حركات بعاعيت

Posted: الخميس,11 فبراير, 2010 by حاج أحمد السلاوى in ساخر سبيل

وصلتنى هذه المقالة عن طريق الإيميل وبصراحة لم يٌشر مرسلها إلى كاتبها الأصلى وحاولت جاهداً معرفته لكى نحفظ له حقوقه الفكرية ولكن دون جدوى .. فليعذرنا إذ قمنا بالنشر دون إذنه .

بعد ان قرأت كتاب رحلة ابن بطوطة.. وقفت محتار ومتمحن.. عند الحتة بتاعت انو زار ارض السودان.. وزار مكان فيهو ناس بياكلو لحم الناس.. بعاعيت يعني.. سحاحير.. والبعاعيت ديل قال بيحبو ياكلو لحم النسوان.. وفي لحم النسوان اكتر حاجة بيحبوها هي الكفين والثديين.. ما عارف حكمتهم في كدي شنو؟ بعد قراءة الكتاب وتمعن فينا نحن معشر السودانيين.. قربت اصل الى انو نحن احفاد هؤلاء البعاعيت ما فيها اتنين تلاتة..

 لقيت اننا ربما نكون الشعب الأوحد على وجه الارض بياكل لحم ني «المرارة» ـ الكبدة ـ ام فتفت ـ الكرشة».. وبعض البعاعيت مننا ياكلو سن البرك.. وهي منطقة تلاقي الضلوع عند الصدر.. الحقيقة الحتة دي مغرية للاكل نية.. وتستاهل مني كل ثناء واحترام. الكرشة خلقها ربنا عشان تهرس الاكل وتهضمو نجي نحن ناكلها نية ونهضمها كمان.. اها في بعوتية اكتر من كدا؟! تنتابني مشاعر بعوتية.. عندما اقف عند جزار وهو يقطع في اللحمة بدون م ا اشعر ألاقي ريقي جرى وبطني كوركت.. ولولا الخوف من شيل الحال اشيل لي حتة لحمة نية واكلها..

اما حكاية اكل الكفين عند بعاعيت ابن بطوطة.. وجدت اننا استعضنا عنها باكل الكوارع.. فقلما نجد سوداني لا يحب الكوارع مما يثير لدينا رغبة قديمة وموروثة وهي اكل مزمزة الكفين.. خصوصا كوارع الضان.. وشوفو المتعة في وش اي زول بياكل في العضام الصغيرة الفي كوارع الضان.. متعة بعاتي ما فيها شك.. تلقاهو ياكل العضم ويمصو ويملصو من خشمو في الصينية او الطربيزة بكل متعة.. وينف.. ثم يتناول الذي بعده يسوي فيهو ما سواهو في اخوهو.. في اللحظة ديك لو سألتو من اسمو ما حيتذكرو ليك.

 اكل الثدي يتضح جليا.. عند اطفالنا الرضع.. تلقى الشافع وهو يرضع وفجأة وبدون مقدمات يعضي امو.. وهو سلوك بعاتي موجود في اطفالنا.. يدحض فرضية نظرية فرويد.. الشافع يعضي امو.. والام عشان تكبح جماح هذه الرغبة البعاتية.. ترصع الشافع في ضهرو وتقول ليهو «احي.. الله يازاك» بالمناسبة.. كلمة احي دي.. هي كلمة بعاتية من صميم قاموس البعاعيت.. على حسب ما ورد في الاحاجي.. لكي اتأكد من ان كل رضع الدنيا بيعضو اثداء امهاتهم.. وهروبا من فكرة اننا بعاعيت.. سألت بعض الاخوة العرب.. ذكروا انه ليس لدى اطفالهم هذه الحركة البعاتية.. وحتى انو في واحد مصري قال لي.. وهو مطير عيونو: «ايه يا زول.. اوعى يكون اطفالكم بسووا كدي؟.. « نهرته وزجرته وانا استشيط غضبا وقلت ليهو «افو…. انت قايلنا نحن بعاعيت واللا شنو؟» وبيني وبين نفسي اتأكد انو نحن بعاعيت اولاد بعاعيت احفاد بعاعيت.. وقاعدين نلد بعاعيت.. الله يجازيك يا ابن بطوطة كان داير تشككني في نفسنا.. وتجنني وتركبني القصبة.

اما اكل البني آدم وعلاقتو بثقافتنا وسلوكنا.. البنحاول نهذبو.. خدو مثلا.. اتحدى اي واحد او واحدة.. يشوف ليهو واللا تشوف ليها شافع صغير وسمين ومبغبغ وعندو جضوم.. بطنو ما تفور عليهو؟.. ويكون عاوز يجضمو.. او يعضيهو في جضومو.. واعتقد ان اسلافنا البعاعيت كانوا بيستعملوا الجضيم في الجس.. ويعرفوا مدى سمن هذا الزول.. زي ما نحن حسي بنجس الخروف من ضهرو.. وما الجضيم للشفع الا هو جس مبطن.. واحيانا الواحد يلقى نفسو بطنو فارت على زول كبير وعاوز يجضمو علا خايف بس.. وخجلان..

 اما في النضم تلقى جملة زي «اكل لحمي» او «اكلت لحمو».. و«ايدي اكلتني» و«قلبي اكلني» في الاغاني.. غنية «يوم طلعت القمرا».. يتضح الاكل والبلع للزول جد جد.. في المقطع «يبلع جب وجب في خصيمو.. جيت ليا»..شفتو البلع دا كيف ا؟!..

 اما اغنية زيدان «لو الاماني بايدي كنت اهديك عيوني واسقيك من وريدي» .. انا لا اشك ان حبيبة الشاعر دا بعاتية.. ومتعودة على الاكل وشراب الدم.. اها لو ما كدي عاد البيخلي الشاعر يهدي ليها عيون ويسقيها دم شنو؟.. بعاتية وكمان بتحب راس النيفا بتاع الزول.. وفي النيفا بتحب العيون.. الغريبة انو انا لما اسمع المقطع دا في الغنية دي.. احس برومانسية شديدة.. اتاريها ما رومانسية.. اتاريها حركات بعاعيت ساكت.. لله الامر من قبل ومن بعد .

 قفل الباب:-    هواي يعجز فكرتك ……… و جمالك يعجز فكرتي

                 في الصد تزيد في خبرتك و في الحب ازيد في خبرتى

ومن عندى أقول خلو راى الزول الظريف الكتب الكلام الظريف دا  .. إنتو رايكم شنو ؟ نحنا بعاعيت ولاّ ما بعاعيت ؟؟؟؟؟

Advertisements
تعليقات
  1. بعاعيت أبناء أسود كمان
    يوم حضرت لي واحد في الجزارة يشيل و يكوم… بالله الزند داك، الفخدة دي كلها أوزنها و قطعا… و ما تنسى الفليتو كم كيلو ما عارف … الناس زهجو بلحيل لأنو شال نص اللحمة الفي الجزارة…
    غايتو واحد ما استحمل
    قام قال ليهو: ياخي انتا مربي أسود..!!

