إنشاء الله خير

Posted: الأحد,7 فبراير, 2010 by سهيل in اخرى

“عبدوش – افليقا – ود المهدي- خالد مدني – البشاوي – قرن شطه -منبرش -ود الزبير -ابو المنذر – ابو محمد دبي – الكناني – بروسسر دوت دوم – الزوووووووول -ود الخلا – ود الفتيحاب – ود بركه – استرايكر – نيام – سنكل – بشار – نونو – الزهراء- فنجان قهوه -طارق اب احمد – ساتنتود – التركي – سمساسم- سمسمه – شمباتي – د- صالح – مشاكل -نور لايت – وكثير من الزملاء الذين لم تفلح ذاكرتي في حشد اسمائهم ” .. كلكم في القلب و لكنكم بعيدون عن المدونه .. الرجاء العوده حيث بكم تزدان الفضاءات الأثيريه ..

في هذه القائمه ركزت على الإخوه و الأخوات الأقل مشاركة .. اما د.عزت و جدو سلاوي و ابكرون و معهم الدماء الشابه الجديده فحالهم افضل بكثير من غيرهم .. على الأقل هم متواصلون .. نداء لكل المدونين لإثراء المدونانت بتواصلهم و آرآئهم .. عودوا .. نحن بإنتظاركم ..

هذا و انا اضع نفسي على رأس قائمة المقصرين او الأقل نشاطآ ..

العم جبرا : نفسك معانا و قلمك .. لا تركن لسوء الحال .. لابد لهذا الوضع ان يتغير وان يعود النشاط و تدب الحياه فينا من جديد.

* لا بد من تطوير آليه لربط المدونون بعضهم ببعض .. اما عن طريق الأيميلات أو الرسائل القصيره أو اي وسيله اخرى لإسترداد قوة المدونه و ترابط اعضائها .. فإختلاف الرأي في حد ذاته دليل عافيه و لكن لماذا إقصاء النفس و إبعادها عن المشاركه .. لعمرك لم تضق بنا المدونه يومآ و لكننا نحن الذين ضاقت اخلاقنا فمنا من قرر البعد و منا من اجبرته ظروفه على ذلك و لكن .. لا مجال للرضوخ لهذا الوضع و هذا التفرق و الشتات .. يعلم الكل ان هذا الجمع يضم خيرة الناس ويجمع الشيب و الشباب .. لا تقبل النفس تفرق هذا الجمع و إنفراط عقده .. لذا علينا ان نحرص إخوتي على بعضنا البعض و على تماسكنا و صداقاتنا و ان نكون نواه لمجتمع صالح .. فأنتم من بذر الخير و ساند الضعفاء و المحتاجين .. أنتم زاد المسير .. كل هذه البدايات الجميله لابد لها من ان ترى النور .. لا مجال لذهاب هذا الجهد المقدر من الجميع سدى .

أسأل الله ان يؤلف قلوبنا و يجعلنا عباده الصالحين.

Advertisements
تعليقات
  1. مشاكل كتب:

    سلامز
    مساء الخيرات يا حبيبنا الشايقست
    استغربت لمن لقيت اسمي في القائمة ديت … كدي استهدى بالله

    لكن حكيكة باقي القائمة مختفين او حركتهم بسيطة في المدونة .. انشا الله يحصل كل خير

  2. علي سنكل كتب:

    هو بالله يا سهيل إنت شايقيست؟ أول مره أعرف.
    يا أخي أنا قاعد حضور ، تقوم تكتبني مع الغايبين .

  3. سماسم كتب:

    سلام سهيل
    كدى قول بسم الله
    عبدوش عذره معروف افلييقا دا ما عارفينو مالو
    وكمان سمسمة يادوب جاية من الصين وقالت ما بتعرف تكتب عربي اتعودت على الصينية ، لكن نونو والزهراء جارات وراء الفكفك ما عارفاهن وصلن وين ،ود الزبير مع سيدي ، نحن خلف الكواليس
    باقي الناس ان شاء الله بعد النداء دا برجعوا

  4. كتب أديبنا الأريب نيام نيام في ذات صباح
    و مافي أجمل من هذه المناسبة التي تذكر فيها سهيل السمار الأعزاء الا و أن أشيل من مفكرتي تلك القصيدة التي كتبها نيام أيام القمردينة و نستأذنه في لصيقا في حنان ساخر سبيل

