هنيده ؟ أزيك ! مشتاقين! وين ما باينها ؟

Posted: الإثنين,8 فبراير, 2010 by ودالزبير in اخرى

هنيده كيفك ؟؟ وين مطوله الغيبه ؟؟ الناس بتسأل منك ! إنشاء الله ؟ ويستمر الحوار بين المتصله هنيده ومقدم البرنامج في الإذاعه الطبيه عثمان حسن مكي وهنيده لمن لا يعرف هذ مستمعه لبرنامج المجال الرياضي وهي مدخل لظاهره ارصدها من فتره وهي علاقات الإذاعات بالمستمعين فبعد أن إنفض السامر من إذاعه هنا أمدرمان بدخول الإذاعات الخاصه وإذاعه البيت السوداني لاحظت إن أغلب البرامج تعتمد على مداخلات المستمعين الذين أنشئوا عالم خاص بهم هو أقرب لعالم المنتديات الإسفيريه حيث تجد أنهم يشكلون حضور في عدد من البرامج حيث تعرفنا على حاجه ( خليفه ) في البيت السوداني وعلى ( مهند ) في المجال الرياضي وشاديه وسلوى وأماني وهنيده الفي صدر هذه البوست والتي غابت لمده أسبوع وعندما رجعت بإتصال بادرها أستاذنا عثمان بتلك الأسئله التي تنم عن أهميتها في البرنامج ..

وصل الأمر لحدود إستضافه هؤلاء المستمعين داخل الإستديو لإداره الحوارات كما قاموا بتشكيل روابط وتجمعات كتجمع معجبي إف إم 100 ولو ذهبنا للإذاعه الرياضيه لوجدنا نفس الأمر وكذلك في مانقو وراديو الرابعه..

ليه جأني إحساس إني كتبت الكلام ده قبل كده؟؟؟

المهم لو الموضوع مكرر أمسحوا لي في وش زوووووووول

Advertisements
تعليقات
  1. زووووووول كتب:

    ودالزبير سلااام
    انا شخصيا ما بتذكر انو الموضوع مكرر لكن لو طلع مكرر احسن تمسحوهو لامولادى ولا مجدى شمس الدين فى وشو شم .
    لكن يا عمك الواحد بتغاظ حد الثماله (دى ماعارفا كيف) من الاخطاء اللغويه عند مذيعى الاف امات وظرافة مازن صلاح امين وبالاحرى بياخته فى اقوال الصحف مقرونا مع اخطائه فى القراءه الصحيحه حتى فى بعض الامثال المشهوره التى يعنون بها بعض الكتاب اعمدتهم .
    وبالمنابه طالما الكلام جاب الكلام فقد كنت شاهدا على حفل افتتاح معرض الخرطوم الدولى لدورته ال 27 فى الاول من هذا الشهر وشهدت عجبا حيث تلاعب سعود البرير ومدير موسسة الاسواق الحره باللغه العربيه ايما تلاعب وكسروا المفتوح ونصبوا المجرور حتى ان احدهم تحدث عن البنيه التحتيه بكسر التاء الاولى والتانيه كمان .
    كسره : الى لقاءءءءءءء (عثمان حسن مكى )

  2. ودالزبير سسسسسلام … ياخ الناس دى عايزة تقلد بس تقليدهم بكون أعمى …. والناس البياكلو ( الفول) فى الشوارع واسمها منو ديك يابت والله مشتهية أشوفها طيب السؤال للناس البتركب مواصلات عامة فى كم سواق حافلة بكون فاتح اذاعة جادة ؟؟؟ ياخ الصباح تركب الحافلة تسمع التجويد لكن تعال الضهر أو المسا لو ماشغل ليك شريط هابط تلقاهو فاتح واحدة من ( الاف امات) الياها … ولا الحكاية دى ليها علاقة بالأحياء والمناطق أكتر من ذوق السائق ؟

  3. ود الزبير و ضيوفه سلام
    ممكن توطي صوت الراديو شوية…
    دي طبعن ملازمة لكل متصلة اذ تعح الأف امات بالمتصلات الشابات و يكاد مقدمي البرامج معرفة معظم المتصلات و هاك يا سلام و ضحك….

