لبنى احمد حسين وزيرا للخارجيه !

Posted: الخميس,25 فبراير, 2010 by زووووووول in سياسية

لا حديث لوسائل الاعلام خلال اليوم واليام التاليه غير اتفاقية الدوحه التى وقعتها الحكومه السودانيه مع حركة العدل والمساواة المتمرده فى دارفور . 

ورغما عن تياين الاراء لدرجة الاقتتال وشن الحرب على الابرياء فى امدرمان ورصد الحكومه لجوائز ماليه كبير لمن يدلها على خليل حيا او ميتا  الا اننا سنرى امير المجاهدين !! خليل ابراهيم مستشارا او مساعدا بالقصر الجمهورى .كما رأينا قبله جون قرنق ومنى اركوى وياسر عرمان الذى شاء حظه السعيد ان يترشح لرئاسة الجمهوريه لانهاء حكم اعداءه القدامى وحلفاءه الجدد .

وهو الامر الذى يدعونا للتساؤل عن مدى اخلاص السياسين لفكرة بعينها غير الوصول الى  والتشبث بالكرسى الوثير ..

انظر الترابى الذى كان يسعى لاقامة الخلافة الراشده فى القاره الافريقيه بمعاونة ابناؤه الذين لا زالوا يمسكون بتلابيب السلطه وعندما ابعدوه من رئاسة المجلس الوطنى انقلب الرجل من اكبر دعاة الاسلاميه الى الدعوه الى الحريه والديمقراطيه وسخر من الشهداء الذين قدمتهم حكومته لحرب الجنوب ووصفهم باقبح الصفات وفضح اداء الحكومه التى كان يسيرها وتلاعبها بالمال العام بعد فوات الاوان بينما كان يسكت على هذه التجاوزات حينما كان رئيسا للبرلمان .

والصادق المهدى اشتهر بين العالمين بتبدل مواقفه تبعا للفوائد التى يجنيها وحزبه فقد حارب الرجل حكومة نميرى ثم صالحها ثم حاربهاوقدم رجال مخلصين لقيادة حزبه مثل ادم موسى مادبو قبل ان تتبدل قناعاته ويبعد مادبو ويمكن لال بيته . كما حارب الحكومة الحاليه هو ابن عمه مبارك الفاضل ثم صالحوها فى جيبوتى ثم هو ينقلب عليها الان بينما ينعم فلذات اكباده بمخصصات وسيارات الحكومه بل ويعملون فى جهاز امنها برتب مرموقه . وهكذا تدور عجلة الايام ليختلف مبارك مع الصادق ويصالح الحكومه مصالحة فرديه جعلته  يصل لدرجة مساعد رئيس الجمهوريه قبل ان يختلف مع رجال نافذين فى السلطه حول اموال البترول .

كما ان ساسة المؤتمر الوطنى ايضا لم يكونوا بعيدا عن تقلب المزاجات وتحول التحالفات فقد وصلوا الى السلطه بطموحات نشر الاسلام والتمكين وجعل خصومهم تحت حذاء السلطه فنكلوا بالمعارضين وفصلوهم من الخدمه وشردوا اسرهم لا لسبب غير اختلاف وجهات نظرهم مع اطروحات الحكومه الوليده .ثم تبدلت القناعات وذهب كثير من رجال القبضه الحديديه الى الشارع وحل بدلا عنهم اخرون كانوا فى الصفوف الاماميه للمعارضه .واختفت الاناشيد الجهاديه مثل امريكا لمى جدادك وبدأت الحكومه تبحث عن طرق لتطبيع العلاقات مع امريكا وهاهى الاخبار تبشرنا بفتح شارع على عبد اللطيف سلميا بعد تحول السفاره الاميريكيه منه وهكذا اختفى قيقم وشنان ربما الى الابد !! كما اوقف برنامج فى ساحات الفداء ثم منعت صحيفة الوان التى ناصرت التوجه الاسلامى قبل وبعد الانقاذ. ووصل عرمان وباقان والور الى القصر الجمهورى وزراء ورؤساء لجان برلمانيه .

