الليله جينا وكيا للمابينا ..

Posted: الإثنين,22 فبراير, 2010 by aflaiga in إجتماعية

فى البداية بسم الله الرحمن الرحيم – عشان ما تقولو بوست افليقا خلا من البسمله وتعملو لينا فيها شعارات وناس يرفعو لافته يكتبو فيها غاب دهرا ونطق كفرا !!!!

بعد داك والله مشتاقييييييييييييييييييييييييين لمن بى غادى واوع زول يقول لى غادى دى جنب شنو لانو حاقول ليهو غادى دى اغدد من بى غادى مهما طال بعادى انا ليك ما بعادى !!!

وبعد داك كدى انوريكم سبب غيبتنا عنكم كل هذه المده الطويله التى لم نراكم فيها ولم يكن ينقصنا سوى عدم رؤياكم الغاليه واما اذا دار محور عجلة سؤالكم التى نصف قطرها شوقكم لنا فنحن والله مسكنا منكم الشديد القوى واع برضو زول يقول لى الشديد القوى ده شنو ؟؟ لانو حاقول ليهو ده اشدد من الشده واقوى من القوه الساكنه فى قلبى جوه يا حبايبى وين !!!!

طبعا فى ناس حتقول عودتنا مرتبطة بعودة سمسمه من الصين بعد اداء شعائر الامر النبوى بطلب العلم ولو فى الصين لانو زى ما قلت ليكم نحنا فى الحته دى انصار سنه جدا !!! ولهؤلاء اقول انو سمسمه جات ليها شهر وشوقنا بحر ودموعنا مطر !! يعنى المووع ليس له اى علاقه بعودة سمسية ولا فولية ولا حلاوه شعيرية !!!

وطبعا فى ناس حتقول افليقا جا مع الانتخابات بعد ضمن فوز الوطنى فى الانتخابات دون تزوير او اى حركات !!! ولهؤلاء اقول ان الوطنى لا يحتاج ولله الحمد والمنه لافليقا او تزوير لانه مرتبط بقلوب الشعب السودانى بالضبط كده زى ارتباط شمباتى بالهندسة الميكانيكية !!! وارتباط سهيل بجراحة الاوعية الدموية !!! يعنى القصه ما انتخابات ولا وطنيات !!!

وطبعا فى ناس حتقول افليقا كان مدور الحمله بتاعة عرمان ولمن ضمن انو عرمان حيفوز وده حالتو بدون بسملة !! جا راجع !!! ولهؤلاء اقول انتو مجانين عاوزين عرمان يبدا بالبسمله طيب ما حيختفى شيطان ابداعو !!!!

وفى الختام يا جماعة الخير يا حلوين يا الزيكم وين ومافى منكم اتنين الليله وين !! حنفضل متحابين زى العسل والتين الليله وين !!! ومن هنا ارسل تحياتى لكل من سال عنى خلال فترة غيابى ولاسرة مستشفى الملكة نور بالاردن واسرة المستشفى الملكى البريطانى وزملائى باسكندنافيا وسويسرا وماليزيا وكل من ابرق مطمئنا على هاتفى الثريا او زارنا بالمنشية ( لا مؤاخذه ) او تكبد مشاق الطله فى فيلتنا المطله على ماسى خلق الله !!!

والشكر كل الشكر لابونا جبرا وعمنا سنكل وعمنا ابكرون وعمنا السلاوى وخالنا طارق وخالنا عزت وخالنا مهدى واخونا البشاوى وولدنا سهيل وستريكر والخاله سماسم والاخت نونو التهنئه بالزواج السعيد فى البلد البعيد ولجميع الاخوه الاشاوس الذين فاتنا ذكرهم وكل الجدد ممن اثرو المدونه فى غيابنا ….

ونعدكم ان نعود كلما تيسرت لنا الكتابه ام دق ..

