البرنامج الانتخابي

Posted: الثلاثاء,23 مارس, 2010 by عزت in اخرى

طبعا يا أحباب الموضوع قرب و حكاية استمالة الناخبين دايرا ليها “جكة” باقي ناس السودان الحلوين ما بيتغشوا بسهولة لكن عيبهم انو كمان بينسوا بسهولة و ما ازالة آثار مايو ببعيدة و لا عفى الله عما سلف خلوها…

عموما لكثرة المترشحين يحتاج المواطنين  لتوعية في الأول كيف يملأ المواطن بطاقات الاقتراع الثمانية أولا خليهو المرشح باقي العملية معقدة و المرشحين كتار و الزمن ضيق  كما تتميز الانتخابات  هذه بالتعقيد، حيث يواجه الناخب داخل المركز الانتخابي عددا من صناديق الاقتراع، منها اختيار مرشحه للرئاسة، ومرشحه لحاكم الولاية الذي يوجد فيها، وممثليه للمجلس الوطني، (البرلمان المركزي) وممثليه للمجلس الولائي، وتزداد الصناديق عددا في الجنوب، حيث يصوت الجنوبيون أيضا  لرئيس حكومة الجنوب. وسيخوض السباق 66 حزبا.

غايتو قلبي على المواطن يعمل شنو و يخلي شنو في ظل تنوع الحملات فبعضهم ركن للشخصيات القومية كمنزل “علي عبد اللطيف” انطلاقا للحملات و واحدين مشوا بيت الأزهري و واحدين مشوا استاد الهلال علة كانوا مفتحين اذ زاروا و افتتحوا منشئات استاد المريخ بل تبرعوا حتى لا يفقدوا ود المريخاب… و واحدين استمالوا المغنيين الوطنيين زي وردي و بتوع الشباب زي محمود عبد العزيز… و أولاد المهدي ما زالوا في كلامهم المفيد و الما مفيد مرات لكنهم جزلون بأنهم قد وجدوا منبرا يستطيعون التنفيث من خلاله و ما حلقة مبارك الفاضل ببعيدة في مجهر سونا …. و الله ما خلى للجماعة جنبة يرقدوا عليها، كما تميز مرشح الاتحادي حاتم السر بالرزانة و المحاورة اللبقة علة نقد اظنو محتاج لسماعة أذن باقي الراجل كبر شوية و يحتاج أن يعيدوا له السؤال أكثر من مرة…..

كما ادخلت السيدة الأولى المتوقعة بالنسبة للجدد ككامل ادريس و واحدين اعتمدوا على السيدة القديمة المتجددة و لكن يعيب الناس على ناس المؤتمر انهم كثفوا الدعاية و الصرف الشديدين لأموال يجتهدون كثيرا في جعلها حلال و من حر مالهم… عموما فالمطلوب الآن أن لا يعول المؤتمر الوطني على جهاز الدولة وأموال الحكومة كثيرا ، و لكن السؤال هل يمكن ذلك في ظل وجود الدستوريين و التنفيذيين المترشحين على سدة الحكم و تكثيفهم هذه  الأيام افتتاح المنشئات فما استاد أمبدة ببعيد و لا كهربة شنو ما بعرف  و لا الزيارات المتعددة لأماكن لم يزرها الرئيس من قبل …… غايتو المطلوب في إمكانية تحييد إمكانات الدولة… فهل سيقدروا

نتمنى ان تعم الديموقراطية والروح الوطنية ربوع السودان، ونتمنى ان ينعم اهل السودان بخيرات بلادهم وبالامن والاستقرار ، وان نودع الى غير رجعة عصر الانقلابات العسكرية والديكتاتوريات وان يظل السودان شعبا موحدا، جنوبا وشمالا غربا وشرقا، وطنا بحجم قاره ، كبيرا في اعين الاصدقاء والاشقاء قويا  لدودا في وجه الاعداء و ما تبقى برامجهم الانتخابية زي أخونا التحت دا

Advertisements
تعليقات
  1. عزت كتب:

    عشان ما يقولوا عزت لم يركن لعدالة توزيع الفرص فها نحن نذكر انه جديرا بالذكر يترشح لمنصب رئيس الجمهورية بجانب الذكرناهم الفوق ديك عبد العزيز خالد عن التحالف، عبد الله دينق نيال من الشعبي و فاطمة عبد المحمود عن الاتحاد الاشتراكي السوداني الديموقراطي و هي أول امرأة تترشح للرئاسة في تاريخ السودان، كما كانت ايضا اول امراة وزيرة للصحة أبان عهد نميري، و منير شيخ الدين جلاب من القومي الديمقراطي الجديد و محمود أحمد جحا مستقلا……ليصير العدد 12

    ربنا يوفقهم كووووولهم انشاء الله

  2. حاج أحمد السلاوى كتب:

    أبو عصمت ..وبقية صفوة الأخيار ..
    إن شاء الله كووووولهم يفوزوا …
    إيه رايكم فى الإقتراح التالى : عدد المترشحين لرئاسة الجمهورية 12 مرشح .. إيه رايكم نخلى كل واحد يبقا رئيس كل شهر ..ونبدا بالحروف البجدية ..أو القرعة .. مش مهم .. عشان ما فى زول يزعل ..وبكدة نضمن وحدة السودان والناس تنسى حكاية الإنفصال .
    وبما ان ولدنا مشاكل ما قبلان بمرشح الحركة الشعبية وصديقه اللدود ود عرمان فنقترح عليهو إنو ياخد إجازة فى شهر عرمان الرئاسى ويمشى عند أحبابه فى أم الدنيا .. ولحسن حظك يا مشاكل صاحبك حتكون رئاسته فى نهاية كل سنة ( لأن إسمه يبدا بحرف الياء ).. والأمر ينطبق على اخينا الزول ( ابو سبعة واوات )… وبكدة يا جماعة نكون وفرنا الموال الطائلة اللى حتروح هباءاً منثورا والمستفيدين منها عدد بسيط من الناس …
    ويبدو إنو حكاية السيدة الأولى ( عواطف ) بدت تظهر فى مجتمعنا السودانى ..بما ليها من تاثير داخل الحوش وبرة الحوش..حقو تورينا عواطفات بقية المرشحين وأكيد حيكون عندنا ميشيل أوباما … اقصد ميشيل عرمان .. مش كدا يا الزووووول ومشاكل !!!
    وخلونا النشوف آخرتا شنو !!

  3. mon amie كتب:

    ياسلام عليك عزت
    انا عندى اقتراح وبلا تصويت وبلا لمه كل واحد من ال12 ديل احكم 3 شهور يعني فترة اختبار نشوف انجازاته القال بسويها للشعب واحسن واحد نقوم نعمل تصويت ونديهو اصواتنا ويكون هذا الاقتراح اجابه للناس البتسال البديل منو؟

  4. mon amie كتب:

    ياحاج والله انا ما سرقت اقتراحك لكن في نفس اللحظه الانت كنت بترسل فيه تعليقك انا كنت بكتب تعليقي واندهشت لمن قريت تعليقك ووجدته قريب لتعليقي وفي نفس الوقت يا سبحان الله

  5. حاج أحمد السلاوى كتب:

    توارد خواطر ..

  6. مشاكل كتب:

    سلامز

    أنا أعترض … إذا أناموجود

  7. ابكرون كتب:

    هل شاهدتم زيارة النائب الاول قبل اسبوع والتطبيل للصافي جعفر وهذا المشروع هذه الزيارة يا عزت كانت لابراز المشروعات والانجازات للانتخابات ورائحة هذا المششروع تزكم الانوف…؟طالع الخبر بالصحف:
    ————————–
    إعفاء الصافي جعفر من إدارة مشروع سندس الزراعي
    في قرار جمهوري صدر أمس تم إعفاء السيد الصافي جعفر من إدارة مشروع سندس الزراعي ، بعد نحو عقدين من الزمان لشغله هذا المنصب . وقد تقرر تعيين الصافي جعفر أمينا عاماً للمجلس القومي للذكر والذاكرين . وفور صدور القرار عقدت إدارة مشروع سندس اجتماعاً امس برئاسة عبد الرحمن الخضر والي الخرطوم وتقرر بعده تكليف السيد احمد حسن طمبل مديراً للمشروع الي حين انعقاد الجمعية العمومية التي يناط بها اختيار المدير الجديد لإدارة المشروع الذي يبلغ عدد المساهمين فيه 850 مساهماً وأوصى الاجتماع باعداد ملف كامل عن المشروع مع تقرير مالي من المراجع العام وتقديمه للجمعية العمومية . يذكر ان مشروع سندس الزراعي كان محل نقد وشكاوي واسعة من المساهمين والصحف ، بسبب التأخير في تسليم وتجهيز اراضيه للمشترين ومعظمهم من المغتربين السودانيين بالخارج ، الذين سددوا مبالغ طائلة بالعملات الصعبة وظلوا في انتظار الاستلام . كما نشبت خلافات داخل المشروع بين ملاك بعض أراضيه المنزوعة وبين إدارة المشروع ، أضيفت اليها مؤخراً مشكلات بين الإدارة واتحاد المزارعين
    ———————————————-
    قال الذكر والذاكرين …هههههههههه نفسي المخطئ يحاسب والله يعين المغتربين اصحاب المشروع…..

