صور من منطقة الشايقيه

Posted: الخميس,11 مارس, 2010 by طارق أب أحمد in اخرى

أعز مكان فى الدنا سرج سيارة و خير صديق فى الزمان كيبورد
منطقة الشايقيه

عندما تحط الرحال فى منطقة الشايقيه الممتده من سد مروى و حتى الدبه فأنك ستدرك منذ الوهلة الأولى سبب رهافة حس هذه القبيله و تفردها بالجميل من بالفن سواء غناء أو الشعر و الموسيقى فجمال الطبيعه على جانبى النيل يفوق الوصف

وهنا أدرج بعض الصور من المنطقه علها تسهم فى أدراك كنه جمال هذا الأقليم

Tarig

أدخلوها بسلام آمنين

جبل البركل و بجواره الأهرامات

TARIG

منزل فوق جبل


و نخيل

وشلال

نوبيان هاوس قريه سياحيه كريمه

نوبيان هاوس قريه سياحيه كريمه

أهرام مروى

نوبيان هاوس قريه سياحيه مروى

قريه سياحيه مروى

قريه سياحيه مروى

مظله


أهرام البركل

دكان

أخيرا لا بد من الأشاره ألى أن الشايقيه عرفوا بأنهم صعبين شديد ولم أجد دليلا على ذلك أبلغ من هذه اللافته التى تشير الى أسماء بعض القرى و مثلها كثير فالشايقى شدة ما صعب عمل كل قريتين فى لافته واحده و الأصعب من دا أنو بالرغم من أن ألأسماء مجانا فالجماعه أختاروا أسماء يستحيل معها أن يكون لديها محليه و ضابط أدارى لجمع الجبايات يعنى زى لامن يجى يقدم نفسوا للناس يقوم يقول ليهم أنا ضابط أدارى أم جفره و الكعره .

Advertisements
تعليقات
  1. ابكرون كتب:

    شكرا يا ابو احمد والله روعه
    الليله نقوم جاريين من الزهراء وسهيل وكبيرهم سنكل حياكلوا راسنا….ما كان تديهم الفرصة دي ههههههههههه…….كان تصور لينا التماثيل في مدخل البركل …..بس ناس الزهراء يعرفوا انو دي بتاعة اهلنا النوبة الفراعنة السود اجدادنا المحس حكمناهم من عاصمتنا كرمة والدفوفه وكنا (هارين )الشايقيه ديل مشغلنهم (ارقوقات) في السواقي هههههههههههههههه اليله( شجمك يا ابكرون) من سنكلوني
    تحيه للبركل ومروي شرق والقرير وديم ود حاج والكرو وشيبا و(ناسا) الحلويين…….

  2. شكرا يا أب أحمد على السياحة و عكس جزءا مهما من بلدنا الجبيبة بس سؤال سغيروني زي بتاع عمك

    وين الناس !!!!؟؟

    أكيد مشتتين و قاعدين يطلبوا في العفو……

    بلاد كثيرة هجرها أصحابها و يقيني تلك المشاريع التنموية بالرغم من ظلمها لبعض الناس زي ناس سكان منطقة سد مروي الا و أن البنيات التي قامت كفيلة بأن ترجع الكثير و تدفع بالمزيد من المهاجرين للعمل و الاستيطان في تلك المناطق باقي الخرطوم بقي مستحيل فيها الشغل….

    طبعا يا أحباب أول شئ سألت منو أب أحمد المظلة باقي في البيت البستاني عندي مظلة محتاجة لخبراء و مبتكرين كهؤلاء الناس….
    ما أعمل ليكم نقشتا براي فقد هاتفت أب أحمد الذي قال انها مصنوعة من جريد النخل عندما يشقق و ينسج بتلك الطريقة الرائعة كسجادة تفرش فوق المظلة…!!

    و كمان سألتو من حاجة تانية…. الفول..!!
    و طمأنني بأنه قد ظفر بقطف أول لو الجماعة ما عملو شئ في الموددوع حأمشي أطمئن على حلاوة الفول بنفسي…. شدو الفول يا أب أحمد !!

