حكاية الطماطم

Posted: الجمعة,5 فبراير, 2010 by عبدالرحمن أحمد in اخرى

عندما يتغرب المرء عن داره وأحبابه تواجهه مواقف ومحطات لابد الوقوف عندها وأخد صنه منها المضحك والمبكي والمضحك المبكي بإتجاه شر البليه ما يضحك فهي غالبا تطفو علي السطح بأكشن الما بعرفك بجهلك والري أكشن شوتته بتكون قويه بإتجاه حنوريك العمرك ما شفته وأصبر لي يا اب زولي الما بعرفك بجهلك والجهل مصيبه والمصيبه العناد معه بمعني اخر تكوين الصوره النمطيه والاصرار عليها وترصد الاخر بكل ما يقدح فيه مع العمل الدؤوب علي بطره وغمت حقوقه وهضمها فيكون كمطلق الاشاعه فمصدقها.
       لزوم هذه اللازمه – مع الإعتذار للبروف – أن صديقي العزيز الطيب أبوصالح  وي يوم من الايام يهم بركوب الحافله المتجهه الي سنتر الخرطوم يستوقفه عم شريف يا ولدي ماشي علي الخرتوم
-عم شريف كيف أخبارك واحوالك أيوه ماشي السوق العربي يللا نترفق سوا -طبعن- عم شريف رجل حبوب ونكته
-يا ود أخوي دحين مووش إتخرجت السنه الفاتت إنشاء الله إشتغلت
-والله في الحقيقه يعني هو لسه  والله  وأنا شايل السي في بتاعتي وماشي لناس شركة بتروجن قالو عندهم تقديم أهو قلنا نجرب حظنا
-أها يا ولدي ما حاولت تغترب؟؟؟
-ولا مفكر
-أحسن حاجه
-كيفن أحسن حاجه ياعم شريف !!!!
-أنا كنت في 0000000-دوله خليجيه- وكنت ماشي مع الكفيل في سوق الخدار -الملجه – وكان في طماطماً مرصوص بطريقه ظريف جميله ويشهيك السلطه قام صحبك سعلني يا السوداني تعرف الشي دا قلت ليهو علي الحلف يا اللخو الشي دا في موسمه لا يساوي المداد الذي كتب به أقصد القفه الشايلنو فيها قام صحبك ضحك ضحك لامن وقع في التراب قال لي انتو السودانين كذابين كذب تعبوا السكر وتكتبو عليه إنتاج جمهورية السودان أها أنا قمت زعلت شديد خلاس وعشان أمغصوا قلت ليهو شفت المنقه الهنديه دي
-قال لي دي برضو عندكم
-علي الطلاق دي موسمها وكتر ما الخير باسط والمنقه فايضه وزايده بأكلوها الحمير وتقول لي شنو قال طماطم قال

Advertisements
تعليقات
  1. ياسين شمباتى كتب:

    الحبيب عبدوز..سلام..
    شركة بتروجن دى ما حقت فلان داااااااك؟؟ والله انحنا ذاااتو بقينا ما عارفين نعمل شنو مع الخلايجة دول,,ساعة يقولوا ليك بلدكم قالوا اتصلحت والبترول مرة واجد!! واحيانا يقول ليك سمعت انو السودان فيهو مجاعة,,عسى ما شر؟؟
    لكن ياهو حالنا,,نكاكى نكاكى ونرمى بعييييييييد..والطماطم البنرزعو دا وصفيحتو فى الموسم بجنيهين وصل فى فترة سعرو الى ال 15 جنيه!! فى حين انو فى الخليج البستوردو دا ما بفوت ال4 ريال كان نطط,يعنى اقل من 3 جنيه وعلى مدار العام!!! ودقى يا مزيكا..

