الاتفاقية.. هل تحقق العدل

Posted: الأربعاء,24 فبراير, 2010 by عزت in اخرى
الوسوم:

شهدت الدوحة مساء أمس الثلاثاء 23 فبراير 2010 توقيع اتفاق إطار ووقف إطلاق نار في دارفور بين ممثلين عن الحكومة السودانية و حركة العدل و المساواه بحضور أمير قطر الشيخ حمد بن خليفة آل ثاني والرئيس السوداني عمر البشير ورئيس تشاد إدريس ديبي ورئيس إريتريا أسياس أفورقي.

وقع الاتفاق رئيس وفد حركة العدل والمساواة أحمد تقد والوزير بوزارة الشباب والرياضة السوداني أمين حسن عمر ووزير الدولة للشؤون الخارجية القطري أحمد بن عبد الله آل محمود ووسيط الأمم المتحدة والاتحاد الأفريقي جبريل باسولي. وتأخر التوقيع العلني لأكثر من ساعتين بسبب إجراء مقارنات بين نسخ الاتفاق حسبما أفاد الناطق باسم حركة العدل والمساواة أحمد حسين آدم. وتصافح إثر التوقيع الرئيس البشير وزعيم العدل والمساواة خليل إبراهيم.

قال زعيم حزب الأمة الصادق المهدي “نرحب بأي اتفاقيات تقع بين أطراف سودانية باتجاه نبذ العنف والتصالح”، لكنه حذر من عوائق تواجه الاتفاق كالمشاركة في السلطة ومسألة الانتخابات والمحكمة وضرورة إحقاق العدالة….. فماذا قال الآخرون و ماذا تقول أنت…؟؟؟
فهدة بعض أقوالهم:

رحبت السعودية بتحسن العلاقات السودانية التشادية الذي سمح بالاتفاق الذي وصفه الأمين العام لجامعة الدول العربية عمرو موسى بأنه خطوة بناءة وإيجابية. وتحدث رئيس الوفد السوداني الحكومي في مباحثات الدوحة غازي صلاح الدين، عن اتفاق يسرى بمجرد توقيعه،  و لكن المهم حسب قوله ما تحمله الأيام القادمة في سبيل حل القضايا الجوهرية، وتحدث عن احتمال أن تساهم حركة العدل والمساواة في الحكومة المركزية أو حكومات الولايات أو مؤسسات الدولة المختلفة.

أما الناطق باسم حركة العدل والمساواة أحمد حسين آدم فقال إن الأهم هو حل القضايا الكلية لشعب دارفور، ونفى سعي حركته للمشاركة في السلطة، لأن المهم حسبه هو بحث المعاناة على الأرض وعودة النازحين وسلامتهم وتحقيق تطلعاتهم. وقال هذا الفصيل إن الاتفاق يقضي بوقف إطلاق النار، ويفترض أن يثمر اتفاق سلام نهائيا قبل منتصف الشهر القادم، أي قبل انتخابات رئاسية وتشريعية متزامنة.  وحسب مسؤولين في العدل والمساواة، التي يقودها خليل إبراهيم، فإن في الاتفاق نقاطا ستفصّل في مفاوضات لاحقة، كتعويض الدارفوريين وفتح طرق الإغاثة وتقاسم السلطة والثروة.

بينما نددت حركات دارفورية أخرى تفاوض الخرطوم في العاصمة القطرية باتفاق “قد يؤثر على مسار المفاوضات المرتقبة”، وقالت إنها في حل من أي اتفاق خارج منبر الدوحة.  وجاء في بيان في الدوحة لحركة العدل والمساواة الديمقراطية (مجموعة أديس أبابا) “شذت حركة خليل إبراهيم عن بقية الحركات بإصرارها على تذويب الحركات في التنظيم الذي يسيطر عليه.. وحينما عجزت عن ذلك لجأت إلى المساومة السرية”. فحسب مجموعة أديس أبابا فإن الاتفاق يشمل إطلاق سراح معتقلين بينهم أخ لخليل إبراهيم واحتفاظ الأخير بقواته في دارفور حيث توفر الحكومة لها المؤن والرواتب، وأيضا تسلمها السلطات السياسية والعسكرية في الإقليم الذي سيكون هو حاكما له، مقابل تعاون حركته في حماية مراكز الانتخابات، وتلقيها تعويضات عن خسائرها.