  3. نيام كتب:

    الاحبة اب احمد الموثقاتي و د. ترطيبة و ابكرون:
    نشكرك يا اب احمد علي روعة الصور و اشهد انك فنان في التوثيق و تكنولوجيا الزووووووم اوت….
    جمال دار الشايقية هو نتاج جمال الفرد في هذه القبيلة الرائعة …اما الشطارة في اختصار الاسماء للقفز فوق زانة الجبايات فاعتقد ينم عن ذكاء متفرد وهو ذكاء مطلوب مع جباة الاحسبون..
    يا ابكرون iي صح هريتونا و شغلتونا ارقوقات الزمن القديم في كرمة والدفوفه علا انقلب السحر علي الساحر وفتحنا مدرسة السناتور لنعلمكم كيف تطعمونا ..اماني تركينكم مو طاعم…نان أشنو؟؟ (يا اخوانا وين افليقا ) …

  4. مشاكل كتب:

    سلامز

    مناظر جميلة و خلابة تعكس حضارة السودان القديم و يا ريت المستقبل يكون احسن و احسن

    لكن نحن شايقست تايواني اتحرمنا من منطقتنا في نوري … بس متقعمزين في الخرطوم دي لمن جابت كثافتنا

  5. الزهراء كتب:

    تحيه شايقيه صباحبه ممزوجه بعزوبة النيل ومصحوبه بي نغم جريد النخل والقمري وصوت السواقي

    فعلا جمال الطبيعه عند الشايقيه كان له كبير الاثر في ثقافتهم وشعرهم وحنين كلمات اشعارنا جا من صوت السواقي الحنينه وزغردة القمري والعصافير- وما ننسى الخضره والنخيل الادى انسان هذه المنطقه صفات الشموخ والعزه- وطلع من قلوب ابناء تلك المناطق اجمل التعابير للوطن والام والحبيبه
    حلات بلدي وحلات بيلا وحلات الطيبه والطيبين
    حلاتا بشيلا في دمي واشيل طنبوري اغنيلا
    وحلات بلدي

    شكرا اخي اب احمد على ذلك التوثيق الرائع
    اما بالنسبه للرجوع للموطن الاصلي فقد بدا الكثيرين من ابناء الشايقيه بالرجوع والتعمير في مناطقهم وذلك بعد انشاء المشروعات والسد والشوارع وغيرها

    حنيني لبلدي حنين فايت الحد

    قالوا الشايقيه كلهم في موسم حصاد البلح بتقوم ليهم حبه في جبهتم- من شدة ارتباطهم بهذا الموسم المهم

  6. ابكرون كتب:

    ههههههههههههههه خايفين من سنكل نطا لينا اخوه الاكبر….غايتو يا الشايقست !…غايتو العارفه انه تناسلنا زماااااان وعملنا ليكم محسنات بديعية جينية وغيرنا لون الصبغة الوراثية هووووولكم لان جدي تهراقا كان معرس زي مية شايقيه …..!
    شفتالفرق يا مشاكل بين تتربي ولو شويه في البلد وتجي (الخرتوووووم)…..وبين تكون قشره زي ناس تانين وما تشوف مروي وكريمي ؟ زي الفرق بين : (جابت كثافتنا)…….وكلام عمك نيام (نان أشنو أو أشني)….لكن ما راح شي البلد منتظراكم وخيرا منتظركم …..يلا هبوا هجرة معاكسة وحريقة في (الخرتوووووووووم)…………..!

  7. ودالخلا كتب:

    سلام ياقبيلة،،
    أحييك صديقي أب أحمد علي روعة التوثيق السياحي وجمال الطبيعة في بلادي، ولكنني أتساءل مع صديقي دوك عزت عن الناس والناس التانين أين هم؟؟
    وتحايا صاحبك كبير البيكمونات المحمولة لتلك القري الجميلة والتي فيها من سحر الطبيعة وجمال الأنسان ما يؤكد مقولة الجمال المسحور وخصوصا” قري نوري والقرير وشييييييييييييييييبااااااااا وناسا الفضائيين ودي كوم براهو…..

