تخيل معى

Posted: الإثنين,8 فبراير, 2010 by mashakel in سياسية

تعالو ( نتخيل ) وصول البني آدم – إن جاز التعبير – ياسر عرمان للرئاسة في السودان .. حتكون الاخبار كيف

الولايات المتحدة الأمريكية تشيد ثلاث قواعد جديدة في السودان لحفظ الأمن و محاربة القاعدة و الإرهاب .. يجازي محنك

ياسر عرمان يؤكد إلتزام السودان بأمن ( إسرائيل ) .. و تزايد معدل تدهور العلاقات بين السودان و إيران و حزب الله و حركة المقاومة الإسلامية حماس .. الود شفت و ختري

فوز تحالف المعارضة الإسلامي في إنتخابات إتحاد طلاب جامعة الخرطوم و المعارضة تصطدم بالقوات النظامية داخل حرم الجامعة .. و ( إغتيال ) طالب و إعتقال المئات .. متعووووودة داااااايما

وزارة التربية و التعليم تقرر إلغاء مادة التربية الإسلامية لتعارض نصوص الدين الإسلامي مع دستور السودان العلماني .. بلد متعدد الثقافات و الأديان و الأعراق و كدا

نسبة النجاح في إمتحانات الشهادة السودانية تصل إلى مستوى قياسي تعدى ال25 % … كلو من المدارس المختلطة

المحكمة الدستورية ترفض نقض حكم صادر من محكمة الإستئناف يجيز للطالبات إرتداء الحجاب في المدارس و الجامعات .. لتعارضه مع دستور السودان

الحكومة تؤكد جديتها في تشييد و إقامة مزيد من ملاجيء الأطفال مجهولي الأبوين ..ما البلد همووووووول

القوات النظامية تتصدى بكل ( بسالة و حزم ) لمسيرة سلمية لجماعة الإخوان المسلمين لرفضهم مشروع قانون زواج المثليين .. أمشوا أمريكا و هيصواااااا

 

 

وزراة الثقافة و الشباب و الرياضة تقيم حفل تأبين للفنان حمادة بت – الذي توفى إثر حادث مرور – بعنوان ليلة الوفاء لأهل العطاء .. و قد شدى الفنان ( تموري الأموري ) ببعض من أغاني المرحوم حمادة بت و على رأسها أغنية حسن ساتي

 تعيين الفكي هارونا مستشارا للرئيس لشؤون التأصيل .. بلدا ما فيها علماء يقدل فيها الفقرا

 

Advertisements
تعليقات
  1. زووووووول كتب:

    مشاكل سلااام
    والله نصايب جد !! وكولها خوازيق لكن زواج المثليين فى السودان دى ختريه كولو كولو وهجاب الفكى هارونا دا خترى برضو لكن عمك عرمان دا ما عندوا امل كبير فى الرئاسه وقد طالعتنا الانتباهه اليوم بخبر عن مخترح (؟) تشكيل الحكومه برئاسة الصادق المهدى والترابى للبرلمان باقان للدفاع وعرمان وزيرا لرئاسة الجمهوريه مع تخصيص نسبة 75% من الحقائب لصالح الحركه الشعبيه .
    كسره : عرمان دا الفيهو مشهووووووووووداااااااااااا لكن ناس العصر الحجرى ديل (المهدى والترابى ونقد ) نقول عليهم شنوووووووووو يا مشاكل .

  2. ودالزبير كتب:

    حماده بت مات

    والنبي ما حد قال لي

    بعدين يا مشاكل إنت ( حسن ساتي ) سمعتها وين دي كان مدوره في الإميل الحصري للسبعه العظام

  3. مُخير كتب:

    العزيز مشاكل
    الأهزاء في كل مكان
    سلام وإحترام
    يا ولدنا أنا نفسي أعرف إنت مشكلاتك شنو مع ياسر عرمان، أنا أوضحت في بوست الحبيب أبكرون والأخت مشاهدة تقديري وإحترامي لكل المترشحين بمن فيهم الرئيس الحالي عمر البشير وغيره، وأعلنت عن تأييدي للسيد الصادق المهدي لأنني لا أرى من هو أقدر منه على معالجة تعقيدات أوضاع السودان لما له من خبرة كبيرة بالشأن السياسي السوداني تتجاوز نصف قرن من الزمان فضلاً عن مؤهلاته الأخرى بما فيها ذخيرته المعرفية ومصداقيته الأخلاقية ولياقته الذهنية والصحية إن جاز التعبير، غير أن ما يحيرني هو عدائك غير المُبرر للسيد ياسر عرمان، خاصة وأنني ذكرت بأن ما لديك ضده مصدر إعلام الجبهجية القديم والحديث”، وذكرت بأن مواقفهم تغيرت فما سر تمترسك خلف هذا العداء، أخي إن الفجور في الخصومة من صفات المنافقين وأنا لا أعرف عن ياسر عرمان أكثر مما هو متوفر عنه في وسائل الإعلام لكن لا أرى مبرر لتصويره بهذه الصورة السوداء وكأنه إبليس شخصياً قادم لحكم السودان. لم أجد فيما كتبت أية معلومات أو براهين تُبرر هذا العداء وأتمنى أن تعقب على تعليقي بدقة وأن تُصححني إن كنت مخطئاً فرأيي (كما يقول كبارنا في الدانقا نقلاً عن الإمام الشافعي) صواب يحتمل الخطأ ورأيك ورأي غيرك خطأ يحتمل الصواب.