    نحن الشعب الوحيد القاعدين معظمنا نضحي في العيد و ممكن نفطر لحمة و نتغدى و نتعشى لحمة

    كسرة:
    واحد جيرانهم بالحيطة عندهم بكا و طبعن بيت البكا لحمتو كاربة… مرتو كوركت ليهو من الحيطة يا فلان…
    قالت ليهو ما جاي بي هناك للعشاء
    قال ليها تعبان…!!
    العشاء فيهو لحمة قالت ليهو براحة…!!

  2. بشار أحمد بشار (ابن برد) كتب:

    “اكل الثدي يتضح جليا.. عند اطفالنا الرضع.. تلقى الشافع وهو يرضع وفجأة وبدون مقدمات يعضي امو.. وهو سلوك بعاتي موجود في اطفالنا”
    سلولو :الأطفال ديل لمن يكبروا ويبلغوا من العمر عتيا وأسنانهم ( تطيح) حيتركوا العادة بتاعت عض الأثداء دي الما معروفة عادة حميمة أم ذميمة .

  3. سهيل كتب:

    والله يا جدو ” إيدي اكلتني علي الكيبورد ” وقلت لازم احن لأصلي و من فات قديمو تاه.. و ما تنسو نحن احفاد البعاعيت برضو بنحب اللحم المبوخ و نادر ما تلقى ليك واحد تستهويه البنت المشطبه ( المعصعصه) الكملانه من لحم الدنيا .. و ماتنسو برضو اغانينا ( الشحم دا آآآآآآيا واللحم دا … عملو لشنو ؟ للجبجبه .. و الضعف دا آآآآآيا سوء تغذيه ) كفاكم كده احسن واحد يقوم يقيم علينا الحد ..

  4. المصري جاء وقبل ما يجي حذروه لو مشيت السودان الناس بتأكل الناس إعمل حسابك ياعم
    صحبك نزل من القطر في عطبره
    لقي حاجه كبيره
    -إزيك يا حاقه\حاجه
    -أهلا يا عشاي
    -أنا عشاك
    ………
    طااااااااخ طاااااااخ
    آآي وعينك ما تشوف إلا النور
    ـــــــــــــــــــــــــــــــــــ
    صديقي حسن صالح الساخر قال
    ………….
    …………
    زولك البتريدو جب تبلعوا وتاني اليشوفو قضيتوا

    بعاعيت أولاد ستين فتله ديل نحن يا حاج السلاوي

  5. سهيل كتب:

    تعرف يا جدو .. الخلا بلدنا دي غنيه بالثروه الحيوانيه شنو ؟؟ انا ياادووووب عرفتا

  6. طارق أب أحمد كتب:

    حابس حابس

  7. طارق أب أحمد كتب:

    البعتنه تاريخيا
    بدون أى تداخل بين ما قام به الزبير باشا رحمه من أعمال قد يصفها البعض بالجليله و الأخر بالسيئه الأ انه فى مذكراته كتب عن القبائل البدائيه التى تأكل لحوم القتله و اللصوص و الزناه و كل من أرتكب جرم يتم معاقبته بأكله
    الزبير عمل على محاربة عادة اكل لحوم البشر المنتشرة في تلك الفترة في القبائل الجنوبية البدائية، وذلك بتوعية الناس، واستبدال الاسرى الذين هم عرضة للاكل من قبل اعدائهم بالسكسك والمجهوهرات الاخرى والتي تكون عادة مرغوبة من السلاطين

  8. حاج أحمد السلاوى كتب:

    السادة البعاعيت كوووولهم ..
    يعنى طلعتو كلكم بعاعيت بالجد وتحبون اللحمة حباً جماً …وأنا ما كنت قايل إنو الحكاية فعلاً جد للدرجة دى لأنى شخصياً ومنذ طفولتى نباتى بنسبة عالية جداً لاوأتعاطى من أنواع اللحوم إلا المفروم من لحوم البقر الصغير ( أو ما يسمى العجل) ولا غير ذلك .. وفى فترة وجود عواطف والبزورة معى فى بلاد بكر كنت بين كل حين وآخر أشترى لهم من اللحوم السودانية المبردة الواردة بالطائرة التى كانوا جميعاً يحبونها وعندما نجلس لتناول الطعام يعزمون على لأشاركهم أكل تلك اللحمة .. فارد عليهم إنت متوحشين ..حسه فرقكم شنو من الأسد أو النمر ؟ .
    ولربما تساءل البعض عن موقفى من خروف الضحية فاقول أشتريه عادى جداً للمتوحشين القاعدين معاى فى البيت.. لاكين ما عندى معاهو أى شغلة بعد ذبحه والتفاف الصعايدة حوله لإلتهامه.
    بس الشى الحيرنى فى مقال أخونا الظريف دا حكاية أكل يدين النسوان والأثداء ..وحقو نبحث فيها عشان يمكن نغير راينا بعد دا .
    وبالفعل أقف مشدوه أمام أخواننا آكلى المرارة وما حوت من كبدة نية وفشفاش وكرشة وشنو ما بعرفوا داك وما اعتقد أنى أقدِم فى يوم من الأيام على إرتكاب هذا العمل الذى أعتبره إجرامى فى حق النفس البشرية ..
    ولدى طرائف مع اللحوم لا يسع الجال لسردها ونخليها إرسال مباشر إن الله مدّ فى الأيام واتلاقينا ..يا بعاعيت ويا أحفاد البعاعيت ..دا شنو دا ؟

  9. ابكرون كتب:

    سلولو : انت متاكد قال لحم الكف والثدي …؟ كدي راجع
    لاني متاكد شاعر (الهقيبه) قال : لحم كتفو وكفلو… وفي رواية اخي (لاحم) كتفو وكفلو…..يعني (باختسااار) كف دي خت ليها (لو)….
    مافي زوووول منكم من ناااااوا
    البياكلوا الناس بدناااااوه

    • يا أبكرونا أأمل حسابك كلام دى فيه إنتهازية وفلفسة بعدين يجيب ليك مشكلة ……………كدى كلمنا عن القوووووووووووووووووورو والأقاشي بالمناسبة الأقاشي اليومين ديل بقى من ما جاور الكتف والفخذ يعني الحاجات الزمان ديك خلوها وبقى أكل الصفوة في الخرطوم وسندوتشات لبنات الجامعة ….أشهر الأماكن بشارع الأربعين وودأرو(ملوك الأقاشي)

  10. حاج أحمد السلاوى كتب:

    اخونا الكاشف الفكفك أبكرونا ..
    بينى وبينك المسالة عاوزة مراجعة من أول وجديد وإجراء مقابلات مع هؤلاء الكانيبالز ( آكلى لحوم البشر ) للتأكد من الأجزاء الطيبة لتناولها ..وكلامك فيهو نوع الصواب ويمكن تكون غلطة مطبعية من أول ناقل للمقال .. بس دا بيخلينا نشك فى أصلك الكانيبالى ونواياك العدوانية .
    طبعن فى ناس ما حيظهروا تانى وحيطفشوا طفشان جد جد بعد ما عرفوا إنو الحكاية فيها أكل ..

