جانا العيد لبرودو

Posted: السبت,27 فبراير, 2010 by neiam in اخرى, ادبية

يا شعب شب
صحصح و تب
يا شعب اوعك يخدعوك اهل الكضب
يا شعب اقرط في الحساب واحسب حسب
الاحسبون الاعجبون حلوين لسان و جراب كضب
حلوين حلاة
يبدوك بس بالبسملة
و يزيدو صلو علي الصلاة
و يعيدوا ليك تسجيل قديم
و كرب كرب
ساربين سرب زاربين زرب
نهبوك نهب
لا بخافو من رب العباد ولا حتي سؤ المنقلب
اعمل حسابك في الشخت اقراه تب
اوعاك ضيعت اللبن الصيف دخل بس انكرب
قلب صفيحات اليمين
مليانة دين
قلب صفيحات الشمال
كلو احتيال
اوعك تشخّت و تنسحب
يازول تعال
خليك حصيف
شخّت علي كيس الرغيف
وتعال اقيف
عاين وراك عشرين سنة
واقيف هنا
كم خطة في رف احسبون
مليانة ذل او مسكنة
والله كضابين كضب
زرعو الكضب في حينا
عشعش عدار و هجين مذلة و حسبنة
من كم سنة
لا انت عارف لا انا
ترعة منو ومشروع شنو قام عندنا
اسمعني بس ما تلكنا
الراديو نما ياتو ناس
و التلي فاس
ما التلفزة و الفسلفة و الفزلكة هي الاساس تجارا بل ديل موطنا
يملوك هبوب
و كضب تخين مرصوص بنا
تحلف تأسس فوقو تب
لكن سراب الصي دنا
شوف الرقيص و الدوزنة
والله لو ما الجوع قريص
كنت زدتك في الغنا
يا شعب شب
يا شعب ركز في الكتب مين السبب
وكفاية ذل او مسكنة

Advertisements
تعليقات
  1. طارق أب أحمد كتب:

    نيام عودا حميدا مستطاب

    وكفاية ذل او مسكنة

    فقط قبل ساعتين كنت شاهدا على مهزله لا يمكن أن تكون ألا فى دولة أمازونيا

    اليوم هو اليوم الختامى لمؤتمر للحاصلى على درجات الدكتوراه فى قاعة الصداقه و الذى يتزامن مع معرض الزهور اليوم الختامى أيضا
    وصل الرئيس فجأتن وأجبر كل من كان خارج بهو المؤنمر على الخروج للشارع و أضف أليهم زوار معرض الزهور وكل من وصل متأخرا عشرات بل أن الرقم يفوق المائه من حاملى الدرجات العليا و أضعافهم من المرافقين و رواد معرض الزهور
    أحدهم يصيح غى أفراد الأمن ((ديل كولهم دكاتره)
    و زوجه تطيب خاطر زوجها ياخى ما خلاس ما مشكله خلينا نمشى أو الرجل متشيث بحقه فى الدخول

    هذا الرئيس الذى يذل علماؤه بل و يخاف أمنه من حملة الأقلام غير جددير بأن يقوده مره أخرى و كفايه ذل و مسكنه

  2. بشار أحمد بشار(إبن برد) كتب:

    نيام صباحاتك غر وجاييك بخشم الباب

  3. عمنا الكاشف الأيب نيام
    حمدن علي السلامه والرجعه
    بعد الغياب

    ما هم كضابين كضب
    بجرأه محسودين عليها
    لامن هم صدقوا إنو نحن مصدقنهم

  4. طارق أب أحمد كتب:

    بشار ((نيام صباحاتك غر وجاييك بخشم الباب))
    نحضر الخروف؟؟؟؟

  5. حاج أحمد السلاوى كتب:

    عمنا نيام نيام … ( حلوة عمنا دى ..مش كدا ؟ )
    أولن حمدن لله على السلامة والشوق ليك ( بلا حدود ) وحبنا ليك زى حبنا( للشريعة والحياة )..وعاوزين غيبتك تكون فى ( الإتجاه المعاكس )وكلماتك الجميلة نهديها للزووووووول والرأى الآخر ..