  4. مُخير كتب:

    الأعزاء دوماً في كل مكان وزمان، والعتب على النظر والكي بورد

  5. زووووووول كتب:

    مخير سلاااام
    والله يا مخير عرمان اكعب من كدا وتجدنى مضطرا لاعادة نكتة بلدياتنا الموزون الذى تشاجر مع احدهم والحجازين شغالين بنفس : استهدأ بالله يا زووول . كدى انعل ابليس . الزوول دا عمل ليكا شنووو؟
    : الزوول دا قال ليا كلام كعب
    كعب شنو؟
    : ما بتقال
    قال ليكا انعل ابوك
    : اكعب من كدا
    قال ليكا ……..
    : اكعب من كدا
    طيب قال ليكا شنوو ؟
    : قال ليا وشيك زى التمساح
    كسره : عرمان اكعب من كدا
    ((وأعلنت عن تأييدي للسيد الصادق المهدي لأنني لا أرى من هو أقدر منه على معالجة تعقيدات أوضاع السودان لما له من خبرة كبيرة بالشأن السياسي السوداني تتجاوز نصف قرن من الزمان)).
    مع احترامىلرايكم ولشخصكم الكريم لكن قصة نصف القرن دى الكادووووك زاتووووووو ولك خالص شكرى يا امييييييير .

  6. علي سنكل كتب:

    الابن مشاكل سلامز :
    ما يقوله مخير هو الديموقراطيه التي نتوق إليها فليس في الديموقراطيه إقصاء ، وكفانا العشرين العجاف التي ولت و ياريت يولى معها إقصاء الرأي الآخر. في نهاية المضاف الانتخابات صوريه وسيجتاح الوطني الرئاسه والبرلمان. ولكن لايجب التفكير بنفس الطريقه النمطيه السائده اليوم ، فلان كويس وفلان كعب. ندي نفسنا فرصه لنتعلم الديموقراطيه ومستحقاتها حتى تسود فينا.

    و لك ودي

  7. محنك كتب:

    يا اخوانا ولدنا ما غلط

    نحن كنا طلاب لما الزول دا ارتكب جريمة وهرب وملفها محفوظ … وهو من كان يفاجر فى خصومته لولا ان شعبنا طيب وغلبان على امره وعايز ليه ولى امر يمشى معاه المدرسة كل الاترشحوا ديل غير البشير وكامل ادريس ما بستحقوا يكونوا هنا

    الاخ مخير مع الاحترام الشديد واختلاف الراى لا يفسد ود بين الاصدقاء
    لقد جربنا الصادق فى غير ما زمان فما نفع وليه جات الانقاذ اساسا لما انت شايل قروشك فى جيبك وما لاقى البتاكلو عهد الصادق الانا عشتو واعى وساهمتنا فى المسيرا باسقاط جعفر نميرى بانتفاضة ، وجات الديمقراطية الفوضى الانا شفتها الله لا عاد ذاك الوضع

    الديمقراطية مسئولية والتزام ياخى دا زول عوض نفسه واهله من مال الدولة قال اراضى ام دوم قال

    نحن ممغوسين من كل الساسة الحاليين ومستقبل مافى

    وين خليفة الصادق ولدو مش وين كبار الحزب ايام الديقراطية قبل عشرين سنة ونيف دردقهم عشان بناتو ورجالن ومرتو واولادو يشتغلو سياسة

    لماذا انفصل مادبو ومسار والزهاوى هل هم احسن ام وليدات الصادق

    دى احزاب كانت عوائل وبقت اسرة صغيرة وليس خشم بيت
    خشم بيت المهدى 4 احزاب
    ومنفصلين منهم 3 احزاب
    دا بطارد السلطة وين ما قبلت والبشتغل كلب صيد بعينه معاه والداير يكون صياد او ليه نصيب فى الفريسة فلا مكان له