  11. التلب كتب:

    سلام للكل
    تسلم يا حاج السلاوي على الموضوع الجميل و تحية خاصة من أحد أحفاد البعاعيت.
    تعرف يا حاج السلاوي أخوانا المصريين لو عرفوا حكاية البعاعيت دي كان حيقولوا أنو في كم مشجع مصري تم أكلهم من قبل السودانيين في المباراة الفاصلة بين مصر و الجزائر و التي جرت بالخرطوم.
    بالمناسبة كاتب المقال هو د.عادل الصادق المكي في عموده ‎(الباب البجيب الريح) بصحيفة التيار

  12. محنك كتب:

    والله يا حجاج … الكواشف بالذات مسالة دخان النسوان كتحلية للحمة … يعنى لحمة مشوحة او بخارى ى مش عادة بعاتيه

    لانو اظن الاسلام حرم اكل لحم الخنزير ولحم النسان عشان كده بقت عاداتنا دى

    زمن الفراعنة كانو بضبحوا ناس عدييييييييل قرابين ( يعنى بضحو بزول ) عشان معتقداتهم الفاسدة

    بس بوكاسا دا عنه علاقة بالسودان

  13. حاج أحمد السلاوى كتب:

    الأخ التلب ..وكل صفوة الأخيار ..
    المشكلة إنو يزال بعض من أخوتنا شمال الوادى يجهلون الكثير عن جنوب الوادى . . يعمل معى فى الشركة فى جدة أحد أخوننا المصريين جاء أحد أقربائه زيارة له فعرف أننى سودانى بعد أن قمنا بواجب التحية والذى منه .. فأفادنى زميلى بعد ذلك أن قريبه
    ساله : همّ السودانيين بيتكلموا برضو عربى زينا كدا ؟
    أحد السودانيين الدارسين فى بريطانيا تزوج من أحدى حسناوات الخواجات وحضرت معه إلى السودان فتولت قريباته الإهتمام بالخواجية وهاك يا دلكة وبخور وأخيراً أوصلوها إلى حفرة الدخان ( مش حفرة د. شمباتى .. ) وغطوها بالشملة فخافت وذهبت إلى زوجها قائلة لقد طبخونى وضعونى فوق النار وكانوا على وشك أن يلتهمونى لولا إنى هربت منهم ..
    شكراً أخى التلب على المعلومة الهامة بخصوص كاتب المقال د. عادل الصادق المكى ..ريحتنى شديييد .

  14. ياسين شمباتى كتب:

    الوالد السلاوى..صباح الخير..
    غايتو انا برررررررررا,مع انو عندى اصول من دنقلا بالقرب من ناوا !!! اما عن العضعضة ولحوم الاثداء والكفوف وما ذكره ابكرون فبرضو انا بررررا,,وان كانت مستطابة..
    لكن والله كاتب المقال ابدع واجاد وجاب اثباتاتو تب..انت المصحيك لى اسه شنو!!؟؟؟؟الاحتفال ما انتهى بدرى ولا شنو؟؟

  15. مالك معاذ سليمان كتب:

    وتأكيداً لبعتوتيتنا
    كنا وما زلنا نهجج ونحتو حت
    عندما تغني بلو بلو :
    الشحم دا اااااي
    واللحم دا آآآآي
    او :
    الشحم هذا
    واللحم هذا
    كما غنى الخليجيون .

  16. مالك معاذ سليمان كتب:

    وتأكيداً لبعوتيتنا
    كنا وما زلنا نهجج ونحتو حت
    عندما تغني بلو بلو :
    الشحم دا اااااي
    واللحم دا آآآآي
    او :
    الشحم هذا
    واللحم هذا
    كما غنى الخليجيون .

  17. بشار أحمد بشار (ابن برد) كتب:

    غايتو يا أخوان اتضح لي انكم كوووووولكم جحمانين لحمة نية ونجيضة مبوخة ومدخنة وامكن مبخرة برضو. يا ربي ده اكون من شنو؟؟؟ غايتو نحن اسود نحن جنود بتاعين نية بس أم فتفت ، مرارة ، ك .ابل ،ك. ضأن فأعلى وهكذا (دواليبك).

  18. حاج أحمد السلاوى كتب:

    ولدنا شمباتى ..
    النايمين ليها شنو ؟
    الحفلة فى القنصلية خليناها قاجة ورجعنا.. القاعدين ليها شنو ؟ أكتر حاجة كانت العصايات المرفوعة عالية فى الهوا( قربت تضرب مراوح السقف) والهتافات هى لله هى لله لا للسلطة لا للجاه ..وكوووووولو عكس ما يهتفون .والأدهى من كدا وصول إثنين من المداح من القناة إياها ( فتى وفتاة ) . .المادحة صوتها حاد بصورة مؤذية للأذن وسمعت مقدم البرنامج يقول إسمها عبير ..ودى أول مرة تظهر فيها تقف مادحة أو مغنية على مسرح القنصلية ( ما شفتها قبال دا ) عشان كد اخلينا العجاجة قايمة وانسحبنا بهدؤ أثناء رفع العصايات دون أن يرانا أحد .
    – أخونا بشار نا متأكد من بعوتيت وجحمنت أهلنا وكاتب المقال جاب الحقائق مدعمة بالأدلة القاطعة ..وشوف عينى لم يخالجنى أى شك فيما ذكره ..غايتو جنس بعوتية وجنس جحمنة !!
    ولدنا معاذ .. يبد لى إنك من قروب (C) من هجيجك مع هرطقات المأفونة حنان بلبلة ..