  6. زووووووول كتب:

    عم (حاج السلاوى) نيام نيام نيام سلااام
    لاغبار على حديثكم من الناحيه الشعريه واللغويه بس عصرتا علينا شديد .
    لا انت عارف لا انا
    ترعة منو ومشروع شنو قام عندنا
    دى ذكرتنى قصة انصار المهدى مع انصار السنه
    *يا المهدى الخلقتنى
    ـ والله انت عارف المهدى ما خلقك لكن داير ليك مشاكل
    اقول : انت يا نيام عاف ليكا مشاريع وترع وكبارى ومصانع وبرضو حاج السلاوى ود اخوك !! عارف لكن دايرين ليكم مشاكل وبس .

  7. شوف الرقيص و الدوزنة

    شيتا خلانا نبطل نعاين في التلفزيون غير الرقيص و الدوزنة دا مافي….
    ياخ ما معقول أخير القنوات اللبنانية و المصرية و قنوات الموسيقى بتلقا ليك اشكال ظريفة بترقص

    تسلم يا نيام

  8. علي سنكل كتب:

    ألف حمداً لله ع السلامه يا نيام . .

    يملوك هبوب
    و كضب تخين مرصوص بنا
    تحلف تأسس فوقو تب

    والله أنا ما شفت لي كضب ممكن تمسكو بأيدك و تتحسو إلا في زمن الأحسبون المليان غباين.

  9. ابكرون كتب:

    نيام يا واحة نرتاح فيها
    كيفك يا رجل حمد الله ع السلامة بركة الشفناك طيب وبركه اللقيتنا طيبين…..
    *** ( يا شعب ركز في الكتب مين السبب
    وكفاية ذل او مسكنة )

    *** ( يا شعب ركز في الكتب مين السبب
    وكفاية ذل او مسكنة )

    *** ( يا شعب ركز في الكتب مين السبب
    وكفاية ذل او مسكنة )

  10. بشار أحمد بشار(إبن برد) كتب:

    نيام جيناكم يا حبايبنا بعد غربة وشوق :
    كضابين كضب وشرفانين شرفة ومزلوعين زلعة وعيونهم فارغة التراب ما بملاها السواحيت الطواغيت المساخيت .وأبكي يا شعبًا مغلوباً على أمره لاكين ماتنسى التسجيل والتوثيق ومصير الصغير يكبر وما ضاع حقٌ وراءه مطالب .

  11. الغبشة كتب:

    مرحب عمنا نيام وازهرت المدونه بحروفك الانيقه……………….
    والله لو ما الجوع قريص
    كنت زدتك في الغنا
    ياخى عارفين حالنا يحنن لكن بعد كلامك ده خليتنا زى الراجل الاتصور وشال الصوره ولقاها شينه قال للمصور عارف روحلى شين لكن ماقدر ده؟؟؟؟؟؟؟؟؟
    اتارى نحن مش مظلومين نحن حيين ميتين الله يكون فى عونا
    والى لقاااااااءءءءءءءءءء

  12. حاج أحمد السلاوى كتب:

    بنتنا الغبشة ثرو عمنا نيام ..
    حكاية الراجل الطلع شين فى الصورة دى ذكرتنى قصة طريفة برضو ..زماااان ايام العرضحالجية قدام المحاكم ( ما عارف لحد حسه موجودين ولاّ جو الجماعة كشوهم زى التانيين ؟ ) جاء واحد للعرضحالجى وحكى موضوعه وطلب منه يعمل ليهو عرضحال للمحكمة .. العرضحالجى كتب العريضة وبدا يقراها للراجل ..بعد شوية الراجل بدا يبكى بكا شديد وكل مرة يزيد فى البكا ..العرضاحالجى وقف من القراية وقال للراجل : ياخ إنت مالك الببكيك شنو ؟ الراجل عليهو وقال ليهو : أنا ما كنت قايل نفسى مظلوم قدر دا ..!!
    وأكيد فى ناس كُتااااااااار جنس دا ..كان الله فى العون ..
    وغلى لقااااااااااااااااااءءءءءءءءءءءء .