يشار إلى أنه قبل توقيع الاتفاق أعلنت خمس حركات دارفورية تمثل مجموعة طرابلس إضافة إلى ثلاث حركات من مجموعة أديس أبابا عن اتفاق لتوحيدها تمهيدا لتوقيع اتفاق إطاري آخر مع الحكومة السودانية.

وبادرت الحركة الجديدة التي أطلقت على نفسها اسم “حركة التحرير للعدالة” إلى الإعلان عن رفضها اتفاق الحكومة السودانية وحركة العدل والمساواة الذي وقع في العاصمة التشادية إنجمينا قبل يومين.

يبدو أن من شأن الاتفاق تبريد أسخن جبهات دارفور حيث العدل والمساواة أقوى الحركات المسلحة، مقارنة بفصائل كالجناح الموالي لعبد الواحد في حركة تحرير السودان الذي ما زال يرفض التفاوض.

فهل يا ترى سيكون خطوة نحو تحقيق السلام الشامل و أن ينعم أهل دارفور و السودان عموما بالسلام….. نتمنى ذلك..!!

Advertisements
تعليقات
  1. ابكرون كتب:

    ليس الاتفاقية يا دوك لكن المليار دولار…….!

  2. مش كدا بالله
    قبل كم يوم في احدى الصحف جابوا كاريكتير بليغ جدا ما عارف مر من تحت أنف الرقابة كيف
    واحد شايل صينية مليانة دولارات و داير يختها قدام واحدين في تربيزة ملفحين زي ناس “الحركات” و معلقين تحت
    (تغيير في أجندة المفاوضات)

    قروشنا …..!! غايتو كان حققت السلام عافينها ليهم أهو تمشي لي ناس زينا مش أبين حسابات في وين ما بعرفو

  3. محنك كتب:

    السلام الحالى حالة ايجابية على الاقل لو اوقف القتال بين فصيل خليل والحكومة ولكن دارفور معلوم ليس فى جنوبها تمرد فهو معقل القبائل العربية ( او ما تسميه الحركات ) بالجنجويد . ولكن من هذه الحركات وهل شمال دارفور القليل عددا وقبائل فى حاجة الى خرتمية حركة ام هوية التبطل السياسى . ان جنوب السودان مع ما يحتويه من عشرات القبائل كانت له حركة واحدة تمردت من اجل مكاسبه وتعطيل تنميته واجندة خارجية وزعومات بوجود قصد وطنى منها . اما حركات دارفور فكانت مع ايغالها فى العنصرية حركات خشم بيوت وفخيذه ولم يكونوا جادين فى حل مشاكل دارفور وسعوا لتدويلها .

    ولكن اظن ان الدولة قلبت الصفحات قبل الاخيره من التنعامل مع الغرب بمساعدة الاخوة فى المحيط العربى فبعد لقاء البشير ساركوزى جاء دبى وجا خليل وجعجع الذين لطخوا سمعتهم بالتعاون مع اسرائيل .

    السلام حالة تعايش ان لم تتصافى نيات ابناء دارفور فلن يقوم …

    والخطورة ان النزاعات القبلية القديمة والتى كانت تحل بمجالس العرف قد تم تدويلها بالرغم من جهل القائمين بامرها

  4. حاج أحمد السلاوى كتب:

