اقبض حرامى

Posted: الأحد,7 فبراير, 2010 by ابكرون in اخرى

استمعت قبل يومين لأحد قادة المؤتمر الوطني يدافع عن التهمة التي وجهت لحزبه باستغلال العربات الحكومية في حملتهم الانتخابية لصالح المؤتمر الوطني ومرشحهم لرئاسة الجمهورية….صاحبنا واسمه ربيع نفي الأمر جملة وتفصيلا……..والصورة تحكي….ولا تعليق أكثر………..!!!

 

 

Advertisements
تعليقات
  1. الطيب ابوصالح كتب:

    دي بسيطة خالص وبالحصل في ابريل علمه عند الله وربك يستر.عشرين سنه ممتعين في الصدق..الكلام في السياسه لا.

  2. حاج أحمد السلاوى كتب:

    أخونا الكاشف ابكرونا ..
    يعنى هى بقت على دى ؟ ما الحكاية دى ماشة ليها عشرين سنة ..مش أى حاجة بينكروها وبعد داك يطلعوا حقيقتها ؟ إنت بس زعلان منهم ساكت ..وما ليك حق تزعل ..ياخ وسع صدرك شوية ..وخليك مسامح وكريم يمكن يرجعوا ليكم واطاتكم الأصبحت دييييييييك وشالوها ناس دال..
    ويعنى شنو لو استغلوا عربات الدولة فى االدعاية للمؤتمر الوطنى ؟ ما هى البلد اصلها كووووولها بقت مؤتمر وطنى ..يعنى زيتهم فى بيتهم…إلا من أبا ..
    وخلينا النشوف آخرتا شنو مع الإنتخابات ..دا إذا الإنتخابات زااااتها قامت !!!

  3. الغبشة كتب:

    ابكرون:هسى وينو الاستغلال كدى قول بسم الله وغير اتجاه رقادك ونوم على صفحتك التانيه……………دى كوابيس بس ما اكتر

  4. ابكرون كتب:

    الطيب ، سلولو، الغبشة….شكرا علي المرور ويا الغبشة العربة الحكوميه لا تتبع لاي حزب تتبع لمصلحة او وزارة او اي جهة حكومية….اي لا يعقل ان نجد عربه حكوميه مكتوب عليها حزب الامة او الشيوعي او حزب الله يستشف انها دعاية لهذا الحزب او ذاك……! ولا يجب ان توضع عليها صورة الرئيس ما دام هو مرشح زيه وزي اي مرشح اخر وكذلك الاحزاب ……وبما ان البلد روكه سااااكت وزي ما قال السلاوي البلد بلدهم …..فهذا زمانك يا مهازل (اخت مشاعر) فأمرحي………….!!!!!!!!!!

  5. أبكرون
    قال ليك في ديك وكلب وحمار مشوا لصحبك دااااك
    أها قام سأل ليك الديك
    إنت ليه خليت الإذانه
    -الديك ماشاء الله عليكم إنتو مليتو البلد كووولها مساجد صوتي بقي ما بيصحي الناس قلت أحسن أبطل
    أها وانت يا كلب مالك خليت النباح في الحراميه!!!
    -الكلب : يا أخواننا انتو البلد كووولها بقت حراميه أنبح في مين وأخلي مين ؟؟؟

    تقول لي أقبض حراااااامي نقبض مين بالظبط

  6. زووووووول كتب:

    ابكروون
    انت الهكومه دا هق منوووو يا اعمك
    وتيب !!!

  7. ودالزبير كتب:

    أبكرون

    يأخي لو جات علي دي يبقى خير وبركه !!! معقوله يا أبكرون أنا قلت أبكر ده قبض لينا جوكي بالثابته ولا وزير مختلس ولا والي سابق ووزير للزراعه حالياً عنده إستثمار زي 14 مليار جنيه والكلام على لسان الرئيس شخصياً وده قالوا إجتهاد منو ساكت قمت إنت يا ابكرعرفت لينا مصدر الإستثمار المهول دي … تقوم تقول لي إستغلال لعربات الحكومه …

    تصدق زمان كان في جهاز إسمه مراقبه العربات الحكوميه أظن تم إلغاءه عشان الواحد يأخد راحته في إستغلال العربات دي الإستغلال الأمثل لخدمه حرمه المصون

  8. علي سنكل كتب:

    أبكرونا الناس كايسه لحرامي سرق 50 مليون دولار ، تقبض لينا واحد سايق عربية حكومه وكاتب عليها الوطني. و كما قال ليك الزووووووول هو الوطني منو ما الهكومه ظاتو. ودي الحكومه القلعوها رجاله وحمرة عين ، من شهر أربعه ولي غادي حيقولو ليكم جابنا الشعب السوداني عبر الديموقراطيه. والما عاجبه يشرب من البحر.

