لو بتحبيني .. تعالي معاي‏

Posted: الإثنين,15 فبراير, 2010 by mashakel in إجتماعية

قصة مأساوية حكاها لي صديقي عن شابة في مقتبل العمر من أسرة كبيرة و محترمة جدا جدا .. تعرفت على شاب  .. قادها إليه الحب الأعمى مستعينا بقلة خبرتها و صغر سنها .. أحبته و أحبها .. كانا لا يفترقان يوميا .. إذا ارخى الليل ستره استمر الحديث بالموبايل ساعات و ساعات .. تعودت عليه و تعود عليها .. حتى جاءت لحظة مفصلية في شكل العلاقة   .

سألها : لو بتحبيني … تعالي معاي .. و اثبتي لي حبك 

كرر لها هذا السؤال عدة مرات و بطرق مختلفة في كل مرة كان الجواب عسيرا عليها .. حتى في لحظة ضعف منها و منه حدث ما حدث بينهما .. و تحول الحب من حب ب (البلوتوث ) إلى حب ب ( الآي آرر ) .. تكرر هذا الفعل مرة و اثنين و ثلاث .. في كل مرة يسأل نفس السؤال و لكن بطرق مبتكرة .. إنها لذة الشهوة عنده .. عمى الحب عندها .

 في يوم من الأيام ظهر أثر بذرة الحرام عليها .. اتصلت عليه لتخبره بالحمل .. نزل الخبر كالصاعقة عليه  .. مع ان الحمل مسؤلية مشتركة بينهما لكنه لم يستطع تحمل هذه المسؤلية .. اختفى تماما من حياتها في رمشة عين .. أصبح لا يرد على مكالماتها المتكررة ولا رسائلها المستمرة .. في الآخر تحامل على نفسه و رد عليها بأنه سيتزوج منها اذا تخلصت من الجنين .

هذه الشابه اتصلت على صديقي الدكتور تتوسل و ترجو منه ان يساعدها في التخلص من الجنين .. رفض صديقي هذا الطلب و حاول ان يقنعها بان التخلص من الجنين يجعلها تقع في مصيبتين الزنا و القتل .. لكنها أصرت على رأيها .. اتصلت على مساعد تخدير و بإغراء المال تمت العملية و لكن  ……  مازالت هناك بقايا داخل بطنها تسبب لها آلام حادة .. قد تحتاج الى اجراء عملية أخرى داخل مستشفى .. و هذه هي المشكلة الكبرى بالنسبة لها .. لانها تحتاج الى معرفة الأهل و موافقتهم على العملية .. هذه الفتاة الآن على ابواب الإنتحار .. و لا تعرف ماذا تفعل .. اتصالات دائمة لصديقي فقط للبكاء و الندم .. طبعا الشاب المستهتر لم يظهر في الصورة بعد ذلك .

ما حصل معها يجعلنا نتساءل … هل هو غباء أم ضعف من الشابة ؟؟

كيف تترك هذا الشاب يتلاعب بها كل هذه الفترة خاصة بعد السؤال عن الإثبات ؟؟

دائما الضحية في هذه الحالات هم الشابات و ليس الشباب .. بحيث ان آخر مرحلة في هذه التجربة بالنسبة للشاب تنتهي مع إنتهاء مراسم ( الحمام ) .. و لكن الشابات يدخلن في مشاكل لا اول لها و لا آخر بعد ذلك .. نحتاج الى حملة كبيرة لتثقيف الشابات حول هذا الموضوع .. حتى من لا تريد ان تتوقف من ممارسة الجنس على الاقل تتثقف حول ( عمل الساتر ) لكي لا تصبح فريسة للمجتمع بعد ذلك … دعونا نتناقش عن المشاكل أثناء و بعد التجربة .. كيف يمكن ان نحد من هذه الظاهرة الخطيرة التي قد تزلزل أرجاء الأسر

Advertisements
تعليقات
  1. عبدالرحمن أحمد كتب:

    مشاكل
    سلامز
    البي راسو بعرف خلاصو وكفي !!!؟؟؟

  2. الغبشة كتب:

    سلام يامشاكل ودائماً بوستك كلو مشاكل……………………………..
    عبدالرحمن: اناضدك وضد الجمله دى من البوست(( حتى من لا تريد ان تتوقف من ممارسة الجنس على الاقل تتثقف حول ( عمل الساتر ) لكي لا تصبح فريسة للمجتمع بعد ذلك ………………))
    الحل موجود التربية المتمسكه بالتدين والدين هو الاخلاق,,,, ثقافة الحوار بين الوالدين والابناء فى امور تعتبر محرم التحدث فيها من حولنا عالم مليان اثارة الاغانى الفضائيات الملابس فى السوق الشارع النت اصدقاء السؤ وزن شياطين الجن والانس الميول الفطريه الحاجه الى المتعه،،،،،،،،،،، كلها اشياء مترابطه متداخله،، عبدالرحمن مشاكل السؤ هو مايمكن تعلمه باسهل الطرق الشيطان عدو الانسان الى يوم يبعث ولكن الخير صعب تعلمه بالساهل ولازم تتعب فى تعليمه وربنا يسترنا ويستر اعراضنا ،،،،،،،،،،،،،، ولى رجعه تانى اكيد.
    والى لقاااااااااااااااااءءءءءءءءءء

  3. الغبشة كتب:

    لو مشينا لمحور تانى اساس العلاقات الانسانيه الروح فوق المادة سوا كانت قروش ومهما كان نوع العلاقه زمالة صداقه قرابه حب زواج اى نوع من العلاقات الانسانيه،،، او ماتنتقل النظره الى المادية وبالاخص الجسد او ممكن نستخدم مصطلح اخونا عبدالمنعم((ولا عمنا؟؟؟؟)) الدقاقه بنكون انتقلنا لصفة الحيوانيه ومافى حاجه اسمها لوبتحبينى تعالى معاى هنا سعيد حيوانى من الدرجه الاولى وانتهازى ومكار وعواطف ساذجة وحيوانية برضو……………………………………………….
    حب حرفين بس عاوز مجلدات شرح اها ياالكواشف وياالباكين اشرحوا وفسروا……………………

  4. الغبشة كتب:

    تصيح سوا كانت جسد او قروش

  5. طارق أب أحمد كتب:

    مشاكل

    هابى فالنتاينز

    ماما أحسان المرأه الجليله و الأم الرؤوم لأطفال المايقوما التى كرست نفسها لخدمة الأطفال مجهولى الهويه كانت قد قالت أن معظم الأطفال ولدوا بعد تسعه شهور و بضعة أيام من الفالنتاينز و الكريسماس و رأس السنه

  6. عبدالرحمن أحمد كتب:

    الغبشه
    سلامين
    ((عبدالرحمن: اناضدك وضد الجمله دى من البوست))

    المثل -البي راسو بعرف خلاصو- المقصود منه وعلي حسب فهمي له “أن الحلال بين والحرام بين ” والخير وااضح والشر برضو واااضح
    بعدين تعالي هنا أيه علاقة المثل دا بـ(( حتى من لا تريد ان تتوقف من ممارسة الجنس على الاقل تتثقف حول ( عمل الساتر ) لكي لا تصبح فريسة للمجتمع بعد ذلك ………………))
    وانا قلت الكلام دا من جانب أنو ماافي داعي للعلاقات السراب
    يعني يا استاذه
    من البدايه
    العلاقه تمر بالمراحل الاتيه
    خطوبه -في أقل فتره –
    والعرس طوالي
    غير كده
    نبقي في زي دا !!!!!!!!!!

  7. هذا ماجنيناهو من ثقافة الغرب الغريب وبعدنا عن الدين تهب رايح البلاوى ونقعد نلطم يمّه ألحقينى ، أى حب هذا الذى يبدأ بالحرام وهنك الاعراض ، أى مصداقية يريد هذا الحيوان وهو لم يصدق نفسه بأن للناس أعراض وأن له أخوات يتمنا لهم الستر ، أى حب تريد أن تأكد حبها له وهى ترتمى بين أحضانه غير عابئة بخلق ولادين ولاشهامة ، اللحظات سهله وقتها ولكن الجرم والعزاب للكل أسرة ومجتمع يستمر الى يوم الدين ، وهذا النبت يكبر وكله حقد على المجتمع وسوف يعوس فى الارض فسادا ، فهل يجرؤ من يرده عن ذلك .
    اللهم جنبنا ومجتمعاتنا اللاعبين بالقيم والشرف .