    الإخوة صفوة الأخيار ..ولأبرار .. سلام .
    خطوة موفقة وملعوبة بذكاء شدييييييد ودى ما مستغربة من أهل الإنقاذ ( الناس ديل صعبين خلاس ….)ونامل أن تؤدى فى نهاية المطاف إلى الإستقرار والهدوء فى هذا الجزء العزيز من دولة أمازونيا العظمى إن شاء الله . ففى الإتفاق مع أحدى كبريات الحر كات المسلحة .. كحركة العدل والمساواة إنتصار كبير جداً لجماعة الإنقاذ وفيه إضعاف للحركات المسلحة الأخرى التى لا تزال تجاهد فى سبيل تحقيق وجود لها فى الساحة الدارفورية ..والحق يقال أن الحكومة الحالية تعيش مرحلة صعبة لتحقيق السلام مع كل هذه الفصائل المسلحة إذ لا يعقل أن تتفاوض مع هذا العدد من المسلحين ( لا يعرف ععدهم حتى الآن .. إذ تنشق حركة كل يوم وتعلن أنها تمثل أهل دارفور ) وكان الأجدى لهم أن يتوحدوا تحت قيادة واحدة للتفاوض مع الحكومة ..ولكنها بالطبع مسالة مدروسة من جهات عليا فمعظم قيادات هذه الحركات المسلحة يعيشون خارج السودان فى الدول الأوروبية ومنهم يتلقون التعليمات حسب الأجندة والمخططات ..فكيف من يعيش الحياة المرفهة ( زى رفاهية أخونا جبرا ) فى باريس يقنعنا أنه يناضل من أجل أهله فى دارفور ..والأخر الذى يعيش بين حسان بريطانيا العظمى ويحفظ كمية من الشعارات التى أصبحت مملة من كثرة ترديدها ..وأحترم الأخ الدكتور خليل ابراهيم كثيراً لبقائه قريباً من مناصريه وجنوده إن جاز التعبير .
    وكل ما يجرى الآن لابد أن له أبعاداً أخرى غير التى نراها أمامنا ..ومخطط له من جهات عليا لا نستطيع الوصول إليها غير أن المثل يقول .. يا خبر اليوم بفلوس .. بكرة ببلاش ..
    ولكننا ومع كل ذلك.. نتمنى أن يسود السلام ربوع كل المنطقة العربية حتى نلتفت إلى ما هو أهم .. وهو بناء الإنسان المغلوب على أمره وجلّ طموحه كسرة خبز له ولذريته يسكتون بها أمعاءهم الخاوية ..حيث مجال للتطور والتقدم للأمام فى ظل ما نحن عليه من وضع لا يسر عدو ولا حبيب .
    التحية لدولة قطر لما بذلته من جهد لتحقيق هذا الإتفاق ..
    وكم كنا نتوق لمشاهدة أحد إخواننا الكواشف القريبين من موقع الحدث ( الجغرافى) ضمن جوقة المفاوضين فى الدوحة ..لاكين قدر ما تاوقنا .. ما شفنا حاجة ..مع علمى التام إنو لا عاجبه العجب ولا الصيام فى رجب !!
    وخلونا النشوف آخرتا شنو .. مع التانيين . !!

  5. ابكرون كتب:

    سلولو والله انت متفائل شديييييد ، هو كان من الاول في داعي لكل ده ؟؟؟؟اقصد ما حدث في يونيو 89 المشئوم……بعدين ده اسمو سهر الجداد ولا نومو…..
    وزولك الفي الدوحة ده ما بمش حتات زي دي ولا بحب رفع الاصابع ومكشن الخلق دي من قولة تيت بتاعتهم ….انا لاقيتو وسالتو ليك بالإنابة وبسلم عليك ………

  6. ياسين شمباتى كتب:

    عزت المرطب..سلام..
    والله البيعملوا فوقو دا تحصيل حاصل,,وين باقى الفصائل!؟؟ وين عبدالواحد؟؟؟ ما ياها الحرب ح تكون مدورة كدة,,هم ما اتعظوا من الاتفاقيات المبتورة دى؟؟ مشاكوس وابوجا وحتى نيفاشا..قروش وبس..

  7. حاج أحمد السلاوى كتب:

    المرطب ابو عصمت ..
    أنا عندى سؤال سغيرووووونى كدا ..الحرمة الوحيدة ( يعنى المرة ..للأجانب من القراء) المغزوزة وسط الرجال دى مالها ؟ وعاوزة شنو ؟..وتبع منو ؟
    حد عارف ..؟
    أبكرونا ..وبما أنك قر يب من من قاعة الإجتماعات شوف لينا الحكاية دى !!حب إستطلاع لا أكتر ولا أقل ..وتفكيركم ما يمشى بعيد ..