  9. دى مؤامرة من الصهاينة أعداء الدين والوطن ياابكرونا ولا السايق معتوه لصق ملصق المؤتمر الوطنى ولا أقول لك اللوحات مزوره أصلو ناس المرور ماشايفين شغلهم من قطع الايصالات لعربات المساكين …. وتقول لى مساواة فى الترويج للانتخابات . ياخ ديل سلعهم الفاسدة بروجو ليها أكتر من ترويج المرشحين المنافسين .

  10. محنك كتب:

    اناسمعت انو العربات دى ملكوها البستحقوها من محاسيب الحكومة وما حا يكون فى حاجه اسمها عربات حكومية …..

    اما استخدامها ياخى تيارات بستخدموها على حساب الدولة وعربات مش عربية

    جات على العربية ما ممكن يكون العربية دى حقت واحد مرشح واستقال وقرشها عندو فى البيت وقال للحكومة ما مسموح لى اسوقها رسلوا سواق يرجعها ليكم

    كسره
    امس شفت فى الاخبار والى جنوب كردفان فى شوارع برصفوا فيها الشاب دا مو نازل انتخابات ليه ما عينوبدلو زول انتقالى زى نهر النيل عشان اتفرغ

  11. طارق أب أحمد كتب:

    قريت العنوان قلت أمك أخو الوزير قبضوهوا

    أبكرون أخوى دا ما حرامى و لا مؤتمرجى دا بس نظام تظلل العربيه بدون ما يسألك بتاع الحركه

  12. ابكرون كتب:

    ابحمد عاش من شافك
    لكن تظليل عربه حكوميه بارقام حكوميه ؟حركة ومرور مع ارقام صفراء؟

  13. ياسين شمباتى كتب:

    ابكرون..سلام..
    والله اقبضو الا اسوى فيهو سواة هناى دااااااك..كمان ما دام طارق جاب سيرة التظليل اقول ليك انو فى ناس استغلت مشكلة الجنائية وختوا صور الرئيس على الزجاج نظام تظليل وكدة!!!

  14. ابكرون كتب:

    الراكوبة /اجراس الحريه /صحف اخري
    (ناشدت أسر شهداء (28) رمضان الشعب السوداني بالوقوف بشدة ضد ترشيح المشير عمر البشير، و منعه من الاستمرار في السلطة التي تقلدها “عنوة بانقلابه الظالم”. و حمّلته مسئولية إعدام الضباط قبل عشرين عاماً، و كشفت عن مطالبات لم تستجب لها بكشف حيثيات المحاكمات لرد الاعتبار، و محاسبة كل من شارك في إعدامات الضباط و تسليم رفاتهم للأسر. و أصدرت أسر الضباط الـ (28 ) بياناً أمس تلقت (أجراس الحرية) نسخة منه، حّملت فيه الرئيس عمر البشير مسئولية (قتل الضباط) في (28) رمضان من عام 1990م. و كان الضباط قد قاموا بتحركات للإطاحة بنظام الإنقاذ، إلا أنّه تمّ إحباط التحرك و أعدام قادته، و ذكر البيان أنّه (في أمسية العام 1990 (لم يكلف القتلة أنفسهم حتى مشقة إبلاغنا بقتل أبنائنا بل فوجئت كثير من الأسر بخبر إعدام أبنائها من الإذاعة السودانية كمجرد خبر عادي مثله و مثل أحوال الطقس، إذ لم يتم تقديمهم لمحكمة نزيهة بل تمّت محاكمتهم في الخفاء في ظل ساعات قليلة لا يستغرقها قاضٍ للبت في شكوى إزعاج أو جارين مختصمين. و قد تمّ دفن جثامينهم الطاهرة في مقبرة جماعية لا ندري مكانها حتى اللحظة)، و ناشد البيان الشعب بالمساندة في (الرفض القاطع لترشيح عمر البشير لمنصب رئيس السودان، و لأنّنا على قناعة تامة بأنّ الطرق القانونية لن تجدي نفعا) و رفضت الأسر التقدم بأي طعن لكنها طالبت السودانيين بالوقوف ضد البشير و إسقاطه، و منعه من تقلد السلطة التي تقلدها عنوة “بانقلابه الظالم” بحسب البيان.)
    لا تعليق ولا يحتاج

  15. طارق أب أحمد كتب:

    الطيب صالح رحمه الله و من أين أتى هؤلاء لكى لا ننسى

    من أين آتى هؤلاء..؟.