  8. عزت كتب:

    ها ها اقتراحاتكم رهيبة يا السلاوي و مون و الله مافي أجمل من كدا و يوفروا الملايين دي لي محمد أحمد انشاء الله يعمل بيهم كبري…

    شوفت كيف يا ابكرون يعني أموال الشعب السوداني دي ما مهمة عطلها و بددها… و في النهاية الذكر و الذاكرين…………

    غايتو أنا مبسوط لأنو الزول دا ما بنفع الا لي جنس تديلس مجلس السلطان … شيتا خلانا نخلي ممتكاتنا في المشروع (جديرا بالذكر لنا عشرة أفدنة في المشروع المذكور) طبعا شالوا خمسة منها بقرار جمهوري لصالح المشروع و لحد الليلي ما زرعت أنا ما عارف عباد الشمس الزاروا نائب الرئيس دا كان في سندس … ما ظنيت

    طلمبات ضاربة و تنفيذ سئ …كان الله في العون

    مشاكل… باركا

  9. حاج أحمد السلاوى كتب:

    لعل الكثير منكم قد شاهد جزء من الحملة الإنتخابية للرئيس مساء أمس ( أعتقد إنها فى بورتسودان ..والله اعلم …بس مش مهم وين !! )ولكن الشىء الذى شدّ إنتباهى ولفت نظرى فى حديثه تللك اللهجة الغير سليمة فى مخاطبة من أبدى وجهة نظره من المراقبين بشأن تأجيل الإنتخابات القدمة .لا إعتلراض لدينا أن يرفض هو والمؤتمر الوطنى وكل شركائهم تاجيل الإنتخابات ولكن الكلمات التى خرجت لن تعود من حيث خرجت وقد رددتها وكالات الأنباء فى جميع انحاء العالم ..كان من الممكن أن نرفض التاجيل ولكن بأسلوب حسن ..خال من الشتم والسب والألفاظ الغير لائقة ..
    رايكم شنو يا الزوووووول ومشاكل وودالزبير ..ولاّما سمعتوهو ؟؟

    • الزعيم السلاوي سلام متابع لكل مداخلات المنتدى ممكن أكون معارض للمؤتمر الوطني بس أسلوب بعض الإخوة غير لائق ونرجع تاني للمربع الأول لابد أن يكون الحوار هادف …كما ذكرت الأسلوب الخطابي ليوم أمس في الحشد الجماهيري غير مناسب وغلطات الكبار لا تغتفر إذاعة لندن بعد كم نشرة كدى حذفت الكلام الأخير بتاع الجذمة (تحت جذمتي)….عمك دى …جن ولا شنو؟ حقو الواحد يحتفظ بحاجة مش شوية كتيرة كمان وما ينسى إنو القائد …
      آخر الأخبار بصحيفة الوطن:
      الشايقية ستقاضي تركيا للإبادة الجماعية بمعركة كورتي …هو في إبادة ولا حاجات تانية؟ هو أحسن نقاضي بريطانيا ومصر لأشياء كتيرة نسيها التاريخ(بتصرف).

  10. مشاكل كتب:

    سلامز

    هلا هلا على الجد .. و الجد هلا هلا عليه

    أولا أحي البشير على الجدية الواضحة في التصريح

    فقد قال : أي أجنبي او منظمة اجنبية تتكلم عن تأجيل الإنتخابات .. تطرد الليلة قبل بكرة .

    نعم أنا أوافق تماما على حديث البشير .. فتتدخل المنظمات الخارجية في الإنتخابات السودانية له تاثير سلبي كبير و تدخل سافر في الشؤون الداخلية السودانية .. كلام قوي و واضح و صريح

    بس يا ريت يبقى قدرو .. فقد فعلها شيخ حسن من قبل و طرد السفير البريطاني .. و كان قدر كلامو

  11. ودالزبير كتب:

    مشاكلز

    ياريت يطلع قرار بكنس كل منظمات مراقبه الإنتخابات من البلاد فوراً ياخي البد دي ما دخلتها عافيه من بقي فيها منظمات أجنبيه وأمم متحده والذي منه … نريد أن نعيد سيرتها الأولى سيره المجاهدين علي عبدالفتاح وصحبه الكرام سيره صيف العبور ..

    يأخي نحن بقينا زوله زي لبنى ببنطلونا تجهجه باكاتنا

    حليل النار ولعت وحليل سودانا العزه والكرامه سودان البطل يونس محمود وصوته الذي كان يرجف الكثيرن حين يشق عنان السماء

  12. حاج أحمد السلاوى كتب:

    ولدنا مشاكل ..سلام ..
    يبدو إنك لم تقرأ مداخلتى أعلاه ومريت عليها مرور الكرام ومن عنوان كاتبها بدأت تسطير كلماتك وومداخلتك التى تطابق المقولة المعروفة ( أصدقك القول لا أعلم مدى صحتها تماماً ..) ويقال فيها : كيفما تكونون يول عليكم .
    فقد كتبت التالى 😦 .لا إعتلراض لدينا أن يرفض هو والمؤتمر الوطنى وكل شركائهم تاجيل الإنتخابات ولكن الكلمات التى خرجت لن تعود من حيث خرجت وقد رددتها وكالات الأنباء فى جميع انحاء العالم ..كان من الممكن أن نرفض التاجيل ولكن بأسلوب حسن ..خال من الشتم والسب والألفاظ الغير لائقة .. ).. فإن كان هذا هو أسلوب رأس الدولة وهرمها .. فكيف يكون خطاب رجل الشارع العادى ؟ مالكم كيف تحكمون ..؟ فهذا الحديث يذكرن بالأيام الخوالى .. ايام الرائد يونس ..أيام الردحى السياسى الله يطراهو بالخير.
    زملائى فى المكنب من الجنسيات العربية الأخرى باغتونى هذا الصباح بسيل من التعليقات والإستهجانات لما سمعوه من حديث .. فلم استطع أن اقول شيئاً .. وما عسانى قائلاً ؟ هل أقول لهم نعم هذا هو السلوب الصحيح ؟ أم اقول نعم يستحقون مثل هذا القول واكثر ؟.
    وهل تعتقد أن شيخكم الذى علمكم السحر بافضل من غيره ؟ بئس المشيخة وبئس المنتسبين إليها ..فطرد السفراء وارد فى جميع الدول الكبرى والصغرى ويطرد السفير أو أى موظف فى السفارة المعنية دبلوماسياً بالقول أن هذا الشخص غير مرحب بوجوده فى هذا البلد ..ولا يقال له ما سمعناه بالأمس ..وما هكذا تورد الأبل .. يا سعد.
    وهل يستوى الذين يعلمون والذين لا يعلمون ؟
    وخلونا النشوف آخرتا شنو !!

  13. kamoon كتب:

    سلام للجميع…..
    من كل المرشحين ديل مافي زول قدر المسوليه كلهم عندهم طموحات شخصيه وحزبيه والناس والمواطن فاهم اي حاجه مافي داعي يستخفوا بيه وكلمة الشعب بيقولها في الانتحابات…..
    عشان كده مشي السوق ومشي الاماكن العامه ده مابجيب حقو….

  14. حاج أحمد السلاوى كتب:

    أخونا شكسبير ..
    من أتى بهذه المنظمات الأممية والأجنبية ..منظمات الإغاثة ..ومنظمات مراقبة الإنتخابات ؟
    الم تُطرد منظمات الإغاثة وعادت مرة أخرى ؟
    لماذا تستعدى على نفسك الآخرين ؟

  15. ودالزبير كتب:

    كتاب المحبوب عبدالسلام للتحميل من هنا

    http://www.sudanray.com/Forums/showthread.php?t=2785

  16. محنك كتب:

    يله يا جماعة يا خبر بفلوس نحن متورين نفسنا على شنو ما بتصلح اصلو بلدنا دى ومافى واحد منهم مالى العين …

    حزب سف
    وحزب سفسط
    وحزب فته
    وحزب بيت العنكبوت
    وحزب كلاش ومساعد ياي

    والباقين عناوين مجهوله

    مستقل يعنى شنو وليه فى ام الديمقراطيات مافى مستقلين

    انا من راى نلم الادارة الاهلية ونقسم السودان على خمسة ونكون مجلس رئاسة من خمس نظار ويا دار ما دخلك شر

  17. mon amie كتب:

    البشير حذر المراقبين الاثنين في كلمة القاها امام ناشطين في بورت سودان (شرق).

    وقال “جئنا بمنظمات وهيئات من الخارج لمراقبة نزاهة وعدالة الانتخابات ولكنهم اذا اخذو يطلبون تأجيل الانتخابات سنطردهم”.

    وتابع في خطابه الذي نقلته محطة تلفزيون خاصة “نريدهم ان يراقبوا نزاهة الانتخابات ولكنهم اذا تدخلوا في شؤوننا وطلبوا التأجيل سنقطع اصابعهم ونضعهم تحت حذائنا ونطردهم”.