  19. الصادق ود البركة كتب:

    السلام عليكم ورحمة الله وبركاته
    شكراً لك يا أبا وضاح عن نقل ماذكرنا بالأصل الذي لاينكر بعاتي إبن بعاتي والحب الجم للحم الذي يتضح في كثرة المضحين يوم عيد الأضحى حتى لو بالدين من الناس المهم أكل اللحم يوم العيد ولا أنسى لو زارك أخ عزيز أو جاء قريب لك من السفر التفكير على طول في ذبح خروف مدغلب إكراماً له وكمان الكرامة لازم فيها دم ودمتم

  20. أها ياعمو الرجال عرفناهم سماسم بحبو اللحم ياتو بالرغم من أنهم يشاركونا فى الشيه الجمر ونشاركهم الحفرة فى الهبهيب ….
    أما عن الجزور دى الزول ده دخلنا فى شكك خاصه نحن فى الفتيحاب اللحمة دى أهم شى حتى التحلية برضوا لحمه ….كان نجيضه ولا نيّه ….

  21. هدهد كتب:

    الكلام ده مقصود بيهو البعاعيت ولا السحاحير وهنالك فرق بين السحّار بتشديد الحاء والساحر، الأول هو الذي يقوم بمثل هذه الأفعال أما الثاني فهو الذي يفعل السحر وليس بالضرورة أن يكون من المفترسات فأغلب الظن أن موطن السحر في الهند وأغلب سكانها نباتيون، ولأنو البعاعيت مشكوك في وجودهم في الحقيقة أما السحاحير فموجودين بين أظهر الناس، وهم الذين يأكلون لحوم الكائنات الحية والميتة ولا يبالون من فعلتهم هذه.

  22. اذكر أن قريبة لنا كانت ضيفة عند ناس في الخرطوم … وبينما هي مستلقية بالليل بعد أن تغدت معهم غدوة كاربة حيث أنهم كانوا ضابحين وكده … المهم الاسرة المضيفة كانت متخمة وليس في بالهم موضوع عشاء في ذلك اليوم … وبينما كانوا يتونسون في الحوش اذا بالضيفة تسمع أصوات ضحك وانبساط صادرة من حوش الجيران المتاخم … فبادرت الضيفة قائلة ( يا ربي الليلة جيرانكم ديل بضحوا ومبسوطين كده مالن يمكن متعيشيين بي لحم ؟؟؟؟ ) هنا انفجر اهل البيت بالضحك مقرونا بالاستغراب من شهوة شخص للحم وهو لم يغيب عنه لساعات .. وحيرتهم لذلك من ربط الانبساط والضحك باكل اللحم
    دي فعلا يا دوب أن فهمتها … دلالة واضحة لما ذكر يالمقال
    مع تحياتي

  23. طارق أب أحمد كتب:

    العام الماضى ذهبت و بعض الزملاء للمجامله فى عقد قران بأبو دليق حاضرة البطانه
    تناولنا وجبة الغذاء و أجزم أنها أكبر صينية غداء رأيتها فى حياتى ,لا يقل قطرها عن المترين و بها عشرات الأصناف و نحن 4 أشخاص فقط لو لو أنك تناولت من كل صحن لقمه لكفتك شهرا و مع أصرار العريس و خلف الطلاق بأكمال الصينيه ثم الحلو
    و عند قيامنا للغسيل فوجئنا بمجموعة طلاقات ما فى زول يقوم و أذا بهم يأتون بالحلو الجد جد صينيتين بهم 2 سرويس كبده نيه و 2 شية جمر

    فيما بعد علمت أن أكرام الضيف ليس بأطعامه فقط بل ما سيأتى ذكره

    عندما علم الناظر بأن الدكتور عبد الله الطيب و رفقته من الأجانب و السودانيين فى طريقهم لابو دليق لزيارتها و التعرف عليها عقد المجلس للتشاور مع رعيته حول كيفية أكرامهم

    وصل الضيوف و أستقبلهم الناظر بعشرات الصوانى الملئى بكبد الضان فقط
    و هنا هتف المرحوم د. عبد الله الطيب ( والله أن هذا لتنوع فى الكرم)

  24. حاج أحمد السلاوى كتب:

    الملاحظ يا خواننا إننا لحد حسه ما سمعنا ولا قرينا رأى أخواتنا وبناتنا الحرائر فى موضوع البعتتة والبعوتية دا مع إنهن طرف فى الموضوع من عدة وجوه … أولن البعاعيت من الرجال بيحبوا ياكلوهم والحاجة التانية أنهن اللاتى يقمن بعمل المرارة النية والكبدة والحاجات الدالة على البعوتية بل بعض منهن يمكن يكونن بعاتيات عديييييل كدا وبياكلن برضو المرارة النية دى وكل الحاجات البياكلوها البعاعيت من آل سعيد ..
    لاكين الشىء اللاحظتو إنو غالبية الشعب السودانى بيحب الحوم بدرجة عالية جداً وعندى إتنين من عُدلاى من آكلى اللحوم بصورة شرهة جداً والغداء او الصينية الما فيها لحمة تبقا صينية بائسة جداً ..بعد مرات اقعد اعاين ليهم وهم يتناولون( غايتو ربنا يديهم الصحة والعافية) اللحمة واقول بينى وبين نفسى حسه منو الصاح فينا ومنو الغلطان الجماعة القاعدين ياكلوا فى الطيبات ديل ولاّ أنا الحارم نفسى منها وما قادر آكلها ..وفى النهاية اقون بلا إجابة مقنعة ..
    غايتو الشىء العارفنو إنو أخواننا العساكر جميعهم وبكل رتبهم العسكرية يحبون تناول اللحوم وما يتبعها من إكسسوارات لزوم القعدات والسمر … البرىء طبعن .
    وزى ما قال أخونا عبدالمنعم فى ناس بيربطوا الإنبساط والسرور باللحمة .
    وغايتو لاكين جنس غايتو !!!

  25. سهيل كتب:

    اولآ يا جدو .. شوف اهلنا اسودانيين ديل الشعب الوحيد في العالم البكد العضم لمن يفتفتو حته حته و يمص مخ العضم و يختو ليك بدره .. يعني العضم دا لو جابوهو لأخصائي عضام ما سوداني حيقول ليك ال طبشير دا جبتو من وين..

    تانيآ : كدي ركزو لينا مع موضوع اكل الكف و الأثداء دي شويه لأنو عندنا حاجات في راسنا دا عايزين نشوف ليها تفسير .. وكده

    شمباتي : ” و إن كانت مستطابه” … فسر افصح ابن ؟؟؟

    جدو : ” بريئه ” .. كده برضو يا عمك ؟؟؟

  26. سهيل كتب:

    جدو : “بعد مرات اقعد اعاين ليهم وهم يتناولون( غايتو ربنا يديهم الصحة والعافية) اللحمة واقول بينى وبين نفسى حسه منو الصاح فينا ومنو الغلطان الجماعة القاعدين ياكلوا فى الطيبات ديل ولاّ أنا الحارم نفسى منها وما قادر آكلها ..وفى النهاية اقون بلا إجابة مقنعة ..”