    صباحك زين مدونتي
    نيام نيام
    ___________
    عشقتك قبل ألقاك بزمنا طويل بالحيل
    وقستك بالنهار و الليل
    في ريشة علي لوحة
    لقيتك انتي دي السمحة
    وفي خاطر مع سرحة
    لقيتك انتي دي السمحة
    ولما الخاطر الوهاج وقف لمحة
    علي قمحة
    زي لونك سقاها النيل
    لقيتك انتي دي السمحة
    ولما تثآب الخاطر بقيت فكرة
    من افكار صور جبرا
    وفي الكـَــسرة
    ولما اتكاتبو الاحباب لقيت رسمك
    ويا حسرة
    علي زمنا ثقيلا فات
    قبل اعرف حروف اسمك
    و من الزوووووووول لقيت حرف العطف معطوف
    مع عزت بقيت رتشي و بقيت مألوف
    و جنس ود الزبير دا ولوف
    صباح افليقا زي سكر
    وما السكر من النضمي كلام معروف
    وتلقي الانسولين دا رفوف
    كلامك انت يا دكتور كلام تاني
    واصله كنانة معروفة
    اصيلة و حتي بحروفها
    يا كناني
    و يا سنكل
    بقينا أهل
    و كلامك وازنة بالشنكل
    و يا نونو و يا شحمان
    كلام مقصة
    ياهو دا السودان
    تموت مقصة بس ما تصاحب الكيزان
    و يا ابكرون كلام موزون
    و من ستكون ؟
    إذا ما كنت سوداني
    ابو فيصل
    بالتفصيل أو المجمل
    باقي العقد لن يهمل
    ود المهدي أرشيفنا و ساتن هو كشيفنا
    ياناس الموردة بتلعب
    و بشارنا أب حديثا أدب
    و يا محمد و يا حاتم ويا ناصر
    رجال باكر
    أريت باكر
    يكون أسه
    ياهمسه
    ويا سمسم من الهند أو كسلا
    رايقة القهوة بمهلة
    طريت أم در طريت أهلا
    وناس بحري و ناس شمبات و بت كسلا
    و من جيلكم و من جيلنا ومن جيلا
    حلات الدانقا1 يوما و حلو ياناس مقيلا
    كمان كسرة
    يا أستاذنا يا جبرا
    اسمح لي أكون فكرة
    في لوحات صباح بكرة

  5. الأخ سهيل
    سلام يا راقي
    تحياتي وأشواق كتيييييييره معاها زياده أشواق تاني حبتين
    أخوك جديد علي أهل الدانقا
    بس إنت بتجي وتختفي زي برق العشي

    وخليها علي الله

  6. حاج أحمد السلاوى كتب:

    ولدنا الألفة سهيل بن سهل الساهلى ..

    ( في هذه القائمه ركزت على الإخوه و الأخوات الأقل مشاركة .. اما د.عزت و جدو سلاوي و ابكرون و معهم الدماء الشابه الجديده فحالهم افضل بكثير من غيرهم .. على الأقل هم متواصلون)

    تقدر تقول لى أفضل من غيرهم دى يصرفوها وين ؟ ياخ أنا شخصياً ( وأعوذ بالله من كلمة أنا ) اليومين ديل بالذات الشبكة شغالة معانا آخر حلاوة من غير مشاكل..و بسجل بمداخلات أكثر من خمس أو ست مرات فى اليوم ..تقول لى أفضل من غيرهم ؟ وتقوم تسجلنى مع الغياب ..وكمان أخونا المرطب عزت ماشاء الله عليهو آخر نشاط وهمة برضو دخلتو معانا فى القائمة ..وبعدين معاك ؟
    المرة دى سماح ..لاكين كان كررتها تانى ..

