أوبريت سودانية

Posted: الجمعة,12 فبراير, 2010 by عزت in اخرى

الشريف زين العابدين الهندي…. ذاك العملاق .. رغم اختلاف البعض معه سياسيا .. إلا انه يجبرك على احترامه وتبجيله .. إن القدرات الشعرية لهذا الرجل تفوق كل خيال .. وتأخذك إلى عالم من الجمال في اللغة و التصوير ..

هاكم (أوبريت سودانية) و هي من أجمل ما كتب.. ففيها لمسات رائعة…. أضاف اليها الفنان عبد الكريم الكابلي بعدا ثالثا عبر اللحن والأداء ..

غايتو نصيحة لمن أرادوا أن يدرسوا جغرافية وتاريخ السودان .. أن يقرؤا (أوبريت سودانية ) ..

قدم الراحل الشريف زين العابدين الأوبريت هكذا:

«هذه أوبريت (سودانية) أنشودة الهجرة والاغتراب… أغنية حب وتصد وعرفان، حداء الذين خرجوا من أوطانهم فالتصقت بأرواحهم ووجدانهم وظلت تتفتّح صوراً يعيشونها بأعماقهم.. ترطّب لهم هجير الغربة وتحدو لهم ركب العودة الحثيث، إنها ليست من تأليف أحد إنما هي مشاعر قوم وموال أمة.. إنها ليست غنا….  إنها عزف هادئ رزين على أوتار الحقيقة… إنها ليست ذكريات إنها هي رفق حي لواقع ملموس معاش مستمر.. إنها ليست رثاء إنما هي ملحمة الحماس اللاهب لانطلاق الشباب المغذى بحكمة الشيوخ.. إنها عروة وثقى تشد أهلها برباط محكم فلا يتحطمون للمحن وإنما يحطمونها ولا يتراجعون للعقبات وإنما يجتازونها ولا يضعفون للصعاب وإنما يطوّعونها إنهم جيل ضرب له موعد ثان مع القدر وتعين له لقاء جديد مع التاريخ والحرية، إنهم جيل البطولات وجيل التضحيات وجيل الفداء.. إنها من تأليفهم جميعاً ومن أدائهم جميعاً في عزف موقّع من سيمفونية الخلود مع اوركسترا الحق والصدق في مهرجان الشروق الجديد بعد ليلهم الطويل الوبيل……