    والله يا جماعه كلام حاج السلاوي صاح الملافظ سعد والله دا رئيس فضيحه

  18. mon amie كتب:

    اقصد اللفظ سعد عفوا للغلط المطبعي. و منو دا البعطيه اصابعه لتقطيعها

  19. aflaiga كتب:

    عزت : عمنا الذى باع المسجد فى دنقلا روى لى احد الاقارب انه حين جاءه مرشحو الاحزاب دار بينه وبينهم الحوار التالى :
    عمنا : شوفو يا جماعه كلكم جيتونا اسى زرافات ووحدانا وكلكم جربناكم قبل كده لكن المره دى الوضع مختلف انتو متنافسين فى مصلحه ونحنا ناس مصلحه انا عاوز 2 مدرسة و2 مركز صحى و 3 بوابير وشوية قروش عشان نوزعا على الغلابه فمن اسى نوريكم نحنا فى الدائرة دى نظامنا 50 % مقدم واباقى بعدين يعنى اسى الحساب 1 مدرسة و 1 مركز صحى وجزء من القروش والمرشح البتعجبنا انجازاتو بنديهو فقومو قدمو عروضكم لانشاء القلناهو وحنبقى على اقل عطاء اتفقنا ؟؟؟
    المرشحين : ووين ذهب الذين يؤثرون ولو كان بهم خصاصة ؟؟؟
    عمنا : ذهبوا مع الذين لا يسالون الناس …

  20. ابكرون كتب:

    هل سمع احدكم برئيس دولة من حولنا يظهر في التلفزيون 34 ساعة في اليوم وخبر رئيسي في نشرات الاخبار وغير النشرات وفي كل القنوات السودانيةواصبح استقباله برقص ووداعه برقص شئ مضحك والله اما الخطاب فحدث ولا حرج ولا تعليق ….
    انتخابات اكبر دولة واغني دوله في العام مناظرات وقليله جدا لا كواريك لا توير نفس لا رغي لا تزبيد….شفنا برضو المالكي والعلاوي وانتخابات لبنان وايران وافانستان وتونس ووووووووو ……10 سنوات في دولة المهجر لم اري اميرهم في التلفاز غير مرات بعدد اصابع الايدي خلال 10 سنوات……ملعون ابو الثروة والسلطة بالتسوي كده…..
    الموضوع بتاع مركز كارتر ده ما هو الا مقدمات لطرد المراقبين للعب بالانتخابات بالمفتشر والمفتوح ودقي يا مزيكا ورقصني يا جدع

  21. aflaiga كتب:

    ابكرون : فى الدول المتقدمه قبل الانتخبات بفترة يتم ايقاف كل نشاط المرشحين فى الانتخابات وايكال امر تسيير الدوله للنواب والمستشارين لتحقيق العدالة فى الفرص وعدم استغلال الدوله فى الترشيح فما ممكن يكون فى زيارة وافتتاح منشات قبل الانتخابات بى شهر يعنى الافتتاح ده بياتو صفه وياتو اعتبارية ؟؟؟ هناك الكثير من الامثله لكن دعنا اخى ابكرون نقول انها بداية وبعدين القيامه ما حتقوم فى الفتره الرئاسية الاولى والقصه طول نفس بس الاحزاب تساعدنا بطول النفس وعزة النفس وعدم البيع فى اللفه الصعبه ولا شنو ؟؟

  22. عزت كتب:

    صبرا يا أبكرون
    شايف ساركوزي عزموا للقمة الأفريقية الفرانكفونية في باريس….. يا رب يلبي الدعوة

  23. عزت كتب:

    شكرا يا أخوانا سنكل فقد أرسله بي دي اف و لك يا و ود الزبير على الرابط للكتاب و الذي فيما يبدو قد لخص العشرة الأوائل بتاعت الانقاذ مافي زول عندو العشرة الأواخر……………. اللهم أحسن خلاصنا

  24. حاج أحمد السلاوى كتب:

    أبو عصمت ..
    العشرة الأواخر ديل حيكتبهم ..سلفاكير ..

  25. بشّار أحمد بشّار (إبن برد) كتب:

    يا دوك عزت : أنا معلوماتي في الكمبيوتر تكاد تكون زيرو لكن قبيل وأنا بسمع في البي بي سي فهمت أن كل ألوان الطيف السياسي والأحزاب المتنافسة في انتخابات العراق تم اشراكها في عملية مراقبة الإقتراع عن طريق الحاسوب بدءً من انشاء قاعدة البيانات وتغذيتها بالمعلومات والإحصاءات والرصد والعد وكان بعض أقطاب الأحزاب يتحدثون هذا الصباح عن مشكلة فنية بحتة لم استطع فهمها لكن الشيء الذي فهمته أنهم متابعين الصغيرة والكبيرة. طيب ناس الأحزاب العباقرة بتاعننا ديل بدل يقعدوا (يعوعوا زي الديوك) مش كان من الأجدي والأنفع يتبنوا ليهم سيستم زي ده ويقولوا للمراقبين الدوليين دي السيستم بتاعنا عاوزين تضمنوا لينا تنفيذه لاكين تقول شنو في الشغل البلدي .

  26. البشاوى كتب:

    دوك عزت – قلت ساركوزى دعا الريس لحضور القمة الفرانكفونية – مش حيمشى – يمكن يرسل سلفا ولا على عثمان – مش احسن كان يرسل ابو الافلاق !

  27. نيام كتب:

    البشاوي:
    باقي ليك ابو الافلاق كان مشي تاني بجي .. لالا كلموا سمسمة الموضوع فيهو لجؤ..
    حاج احمد السلاوي:
    الشهير بسلولو اقتراح التوالي في حكم الموالي جميل مثالي بس المشكلة شهر فبراير دا فيهو 28 يوم اها منو البرضابو…عشان كدا فبراير يكون اجازة للشعب الفضل ..
    ابكرون:
    ما اصلو الجماعة ديل لما اللهطي يفوح و يملا الشارع و السوح يلعبوها بيلية الوالي سفير الوزير مستشار المدير سكرتير … وافتكر صاحبنا مع الانتخابات دي شغلو مهم في الذكر و الذاكرين …موش بذكر الناس بوجوب طاعة اولي الامر منكم

  28. عزت كتب:

    أمبارح يا نيام لمن قريت الخبر للمدام قالت لي يمكن ودوهو للذكر و الذاكرين عشان يتوب..!!

    يا بشار لكين التقنيات الحديثة منو البسمع بيها مدام رئيس المفوضية عمرو زي تسعين سنة كدا.. ما بالك بنايبو و أعضاء اللجنة و رؤساء أحزابنا برضهم ندائد ليهم فالشاهد أن مثل هذه البرامج ممكن تصلح لانتخابات 2020 لمن الكوامر دي كلها تتكل…

    لكين كدا مشكلة المرشحين 12 بي كد واحد ما حيلقى فرصة… يا نيام ما نكلم المرأة الوحيدة المرشحة و هي زاتا مفروض تغيب يومين كل شهر… يعني ما فارقا معاها و الا فات فوقا الفوات…!!

    و الله فكرة يا البشاوي … و الا يكلم لبنى ما تقول قاعدة في فرنسا و كتابا عامل ضجة هناك…

  29. عزت كتب:

    جاء في الأخبار

    شبه ممثل الادعاء في المحكمة الجنائية الدولية لويس مورينو أوكامبو مراقبة الانتخابات في السودان بمتابعة التصويت في ألمانيا في عهد الزعيم أدولف هتلر.

    وتزامنت تصريحات أوكامبو مع تأكيد الرئيس أنه حتى في حال تأجيل الانتخابات الرئاسية والبرلمانية في البلاد، فإن الحكومة الحالية ستبقى, ولن تتغير إلا وفق ما تفضي إليه الانتخابات.

    تصريحات البشير جاءت بعد يوم من تهديده بطرد المراقبين الدوليين الذين سيتابعون الانتخابات في حال محاولتهم التدخل في شؤون البلاد.

    وكانت بعثة المراقبين الدولية في السودان قالت الأسبوع الماضي إنه ربما يتعين على السودان تأجيل أول انتخابات تعددية يشهدها منذ 24 عاما بسبب تأخيرات في التجهيز والإعداد، مع غياب مئات الآلاف من الأسماء عن قوائم الناخبين قبل أسابيع من الانتخابات.

    وأصدر المسؤولون في مركز كارتر تقريرا جاء فيه أن الانتخابات الرئاسية والتشريعية التي تجرى في السودان ما زالت “في خطر على عدة جبهات”، وحثوا الحكومة السودانية على رفع القيود الصارمة المفروضة على المسيرات، وإنهاء القتال في دارفور قبل الانتخابات.

    وانتقد عبد الله أحمد عبد الله نائب رئيس المفوضية القومية للانتخابات في السودان التقرير، وقال إنه استند إلى معلومات خاطئة, ودعا المركز إلى التعاون مع المفوضية باعتبارها الجهة الوحيدة المخولة بإعطاء معلومات بشأن الانتخابات.

    يشار إلى أن عدة أحزاب معارضة سودانية دعت إلى تأجيل الانتخابات، قائلة إن السودان يحتاج إلى وقت يقر فيه الإصلاحات الديمقراطية.