لكن تبدل الموقف الحكومى ربما كان نحو الافضل للمواطن  حيث جعل الحكومه تكف عن طموحات اسلمة امريكا وتعريب افريقيا!! و تلتفت للمواطن وتنمية الموارد فشهدنا خلال السنين التى اعقبت المفاصله اكبر عمليات تنميه تشهدها المنطقه ورأينا الطرق والجسور و المصانع ومشاريع البنى التحتيه المختلفه كما رأينا اخوتنا المصريين يغتربون فى بلادنا ويسكنون الدروشاب والكلاكله وداردوق بعد ان كان المصرى يتجه الى دول اخرى مثل الخليج .كما رأينا البنغاله والاثيوبيين ينظفون شوارع مدن ولائيه مثل عطبره والدامر .

والنخب الجنوبيه التى تؤثر وتتأثر بما يدور فى الشمال والعالم اخذت بحظها من تبدل المواقف وتغير القناعات فسلفا زعيم الحركه الشعبيه اختلف مع قرنق ثم عاد اليه قبل ان يرث رئاسة الحركه والجنوب وجزء كبير من الشمال بعد هلاك الاخير . ولام اكول حارب الحركه الشعبيه ثم انضم اليها ثم خرج منها وصالح الحكومه ثم خرج منها بجسمه بعد ضغوطات الحركه على الحكومه وهو ايضا تحالف مع بلايل وبنانى حلفاء الحكومه فى مرحلة سابقه وكونوا حزب العداله ثم خرج ثلاثتهم على بعضهم البعض وقسموا حزبهم الذى يفتقر الى السند الجماهير الى شقق وارباع قبل ان يغدر اكول وينشئ حزب الحركه الشعبيه للتغير الديمقراطى الذى اصابته حمى التشققات وعدم الثبات على المبادئ والقناعات الشخصيه منذ صرخة ميلاده بقاعة الصداقه .

والظاهر ان تقلبات افكار وتبدل قناعات النخب السياسيه سيبقى ما بقى بريق الكرسى وسيبقى ما بقيت امتيازات الوظيفه الحكوميه ولا نستبعد ان نرى السيده الفاضله جدا !!1 لبنى احمد حسين وزيرا للخارجيه فى حكومة الخرطوم رغما عن خروجها خلف النقاب من بلد لا تسمح لها بممارسة حريتها الشخصيه !! وابراز مفاتنها التى تخصها وحدها لمن تريد من الرجال   .

Advertisements
تعليقات
  1. محنك كتب:

    يا اخوى نسيتنا وابكرون وسلولو وين وزاراتنا …. اهم شى خدمات المواطن وينها

    فعلا كلو كراسى وسلطة وثروة …. ونحن مزحلقين

  2. زووووووول كتب:

    محنك سلااام
    بالمناسبه يا محنك الطريقه الشغالين بيها انتو وناس سلولو وابكرون ما بتديكم وزاره ولا حتى موظف استقبال . الدرب واضح لو فى طريقهشوفوا ليكم تلاته كلاشات وامشوا اى خلا وفكوا كم طلقه فى الهواء الطلق وبعد داك بنشوف ناس باسولى وبتاع قطر يدخلوا واسطه ويا وزاره جوووك ناس .بس المليار دولار ادونا منها حق براءة الاختراح !!