  2. العزيز دكتور شمباتي
    جمعتك مباركه
    شفت مشكلة بلدنا وفرة الانتاج وسوء ربط مناطق الانتاج بمناطق الاستهلاك ومااافي تخزين من أساسو المنقه في موسمها في النيل الازرق يأكلوها الحمير – ودي حقيقه – وتطير السماء في غير الموسم
    وزمان في المدرسة قالوا لينا مصنع وين دااك قفل لنفس لعدم ربط الشنو بالشنو ومصنع تجفيف اللبن ما عارف مالو
    ودقي يا مزيكا

    • يا عبدو الصفايح خلوها بقت تتعبأ في كرتونة البرتكان المصري الكرتونة ب25 جنيه جنيه ينطح جنيه وناس الكارو حايمين بيها في الحلة طبعاً بالين وأربعة ب2 جنيه تاني شنو أقول ليك عن الرجلة الدايرة عدس وصلصة وزيت وحبة بصل . زمان بقول البيأكل عيشتين رغيف يضربو بيه المثل اليومين تآكل كيسين عيش رغيف ما تشبع حل دي الرغيف دى فيه شنو تتطبق خمسة ما يكفو لقمة جرب بكره وأنا في إنتظارك لمن تشبع

  3. محنك كتب:

    يا دكتور ابو الش

    الطماطم لما تقوم من حوضة وتصل السوق يكون صاحبها خسر اكتر من 3 ريال بالكيلو فيها اقرب منطقة وهى شمال الجزيرة مناطق ابوقوته والعزازى من هناك للخرطوم فى 6 جبايات و 4 كمائن جكع كمين شرطة مرور وما دايرين سبب مكوش شايل ناس وانت عربيتك تجارى رخصتك ترخيصك والله ما فاضلين الا يقولو اقامتك او هويتك

    تقول لى البستوردو لو استوردوه حتكون الجمارك والضرائب على الكيلو اكثر من سعر الكيلو فى اى بلد خليجى

    الحكومة دى لو ما خلت ضرائبها وجماركها وجباياتها الناس بتموت الان الكان غنى فقر والفقير وصل العناية المركزة

  4. محنك
    وجوه السوق المركزي في نقطة جبايات تاااني شفت الضرائب دي شايلنها كم الناس تكورك علي الدبلكيشن بتاع الضرائب
    هسي بتاعتنا دي يصفوها كيفن – إنفينيتيشن –
    شمباتي
    قلت زول بتروجن مالو – صاحبك ما قايلها دايمه رمو ليهو الجوكر جوه الصندوق قام جر الجوكر جروه خمسين
    ودقي يا مزيكا

  5. ابكرون كتب:

    عوبد مساءك بندوره او بنضوره
    البغيظ يا عبده ان سكر كنانه يعبأ مره اخري في السعودية والامارات والكويت ويكتبوا فيه انتاج سعودي أواماراتي أوكويتي …..اي نعم هم شركاء في كنانه لكن هم ليسوا بمنتجين ….ونحن ناس الدقير نايمين في العسل

  6. يا جمأة أنا مرة في نقطةتحصيل زكاة وضرائب المتحصل بعد الضرائب دفع صاحب العماري الزكاة بإعتباره زروع تقول لي طماطم دى شنوإن الله طيب يحب الطيب ولا دى فقه الضرورة . حقو ناس المطاعم ما يدفعوا ضرائب بسببهم مزقنا فاتورة الدواء للناس البياكلوا جدادهوالكيلو ب10 جنيه يعني نقول المحل عامر ونشط ونشيل ضرائب يا أخوان ناس المرور ببيعوا المخالفات لناس الهايس من صباح الرحمن . ناس المرور الواحد من الصباح بيربط وش ككو لأصحاب الهايس وخليك من شناتم تقول معزلين تقول لي طماطم يا أخونا أبكرون كتاباتك التأسفية عن الإنتخابات دي خليها علي جنبه دايرين نشوف قفة الملاح دي بعالجوها كيف؟ يا السلاوي ألحقنا وأفزعنا بعد دى نأكل نيم يا جماااااااااااااااااااااااااعة
    الروووووووووووووووووووووووووووووب

  7. عباس كتب:

