ستديو النجوم…

Posted: الأربعاء,3 مارس, 2010 by ياسين شمباتى in ادبية

على غرار برنامج(نجوم الغد) بقناة النيل الازرق قام التلفزيون القومى بتنظيم منافسة اسماها (ستديو النجوم),,وقامت قناة الشروق بمجاراتهما ببرنامج (سباق المبدعين)..مع تحفظنا ونقدنا لبرنامج نجوم الغد الا انه بجد افضل الثلاثة, من حيث الاعداد والمشاركين كما وكيفا,فالتنافس بين عدد كبير من المتبارين,وحقيقة فيهم من يستحق ان يحمل لقب مطرب,وغالبيتهم من الشباب او اليفع الذين يمكن صقلهم وتدريبهم,ولا ننسى انه خرّج لنا (صفوت الجيلى-عافية حسن-شريف الفحيل-ريماز ميرغنى-سارة النور….وغيرهم),ومقدمه ذو باع طويل فى مجال الفنون..

لكن قناة الشروق اتت ب(خالد حسن) المطرب الفائز مع فريق شمال افريقيا بالبوم العرب,الذى يفتقر تماما الى مهارات التقديم والحوار..اما تلفزيوننا القومى فلقد اتى بالمبدع صاحب الباع فى برامج المنوعات (صلاح طه) لكنه ايضا يفتقر بشدة الى المعرفة بالفن واهله,ونجده يقرأ دوما من ورقة يحملها اسماء الشعراء والمطربين والمشاركين!! يعنى لا حفظ فى الراس ولا نظرة من الكراس(الشاشة المتحركة عن بعد)!!..

بعدين المحيرنى ناس التلفزيون ديل لا عندهم مهندسين ديكور لا ستايلست ولا فنيي ملابس!! يعنى المشاركات آخر ابتهاج واحتفال بالمولد وعرائسه!! تلقى واحدة لابسة اصفر  فاقع يعمى البصر وازرق غامق,,واخرى وردى مع برتقالى يزغلل العيون,,وديك شنو بشنو كدة..ام عن التوأم اللائى قد وصلن الى مرحلة التصفيات فاحسبهن قد تخطين التصفيات التى لا يمكن للمرأة العودة منها الى نقطة الانطلاق!! وتوام اركويت الذكور لما صبغوا شعرهم حتى قدروا يظهروا قدام الكاميرا..اسه ديل دايرين يبقوا نجوم كيف!!؟؟ ديل ح يمشوا مقبرة النجوم..

اما عن الاداء الضعيف والاصوات الخيشومية فحدث ولا حرج,,كلهم يعتمدوا على الخيشوم فى اخراج الاصوات,مافو واحد صوتو مميز,وصولاتهم تعباااااانة تعب العدو..واتفضحوا تماما بجهلهم عن اسماء من يتغنون لهم,,اما عن اغانى الحقيبة فالجماعة قاعدين كنب,,واحد غنى (السمحة ام عجن) مافى واحد قدر يغنيها معاهو…يا جماعة حرام عليكم التشنيف دا..

هل نحنا ناقصين فن ومطربين؟؟يعنى البرامج كلها بقت اغانى وعلى وزن (ستار اكاديمى)..حتى الشعر لم يعد له مكان فى المنافسات,اما البرامج الحوارية فهى شحيحة ومعروفة منذ عشرات السنين..

اقترح ان يتم تغيير الاسم من ستديو النجوم الى (ستديو المعوقين)!!!!!

ونلتقى….

Advertisements
تعليقات
  1. لكن ماخليت ليهم حتة يقبلو عليها.

    • الأخ شمباتي سلام……..

      أولاً : صلاح طه بتاع إذاعة وتعتمد على الورق والظاهر النسى عادتو قلل سعادتو….
      هسع ناس الضرايب بشيلو عدادات من الفنانيين؟
      والله يا فارس الحقيبة أبكرونا وهجار كان ما بطلتو التلفزيون دا ….نخشى لكم أن تنفقع المرارة

      سؤال بسيط :
      هل التلفزيون لديه معهد لإعداد مقدمي البرامج وللا الحكاية وجاهة وكدى؟

      والله تلفزيونا دا أخير منو ناشونال جوغرافيك(wild) ياااااااااااااااأخوي بقلدو وما خايلة فيهم ياااااااااخي
      أنا بقترح نخرج لينا فنان من(ساخر سبيل ) نحفظو أغاني الحقيبة تمام بعد مرورو باللجنة المنظمة
      حيكون في سقوط كتير …أبكرونا ما بجامل حتى لو كان الحسس عذاب