  8. زووووووول كتب:

    الدكتور عزت بقا ريتش سلاااام
    نشكر لكم دعوتنا لمعرض الزهور بقاعة الصداقه ونعتذر عن تلبية الدعوه بسبب ارتباطات مسبقه ليوم امس .
    بالنسبه للاتفاقيه فقد كتبت موضوعا من وحيها سيتم نشره على صفحات سوداننا ان شاء الله لكننى ضد اتفاقيات السياسين التى يسعى كل طرف فيها لكسب اكبر النقاط بعيدا عن اعين المواطن الذى سيرى خليل ابراهيم الذى قتل الابرياء فى امدرمان وزيرا او مستشارا فى القصر رغم انف ذوى ضحايا احداث امدرمان

  9. aflaiga كتب:

    عزت والحبان السمار :
    قالو عمر البشير حضن خليل وخليل حضن عمر البشير وقالو امبارح عمر البشير حضن قرنق وبعد داك حضن سلفاكير وبعد داك حضن مناوى وحضن موسى محمد احمد ومبروك مبارك سليم …
    طيب يا جماعه عليكم الله لو حضن الشعب ده انشاء الله خمسه دقائق بس كان ده كلو حصل ؟؟؟؟
    نحن شعب محتاج لحضن دافئ فنحن احق الناس بالاحضان ولا شنو يا جماعه ؟؟؟؟
    حتقولو لى طيب الريس يحضن منو ويخلى منو من ال30 مليون ديل ؟؟؟؟
    حاقول ليكم اسى العشرين سنه دى لو كل يوم حضن عشره مش كان الواحد اتحضن فى حضن الثوره مرتين تلاته ؟؟ ولا كتير علينا نحنا قلنا حضن بس ما طماعين زى ناس عاوزه تتحضن وتتباس وما عارف شنو داك ؟؟؟
    ومن اسى العاوز يتحضن قبل الانتخابات يرفع يدو والعاوز يتحضن بعدها يرفع … برضو يدو !!!!

  10. aflaiga كتب:

    حسبه منطقية :
    20 سنه فى 365 يوم يساوى 7300 وهو مجموع الاسر فى السودان يعنى لو كل يوم عدا العطلات الرسمية قام الريس حضن ليهو كم رب اسره مش كان حضن الشعب ده كلو ؟؟؟؟؟؟

  11. حاج السلاوى الحرمة دى هى الشيخة موزة زااااااااتا – منتظر تصحيح من ابكرونا – ودى يا سيدى الكلام عنها كتير – يقال – والعهدة – على الرواى – انها الكل فى الكل وهى الممشية الناس على عجين ومابلخبتوهو.

  12. ياسين شمباتى كتب:

    استرايكر..
    يعنى زى(هناية) هنا !!؟؟؟؟ غايتو السياسة دى وسخة بشكل!!

    افليقا..
    غايتو انا لا داير قبل ولا بعد !! راجيييييك فى الايميل او التلفون للاهمية..

  13. ابكرون كتب:

    افليقا : حضنة الشعب ده كان ممكن تكون في مره واحده بس لو خصص او رجع ثلث ما نهبوه جماعتوا وهم كثر والمنهوب كثير وقد يصل الي مئات المليارات من الدولارات في 21 سنه وسهل بيه معيشة المواطنين المساكين ديل كان يكون فعلا صالح شعبوا وحضنهم مش يجري لي وراء المتمردين لارضاءهم بالمناصب والدولارات والحياه المرفهةعشان شنو؟
    السلولو : البنية في الصورة هي ابنة الامير الشيخ حمد وهي سكرتيرته وهي متعلمة وقمة في الاداء الدبلوماسي ومحترمة من الاجميع بقطر…..

  14. لكن ياا بكرون تقريبا تشبة الشيخة موزة جدا – وفى صورة كانت عندى ليها – ح افتشها – والزها ليكم فى الميل – مع مقال عنها .

    المهم فى الموضوع – انو لادارفور ح تتحلا مشكلتا – او المواطن المسكين ح تجيهو حاجة من المليارات – ولكم فى قروش ا لبترول بالنسبة للجنوب او الشمال مثال.

  15. زووووووول كتب:

    عزت والزوار
    ثعال بثيط يا جماعه
    ماذا جنى السودان من اتفاقيات السلام التى تم توقيعهامع قرنق واركوى ومبارك سليم وموسى محمد احمد . بدلا من تحول الاموال لشراء السلاح تحولت للحسابات الخاصه وبدلا من الموت برصاص الجيش الشعبى تحول الجنوبيون الى الموت بتعذيب الجيش الشعبى واسألوا المورلى والتجار الشماليين . وعلى طريقة جمهور المريخ مع مجدى شمس الدين دعونا نهتف امام الرئيس ما دايرين امير المجاهدين … ان ….. ان (دى حركات ساوند وكدا )

  16. زووووووول كتب:

    فى عنوان مقاله تساءل الدكتور الاتفاقيه هل تحقق العدل ؟؟
    اقول نعم تحقق العدل والمساواة كمان . اذ انها ستقود خليل ابراهيم للوزاره الاتحاديه او المستشاريات او مساعدى الرئيس بعد ان جرب الوزارة الولائيه وستساويه كتفا بكتف مع مناوى والور وعرمان وهذا قمة العدل والمساواة وليذهب انسان دارفور وانسان السودان الى ما ذهب اليه اهلنا فى جنوب السودان .