  30. حاج أحمد السلاوى كتب:

    المرطب عزت أبو عصمت ..
    أضحكتنى مرتين …الأولى لامن عواطفك قالت ليك أخونا الصافى جعفر ودوهو لمنظمة أو حلقة الذكر والذاكرين عشان يتوب ..دا أجمل تعليق الواحد يسمعو فى شأن هذا الرجل ( بالمناسبة الصافى دا صاحبى وصديق واشتغلنا فى مكتب واحد ..مكتب تنظيم مديرية الخرطوم آنذاك .. غرب سوق الخضار القدييييييييييييييييييييييييييم ..أو ميدان الأمم المتحدة .. فاكرو ؟ )..وبعد دا كووووولو إن شاء الله يتوب .
    والتانية ما كان من شأن المرشحة للرئاسة ..يا خ دى من زمن المرحوم جعفر نميرى..تقول لى يومين ؟ وهى مش التى أطلقت المقولة المشهورة آنذاك أثناء الإحتفال فى إستاد الخرطوم ..ولو ما فاكر قابلنى فى الضفة الغربية ..عشان ناس شمباتى وجماعته ما يعرفوا الحاجات دى ..إتفقنا ؟

    • الحاج السلاوي سلام
      أعتقد قالها السيد/ صمويل لوباي
      (يا …….. كلام دا ………) ويا حليل سوق الخضار والجبنة الشدر من أولادملاح …وبط مايرنو وكوستي ….وسخلان حلة كوكو……
      وجوافة الجريف ومنقة كسلا…وكان في……

      عندي صورةقديمة كدي أفتشها ليك….

  31. ودالخلا كتب:

    سلام يا قبيلة،،
    حاج السلاوي ما بلاش الكلام الزي ده، وبالمناسبة دي أنت عارف الرمز المخصص لها شنو؟؟ كدي ورينا العلاقة بين كلامك القلتو وبين الرمزيا صاحب الترميزات والرمزوز العجيبة،،،
    هل تعلم يا صديقي أنه يا هو زاتو موضوعك الدايرو في الضفة يا ناس الضفاف،،،،،
    قال تنظيم مديرية الخرطوم قال،،،

  32. نيام كتب:

    دوك عزت:
    اهلك فيهم الخير..لكن ياخوي ديل زي فرعون لحدي اخر لحظة حتي يقول امنت برب موسي وقد رفع الكتاب و جفت الصحف..يتوبو وين للبلي دا…بعدين فاطمة جاية تبعث مايو من جديد هو مايو الاصل نحنا لي هسه دايخين من بوختو جايبا لي ناس محكر جاية تتحكر..
    انا غايتو اقتنعت براي محنك نشوف العمد الزمان ناس و د نواي و الجماعة ديل و كل واحد نديه ولاية و خلاص…
    السلاوي:
    قت لي مكتب تنظيم مديرية الخرتوم عيييييييييييك يا الكاشف اخوي!!!!

  33. حاج أحمد السلاوى كتب:

    أخونا الكاشف نيام نيام نيام نيام ..سلام
    آآآآآآآآآآآآآآآآآآى مكتب تنظيم مديرية الخرتوم زاااااته ..الكان زمان غرب ميدان الأمم المتحدة سابقاً ( ابراج الوحدة الزائفة حالياً )..وياحليل تلك الأيام الخوالى ..
    شايفك كدا زى البتعرف الحاجات دى ..
    الموثق أبو عصمت .. ما ألاقى عندك صورة قديمة للمكاتب دى..كدى فتش عندك ..وبيت الضبع لا يخلو من عضمة ..او كما قال !!
    اكيد حسه واحد صاحبنا هناااااااااااااااااااااك قاعد يدبج فى مداخلة..بس أحب اقول ليهو ..أأأأأأأأأأأأأأأأى نحنا من الزمن دااااااك قاعدين …أكان عندك كلام تانى قولو ..

  34. ودالخلا كتب:

    حاج أحمد السلاوي كبير الكواشف وبتاع التنظيم كمان!!
    قت لي نميري قال ليهم بيسلم وين؟؟
    أنت يا حاج أحمد ما عارف أنو التنظيم ده يعني شنو؟؟ تتذكر يا حاج أحمد في فلم زمان لعادل امام أسمو أحنا بتوع الأتوبيس، أها دي زي كلامك ده بتاع تنظيم المديرية ،
    قال تنظيم المديرية قال!!

  35. aflaiga كتب:

    اه انا من فرنسا وما فى فرنسا
    لو ارسلونى اليك فلن انسى
    ان احيى ديقوول وساركوزى و انسى
    ايام نحس ما فتئت اقضيهن نحسا
    لكن يا ليتهم يرسلوننى وتكون دقسه
    لا الوطن سيجد ممثله ولا سمسمة ستمسى
    انت اازول بتلعب دى فرنسا

  36. ياسين شمباتى كتب:

    الحبيب عزت..سلام..
    والله برضو د.جحا قال كلام كويس ومنطقى,,وممكن يكون خيار كويس,,خصوصا وانو اترشح قبل كدة فى الانتخابات السابقة..ويارب زولك يلبى الدعوة!!

    ابكرون الحبيب..سلام..
    يادوووبهم اقالوهو؟؟ هو قبل فترة قال (آن للفارس ان يترجل عن صهوة الجواد)!! طبعا الفارس هو والجواد مشروع سندس,,طيب فارس الانقاذ ما آن له ان يترجل عن صهوة الشعب!؟؟ والله دى ذكر وذاكرين دى!!!

    ابوى السلاوى..سلام..
    فضيييييحة وجهل,زى دا ما مفروض يحكموهو فى دافورى خليك من بلد بحالو..بعدين شايف الناس حاملين على المنظمات الاجنبية,,طيب الاستثمار الاجنبى كيف!!؟؟ غايتو جنس غايتو!!!

  37. عباس كتب:

    سلام عليكم
    12 مرشح انا شخصيا ماداير منهم ولا كومر غير الولاد الضغار كامل ادريس وياسر عرمان ومنير جلاب منافسة بين تلاتة مرشحين كفاية جدا جدا مالنا ومال الهم ياخ البقية ديلاك عمرهم السياسي الافتراضي انتهي

    حاج احمد السلاوي
    منتظر شنو من الكيزان ؟
    البشير اتنكر لرفقاء الدرب والسلاح تصفيات والصالح العام
    علي عثمان انقلب علي شيخوووووووو
    نافع علي نافع تفنن في تعذيب الاستاذ الجامعي ومدرسه ومن ثم زميلة في هيئة التدريس الاستاذ فاروق محمد ابراهيم
    يعني الجماعة ديل كلهم كانت بيناتهم علاقة قوية ولا تسمح لاحد منهم ان يقدم علي فعلة من فعايل الكيزان
    ياربي نتوقع من البشير شنو غير الاسلوب الاشتر والهالك الذي يسلكة في خطاباتة ؟

    ود الزبير
    سيرة علي عبد الفتح وصحبة وصيف العبور حاترجعنا المربع الاول
    ولا رايك شنو ؟

  38. ودالخلا كتب:

    سلام يا قبيلة،،
    دوك شمباتي حمدالله علي سلامة الخروج من الحفرة، وجات سيرتك مع عمك السلاوي، واعفي لينا،،،
    وداير أقول لك يا دكتور اننا خلال العقدين الماضيين كنا صابرين على اشياء كثيرة فهل نستطيع أن نعمل على تصحيحها بصبر ؟ أو لماذا نضع الاحمال على ظهورنا ونشتكي ؟ فلماذا لا نرميها، وأعني بكلامي هذا ضجة الأنتخابات وأعادة الحريات والديمقراطيات أو الكلام الذي كان الناس يلهثون خلفه السنوات الطوال، وعندما حانت ساعة التطبيق أو الخلاص كما يراها الكثير من الناس برزت للوجود نغمة التأجيل، وطفقوا يبحثون عن المبررات بعدم أكتمال التجهيزات والكشوفات والشنو ما بعرف داك، يا أخي ده يا هو حالنا نحن دائما” ما يفاجئنا رمضان والعيد والأنتخابات وكل المناسبات السعيدة والمبرمجة already ونقعد نتلفت في السهلة…
    لا نعرف نخطط ولا نعرف نبرمج ولا حتي التنفيذ للأشياء المبرمجة طبيعيا” نفشل في أدارتها كالخريف وخلافه، يا اخي نحن أصبحنا أضحوكة بين الأمم!!!
    تزادا حيرتي كلما فكرت في هذه المواضيع،،،
    وبعدين الناس الجابوهم يراقبوا العملية الأنتخابية هم مالهم ومال تأجيلها، الكلام ده وراءه ما وراءه يا صديقي!!
    وما عارفين الحكاية دي ماشة علي وين؟؟

  39. اواصر كتب:

