ان جاءنا الاعمى…

Posted: الخميس,25 مارس, 2010 by ياسين شمباتى in سياسية

اولا احبتى اقدم اعتذارى عن اتجاهى كلية بالمواضيع الى الناحية السياسية,لكنها ضرورة يمليها علىّ الراهن السياسى فى البلاد, ثم تجاوز حكومة المؤتمر الوطنى لكل القوانين والاعراف المعمول بها وفق الدستور وقانون الانتخابات الذى مررته باغلبية ميكانيكية فى البرلمان..

ما دعانى الى تسطير هذه الكليمات هو الخبر المدهش الذى ما ان سمعته حتى اجريت عدة اتصالات ونقبت فى الانترنت لاتأكد من صحته,الا وهو ان المؤتمر الوطنى قد دفع باحد كوادره العميان الى الترشح للبرلمان!!! اى والله كما سمعتم وقرأتم تماما..قد يقول قائل بانهم كلهم عميان,ويكون راميا الى عمى البصيرة والقلب عن الحق والطريق المستقيم,لكن اخانا هذا اعمى البصر,ولا يعيبه خلقيا هذا النقص,لكنه يعيبه ويقصيه تماما عن دائرة الحكم وتحمل مسئوليات شعب ومواطنين..والترشيح فى الدائرة (6) غرب الحصاحيصا…

قد ياتى احدهم ويقول بان سيدنا (عبدالله ابن ام مكتوم) قد استخلفه الرسول صلى الله عليه وسلم على المدينة عدة مرات,كيف ولا وهو من تنزلت فى شأنه آيات تتلى ابد الدهر,اقول نعم تم ذلك لكن لعدة مسوغات,اولها انه رضى الله عنه كان من مجتمع تفشت فيه الامية ولم يكن يضع للقراءة والكتابة معنى او يقيم لهما وزن,ولم تكن من شروط الامرة والتأمر..ثانيا كان رضى الله عنه يريد الخروج للجهاد ولكن هيهات له وهو بهذا يكون منتحرا فقط , لذا نال هذا الشرف..ثالثا فى ذلك الزمان لم تكن القراءة والكتابة ضروريتان لسياسة امور الناس…ولم يثبت تولى خليفة او امير اعمى لمقاليد الحكم..

اما عن هذا العصر فالدستور به فقرة واضحة ويدعمها قانون الانتخابات تقول بان(المترشح لاى منصب دستورى يجب ان يكون مجيدا للقراءة والكتابة) او كما جاء فى النص الاصلى..فما بال المؤتمر وصلت به الجرأة الى تجاوز القوانين واللوائح؟؟وما بال المحكمة التى رفع اليها الطعن قد رفضته وعلق القاضى على القضية بان المترشح يجيد القراءة والكتابة!!؟؟ مع العلم بان اهله قد شهدوا بانه أمى..وما بال مفوضية الانتخابات تغض النظر؟؟وكيف جاز لها من الاساس ان تقبل مثل هذا المرشح؟؟هى ناقصة عمى وطراشة!!؟؟ لا انتقص من اخينا المرشح ولكن حقيقة مثل هذه الامراض تعيق الشخص عن تحمل مسئولية نفسه فكيف بمسئولية غيره؟وكيف لرجل يقاد ان يقود امة؟؟

واذا كان هذا هو حال الشعب السودانى الفضل,,فكيف به اذا جاءه الاعمى!!؟

كسرة :- هل نحن شعب سودانى ام هندى!؟؟ ما دعانى للتشكيك فى هويتنا هو ان اى حملة انتخابية او لقاء جماهيرى لاى من الاحزاب يختتم بغناء ورقص ومزك والعراض يعرض والرقاص يرقص والهزازا يهز..معقولة بس!!!!

ونلتقى…..

Advertisements
تعليقات
  1. مشاكل كتب:

    سلامز

    النصيحة …. ما صاح

  2. مشاكل كتب:

    سلامز

    ملاحظة من بعض المتابعين للشأن السياسي السوداني هو عدم وجود أي فقرة في بنودبرامج الانتخابات لكل او معظم المرشيحن للرئاسة تتحدث عن المعاقين جسديا أو عقلانيا … أها الفهم شنو

  3. عباس ركس كتب:

    سلامات شمباتي :
    اولا : اذا كان رأيهم بأن هذا الشعب ( الفضل ) اعمى واطرش وعوير وريالته صابة , فلماذا لايكون المرشح اعمى وامي بس !!!
    قبل يومين البشير بيتكلم ( وح نحارب الظلم والفساد والمحسوبية ) – اللي جابوهم هم بأنفسهم – يعني ح نفلقكم ونداويكم . فتأمل !!!!
    خاتمة الحملات الانتخابية تعني – أكان جبتونا ح نخلي ايامكم كوووووولها هجيج وسكسكة وجبجبة !!!!