    الطائفيه اكرمك الله هم قرادة دم ابناء السودان

    ماذا قدموا لنا ما هى انجازاتهم ؟
    السندكالية اشرحها لى

  8. الأخ مشاكل سسسسسسلام … اذا كان من ناحية ديمقراطية فشخصى لا أمانع فى أن يفوز عرمان أو علان طالما ارتضينا الديمقراطية وتم الترشيح على ضوء برنامجه المطروح فلا غضاضة من رئاسته أما ماقد يحدث من تغيرات فما أظنه سيقوم بماليس وارد فى البرنامج (هذا باعتبار أن الترويج لكل برامج المنافسين قد تم) … هناك بعض النقاط لاترتبط بمن هو فى السلطة كى تحدث فمثلا زواج المثليين شاهدته بام عينى بين سودانين مقيمين باحد الدول العربية (نعم انهم قلة ) لكنهم موجودين قبل عرمان والبشير …. بعد كل ذلك لا أعتقد ان عرمان نفسه قد ترشح ليفوز بهذا المنصب والله أعلم .
    ودالزبير : ههههه انت من الموضوع دا كله ما شفت الا الجملة الصغيرة دى ….

  9. الغبشة كتب:

    سؤال انت الاخترت برااااااااااااااااااك اسم مشاكل؟؟؟؟؟؟؟؟
    كسره ::كان نفسى اعلق على بوستك ده يا مشاكل لكن لو علقت بجيب لروحى المشاكل…………..!!!!!!!!!!!!!
    الله يجازى محنك يا مشاكل…………….بالخير والصحه وقلم سنين وماهو حنين على الغلط…

  10. ابكرون كتب:

    انا يا مخير بستغرش في الشباب ديل اشياء عايزننا ننساها ليه ونحن عايشناها ؟اذاعرمان ولا (اكن له اي ود او اي ششئ)قد قتل اتنين ولا واحد في خصومه الم يقتل الآخرون 28 ضابطا لانهم فعلوا نفس الشي الذبي فعلوهوا همفليلة 30 يونيو وفي ليلة العيد ؟؟؟؟ ام لهم لهؤلاء الملائكة حلال ولغيرهم حرام !!!الم يقتلوا مجدي وجرجس وغيرهم في حفنة دولارات وهم ينهبون مليلرات الدولارات؟؟؟؟؟؟الم يؤسسوا لبيوت الاشياح وتعذيب الشرفاء ؟ الم يغتصبوا ود الريح وغيره …..؟عايزننا ننسي ده كلوا عشان زفتان ده رشح نفسه …..يا هلا بيك يا عرمان ان كنت الوحيد واتفق عليك الرهط ساعطيك صوتي ….وفي ستين داهية آكلي قوت الشعب…يتكلمون عن مادبو وشنو ووين ال 20 الف الذين شردوا من الخدمة المدنيه وال5 الاف ضابط من العسكريه؟؟؟؟الم ينهب قبل ايام احد تجارهم مليارات هل صدر بيان من الحكومه بادانته ؟؟؟؟؟؟مالكم كيف تحكمون طممتوا بطنا

  11. حاج أحمد السلاوى كتب:

    ولدنا مشاكل ..أريت حالك زين …
    إنت يا ولدى عندك زول من قرايبك جبهة أسلامية أو أخو مسلم أو مؤتمر وطنى .. شغال مع ناس الإنقاذ ديل ..ولاّ شنو ؟ إذا كان ناس المؤتمر الوطنى بدأوا يفتشوا عن عيوب الآخرين خليهم يخموا ويصروا ..وكفاية جداً القالوا ليك عمك ابكرون فى مداخلته أعلاه .والله نحنا ما بنعرف المدعو عرمان دا وما عندنا بيهو أى علاقة …والقصة إنتخابات وكل زول يحكم ضميره فى إختيار الشخص الصالح ( القوى الأمين ..زى ما بيقولوا الجماعة )للحكم والرئاسة .وإنت إذا عندك حاجة ضد الزول دا امشى ارفع عليهو قضية واطعن فى اهليته للترشيح زى ما عمل الدكتور معتصم عبدالله محمود ..وما تبقا المسألة كلام ساكت وعدم ريدة فى الزول …
    وما دام إرتضينا الديمقراطية الليبرالية دى خلونا نمشى فيها للآخر ونشوف آخرتا شنو وحتودينا وين لأنو أنا عندى راى فى الديمقراطية فى دول العالمين التالت والرابع ديل ..