    السلام عليكم الزوار الكرام
    لااجد ماأشبه به الوضع الراهن سوي ابيات شعر علها تشفي صدور ناس مغبونين كتاااااااااااااااااار
    لاتأسفن على غدر الزمان لطالما= رقصت على جثث الأسود كلاب
    لاتحسبن برقصها تعلو على أسيادها =تبقى الأسود أسوداً والكلاب كلاب
    تموت الأسد في الغابات جوعاً= ولحم الضأن تأكله الكلاب
    وذو جهل قد ينام على حرير =وذو علم مفارشه التراب
    طبعا كلام البشير في بورسودان كلام عجيييييييييييييييب بالجد دا شنو !!!!!!!!!!!!!!!!! لو ما اخاف الكضب اقول البشير دا قاعد يتكلم فى صالون بيتو (ما قدام العالم كلو ) وفي وقت عيون العالم اجمع علي السودان . تتم مراقبة الانتخابات فى اي بلد فى العالم بواسطة جهات محايدة اجنبية تتم الموافقة عليها من قبل سيادة الدولة وموافقة الاحزاب الأخري ( دا شئ بديهي ) ومهما وصلت درجة الخلاف مع هذه الجهات لايكون التعبير بهذا الاسلوب المشين اين ادب الحوار والدبلوماسية واختيار الالفاظ يادولة المشروع الحضاري !!!!!!!! وهذا جلا وعلا يخاطب الحبيب صلي الله عليه وسلم ويأدبة( لوكنت فظاً غليظ القلب لانفضوا من حولك ) والشئ الموسف انهم دائما يعتمدون علي اثارة عواطف الناس البسطاء بالخطاب الذي يشعل فيهم الحماس( يعني الشجرة طوالي ) وما خطابهم يوم افتتاح السد ببعيد (يموصوا ويشرب مويتو) لأكامبو . لكن هذا دأب الانقاذ منذ بداية عهدها ونظرتها فى انها ستكون الوحيدة في حكم السودان وعدم الاعتراف بالآخر وكان شعارهم في بداية ايام التمكين (نجضت نجضت مابنديها بغاث الطير) . واكيد عارفين بغاث الطير ديل منو؟
    (طلب التأجيل تدخل فى شئون السودان الداخلية ) وهو البلد دي عندها شئون داخلية بالله ؟ طيب العالم القاعدة فى دارفور لحفظ السلام دي شنو ياربي؟ هو انت اقليم صغير ماقادر تحافظ علي ناسو ناهيك عن بلد كامل ؟ والامريكان القاعدين في قلب الخرطوم وقافلين شارع كامل ليهم سنين ديل شنو ياربي اكيد دي كلها شئون خارجية مابتخصنا. راجعين

  40. mon amie كتب:

    سلام اواصر
    دايما كلامك جميل ونقدك حلو وفي محلو تحياتي

  41. mon amie كتب:

    انا هسه قاعده بتفرج علي حملة عمنا البشير في كادوقلي كترت ناس لمن معلقين في الشدر وابراج الكهرباء ما عارفه جو احضرو الرقصه ولا اسمعوا كلاموا الفارغ وشتايمو الذي شتايم الشوارعيه

  42. محنك كتب:

    بحبو شتايمه …. هو جبال النوبة دى الصادق المهدى زارها لما كان وزير اول … بعدين الرئيس جاى ليه ما يستقبلوه …. لو جا مفتش او ضابط ساكت فى الاقاليم الناس بتشمشر واهو موضوع الناس ما عندها حاجة تسويها والعمل يا دوبك ساعات ومافى تسلية وقد يكون تلفزيون ذاتو مافى والكهرباء بتقطع …. برنامج على الهوا … اها لو الناس الفى الجزيرة وبورتسودان وكادقلى ودارفور والجنوب الحضرو وعرضو ورقصوا ادو البشير واطاتكم اصبحت لانو دى مناطق معارضة الباقين فى جيبو يعنى ليه ما مشا شندى ؟

  43. ابكرون كتب:

    والله يا اواصر بتختي الصباع في الجرح المنوسر
    تسلمي……………………..

  44. نيام كتب:

    اواصر:
    اواصر اواصر
    دا رائك معاصر
    واكتر كمان
    لانو مباشر
    وسهل البيان
    بس مين اللي يسمع في هذا الزمان
    دا كلو بيطبل للبي السلطان
    شوية هتيفة عشان الرغيفة و قموسها كمان

  45. اواصر كتب:

    السلام عليكم الزوار الكرام
    mon amieالأخت
    يديك العافية علي كلامك الحلو .التلفزيون ومناظر الناس البسطاء دي انصحك ماتشوفيها لانها بتعمل المرارة .
    الاخ ابكرون
    الجرح المنوسر ظاااااااااهر مادير ليهو اشارة لكن الناس مغتية عيونا ، زمان الناس بتطلع مظاهرات عشان اقل غلط !!! لكن الانقاذ عملت مع الاغلبية بمبدأ اطعم الفم تستحي العين وضعاف النفوس كتار وكما قال الحبيب صلي الله عليه وسلم في مامعناه فى اخر الزمان القابض علي العقيدة كالقابض علي الجمر .
    الأخ نيام
    كلامك جد حلو وموزون واديك هاشم صديق لمن قال :
    اذكر ان امي علمتني الا ادير خدي لصفع الوحل والأحزان
    وأن ادري بأن الناس قد تأتي تصلي الفجر تلبية وايمان
    وقد تأتي لان النوم لم يأتي
    وقد تأتي لأن الفجر تزكية لدي السلطان

  46. مشاكل كتب:

    سلامز

    ليس كل ما يقف وراء البشير هو بمطبل او من الهتيفة
    لكل شخص قناعاته و آراءه التي يبني عليها و يدلي من خلالها بصوته
    و ليس كل من وقف مع البشير يقف معه لحبه للبشير و لسياسته بل لأنه من أفضل السيئيين .. و قد أفتى كثير من الشيوخ مثل الشيخ الجليل عبد الحي يوسف بحرمة أعطاء الصوت للنصراني او إعطاء الصوت للعلماني … فهذه هي الرؤية الشرعية

  47. مشاكل كتب:

    البشير هو المرشح الوحيد الذي يتحدث عن انجازات او برنامج انتخابي قادم .. سواء كانت وعود صادقة او غيرها

    اما بقية المرشحين فلا برنامج لهم سوى شتم و محاولة تشويه سمعة المؤتمر الوطني .. فما الفرق بينهم كشخصيات بارزة و بين طلاب الجامعات في أركان النقاش

  48. حكاية كتب:

    مشاكل قلت عبد الحى قال شنو ؟؟؟؟؟
    مايمكن النصرانى ده عنده رحمه وقلب اكتر من العندهم دقون وعلامه صلاة دليل المعرفه والتنزه
    خلونا يا جماعه وفضوا المجلس وخلوا الشعب يخنار ناس من عنده
    الخرطوم فيها عربات كبيره عليها دعايات رمز الشدرة المخضرة وكمان بدل جعجعت الريس الوجعت اضانا نلقى جعجعه فى الشارع صادره من عربات الدعايه بتاعتهم ياريت شجرتهم دى لو علقوا لينا فيها برتكان ولا تفاح يطفى الحر واهو يلقوا ثواب
    غايتو لو من شركات الدعايه اجيب شامبيون واعلق عليه رمز الشجره وزيت صباح فيه السيده الاولى التانيه ومعاهم رمز الشجره البطلع الزيت الطلع زيتنا وشركات الصابون عليها صورة الريس مكتو ب عليها الغسيل النضيف
    واهو كله بتمنه تلقى صورة الريس فى كل بيتك بينى وبينكم دى فاتتهم
    كسرة :
    لم نجد منهم سوى الكلام مافى واحد اطرش واصم عشان نرتاح دايرين افعال للمستقبل مش افعال الماضى المبنى للمجهول

  49. mon amie كتب:

    منو دا الافضل السيئين والله ده اسوأ السيئين والله النصاره بلادهم احسن وانظف من بلدنا وحكامهم افضل ومحترمين وماحراميه علي عينك يا تاجر زى العندنا وبحترموا مواطنيهم خلينا بالله امكن لو حكمنا نصراني اكون علينا رؤوف رحيم من البلاوى ديل اللهم لا نسالك رد القضاء بل نسالك اللطف فيه

  50. ياسين شمباتى كتب:

    ود الخلا..سلام..
    والله صدقت فى حتة التأجيل دى,,لكن برضو بعض الاحزاب معذورة لانها غير مستعدة ماديا,كمان ما تنسى الكبت السياسى الكان حاصل فى البلد ومنع اقامة اى ليلة سياسية او دعوة الى الانضمام علنا,,عشان كدة الجماعة عايزين التأجيل..والصبر كملناهو تب..اما المراقبين فمن حقهم ان يقولوا رايهم اذا رأوا ان العدة غير كاملة وهذا بموجب اتفاقيات منصوص عليها..لكن حكاية المطبعة دى شنو طيب!!؟؟

    اواصر..سلام..
    لك التحية وانتى تنتقدين وتوضحين بمنطق ووعى ورقى..والتحية موصولة لهاشم صديق..

    مشاكل..سلام..
    طبعا الشيخ الدكتور عبدالحى يوسف هو الوحيد اللى اعترض على الدستور لما اجازوه لانه ما حدد ديانة المترشح للرئاسة او جندره,,لذا احترم فتواه,,لكن بقية الشيوخ ما عندى ليهم حبة التسالى دى لانهم جبنااااااااء وما بمرقوا فتوى الا بالطلب..لكن برضو يا خوى البلد حاكمها دستور وضعى وليس شرع الله,,فعليك الله ما تدور لينا نغمة علمانى او نصرانى دى تانى…

  51. ياسين شمباتى كتب:

    مشاكل…
    بعدين برنامج شنو القعد يقولوا!!؟ دا شابكنا عملنا وفعلنا وتركنا,,بعدين الوعود يجب ان تحس فيها المصداقية وليس اى كلام ساكت..اما عن اركان النقاش فكلام البشير اسوأ من ان يقال فى ونسة فى بيت بكا او على طاولة ضمنة..السترة والفضيحة متباريات يا عزيزى..