  7. زووووووول كتب:

    آآآآآآآآآآآآآآآآخ يا عزت ذكرتنا الايام الجميله ايام الشعار الاصفر القمردينى .وفشان كدا اقترح على الاخ سترايكر استبدال الشعار الابيض الذى لا علاقة له بالبطولات!!!! بالشعار الاصفر او الاحمر زاتوووووووووولا شنوووووو يا امولادى (اقصد يا سترايكر )

  8. ودالزبير كتب:

    أنا إسمي مكتوب طيب

    وهذا البوست يعتبر إذن مفتوح لكتابه عدد إتنين بوست يومي لتعويض ما فات

    بس بعدين ما تقولوا الروب

  9. ابكرون كتب:

    سهيل : ياخ حرام عليك من 5ديسمبر الي 5 فبراير 10 بوستات غير التعليقات بالكوم في البسوي والما…..
    مافي مقارنه مع ناس صفر بوستات ديل فلان وفلانه وووووووو كده وبتاااااع مش يا حسنين ويا آسيا

  10. مُخير كتب:

    وجه الحبيب
    الحلوين
    سلام وكلام وعتاب أحباب، أصلوا الجمهور ده ما بيحركوا إلا سوط اللوم ولا صوت اللوم وعلى كل فيما كتبت دلالة أكيدة على أن قلب الحبيب على المدونة.

    أبوعصمت قصيدة نيام زينة الكيكة والتحية له في مدني ولكل الأقطاب داخل وخارج السودان.

    دانقا هكذا رجالها ليس عليها خوف ستظل نابضة بالحياة والفكر والطرائف وكل ما يشحذ الذهن ويخاطب الوجدان ويلامس الضمير وينعش الخاطر وربنا يخليكم ويخلي دانقتكم

  11. الأخ سهيل معك حق الواحد بقى يجى يادابك يرد او يعلق على كم موضوع وتلقاهو بره الشبكة ….. بس ياخوانا جددو لينا النشاط برحلة وماكل واحد يكون أنا جاهز بس انت شوف الباقين يلا ننفض غبار الشتا دا .

  12. طارق أب أحمد كتب:

    سهيل
    حـــلات لق لق

    ما هو أنت كمان ما بتظهر ألا مع الحبيب بورقيبه

    حد فاهم حاجه
    ولا انا

  13. بشار أحمد بشار (ابن برد) كتب:

    صحي يا جماعة الناس دي مشت وين؟؟؟؟ غايتو (لاكين) بالغوا جنس (بوليغ) .أنا (سخسيا) بقيت (ما قع) أشوف الكيبورد وعاوز لي كيبورد على نظام بيريللي .

  14. حاج أحمد السلاوى كتب:

    أخونا بن البُرد ..سلام مربع
    حسه خلى الناس كانت وين وجات من وين ومشت وين … إنت كنت وين ؟ شوقنا ليك بحر وسلامنا ليك مطر وحمدن لله بعودة الظهور الإسفيرى العلنى ..إنت ليه بتعمل فينا كدا ؟ تظهر يوم وتغيب …. أيام !إنت ماك عارف إنو الكواشف ديل بيحبوا الونسة الدُقاق ؟وخسوساً لامن يتلموا مع بعض ..فيا اخى لا تحرمنا من طلعتك بحروفك رغم علمنا التام بظروفك الصحية والتى آمل أن تكون كل الدماء قد عادت إلى شرايينها دون مساعدات خارجية .
    وما تقطع الجوابات !!!

  15. ألفاتح جبرا كتب:

    ولدنا الباشمهندس سهيل
    الأحباء الأعزاء

    أول حاجه أنا عاوز أعترف بأنى أول المقصرين .. الأسبوع كلو يا عيا ومرض يا إكتئاب يا شنو ما بعرفو داك والشئ المحيرنى إنو الجامعة خليتها وبقيت عاطل ساااكت لكن الوكت بيمشى وين الله يعلم ! عموماً أنا بتمنى إنو الناس ترجع زى زمان فى التواصل والمشاركة وحرام المجتمع العملناهو وسويناهو عبر السنوات دى كووولها يرجع لى وراء … بالنسبة لى ناس الداخل عملتوا شنو فى موضوع الرحلة ؟ طيب إن شاء الله (بوش عبدوش) بالعدم !

