المذياع وكانت نشرة الأخبار التى بدأت ب (أيمانا منا بالمساواة والتنافس الشريف ….) ولم تتغير بقية نشرات الأخبار الا عند الثامنة مساء حيث اضيف اليها خبرتخلى المرشح الواثق عن التمنافسة الشريفة .

  21. التلب كتب:

    سلام للكل
    الأخت مشاهدة مع احترامي لخيارك و خيار الأخوة و لكن أعتقد أن شبهة التزوير ليست بالامر الهين. يعني يا مشاهدة زول لمن كان صغير و قليل ألخبرة كان خياره تزوير تاريخ ميلاده! طيب الآن بقى كبير و خبرته كبيرة حيكون خياره شنو ؟؟؟؟
    يتوجب في الشخص الذي يترشح لمنصب رئيس الجمهورية أن يكون نزيها (النزاهة أولا و ثانيا و أخيرا) و أنا لا أرضي بأن يكون رئيس السودان معروفا على مستوى العالم بالرئيس المُزوِّر.
    أنا لست من أنصار تشويه صورة أي إنسان و لكن استفزني جدا ترشيح د. كامل و الشي الذي يصيبني بحالة من (الإستغراش) هو كيف يتجرأ شخص تم إرغامه على الاستقالة من منصبه بعد اجراء تحقيق أثبت تورطه في عملية تزوير على الترشح لمنصب رئيس الجمهورية؟؟
    أرجو أن لا يفهم هذا التعليق في سياق الدعاية لأحد المرشحين. أنا شخصيا و لوجودي خارج أمازونيا لم تتح لي فرصة التسجيل للانتخابات هذا بالاضافة الى أن قائمة المرشحين نفسها غير مشجعة و كما تفضل الاخ أبكرون جلهم من الجلاكين. و لكن الانتخابات في حد ذاتها خطوة في الطريق الصحيح. أسأل الله أن يحفظ السودان.

  22. ياسين شمباتى كتب:

    الاخ التلب..سلام..
    فعلا كانت هناك قضية ضد الدكتور كامل الا ان ساحته برئت وواصل عمله فى المنظمة حتى اكتملت دورته,,ولقد ذكرت هذا قبلا..لكن دعنا نضع فى الخاطر انه زور شهادة ميلاده حتى يتاح له اخذ المنصب,,لا يمكن الجزم بذلك لانه ولد فى زمن كان التأريخ فيه بموت فلان او حج علان او فيضان النيل!! ومن وجهة نظرى انها قد تكون هنة تؤخذ عليه ولكنها لا تخصم منه شيئا..وشكرا كتير على الراى وتوضيح الامر..

  23. التلب كتب:

    العزيز شمباتي تحياتي
    الرجل يا شمباتي تمت أدانته من قبل وحدة تحقيقات تابعة للامم المتحدة. و من ثم تم الضغط عليه فاضطر لتقديم استقالته و التنحي عن منصبه قبل عام كامل من تاريخ إنتهاء فترته.
    كما ذكرت في مداخلتي السابقة لا أود تشويه صورة الرجل و لكن ترشحه لرئاسة الجمهورية تجعله عرضة للانتقاد.
    الاخ شمباتي الرجاء أرسال رسالة الكترونية على العنوان التالي anasudani100@yahoo.com

  24. ابكرون كتب:

    التلب ازيك
    ياخ د كامل تمت تبرئته رسميا(من حكاية تزوير العمر) التي روج لها احد الشوام لمصلحة تختص باعادة انتخاب الدكتور لفترة جديدة…. والبراءة جات من قبل الامم المتحدة بعد ما عرفوا قصة انه اي سوداني مولود في الاول من يناير….فصحيفته بيضاء من غير سوء …مش زي صحايف ناس

  25. التلب كتب:

    العزيز ابكرون سلامات راجع بريدك الالكتروني

  26. ياسين شمباتى كتب:

    التلب..
    علم ونفذ..لكنى اؤكد لك انه قد برئ تماما كما ذكر ابكرون..وان كانت هناك معلومات غائبة عنا الرجاء تزويدنا بها..واوافقك الراى فى ان المرشح للرئاسة او اى منصب عام يجب ان تكون سيرته ناصعة وحتما سيكون عرضة للانتقاد..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s