  3. لكن يا الزووووول الخلا بقى كلو مسجل “للحركات” ، وناس غابات الجنوب شالوا نصيبهم و الشجر الفي النيل الأزرق قطعوهو و ناس ضرار و آمنة ماسكين الشرق ما فضل الا الشمال البقى خلا كان مشوا فيهو بيجوا ناس الانقاذ يلقطوهم بالهيلكوبتر واحد واحد…………

  4. aflaiga كتب:

    الزووول : سجمى اسى قلت لبنى بالجد بقت وزيرة خارجيتنا !!!!
    مع انها مختصه فى الامور الداخلية !! ومرقت سوقت امورنا الداخلية !! فى الخارج بشكل جميل يحسدها عليه مبارك زروق ذاتو !! غايتو اعتقد انو دبلوماسيتنا بى ورا !! لبنى حتكون دبلوماسية طريه ومتفاعله مع كل المتغيرات العالمية بس كيف تلقى ليها مساعدين ياى يسندوها من ورا كويس عشان بلدنا تمشى قدام !!! وبقترح انو لو بقت وزيرة خارجيتنا انو امسك ليها … مكتبا وانو ابكرون يكون وزير دوله بتاعا لانو اكيد زول بيقدر ..الوقفه القوية بتاعتا مع قضايانا الداخليه ولا شنو يا ابكرون ؟؟؟ شكلك طمعان فى اكتر من وزير دوله وعاوز تجى بى قدام عديل كده ؟؟!!!

  5. حاج أحمد السلاوى كتب:

    السادة صفوة الأخيار ..
    يعنى آمنتم كوووولكم إنو عشان تاخد حقك من الناس ديل لازم تشيل السلاح ..بعد داك ممكن يقعدوا يتفاوضو معاك فى الدوحة … فى إنجمينا … فى أى حتة على سطح الكرة الأرضية .
    وزى ما قال أبو عصمت ما فضّل فيها حتة فاضية تمشى ليها ولاّ غابة تدخلها إلا الشمال ووسط الخرطوم على وزن سنتر الخرطوم ودى الجماعة متمركزين فيها ..وبيغادى ناس أفليقا ما حيدوك حاجة .
    ونحنا يا الزووووول وزارات مع الناس ديل زااااتها ما عاوزنها لأننا ما بنقدر نجاريهم فى البيسووا فيهو دا ..إتعودنا على الشفافية والمصداقية ( رغماً عن عدم إستلطافى لهذه التعابير الجديدة ) وما أظن بعد العمر دا نقدر نتعلم أمور اللف والدوران وأمور التلات ورقات أو تلبيس الطواقى .
    أخبار الصحفية لبنى شنو .. رجعت ولاّ لسه ما خلصت الجولات ( جولات مقابلة الرؤساء )الخارجية بتاعتها ؟ لاكين باقى ليك بتقدر ترجع تانى ؟
    وخلونا النشوف آخرتا شنو !!!

    • حاج السلاوي سلام زعيم الضفة الغربية أبكرونا زعيم الحقيبة ….
      كل الأخوان سلام …. رجعتونا تاني للمربع الأول … وجع القلب وراااااااااااااااااااا وراااااااااااااااااااااااا ورا …ورا ورا وراااااااااااااااااااااااااااااااااااااااااااااااااااااااااااااااااا….
      عااااااااااااااااااااااااااااااااااااااااااااااااااااازين نفهم حاجة شنو الإنتفاضة دي …والله قلبتو الهوبة طيب نحن الفي الخرتوم نقول شنو ….؟ نقول سمح نقول جميل – يغني حمد الريح ( نحن في وادي وإنتو في الوادي ) وحمام الوادي …وفي أغنية بلابل الدوح …وحي الدوحة في كل حتة في الخرتوم وكل الأقاليم …. بقالة الدوحة ….صالون الدوحة .. مطعم الدوحة…. كدى من هنا للإنتخابات 40 يوم يعني فترة ما بعد رفع الفراش ….
      والله كل التعليقات في محلها وكل زووووووووووووووووووول عندو رأي …..بس هؤلاء القوم بفهموها زيكم كدا؟
      كل أطروحات المرشحين بتخاطب عقول البسطاء البتغدو وما بتعشو … وناس الكارو والسكن العشوائي ….دا الفضل….. شوفو شوارع الموردة والعباسية بدأ رصفها ….وعربات القمامة بتشيل مننا 3 جنيه في نص البيت شهرياً وستات الشلي عملو ليهن أكشاك …والكوررررررررررررررررة شغالة والهلال غلب الأفيال وأولادنا ماشين البرازيل للتدريب …عشان يلعبو في البارسا…… هذا هو مونديال الإنتخابات …