  8. طارق أب أحمد كتب:

    عزت و ود الخلا
    ( الناس إندلو الجناين )
    نفس السؤال وجهته لمعتمد الدبه فأجابنى بأن كل تعداد الوليه لا يتجاوز المليون

    أبكرون
    جاييك بى بوست صور كارب لى أهلك النوبه

    نيام
    شكرا على الأشاده و دى شهاده فعلن أعتز بيها
    بس أرقوقات دى لا أنا لا أخوى الكاشف السلاوى ما سمعنا بيها

    مشاكل
    ياخى المسأله ساهله جدا المشوار بالعربيه لا عن كورتى 4 ساعات و الفنادق زى ما شايف

    الزهراء
    قتلى الشايقى بقوم ليهو قرن أيام حش التمر

  9. حاج أحمد السلاوى كتب:

    إبن بطوطة السودانى أب أحمد..
    خلاس إعتمدناك موثقاً تاريخياً للمنتدى ..
    بس ما قلت لينا ماذا تعنى أم جقرة والكعرة ..أكيد شايقية الخرتوم زاااااتهم ما عارفين معناها شنو !!
    غايتو أرقوقات دى يطرشنى ما سمعت بيها !! كدى النسأل منها عمنا الكبير الكاهن .. اقصد الفكفك .

  10. مشاكل كتب:

    سلامز

    إنشاء الله مصيرنا نرجع تاني لي بلدنا .. نستمتع بي حدائق نوري البنسمع بيها سمع دي

    السنة الجاية انشا الله ح يكون في مشاريع كتيرة ح تفتح هناك و خاصة الزراعية منها

    البلد غنية بي مواردها لكن ينقصها التخطيط السليم .. و دا في طريقو انو ينتهي انشا الله

  11. مخير كتب:

    الفنان المصور الرائع أب أحمد
    الحبان في كل مكان
    سلام وشوق
    الصور بديعة ودعني أحي عدستك الأخاذة، فإنها ليست الكاميرا التي تجسد الجمال بل حس الفنان المرهف خلف العدسة هو الذي يصور الجمال كما يراه ويشرك المشاهد في روعة المشهد، يفعلها البعض بالريشة ويسطرها الأدباء بالقلم، أما المصور فهو ينقل شغل المصور الأكبر جل في علاه كما هو بتفاصيله الدقيقة والرقيقة بل رتوش أو فوتوشوب. فالشكر لك أب أحمد على هذه اللوحات التي تتحدث عن نفسها وتقول الكثير المثير. وزدنا من هكذا لفتات.

  12. حاج أحمد السلاوى كتب:

    بالله ياجماعة … أى واحد شايقى يرفع إيدو .. اليمين بس !!!

    • الأخ السلاوي…تحية عطرة ولكل أهل المنتدى

      والله حرام أن يعيش السودان في ظل الحروب التي لا تفضي إلا للدمار….وليت أن نرى صوراً جميلة عن الغرب والجنوب والشرق ….
      أقترح عمل قاموس للمفردات اللغوية عشان العيال يعرفو حاجة وما يجي يوم نحتاج فيه لعمنا قوقل

      وكمان صفحة لصور من بلادي نختار فيها لقطة الأسبوع أو الشهر(معرض صور) يوثق للمنتدى
      ليكون موسوعة جغرافية للعيال أصلو حصص الجغرافية بقت ما فيها فايدة آهو نرجع للقولد والجفيل
      صورة لأطفال المنتدى عموماً دي فكرة لمشاركة الأسر …

  13. ود الفتيحاب كتب:

    ياسلام على هذه الروعه والجمال فى المكان والكلام ، أب أحمد لك التيحيه والجمع المبارك الطيب ، وحلوة المناكفه والناس رايقه ، تشرب فى شاى الصباح ، وحولنيه جريده يوميه عليها عنوانين الصباح ، وصوت ساقيه فى الفجريه ترونى الطين ، لكم جميعا أجمل صباح …