    – شنو يا عمك .. مش في القرآن قالو ” كلو من طيبات ما رزقناكم” . و في موضع آخر ” ولحم طير مما يشتهون ” و برضو” فكلو منها و اطعموا البائس الفقير ” وبرضو ” … يازول العضه دي اساسيه و ما تنسى ” صيد البر و البحر ” و المحرمات فقط هن ” ما اهل لغير الله به و الموقوذه و المترديه و ما اكل السبع و النطيحه و الدم و لحم الخنزير” ..

    شفت كيف .. اها إنشاء الله وقع ليك
    كسره : شمباتي وود الفتيحاب .. الليله عمكم دا اعزموهو شيه عشان يصول و يجول و يعوض نص عمرو الراح بلا منجريه دا ..

    كسرتين : يعني ياعمك لو ما اكلت لحم حيقولوا عليك ما سحار.. التهمه لابساك لابساك كونك سوداني .. امعط جريت لعابنا و بوظت اعصابنا ..

  27. حاج أحمد السلاوى كتب:

    ولدنا سهيل بن ساهل الساهلى بن الأسهل ..
    أوعك تكون من هؤلاء اللى ذكرتهم فوق ..ازعل منك بعدين !!
    اهلك ديل ما باقى ليهم إلا ياكلو الجلد زااااتو ..ويمكن يكون حصل ونحنا مانا عارفين .
    وعشان اوريك حب أهلنا السوادنة ( حسب تسمية الخليجيين ) للحوم ومشتقاتها بقوا يشبهوا بيها أى حاجة ويضربوا بيها المثل فى الحلاوة والطعامة …
    وحتى الغانى ما قصروا وغيروا فى كلماتها كما فعل احد الظرفاء أو الخبثاء عندما حوّ ر كلمات أغنية ترباس من : سيبنى فى عِز الجمر ..إلى نفسى فى شية جمر ..تخيلوا بس !!!
    وتفسير شنو العاوزه بعد دا ..المسالة ياخ واضحة وما عاوزة ليها درس عصر ..
    – طارق ..الحلو بعد الأكل كبدة نية ..طيب ديل جابو ليكم شنو أكل ؟

    • يا حاج سلام والله حكاية البعتنة دي أعتقد اليومين ديل ما في خاصة الفلس ضارب كل الجيوب تصدق الطماطم اليومين ديل رخيصة الكيلو بجنيه الناس واقعين فطور سلطة خاصة رجال الشرطة بالأسواق ومحلات البوش. اللحمة بنعاين ليها البقر ب10 جنيه للكيلو طبعاً بقولو عجالي لبن أما الضأن ب15 جنيه وفي جماعة بعاعيت الجزار يضع لهم وضع خاص وما عارف بدفعو كم؟ يجي الواحد يخم اللحمة السمحة وإنت بتاع الكيلو لا يعيرك أدنى إهتمام .في جريدة الدار اليوم خبر مفاده أنه تم العثور على حمار مذبوح وفضل الرأس والكوارع يعني ضبحه جزار حريف بإحدى المناطق النائية بالخرطوم وربك يستر

  28. حاج أحمد السلاوى كتب:

    يا سهيل كلامك دا كوووولو عارفنو .. لاكين مافى طريقة ابداً للعضة البتقول عليها دى ..التقول فى زول عامل لى عمل .. !!

  29. سهيل كتب:

    قالو البياكل لحوم كتير بتجيهو نزعة التدبيل .. ورد هذا في كتاب الموحدين

  30. حاج أحمد السلاوى كتب:

    سهيل ..نحنا عرفنا البينا والعلينا ..وتدبيل تانى ما عندنا وما عندنا ليهو قُدرة ..وأصلاً ما بعاعيت …شيل شيلتك إنت البعاتى ولسه طرزان … كسير تلج عدييييييل كدا ..وما تسمع جعجعة ناس الدوحة البهناك ..ركز معاى شوية ..احسن ليك .
    وكتاب الموحدين دا تأليف منو ..؟ واحد من الكواشف ؟

  31. ودالفتيحاب كتب:

    الموحدين لى أبن أبيه لجدو المندكورى ، ده أرجل راجل كان عندو تسعه كواشف ، يحلقنا وينجدنا ، بى بركاتوا وأفعالوا …

  32. علي سنكل كتب:

    حاج السلاوي وسماره الكرام . .
    في مطلع تمانينيات القرن الماضي أرسلت اليونيدو وفداً ثلاثياً لتدريب أهل الأمازون على الاستفادة من مخلفات المسالخ ، أحدهم أختصاصي حفظ فوري للجلود وواحد تاني اختصاصي حفظ طويل الأمد للجلود ( تحنيط و تصنيع ) ، التالت مختص في الاستفادة من المخلفات الأخرى في الأغراض ( صناعة الغراء ، وفوم إطفاء الحريق والجيلاتين . . إلخ)سجلو لينا زياره في الجزيره سموها زياره استطلاعيه ، وقالو حيكملو زيارة بقية أنحاء الأمازون ثم يعودون لبداية دورات التدريب.
    ذهبوا ثم عادو بعد شهر أو نحو ذلك ، ولكنهم عادا إثنين بدلاً عن ثلاث. ولم سألتهم عن الثالث وهو المختص في الاستفادة من المخلفات غير الجلود. كانت الاجابة أنه عاد إلى بلاده حيث لا توجد في الأمازون أي مخلفات في المسالخ غير الجلود. وحتى الجلود هنالك من يأكلها.
    ما بعاعيت؟

  33. طارق أب أحمد كتب:

    ياعمك
    أبصم بالعشره أنك ما حتعرف ايه هو اللأبغازى

    عموما هى حاجه فى الخروف تؤكل زى أبتايزر, مزه .فاتحة شهيه

    سنكلونى
    الأبغازى دا الشى الوحيد البفضل بعد ما تدى الجلد للجزار

  34. علي سنكل كتب:

    أب أحمد :
    هل تعرف أن لحمة ( الأقاشى ) هي في الأصل بقايا اللحم والدهن العالق بالجلد من الداخل ؟ أو ما يسمى بالطبقة التي تربط بين الجلد و جسم الحيوان (CONNECTIVE TISSUE ) ، و حتى دي ما مخلينها البعاعيت.
    الأبغازي ده والله إسم مألوف على سمعي لكن طولنا من العضات التاريخيه ، فنسيتو.