  12. طارق أب أحمد كتب:

    ياسر عرمان ,ياسر شيطان ,جورج بوش ظاتو
    بس ما البشير

  13. مُخير كتب:

    الأخ الحبيب محنك
    والأخ الفاضل الشيخ الزوووووول
    الأخوة والأخوات كل مكان
    سلام ومحبة وإحترام
    أتفق مع الأستاذ سنكل في أن الإنتخابات قد تكون تحصيل حاصل والجماعة ديل في خاتمة المطاف حيعوسوا عوسهم، ومع ذلك أود التعليق على جزئيات من كلام محنك:
    1) ((جربنا الصادق فى غير ما زمان فما نفع )) إذن لم تجربه في هذا الزمان لذا سيأتي إن قُدر له مستصحباً تجارب الماضي وبحكمة الشيوخ سوف يصحح ليس أخطاء الماضي فحسب بل وكذلك وبإذن الله وعونه سيصلح ما أفسده الدهر.
    2) ((وليه جات الانقاذ اساسا لما انت شايل قروشك فى جيبك وما لاقى البتاكلو)) هسة مافي قروش في الجيوب يالحبيب والجماهير بتآكل تبن راجع سيناريو الأستاذ الفاتح جبرا حول الجرجير.
    3) ((عهد الصادق الانا عشتو واعى وساهمتنا فى المسيرا باسقاط جعفر نميرى بانتفاضة ، وجات الديمقراطية الفوضى الانا شفتها الله لا عاد ذاك الوضع)) نحترم رأيك وشخصك لكن الديمقراطية بكل عيوبها افضل من الشمولية ولا مجال للمقارنة.
    3) أما بقية الإنتقادات إن صح وصفها بذلك فهي مُكررة وقد أوضح السيد الصادق موقفه التاريخي منها في كتابه الديمقراطية عائدة وراجحة أتمنى أن تقرأه، وصحيح إن ((الديمقراطية مسئولية والتزام )) لكن غير الصحيح هو ما ذكرته ((دا زول عوض نفسه واهله من مال الدولة قال اراضى ام دوم قال)) ما حصل عليه وأهله تم دون علمه ولكن في نهاية المطاف كانت أملاكهم ورثوها عن السيد عبدالرحمن وصادرتها مايو فإن لم ينصفهم العهد الديمقراطي فمن سينصفهم، ومع ذلك لا أحد يُشكك في نزاهة ونظافة يد السيد الصادق الذي لم يكن يتنال راتب من الدولة. .

    4) ((نحن ممغوسين من كل الساسة الحاليين ومستقبل مافى)) فال الله ولا فالك الله في والمستقبل مشرق بإذنه تعالى، تفائلوا خيراً تجدوه خيراً بمشيئة الله.
    5) ((وين خليفة الصادق ولدو مش وين كبار الحزب ايام الديقراطية قبل عشرين سنة ونيف دردقهم عشان بناتو ورجالن ومرتو واولادو يشتغلو سياسة………..لماذا انفصل مادبو ومسار والزهاوى هل هم احسن ام وليدات الصادق….)) ده كلام مخلوط ومغلوط وحيث أنه لا يهم الأخوة هنا فلا داعي للخوض فيه، فقط أود القول بأن المؤسسية والقرار الديمقراطي لو جاء بخدم الصادق في قيادة الحزب فإن الأعضاء راضين، إنت مالك موجوع (:
    أما للبقية فالحديث سيكون بيننا على البريد الإلكتروني ولك كل الود والتقدير وأكثر

  14. زووووووول كتب:

    الامير مخير
    الاخ محنك
    سلاااااام عليكم ورحمة الله وبركاته
    اولا دعنى اكرر المقوله المتواتره اختلاف الراى لا يفسد للود قضيه ودعنى ان اعبر لكم ولجميع الاخوه بعظيم مودتى وخالص احترامى .
    اهاااااا اقول ليكا بالنسبه لعمك الصادق المهدى الراجل دا طبعا انت ذكرت انو عندوا خبرات متراكمه فى السياسه لكن دعنى اقول ان السيد الصادق المهدى خبير بدرجه كبيره فى معارضة الحكومات القائمه فقد عارض حكومات النميرى والانقاذ وهى فتره تقارب نصف القرن زاااتوووو .
    اما الحكم فياتى الرئيس البشير على راس القائمه عشرون عاما عام ينطح عام .ثم المرحوم جعفر نميرى .
    اما خمة الشعب التى على ما اعتقد هى غاية الديمقراطيه فلم يوفق الرجل فيها على قلة سنوات حكمه ولم نر جسرا مكتوب على مدخله وضع حجر الاساس السيد الصادق المهدى كما لم نر طريقا شيدته حكومات الديمقراطيه ولا مصنعا ولا حتى مزرعة دواجن سعة الف دجاجه .
    اما عمل الامام رئيسا للوزراء دون ان يتغاضى راتبا من الدوله ففيه نظر اذ ان من يتنازل عن راتبه طيلة سنى حكمه جدير به الا يبحث عن تعويضات لاهله مقابل اراضى ام دوم من اجل الشعب طبعا .
    اما الازمات فى عهده فلا تحصى ابتداء من الرغيف وحتى الصابونه والظهره واذكر كاريكاتيرات عز الدين ((الحق يا دكتور الولد بلع الصابونه واحنا محتاجين ليها )).
    اما سوءات الانقاذ التى ذكرها اعمامنا ابكرون والسلاوى فهى صحيحه بنسبة ميتين فى الميه ولا مجال لانكارها . لكن ما يجب ان يعرفه الاعمام ان انقاذ قتل ضباط رمضان ومجدى والاحاله للصالح العام تختلف كثيرا عن حكومة البشير اليوم بعد ان صار معظم محركى اجراءات الظلم والتعسف فى صفوف المعارضه ومن دعاة الحريه كماااان .وارجو ان اسمع راى ابكرونا والحاج سلاوى حول هذه النقطه .
    كسره : الايميل ما فينا يا مخير خلينا نفتها فى الهواء الطلق دا .ويا مشاكل الله يخليك للمتل دى .
    وجااااااايييييكم تانى