  14. ود الفتيحاب كتب:

    قبل أبكرون كدى النجتهد لى عمنا السلاوى فى معنى الارقوقات
    قيل فى معجم أبكرون الكبير فى تفسسير النحو .
    أن الارقوقات جمع أرقو ، والأرقو هو عود طويل يوضع على رقبة الثور فى الساقية ، وعند تجرك الثور بقوتة يسحب معه هذا الارقو المربوط مع بقيه أجزاء الساقيه فتتحرك كل الساقيه فى حركه دوران
    تسحب من خلاله المويه من الجابيه عبر القواديس الى الدروة ثم الى السباليق ثم الى الجداول ثم الى الحيضان لتروى الزرع ، وعاد يالسلاوى الحق الفكى أبكرون يفسر ليك هذه الاسماء قبل نومة الظهيرة
    ….

  15. ابكرون كتب:

    الأرقوق يا سادة هو تور الساقية ويطلق علي التور المفرد الذي يربط عليها ليديرها حتي تتدفق المياه عبر الجداول الي (التقانت) ههههههههههه قابضك يا سلولو حتقولي تقنت شنو ؟ يسمك……

  16. ياسين شمباتى كتب:

    اب احمد والاحباب..سلام..
    بلادى انا,حبيبتى انا,,مروى وابودوم والقرير وتنقاسى السوق والرويس وديوم ود حاج ومساوى وجزيرة سيدى على و……..
    متين يا الله نرجع للبلد طولنا..هكذا لسان حالنا يغنى مع (اليمنى) ايام كان صاحيا مع الشعب..
    والشمال بلد الاحبة..ويا رمسال قبايل الشوق انا الضهبان..وما شفت عوض يا سارى الليل..والكثير غيرها من مفردات اهلنا وحبايبنا..

    ابكرون..اظن صور البيت الفوق الجبل دا من قرية (شيبا)..خصوصا انو الزول دا عدّ بالشرق..
    ومعلومة مهمة جدا,اهلنا فى الشايقية بعكسوا التجاه!! فالغرب شرق والشرق غرب!!! لانهم ما ادوا اعتبار لانحناء النيل واتجاه الشمس,,يعنى الاتجاه عندهم اعتمد على العادة وليس الشمس…

    التقنت..الباجورى..الانقاية..البتاب..الآرتيق..مفردات صعبة المبنى جميلة المعنى..

  17. الجموعي كتب:

    ياسلام عليك يابلادي

  18. بشار أحمد بشار (إبن برد) كتب:

    عزيزي أب أحمد
    كثيرا ما تستوقفني فصاحة الشايقية وحسهم ووجدانهم المتدفق وحنينهم للأوطان الذي تعبر عنه أغانيهم وألحانهم الشجية والآن أدركت أسباب البكاء ونقف الحنظل لدى سمرات الحي .

  19. طارق أب أحمد كتب:

    شايف يا سلولو كلنا طلعنا أرقوقات و حتى اللارتيق ما لامين قيهو

    شمباتى ياخى حكاية شرق و غرب دى جهجهتنى جهجهه يعنى عشان تعرف أنك فى الشرق ولا الغرب لازم تبارى النيل من أبو حمد

    مخير مشكور على الأشاده

    ود الفتيح باكر الجمعه نحاول نطبق برنامجك الصباحى دا طبعن لو ما عملوا شى فى المودوع

    الجموعى تشكر على المرور و ما تنقطع و خليك قريب عشان الأنترفيو بتاع عمك الحاج السلاوى

  20. حاج احمد السلاوي كتب:

    السادة السُمار … صفوةالأخيار ..
    أولاً نحقق طلب أخونا أب احمد ونرحب بالأخ الجموعى صاحب الكلمات الثلاث صديقاً وعضواًً فاعلاً مع إخوانه من الشباب وأعمامه الكواشف ونتمنى أن يجد ما كان يصبو إليه فى هذا المنتدى إن شاء الله .. بس نرجو منه أن يورينا موقعه الجغرافى فى الكرة الأرضية لتسهيل التواصل معه ..طبعن إن كان يرغب فى ذلك .
    – أخونا الكاشف الصغير ود الفتيحاب ..حمدلالك بالسلامة .الجماعة سافروا ولاّ شنو ؟ ما كنا قايلنك بيتوتى درجة أولى !!ومشكور على الشرح الوافى للمفردات (الشايقية )وإن أختلفت مع شرح الفكف بكرونا وأقترح أن تعملوا لجنة توافق لتوحيد معنى كلمة أرقوق ..واحد قال هو العمود والتانى قالهو التور( الثور )..وحِدوا الصف !!!
    وللعلم السواقى دى كانت موجودة فى الخرطوم أيام الزمن الجميل .. شفتها يا بو عصمت ؟
    والسؤال السغيروووونى ..هل من المفترض إنو الزول لازم يعرف معانى كل المفردات السودانية ؟ … لا أظن ذلك ..

  21. sobajo كتب:

    المرهف اب أحمد
    تعجبني وتطربني لدرجة الثمالة اشعار وغناء اهلنا الشايقية بالطنبور لانها تلامس اوتاراً حساسة في دواخلي خاصة عندما يتناولون الغربة وشجونها وشوقهم للاهل . ففي اشعاهم حنية صادقة غير متكلفة وهذه المناظر الطبيعية الخلابة تؤكد على ذوقهم المرهف . مشكور يا اب احمد على هذا الجمال والخضرة .

  22. ابكرون كتب:

    جمعة مباركة:
    سلولو التحية ليك ولود الفتيحاب ….ياخ دي متاكد منها وشئ عشته بينه فترة …وجلست خلف الارقوق وهو يدور: الارقوق هو ثور الساقية الواحد لان الساقية عادة تدار بثورين …..وععشان تتاكد زياده هاك الكوتيشن ده من موقع ناوا عروس النيل :
    ( الارقوق : فى العادة تدار الساقية بإثنين من الابقار وفى بعض الحا لات تدار بواسطة تور واحد ويطلق عليه (ثور ارقوق) اي المنفرد ، ويكون من الثيران القوية عادة)
    وزيادة في الثقافة التراثية ….
    اليك الموقع تحت وفيه شرح لبعض اجزاء الساقية ….يا سلاوي يا (ألس) اكيد دي (ما التور التاني هههههههه)………عموما كل مفردات الساقية مفردات نوبية بحتة
    http://www.nawaonline.net/vb/showthread.php?p=113293

  23. محنك كتب:

    اولا نشكر ابواحمد على زيارة ديارا ما شفناها ونتمنى زيارتها ( علا انا ما شايقست )
    اظن ان الارقوق هو عود الساقية والتور هو ( الجرّق )

    قال الشاعر تورالجر فى قصيدة ودكين وطه البطحانى

    جرّق ما جفل خايف صياح الساقية
    والحاسّة السرج لابد تكورك راغية
    عرفناها عاد الفارقة ماها ملاقية
    عرفناه المعاك نرجع وتبقى الباقية

    فالشاهد فى المعنى ان الجرّق وهو تور الساقية لا يجفل خائفا من صياحها ( اى اننا لا نهاب الحرب لاننا نعرفها ) والحاسة السرج ( التى اسرجت بطريقة تؤلم ظهرها ) مافى واحد يقول السرج شنو بتكورك يعنى تصيح وراغية من رغاء الابل يعنى اذا تالمت سيكون لك رد فعل

    وانا حضرت آخر ساقية فى قريتنا وركبت خلف تيرانها وتعلمت اسامى اعوادها من جدى ولكن نسيت الكثير منها ولا زال الجرّق عندنا هو الشخص الهميم والمهم والشهم

    ويمكن نكون نحن ما اخذنا كل اسماء النوبة او عربناها ( درّجناها بالاصح )