ابنكم وحبيبكم افليقا

الخرطوم 22 – فبراير – 2010 م

Advertisements
تعليقات
  1. مشاكل كتب:

    سلاااااااااااامز

    الشوق بحر و الدموع مطر

  2. ابكرون كتب:

    سلام يا فلقه بس ده البتعرف ليه تجي تفلقنا وتخلي دمنا شاري وتجري
    في قصه عن ال….المستوعبين اوعه تكون مشيت سجلته اسمك……تحياتنا لسمسمة

  3. حاج أحمد السلاوى كتب:

    أخونا وولدنا الدينمو ..أبو الأفاليق ..
    ما بنقدر نقول حاجة غير .. حمدن لله على السلامة ..
    وإن شاء الله .. ما آخر طلة ..
    وتحياتنا لكل الأسرة العائدة بدون حصين والكانت موجودة .

  4. aflaiga كتب:

    مشاكل : وطول البعاد قطر والاعتياد خطر وعدم الجيه بطر شفت كيف يا بطل ؟؟
    ابكرون : اها نسيت اقول انو ف ناس حتقول افليقا استوعبوهو مع ال …المستوعبين – ولهؤلاء نقول برغم ان المؤتمر الوطنى وعاء جامع يستوعب الكل الا اننا ما بنحب الوعاءات ومن انصار انو كل زول ياكل فى صحنو وما بحب الفته وبحب السندوتشات على قول الفنانه عوضية عزاب ( انا بحب السندوتشات يا احلى باكات ) !!!
    السلاوى : سعال فقهى : هل عدم احضار الحصين من الصين يدخل فى عصيان القادمين للقاعدين وما هى العقوبة فى قانون الحياه البرية المعدل للعام 2010 م مقروءا مع الماده 11 الرفق بالحصين والما جابوها ؟؟؟
    الحبايب الحلوين : والله مشتاقيييييييييييييييييييييييييييييييييييييين جد جد ..
    بالمناسبة ناس سودانيز اون لاين بيحركو فى فعالية لتكريم جبرا نصير الموجوعين اها انتو وييييييييييييييييييييييييييييييييييييييييين ؟؟؟؟ ولا ماكم موجوعين ؟؟

  5. زووووووول كتب:

    مرحبتين حباب افليقا
    عودا حميدا وبوستا مقرؤا وتعليقات جميله . هنيئا لعين رأت كتاباتكم . واستمتعت بتحليلاتكم

  6. سهيل كتب:

    حمدن لله على السلامه يا فرده .. دخلت بخوجلي و مرقت بحمد .. بطل حركات و ما تبقى زي ود المويه .. كنت غاطس وين و بتسوي في شنو ؟؟ .. ما شاء الله شايفك مدشن حمله ” وطنيه” كااااربه جهجهت بيها ناس ” الشعبي و الشعبيه” ذاتو.. في زول عندو راي ؟؟

  7. حاج أحمد السلاوى كتب:

    أبو الأفاليق ..سلام ..
    نحنا موجوعين بالحيل ..واجعنا الشعبى … الودوهو بعيييد فى آخر الدنيا ..
    وواجعنا المؤتمر .. السووهو الأولاد فى الحلة الجديدة ..وما عزمونا نحضره .
    وواجعانا الحركة …العملتها البت قدام الرجال فى الشارع ..
    هو الما بيوجع شنو ؟.

  8. أفليقا سلام
    و عودا حميدا مستطاب
    و سلام يا أحباب
    كلو عرفناهو يا السلاوي الا الحركة العملتا البت دي ما شفناها

    نقوم نكلم ليها بو فيصل يعمل معاها الواجب

  9. سهيل كتب:

    شنو ياعمك ” جدو” .. خليت لي ناس مشاكل و عبدوش الحنتوش شنو ؟؟ غايتو جنس غايتو ..

    يا اخواننا : أفليقا بعد كان رافع القزاز و مظللو بقى قزاز ذاتو ما عندو .. زمان كان تضرب ليهو ما تلم فيهو .. هسي تمسكل ليهو ساي بالغلط يصبك ساعه .. حصلو المولد

  10. سهيل كتب:

    د.عزت ماشي بعيد ليه ؟؟ بو فيصل بتاع مين .. نحن في الخدمه و رقبتنا سداده .. أفوء

  11. سهيل كتب:

    قلتا لي يا جدو البت عملت شنو ؟؟ عشان الجزاء يكون من جنس العمل .. ولا كيف

    – شفت يا افليقا .. اها اسه تورت نفس اعمامك ديل … و في رواية نفسنا نحن ذاتو

  12. aflaiga كتب:

    السلاوى : النبى فوقك البت عملت شنو وعملو ليها شنو والناقص شنو عشان نتمو !!
    عزت بقاريتش الدكتور الرائع من ضمن ما شغلنى انشغالى بتشجير مكان السكن ومدعو للافتتاح عشان نقول شرفنا ابو الخدار ذاتو .
    سهيل : اسى لو نص الجده بتاع السوا البرانى عملتو جوانى ما كان زغت من صالح امبارح !!!
    النبى البنية سوت شنو لانو الايام دى ايام حركات ساى واى زول عندو حركة ما سواها ليهو عشرين سنه ناوى يسويها اليوم والايام التالية وبكره يا ما حنشوف حركات

  13. بشار أحمد بشار (ابن برد ) كتب:

    ولدنا أفليقا (حمدللالك بالسلامي) ,الخوف يا غالي تكون قد فرضت عليك اقامة جبرية قي التشارز (الحراسة) بتاعت سمسمه الى أن ثبتت براءتك من التهم التي وجهت اليك ولا أنا (خلتان)؟؟؟

  14. حاج أحمد السلاوى كتب:

    كل صفوة الأخيار ..
    طبعن مش حأقول ليكم عن الحركة المزعومة وخليكم معلقين كدا وكاتلكم الشمار ( الأخدر والنتشف ) لحد ما ريقكم ينشف بعد داك نقول ليكم الحاصل شنو ..
    سهيل ..خدمة شنو الداير تقوم بيها ..؟ كان غيرك اشطر ..ناس عبدوش ومشاكل بقوا حناتيش ؟ يطرشنا ويعمينا ..سمعتو ولاّ جابوهو ليك ..ولاّ …………؟ خلى ابكرونا يتم ليك الباقى .
    – أبو الأفاليق .. برضك إنضميت للمجموعة وعاوز تتم الباقى ..ياخ خد نفسك شوية .. إنت يادوبك جايى من سفر بعيد …عاوز تعرف الحركة شنو ..؟ كل حركة معاها بركة ..وكل بركة معاها حركة ..
    الشمار دا مالو بقا كتييييير كدا الليلة ؟
    وخلونا النشوف آخرت الحركة دى شنو !!!

  15. علي سنكل كتب:

    أبو الأفالق نورت بيتك ومطرحك . . .
    مرحبتين حبابك واليوم السعيد الليله جابك
    طلمت البلد في أيام غيابك
    سألت الله الكريم يحفظ شبابك
    يا وطني وشعبي وعرمان وشعبيه ، المهم تاني ما تعمل كده ، يعني عشان الواحد عواطفو سافرت يقوم يعمل عقوبات جماعيه؟ والله ظلم.

  16. الغبشة كتب:

    عليكم الله هسى المدونه طعمها مابقى رهييييييييييييييييييب
    اصلو صاحب البهارات من زمان قلنا افليقيا ولا شنو ياناس؟؟؟
    والله بالغتوا معانا هسى نسلم على الزول ده كيفين فرقه ما خليتوها لينا لكن يستاهل اكتر من كده
    تسلم يارائع وكتابتك اليوم تعنى انك بخير وربنا يديم محبة خلقه فيك ياولدنا ويكترها ويكبرها
    والى لقااااااءءءءءءء

  17. أفليقا
    بعد الغياب
    أفليقا آآآآآآآآآآآآآآآآآب
    يا مرحباب \صدي\ باب باب باب باب
    (باب السنط وللا شنو)
    حمدن علي السلامه أبو الأفاليق

  18. حاج السلاوي
    أنا عارف الحركه
    لاكين خلي الشمار يحرقم

  19. حاج أحمد السلاوى كتب:

    ولدنا عبد الرحمن ..
    أكان بقيت عارف .. قرِط على كدا ..وقابلنى فى الضفة الغربية .. الإيميل .

  20. التلب كتب:

    البلد نورت يا ابو الافاليق و الله مشتاقين

  21. طارق أب أحمد كتب:

    أفلى
    دا سودانى ولا الوطنى ولا سمسمه ولا الصين ولا حمودى و سرويه ولا شنو ؟؟
    نتلاقى اليله فى معرض الزهور عشان يكون سلامنا ليك وسط الزهور متصور

  22. ياسين شمباتى كتب:

    الحبيب افليقا..سلام..
    وحمدالله على السلامة..ومكانك محفوووووووظ وما ببوظ!! بس انت كتر من المواد الحافظة!!