  15. زووووووول كتب:

    احم احم

  16. زووووووول كتب:

    لكل الاخوه قراء سوداننا خاصة الذين لا يشاركوننا قائمة الايميلات اهدى قصيدة هاشم صديق قرنتيه وهى من روائع الايميلات المدوره بين اعضاء المجموعه مع الاحتفاظ بالحق الادبى لاخينا خالد ابراهيم مرسل الايميل الرائع وكمان برضو حاسس انو القرنتيه دى عندها علاقه مع انتخابات الرئاسه والبرلمان (بس كيف ما عارف)

    لا دبابة برمائيه

    لا جاسوسة مدسوسه

    لا غواصة روسيه

    لا جندية في حركه

    لا مختلسة مال شركه

    لا قصفت حدود فشلا

    لا كسرت صريف كسلا

    ولا معروفة ختميه

    قرنتيه

    لا صعلوكة لبست شورت

    لا بتعرف شنو البظبورت

    لا محتاجة جنسيه

    هي قايلة النيل سقف بيتا

    وقايلة ضفافو محميه

    جات منسابه عز الصيف

    قايلة الناس بكرمو الضيف

    قايلة النيل أمان والقيف

    وقايلة الحاضرة عصريه

    قرنتيه

    جات بصغارا دايرة الخير

    لا شافت يفط تحذير

    لا نزحت تكوس توزير

    لا جاطت حركة السير

    لا درات وسام تقدير

    لا مستغله عشرين وش

    ولا بتعرف تعيش بالغش

    كان محتاجة بس للقش

    وجات أحلامها دوغريه

    قرنتيه

    لا بلعت عديل السوق

    لا نضمت بدون طايوق

    لا كنزت دهب أو ماس

    لا ظلمت بدون إحساس

    لا عصرت شباب الناس

    لا كتمت على الأنفاس

    لا قطعت عشب بي فاس

    لا داستنا زندية

    قرنتيه

    لا دست سلع في الخيش

    لا شربت مريسة العيش

    لا ضبطوها في التفتيش

    لا سجنوها شالو الفيش

    لا خانت قسم أوديش

    لا اجتمعت بمستر جون

    لا أكلت مونة العون

    لا سدت علينا الكون

    لا سبت كتاب أو دين

    لا سامتنا حمرة عين

    ولا باعتنا ضهريه

    قرنتيه

    جات مشتاقة للخرطوم

    تزور أحبابها خايفة اللوم

    تصيح وتنادي بالحلقوم

    جنينة النزهة وين يا زول؟؟

    لقت حال الجنينه خلا

    حليل زمنها وحليل أهلها

    لا قرنتي لا أصله

    لا صوت كوكو

    لا بغله

    لا حلوف

    ولا أسداً مهاب بالخوف

    لا نمراً يشد الشوف

    لا ضل فيل

    لا تتيل

    جريهو جميل

    ولا غزلان ولا طاووس

    يباهي النيل

    لا زفة طيور ونعام

    لا نمراً دفر قدام

    كل الشله يا قرنتيه غمضة عين

    أحالوهم لصالح عام

    تقول الدنيا مهديه!