  2. د.شمباتي
    ياخ ناس التلفزيون ديل انا من زمان زعلان من ألوان خلفياتهم دي
    خليك من ألوان ملابس المشاركين -ناس يدوك إحساس حلاوة المولد خرتمية لون ياااااخ!!! دا شنو دا!!
    لكن ناس النيل الازرق ماشاء الله عليهم الخلفيه لو زادت ما بتزيد من 3 ألوان
    كســــــــ ــــــــــــــره:-
    وأديني من لون الفرح
    وافرح معاي في سكه صي
    واوعاك تذكرني بي حزني القديم
    أصلي أنا زهجان وقافله معاي
    وخليك سوداني

  3. ابكرون كتب:

    انت يا يسن بجيبوا الفنانين والفنانات ديل كلهم من وين عشان يغطوا الثلاث محطات ديل في مدارس اساس بتفقع فنانين ؟ اها وبعدين بعد ما يتخرجوا من جامعة التلفزيون بمشوا وين ؟السوق ولا العدادات ….! حقوا الواحد يستثمر فيهم ….بعد شويه( ساخور) حتطلع لينا بمُداح الغد…وتليها طيبه وناس زووول بعد ما يخموا الناس من الخزن بتاعتهم والهمر …..غايتو جنس مرض….الواحد حواجبو وجعتو

  4. حاج أحمد السلاوى كتب:

    نحنا إن شاء الله بعد سنتين تلاته حيكون عندنا 5 مليون مطرب ومؤدِ ومغنى ..كدا كويس يمكن أسعار الفنانين ترخس شوية ..وما تنسى إنو الأولاد والبنات البيغنوا ديل أهلهم محتاجين عشان يعيشوا ووجدوا أسهل الطرق للحصول على المال .. عشان كدا حقوا يضيفوها لكتاب سبل كسب العيش فى السودان …

  5. زووووووول كتب:

    الاخ شمباتى سلااام
    قبل ايام قليله قرأت مقالا للكاتبه الجزائريه الرائعه احلام مستغانمى تتحدث فيه عن اهتمام العرب بالفارغه والمقدوده .وسؤال الكثيرين لها عن ورده الجزائريه عندما علموا انها من الجزائر ولم يسألوها عن جميله بوحريد . والمقال رائع بحق كعادة مقالات مستغانمى لكننى وبكل اسف لم اعثر عليه فى ارشيف الاهرام اليوم لكننى وجدت مقطعا جميلا فى احد مواضيعها يحكى عن تراجع اهتمامات العرب والمسلمين من قراءة مقدمة ابن خلدون الى الاستماع الى هيفا ونانسى وروبى .
    تقول مستغانمى :
    { فالأمة العربية، حسب أحد الظرفاء، نسيت في القرن الحادي والعشرين مقدمة ابن خلدون.. لأنها مشغولة بمؤخرة (روبي)!
    كسره :

  6. ياسين شمباتى كتب:

    استرايكر..سلام..
    لسه فى باقى غبينة ما فشيتها..ياخ ديل عجيبين خالص..

    عبدوز..سلام…
    اى والله,,لكن مهندسين الديكور ديل وظيفتهم شنو بالضبط!؟؟ كسرتك حلوة شديد لكن خربتها فى الآخر..

    ابكرون..سلام..
    والله منطق,,لكن المشاهد كمان ذنبو شنو!!؟؟ ناس ساهور عملوا (ملك المديح)!! ما سمعت بيها؟؟وكمان فى امراء ومراتب عجيبة كدة..سلامة حواجبك يا ملك..

  7. ياسين شمباتى كتب:

    الوالد السلاوى..سلام..
    ما قلنا شئ,,اليسترزقوا بعدين مناا بس,,بعدين ما ينسوا انو دى قناة فضائية,,يعنى فضيحة عالمية..بعدين العدادات لسه فى السما..حرم النور لما بدت تغنى اهل الحلة(القلقالة او الضقالة) احتجوا وقالوا لى ابوها : عيب عليها,,قال ليهم خلوها تساعدنى فى حق الكهربا !!!

    زوووووول..سلام..
    اى والله,,مقال رائع جدا وجانا فى الايميل من احد المدونين,,والنصيحة احلام مرقت الحقيقة,,والسودان بقى ينافس مصر ولبنان فى حنة المطربين دى..

    كسرة مهمة شديد:-
    المعوقين المقصودة فى آخر المقال تقرأ بكسر الواو والقاف ,اى بمعنى من يعوقون تقدم الفن والمجتمع,,وليش الشريحة الاخرى طبعا,,وهذا لا يفوت على فطنة القارئ وذكاءه..