  52. ابكرون كتب:

    يا حاج يسن متور نفسك مالك برنامج شنو العنده نحن جربناه 21 سنه ما نفذ برامجو دي ليه عايز يعملها في 4 سنوات مقبلة؟؟؟؟؟؟؟؟؟ بالله خلونا اما مفتي السلطان طلع انتيكه ساكت لتزيين اعمال المؤتمر

  53. مشاكل كتب:

    سلامز

    اعلن الرئيس البشير عن أن الانتخابات القادمة لن تؤجل

    و قال في حديثه أما تجمع كبير لمواطني الفولة في حفل وضح حجر الأساس لمحطة كهرباء الفولة

    ماف تأجيل … ماف لكلكة

    مؤكدا ان الحكومة خصصت مبلغ مليار دولار لتنمية ولايا كردفان

  54. عزت كتب:

    (البشير هو المرشح الوحيد الذي يتحدث عن انجازات او برنامج انتخابي قادم)

    هو الوحيد فعلا الذي يتحدث عن انجازات و لكنه لا يتحدث مطلقا عن برنامج لأنو ما عندو

    و حتى فعلنا و تركنا لا يقولا لنا الا و كأنها تفضل على الشعب السوداني ….
    و الغريبة ناس برامج التلفزيون لمان يستضيفوه ما بيوجهوهو عشان يخلي فعلنا و تركنا و يركز على المرحلة القادمة و ماذا (سيفعل بنا)

    بختوا غايتو لقى ليهو فرصة في المليارات و قعد يوعد بيها المساكين

    (مؤكدا ان الحكومة خصصت مبلغ مليار دولار لتنمية ولايا كردفان)

  55. نيام كتب:

    نعم بديهي انه ليس كل من هو مع البشير من الهتيفة و ليس كلهم من الارزقية لان فيهم من هو في هذا التنظيم منذ نعومة اظفاره او من مراحل الثانوية ولم يظهر البشير انذاك…ولكن عبر هذه العشرين عام و قطار الانقاذ يركب كل صباح من اصحاب المصالح و الارزقية و الذين جادوا عليهم بالوظيفة و هنالك من هو اكفاء منهم او بمشاريع ملتوية او رخص مفصلة تفصيل او نحو ذلك من الاساليب التي لم تعد تخفي علي احد وصار هؤلاء تُرك اكثر من الاتراك…بل ان بعض الاتراك من اهل الانقاذ اصحاب المبادئ تركوا التركية ذاتها…

  56. mon amie كتب:

    من رائيي الانتخابات دي اعملوها طره وكتابه ولوجات لصالح ناس اللاوطني نعيدها لانها اكيد بتكون مزوره

  57. ياسين شمباتى كتب:

    ابكرون..
    والله مجبور على التتويرة,,وبتوتر لمن اسمع اسمو او زول يشكر لى الراكوبة فى الخريف..اما العلماء فالفيهم اتعرفت تب..

    مشاكل..
    والله التأجيل دا لو بقى قرار دولى الا يلحس كلامو دا زى طلاقى الزمان..مافى داعى للماضة والكلام الما بقدروا عليهو وبعدين يبقوا فى الجرسة..هى الفولة دى اشتروها جديد ولا شنو؟؟من زماااان مضلمة مالو ما قام عليها؟؟كدى اليحل كهرباء العاصمة المثلثة ومويتها.بلا دجل معاه..

    مون..
    الله يقطع شيطانك…بالغتى فوكها دى..

  58. اواصر كتب:

    السلام عليكم الزوار الكرام
    الأخ مشاكل
    اوضحت الآتي سابقاً (أفتى كثير من الشيوخ مثل الشيخ الجليل عبد الحي يوسف بحرمة أعطاء الصوت للنصراني او إعطاء الصوت للعلماني … فهذه هي الرؤية الشرعية) الكلام دا ممكن تقولوا الدولة لو النظام عندها هو الشريعة الاسلامية وكل سكان السودان هم من المسلمين ، الاسلام هو دين الاعتراف بالآخر بعدين كلام زي دا وفي الوقت دا معناهو فتنة كبري وقاتل الله الفتن صغيرها وكبيرها ، والسؤال هو هل صدرت هذه الفتوي من مجمع الفقه الأسلامي (الجهة الرسمية المناط بها اصدار الفتاوي فى الدولة) ؟
    ومتي صدرت هذه الفتوي السريعة هل هي للاتخابات فقط ام تعتبر سارية المفعول؟
    كان الامام مالك رضي الله عنه في علمه الغزير يجوب البلاد شرقها وغربها ويسأل القاصي والداني والصغير والكبير في سبيل اصدار فتوي مهما صغر شأنها وقد يمتد اصدار الفتوي عنده لأعوام حتي قال الناس لايفتى ومالك في المدينة . اما كان الاصلح لهؤلاء الشيوخ اصدار فتاوي عن ما يحدث فيما يسمي العاصمة الفيدرالية والخمور التي تجلب من الخارج للحركة الشعبية و للمنظمات، والتي تأخذ عليها الحكومة ضرائب (تملأ جيوبها من المحرمات) وحفلات الديسكو والمفاسد التي تتم في قلب العاصمة الاسلامية في احتفالات اعياد الميلاد ورأس السنة .
    والمفروض الكيزان يعوا تماماً انو الحاكم البلد دي دستور وضعي والشريعة البتكلموا عنها دي للناس في القري والارياف لإثارة حماسهم ماهي الإكلمة حق اريد بها باطلاً .
    وثانيا أعطاء صوتك لأفضل السيئين ماهذا الكلام العجيب آلا تلعم ان صوتك امانة في عنقك الي يوم الدين يسالك الله منه يوم الوقف العظيم فبصوتك قد يفوز من يذيق شعبك الظلم والفساد ؟ انه انتخاب الفساد .

  59. ودالزبير كتب:

    سير سير ياالبشير

    نحن جنودك للتغيير

  60. mon amie كتب:

    الفوله دى من زمان من قبل 21 سنه قاطعه مويه ونور ويادوووب اتذكرها والله الانتخابات دى بترجع الذاكره للناسين والله كانوا ناس الفله ارقصو بغنية وردى ياناسينا ومجافينا حن علينا

  61. نيام كتب:

    “””هل السودان هو بورتسودان !!؟ وهل ايلا هو الانقاذ!!؟؟ رشح ايلا لولاية بورتسودان او حتى السودان,,لكن البشير لن نرشحه ولو لقيادة عربية درداقة..””
    تمت تنمية مجتزئة في بعض انحاء الوطن نتيجة لاتفاقيات معروفة اجرتها الانقاذ مع بعض اطراف الصراع في الجنوب في الشرق في الغرب و قد نجح هيلا في اعمار مدينة بورتسودان كما فشل اخرون .. لكن هل يعني ذلك ان يدخل السودانيون الي الغابة او الصحراء او جبال الشرق ليحققوا تنمية في مناطقهم .. هل يعني ذلك اخذ التنمية قسرا الا يمكن لها ان تاتي سلسة و شاملة للوطن الواحد…لماذا ندمر مناطق مثل كردفان او الجزيرة لنرضي مناطق اخري وهل الجزيرة تتبع لواق الواق…واضح ان التنمية تجري علي الولاءت و الترضيات وهذا حتما سيقود في نهاية المطاف الي تجزئة الوطن…اما الدعايات الانتخابية و الوعود المليارية فهي لن تفوت علي المواطن فهو اكثر وعيا من قبل…
    اما قصة مفتي السلطان فرحم الله الشيخ طنطاوي…

  62. مشاكل كتب:

    سلامز

    كتب شمباتي : مشاكل..
    والله التأجيل دا لو بقى قرار دولى الا يلحس كلامو دا زى طلاقى الزمان..مافى داعى للماضة والكلام الما بقدروا عليهو وبعدين يبقوا فى الجرسة..هى الفولة دى اشتروها جديد ولا شنو؟؟من زماااان مضلمة مالو ما قام عليها؟؟كدى اليحل كهرباء العاصمة المثلثة ومويتها.بلا دجل معاه..

    يعني الراجل يتكلم عن تنمية في الخرطوم تقولو نسى الولايات … يتكلم عن إعمار في الولايات تقولو الليحل مشكلة العاصمة المثلثة … مالكم كيف تحكمون ؟؟؟؟

    الأخت أواصر
    حتى و إن كان الدستور وضعي او غير شرعي … فالله تعالى لن يسألك عن وضعية الدستور .. فقط سيسألك عن صوتك فهو كما قلت أمانة في عنقك … فهذا ما قصدته في حديثي .. و لم اتحدث عن الدستور و ما يكفله .. فكما وضح شمباتي فالدستور وضعي و قد اعترض عليه الكثير من العلماء و ليس فقط الدكتور عبد الحي يوسف

  63. ابكرون كتب:

    بالله كمان عايزين توهموا الناس انه ربنا يوم القيامه كمان بسالهم عن صوتهم ادوه لمنو وامانه …..! دي في ياتو سورة ولا في ياتو حديث….وياربي هنا الامانه دي بتكون مشروطة للمؤتمر…للفساد يعني !!!!! ده المطلوب دينيا ؟؟؟؟ بالله بطلوا خلط الامور……!