    قرنتيه

    جت زي ضيفة ما غاره

    لا محتاجة لي فيزا

    ولا تصديق على زياره

    جات والشوق دموع حاره

    تجدد في العيون الشوف

    بين توتي وعلالي أبروف

    قايله الدنيا لسه سلام

    ما خيم زمان الخوف

    ولسه هناك ضفاف حره

    ما مطمورة للمره

    قايله الناس بعزو الضيف

    ما بسوقوهو لي حفره

    وجوار القيف

    ما بيكلوهو في السفره

    ومصيرو مخيف

    قايله الحاضره ما غابه

    وقايله حقوقها محميه

    قرنتيه

    لا قدلت في شارع القصر

    لا حامت في وقت الحظر

    لا خشت على المأمور

    ولا نطت سلك أو سور

    لا دخلت على أمدرمان

    ولا كسرت قفل دكان

    لا دفرت على التلفاز

    لا عضت كراع فنان

    لا ذاعت بيان للناس

    لا احتلت كمان حيشان

    ولا نصبت شبك للحش

    جات بصغارا كايسه القش

    تلاقي القوت

    صبح محظور

    وخير البقعه جوا السور

    سماحة الدنيا منسيه

    قرنتيه

    لا بتعرف عجن أو لخ

    وجات أحلاما دوغرية

    عجب ساقوها جوه الفخ

    عجب من طولها وقعت تخ

    عجب سلخوها صبحيه

    عجب ونحنا بنسلخ الانسان

    كيف ما نعذر الحيوان

    عجب والدنيا عصريه!!

    قرنتيه

    لا دبابه برمائيه

    لا جاسوسة مدسوسة

    لا غواصه روسيه

    لا جنديه في حركه

    لا مختلسة مال شركة

    ولا حزبيه بعثيه!!

  17. زووووووول كتب:

    صدقا لكلامكم يا ابكرون ويا السلاوى لكن ما وريتونى رايكم شنو فى تبدل مفاهيم الانقاذ منذ الثلاثين من يونيو وحتى تاريخه .ومن تاب تاب الله عليه ولا كلامى دا ما هوتميل ؟

  18. ابكرون كتب:

    زووول سلام كيفك
    زووول الإنقاذ(وانا بتحفظ علي اسم الانقاذ) لم تتبدل ولن تتبدل الإ نقاذ عايزه تعيش دهورا زي الحرباء كل 5 سنوات بجلد ولون لزوم الاستمرارية…لم تلجم الفساد ولن ترجع جنيه من المليارات التي نهبت لخزينة الدوله ….الانقاذ لا توظف الا ناسها في الخدمة المدنية والنظاميه وفي التجارة والاقتصاد ودي ما عايزه دليل او نقاش …الانقاذ لم ترجع جيوش الصالح العام في المدنية وبالطبع في النظاميه ولم تعوضهم رغم الوعود …الانقاذ لم تخبر بمكان دفن من قتلتهم لزويهم واطفالهم البقوا شبان…الانقاذ لا زالت تصر علي القوانين الامنية ووووووووو اذا اردت ان اعدد سيدركنا الصباح اذن الانقاذ لم تتغير وتتبدل قولا لا فعلا….حتي ما تراه من توجه نحو الانتخابات فهي العوده بوجه اخر وما هذا التوجه الا نتيجه ضغوط داخليه وخارجيه..

  19. يا حاج السلاوي سلام كتير
    الجماعة ديل قول ليهم هدوا اللعب أولاً يا مشاكل لو فاز ياسر عرمان شوف ليك قبلة قبلة …
    عموماً يا عمنا السلاوي والله الديمقراطية بنعرفها كويس وذي ما قال أخوان الصفا جربنا كل الشعارات أنا عايز مرشح واحد يتكلم عن صينية الغدا كيف تتصلح … وقيس على ذلك …الإنتخابات مسئولية وصوتكم أمانة في الرقاب …..فلا تخدعنا الشعارات البراقة نريد مناظرات عبروسائل الإعلام يعني دايرين مشاكل يا مشاكل …. والقرنتية كدي نخليها ونشوف الكلاب الضالة عاملة شنو في الناس قالو في زول بوزعها بالليل وقربو يمسكوه .

  20. محنك كتب:

    والله احترنا مع بلدنا الحل شنو

    اخونا مخير قصدت من خليفة الصادق انه لا يمارس الديمقراطية فى حزبه فكيف بالسودان

    وقد تشظى حزب الامة 7 شظايا من عدم الديمقراطيه فهو يتشدق بها ولا يمارسها

    والازمات الزمان دى اخير الدكتاتورية للشعب المسكين لانه عايز ياكل …. اما الديمقراطية فهى للسياسيين لانو بياكلوا من دم الشعب

    نحن عايزين الدين يكون قدام وخدمات وامن وتنمية

    بعد داك مين يجى الله اعلم

    ماعايزين ليبراليين او شيوعيين بس
    وكل واحد برايه لانو الشيوعى عايز الشيوعيين واللبرالى عايز اللبراليين ولا حجر على راى