    طبعا الأف امات ديل لابد منهم في شوارع الخرطوم و عند الزحام…..جربت رايو 100 بتوصية من الغبشة لقيتو جادي شديد و مرات واحد يمسك المكرفون يفكو منو الله… يحكي و يحكي….. لكن في الفترة الأخيرة زابنت ناس راديو الرابعة لما لمست منهم خفة دم و محاورة جيدة للمتصلين…. و لمن أزهج منهم بمشي لي ناس ني بي سي اكسترا… زي العسل

    برضو عالم الرياضة ظريف في امدرمان…………… الى ااااااااااااااااااااااااا لقاء

  4. حاج أحمد السلاوى كتب:

    أخونا العزيز أبو عصمت ..
    الإذاعات دى كوووووولها بتسمعها وين ؟ ..فى المكتب ..فى العربية وانت سايق ..ولا فى البيت ؟ .
    نحنا غايتو الإذاعة بنسمعها بس ونحنا فى طريقنا للعمل الصباح والمساء .. تانى ما عندنا طريق نسمع بيها راديو ..وطبعن ما بيوصلنا فى موقعنا الجغرافى دا إلا إذاعة أمدرمان الوطنية ..القومية العالمية وكلها أخبار عن المؤتمر الوطنى وحيرانه..وفلان قام وفلان قعد وعلان قدم فروض الطاعة والولاء ..

  5. الغبشة كتب:

    عمو السلاوى كل اذاعات الاف ام ممكن تصلها بالنت

  6. تصور أنا لسه بتذكر ومستغرب لحكاية الناس الكانوا برسلوا تهاني ورسائل شوق عبر البريد للبرنامج الاذاعية … منذ صغري ولم أكن مقتنعا بكتابة رسالة وارسالها الى ص.ب ما عارف كم كده … نلفزيون امدرمان … ويقال أنها رسائل منجورة … أو مفبركة
    المهم طبعا حكاية المداخلات عبر الهاتف لا شك منطقية وليس ليست لهذه الدرجة
    اذاعة mbc اف أم طول اليوم اتصالات عبر الهاتف ثم فاصل اعلاني ونواصل مع مستمعينا الكرام
    حاجة تصيب بالضجر صراحة … تكرار مقيت وممل

  7. طارق أب أحمد كتب:

    و دكتور عبد القادر ينضم
    ((صدقونى هذه منتجات ذات قيمه شنو ما عارف كده))

    هذا الدعى الذى ظل لسنين يوهمنا بأنه حارس الجوده و مديرها كيف يسمح لكل قاذورات الدنيا أن لا تعرف لها طريقا غير تراب بلدى
    أحيى الرابعه و الطبيه و أكيد البى بى سى التى لا ينافسها فى الصباح ألا القهوه

  8. اصلو يا حاج بنستمع ليها في السيارة باقي أنا شغال في حتتين بيناتهم زي ثلاثة كيلو و بالصباح و الضهر دا غير المشوار بتاع البيت التاني……
    ما يمشي فكرك لبعيد…….
    محل البناء….!!

  9. علي سنكل كتب:

    والله جات سليمه يا عزت . . سلامه كبيره خلاس. لمن قريت البيت التاني من الخلعه أخدت نطه لا فوق. بس الكويسه بردت النفس بصوره فوريه ، ربنا يقدرك على البنيان يا أخي ، باقي ده شئ صعب في السودان. نعاين ليهو وخايفين منو.

  10. مُخير كتب:

    آلووووووووووو ود الزبير
    ســــــــلامــــــات
    ممكن أهدي ؟؟؟؟؟ آييييييييي
    كدي سامعني بقووول ممكن أهدي ……..
    طيب بهدي الأغنية للصديق الحاج أحمد السلاوي في جدة وللأخ على سنكل بالإمارات، وللأخوان ألأبكرون ومحنك بالدوحة ولكل ناس المدونة بالسودان، وخسوسن الأخ خالد مدني وممكن أهديها ليك يا ود الزبير طيب بهديها ليك لو ممكن ؟؟؟
    إهي إهي (دي نظام ضحكة وكدة) ياخي قوموا شتتوا ولا تلفزيون ولا إذاعة ولا كورة ولا ولا ……….
    إنتو العندكم شنو ياخي ؟؟

  11. حاج أحمد السلاوى كتب:

    أخونا الأمير مخير …
    أشكرك كتير على الأهداء الجميل العملتو لينا مع بقية الكواشف …لاكين بس ما عرفنا ياتو أغنية كانت مهداة لينا ..إن شاء الله تكون الأغنية الشهيرة قنبلة (غمبلة بالسودانى) أو أغنية راجل المرا حلو حلاة ..أصلو دا بقا عزاءنا الوحيد ..ولاّ رايكم شنو يا ناس قريحتى راحت ؟؟

  12. ودالزبير كتب:

    إعزائي المستمعين
    المفروض طبعا الواح يرد عليكم واحد واحد لكن الزول شويه بعافيه ماعارف فتر ولا تعب ولا تقدم سن أها هسه من دربي ده ووالبيت جاك زول

    غايتو لو ربنا رفعنا نرجع نلقاكم تامين لامين

    أبقوا عشره على العده

    إلى ااااااااااااااااااااااااااااااااااااااااااا لقاءءءءءءءءءءءءءءءءءءءءءءءءءءءءءءءءءءءءءءء

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s