    السماء ما تزال صافية فوق أرض السودان أم أنّهم حجبوها بالأكاذيب ؟
    هل مطار الخرطوم ما يزال يمتلئ بالنّازحين ؟
    يريدون الهرب الى أيّ مكان ، فذلك البلد الواسع لم يعد يتّسع لهم . كأنّي بهم ينتظرون منذ تركتهم في ذلك اليوم عام ثمانية وثمانين .
    يُعلَن عن قيام الطائرات ولا تقوم . لا أحد يكلّمهم .
    لا أحد يهمّه أمرهم .
    هل ما زالوا يتحدّثون عن الرخاء والناس جوعى ؟ وعن الأمن والناس في ذُعر ؟ وعن صلاح الأحوال والبلد خراب ؟
    الخرطوم الجميلة مثل طفلة يُنِيمونها عُنوةً ويغلقون عليها الباب ، تنام منذ العاشرة ، تنام باكية في ثيابها البالية ، لا حركة في الطرقات . لا أضواء من نوافذ البيوت . لا فرحٌ في القلوب . لا ضحك في الحناجر . لا ماء ، لا خُبز ، لاسُكّر ، لا بنزين ، لا دواء . الأمن مستتب كما يهدأ الموتى .
    نهر النيل الصبور يسير سيره الحكيم ، ويعزف لحنه القديم ” السادة ” الجدد لايسمعون ولا يفهمون .
    يظنّون أنّهم وجدوا مفاتيح المستقبل . يعرفون الحلول . موقنون من كل شيئ .
    يزحمون شاشات التلفزيون ومكرفونات الإذاعة .
    يقولون كلاماً ميِّتاً في بلدٍ حيٍّ في حقيقته ولكنّهم يريدون قتله حتى يستتب الأم
    مِن أين جاء هؤلاء النّاس ؟ أما أرضعتهم الأمّهات والعمّات والخالات ؟
    أما أصغوا للرياح تهبُّ من الشمال والجنوب ؟
    أما رأوا بروق الصعيد تشيل وتحط ؟
    أما شافوا القمح ينمو في الحقول وسبائط التمر مثقلة فوق هامات النخيل؟
    أما سمعوا مدائح حاج الماحي وود سعد ، وأغاني سرور وخليل فرح وحسن عطية والكابلي و المصطفى ؟
    أما قرأوا شعر العباس والمجذوب ؟
    أما سمعوا الأصوات القديمة وأحسُّوا الأشواق القديمة ، ألا يحبّون الوطن كما نحبّه ؟
    إذاً لماذا يحبّونه وكأنّهم يكرهونه ويعملون على إعماره وكأنّهم مسخّرون لخرابه ؟
    أجلس هنا بين قوم أحرار في بلد حرٍّ ، أحسّ البرد في عظامي واليوم ليس بارداً . أنتمي الى أمّة مقهورة ودولة تافهة . أنظر إليهم يكرِّمون رجالهم ونساءهم وهم أحياء ، ولو كان أمثال هؤلاء عندنا لقتلوهم أو سجنوهم أو شرّدوهم في الآفاق .
    من الذي يبني لك المستقبل يا هداك الله وأنت تذبح الخيل وتُبقي العربات ، وتُميت الأرض وتُحيي الآفات ؟
    هل حرائر النساء من ” سودري ” و ” حمرة الوز ” و ” حمرة الشيخ ” ما زلن يتسولنّ في شوارع الخرطوم ؟
    هل ما زال أهل الجنوب ينزحون الى الشمال وأهل الشمال يهربون الى أي بلد يقبلهم ؟
    هل أسعار الدولار ما تزال في صعود وأقدار الناس في هبوط ؟ أما زالوا يحلمون أن يُقيموا على جثّة السودان المسكين خلافة إسلامية سودانية يبايعها أهل مصر وبلاد الشام والمغرب واليمن والعراق وبلاد جزيرة العرب ؟
    من أين جاء هؤلاء الناس ؟ بل – مَن هؤلاء الناس ؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s