  8. بشار أحمد بشار(إبن برد) كتب:

    إزيك يا دوك شمباتي : سؤال بريء جداً هل بالضرورة أن تكون الخلفية ملونة؟؟ بعدين إنتو باين عليكم بتحبوا تعذيب الذات البوديكم لحتفكم بظلفكم شنو؟؟ ناشونال جغرافيك أبو ظبي مالها؟؟؟

  9. ودالخلا كتب:

    سلام ياقبيلة،،
    دوك شمباتي سلام،
    لمن تقرع الأجراس يا صديقي، أمة أصبحت ساهية ولاهية، وفي غُيِها سادرة، لا رقيب ولا حسيب ولا وازع من ضمير، أنك حيثما تنظر في فضائياتنا وكلما أدرت مفتاحا” لقناة من قنواتنا أو أذاعاتنا، أو تصفحت صحائفنا وصُحُفنا تجد الأغاني والثرثرة والكلام، أمة” أضاعت نفسها بكثرة المغاني والأغاني والكلام، والحديث الممجوج في الفارغة والمقدودة، وكل هذا أهدار لجهد وموارد الأمة فيما لا طائل تحته، والناس في غفلة، وليس هنالك من رجل رشيد يرد الأمة لرشدها ، ويجعلها تفيق من ثُباتها العميق…
    الي متي هذا الهوان والضياع، وليس في الأفق بارقة أمل أو بصيص من ضوء يلوح في نهاية النفق المظلم يبث في نفوس الناس الأمل والرجاء…
    هيا بنا يا أصدقائي نوقد شمعة في مهب الريح هذه ونحميها بكل ما نملك عسانا نستطيع أضاءة الدرب للسالكين من أمتنا والغافلين من بني وطني الذين تفرقت بهم السُبل وتشتت بهم الأنواء وأضاعوا الأيام بين الأماني والتمني، وعلنا نستطيع قيادة الأمة لبر الأمان فلا مستحيل في مواجهة عزائم الرجال..

  10. مستر راعى كتب:

    اذا كان رب البيت بالدف ضاربا فشميت اهل البيت الرقص
    لكن رب البيت بالدف راقصا وشيمة اهل البيت الطرب
    اذا كان رب البيت بالميكرفون صارخا فشيمت الشعبى التهليلى ——–ماتفهمونا غلط ماقاصدين شعبى ولا مؤتمر
    يا جماعه الناس ديل بقروهم من عمر 3 سنوات من الحضانه والروضه والمدرسه والخ تعبوا
    بقروا حاجات مافاهمنها بحفظوا زى الطرش بغض النظر عن الفهم
    وخلاص تعبوا ماباقى الا الغناء —-بعدين الله يسألكم الواحد يتخرج من الجامعة ورجوله تحفى من فتيش الشغل حتى لو اشتغل ضرايب نفايات اللللللللخم

    يبقى بغنى وماعليه شى من منازلهم ومجموعه اهله لدخول عالم الفن الموضوع كله حنجرة صوتيه
    اما ناس القنوات الغبش دايرين زول يملا ليهم فقراتهم فلقوا المغلوب على امرهم ديل
    والمسكين الوحيد فى الموضوع ده كله المشاهد شاهد ماشفش حاجه
    ك
    س
    ر
    ة:
    تلفزيون السودان ده ظلمنا من زمان يوم واحد ماجاب ليه ناس تفتح النفس —
    شى عمه وشى جلابيه وشى بدله اكبر من الكتف وشى توب فيه ستين ورده وشى ستاير وشى مشمعات وشى موكيت كحلى زوق يحسدوا فيه

  11. ياسين شمباتى كتب:

    صديق الفولانى..سلام..
    بالضبط كدة,,بعدين لا فى معهد لا يحزنون,وحتى الوجاهة ما مطلوبة,,الواسطة واشياء اخرى_برواية الدورى_اما الضرائب ففلاحتهم فى المساكين,,لكن الفنانين الكبار المسجلين بالاتحاد عليهم ضرايب وكدة..

    عبدوز…سلام..
    كان سرح كان قعد ياهو الخاطر يا ولدى…

    العم بشار..سلام..
    والله كلامك صاح,,لكن ياها بلدنا وما بندور بشتنتها وياهم اهلنا وما بندور ليهم الفضيحة,,ونقول ننقدهم شوية كان ينفع فيهم..