    سلام عليكم وجمعة خير علينا وعليكم
    عندنا غاز البتجاز برضو فاكنو في الهواء لانو مافي مستودعات كافيه مع انو حاجة لابد من انها تتعمل المستودعات دي
    علي حد علمي توقف تصنيع اسمنت عطبره لعدم معالجة مشكلة التلوث او نضوب المنطقه من حجر التصنيع وكلها في راي ليست اسباب لقفل المصنع
    اذا قلنا البلد في مرحلة تعمير وانشاء يعني نبني البلد بالشي المستورد مع العلم بامكانية انشاء المصانع
    ونجي علي مصنع جياد قايمين وقاعدين جياد جياد وكل الحكومة ودواوينة عربات مستوردة مع انو لو صرفو ليهم جياد حاتتكون بمثابة دعاية للمنتج (نعم بعض الجهات الجكومية تعتمد علي جياد ولكن ليس بذلك القدر اذا ما قارنة الجهات الحكومية ككل
    الله كريم علينا

  8. الطيب ابوصالح كتب:

    الاخ عبده ما داير اقول ليك من خلا داره قل مقداره لاننا قل مقدارنا في بلدنا الحبيب وما علينا الا الصبر والامر من الصبر انو نرجع في هذه الظروف المعروفه دي جربنا الصبر وفشلنا . خلينا في الغربه لقايت ما المراره تتقسم نمشي نشوف كومنا وين دا اذا كان عندنا كوم

  9. أبكرون
    صباحاتك كاتشب الجماعة ديل لما يكتبوا إنتاج سعودي وللا إماراتي أو كويتي دا ياهو -العمل الدؤوب علي بطره وغمت حقوقه وهضمها – يعني نحن كتيره علينا إنتج جمهورية السودان تعبئه مملكه الواق الواق وكان قلنا هم الانتجو قصب السكر دا زارعنه في الرمله صااح – وناس الدقير ما ببردو قلب نوهااائي نايمين في العسل
    عباس
    مشكلة الغاز اتحلت ببناء مستودعات جديده لكن مشكلة التلوث شمال الخرطوم مشكله بانتظار الحل
    أبو الطيب
    قلت المراره وللا شنو؟؟؟
    الخوف نرجع ما نلم في الجلد

  10. سلام يا أعزاء
    يا حليلك يا بلدنا
    حليل حكاية بيع البصل بما حصل
    و حكاية الكوم بقرش و الدقة بلاش
    و حكاية الشعيرية ….. حد متذكرا

  11. ودالزبير كتب:

    شباب سلام يا ناس القوطه

    أول حاجه إنتو المعلق الطيب أبو صالح هو نفسه الطيب أبو صالح المشار إليه داخل البوست والكان رافض لفكره الإغتراب ولا تشابه أسماء ساكت
    أبكرون

    ناس الدقير ما نايمين في العسل ديل نايمين في الطابق التاني يتاع نادي المريخ

  12. محنك كتب:

    الاخ عباس جيتنا لموضوع جياد

    دى شركة عالمية شركة هيونداى وليست شركة محليه بالكامل

    عند وصول الانقاذ تمت تصفية شركة مواصلات مدينة الخرطوم ابورجيلة سابقا …. واين مبانيها وموقعها قرب سباق الخيل الان واحد يورينى طولت من السودان والشارع دا بالذات

    ثم الان يقوم والى ما معروف جاى ام مغادر بصناديق الاقتراع يقول انو عايز تانى يجيب باصات من بره
    تاتا
    الصين
    ماليزيا

    طيب لو فى دعم للمنتج الوطنى حقو الوالى دا يدقو او يشنقوا جياد دى مالها ما عندها بصات لاحقين شنو جوه الخرطوم السايقة واصلة

    والمواطنين الاشترو اسكراب وكرور جياد ( حافلات تعمل لمدة سنة واحدة ) مثل الحقنة تستعمل وتطرح فى النفايات يتمقلبوا لا رجعوا استثماراتهم وكامن جابتلها بصات

  13. الغبشة كتب:

    ياعبدوز:حليل زمن امى كانت بتخلط الطماطم فى رخصتها وتعبيها فى كيس قماش وتعلقها فى الحبل لحدى ما تنزل كل مويتاه وتكون هى مخزون جيد لايام الغلا او فى غير موسمها والله كانت ايام…………………….اها نرجع لقصتك ياخوى اى شى بقا عندنا زى حكاية طماطمك سؤ تخطيط ما اظن!!؟؟ عندنا منظراتيه ميه الميه لكن منو البنفذ ومنو البتابع فو سؤ ادارة والتنفي والمتابعه من اساسيات الادارة الرشيده هسى دحين خريجيننا مازى الطماطم كتااااااااااااااااار ولما يطلعوا بره اشطر منهم مافى ويفيدوا البره ويفيدوا نفسهم لو قدره لكن البلد الطلعتهم ابداً ،،،،اها زى المنقه يعنى(( مش الحاجه السمحه بنقول عليها منقه)) جوه تاكلها الحمير كما اسوت عصير((وطبعن عارفين الخلاطه البتسوى العصير منو!!!!!!!!)) وبره تتباع بالدنانير .
    والى لقااااااءءءءءءءءءء

  14. د.عزت
    سلامات كترات
    ما قلت لي السكسكانيه ما شايفها إختفت وللا بقت من الممنوعات
    ودالزبير
    تشابه أسماء سااااااكت – ساكت ما بتكلمش -وحلوه الصدف يا ربي يكون الطيب غير رأيه واغترب إحتمال ممكن ربما وللا يكون واحد لقي الجلابيه قدرو قام لبسها
    محنك ثرو الغبشه
    زامر الحي لايطرب

  15. حاج أحمد السلاوى كتب:

    ابو عصمت المرطب .. العجوز ..
    حسه باقى ليك يا عزت فى زول بيعرف الإصطلاح بتاع الكوم بقرش والدقة بلاش دا ؟
    لاكين قعدت اضحك لامن الناس قالوا الزول دا مالو بيضحك براهو .. جنّ ولاّ شنو ؟ وهم ما عارفين السبب طبعن … مساكين ..الله يجازيك يا عزت ..غايتو بتنكت لينا جنس حاجات … نسيناها زماااااااان … حسه تلاقى بقية الكواشف ضحكوا لامن دموعهم جرت واتذكروا ماضيهم البعيد.. ..ويا حليل الدقة البلاش ..وربنا يديك العافية ..

    – ولدنا عبد الرحمن .زما شاء الله عليك … سويت ليك سوق |.. بالطماطم بتاعدك دا ..كان حقو تتم باقى السلطة ( بفتح السين واللام .. ما تفهمونا غلط !! )..

  16. الطيب ابوصالح كتب:

    ود الزبير
    ان شاء الله امورك طيبه
    ياهو زاتو بيشحمو ولحمو لكن يا اخوي ود الزبير الشواكيش كترت مع الفلس غيرت كل افكاري…وانت عارف الشي الثاني وربك يغير الحال في ابريل

  17. الوالد حاج السلاوي
    ــــــــــــــــــــــــــــــــــــ
    تلامذتك ياباشا الفكر التجاري دا جايبنه من سعادتك وكل بوست وانت بخير
    لكن أظني عارف حكاية كوم القرش والدقه البلاش
    لكن الشعيريه المقدده -قيل هي المكرونه –
    ماني خابر موضوعها شنو؟؟؟

  18. ابكرون كتب:

    سلولو/عزت
    الله خلق للنعجه ضنب
    الكوم بقرش والدقه بلاش
    كوم شنو نحن ما عارفين سمعناها كده لكن اكيد سلولو بكون سفه الدقه دي ….تكون دقة دوم ولا قنقليز….ولا دقة حلاوة (شنو كده) سكينه……
    يا حليل عبود…ما شاف حلويات نسوان الرؤساء اسه..ايشي لكوووم وايشي فيرورو روشيه وماكنتووووش والغريبه وزيرة خارجية موريتانيا شكيتا لي الله…..