  17. و الله فعلا يا الزوووووول منتهى العدالة و مافيش أحسن من كدا….
    هسة المليار القال عليها الشيخ دي نصيب شعب دارفور كم منها يا ربي

  18. طارق أب أحمد كتب:

    أرسلت فى اخرى | Tagged سياسية غصبا عني، و النشوف آخرتا | تعليقات!!!!!

  19. بشار أحمد بشار (ابن برد) كتب:

    سلام يا دوك عزت والجميع : غايتو نوع الاتفاقات والخلافات دي ذكرتني صراعات عصابات المافيا في السيطرة على موارد المال كل في مناطق نفوذه . بعدين خليل ده زي (الراصي ليهو بنك) مع ناس الانقاذ ديل وأكان ما كدي العرفو شنو أنو عمر البشير حيفوز في الانتخابات عشان يقسم معاهو السلطة والثروة . غايتو نحن عيشتنا تطير ونحن قسمتنا ياخدها لينا الا نام لا أكل الطعام.

  20. ياسين شمباتى كتب:

    لكن ما تنسوا ان خليل ما ح يرضى بمناصب عرمان والور واركوى !! ياربى ح يعينوهو شنو!!؟؟

  21. ودالخلا كتب:

    سلام ياقبيلة
    دوك عزت وزواره الكرام
    هذه الأتفاقية خطوة جبارة في طريق تحقيق الأستقرار والنماء لشعبنا، وهي الفرصة الأخيرة لوطن واحد عريق ذو ماضي تليد وحاضر زاهي ومستقبل مشرق وضيئ مادام تواطأ الناس واتفقوا علي الحد الأدني من الأتفاق، وهي في الحقيقة تختلف كثيرا” عن كل الأتفاقيات السابقة في كونها أرجأت كل التفاصيل لما بعد تحقيق وقف حقيقي لأطلاق النار، والبدء في عملية اعادة النازحين والمتأثرين بالحرب لقراهم والبدء فورا” في تنفيذ ترتيبات الأعمار هذه الأولي، والثانية تأجيل الأنتخابات لفترة رئاسية ثانية، تستعيد فيها الأحزاب عافيتها وتتعرف فيها علي تطبيق الديمقراطية والشوري في نفسها أولا” لتتمكن من تطبيقها علي قواعدها ثانية ومعرفة البيها من العليها، وهذه الثانية.
    أما الثالثة والأخيرة وهي المهمة جدا” فيجب علي مجموع الشعب باجمعه أن يتعرف علي طريقة الحكم وكيفية الحكم وطريقة الحكم ويتم ذلك بالأتفاق علي دستور شامل كامل متفق عليه يوضح شكل وطريقة الحكم والقوانين التي تسود البلاد، وبعدها فليحكم البلاد من يحكم طالما أنه سيكون محكوما” بقوانين ولوائح لا يستطيع أن يحيد عنها قيد أنملة…
    والنشوف أولتا شنو قبل آخرتها يا حاج السلاوي!!

  22. مستر راعى كتب:

    كيفكم يا جماعه
    قمت من النوم لقيت عملوا اتفاقيه ده شنو كلو من ورانا
    وعاملين جوطه قدرده
    يوم يتشكلوا والعجاج يقوم وتانى يتصلحو عند الجيران
    بلاش فضايح معاكم
    قسموا ادوا كل زول حقو ونشوف شغلتنا ومراعينا
    عاد اليوم الحفلات و الغنا والدنيا تجوط خلاص وقعوا عقد بيع السودان لجهات غير مضمونه وايادى غير امينه
    بلدى يا حبوب يا الاكلوك وشربوك
    وللتراب با عوك
    المواطن مغلوب على امره
    كسرة :————–
    باقى نوقع مع الشيطان ونخلص ولا هو وقع معانا زمان

  23. ياسين شمباتى كتب:

    ود الخلا..سلام..
    وينو الحاضر الزاهى دا !؟؟ والله احسن نرجى المستقبل المشرق..بعدين هل سيعوضوا النازحين فرديا ولا كيف؟؟والشهداء الماتوا ديل موقعهم شنو؟؟ والمرتزقة العفا عنهم البشير ديل حينخرطوا فى الجيش السودانى ولا كيف؟؟ هى هشة هشة…والمقصود منها الزخم الاعلامى وكسب بونت للانتخابات الجاية وبس..