    يا أب أحمد ويا سلولو:
    معانا بعاتي هنا في المدونه دي رجع من أمريكا أيام زمان ، وكان في بعثه دراسيه أيام الأمازون موزون ، وكان أن قام الأمريكان بالواجب كاملاً من مسكن ومأكل ومشرب ، كانت بعثه متكفي ، مما جميعو. وفي نفس الوقت كانت الأمازون الحنون على بنيها آنذاك تحول لهم مرتباتهم الشهريه كاملة غير منقوصه ، و بالدولار.
    المهم تراكمت عند صاحبنا هذا مبالغ من الدولارات بلغت عند عودته إلى الأمازون 42 ألف دولار، وكان أن أنفق صاحبنا كل هذا المبلغ في سوق الناقة على الشواءات ، وكبدة الإبل والضأن.

    سألته ولماذا لم تشتري بذلك المبلغ منزلاً للعائله؟
    أجابني : إنه كان مبلغاً تافهاً.
    من هو؟
    فكي أبكرونا ، هل تأرفونا؟

  35. طارق أب أحمد كتب:

    الأبغازى يا عزيزى هو العصاره المهضومه فى الأمعاء الدقيقه ( المصارين ) و تستخرج من المصران و تقلى بالزيت مع البصل ثم يضاف اليها الملح و الليمون

  36. حاج أحمد السلاوى كتب:

    أبو السناكل وابو احمد …
    إنتو بتقولوا فى شنو ؟ يطرشنا الحاجات البتقولوا فيها دى ماسمعت بيهاوبالطبع مش حأكون تناولتها .غايتو لاكين جنس بعتتة وبعوتية ..إنتو بالله بتاكلوا جنس الحاجات دى ؟ قبلكم وقبالكم ..

    • حاج السلاوي سلام
      في حكمة سودانية من الغرب الحبيب بتقول :

      اللحم شي واللبن نيئ ( طبعاً غاية في الروعة بالنسبة لتخفيض الدهون من اللحم لكن بتاعة اللبن ما فهمتها)
      عموماً (أبو غازيي) دى الإسم الفني ليه في الغرب والدمازين (أبو مورين) والله ما أكلته طوال تواجدي بالنيل الأزرق لمدة 12 عاماً .المسألة حسب مشاهدتي وأخوك جزار حريف العصارة المهضومة من القش وبعد التصليحات في معدة الحيوان يكون شكلها أخضر ذي القرش فهذه يتم إصطيادها بواسطة الجزار الحريف تقلى في النار ويضاف عليها بعض (الأتي) غايتو جنس قرف.
      السودان أكبر دول في أفريقيا منتجة للحوم الحمراء وبناكل حاجات عجيبة. يا ناس الملوحة جاينكم والكول
      تحياتي…

  37. طيب دى شوية ثقافه لحمية : الفقرة ، الزند ، بيت الكلاوى ، الكستليته ، ودى أحىّ منها ،(عزف منفرد )، الفخذه ، وهى للكيشه فى الشراء لحمتها غير طاعمة فى الشواء ، الموزه ، بيانكوا ، فليتوا ، المخروقه ، ودى فى ملاح الباميه المفروكه ياسلام ، بعدين لى هواة المصمصه والقرقشه .هذا فى صميم اللحمة . أما الدواخل نرجع ليها بعد مانسمع رأى الجمهور….

  38. حاج أحمد السلاوى كتب:

    غايتو أنا احلف الليلة وأقول إنو ناس الفتيحاب ديل كوووووولهم بعاعيت وسحاحير كمان مادام ودالفتيحاب بيوصف ليكم جنس الوصف دا فى أنواع اللحوم وتطبيقاتها …
    غايتو أنا شوف عينى ( البياكلن الدود ) شفت أحد الجزارين شال من شوية من بول الخروف وختاهو فى كباية الشاى وهاك يا إستمتاع بطعم الشاى اللذيذ..دا عليكم الله يقولوا عليهو شنو ؟… تقول لى ما بعاعيت !!
    كنا عاوزين أخونا فىالله والوطن ولدنا الدينمو افليقا يقول لينا أنواع اللحوم الموجودة فى الشمالية وطريقة تناولها ..
    طبعن فى حاجة نحنا نسيناها وتذكرتها الليلة وهى إنو اللبنانيين برضو بعاعيت زينا وسحاحير ومتوحشين كمان لأنهم بياكلوا اللحمة النية عديييييل كدا ..وشفتها بعينى …وهى عبارة عن لحمة الفخدة يدقوها بشاكوش ( بالكم لا يروح بعيد ..غير شواكيش ولدنا مشاكل ) لحد ما تتهرى وتبقا ناعمة وياكلوها على كدا ودى من الأكلات المفضلة عندهم غير الكبة النية ..يعنى يا محنك لا تخاف مش نحنا برانا البعاعيت ..ولسه ما عرفنا اخواننا فى مجاهل أفريقيا بيغادى قاعدين ياكلوا شنو ..ربنا يستر .

  39. عمنا الكاشف السلاوي الكبه النيه دي منو؟؟؟
    الناس قالو عندهم البيض شبه المستوي دي ياها المقصوده وللا واحده تانيه؟؟؟؟

  40. مُخير كتب:

    أبو الحجاج سلام
    الحلوين في كل مكان سلامات
    حيرتي يا ابو وضاح في قصة نباتيتك دي، ياخي دكتور عزت بتاع النباتات والبيئة ما نباتي، على قول وجه الحبيب سهيل قصة حرمانك من اللحوم دي شحتفتنا على شبعة، ياخي مافي أحلى من الشية أكان جمر أو صاج، وأما الأقاشي “النازو داشي” ولا شنو يا صديق الفولاني ؟ مافي أروع من طعمو ضان وساخن، ولا شية الشرق السليت ولا إسمو شنو اللحم البنجضو في حجر الظلط المين بيقيسو غير يا أبكرون (ههههههههههه)
    كمان عندكم في جدة المندي والسيخ كباب والبوتي والتكة واللذي منو ؟؟ يا حاج صحح مواقفك وإلا حنشكك في كاشفيتك “القاووت” من أهم مؤهلات الكاشفية وأول أسبابو عشق العكاوي والسنكيت والضنب في شية الصاج البتودي الأردن وبتقفل البلوفة، أسأل بشار العائد غايتو جنس غايتو

  41. حاج أحمد السلاوى كتب:

    أخونا الأمير بن الأمراء مخير ..
    إنت لو عرفت الحاجات التى لا أتعاطاها ولا اقربها حيحتار فيك عدوك .. أولن لحم الضأن اللى بتتكلم عنه دا يمكن لو كتبه لى الطبيب دواء ما أظنى استعمله ..يمكن شوية مفروم من العجل الصغير أها الواحد بيحاول فيه مرات يعوض بيها النقص الغذائى.. ثم البيض ( جنى الجداد كما يسمونه اهلنا فى السودان ) أكاد استفرغ إذا صادفتنى بيضة مكسورة قدامى.. وانا فى دهشة وحيرة ممن يشربونه مع الحليب أو ياكلونه نص إستواء .. الكبدة حتى لو كانت مستوية ( منجضة ) ناهيك عن إنها تكون نية .. وحاجات كتيييرة تانى حاميانى…الشىء الوحيد الذى استطيع استسيغه واتناوله هو السمك.. غالبية أنواع الخضروات واعتقد إنو كافى جداً… فخليها مستورة والحمد لله على كدا ..وهل تصدق إنو بعد دا كووووولو إكتشفت غنو أعانى من الكوليسترول ..يعنى تخيل لو كنت باكل طبيعى زى الناس التانيين كيف كان يكون الوضع الصحى ؟ فسبحان الله على ما قدر لنا ..وما قدر الله فعل .
    الغريبة إنو ما فى حد من الأنجال طلع لأبوه والحمد لله ..بياكلوا اى حاجة وما عندهم قشة مُرة وانا أقول ليهم ( البزورة وامهم ) إنتو بعاعيت ومتوحشين .

    • حاج السلاوي
      أهلنا الهوسا بيكلو السمك في الفطور والغدا والعشا أظنهم إكتشفوا أن اللحم الطري من صيد البحر فيه شفا لبيت الداء أنصحك بالسمك …خاصة الزعانف والرأس دي فيها شوربة كاربة مع إضافة بعض الخضروات مثل الجذر وفول الحاجات ما تكتر فيه يعني شوية كدى…وقليل من الفريك لزوم الرغيف وبالله ورينا النتيجة …كدى تمشي كداري من مايرنو وحتى القضارف ما يصيبك شيئ يعني تزييت للركب والمفاصل وخلاص من آلام الرطوبة .

  42. سهيل كتب:

    جوعتونا يا عمك

  43. مُخير كتب:

    الحبيب أبو وضاح
    الحبان في كل مكان
    سلام واحترام
    يا حاج لا أملك إلا أن أرثى لحالك وأتعاطف معك، والبركة الفي مفروم العجل، زارتنا زميلة صينية دكتورة في علم الحاسوب وكلفت بإكرامها فأخذتها إلى مطعم “القلعة الحمراء” وما أدراك ما القلعة الحمراء حيث المشاوي واللحوم بكل ألوانها وأصنافها، وطبعن الخدمات ذاتية ومفتوحة “سيلف سيرفس” يعني تآكل ما بدالك لمن تقول بس فإذ بالضيف الموقر تكتفي ببعض السلطة وقليل من النودلز (المعكرونة الصينية إن جاز التعبير) وإستغرشت حتى النخاع عندما عرفت إنو في ناس في الدنيا ما ليها حتى في لحم الدجاج ولا بيضو ولا حتى السمك، غايتو لا نملك إلا أن نقول كان الله في عونكم، أما نحن ومن هم على شاكلتنا ما عندنا لحمة مُرة خلي القش يا حاج، حتى الجراد بنقزقزو لب على قول الأخوة في شمال الوادي، كل البط والأرانب الداجنة وربما بعض الدعافيس التي قد لا تخطر لك على بال.

  44. حاج أحمد السلاوى كتب:

    اخونا الأمير مخير ..
    أكان كدا إنتو بعاعيت عديييييل كدا ..والزول الكتب المقال دا ابداً ما خاتى ..وكلامه كوووووله صاح.
    ربنا يديكم الصحة والعافية ويبتعد عنكم الكوليسترول وضربة القلب وخمة النفس وشحتافة الروح ..

    • يا حاج السلاوي … قبل يومين الجرايد جابت صورة حمار مذبوح بخلاء الحاج يوسف اليوم تأكد أن الضحية حمار تم شراءه بواسطة مجموعة أسيويين وتم ذبح الحمار إحتفالاً بعيد الحب قيمة الحمار 350 جنية الدعوة كفت 110 شخص عدد الحمير التي تم بيعها لهم حتى الآن حوالي 100 حمار شفته البعتنة دي وكمان وين في الخرطوم .دي حاجة عادية عندهم يعني بعد يومين كان شفتنا ربينا الحمير صدق زيادة لدخل الأسر. الناس ديل ما شايفين لحمة الضأن والعجالي والسمك.

  45. elturkey كتب:

    الكلام دا حصل متين ووين وكيف …. غايتو فى ناس لمن كبرو ماخلو العض ولا العضة …. كنت متوقع ألقى قرن شطة يقول ليكم الاسبان بمزو بالسمك السردين (النيئ) على ليمون بس عشان اقول ليكم الأتراك عندهم اكرم للضيف خاص باللحمة المفرومة النية يعنى يخلطوها (يعجنوها) مع البرغل والشطة الحارة (جدا) لمن تبقى زى العجين ولاختبار جودتها يضرب بها السقف لو اتلصقت تكون تمام والا فما شغل (موألم) تكرضم ليك قطعة وتلفها بخس وتحلب عليها ليمون وبمزززززززززاج …… وبرضو تقول ليا نحن بعاعيت

  46. حاج أحمد السلاوى كتب:

    أخونا التركى ..نعم فى بعاعيت تانية زى الأتراك ديل واللبنانيين برضو بياكلوا اللحمة النية لاكين ما ظنيتهم بياكلوا الفشفاش وما يتبعه من إكسسوارات المرارة ..أنا بس عاوز أعرف الحاجات دى بتتبلع كيف ؟

  47. محنك كتب:

    والله يا حاج مسالة بتتبلع دى اشرحها ليك

    يعنى يا حاج النمر والاسد بقول بصطادوا كيف دى غريزة قمت لقيت اهلك بياكلوا اللحم وبيحتفلوا باول لحمة اكلتها وشفتهم بيضبحوا الخروف وبياكلوه وممكن يدبغة جلدوا كمان ….. وشفت الجزارة ورسلوك تجيب اللحمة ومرات الكوارع … اكيد الموضوع عادى عندك

    سؤال سغيرونى كده يا حاج : لما كنت صغير ما كان عندك علاقة باللحم ام النباتية دى بعد كبرت ؟ لانه لو من صغير ستكون حديث المنطقة وتعليقات التلاميذ فى الكتاب ( انا عارفك كاشف شديد ) .