  64. ياسين شمباتى كتب:

    نيام..
    للاسف هم قبل كدة قالوها (الراجل العندو عندنا حاجة يلاقينا فى الغابة) ورحم الله قائل هذه العبارة,,وللاسف ايضا هناك اذكياء فهموا الرسالة وما وراء الكلمات,,اما نحن فجلسنا مربعين ايدينا وصدقنا الهتاف والاعلام الدينى والتغطية الحقيرة من قبلهم..لكن كل شئيا انكشف وبان..

    مشاكل..
    طبعا ما كدة,,لكن هو لا حل مشكلة الخرطوم ولا حل غيرها من المشاكل,,بل ابتلاتنا بالمشاكل والمصايب..ما اقصده هو ان لا داعى للعب بمشاعر المواطنين واحلامهم البسيطة,,التى هى فى الاصل حقوق وفروض على الدولة..كان وين البشير قبل 20 سنة والحرب بتبدا فى دارفور؟؟ والمواطنين يقتلون فى كجبار؟؟ والطلاب يهانون ويقتلون فى الجزيرة؟؟ولا هى كلام ووعود بس؟؟
    وجيتنى فى حتة الدستور,,ما دام اتفقت معاى على انو البلد يحكمها دستور وضعى وليس شرع الله فاتفق معى ايضا ان الدولة لا تعترف بالشريعة كمصدر للتشريع وللحكم,,يعنى دولة بااااااااطلة..وارجوك يا صديقى ابتعد عن الانزلاق والانجراف وراء كذبهم وتمسحهم بالدين…اما ما دام ارتضيت بها دولة وحكما فيجب ان ترضى بما يمليه الدستور فى حنة الانتخاب والترشح دى..

  65. مشاكل كتب:

    سلامز

    المادة 1: طبيعة الدولة
    دولة السودان وطن جامع تأتلف فيه الاعراق والثقافات وتتسامح الديانات، والاسلام دين غالب السكان،
    وللمسيحية والمعتقدات العرفية أتباع معتبرون

    المادة 4: الحاكمية والسيادة
    الحاكمية في الدولة لله خالق البشر، والسيادة فيها لشعب السودان المستخلف، يمارسها عبادة لله وحملاً للأمانة
    وعمارة للوطن وبسطاً للعدل والحرية والشورى، وينظمها الدستور والقانون

    المادة 10 : الزكاة والمفروضات المالية
    الزكاة فريضة مالية، تجبيها الدولة وينظم القانون كيفية جبايتها وصرفها وإدارا. والأوقاف والصدقات والعون
    الذاتي موارد طوعية تشجعها الدولة، وينظمها القانون، كما ينظم الضرائب والرسوم المالية والمفروضات
    الأخرى بطريقة عادلة

  66. مشاكل كتب:

    سلامز

    الحبيب أبكرون
    طبعا كل شخص سيسأله رب العالمين عن ما فعل في الدنيا و عن كل صغيرة و كبيرة

    ( إذ يتلقى المتلقيان عن اليمين وعن الشمال قعيد* ما يلفظ من قول إلا لديه رقيب عتيد )

    ( وقالوا لجلودهم لم شهدتم علينا قالوا أنطقنا الله الذي أنطق كل شيء ) [فصلت:21].

    وعن أنس قال: ((كنا عند النبي فضحك فقال: هل تدرون مم أضحك؟ قلنا: الله ورسوله أعلم قال: من مخاطبة العبد ربه فيقول: يا رب ألم تجرني (تحفظني) من الظلم؟ يقول: بلى، فيقول: إني لا أجيز اليوم على نفسي شاهدا إلا مني، فيقول: كفى بنفسك اليوم عليك شهيدا، والكرام الكاتبين شهودا، قال: فيختم على فيه ويقول لأركانه انطقي فتنطق بأعماله ثم يخلى بينه وبين الكلام فيقول: بعداً لكنّ وسحقا فعنكنّ كنت أناضل))

    قرأ رسول الله هذه الآية: ( يومئذ تحدث أخبارها )
    قال: ((أتدرون ما أخبارها؟ قالوا: الله ورسوله أعلم، قال: فإن أخبارها أن تشهد على كل عبد أو أمةٍ بما عمل على ظهرها أن تقول: عمل كذا وكذا يوم كذا وكذا فهذه أخبارها))

    يقول الله تعالى: ” ووضع الكتاب فترى المجرمين مشفقين ممافيه ويقولون ياويلتنا مال هذا الكتاب لايغادر صغيرة ولاكبيرة إلا أحصاها ووجدوا ماعملوا حاضراً ولايظلم ربك أحداً”

  67. mon amie كتب:

    طيب يا مشاكل ناس الحكومه ديل الكلام ده ما مره عليهم ولا مافاضين من اللهط وما عندهم وقت لقراءت المصحف و فهم الحلال من الحرام !

  68. مشاكل كتب:

    سلامز

    حسب رأيي

    فساد الأفكار و العقائد … أسوأ من فساد الأعمال

  69. ابكرون كتب:

    يا مشاكل
    بنفس المنطق خلاص ربنا بسالك ليه اديت صوتك الحكومة دي وانت عارفا قتلت وسحلت ونهبت وافسدت ويتمت اسر وافقرت اسر واثرت آخرين وظلمت وووووووو لسته تطول….وانا قبلان انه ربنا يسالني لاني ما حاديها صوتي لانه في 11 مرشح انظف سيرة واعدل وربنا يعلم اكتر مني ومنك ناس المؤتمر عملوا شنو …!
    بعدين فساد الافكار ضرره عل الشخص الحامل الافكار دي لكن فساد الاعمال من فساد العقيده ولو شخص عقيدته وافكاره طيبه اعمالو بتكون طيبه اما فساد الاعمال تاثيره علي الامة كلها وعلي بشر ربنا حذر من ظلمهم ومن بقية اللسته الغارقين فيها هؤلاء حتي شوشتهم……

  70. مشاكل كتب:

    سلامز

    في ظل الظروف التي تشهدها البلاد من تدافع سياسي كبير بسبب الإنتخابات القادمة
    توجد عدة شبهات

    هل يجوز التصويت في الإنتخابات ؟؟
    لبعض المتشددين الإسلاميين فتاوى تحرم الدخول في الإنتخابات .. و هذه الفتاوى قد أكل الدهر عليها و شرب و تأكد بطلانها ففكرها قائم على التزمت و التشدد و عدم إعمال العقل و الإجتهاد
    فقد أفتى الشيخ بن عثيمين ب ( وجوب ) التصويت :

    “أنا أرى أن الانتخابات واجبة, يجب أن نعين من نرى أن فيه خيراً, لأنه إذا تقاعس أهل الخير من يحل محلهم؟ أهل الشر, أو الناس السلبيون الذين ليس عندهم لا خير ولا شر, أتباع كل ناعق, فلابد أن نختار من نراه صالحاً”

    http://www.muslm.net/vb/showthread.php?t=379939

    و الشبهة الثانية هي هل يجوز ان نصوت للنصارى أو الكفار في الانتخابات ؟؟

    كل الفتاوى التي اطلعت عليها تؤكد عدم جواز التصويت للنصارى في ظل وجود مرشحين مسلمين و إسلاميين … بل يجب علينا أن ( نبدي ) عدم حبنا لهم و عدم موالاتهم ( قد كانت لكم اسوة حسنة فى ابراهيم والذين معه اذ قالوا لقومهم انا برءاؤا منكم ومما تعبدون من دون الله كفرنا بكم وبدا بيننا وبينم العداوة والبغضاء أبدا حتى تؤمنوا بالله وحده ) صدق الله العظيم
    و قال تعالى ( يا أيها الذين امنوا لا تتخذوا اليهود والنصارى اولياء بعضهم اولياء بعض ومن يتولهم منكم فانه منهماا إن الله لا يهدى القوم الظالمين ) … هل نحتاج لأكثر من ذلك !!! واضح تماما

    الشبهة الثالثة .. هل يجوز التصويت للعلمانيين ؟؟
    قولها و بالصوت العالي … لا يجووووز التصويت للعلمانيين سواء أفراد أو أحزاب أو جماعات .. قال تعالى : (
    ياأيها الذين امنوا لا تتخذوا اباءكم وإخوانكم أولياء إن استحبوا الكفر على الايمانومن يتولهم منكم فأولئك هم الظالمون ) … و قال تعالى : ( لا تجد قوما يؤمنون بالله واليوم الاخر يوادون من حاد الله ورسوله ولو كانوا آباءهم أو أبناءهم أو إخوانهم أو عشيرتهم ) .. حتى إذا كان المرشح من أهلك فلا يجوز لك ان تصوت له .. فالمسلم ولي المسلم .. قال تعالى : ( إنما وليكم الله ورسوله والذين امنوا الذين يقيمون الصلاة ويؤتون الزكاة وهم راكعون ومن يتولى الله ورسوله والذين امنوا فان حزب الله هم الغالبون) … بالتأكيد العلمانييون لن يقيمون الصلاة و يؤتون الزكاة فهم يحاربون الله و رسوله بإبعادهم الدين عن السياسة

    فلتعطي صوتك للقوي الأمين

  71. ابكرون كتب:

    بسيطة ال11 مسلمين وحتي نقد الشيوعي يصلي ويصوم وقد استهزأ بالسائل الغبي الذي سأله في برنامج حنين هل تصلي الآن ….فسخر منه و اجاب مبتسما وساخرا من بلادة السؤال بانه لا يصلي الآن اي (في هذه اللحظة) … وقد ذكرت صحفيه في احدي الجرايد شهدت الحلقة انها شاهدته يصلي قبل دخوله للبرنامج…وقال عنه الترابي انه كان يؤمهم هو والصادق في كوبر…….خليك من نقد الشيوعي العجوز وعرمان… من اكثر تدينا من الصادق ؟؟ ونيال والسر مسلم وكامل ومبارك وجحا والبقيه لمن نسمع ان احدهم نهب ولا قتل ولا عذب ابرياء وغير ابرياء في بيوت اشباح….وبعدين انتهي زمن التكفير ولا يعلم ما بالقلوب الا الله وكم من مصلي ومكبر ومهلل قاتل ولص وزاني……..
    تستحضرني يا مشاكل قصة صحفي محسي من منطقة كجبار القي القبض عليهفي ارض المحس واخذوه عنوة من حضن ابناءه وكان في زياره لهم من الخرطوم كما حكي في سودانيزاونلاين بان الامن كان ينقله من منزله الي امن دنقلا وفي الطريق كانوا يعذبونه بالضرب والبصق وهددوه بالاغتصاب وذكر ان العربه توقفت في الطريق ونزل زبانيته ليصلوا…تخيل ليصلوا وذكر بالنص انهم عادوا لتعذيبه اكثر كانهم لم يكونوا بين يدي الله….جالك كلامي

  72. محنك كتب:

    قد دا ايام الديمقراطية الحضرناه كان بصلى … لكن الفكر المزدوج هو المشكلة لانه الاسلام لا يقبل القسمة على اثنين …. لازم تاخدوا كلو اقتصاد وقوانين وسياسة

    فالدين ليس تعبدا فقط ولا احكام وقصاص ولكنه اخلاق ومعاملة

  73. مشاكل كتب:

    سلامز

    يبدوا أن الحبيب أبكون لم يصل إلى ما أريده من كتابة مجموعة الفتاوى السابقة .. نوضح أكتر

    لنترك نقد فهو لا يهمنا بشيء – مع انه علماني -… و فرصة فوزه في الإنتخابات مثل فرصة فوزي في برنامج استار اكاديمي

    أما البني آدم – إن جاز التعبير – ياسر عرمان فهقد صدرت فيه مجموعة من الفتاوى الشفاهية لبعض الشيوخ لكفره و ردته خاصة بعد انكاره لحد من حدود الله في البرلمان

    نترك كل ذلك … فالعلمانية كفر بواح … فلا ( تجزئة ) في الدين او التدين
    و الأدلة سبق كتابتها

  74. ودالخلا كتب:

    سلام ياقبيلة،،
    الأكارم أبناء الكرام،،
    لا خلاف في أننا نسعي جميعنا في تولية أمرنا لمن يصلح للولاية، أو بمعني آخر من يخشي الله ويتقيه ويُطبق ذلك في هؤلاء الناس الذين نكبوا علي مر السنين والدهور في ولاة أمورهم من لدن بداية المدنية وادخال نظام الحكم الحديث وأعني بذلك التركية السابقة وما تلا ها من حكومات وطنية في المهدية أو أجنبية بالحكم الثنائي والوطني والدوامات المتتالية من عسكرية وديمقراطية حتي تاريخ اليوم..
    والمغالطة في أن هذا يصلي وذاك يفعل مالا يرضي ربه فهذا سلوك شخصي بين العبد وربه ولا يهم المواطن كثيرا” فتلك أمور شخصية، وهؤلاء الناس بشر وليسوا بملائكة في مجموعهم، والاجدي لنا أن ننظر في نظافة وعفة وشفافية المترشحين لمستويات الولاية المختلفة، هل هل السجل نظيف وخالي من الخصال الثلاثة التي ذكرها الرسول الكريم عليه أفضل الصلاة والسلام في أخلاق المسلم الذي لا يكذب في حديثه ولا يخون أمانته ولا يفجُر في خصومته،،،،
    ونحن نعلم تماما” ان العبادات الشعائرية لا تصح ولا تُقبل الا اذا صحت العبادات التعاملية، فلنطبق هذه المعايير القياسية علي مرشحينا وننظر في أيهم صاحب السجل الخالي النظيف الذي لم يتصف بأي منها، ومن منهم من يتطابق تعامله مع الناس مع شعائره مع ربه فهو الأجدر ، ونحن من بعد ذلك سنبصم بالعشرة.

  75. mon amie كتب:

    الاخ مشاكل
    تعال كدى نتكلم عن عمر البشير ونشوف اصلح ام لا:
    البشير ثبت في كثير من المواقف كذبه والرسول(ص) يقول( ولا يزال الرجل يكذب ويتحرى الكذب حتي يكتب عندالله كذابا)البشير ثبت انه يعلم واخيرا باعترافه ومسئوليته عن ما حدث بدارفور ( بلاباده لشعب دارفور) وهو واليهم وحاميهم وحاكمهم يقول الله تعالي (ولاتقتلوا النفس التي حرم الله الا بالحق) فماهو الحق الذى قتل به الاطفال والنساء والرجال العزل
    البشير و اعوانه نهبوا وسرقوا اموال الشعب وبدا عليهم الثراء الفاحش يقول (ص) لو سرقت فاطمه بنت محمد لقطع محمد يدها . فما بالك بفاطمة بنت خالد ووداد بابكر والبقيه اللاتي يمتلكن الشركات والمنظمات
    هل البشير بكل ما ذكر من فساد اعلاه وهذا شئ بسيط من عيوبهو ومساؤه التي لوقعدت اكتب شهر مابكفي فساده (كوروبشن) مؤهل لحكم السودان
    انا بعقتد بان ياسر ونقد لاعيوب فيهم مثل عيوب عمر لان عيوبهم فيما يعتنقون من فكر لاياذي الشعب ولايضرهم وكل شخص حر في اعتقاده نحن دايرين نعيش في سلام ويتوفر لنا سبل الحياة الضروريه من تعليم وصحه وامن وتوفير سبل العمل الكريمه زي اهل الامارات المواطن هو الاهم

  76. نيام كتب:

    ودالخلا
    سلام ياقبيلة،،
    الكريم ابن الاكارم،،
    “لا خلاف في أننا نسعي جميعنا في تولية أمرنا لمن يصلح للولاية، أو بمعني آخر من يخشي الله ويتقيه ويُطبق ذلك في هؤلاء الناس الذين نكبوا علي مر السنين والدهور في ولاة أمورهم من لدن بداية المدنية وادخال نظام الحكم الحديث وأعني بذلك التركية السابقة وما تلا ها من حكومات وطنية في المهدية أو أجنبية بالحكم الثنائي والوطني والدوامات المتتالية من عسكرية وديمقراطية حتي تاريخ اليوم..”
    في رائي اننا لم نتنكب في حكوماتنا الوطنية سواء كان ذلك في المهدية او فيما تلي الحكم الاجنبي الدخيل..لان كل تلك الحكومات الوطنية بما فيها المهدية لم تعطي الحد الفيصل حتي يحكم عليها التاريخ..فلو تركت المهدية (افتراضا) عشرون سنة او تركت أي حكومة ديموقراطية مثل هذه المدة لكان شأننا مختلف جدا…فالديموقراطية الهندية كانت فيها مساؤي و انحرافات اكثر بكثير مما عندنا ولكن انظر اين هم و اين نحن..مشكلتنا يا صديقي و التي ندفن رؤوسنا في الرمال عمدا احيانا و تجاوزا احيانا اخري هي مرور عدد من العسكريات التي ما قتلت ذبابة ، ولكنها قتلت فينا النخوة و الكرم و التسامح و الفطنة و الشهامة وعشش فينا الاحباط والكره لبعضنا بعضا حتي اصبح السوداني للسوداني اكثر عداء من اليهود…انظر ما كان بين الشيخ و حواره قبل الخصومة ثم اعد البصر كرتين …
    mon amie:
    شتان ما بين فاطمة بنت محمد عليه افضل الصلاة و التسليم و فاطمات اخر…

  77. mon amie كتب:

    الاخوه الاعزاء
    صباح الخير عليكم
    انا واعوذ بالله من كلمت انا بعتقد اننا لازم نبصر العميي من الشعب السوداني بمساوى هذا النظام وبكل السبل ونعريه امام الراي العام ولو باضعف الايمان حتي لانكون شياطين خورس .الله اكبببببببببر ولا نامت اعين الجبناءء

  78. ياسين شمباتى كتب:

    مشاكل..سلامز..
    عرف العلماء الايمان بانه( ما وقر فى القلب وصدقه العمل)..يعنى بدون عمل ايمان ما ينفع..وعشان كدة فى الدعاء المأثور(وارزقنا العمل بما نعلم)..دا اذا كان اصلا زولك دا بيعلم شئ من الشرع!!!
    واقولها ليك كااااااش,,ما دايرين زول يلعب بالدين,دا احسن منو الكافر راسو عديييييل..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s