    الوالد السلاوى وعبدالرحمن..
    كدى ما تدخلونى معاكم فى الايميل دا عشان اغتس حجركم!!

  23. حاج أحمد السلاوى كتب:

    د. شمباتى ..
    أنا عاوز أعرف بس .. إنت المرقك الليلة من الحفرة شنو ..شردت ؟ دى ما مواعيدك الحافظنها نحنا ؟.
    وإيميل الضفة الغربية دا .. يِسِمك !!!

  24. الغبشة كتب:

    عمو السلاوى: تصدق لما شفت اسم يايسين فى اخر التعليقات الا سالت ياجماعه اليوم شنو؟؟؟؟؟؟؟؟؟؟؟؟؟؟؟؟؟؟
    اعترف يا شمباتى فى شنو؟؟؟؟؟؟ قاعد وين؟؟؟؟؟

  25. حاج السلاوي
    د.شمباتي مُصِر لازم يعرف الحركه ولو عن طريق الضفه الغربيه …..نحن دايرين نعرف مين مهد ليك خارطة الطريق للخروج من الحفره المعنيه بعد داك ممكن نبدأ مفاوضات الجوله الأولي

  26. ياسين شمباتى كتب:

    الوالد السلاوى..
    يا جماعة عندى شغل!! يعنى اسكن قبلى ولا شنو؟؟لازم حبة ترفيه وكدة,ولا خايفين على اموت من ازدياد الرفاهية!!؟؟ واكيييد الايميل ح ترسلو لى,,يرضيك كدة؟؟

    الغبشة…
    يا جماعة عندى شغووووووووول!! بدل ما تقولوا حمدالله على السلامة تقطمونى كدة؟؟

    عبدوز..
    ما كان العشم,,لكن بلاقيك فى الزقاق دااااك,,طالعنى سريع..

  27. طارق أب أحمد كتب:

    وللاى فعلن
    من علامات الساعه تمانيه و نص
    تلقا شمباتى معلق تعرف النهارده الأربع
    تصل الشغل تلقا القمصان بره تعرف النهارده الخميس
    الدنيا صانه تعرف النهارده الجمعه تشغل اللابتوب فبل تتسوك عشان تشوف البروف قال شنو
    زهجان و قرفان ياخى السبت دا ممل من زمن الثانوى العام

    وهكذا دواليك

    بس يا شمباتى أنت المرقك شنو
    ما تقول ماشى أجيب التعيينات

  28. الغبشة كتب:

    يا شمباتى: ولا تزعل ياخى قدر كده لمن يطق ليك عرق ولا حاجه بس الاجنده بتاعتنا توقيتها عليك يومك التظهر معناها اخر الاسبوع وبالتحديد الخميس او اخر الاربع،،،،،،،،،،على اللخبطه العلينا لخبطتنا الليله ولا يهمك تعال الخميس السبت الجمعه الاسبوع كله عادى بس ما تزعل……………
    والف حمدلله بالسلامه وبركه الانت طيب وماعندك عوجه
    كسره :اها كده كيف لسه مقطم؟؟؟؟؟؟؟؟

  29. شمباتي
    كدي نتلاقى بيغادي بس أصبر لبعد المغرب أصلا قعده الزقاق بتحلي مع شاي المغربيه
    ورا الــPHC
    وانت فاهمني طبعاً

  30. مخير كتب:

    ولدنا أبو حمودي حمدلله ألف على السلامة
    الحبان في كل مكان سلام ومحبة واحترام
    أولن حمداً لله على سلامة أم حمودي وإكتمال العقد الأفليقي.
    ثانين: وانت غايب منت حاضر برصيدك الثر سوى المنكوت من الأرشيف والطازج المتجدد زي عيش الريف …
    ثالثن: حتبدأ من حيث وقفت وتواصل ويا حبابك ويا هلابك ساخر سبيل دارك ومطرحك….

  31. ياسين شمباتى كتب:

    طارق..
    حلوة التعيينات دى,,لكن بالجد بشيل معاى تعيينات من هنا !!! عندى شغوووووول يا جماعة..احرجتونى والله..