  13. نيام كتب:

    زووووووول:
    عزيزنا رفيق الرايات الحمراء ذات الأنجم اللألاء ز7(و)ل ثرو ود اخوي )الراجي اخرها ) الشاب سلولو:…روبرت هلم عندما شعر بانهم مغادرون للسودان لا محالة ، بعد رفع العلم مباشرة نادي الزعيم الازهري (رئيس الوزراء) و محمد احمد محجوب (زعيم المعارضة ) وقال لهم بالحرف الواحد:
    – انه بلدكم و نحن سنغادر و لكن اردت قبل ان اغادر ان اخبركم باننا تركنا لكم ثلاثة اشياء اذا فرطتم في واحد منها ضيعتم البلد .
    – فساله المحجوب و ماهي هذه الاشياء الثلاثة
    – فرد السيد هلم : اولا الخدمة المدنية ، ثانيا السكة حديد ، ثالثا مشروع الجزيرة..
    ولعلي لا احتاج ان اسالك ماذا فعل الاحسبون بكل هذا فانت سيد العارفين…(ايها الاتبراوي وين بلد الحديد و النار)…

    سنكل ثرو بشار ثرو ابكرون:
    عندما تستيقظ في الصباح الباكر و تستمع الي نشرة اخبارنا الصباحية تتخيل انك في ثاوث هامبتون او بطرس بيرغ و لكن سرعان ما تعود الي رشدك عندما يقطع التيار الكهربي قبل نهاية النشرة..

    طارق اب احمد ثرو عزت المرطب:
    بالله شفتو النقزي دا كيف !!!الزعماء الكارزما يجعلونك تتحفز لسماع كلامهم واذا رفعوا اصبعا فقد تأبطوا شرا اما اذا رفعوا الايدي فاحرص علي سماع نشرة الصباح..

    الغبشة ثرو عبدالرحمن احمد:
    سعلت الله صورتكم تعجبكم بحياتكم وينصلح الحال قبل ما تجي صور احفادكم..لكن الجرح خوّخ..عبدالرحمن بمناسبة صدقوا اننا مصدقنهم دي ما حكاية جحا يقول الكضبة و بعدين يصدق كضبتو اهدي ليك اغنية ابوعركي (اوع تصدق)..

  14. مشاكل كتب:

    آه يا زمن غدار

    بنجري ليل و نهار

    فوق لقمة تكفي الجوف

    او موية تطفي النار

    حكومة عاملة طناش

    و شبابنا كلو دمار

    تحت الشجر قاعدين

    طعمية ولا شمار

    و الناس تشيل الحال

    الكلمة زي مسمار

    دارفورنا يومي تئن

    و الدم يفيض انهار

    شرقنا كان منبع

    قرآن علم أذكار

    شمال وسط أبطال

    ناس كرري و الثوار

    صحو البلد يا ناس

    و الجار يساعد الجار

    نزرع بذور الحب

    نحصد سلامنا ثمار

    سهلها يا رحمن

    و استرنا يا ستار

  15. مشاكل كتب:

    سوري على ( بعض ) الألفاظ لكن دا الحاصل

  16. ياسين شمباتى كتب:

    الحبيب نيام..سلام وشوق ومحبة..
    عودة قوية وتذكرة طيبة فى زمن الغفلة..احد الاخوة فى احد المواقع الاسفيرية رد عليهم بان(لا تقربوا هذه الشجرة) وقد صدق!!

    الحبيب مشاكل..سلام..
    وطيب؟؟؟

  17. مشاكل كتب:

    سلامز مربع

    و ( طيب ) دي الحيرت بوبي زاتو

  18. ياسين شمباتى كتب:

    هى لكن (بوبى) دا ما فهم بعد دا كلووووووو!!؟ يكون بالغ بس..

  19. aflaiga كتب:

    نيام الاديب الاريب :
    اسف كتير شان ما قريت احلى الكلام
    لكن عزاى انو الكلام الزين تمام
    ماعندو ميقات للزمان شان يتقرى زى اى كلام
    ياخى انت بتنوم كده ولمن تصحى بتصحى الناس النايمه والحايمه والصايمه والهايمه وبتقض مضاجع الناس الراقده لينا فوق راى والجاى جاى …
    عليك الله كان بعد كلونومه فى قومه زى دى :
    يا ناس هوى ما تصحو نيام ده وتزعجوهو فنومه قيام ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s