  8. بشار أحمد بشار (ابن برد) كتب:

    مشاكل سلمون عليكم: هي البت الغبيانة دي كانت فاكرة أنو نتيجة الزنا حتكون شجرة ليمون ولا شجرة جوافة ؟؟ شيء طبيعي يكون ابن سفاح لعلاقة غير مشروعة وأهلها لغاية ده كلو حصل كانوا وين؟؟ مخزنين قات ولا شنو؟؟

  9. زووووووول كتب:

    سلللللاااامز وسلااااامز
    قصه ربما تكون متكرره مع اختلاف الشخصيات وفى كل قرية ومدينة نسمع قصصا يندى لها الجبين وهذا ناتج من ضعف الوازع الدينى والتربيه السليمه كما تفضلت الغبشه كما انه ناتج من بعض عاداتنا السيئه كالدخول على النساء وصديق الاسره وسلم على المدام . يا اخينا انت مالك ومال الياى لا يسلم على المدام ولا تسلم عليهو وصديق الاسره حدو الديوان وبس .
    كما انه ناتج من تفسخ بناتنا وخروجهن سافرات متبرجات والمصيبة اننا كلنا نشجب وندين ونستنكر التبرج بينما نسمح لبناتنا بلباس ما لذ وطاب لهن .ولمعرفة صدق حديثى انظر لبناتنا فى الاسواق ثم اتبع من شئت منهن ستجد عنتره فى بيته وقد تدلى شارباه على فمه وستجده منكر ايما انكار للبس الما محتشم .لا بالله .
    كسره :
    صدق الحق اذ يقول :يا ايها النبى قل لازواجك وبناتك ونساء المؤمنين يدنين عليهن من جلابيبهن ذلك ادنى ان يعرفن فلا يؤذين ))
    وفى احديث الحجاب عندما سألت احداهن رسول الله صلى الله عليه وسلم ع نحد حجاب المرأه قال يرخينه شبرا (اسفل القدم فتنبه) فقالت العفيفه : اذا تنكشف اقدامهن يا رسول الله .
    فقال لها اذا يرخينه ذراعا ولا يزدن .(من من بناتنا تطبق هذا الامر ومن من رجالنا من يستطيع الزام زوجته وبناته بهذا الامر .
    جاااااااييييييكم

  10. مشاكل كتب:

    سلامز

    فعلا التربية ليها أثر كبير على مفاهيم و تصرفات الشباب .. لكن التربية في البيوت فقط بقت ما كفاية لانو الشاب او الشاب بعد مرحلة المراهقة بكون متأثر اكتر بي البيئة المحيطة بيهو خارج نطاق الاسرة .. لكن مع غرس قيم التدين في الطفل يكون التأثير مختلف مع اختلاف الجرعات الاخدها و هو صغير

    و الكلام دا المفروض البنات يفهموهو بصورة كبيرة لانهم هم البيدخلو في المشاكل اكتر من الاولاد الف مرة .

    ففي حالة الشابة ديت .. اكيد هي لو ما ادت الولد علامات انها ممكن تتهاون في التعامل معاه و تتمادى معاه ما كان حاول اصلا معاها علشان يصل لي هدفو .. برضو هو احتمال يكون وقع فريسة لاثارة غرائزو منها .. سواء طريقة اللبس او الكلام او اي حاجة تانية

  11. مشاكل كتب:

    معظم الاهل الزمن ده بفتكروا انو التربية الكويسة انو الاولاد ياكلو احسن اكل
    ويتعلموا احسن تعليم فى احسن مدارس وجامعات
    ويلبسوا نضيف وانيق ومحترم
    لكن مافى زول بهتم انو يغرس قيم الدين
    ويتابع الاولاد والبنات خاصة فى مرحلة المراهقة
    وييعرف اصحابهم ويحثهم على الصلاة والقيم السليمة ..

  12. مشاكل كتب:

    لو الولد او البت نشأ فى بيئة صالحه والناس بذلت مجهود فى انو يعلموه التربية السليمة مابنحرف , ممكن فى مرحلة من المراحل يطش او يتجاوز شوية , ودى فى الغالب بتكون طبيعه مرحلة , لكنوا برجع فى النهاية لانو اصلو طيب ومتربى تربية سليمة , والولالدين لو حريصين على التربية حتى النت والتلفزيون ممكن يتحكموا فيهم , ويقفلو قنوات معينه فى التلفزيون ويسمحوا بقنوات معينه , ويعملو رقابه قدر الامكان على النت

    وحتى لو الولد او البت عمل حاجه كعبه او دخل موقع ماكويس بكون عارف انو ده غلط واتو هو بعمل فى حاجه غلط ودى فى حد زاته مرحلة كويسة بتضمن ليك انو الولد حيرجع ويندم , لكن للاسف فى ناس فاتحين كل الابواب لاولادهم يعملو الدايرنو ويطلعو متى مادايرين ويرجعوا متى ماهم دايرين ,