  12. ياسين شمباتى كتب:

    ود الخلا..سلام..
    طيب انحنا دورنا ننقد ونمرق النصيحة ونبين العرج,,ودورنا هو اصلاح المجتمع بدءا بانفسنا والاقربين,,ودايرين بالجد نفكر فى التوعية والتبصير بالاخطاء الشائعة الضارة جدا,,ولا نيأس ونفقد الامل فى الاصلاح على خلفية الخير..ولنجعل شعارنا (من هنا نبدأ وفى الجنة نلتقى)…

    مستر راعى…سلام..
    صدقت اذ عرّضت…والله انا شايف انو التلفزيون فى حقبة الثمانينات وبداية التسعينات لا بأس به من حيث كفاءة المذيعين وجودة البرامج وملاءمتها للواقع ولحوجة المجتمع,,حتى الدولة كانت تهتم وترعى الفن بكافة ضروبه,,اما الآن فهى تهتم فقط بالموجه منه والمبتذل..

  13. والله يا دكتور تجربة نجوم الغد بتاعة النيل الارزق مش بطالة أهو خرجت لينا ريماز ميرغني وأخير فهيمة الفهيمة وقبلهما عافية
    لكن الود بتاع شمال افريقيا دي ربما هو فنان لكن كمنظم ومقدم برامج هذه مش لعبته خالص وممكن تحرقه كفنان
    الثالثة لم اشاهدها بعد

    مع تحياتي والود موصووول

  14. ياسين شمباتى كتب:

    عبدالمنعم..سلام..
    اوافقك الراى تماما,,ونجوم الغد على الاقل تتبع منهجية واضحة وبتنقى شوية_باستثناء التيم الاخير_لكن جماعتك ديل جايطنها سااااااكت..ربنا يصلح الحال….

  15. بت بلدى كتب:

    والله تلفزيون السودان فضيحه ولو ما نشره الاخبار ما اظن ممكن زول يشاهدو والله نحنا لما كنا فى الابتدائى والمتوسطه والثانوى كنا بنعمل جمعيات أدبيه ونخرجا أحسن من برامجم دى

  16. الغبشة كتب:

    سلام ياشمباتى: يااخوى القصه حاكو حاكو جداده ماكو وبس,,,,,,,,,,,لا فنيات لا لا اساسيات ولا اى شى برنامج يملا الزمن وبس والله يكون فى عون المشاهد البمشى بنفسه للدبرسه دى وزى ماقال ليك بشار البوديكم شنو؟؟؟؟؟؟؟؟؟
    كسره: نصيحه ناشونال جغرافيك ابوظبى والجزيرة الوثائقية روعه علم ثقافه متعه خلوها اساس بنامج برنامجين فى اليوم وخلى العيال والاخوان والاصحاب يشاركوك وحتلقى اللمة والصحبه فيها واحلى برامج ناشونال لم اكن اعلم ؟؟؟؟؟
    والى لقااااااااااااااااااااااءءءءءءءءءء

  17. ياسين شمباتى كتب:

    الغبشة..سلام..
    والله ما بندور الفضيحة لى ناسنا,لكن انا اصلا متابع قنوات تانية ومنتظم عليها,,وقت الدعايات والاعلانات بندى ناسنا طلة,,والطلة كتلت خلق الله!!!

  18. مخير كتب:

    ياسين سلام
    نحن ذاتنا بندعو معاك ربنا يصلح الحال ؟؟
    لكن ياتو فيهم الدايرنو ينصلح ؟؟
    كتف الغنا الميل ؟؟
    ولا حال الكورة الريل ؟؟
    ولا عالم السياسة الإتنيل؟؟
    ولا ولا ولا … وما تزعل يا طيب إن شاء الله بقدرة قادر تنصلح الأحوال كووولها وتتحقق الأماني الممكنة وبنقدر عليها ونعرفها آمييين
    ثم إنت حارق جازك مالك ؟؟ كان ناسك كان بني يعرب كوولهم لفاحين مافي إبداع … البتاعات البتقول عليها من زمن ستديو الفن إنتهاءً بالإستار أكاديمي إلخخخ كولو ملفوح من الخواويح … الأمريكان أيدول وما شاكل، يعني اللبنانيين يلفحوا من الأمريكان ونقوم نحن نلفح منهم يعني ثيرد هاند مش سكند هههه

  19. ياسين شمباتى كتب:

    بت بلدى..سلام..
    مرحبا بك ونرجو ان يطيب لك المقام معنا فى بلدنا الصغير مدونة الجميع والقبول لكل الآراء..حليل الجمعيات الادبية والليالى الثقافية ومهرجاناتها..حقيقة كانت تصقل الموهبة وتنشط الكل للمشاركة وتظهر المبدعين..

    الامير مخير..سلام..
    والله صدقت..لكن على الاقل الامريكان عندهم برنامج واحد ملتفين حولو!! انحنا كل قناة عايزة تقلد براها,,وكدة تبقى هندريد هاند بعد..الحمدلله ولسه بندعو بصلاح الحال..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s