      هناك عداء سافر…كل واحد بشر غسيل التاني في الكباري…. والسمك مقيل تحت الكبري
      والبنات حايمات في الحدائق تحت الشجر إتنين إتنين…والنظام العام ما بسألم….الديمقراطية جاية… والعبايات أكبر كضبة ….
      يا حاج السلاوي ما أكون مطشش.
      هذا ما يعتمل في نفسي وقد تكون الصورة مشوشة بس رايكم شنو؟
      يل أبكرونا ريحنا بأغنية حقيبة إن شاء الله سياسية …

  6. ياسين شمباتى كتب:

    الحبيب زوووووول..سلام..
    والله بديت كويس جدا ومرقت النصيحة تب..بس حتة البنغالة والثيوبيين ديل ما بتنهضم,,اسه انحنا خلااااااص شغلنا كل العمالة العندنا وبقينا نجيب فى البرة,,ولا زى تابيتا هددت مرة انها تجيب اطباء من مصر!! قومى لفى كدة ولا كدة..

    وطبعا المؤتمر الوطنى رجع لى شعاراتو القديمة القذرة وابانها جيدا فى الاستاد يوم تدشين الحملة,,وديل الكلب عمرو ما ينعدل!! وغنى مغنيهم فرفور (فات ولى نصرنا) صدقت اذ اخطأت..

    اما لبنى فما اعتقد انو الور حسن منها فى شئ,,وامكن تكون افضل من وزيرة الشئون الاجتماعية التى ترتدى الحجاب ولا ترعى فى مؤمن الا ولا ذمة..الكفر البواح افضل من النفاق حسب راى الشرع,,ولا كيف الراى؟؟

    والشجرة تهز لى ود العز…..

  7. ابكرون كتب:

    يا فلقه والله صدقت مش تستاهل تكون رئيسة الجمهوريه اسه هي ولا عبد المحمود بتاعت الاتحاد الاشتراكي ؟عليك الله خلقتا مش اخير من الور وكرتي واسماعين…ومؤهلاتا سمحه تنحب وتنراااااد…..خارجيتكم دي ؟ حتكون رئيسة الجمهورية السابع الفرنسيه هو (صار كوزي) جاء اطرش من رومانيا متين ما ليه 10 سنوات بس……الرسول يا افليقا ما دبل بيها عشان تلقي ليها سند …..!وما اظن سمسمه تعمل ليك الصبغه تجيب خبرك خاصة وان البنية موعوووووده بالجمهورية الفرنسية …..الزوووووول قال وزيرة خارجيه!!!!!!!!! والله عندو قصر نظر…..!

  8. بشار أحمد بشار (ابن برد) كتب:

    الز (بسبعة واوات ولام) -كتبت اسمك بإختصار شديد لزوم الشورت هاند وتوفير الوقت والجهد- سلامي : لاكين مرقت النصيحة وخليتها في السهلة بدون (أندرويرز) ويادوك شمباتي :”انحنا خلااااااص شغلنا كل العمالة العندنا وبقينا نجيب فى البرة,” القالك منو أنحنا عمالتنا ما شغالة مش اليوم كلو قاعدين من ضل لضل يونسوا في ستات الشاي إنت دايرهم يتقطعوا يعني ولا كيف؟؟؟

  9. سهيل كتب:

    تحياتي و اشواقي للكل ..
    سلامات حبيبنا الزوووووول و بركه الجيت .. دي شنو القنابل دي .. انا شخصيآ بتهمك بتبديل قناعاتك من اقصى اليمين لأقصى الشمال .. يا زووووووووول براحه علينا .. نحن بقينا ماعارفين نشوت وين .. يمكن بعد شويه نبدل قناعاتنا و نعمل حركه في شكل ورده ( ما شعبيه) ..
    – الدليل يا فرده عفيصك شمال و يمين ما عدا ( محمد ابراهيم نقد و عمك الميرغني) .. لكن بطمئنك انو السيده الفضلى لبنى الكلام دا بعيد عن شنباتها .. علي بشنو ما بعرفو دااااك لو هي بقت عضو برلمان ساي خليك من وزير إتحادي انا اقطع جنسيتي .