  16. سهيل كتب:

    صباحكم زين و الحمدلله على الطله .. و زي ماقال حبيبنا مخير البلد بخير مادام فيها إنتو ..
    شكرآ للجميع المرور و نتمنى دوام المرور و المشاركه ..
    اخونا عبد الرحمن احمد مرحب بيك والله زي ماقلتا انا فعلآ مقصر و ظهوري في الفتره الأخيره قليل .. وسامحوني غلطان بعتذر
    ابكرون و جدو : شنو ليكم ؟؟ الواحد ما يقرع الواقفات ولا شنو .. انا ذاااااتي بطاريتي نايمه بس شغال ( جمبر) .. عقبال عندكم

    والله يا عم بشار لو عارف الكلام ده بمرقك و يخليك تشوف الكيبورد كان كتبتو زماااان .. ليك وحشه يا بن برد .. ربنا يتمم الشفا وترجع زي زمان.
    اب احمد : اقعد ساي
    الزوووووول : إنت لازم تلكنها يعني .. احمر مين و طمبل مين .. بركه الجيت
    ود الزبير : عملتها كيف دي .. إنت بس تعال
    مخير : خليك قريب
    سماسم و مشاكل : خلوها عتاب حبايب .. المابدورك ما بفقدك
    عمنا سنكل : وينك يا الحبيب .. نعل مافي عوجي .. إت نان كت قاياني شنو ؟
    د. عزت : لك التحيه و انت تسوق ساقيتنا و تسقي زرعنا

    العم جبرا : شكرآ للمرور و زي ما قلتا المجتمع الرهيب دا ما بنخليهو للريح.. و معاك في قاعة الشارقه بإذن الله .. و من هناك ننسق للرحله و لم الشمل.

  17. خالد مدني كتب:

    انا جيت … بس انت يا سهيل انت ظااااااتك بقيت ما زي زمان … واكيد اكيد حنتلاقي .

  18. سهيل
    الله يسلمك ويديك العافي
    ومبرووووووووك لأستاذنا ألفاتح جبرا بتدشين كتاب لبس جماعي وهو يضع الحلقه الأولي من سلسلة ساخر سبيل
    ومبروك مقدماً لحضوركم وتشريف الاستاذ بس ما تنسونا من التوثيق وكده
    و آآآآآه لو تجدي لو
    لو كنت في!!!!

  19. ياسين شمباتى كتب:

    سهيل…سلام..
    ان شاءالله خير!!!! مفروض انت بالذات تكتب عشرة بوستات كل يوم!! عن نفسى معروفة ظروفى وانى ما بجى الشبكة الا اخر الاسبوع واحيانا زوغات فى النص,,لكن انت ماااااالك!!؟؟ولما بظهر بمر وبحاول اعرف الحاصل على الناس..لكن الكسل والتجاهل الحصل من بعض الاعضاء وانعدام التواصل دا اكيد عايز مراجعة شخصية..يعنى حتى الايميلات الداخلية بقت تعبانة شوية,,خليك من التلفونات او الرسائل على الجوال..وكم من بوست كتب ولا حياة لمن تنادى..

    لكن انت مالك؟؟ ان شاءالله خير…

  20. سهيل كتب:

    يس حبيبنا سلامات .. نحن برضو يا عمك اللبدنا ؟؟ اسكت دا إنت شغال تنطط من حفره لي حفره .. لمن تلقى نفسك معانا في حفرتنا دي .. بس حفره خمسه نجوم بي ناسا .

    برجع و اقول ليك .. وللإخوه بالخارج .. إنتو كان جارين ورا تحسين الأوضاع .. نحن هنا جارين ورا الستره و حق الملاح والحمدلله على جزيل النعم.. والظروف العامه هي اللامه الناس من المشاركه الفعاله و اهو لمن نلقى طريقه بنحاول نظهر و نقول للناس سلام .. وشكرآ جزيلآ للناس الشايله الشيله و بوجودهم و مشاركتهم ظلت المدونه حيه و ماشاءالله كل يوم تجتذب المزيد من الدرر لعقد هذا الجمع ..
    حقكم علينا و إنشاء الله نروق و ترجع ايامنا الجميله

  21. ياسين شمباتى كتب:

    سهيل..
    والله حفرتكم ديك صعبة خلاص,,التقول ما قعد يفتشوها !! اما عن الجرى فكلنا هذا الرجل,,لكن الفى القلب واصلة..وانحنا من زمن فى انتظار الروقة دى,,لكن ما باين ليها آخر..