  4. mon amie كتب:

    صباحكم زى الورد يا جماعه والله ناس المؤتمر الوطني ديل خلوا موضوع افتتاح احتفالاتهم بالقران الكريم وبقوا افتتحوا بالدسكو والغناء ويختموها بالهجيج والنبق النبق . قبل كم يوم عمنا بيشو كان في ملكال وبعد ماجعجع وضربت المزيكه وبدا اتهوزز سمعت الفنان بلدياتو بغني في اغنيه فيها مقطع بقول من حمرة عيونو اسلموا نصارى.. ! والمتفرجين كلهم نصاري. عجبي!!

  5. mon amie كتب:

    هو ما بركه الرشحوا اعمي ما منغولي كانت كارثه لا مركز كارتر ولا معهد سكينه ما بحلونا وهم كلهم عاهات من كبارهم

    • يا بتي سلام ليك ولك لأهل المنتدى بعيب عليك حاجة واحدة إنتي عندك مشكلة مع الناس ديل والله أتمنى أن يكون تناول المواضيع بصورة جادة وبلاش شمارات أعتقد أن الحوار الهادف نستفيد منه جميعاً لمعرفة ما خفى من البعض لكن بصورة تكون جادة نحترم فيهارأيك …

  6. عزت كتب:

    من حمرة عيونو اسلموا نصارى.. ! والمتفرجين كلهم نصاري. عجبي!!

    مون .. يا أختي ما تحرقي أعصابك ساكت .. يكونوا ما فهمو بقول في شنو… ما بتذكري العريس الطلب أغنية لعروستو (من هسة و بقيت تنسى) و الا شرحبيل بيغني للعرايس (ياما بكرة تندم و أنا حالك بشوفوا)

    و عادي جدا تلقى الجماعة بيرقصوا على أنغام (مناحة)
    و الا المداحين يركبو ليهم كلمات في أغنية (راجل المرا حلو حلا)

  7. عزت كتب:

    عارف يا شمباتي أنا الكلام دا سمعتو من (حاتم السر) مرشح الاتحادي عندما أبرزه و علق على شطب ذات الطعن الذي تقدموا به و القاضي الذي شطب الطعن بأنه كان ياتمر بالتلفون و بعد ما كتب هذا الموضوع قمت قوقلت و لقيت طراطيش كلام مفاده أن إسم الدائرة الرسمي هو (الحصاحيصا الغربية)…

    فاز فيها حزب الأمة مرتين و الإتحادي مرة واحدة.. و تثاقل نشاطهما في العقدين الماضيين، لأسباب معلومة، فيما لمعت أسماء تتبع لحزب الحكومة، يعتبر أشهرها (شيخ رجب) الذي كان يعمل مع شيخ إماراتي حتى ابتلاه الله بفقدان نعمة البصر فكافأه الإماراتي برصف الطريق الذي يربط بين الحصاحيصا و قريته “الفريجاب”.. و يمر بمدينة طابت و قرى أخرى .. و قيل إن هناك مدارس و دعم مالي يصل بشكل راتب و تظهر آثاره في القرى المجاورة، و يؤكـّـد الأهل بمدينة طابت أنه لم يقدم للمدينة شيئآ أبدآ، حتى أن أنصاره يعتبرون هذه النقطة قاصمة ظهرهم في النقاش..

    كان (شيخ رجب) عضو المجلس الوطني المنحل.. و هو يطرح نفسه الآن مرشحآ للمؤتمر الوطني بالدائرة.. و الغريبة المرشـح الثاني للمؤتمر الوطني هو محمد حسن أحمد البشير!! أخو أب شدرة و لديه منظمة طوعية يعمل فيها أقاربه بالمنطقة و يسعون لترشيحه، حاولت قيادات المؤتمر الوطني بالمنطقة في لقاءات كثيرة التوفيق بين المرشحين بلا نجاح اذ يريدون أن يتنازل (شيخ رجب) لشقيق الرئيس و يليحون له بعدم أهليته بسبب فقدانه نعمة البصر ففاجأهم الرجل بفتوى مكتوبه و ممهورة من بدرية سليمان، التي برّرت الإنقلاب، و قالت إنه فقد بصره بعد الإلمام بالقراءة و الكتابة، و قال إن طه حسين كان وزيرآ و كلامآ من هذا القبيل..