  19. حاج أحمد السلاوى كتب:

    الفكفك الكاشف الكبير .. ابكرونا ..
    يا ها زااااته جبت الناقصة الكنتا أنا ناسيها ..الله خلق للنعجة ضنب.. حسه يطلع سنكل وبشار وينكتوا ليك حاجات تانية كمان ..وما ننسى الكاشف القاعد فى وادمدنى دااااااااك ..وعامل فيها رايح .
    غايتو أكان طلع ولدنا سهيل بيعرف الحاجات دى تحولوهو طوااااالى لقروب الكواشف ..
    كدى يا أبوعصمت أكتب لينا عن الكرتلة بتاعة زمان …وشختك بختك ..
    وغايتو .. جنس .. غايتو .

    • يا عمنا السلاوي سلامات
      علبة الأناناس كانت بريال زمن الكرتلة وشختك بختك من دكان الطوخي بأمدرمان وعياس رشوان جنب جامع أمدرمان الإعلانات كان ليها طعم والكبك ب99 قرش من باتا والكراسات تصرف مجاني بالمدرسة والحبر بلاش .
      يا أبكرونا بعد الطماطم الكتيرة دي حقو تفكر لينا في مصنع دكوة لزوم السلطة والفطور . آخر الأنباء بصحيفة حكايات د. الجميعابي بقول نسبة الأيدز 1.1% بين طلبة الثانوي الداخلين الجامعة يعني 11 بين كل 1000 طالب .
      عارف اليوم قضيت رحلة صيد سمك عند الكبري الجديد بالصالحة بياض كبير كبرة لو حظكم كويس السبت الجاي عازمكم سمك سمكمك بس تجيبو رغيف معاكم وطماطم ودكوة الصاج علي .
      تحياتي

  20. عباس كتب:

    اها الدردقو بالشطة عشرة جنيه بس الظروف جبرتنا عشرة جنيه بس
    صحي كانت الظروف جابراكم يالكواشف ؟

  21. الاخ الصديق

    كدي إستهدي بالله وروق المنقه كلو بمضي
    وكلو مع الايام بروح
    بس نتحمل ونصبر ونأمل إنو الجاي صباحا أجمل

  22. السلام عليكم ويومكم سعيد ….. غايتو نحن ناس اقاليم ساكت …. بس كنا بنشترى علبة الصلصة الصغيرة ملانة فول مدمس بتعريفة والبمباى المسلوق اربعة بقرش وكمان البيضة المسلوقة بقرش لكن الطماطم والسلطة المابتغيب من صينية الغدا (هو وينو هسع ) كان بتكلف قرشين كدة مابتذكر انو فى جزر ولا خيار …. أبو صالح قالو تانى الغربة العكسية بتبدأ يعنى ناس عمك ابكرونل يجو عايدين مع الدكاترة والمهندسين بس خلى الانتخابات تنتهى على خير …. الله كريم

  23. حاج أحمد السلاوى كتب:

    أخونا التركى ..سلام ..
    يجوا عايدين …إن شاء الله عايدين بالمدرع و ……… ولاّ ساكت ؟ تاااااانى ؟؟؟
    مجرد سؤال سغيرونى خطر ببالى ..

  24. حاج أحمد السلاوى كتب:

    معليش يا خواننا سؤال سغيرونى خارج نطاق البوست الفرود …
    نما إلى علمنا إنو السيدة سمسمة حرم ولدنا الدينمو أفليقا قد وصلت البلاد قادمة من بلاد الصين والحصين بالسلامة قبل فترة من الزمن … طيب أفليقا دا مختفى لشنو وعشان شنو ؟؟ غايتو إن لم يسلم نفسه عند إدارة المنتدى خلال 24 ساعة ستتخذ ضده الإجراءات القانونية بما فى ذلك إبلاغ الإنتربول ..ولا عذر لمن أنذر ..

  25. عمنا السلاوى – والله افلايقا تمام وماعندو اى مشكلة – ويقرئكم السلام – وبقول ليكم – هو حاليا فى مرحلة تصالح مع الذات اثناء الالتفاف الانموذجى لتلافيفه الوجدانية – فادوه صنة وبجيكم صادى قريب .