  22. خالد مدني كتب:

    ف5ع8عص5عناثغغفهناثقههع4ف78ع3هجقثغحث
    كسره : ياسهيل اعلاه مشاركة ملاذ كمان … اها قصرنا ؟؟؟

  23. طارق أب أحمد كتب:

    شمباتى

    بركه الشفناك طيب

    فى أختراع سودانى اسمو الراحله مصمم خسيسن للمغتر-بات- بين

  24. طارق أب أحمد كتب:

    شمباتى
    أنت صاحبك سهيل دا يقصد شنو بالناس الشايله الشيله
    غايتو من باب الأحتياط كلم والدتكم تأمن الأبواب بالمناسبه وين محمد عبد الواحد

    ود المدنى
    ملاذ ما شاء الله منها خوف على ناس جبرا
    صحى المدوناتيه من عشها زوزايه

  25. طارق أب أحمد كتب:

    شمباتى
    صاحبك سهيل دا يقصد شنو بالناس الشايله الشيله

    غايتو من باب الأحتياط كلم والدتكم تأمن الأبواب فى حالة شيلتكم ما زالت فى الحفظ والصون

    بعدين يا سهيل انت ما سمعت الكابلى بقول الغربه سترة حال

  26. ياسين شمباتى كتب:

    الحبيب طارق..سلام ومساك طيب..
    ياخوى انا قااااعد بس انت اللبدت لبدة هناى داك,,وقلنا مشغولية,,لكن ما عرفنا ليها آخر..بعدين الاختراع اسمو الرحالة ياخوى!! الخبر طاقش اضاننا غادى..
    اما عن (شيلة) سهيل فدى انا منها بعيييييييد,خليهو يشيلها براهو..وفعلا الغربة سترة حال بل واقشى نضال..على قول ود الفتيحاب ودعاءه الطيب(اللهم بك اصول واجول اللهم احفظنى وردنى الى وطنى سالما)..لكنى شامى كلام تحت بالسترة دى!!! دى الا فى التلفون بس..

  27. حاج أحمد السلاوى كتب:

    ولدنا خالد مدنى ..أبو لاذ ..سلام ..
    فى نوع من كسير التلج بيقول : شخبطة عيالك تخطيط لمستقبلنا .

  28. سهيل كتب:

    سلام عظيم لبتنا ملاذ السوسيوه الصغيرونه و ماقصرتي تب..

    شمباتي زايغ وين من شيلتي دي .. اهااااا اجيك ناطي ولا تستعدل براك ..
    يا جدو ما تشوف لينا العيال ناس يس ديل .. عايزين يلخبطو حساباتنا فوق تحت .. قال شيله مافي .. لكن ويييييين يا فرده .. ما تخليني اسوط ليك الواطه بيجاي و اشمت فيك أبله ظاظا و معاها ناس ابكرون وود الفتيحاب و جدو .. باقي ديل راجين يشوفو فيك يوم ..

    أب احمد : فضحتنا .. يصلحوك ناس يس من السعوديه و إنت عامل فيها عنتر .. خم و صر .. كان اخير تقول (portable)

  29. ياسين شمباتى كتب:

    سهيل..
    تعال ناطى عليك الله..طبعا انا من الزمن دااااك راجيك وانت عامل فيها اضان منو كدة ما بتسمع!! لا تاكيد لا نفى..اما عن الراجين يشمتوا ديل فالبينا عامرة ودافننو سوا,,والسترة والفضيحة اخوات..

  30. طارق أب أحمد كتب:

    سهيل
    يا حبيب أنا لا بعرف رحاله لا ماجلان دى بعرفوها ناس السعوديه و الناس القاع يقعدوا فى الحفر بس

  31. الزهراء كتب:

    الاخ سهيل
    شكرا لافتقادك للاخوه والاخوات المختفين
    الاخوه الاعزاء نهاركم سعيد
    وحقيقه اخفتنا مشاغل الحياه بمختلف انواعها ولكن والله دا ما عذر المفروض الناس ما تنقطع معما حصل لانو المدونه دي هي الدوحه الوحيده التي يمكنها ان تقينا من هجير الحياة القاسي

    وبشكر المدونين الجدد لانهم ماشاء الله مواصلين ومجرين الحياه في شريان مدونتنا وربنا ما يحرمنا منهم لانهم صاروا اصل من اصول التواصل
    وبنجيكم بي رواقه لو ما هنا في حيشان تانيه

  32. حاج أحمد السلاوى كتب:

    بنتنا الزهراء..
    لاكين الحيشان التانية دى نحنا ما بنعرفها ..يمكن تكون الحيشان التلاتة ؟

  33. الزهراء كتب:

    معقوله ياعمو سلولو
    الحيشان بقصد بيها البوستات التانيه والايميلات ودي انت اساسي فيها طبعا

  34. سهيل كتب:

    الأخت الزهراء شكرآ لشعورك الطيب.. و نحن متفهمين اسباب غياب الناس لكن برضو الطله مهمه و البين الناس لازم تكون عامره بالتواصل .