مساهر ليلك الطول نجومه هجوع

وغرقان قمره في جوه السحاب مصروع

بصارع فيك ضلام تمن سنينه سبوع

واراقب فجرك الآذن زمانه سطوع

وشايلك سيف نصر لا يطيش ولاهو بزوغ

ورابطك في حشاي من العطش والجوع

واسقيك مني دم ودموع

واوقد لك جحيم وشموع

واقش منك دموع الضيم على خدودك بتتحدر

واقبل فيك جبين مرفوع

كراية النصر وبيرق عزة رفرف في ركاب فاتحين

واغسل لك تراب الهجرة باليدين

راجيك المجد مدخور لك سنين

ودنين من حبوبتك الوقفت ترد الدين

وتطرد حملة الباشا ومع الغازين

حليله مهيرة كاسرة التوب وحد الزين

**

ومن جدك بكبرفوق جبل سرغام

ودافن ضهره في كرري ومتكنتل ركاب ولجام

وسال في ايده سيف العود ببعج بيهو كبدة وهام

وقبال دمه ما إرشح مع البارود اكون شتت عليك اجسام

أجسام من غزاة ماقدروا اسبوك

ولاكشفولك المقنع ولا في الشينة ختوك

ولا حلولك احداقهم ولاهم قدروا ادنوك

ومما فاتوا لي هسع بدوروا رضاك واطروك

**

وكيف انساك وذكراك لي دما هو عروق

ومما الهجرة حلت ليهو لابسك انتي عمة وطوق

وعايشك جوه وجدانه معايشة الحنين لي الشوق

وممزوجة فيك ممازجة اللسان لي الضوق

**

بشوفك في عيون النيل وفي الاطفال

وفي تاريخك الاخضر على الاجيال

وفي بحر الدمي اللسع بجم سيال

وفي مستقبلا واعد كبار وعيال

بشوفك بشري فيك شقق جبال

ورمال بترسم لي طريق نجم العشا الولوال

وتكشف فيك اسرارا كتار واهوال

والقاك حتى في رمش الغريب الضال

مهوم في اليمن لا الحامدي لا السلال

والاقيك في الخليج مشرورة حالك حال

واثكل فيك يبيعوك بي الدهب والمال

**

فلذاتك مبعثرة في البلاد مأجورة

تبني على الرمال احلامها ثم قصورها

خلوك سايبة في ايد الطغاة ماسورة

شان ما اسلموك الحلبي روب في كورة

**

ابشري نحن لسع في الخلا مرابطين

ونحن عقاب عهود انصار مع مهاجرين

ونحن سهارى ما بنعرف غمضة العين

ونحن فداك نذود عنك بقالنا سنين

حالفين بيك قسم غالي وعزيز ويمين

مانضوق راحة لانشوف زوجة لا والدين

ولا ندفن رؤوسنا على الرمال خايفين

حتى نوقي من اشلانا اعلامك على القصرين

وحتى نسوي لي القصفوك مقبرتين

زي ما صنعنا تاره على الالف الفين

وحتى انكسر القيد وانقسم نصين

واكون عيدنا الكبير في مقرن النيلين

**

ومابننساك عشان اطراك في الازمان

قريب منك قرابة الحدقة لي الانسان

وجايل فيك جولة الدم على الوردان

وقيمتك عنده زي قيمتك معاهو زمان

بعيشك هضة بتشارف تلال قيسان

ويحياك موية في دارفور تبل عشطان

واديم فيك من سنار ترع خزان

وادفق خيره بي عند الرهد بستان

واقول لي الدندر الغاضب كفاك جيشان

واسهر لي وليداتك اعشى الحاري والجيعان

**

منو الزيك ولد واستالد الاولاد

منو الزيك يجيبهم ديمة عشرة انداد

منو الزيك ببز الدنيا موية وزاد

منو الزيك ضروع وزروع ونيل مداد

منو الزيك بطان وغابة دون حداد

منو الزيك سهول وادي وجبال اوتاد

منو الزيك اصل موروث من الاجداد

منو الزيك جراتق دم قدام وجداد

قشى الدمعة يابت الرجال مابحكموك اولاد

**

بت الحر وام الحر واخت الحر

وست الضنبة مردوم بي وراهو بجر

ست الفي الخشش من العصير بنتر

ست الخيل وست الفي القلوب بنقر

وام الحلفو بيك وبي العذاب المر

مابختولك الشينة ومناحة كر

**

اولادك فضلة الموت وبتلجوبو

ودائماً سيرته في لسانهم ويتسلوبو

وزرعك من زمان المهدي طارح دوبو

واحدين بحصدوا وواحدين بكفو دروبو

**

تيلادك مسكر في الخزن محروس

هجليج واندراب ومهوقني وابنوس

ومن صمغ الهشاب سوي السنط ترتوس

ومن شدر التبلدي الموية كوس في كوس

ومن ضل النخيل الشمس دايرة تكوس

ومن حرب المطر فرع الحراز مدروس

ومن شوك السدر جيش السلم هكسوس