    النشوف آخرتها شنو ؟

  48. حاج أحمد السلاوى كتب:

    أخونا محنك..
    بصراحة كدا مسألة النبوتية ( عكس البعوتية أو البعتتة ) دى بدت معاى منذ الصغر ( فى القرن الماضى..نحنا كواشف شديييييد ) ومستمرة معاى لحد اليوم.. وهل تصدق إنى لحد عمر 16 سنة ما كنا اعرف الفرق بين لحم الضأن ولحم البقر ودا ناتج لعدم إهتمامى بالموضوع من اساسه وأذكر فى أيام فترة رئاسة المشير نميرى كانت تحدث أزمات وفجوات غذائية حيوانية …لم أكن اتاثر بها قط وما كانت فارقة معاى وأشوف الجماعة قايمين وقاعدين عاوزين لحمة عاوزين لحمة ..
    وارجع واقول الحمد لله على ذلك ..وإيه يعنى الخضروات دى مالها ..ما فيها أى مشكلة ..وممكن تبقا بعاتى خضروات كمان وتاكلها نية ..وما فيش حد احسن من حد ..
    لاكين إنتو بالجد بعااااااااااااااعيييييييييييييييييييييييييييييييييييييت برخصة .

  49. ياسين شمباتى كتب:

    صديق الفولانى..سلام..
    والله برضنا سمعنا كدة,,وكمان كان فى جيراننا من نفس المنطقة قالوا امهم يوم سلت ضنبها للدكاترة فى المستشفى!!!

    سهيل..سلام..
    العصرة مافى داعى ليها,,والاستطابة معلومة طبعا..

  50. طارق أب أحمد كتب:

    يا حاج
    أبو النسب نيسأل نسيبو بالتلفون : قول للحاجه عايزه لحمة ضان و لا عجالى ؟
    ….
    طيب قول ليها عايزه مفروم؟؟

    xxx يسأل أبو البسب : أقول ليها مفروم ضان و لا عجالى؟؟

    سلاوى : ما رأيكم دام فضلكم

  51. حبيبنا الحاج لو (البعوتية) بقت على أكل لحم البقر والضان بس مامنها خوف الكلام على التانين ….

  52. نادوس كتب:

    العم السلاوي
    سلامات بعد غيابنا
    والله خجلانين منك من كٍِتر ما بنقول ليك جايين وننشغل

  53. أبكرونا سلام
    لقيت ليك حاجة كدى تريح النفيس

    مقطوعات موسيقية للموسيقار برعي محمد دفع الله

    المروج الخضراء
    ———–
    هنادي
    ————
    ورينا رأيك——– فيها رائحة الوطن

  54. حاج السلاوي – عبد المنعم- مشااااااااااااااااااااااااااكل وين؟ كل الجميع المولد مبارك اليومين ديل واقعين حلاوة سمسمية- حمصية-بس بتاعت الفول مافي الموسم الزراعي فاشل شوية وقنطار النقاوة مابجيب حقو الكيلو ب2 جنيه ونص العروس تم ‘ستبدالها بأرنب بلاستيكي من الصين والله الصنيين ديل (يمكن حرشوهم الجماعة )

    الطمطم اليومين ديل رخيصة والله الباعة ينادوك يا عمك يا أستاذ تعال شيل دي بس السمك في الموردة غالي شوية

    يا جماعة كدي نوعو لينا شوية بس من غير الضفة الغربية يا حاج

  55. abushagrod2 كتب:

    حاج السلاوي سلامات والصفوة الأخيار المتداخلين
    من كردفان الأبيض بعاعيت مختلفين ويتعاملون بالمنطق واللوجيك والذي منو
    في حمير سائبة كتيرة في الأبيض لواحد أسمو محمد زين ماشة ساكت بعد ما توفي صاحبها والواحد العندو غرض مشوار ولا حاجة داير يرحلها يمسك واحد يقضيبيهو مشاويرو وبعدين يفكو
    وفي واحد من عايلة البعاعيت بقي يضبح منها ويبيع لغاية ما مسكوامتلبس ودوه للقاضي وبعد الشهود والإثبات والذي منه قال للقاضي ( انا قبال دي موكلهم اربعتاشر حمار ما سون ليهم حاجة )
    يعني يا سيادة القاضي الناس ديل بعاعيت عديل وممكن ياكلو أي شئ ما يسوى ليهم شئ
    أصبحت مثلا والواحد العندو أجندة خفية داير يمررها في أي موضوع السياسية خاصة وفي ناس في الكمكان والحريق بتزق البايز الغطاء جوة الكتشينة فيقولو ليكم أعملوا حسابكم من حمير محمد زين
    أما حكاية فتوي الشيخ الأزهري الداير يحل مسألة خلوة الموظف بالموظفة وقال ترضعه خمسة رضعات مشبعة فيصبح أخاها من الرضاعة فكان في مدرستين فقهيتين
    الأولي قالوا لا تكون رضاعة إلا مباشرة
    ولم يذكروا الخوف من البعاعيت البعضوا وهم كبار
    ومدرسة تانية قالو بخلاف ذلك وقالوا تحلب ليهو كل يوم كباية لمدة خمسة يوم متوالية لشرط التوالي في الرضاعة
    وطبعا الناس مشت مع رأي حمهور الفقهاء
    برفض المسألة من أساسها
    ولكن تعال شوف البعاعيت الفي مكاتبنا في السودان على أي مدرسة بعاتية ينتمون

    عمنا شانوق في شبابو كان في قوة دفاع السودان ومن كرن ودوهم سرت بلبيبيا والكفرة وكان معاهم الكتيبة الهندية الهندوسية وصادف وهم في المعسكر جاهم عيد الأضحي قاموا جابوا الخرفان والهنود يعاينوا ليهم ساكت وقاموا ضبحوا قاموا الهنود فرزوا عيشتهم وعدتهم – قاموا سلخوا وقبال ما يقطعوا الحم طلعوا المرارة والكبدة وقطعوها وبدو يأكلوا .. قاموا الهنود من نص النهار عملوا ديدبان علي نفسهم وبقوا يحرسوا روحهم بالتناوب وقالوا السودانيين ديل صحي ( كانيباليزم ) وأكلة لحوم البشر وبعاعيت كمان ويقوموا بليل ياكلوناّّّّّّ!!!!!!!

  56. الصادق ابراهيم كتب:

    السيد مدير
    جهاز شئوون البعاعيت في الخارج
    طلب دعم لاستخراج بطاقة بعاتي

  57. ابو وضاح كتب:

    لكم التحية بعاعيت بلادي
    ومن الادلة الاخري علي كوننا بعاعيت من دون ادني شك الواحد لمن يحاول يبين غضبو من شئ تلقا عضة يدو وقال ليك حييييييي منك
    تفتكرو في حد بياكل لحو غير البعاتي

  58. ياسين شمباتى كتب:

    ابووضاح..سلام..
    ومرحب بيك كتير,,طبعا اول شئ حسبتك ابووضاح زولنا,,لكن برضك اكيد زولنا..وخليك قريب..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s