    يس : كلمااقول اكبر منك اللفه تجيني تحت كرعيني.. باين عليك ” مستمتع” آآآآآي ” مستمتع” .. لكن اقول ليك .. حدو قريب يافرده ..و إنت الله يديك العافيه خليك ناااايم قفا من ناس جدو وود الفتيحاب .. لمن تلقى شنو مابعرفو داك و الباقي تمو براك

  35. سهيل كتب:

    أب احمد يا خطييييير إنت يا بتاع ال fixed

  36. ياسين شمباتى كتب:

    سهيل..
    لا خلاس سكتنى تب… لكن المتعة حليلها فارقناها فى السودان !! استمتعوا بيها انتو..

    اب احمد..
    حااااامضة,,لكن سمحة على قلوبنا..ضربت ليك كم مرة بس تلفونك ما بجمع!!!

  37. الصادق ود البركة كتب:

    السلام عليكم ورحمة الله وبركاته
    سؤالي عن الأخ المفضال عبد الله الشيخ (ود الخلا) وينو وينو ينو ؟؟؟؟؟؟؟؟؟؟؟؟؟؟؟؟؟

  38. سهيل كتب:

    ود بركه : حبيبنا ود الخلا رافع القزاز و مظللو.. لكن حسي بنفك ليك فيهو طوبه

  39. حاج أحمد السلاوى كتب:

    سهيل .. تظليل القزاز دا مش ممنوع وعليهو غرامة ؟
    ولاّ الحكاية بقت سجن ..سجن ..غرامة .. غرامة..
    – ودالبركة ..حمدن لله على السلامة بالطلة البهية ..خلاس الإمتحانات خلست ..يديكم العافية .
    -بنتنا الزهراء ..خلاس عرفنا الحيشان التلاتة دى محلها وين ..فى الأول كنا ضهبانين ساكت ..

  40. ودالخلا كتب:

    سلام ياقبيلة،،
    أخي الكريم البركة الصادق ودبركة وبقية السمار الأكارم بنو الكرام،،
    صديقي سهيل النجم البعيد ضووووووااااااااي..
    سديقي كبير الكواشف ومقنّع الكاشفات حاج أحمدالسلاوي
    الظل الظليل مع التظليل ورفع القزاز دي سيمة الناس الهناي، ونحن من ربينا وقمنا أتربينا غبش أولاد غبش، لا رفعنا قزاز ولا كسرنا كباية، ويانا ديل حايمين وسط الملأ ندافس ونداقش في الأسواق وما جيبين للدنيا خبر، ومرة بعد الأخري بنطل الدانقا وغالبا” مايكون ذلك في يوم الأجازة….
    شكرا” أخي ودالبركة علي السؤال وتفقد الأحوال وفعلا” أنتم من أصول وأبناء أصول ملوكية، وياسهيل يا خوي لا تجدع فينا طوبة ولا درابة نحن جاينكم بس بي رواقة وبعد ما يجيكم شيخ صالح وأخونا أفلايقا وبقية الأخوة الكرام ورفاقهم من الحرائر بنات القبيلة.
    التحية مجددا” لكم أجمعين ودمتم سالمين

  41. سهيل كتب:

    بركه الجابتك طوبه ..

  42. طارق أب أحمد كتب:

    .. ياعمك
    أبصم بالعشره أنك ما حتعرف ايه هو اللأبغازى

    عموما هى حاجه فى الخروف تؤكل زى أبتايزر, مزه .فاتحة شهيه

    سنكلونى
    الأبغازى دا الشى الوحيد البفضل بعد ما تدى الجلد للجزار

  43. طارق أب أحمد كتب:

    صديقى الخلوى
    سلام يا قبيله
    الجفلن خلهن بنرسل ليهم قراع
    مكانك سيظل شاغر شديد حتى أبريل
    الدور دا أبريل ما معاها رجب!!! شفت كيف

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s