    (لم ينتهي كلامهم و لكن زهجت أنا من قرايتو)

  8. mon amie كتب:

    سمعتوا الشمار المحكمه ادستوريه رفضت اطعن في ترشيح مستر بيشو والله دي محكمة مدستره سااااكت في البشير هم الطاعنين ديل ما عارفين الدستوريه دى حقت البشير وارثها ابا عن جد كانوا اطعنوهو عند الجنائيه الدوليه

  9. ودالزبير كتب:

    شباب

    بعيداً عن الإنتخابات والسياسه هل هذه دعوى لإقصاء أصحاب الإحتيجات الخاصه هل فات عليك يا دكتور شمباتي إن هناك طريقه لقرأه العميان إسمها بريل بعدين يا شباب ومن الآخر كده لو في عهد الديمقراطيه أو عهد الإنقاذ النواب أصلاً بيجوا البرلمان عشان التكييف والنوم يعني الزول العميان ده ماراح يجيب حاجه جديده لو ما شاف الناس …

    أعتقد إن الإعاقه البصريه لا منع الشخص من التمثيل النيابي ودونكم الكفيف الذي يعمل محاضر في أحدى الجامعات وإنشاء الله ألقى ليكم قصته وننزلها هنا …

    ما أي حاجه ننظر ليها بمنظار العدو … الموضوع ده حساس شويه يا شباب

  10. شمباتي حمداً علي السلامه
    سطتها ومشيت
    وجيت لقيت كل الارض جوطه
    ودقي يا مزيكه

  11. ابوالمنذر كتب:

    شمباتى.. تحياتى
    الاخوه والاخوات ….سلامات
    سمعتو بالسمك العميان ده بجى فى بداية الدميره بعد فتح الخزان وكثرة الطمى وتلقاهو مطفح تقبضو بالمنجل و بايدك على سطح الماء..
    اهو سمك عميان وسمك شبعان وسمك عشمان المهم يتخمه…
    لكن برضو يضع سرو فى اضعف خلقو وقد تحسم الاذن قبل العين احيانا .. نتمنالو التوفيق والصحه وتعود ليهو نعمة البصر قادر ياكريم …

  12. ياسين شمباتى كتب:

    مشاكل..سلامز..
    بركة المرقت النصيحة..اما عن تضمين المرشحين لذوى الاحتياجات الخاصة فى برامجهم فحقيقة ما سمعت شئ زى كدة,لكن الما اتضمنتو البرامج كتير,,وذوى الاحتياجات لو ساعدوا ليهم اهلهم اكيد بقدروا على خدمتهم كمان,,ولا امكن رامين الموضوع على منظمات المجتمع المدنى وعلى المنظمات الاجنبية!!؟؟حقيقة نقطة مهمة,,لانو فى الدول المتقدمة عندهم اولوية,,ياخ المثليين عندهم حقوق وبعملوا ليهم اللف حساب فى الحلمات الانتخابية والدعائية..

    ركس..سلام..
    بركة بالطلة يا حبيب..والله كلامك صاح,الجماعة ديل احتقرونا شديد,,والبرضى بيهم يكون راضى بالحقارة بس..اما عن الهجيج والجبجبة فدى طامة لو حصل كدة!!!
    اما البشير وتصريحاته فاحسن الراجل دا يدوهو منوم لحدى ما ينتهى الاقتراع لانو بقى فضيحة بس,والادهى انهم يطلعوا تانى يوم يبلعوهو كلامو ويقولوا اصلو هو ما قال كدة!! كدة ياااا بحرى..

  13. ياسين شمباتى كتب:

    مون آمى..سلام..
    والله ضحكتينى وانا زعلان..اسلموا نصارى!! انا اصلا الاغنية دى من زمااان عندى فيها راى,,كمان زولك دا عوعا بيها فى ملكال؟؟ طيب مالهم النصارى الهناك ديل ما اسلموا؟؟ ولا هى عياقة وعباطة بس؟؟اما عن خريجى معهد سكينة فمعظم منسوبى الانقاذ قد تخرجوا منه,وحتى اولئك الذين لا يفهمونها جيدا..ولا نقلل من شأن المعوقين لكنهم لا يصلحون لقيادة البلد..

    عزت..سلام..
    هههههههه..عليك الله بدرية قالت كدة!!؟؟حسبى الله عليها..هى الدائرة الغربية او غرب الحصاحيصا ما متأكد لكن شيخ رجب معروف لدى اهل المنطقة وطبعا ممكن يكتسح بالطرق الصوفية وجماعاتها,والفريجاب تدين له بالولاء التام,,وطبعا الطريق متبرع بيه شيخ امارة الشارقة الدكتور القاسمى,,لكن الجماعة سموهو طريق المشير الزبير!!!
    بعدين اخو اب شدرة جاب قروش من وين وعمل ليهو منظمات طوعية وشركات وهلم جرا ؟؟الجماعة ديل بقى وشهم مكشوف وما عندهم حياء او خجل..لكن بلاقيهم قدام..