  10. سهيل كتب:

    افليقا و ابكرون .. شنو يا فرد .. شي داخليه و شي خاجيه و مصرين تعملو للبنيه سنده يا سندالات إنتو ..مافضل ليكم إلا هناي .. آآآآآي وراوراوراورا .. قلبها يمين .. قلبها شمال .. قلبها سنجه .. قلبها سنار .. و اوعك من تمسكها من (الكبري).. امسك من اي حته تانيه .. باقي الكبري دا ناسو كتااااااااار

  11. علي سنكل كتب:

    زووووووول سلامات . . .
    والله النهار دا أطربتنا بوصفك البليغ لحالنا الوضيع. وممكن تكون وزيره مش خلت السودان من رئيس الجمهوريه لأصغر ولد في لبنى وسراويلها لمدة تزيد عن الشهرين. وصعد نجمها إلى عنان السماء لسبب تافه ، تحولت إلى مناضله من مناضلات حقوق الإنسان وأشهر من مروان البرغوثي وجميله بو حريد. نحن يا عزيزي الزووووووول نقذف بمبدعينا ومثقفينا وأوائل فصولنا إلى خارج العمل العام ونولي أمرنا العام لنجوم الصدف هؤلاء. هذا يا عزيزي سبب تخلفنا.
    بالله قلت لي البنغال والأثيوبين بنظفو في شوارع أتبره ودامر المجدوب.
    طيب ما تقول لينا تعالو راجعين.

  12. زووووووول كتب:

    عزت وافليقا سلاام
    صدقنى يا دكتور الطريق الذى سلكته لبنى يعتبر اقصر الطرق للوزاره وعندما رات لبنى سلفا ومناوى وباقان وصلوا الى الوزاره عن طريق العضلات وبما ان ماكينتها لا تحتمل طرق العضلات الوعره فقد سلك شارع السراويل !!الذى اوصلها الى ساركوزى وبعد محطه محطتين ستكون وزيرة خارجيه عدييل بس اسألوا ابكرون لو طمعان فى اكتر من وزير دوله وداير يجى بى قدام عديل كدا عمنا سلاوى دا يجى بى ويين يا افليقا ؟؟
    سلاوى سلاام
    ان شاء الله تلقا ليكا مقعد يا عمك لو وراء ولا قدام ما مهم وبعدين حركات اللف والدوران الوزاره كفيله بتعليمك اياها بس انت اعرف اصل وبعد داك راح تكون اكبر فحييط .

  13. زووووووول كتب:

    ابكرون سلاام
    قلتا ليا رئيس فرنسا عديل كدا ؟ طيب لو كدا سمسمه موافقه من هسع افليقا يدبل بيها بس الخازوق هو ما يوافق ويتمسك بحتة مدير المكتب دى .
    بشار عمنا واديبنا حبابك ما غريب الداروسلااااام
    وشوقنا بحووووور وبصراحه فقد يئست من النخب والقيادات فى بلدنا وصرت اعتقد ان المبادئ باقيه فى بلادنا لكنها توجد عند ناس قريعتى راحت اما الزعماء والذين يلهثون خلف قيادة الناس فلا مبادئ ولا يحزنون ولو ما مصدق شوف اسغر رئيس لجنه شعبيه فى بلدكم ولا اسغر خفير وامتحن مبادئه وقناعاته وستجد النتيجه ضعيف جدا وراسب مبادئ عدييييييل .
    سهيل سلاااام
    لم نغير ولم نبدل يا صديقى لكنه الواقع واعتقد ان ما ذكرته من خلال المقال سليم مائه بالمائه .اما الميرغنى فقد تجاوزه الزمن وكذلك فعل مع نقد وهما يتحدثان ويشاركان فى الانتخابات من اجل تنبيه المواطن انهما لا يزالان على قيد الحياة .
    اما التحدى بتمزيق الجنسيه فعليك البدء به منذ الان ستأتى لبنى زعيمة ربما وحدها وربما بصحبة عبد الواحد فى مفاوضات الدوحه القادمه بعد ان يصل خليل ويولعها عبد الواحد بهناك ولو حيين بنتلاقا .
    عمنا سنكل سلاااام
    ومرحبتين حبابك بقلمك بس ما تجاسف تجى راجع وخليك متابع معانا اول بأول .وبعد ما نشوف الاوائل يتقدمون نقول ليكا تعال لكن البلد لسا الوصول للمنصب العام لا زال يعتمد فيها على العضلات والسراويل وديل الاتنين شعرا ما عندك ليهو رقبك خليك قبلك يا دكتور.
    شمباتى سلاااام
    والله حتة البنغاله دى ما دايره رفع ضوايه بس ما عارف ان كانت تعنى الغنى والرفاهيه ولا الفشخره وبعدين انت ما عندك خبر ولاية الخرطوم طارحاخمسه الف وظيفه .
    وقصة لبنى احسن من وزيرة الشؤون الاجتماعيه دى الا تكون سماحة منظر اما سوى ذلك فلا والف لا . ولا يجرمنكم شنئان قوم على الا تعدلوا وبرضو نقول ما فى اى زول فى البلد دى عندومبادئ ولا قناعات ومافى احزاب حقيقه انما مصالح وبس وبجيك تانى انت بالذات يا دكتور شمباتى .

  14. ياسين شمباتى كتب:

    بشار..سلام..
    والله فعلا,,برضها مهمة قومية!! خصوصا لو جات كشة يساعدوهن فى لم العدة والجرى والمساككة..

    زوووووول..سلام..
    والله السماحة اكيد,,بعدين وجود مبدأ ولو كان خطأ مفيد,,لكن يكون مبدأك وهدفك اللغف والجاه والمنصب دا نسميهو شنو!!؟؟ وفى انتظارك يا حبيب..

  15. طارق أب أحمد كتب:

    الزووووول سلام و مبرووووووك النيو لوك
    لكن ما تقول لى ,, تعرف لو كلامك دا كان كاتبو ز ول تانى كان شرب ما روى من نبع كيبوردك

    سؤال فقهى

    شعار أحد المرشحين لرئاسه البلد بقول ((صوتك أمانه ))

    طيب أذا هو أمانه يبقى يحرم شرعا أن يعطى لقاتل و حرامى بحكم سكوته على الحاصل المعلوم لكل الناس ما رأيكم دام فضلكم

  16. ياسين شمباتى كتب:

    الحبيب طارق..سلام..
    زوووووول آثر الابتعاد وخلاها عاااااايمة على كيفها,,لكن ليكن شعارنا (ولا تقربوا هذه الشجرة)…

  17. البقاري كتب:

    مرحب
    الكلام حق الزووووووووووول دا كلو صاح وتحليلو منطقي. لكن ناااااااااس التعليقات ديل ما بمرقوووو النصيحة. لانو الجاب بني بنغال والاثيوبيين يشتغلو في النظافة فهم ناسنا. امسك اي واحد من العطالة ديل قول ليهو تعال اشتغل شغلهم دا تلقاهو بتنقع انا دا عامل نظافة
    وبنظر في السودنة

  18. ياسين شمباتى كتب:

    البقارى..سلام..
    اها انت نصيحتك شنو!!؟؟ وهل انت موافق على تشغيل عمالة خارجية ورمى ابناء البلد فى الشارع وتشريدهم خارج الوطن!!؟؟
    بعدين هى وقفت على عمال النظافة بس,,دى جابت ليها مهن اخرى وكمان قالوا ح يجيبوا اطباء !! اها نقع وين بعد دا؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s