  24. ابكرون كتب:

    الشئ العجيب في هذه الاتفاقية والإتفاقيات التي سبقتها يستوعب من حملوا السلاح ضد الدولة وقتلوا من قتلوا من قواتنا المسلحة والشرطة ، يستوعبوا في القوات المسلحة والشرطة ، بينما ابناء القوات المسلحة والشرطة منذ 1989 يشردون ويحالون للصالح الخاص بالآلاف ولم يحملوا سلاحا ضد الدولة بل يحملون كفاءات عليا وخبرات وكل جريرتهم انهم غير موالون للنظام…….عجبا فعلا انها عدل ومساواة !!

  25. ودالخلا كتب:

    سلام ياقبيلة،،
    أخي دوك شمباتي، يا صديقي قالوا تفاءلوا خير تجدوه، وخلينا نتفاءل بالحاضر العايشنو وما في داعي نتعس أنفسنا زي الناس المتشائمة وكأن القيامة قامت، ونصبح نلعن ونمسي نسخط، واليوم كل الناس في غضب من منو وعلي منو ؟؟ وهم السبب الأول في ذلك ،والحالة النحن فيها دي من ضرب أيدينا، وهي نتاج لما يفعله الناس في أنفسهم، ففي زمن النبوة والرسالات السابقة كانت العقوبة عذاب فوري وحاسم للفساد الذي يفعله الناس والعياذ بالله، ولكن بعد الرسالة الخاتمة ، والرحمة المهداة بالأسلام علي المبعوث بها أفضل الصلاة واتم التسليم ، أصبحت عقوبات فساد البشرية كالذي تراه اليوم وهو جعل البأس بينهم شديد، ونحن نقول في الدعاء (اللهم لا تسلط علينا بذنوبنا من لا يخافك ولا يرحمنا)، وهذا يعني أن ما يعيشه ويكابده الناس هو حصائد أنفسهم وجزاء ما أقترفت أيديهم يا صديقي..
    (لا يكلف الله نفسا الا وسعها لها ما كسبت وعليها ما اكتسبت ربنا لا تؤاخذنا ان نسينا او اخطانا ربنا ولا تحمل علينا اصرا كما حملته على الذين من قبلنا ربنا ولا تحملنا ما لا طاقة لنا به واعف عنا واغفر لنا وارحمنا انت مولانا فانصرنا على القوم الكافرين)
    وتفــــــــــــــــــــــــــــــــــــــــــــــــــاءلوا خيرا” تجدوه..

  26. زووووووول كتب:

    ود الخلا سلاام يا سديقى
    والله يا عمك بس نحن خايفين نتفاءل تطلع لينا زى نيفاشا لانو زمن نيفاشا اتفاءلنا لمن بى غادى وفجأة كدا الحكايه انقدت فى دارفور فما هو المانع من تنقد الان بعد وصول خليل الى السلطه فى فجه !! تانيه
    كسره : تفائل لكن بشيش ما تزويد المحلبيه عشان الصدمه ما تكون كبيره .

  27. ياسين شمباتى كتب:

    زووووووول..سلام..
    والله نصيحتك غالية,,لكن انحنا اتفاءلنا عشرين سنة,,وما نفع..تعالوا نتفاءل بالجديد,,فى زول بتفاءل بالقديم؟؟؟

  28. mon amie كتب:

    الخ افليقا والله تعليقك بتاع الاحضان اجمل والذ تعليق قراته من بين كل هذه التعاليق ولاتدري كم ضحكني من قلبي لي زمااااان ماضحكت كده من قبل يونيو 1989.والله يا اخي لو جا احضنك رائحة قذارتهم حتقتلك احسن ما يحضنك فالعملوا في البلد دى صابون العالم كله ما بزيلوا ولا الروائح الباريسيه جميعها تزيل رائحتهم العفنه .

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s