  24. طارق أب أحمد كتب:

    اجزاْ الساقية
    الحلقة الكبرى :
    والمعروفة فى لغة النوبة
    (أرقدى) وهى الترس الاكبر الذى تحركه الابقار بواسطة (التكم ) وبالتالى تتحرك بقية أجزاْ الساقية الاخرى . والحلقة الكبرى تتكون من اجزاْعدة منها (التوندى) (والنوامق) جمع نامقه (والسندقيق) وهى التروسالمركبة فى (النامقة ) وبواسطتها تتحرك الحلقة القلب ثم التوريق ثم دولاب المياه .

    (العطفة)
    المشق:_ بكسر الشين المشدده ،هو العمود الريْسى الذى تثبت فيه الحلقة الكبرى .او محور الارتكاذ الذى تدور بواسطته الحلقة الكبرى .وتركز قاعدته على قطعة خشبية تسمى (الكديس) وثبت رأسه فى (الديو) عدد سندقيق الحلقة الكبرى (40) سندقيقة كل واحد من سندقيق الحلقة الكبرى تعادلها واحدة من سندقيق الحلقة الصغرى بنظام دقيق وإذا اختل هذا النظام توقفت الساقية .
    الديو : وهو العمود المستطيل الممتد افقيا فوق ( المشق) ويثبت فيه الجذ ْ الاعلى من المشق
    ويثبت الديو على عمودين أحدهما يسمى (البقدوق ) والاّخر يسمى (ليدوكرى)
    التكم : التكم عمود له فرعان يثبت جزعه فى المشق وينسج مابين الفرعين بالحبال ليجلس عليه (الاروتى ) ومتد من التكم حبل غليظ يسمى الارس ويربط فى (الاسلام )الذى يوضع على اكتاف البقر
    الحلقة الصغرى : او (الحليقة ) وهى على نمط (الحلقة الكبرى ) وبواسطة الحليقة يتحرك (التوريق)
    التوريق : وهو العمود الريْسى والذى يشبه( عمود طوالى )فى السيارات ، وبواسطته يتحرك دولاب المياه (العطفة)
    العطفة: اودولاب المياه والذى يحمل 0(الالس والقواديس) ومن اجذاْالعطفة (الفاشوق والترنتريق)
    القور : هو العمود الذى يرتكز عليه التوريق .
    الالس والقواديس :الالس حبل غليظ يثبت عليه 0(القواديس ) الجرار الصغيرة من الفخار تربط فى الالس بطريقة فنية لايعرفها ىإلا المزارع التخصص فىاعمال الساقية

    الارقوق : فى العادة تدار الساقية بإثنين من الابقار وفى بعض الحا لات تدار بواسطة تور واحد ويطلق عليه (ثور ارقوق) اي المنفرد ، ويكون من الثيران القوية عادة

    الصمد والترابلة : الصمد هو ريْس مجموعة المزارعين المنضوين تحت ساقية واحدة وهو ميسمى حديثا بريْس العمال الزراعيين وهم الذين يطلق عليهم اسم 0(الترابلة) ومن المميزات للصمد ان يكون اكبر سنا واكثر خبره بأعمال الساقية والزراعة .واكثر نصيبا من الارض الزراعية فىبعض الحالات وهو المسوْول عن الساقية والجباية 0(طلب الحكومة )وجمعه لشيخ المنطقة

  25. بشار أحمد بشار (إبن برد) كتب:

    جرّق ما جفل خايف صياح الساقية
    والحاسّة السرج لابد تكورك راغية
    لله درك يا محنك في إجادة الإختيار وإسم على مسمى.
    “مافى واحد يقول السرج شنو بتكورك يعنى تصيح وراغية من رغاء الابل يعنى اذا تالمت سيكون لك رد فعل” فعلا في ناس فكرهم بمشي بعيد.