    الغبشة..باكر الله فيك,,كدى اعصابى هديت شوية,,كمان كان لقيت لى كباية ليمون صااااااقطة,,ولا كوكتيل من بتاع صاحبنا داك يكون ما قصرتوا معاى تب..

    عبدوز..
    فااااااهمك..بس خليها متاخر شوية عشان عندى محاضرة بتخلص على عشرة كدة..

  32. د.شمباتي

    طرحة الركشه عندكم بي كم ؟؟؟؟
    لاكيييين لقيتك ركاشي قدييييييييييييم

    صاحبنا يلقب أوستن الجماعه لقوهو زي زمنك ماشي برااهو
    -أوستن كامل ولا راكب ما شايلو والله لكن خسااااااره!!!!
    شفت الثقافه الجزيريه دي كييييف!!!!!

  33. ياسين شمباتى كتب:

    عبدالرحمن..
    لكن لقيتك خترى مرة!!! انا كنت منظم الموقف والادوار وكدة!! هى وظيفة ما حلوة لكن عشان النظام برضك حلو,,وكنت انادى (يا راقش,,ائتنا برقشة) لتمتطيها الداموك وتصل بالسلامة..بس..

  34. الغبشة كتب:

    عبدوز وشمباتى: كمسنجية انتو ولا حاجه وبركه الداموك الدايرن توصلوها بالسلامه،،،،،،،،،حتوصلونا وين انتو ارجعوا ذاكروا فى ورق عمك هجار بهنا وشوفوا لينا حاجه احسن شويه من داموك دى ولو ما لقيتو فى القديم شى خفيف على كى بوردكم ولسانكم ان شاء الله ارجعوا بينا للحمام الماليزى اخير من الداموك….
    كسره:::999 فى اختفاء شديد مالكم عساكم بخير؟؟؟
    والى لقاااااااااءءءءءءءءء

  35. الصادق ود البركة كتب:

    السلام عليك ورحمة الله وبركاته
    (مرحبتين حباب افليقا
    عودا حميدا وبوستا مقرؤا وتعليقات جميله . هنيئا لعين رأت كتاباتكم . واستمتعت بتحليلاتكمم) منقووووووول من الزووووووول (((((((وأنا كمان))))) ودمتم

  36. حاج أحمد السلاوى كتب:

    ولدنا سهيل و العزيزة الغبشة …سلام
    ألحقونا بسرعة بالترجمة على الشريط ..الداموك دا / دى شنو ؟وما تخلونا مسطحين ساكت .
    حسه يطلع ويظهر لى واحد كاشف قاعد بيغادى فى الدوحة ويعمل نفسه مقددة وعارف كل حاجة !!
    – الأستاذ ودالبركة … برضو حمدن لله على سلامة الظهور الإسفيرى العلنى ..
    – ودالباشا ..إن شاء الله خير … طولت الغيبة ..
    – طفشانة … طفشوش .. طفشفش ..تكونى طفشتى جد جد ؟
    – سماسم ..ربنا يخفف المشغوليات عشان نقرا ليكم حاجة ..
    – الزهراء..الحاصل شنو ..؟ الشبكة طاشة ..ولاّ طاشة ؟
    – نونو .. لا أسكت الله لك حسا.. أو حرفاً ..ظبطى الأريل كويس ..!!
    -واخيراً الكاشف نيام نيام ..عملتها ظاااااهرة بالرغم من إننا ما عارفين ظروفك بالظبط .زلاكين أدينا طلة مرة فى الأسبوع .. مرة كل عشرة أيام ..مرة كل أسبوعين . أها شنو رايك…قصرنا معاك ؟.

    … ابو الأفاليق ..لسه مُصِر تعرف الحركة ؟ الحركة الشعبية ولاّ الحركة إياها ؟ ..معليش حأقولها ليك بيغادى .. بس المرة دى فى الضفة الشرقية ..لأنو شمباتى حيكون فى ال……… الضفة الغربية . إنتفقنا ؟؟ مقصودة ) … ؟

  37. ياسين شمباتى كتب:

    الوالد السلاوى..
    انا قااااااااعد فى الضفتين!! لقيتك صعب مرة..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s