ومن زهر التبر البادية باقية عروس

وبي توب البرم سوي الطلح مبلوس

ومن شدر الاراك عطر الرعاش مبثوث

ومن سيف العشر جيش هكس صار مهروس

والدوام واج بقيف الابتراوي خروس

**

فيك الفيل وفيك العنزة والجاموس

وفيك التيتل اللبات قرونه تروس

وفيك الاصلة والدابي اب درق وجروس

وفيك ريل الودي البي ناله راتع اجوس

وفيك صقر الكواهلة العينو كالفانوس

وفيك فهود وفيك نور وفيك طاؤوس

وفي نيلك عشاري اشيل من الجاقوس

**

فيك الازرق البي عرفه هد القيف

وفيك الابيض الماش منطرح مابقيف

وفيك زهد المفازة الوعدو ماخليف

وفيك الاتبراوي اللي الشواطيء مخيف

وفيك الدندر البهجم هجمة السيف

وفيك الباسلام في الفشقة عامل هيف

وفيك سيتيت منبت من قناهو صريف

وفيك القاش بوري الرعدة والصاعقة الداودو كيف

**

وفيك بحر الجبل حاقب عري الرجاف

وفيك بحر الغزال والجور وبحر زراف

وفيك سوباط ملولو زي دبيبا خاف

وفيك بحر العرب مليان نعام وزراف

وفيك بحيرة قال (نو) سيده ما الاسلاف

وفيك خور اب حبل شاقي البلد كشاف

وفيك تمت العظيم شايل الكليت والشاف

وفيك خور الدهب ذو الذكرى والاعراف

وعندك مقرناً حرم سواك ما انشاف

**

وعندك الف خور في الوادي والفين رافد

وحسبان الجزائر والجروف ماوارد

والنبرو الحبيب لي عودو سيدو اقالد

والساقية الحنين توريقها باكي وساهد

والبلدات ونجاضات حليلة فايد

وسمسم وام صقور وسهل قبوب ود زايد

وصقيعة ام بليل براقها قايم وقاعد

والمطر البكب اربع شهور ويدارد

وفيك قنبلية كمبو سته الوارد

وام سنات تغازل دوكة ماشه تحادد

اسفاي بقول لي الفشقة بهمك شارد

كونه الفار بقت ترع وجناين وموارد



Advertisements
تعليقات
  1. الأحباب سلام و جمعتكم مباركة
    و بمناسبة أنو مافي مناسبة نزلت سودانية… فلا توافق هذه الأيام موت الشريف اذ توفى في أكتوبر 2006 …و لا دعاية انتخابية للكابلي…. بس من أمبارح مدوه في دماغي اذ سمعتها قريبا….. و يمكن أن تسمعها أنت أيضا من “يو تيوب” و أكيد حتدودي في دماغك

    شكرا يالشريف “رحمك الله” و شكرا كابلي….

  2. دكتزر عزت جمعه مباركه

    ///واقش منك دموع الضيم على خدودك بتتحدر

    واقبل فيك جبين مرفوع///

    دايماً تدهشنا حد السكات
    هسي نقول شنو ؟؟؟
    غايتو
    شكراً يا دكتور وشكراً يا كابلي وشكراً ياالشريف -رحمك الله –

  3. الغبشة كتب:

    سلامات دكترنا عزت لك الشكر والتحيه لو كتب ديل بس كان كفانانحمدالله سودانين سودانين

    منو الزيك ببز الدنيا موية وزاد

    منو الزيك ضروع وزروع ونيل مداد

    منو الزيك بطان وغابة دون حداد

    منو الزيك سهول وادي وجبال اوتاد

    منو الزيك اصل موروث من الاجداد

  4. محنك كتب:

    رحم الله الشريف القصيدة تعج ومضمخه من عبق السودان …. حقو فى المعاينات يسالوا اولادنا من بعض معانى كلماتها لو كانت فى بلد اخر غير السودان لكتبت بماء الذهب

    وفيك تمت العظيم جاي الكليت والشاف

    وفيك الباسلام فى الفشقة عامل هيف

    لقد حشد مظاهر الطبيعة فى السودان …. لو تم شرحها بالصور لاصبحت اكبر دعاية جاذبة للسياحة ولاختار السائح ما يعجبة وسيجده عندنا
    جبال
    اودية وخيران
    انهار
    صحارى
    غابات زراعة نباتات …. حيوانات مستانسة او وحشية …

    ويكون السؤال الاول ما هو البرم ؟

  5. محنك كتب:

    اكتب البيت الذى يحتوى على نهر الزراف
    اين يقع كمبو ستة
    اذكر اربعة من انواع الاشجار التى توجد فى غابات السودان ؟ وماذا تنتج من ثمار ؟

    دى براها جغرافيا كاملة منهج احسن من الكنتوش والما بعرفو البدوهو عيالنا فى المدرسة

  6. msailalrsed كتب:

    مانـي متابع للسيـاسة والأخبــار
    ولا همـني أوباما ولافوز ماكـــيـن

    ولا همني وش قال حسني وبشار

    وما همني لو زادوا الهند والصين

    وما همني لو سوق الأموال منهار

    وماهمني لو كان خسروا ملايـين

    ماهمني الا راتبي ذا الشهر طــار
    كله صرفته يوم خمسة وعشرين

    بعثرت مدخولي على يمين ويسـار

    وقعدت وعيالـي نصفّـق بـكفــين

    1300 عـلـى طـــول فــ إيــجــــار

    400 مصروف جوال في زين

    1150 في شــركـــة إعـــمــار

    قرض ٍ أخذته وشفطـوه الشياطين

    1100 تجديد وأتعـاب سـمــسار

    عندي استمارة مطوفة حول عامين

    400 فــاتــورة المــاء والأنـوار

    حـتـى ولـو كـنّـا للأنــوار مـطـفـيـن

    أمــا 800 بـســوي بها الــكــار

    سـيارة ٍ جـربـا ثــلاث وثــمـانـيــن

    لا شـمـة الراتـب يجـيها كـما الزار

    تنـفض مكيـنتها كما نـفض بوكليـــن

    وام العيال تـصـيح يا زوجي البار

    هذا الشهر عندي في القصر عرسين

    احتاج انا فستان من عشرة امتـار

    وأفصـله يا فـالح الـراي بـألفــــيـــن

    وأخر مئة بتروح في جيب كومار

    الحارس الهندي عسى فـاله الشـيـن

    ويقـول ما تـكفـيـه للفـلفـل الحــار

    زعلان يبغى فوقها زود خـمســـيــن

    وزادت معانـاتـي مع زود الأسـعار

    أصبح مثل ما قيل طاق ٍ بطاقـيــــن

    أزمة مسـويها مــداهن وتــجـــــار

    وراحوا ضحيتها الضعوف المساكين

    منـحاش من نـار ٍ وطـبيـت في نار

    ويا ويل حـظ اللي وقــع بيـن نـاريـن

    وإن الجمل صابر على الضيم صبّار

    وان طاح تكثر في جنوبه سكاكـين

    أبديت ما في الصدر من هم واسرار

    بأقولها واخلي الخافي يــبـيــــن

    يا شيوخنا لا لا تغضون الأبصار

    صار المواطن يشكي العسر والدين

    وانتم به ادرى ياطويلين الأعمار

    بالله عليكم شوفوا الوضع بالعين

  7. التلب كتب:

    تسلم يا دكتور و رحم الله الفقيد الشريف زين العابدين الهندي
    أدناه رابط الأوبريت بصوت الفنان عبد الكريم الكابلي

  8. روعة ما بعدها روعة
    رحم الله الشريف واطال في عمر كابلي
    ومتعك الله يا دكتور بالصحة والعافية وانت تنشر هذا الابداع الراقي

  9. الغبشة كتب:

    صباحكم خير………………
    محنك: ممكن اجاوب على اول سؤال ونخلى الباقى للتانين وفكره جميله لو قدرنا نوضح كل الحاجات الجواها منها نستفيد ونفيد
    البرم هو زهر شجرة السنط وعلى ما اعتقد زهرة صغيره صفراء ورقيقه يعنى صغيرون كده وممكن دكتور عزت يصحح المعلوه،، وفى المثل بقولوا(( تويس برم كان ضبحه ما بسد قرم))
    والى لقااااااااااااااءءءءءءءءءءء

  10. محنك كتب:

    شكرا ليك يا اختنا الغبشة
    نعم صحيح ولكن يشترك مع السنط فى البرم ايضا
    السيال الطلح السمر السلم واخريات من اشجار شوكية

  11. هدهد كتب:

    صباحكم أبيض ومنور وكلو زينة
    رحم الله الفقيد الشريف الهندي الذي كان وحده قامة وطن وركيزة امة، وحبه للوطن وترابه أنساه كل الجراحات والآلام وسما فوق الأحن والضغائن والصغائر، فهو من يستحق التخليد بتدريس مثل هذه الأنشودة الرائعة لتلاميذ المدارس ليتعلموا ويعرفوا ماذا يعني الوطن وكيف يكون الحب للوطن، مش زي ناس كدا حاقدين وحافرين لأهلهم وبني وطنهم، وهم كل يوم شكل وكل يوم لون وما عرفناهم معانا ولا مع التانين.
    شكرا” لكم علي نشر الأبداع والكلام الطيّب المموسق ودمتم ذخرا” للأمة ودرعا” واقيا” ضد غائلات الزمان والتطرف والأنقياد الأعمي خلف المجهول نحو المجهول.