  26. حاج أحمد السلاوى كتب:

    ولدنا سترايكر ..سلام ..
    مع إنو ما فهمنا حاجة من تصالح الذات مع الشنو ما بعرفو داااااك …لاكين لقينا ليهو العذر خلاس ..وعرفنا البيهو والعليهو ..وإن شاء الله ربنا يلطف بيهو ويديهو الفى مرادو ..
    إن شاء الله حرمه المصون تكون معاها شوية حصين من الصين ..طبعن حتكون حصين سغيروووونة ..زى أسيادها البتشابهو زى حجارة البطارية ديل .. من النوع الإسمه بونى ..مش كدا ؟
    يمكن يا ربى يكون قاعد يكتب فى تقرير عما حصل فى البيت فى غياب السيدة الأولى ..سمسمة ؟
    على أى حال له خالص التحايا ..وفى إنتظار مداخلاته الجميلة..

  27. عبد المنعم كتب:

    والله لكن حاجة تغمس جنس سطحية وعدم تقدير امور يصيب بفوران الاعصاب … الله يجازي الكان السبب

  28. طارق أب أحمد كتب:

    والله يا عبد الرحمن كلام عمك شريف سمح شديد ألا ما لو مزعل الشمباتى و رفاقتو أكان الطماطم فى الصيف الكيلو بى خمسطاشر ما تاكلو تفاح الكرتونه بى عشرين
    صحى عالم غاويه فقر

  29. كلامك صحي يا طارق أب أحمد
    إلا كمان البقنع شمباتي ورفاقتو منو

  30. ياسين شمباتى كتب:

    اب احمد..سلام يا حبيب..
    ابييييييييت ما بقتنع الا الجماعة يجوا عايدين!! كان بالمدرع والمكسيم يا حاج السلاوى ولا كدارى,,المهم رجعتهم…

    محنك..سلام..
    بمناسبة الجبايات والتحصيل امس كان فى حوار مع مدير عمليات المرور بالعاصمة فى برنامج(عدد خاص),,زولك طلع الشجرة بى قفاها وقال اصلو هو الزى ناس المرور منو فى طيبتهم واخلاقهم وفهمهم!! قلت ياربى الزول دا فى الخرطوم ولا دبى!!؟ استغفر الله..

  31. د.شمباتى الغريبة بتاع المرور كان بصر أنو الكلام دا ماحاصل واتهم الزول القطعوهو اكتر من ايصال فى اليوم وناس التلفزيون بالكذب لما قال الايصالات دى ماأظنها فى نفس اليوم عجبى !!! بس عجبنى حرارة قلب المذيعة مع أنها احيانا نعدت حدود اللياقة الحوارية .

  32. التركي
    المسعولين بتاعننا لما يستضيفوهم في التلفزيون أو الإذاعه ببدعو جنس إبدااااااااااااع
    أظنك شفت كلام الزول الجمارك والتفاح الامريكي وفكت آهره ديك /إنت أمريكا البتعبد فيها دي ………كلامي واضح كنت بتكلم باللاوندي/
    كده وروني يا شمباتي ويا التركي لاوندا دي موقعها وين في الخريطه

    كسره
    شمباتي : دخلت منطقة إرسال؟؟؟ جاري البحث عن الشبكه ؟؟؟؟

  33. ياسين شمباتى كتب:

    التركى..سلام..
    النصيحة(منى ابوزيد) معروفة بالقطامة وكدة,,وفعلا تعدت حدودها لما قالت ليهو (كدى خلينا من الثقافة المرورية) كأنها قاعدة فى ونسة نهارية!! اما البونى فمعروف بلباقتو وكدة..كمان ما بخجل قال انو كل العساكر خريجى جامعات وكمبيوتر وثانوى!! ما بنبخسهم حقهم لكن القليل منهم متعلم,,كمان ما علق على حتة الزكاة البياخدوها من العربات دى,,وما علق على الزول الشالوا رخصتوا ولا رخصة د.عبدالقادر محمداحمد مدير الضرائب الاسبق…فضح نفسو بس..

    عبدالرحمن…سلام…
    جينا الحضر خلاص..اظهر بهناك..