    المشكلة بتكون انو زى ديل قاموا على انو مافى حدود وانهم ممكن يعملو اى حاجه من غير مازول يقول ليهم حاجه , ودايما لو سالتى بت او وولد من ديل كيف تحضن ليك بت فى اوزون ولا كيف تخلى الولد يبوسك وفى مكان عام كمان بردو عليك بكل برود : وفيها شنو يعنى ؟؟؟…

    وفلعلا سؤال منطقى , فيها شنو ؟؟ لانو هم لمن قاموا مافى زول قاليهم انو فيها حاجه , ديل ناس استقوا القيم بتاعتهم من ميلودى فبحاولو يتحدوا الملل م اكتر , وقنوات زوتانا ورقيص تانا ودعارة تانا المنتشرة دى

    الولد او البت وهو صغير بكون ورقه بيضا , تملاهو بالقيم المناسبة انته , او اذا خليتو من غير قيم حيكتسب قيمو الخاصة بتاعت فيها شنو ..؟؟ ويعنى شنو ؟؟؟ من القنوات الفضائية ومن قروبات سكسيست سودانيز فى الفيس بوك

    صاحبي قال لي : عندى شافع قريبى قبل كده سالتو عن فنانو المفضل , قام قال لى فنانى المفضل وقدوتى هو ( امنيم ) وبعداك طوالى دنقر لى فى الارض على طريقة ( الفقس ) وهو بقول

    ” shake it shake it baby “

  13. حاج أحمد السلاوى كتب:

    ولدنا مشاكل ..سلام
    كلامك كوووولو صاح وبيقودنا إلى خطورة القنوات الفضائيىة اللى ذكرتها فى مداخلتك أعلاه ..وفى الحقيقة كنت دائماً اقول إنو هذه الفضائيات المفتوحة سداح مداح فيها خطورة على الأجيال القادمة .. فمن شب على شىء شاب عليه .. فهاهم الإفرنج يعتبرون الإباحية الجنسية شىء عادى وما فيها حاجة لأنه نشأ فى هذه البيئة منذ طفولته ويرى ويسمع كل شىء فكيف يعتبر ذلك الشىء غير صحيح عندما يكبر ويستقل بذاته بعد الثامنة عشر من عمره وهى سن الرشد فى قانونهم والإستقلالية حتى عن سلطة أقرب الأقربين إليهم ..ولقد شاهدنا اشياء تنافى قيمنا ومثلنا وتعاليم ديننا القيم ولكن خوفنا الآن هو أن تنتقل إلينا هذه الممارسات ( إن لم تكن قد إنتقلت فعلاً ) وتصير شىء عادى بالنسبة للأجيال القادمة ..وما سؤال يعنى فيها شنو إلا البداية لما سيأتى ..
    لذا فإن مسئولية أولياء الأمور صارت كبيرة فى هذا الزمن وتحتاج إلى تفعيل ومجهود للمحافظة على قيمنا الدينية فى أبنائنا وبناتنا مقارنة بما يرونه فى الفضائيات والشبكة العنكبوتية .
    وربنا يستر لقدام ولما ستأتى به الأيام القادمات .

  14. العزيز مشاكل والاحبة الكرام …. أعتقد اننا فى زمن يتحتم علينا ان نكون واقعين وعملين مع ابنائنا أكثر من زمن ( ان كبر ولدك خاويهو) الليلة الولد بكون عنده أخوان كفاية مابكون محتاج ليك كأخ اكثر من أن تكون له أبا وأعتقد اننا لو ثقفنا الاتنين اولادنا وبناتا وكنا معاهم صريحين فى كل شئ حتى علاقاتهم الشخصية بنقلل من المشاكل العاطفية والعلاقات الحيوانية (طالما أن القضاء عليها غير واقعى) … نعم التربية ليها أثر كبير جدا وكذلك الالتزام بتعاليم ديننا لحنيف .. بس طالما يرعى الغزال وسط الغابة فهناك أسود ونمور وبنى آوى … مادام مابنقدر نمنع اولادنا من الاطلاع ورؤية الافكار الغريبة فمن باب اولى أن نناقشها معهم ونتيح لهم فرصة اطلاعنا على رأيهم وحتى دعوة أصدقائهم للتعرف عليهم وبنظرة الأب و/أو الأم يمكن تقديم النصح وتوجيه مسار تلك العلاقات … كنت أتمنى أن تفصح البنت عن علاقتها لأمها على الأقل قبل الولوج فيما آلت اليه وبما ان مشكلتها قائمة فلا أعتقد أن وقت الانتحار متوفر أكثر من مصارحة أسرتها فقط عليها أن تتحين الفرصة السانحة بعد تأسيس البنية التحتية لذلك ..