  12. شكرا يا أحباب
    على المرور و الاضافات الجميلة
    بالله سودان زي دا مش حقو يكون في طليعة الدول …. الله يجازي الكان السبب
    …..
    و أنا ورا كمبو ستة لقيت تمامة للقصيدة
    …………………………….
    في غروبك ، ربوع خصبة وتبرمبهول ..
    وديان من عقيق ، مغسولة مطر وسيول ..
    وكثبان تابة ، بطرزحواشي سهول ..
    تجود بالكركدي ، وصمغ الهشاب والفول ..
    وتدى القنقليس ، طول الشهور والحول ..
    وفيك حفرة نحاس ، وأبوتولو غير مصقول ..
    والعيش ، والسماسم ، والصمغ ، والكول ..
    والتور ، والخروف .. والناقة ، والكاتول .
    علي دينار، كسب ليها الشرف والطول ..
    أبو زكريا أداب العصاة ، زول زول ..
    من وداي مكربت في ربوعها وجول ..
    لي الكفرة وصحاريها العجاف والفول .
    **
    وجبل مرة الشمخ جايب مناخ لبنان ..
    فجر من ينابيعه العجاف بستان ..
    طارح عنب والزيتون مع الرمان ..
    وجاب من يافا تفاحا كبار ومكان .
    **
    من مليط مكربت شاقي دار الريح ..
    نازل بارا وام فتنه بتسر وتريح ..
    وتياسرعلى التياره ، وصوتها بيصيح ..
    ونوخ تقلي ، في السهل الكبير وفسيح .
    **
    ومن تقلي ، امبرم شايل جبال النوبه ..
    عامر قلبه ، بي برشم عريس الحوبه ..
    **

  13. طارق أب أحمد كتب:

    msailalrsed يا خى الأسماء الصعبه دى بتلقوها وين عموما مرحبتين و حبابك و خليك جاهز للأنترفيو بتاع عمك السلاوى

    فلذاتك مبعثرة في البلاد مأجورة

    تبني على الرمال احلامها ثم قصورها

    خلوك سايبة في ايد الطغاة مأسورة

    عجبى

  14. علي سنكل كتب:

    مشكور د. عزت على هذه السياحة الجميلة مع المرحوم الهندي والكابلي.
    أوبريت عباره عن محاضره فيها جغرافية واقتصاد وسياحه وجمال الأمازون. بالله بعد تفاح يافا وطراوة لبنان الناس بتقتل في الطلبه؟ وليه في شنو؟ ذي ما سأل أب أحمد.

  15. حاج أحمد السلاوى كتب:

    فعلاً يا ابوعصمت ..ربنا يجازى الكان سبب ..ويخزيه دنيا وآخرة ..
    – ابو احمد افسم دا جبتو من وين ومكتوب وين ..عشان نلحق نعمل ليهو الإنترفيو قبال الإنتخابات ..ما شايف لى زول عنده مداخلة على الموضوع الجميل دا بالإسم المذكور ..ما تكنوش دقست يا اب احمد ……..وإنت سايق !!
    لاكين عشان ما نضيع الوقت ساكت نعمل الإنترفيو ل هدهد وأول حاجة نرحب بيهو/ بيها لأننا ما قدرنا نستكشف من المداخلة الرصينة الجميلة الكلمات والتعبير إن كان هو أو هى ..نرجو المعذرة ..ولكن الترحيب قائم ونتمنى ليهو/ ليها إقامة طيبة مع إخوانه من الشباب ذكوراً وإناثا وأعمامه الكواشف..وأول أسئلة الإنترفيو واهمها هى الجميع يريدون معرفة الموقع الجغرافى لكى يكون هنالك تواصل أكثر فاكثر ودا خيار متروك ليكم إن كان لكم رغبة فى ذلك لأننا بنموت فى الديمقراطية اياً كان نوعها .. مش داخلين على إنتخابات ؟؟
    وأكرر المداخلة والتعليق ذات مستوى راق….ومموسق ..

  16. مُخير كتب:

    الحبيب أبو عصمت سلام
    الحبان سلامات
    الأوبريت رائع يا دوك ويلمس أي سوداني في حنان حنانو أعجبني جدن عندما شاهدته أول مرة ويزداد الإعجاب مع كل إستماع جديد، المرحوم الهندي سكب فيه خلاصة شاعريتو وحبو للوطن والأستاذ الكابلي كب فيهو عصارة مهاراتو التلحينية فخرج عملاً متكامل الروعة وأذكر في حفل تأبين الهندي الذي تم عرضه في تلفزيون السودان عندما قام الرئيس البشير لإلقاء كلمتو ببساطة السوداني بدلاً عن المؤبن إنصب حديثو على الأوبريت وكيف أنه لا يكف عن سماعه في المنزل والسيارة وأنه لشدة ما عاجبو قال ما معناهو أنو حقو يدرسوا في المدارس، وفي هذا تأكيد لسودانية الرئيس وبساطتو وأتمنى أن يسحب ترشحيه للرئاسة عشان ما يفوزو بالقوة وتقوم باقي الجوانب الإيجابية الفيهو تغيب عن الذاكرة وتحل محلهااللعنات.
    الله يلعن أبو السياسة ويا عزت يوم شكرك إن شاء الله ما يجي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s