  34. ياأبو عبده كسعولينا ديل مسعولين من الخير ومناه بس مايصدقو يستضيفوهم والمذيع الذكى بس يدردقهم براس الخيط واضانك ماتسمع الا العجب … ياخ مش بقولو الجاهل عدو نفسه ؟؟؟ … لو مشيت لشمباتى بهناك خلاص يكون وراك محلها بس ماتحاول تصلها .
    الحبيب شمباتى : ياخويا البونى حيرنى والله وماعرفته محرج من لهجة منى ولا مستمتع من الماقادر يعبر عنه وجابتو هى على بلاطة …. بس زولك يستاهل اكتر من كدة لأنه جا وماعارف جاى لشنو ولا عنده أى معلومة مفيدة بس قضاها هرج وسلطة كلام …. بكرة تسمع بيهو سفير فى الحتة الفلانية

  35. ياسين شمباتى كتب:

    التركى..
    احتمال كبير,,خصوصا انو هو ذاااااااتو لو سالوهو مؤهلو شنو الوصل بيهو الدرجة ما يقدر يقول بغم!! والرجل اعرفه معرفة شخصية..
    النصيحة البونى كان محرج شديد,,خصوصا انو بتربطو بى ناس المرور معرفة شخصية وكان عضو فى اللجان بتاعتهم,,اللى هى بتاعت شنو انا ما عارف,,لكن كان معاهم كما ذكر العقيد عمر..

  36. معليش يا جماعه علي الاخطاء واللخبطه – تعديل –
    التركي
    المسعولين بتاعننا ديل لما يستضيفوهم في التلفزيون أو الإذاعه ببدعو جنس إبدااااااااااااع
    أظنك شفت كلام الزول بتاع الجمارك والتفاح الامريكي وفكت آخره ديك /إنت أمريكا البتعبد فيها دي ……… وانا بتكلم معاك كلام واضح ما فاهمني ؟ هل كنت بتكلم باللاوندي/
    كده وروني يا شمباتي ويا التركي لاوندا دي موقعها وين في الخريطه وخلوكم من دي الزول نكر نكران عديييل كده وكمان يغالط
    والحيوانات المفترسه قال المسعول إنها كلاب ذات ناب شفت كيف !!!!!!!

    كسره
    شمباتي : دخلت منطقة إرسال؟؟؟ جاري البحث عن الشبكه ؟؟؟؟
    كده دقيقه النجيب ليكم الرابط وانتو أحكموا………………………………….؟!؟!؟!؟!؟!؟!؟

  37. أها شوفو اللنك دا واحكموا براكم الراجل فقد المنطق

  38. طارق أب أحمد كتب:

    هو فقد المنطق بس
    ياخى دا أفضل مثال لبغل أعطيت له سلطه كبقية البغال المتسلطه على رقابنا

    أما هذا المواطن الذى وصف بأنو ما راجل و جبان أكيد فكر ألف مره فى عياله بدلا من ضربه بالصرمه

  39. دا كان خلوهو شويه كان شاتو بونيه ولحقها ليهو بشلوت لانه ما قدر يبرر والما قادر يتمها هرش وعنكبه وبرم ضراع سااااكت
    ويستمر المد الثوري

  40. حبيبنا الزووووووول
    وعشان إنت قمت تاااااني جبت سيرة الطماطم دي
    وعشان أفليقا قال الطماطم اليومين دي رخيييس
    وعشان أنا فخجت الطماطم بتاعتك ديك يا اللووووووز يا حبيبنا
    عليه:- _____ ____ _____ ______
    أنا برفع البوست بتاعي دا عالياً
    بره أمازونيا وما عارفين الاسعار
    الزووووووول تعال فجخ ساي وهذه بتلك

  41. زووووووول كتب:

    عبدالرحمن سلاام
    شنووو يا عمك دى منافسه ولا شنوووووووو؟؟
    طيب مرحبا بالمنافسه الصفيح عنك بى كم ؟؟ وطماطمك دى بلديه ولا سيكو ؟؟
    يلا علينا جاى شارك واقسم الصفيح بى جنيه جديد واحد وسبت هواده .

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s