  26. سهيل كتب:

    يا سلااااااااااااااااااااااااااااااااااااااااااااااااااااااااااااااااام … اها رايكم شنو نقوم الرحله نمشي البلد ( الشماليه ) نشوف الجناين و السد و اهو نكون عملنا رحله كااااااااااربه ” بدون حبش”..

    د. عزت : ماشي السليم متين ؟؟؟ قصدي لأب احمد .. خسمتك بالنبي ما تفوتني

  27. محنك كتب:

    العزيز بشّار
    شهادة اعتز بها لكن لا اظن استحقها

    فعلا ريفنا على النيل جميل جدا وانفر الشمال من الشايقية الى حلفا بالتمازج بين الحضارة القديمة والرقى وجمال الطبيعة بالرغم من ذلك عدد السكان فى تناقص .

    الخدمات العشمنا فيها بقت جبايات تطرد الفضلوا

  28. البشاوى كتب:

    أب أحمد- والسمار
    تحية ندية من دارشايق – روعة فى التوثيق – وياريتك كمان لو لاقيت عواجيزنا كان أدوك توثيق تأريخى يضاف لتوثيقك الراقى – كان ادوك جرعات من الغنا الجميل وجرعات من ألطف المعانى – وبعض السخرية الحلوة
    أبكرون – سبقتونا زمان كنا مشدوهين فى المريسى – لكن بعد وعينا ليكم تانى مابتلحقونا كان جرى ولا نط ههههههة

  29. علي سنكل كتب:

    أب أحمد سلامات
    ومشكور على التوثيق ولكنك مقل ونحن عطشانين للمتل دا ، دحين عليك سيدي الحسن الكان ما رجع تاني ، أرجع تاني وتم عقابو.
    أبكرون طبعاً ما حأقول ليك شئ لأننا شعب واحد بس نحن متهمين بالطوريه والعسكريه وإنتو بالكمشه والحله.
    قال ليك يا أبكرون الضباط في كورس في مدرسة المشاه في جبيت ، كانت وجبة العشاء بجيبوها ليهم بدري جداً. والطباخين من عندكم طبعاً. يوم الضباط مشوا ضربو ليك عصير التمر وتأخرو على العشاء. ورجعو جيعانين جداً ، مشوا الصفره الطباخ رفض يفتح ليهم وقعدو يحنسو فيهو ساعه وما قبلان. في واحد من الضباط من عندكم رطن مع الطباخ.
    الطباخ قال ليهو تيب أدخلوا ، وإنت أيه يجيبك مع الفطايس دول.
    منطقة الشايقيه يا أب أحمد من أجمل مناطق السودان جمالاً ، لكن المنطقه الجميله محدودة المساحه وهي المنطقة الواقعة على ضفتي النيل ، والباقي صحراء قاحل. وده السبب إنك ما لقيت الناس ، الناس سافرو للعسكريه لمان الطوريه بقت ما جايبي همها.
    البشاوي: نحن ما شغلتنا المريسي شغلنا الغنا للبنات السمحات.
    تلقى الواحد يغني ليها ويضيع يومو كولو وفي الآخر تطلع معرسا ومتموم حلوها وجاي إجازي بس لي عرس أخوها.

  30. ابكرون كتب:

    ههههههههههههه والله ضحكتني يا سنكلوني والنكنه حلوه لكن كلام البيشاوي صحيح زمن بعانخي وحتشبسوت وتهراقا غنا شنو العندكم دخلنا ليكم سيستم الطورية القلتها وعلمناكم تزرعوا كيف وعرسنا البنات السمحات كلهم…..اديك نكته حقيقية اسال منها بشار : عندنا حلفاوي طباخ ببورتسودان برتبة صول…مره جينا فراش زميل وسالناه عن كشف المواجبة قائلين : (الدفتر وين يا فلان؟) فما كان منه الا وان تلفت ودخل يده في جيبه وقال : (ديفتر في لكن بتااااع بسيت).. واخرج دفتر لف من جيبه لدهشتنا…………!

  31. رشا الفنجري كتب:

    احي كل الشايقيه علي الارض

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s