  21. عارف يا مشاكل المسألة ذي البسمع أغاني كابلي وواحد بسمع محمود عبد العزيز دي الإنتخابات يا جميل قارن بعد دااااااااااااااك

  22. مُخير كتب:

    الأخوة والأخوات كل مكان
    سلام ومحبة وإحترام
    الأخ الفاضل الشيخ الزوووووول
    في البدء لست ناشط سياسياً ولكنني أعتبر ان الحياد لا موقف وأرى أن كل زول (بواو واحدة) مطالب بتحديد موقف واضح تجاه القضايا الراهنة بما فيها الإنتخابات، ولا عليك فليكن كُل الحوار في الهواء الطلق حتى لا نترك مجال للشك وسوء النية مع التسليم التام بأننا أخوة وبيننا ما يكفي ويزيد من تفاهم وتفهم ومحبة وإحترام والسلام.
    الحبيب محنك: ما يغيظني بجد أن بعض الناس تلووك في تهم وإفتراءات واهية، نعم تشظى حزب الأمة في الماضي وربما في الحاضر لكن في الشدة لا يبقى إلا القوي القابض على المبادئ أما المهرولون خلف المصالح الذاتية والمكاسب الآنية فيذهبون جفاء ويبقى الأصل قوياً شامخاً كالطود ثم يرجع إليه المخطئون يجرجرون أذيال الخيبة، ولدى الكيان مساحة رحبة للصفح والتسامح. قلت ((الازمات الزمان دى اخير الدكتاتورية للشعب المسكين لانه عايز ياكل …. اما الديمقراطية فهى للسياسيين لانو بياكلوا من دم الشعب)) الديمقراطية الحقة تقوم على المسائلة والمحاسبة وتفسح حرية للرأي العاموللسلطة الرابعة كي تكشف وتفضح الفاسدين ولكن في ظل الديكتاتورية عينكم على الفساد والفاسدين وما تقدروا تقولوا بغم.

  23. مشاكل كتب:

    سلامز

    متأسف جدا جدا جدا عن التأخير في الرد لظروف الجري و ( الجري ) برضو

    زووووووولي
    متفق معك تماما في الرأي إنو البني آدم – إن جاز التعبير – ياسر عرمان ما ليه كبير أمل في الرئاسة
    فهي كالنعمة بتعرف عاطيها .. لكن مع ياسر كالجمرة بتحرق الواطيها

    ود الزبير الختري
    انت قالولك الغنية دي الا مع السبعة العظام … تعيش كتير تشوف كتير .. البرنامج ماشي لي قدام و الغريق لسه .. ولا ما كدا يا شمباتي

  24. مشاكل كتب:

    الأمير مخير

    ياسر عرمان شخصية دائمة شمالية المفروض انها مسلمة – لكن مع الأحكام التكفيرية الطلعت عليه بعد غنكارو حد الزنا في البرلمان بقى في شك – متحالف مع المسيحيين العلمانيين – ضد عقيدة الولاء و البراء – في محاولات ( كانت ) جادة استرمت سنين طويلة لتحويل السودان لمستعمرة علمانية بلا دين و يكفيني شهادة صديق أخي عليه و ذكرتها قبل كدا في توبيك سابق
    واحد ينكر حد من حدود الله – الزنا – هل نرجو منه أن يخلصنا من الإنقاذيين ؟؟؟؟؟

    اما الصادق المهدي فهو شخصية – بياعة كلام – لا بودي ولا بجيب و انا شايفو زي سمك الزينة في الانتخابات الجاية … شخص جلس على كرسي رئاسة حزبه من عشرات السنين .. ولا يوجد حتى من يخلفه .. و اذا وجد فهو من العائلة المالكة … هل ترجو منه أن يعيد لك الديمقراطية التي فقدها في حزبه ؟؟ هو لعب ولا شنو

  25. مشاكل كتب:

    العزيز التركي

    بالله انسى موضوع البرامج الإنتخاية دا

    فهو حبر على ورق

  26. مشاكل كتب:

    الغبشة … ضفاري طوالي و نحن قدامك كمان

    حبيب ألبي الوالد السلاوي

    اييي عندي واحد من قرايبي جبهجي .. لكن في السايد الغلط اظنو .. جبهجي في الفاضي سااااي

    انا ما احتكرت على حد انو يرشح او يترشح .. لكن من حقي اني اتكلم في أي مرشح من باب المناصحة فقط

    الحبيب أبكرون

    هو ناس الله قال و الرسول قال بهدلونا و جهجهونا

    ناس قريعتي راحت ديل ح يعملو لينا شنو

    الله يستر ما يدخلو الشعب الماسورة

  27. ياسين شمباتى كتب:

    الحبيب مشاكل..سلام..
    مساك طيب..حقيقة ما كنت عايز اتداخل تانى بعد الشمطة بتاعت الفيس مع الشباب,,لكن حقيقة الكلام يابى الا ان يسمع..واصابعى تابى الا ان تجرى على اللوحة لتسطر بعضا من مشاعرى تجاه الوضع..
    اولا انا كمواطن_واظنه حال الكثيرين_نريد حاكما عادلا لا ظالما,,بعداك جنسيتو وديانتو دى مشكلة تانية..لانو بكل بساطة مدعيى الدين والاسلمة ما جابوا فايدة,,واكيد المشكلة منهم ما من المنهج الاصل..اها تانى دايرنى ارشح البشير او المؤتمر ليمتطينا كما فعل ويفعل حتى الان؟؟ لا والف لا للبشير وحزبه وطغمة الاوغاد من خلفه..
    اما عن حرية الترلاشح والترشيح فدى مكفولة بموجب القانون والدستور,,ودستورهم البيحتكموا ليهو دا ما فيهو ديانة المرشح او نوعه_ذكر ام انثى_ عشان كدة ما عايز اسمع فتوى من المفتيين حقينهم بانو التصويت لى ياسر حرام..خليهم يشوفوا ليهم سفر رئيس او قطع اشارة حمراء يطلعوا فيهو علمهم,,وليسكتوا عن ظلم الحاكم وفجور وزرائه واكلهم مال اليتيم والمحروم والسائل وزكاة الشعب والجبايات والمكوس..وليلجموا بلجامهم هذا حتى تأكله النار يوم العرض الاكبر..
    اما عن الماسورة فانحنا دخلناها زمااااااان,,وفى رواية ان العكس هو ما حدث!!!!

  28. ياسين شمباتى كتب:

    اما عن الاغنية اياها غايتو انا ما كنت حاضر القعدة لكن وصلتنى ضمن السبعة..شكيت محنك وعمايلك على الله..

    الامير مخير..سلام..
    حقيقة الصادق ما خيار طيب للشعب,,على الاقل ما قادر يتخلى عن احساسو بالملك وكدة,,يعنى معقولة مافى شاب او على الاقل خحد تانى ممكن يترشح او يتولى قيادة الانصار غيرو!!؟؟ حقيقة هو ما استقر فى حكم ديمقراطى لكن بداياتو ما كانت مبشرة..وحدث ولا حرج عن تخبطو واتفاقياتو الجوفاء وصفقاتو مع المؤتمر الوطنى وتحالفاته العجيبة مع الحركة..
    دايرين زول جديييييييد,,فلنرحب بالدكتور كامل ادريس وكدة…

  29. زميل مشاكل : ماعايز اتطرق لمسالة الفتاوى لأنى بعتبرها سياسية اكتر من انها دينية ومثلها كثير … لكن العلمانية ليست الدين أو عدم الاعتراف والعمل بأحكامه حسب معرفتى ,العلمانية هى فصل الدين عن الدولة ( السياسة) يعنى أى زول عايز يستثمر الدين لجلب عطف وتأيد الضعفاء يقفلو ليهو الدرب دا …. لسه مصر على حكاية البرامج الانتخابية تعرف ليه ؟ عشان لو فعلا فى ديمقراطية ح تستمر اقدر أحاسب المرشح على عدم تنفيذه لكلامه اللى على الورق دا على أسوأ الفروض بحاسبه فى الانتخابات القادمة دا لو ما استعجل فى التنفيذ قبل موعد الانتخابات التانى زى مابعملو التانين وبرضو بعتبرو مكسب …
    الحبيب شمباتى : اتطرقت لنقطة مهمة مادام مامذكور جنس المرشح واترشحت فاطمة وفازت هل يجوز انها تحكم البلد ؟؟؟ ياربى الدستور فيه نقطة كدة ولا كدة أعتقد انهم برضو ح يفتو فى الموضوع دا والفتاوى فى رأي توجيهات سياسية ليس الا .

  30. ياسين شمباتى كتب:

    الحبيب التركى..سلام..
    والله دى نقطة اساسية وتطعن فى براء الناس ديل وولاءهم واحتكامهم للشرع,,يعنى بالواضح كدة البلد يحكمها دستور وضعى,,لذا علينا جميعا ان ننصاع له او نحكم ببطلان الدولة والحاكم عديييييل كدة…بعدداك نجى نتكلم عن الشريعة ومدى تدين عرمان وكدة..
    والدستور ياخوى اظنو كلو ثغرات وكدة,,لكن الفاهمو منو بس..الحمدلله على كل حال..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s