  15. ياسين شمباتى كتب:

    الحبيب مشاكل..سلام..
    طرحت وجهة نظرك وجاءت المداخلات فاكملت اللوحة,,لكن البوست دا كان ممكن يقودنا للبوست اياه لطيب الذكر المختفى (خالد مدنى) عن الايدز ايام القمردينة,,وفى تشابه حول النهايات المتوقعة للمارسات الخاطئة للجنس,,وممكن يعمل شمطة اذا اتكلمنا عن الواقى والساتر..عشان كدة انا بلم ضنبى واقيف بعيييييد..
    لكن بالجد البت دايما غبيانة وضعيفة,,والزنا جريمة مركبة كما علمونا فى المرحلة الثانوية…

  16. dinasorkha كتب:

    لابد من التوعية الجنسية
    والساتر احسن من الحمل طالما ان احل في استخدام الموانع لمنع مصيبة اكبر

  17. طارق أب أحمد كتب:

    شمباتى و ديناصورخا ((بس لو أعرف مكان الأسماء الصعبه كنت أقفلو ليكم))

    أهلك الشوايقه عندهم مثال لطيف لما أسلفت

    أحد المزارعين الكبار وكان قد قطع تعليمه فى كلية غردون أرسل أبنته الوحيده للدراسه فى أحدى جامعات الخرطوم الزمن داك مما أثار حفيظة أهل القريه وتجادلوا معه فى أن البنت مكانها البيت فرد عليهم بأن أنا وديتا تتعلم عشان تعرف تستعمل المانع و ما تجيب لى كفوه زى بناتكم ديل

  18. حاج أحمد السلاوى كتب:

    أخونا اب احمد ..و د ي ن ا ص و ر خ ا ( كدا صاح ؟ )
    الإسم الفوق دا غلبنى تب اقراهو .. ناهيك عن معرفة المعنى ..
    كنا عاوزين نرحب بصاحب / صاحبة الإسم لاكين ما عرفنا نقول شنو.. عشان نعتذر ليهو / ليها لحد ما نعرف القصة شنو ..ممكن يا سيد الإسم ( دى بتمشى مع الجنسين ) تعرفنا بنفسك ؟..دا طبعن إذا ما كان عندك مانع ..وإنا لمنتظرون .

  19. ياسين شمباتى كتب:

    اب احمد..سلام..
    والله عمل خير!! لكن بالجد مادام انو فى ناس اغبياء وما خافوا من ربنا احسن نعمل الساتر عشان الناتج والجريمة المركبة..لكن فى ناس امكن يفهموا انى بدعو للاباحية الجنسية..وانا لا اقر باى حال الزنا او الممارسات الخاطئة للجنس,,لكن اكيد يوجد منا الخطاءون ونسال الله ان يجعلهم من التوابين…

  20. semsema كتب:

    السلام عليكم
    اهلي واسرتي شكرا للسؤال انا وصلت منذ اسوعين وشوية لكن البرد الشديد في البلد ديك والحر الشديد عندنا يعني بارد وحار عمل شوية نزلة كدا والحمد لله الان في احسن حال .
    افليقا عملوا خارج المكتب طوال اليوم لذا لايستطيع المدلخلة

  21. semsema كتب:

    افليقا مع الشغل خارج المكتب طوال اليوم محروم من المداخلات البسيطة فما بالكم بكتابة مواضيعه الشيقة والله كثيرا نفتقد نكهته التي تضفي جو من المرح بس ناس الشغل يدوهو فرقه وبكون معاكم.
    ومر تانية شكراً للسؤال وتسلموا.

  22. semsema كتب:

    عفواً مشاكل المداخلة تبع الندوة
    وموضوعك يحمل نفس المأساة وكنت اقرأ فيه وكلي حسرة وارسلت التعليق السابق مع الاعتذار لاخوانا واسعدنا سؤالكم عنا

  23. bahooli كتب:

    اشاعة الفاحشة هو ابتلاء من الله لهذه الأمة ،،،وعلي من يخاف الله ان يجتاز الامتحان

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s