  14. ياسين شمباتى كتب:

    ود الزبير..سلام..
    لقد ذكرت فى حديثى انى لا اقلل من شأن ذوى الاحتياجات الخاصة,كيف افعل ولدى منهم واحد فى البيت!!؟؟ويهمنى امرهم اكثر من اى شخص آخر..لكن الحق يقال,ام لم يرفع الكيزان شعار ان صوتوا للقوى الامين؟؟هنا تنتفى صفة القوة لان احدى حواسه الجوهرية معطلة..والاستاذ الجامعى ليس كرئيس مجلس شورى او والى او نائب بالبرلمان..
    وماذا قدمت الانقاذ لذوى الاحتياجات الخاصة حتى ترشح واحدا منهم ؟؟ام هى السياسة وقذارتها ولؤم الانقاذ وتوابعها؟؟ هل سمعت فى العالم المتقدم الديمقراطى مثل هذا ؟؟ او ليس المسئول عن الشعب بحجاة لان يقرأ مافى وجوه محدثيه من صدق وكذب؟؟وان يقرأ معاريضهم وان يكتب موجها لحلها؟؟ ومن الذى سيكتب له بطريقة برايل ليقرأ هو بها ؟ولا كمان يرشحوا ليهو واحد تانى يكتب ليهو؟؟
    وهل يعقل ان نعين ابكما مؤذنا؟؟انها اشياء لا تعقل يا عزيزى..
    اما عن العداوة,,فاقول نعم,,ان الانقاذ عدوتى وعدوة كل مواطن مطحون ذاق الامرين على يدها..

    عبدوز..سلام..
    الله يسلمك يا صديق,,والله نسوى شنو بس,,النصيحة تمرق والغباين تتفشا..خليك قريب..

  15. ياسين شمباتى كتب:

    ابو المنذر..سلام..
    يكون الجماعة ديا ناوين يخموهو؟؟ يعنى يريسوهو وشنو كدة ما عارف؟؟الله يكضب الشينة..وندعو ليهو معاك بتمام العافية وربنا يبعد عنو كل شر ويبعدو عن كل شر..

  16. ودالزبير كتب:

    غايتو جنس غايتو

    لو كانت الإنقاذ ستسقط بما يكتبه الناس حولها لكانت سقطت بمقالات هشام هباني ودينق وتراجي مصطفى والعميد الريح وغيرهم من أساطين الكتابه الإلكترونيه والمعارضه المرطبه

    المهم يازول أكتب وفش غبينتك لأنو شهر أبريل قرب … والشعب سيقول خياره

    ماتجي نستبق الإنتخابات ونكتب على ضوء نتيجتها المتوقعه

  17. ياسين شمباتى كتب:

    ود الزبير..
    على الاقل يكون الواحد فش غبينتو وقال كلمة الحق وما يوصف يوما بانه كان مواليا او مرتزقا..
    والسقوط والنجاح ما بيد زول,,لكن التوعية واجبة ومسئولية امام الله..بعدين البوست اسه مافيهو فوز وفشل,,دا عن تجاوز قوانين ودستور,,ولا انت التجاوز دا عاجبك؟؟

  18. ابكرون كتب:

    يا سادة حاج رجب ده بفتح خانات ل 7 او 8 وظائف واحد يقوده وآخر يقرأ ليه التقارير وواحد يكتب ليه ….وواحديقرأ ليه كلامه للمجلس وواحديسوق ليه وآخر يلبسه ويحلق ليه وواحد مستشار وواحد يرقص بدلو ويرفع ليه اصبعه شوفتوا الكميات دي مالكم قاطعين ارزاق الكتيبه دي…..بعدين الحصا حيصا شرق ولا غرب ما محتاجه زول مفتح تفتيحه…..! هو ناس المؤتمر المفتحين شن طعمهم…….

  19. ابوالمنذر كتب:

    ود الزبير
    غايتو الاتعمل فى بورتسودان من مشاريع بنيه تحتيه واقتصاديه(المنطقه الصناعيه الجديده) لو ورونا ليها قبل 10سنوات لاعتبرناه ضرب من الخيال ومن عاشر المستحيلات ولو تصدق اى بيت فاتح فى زلط ومن الزلط للبيوت طوب (انترلوك) يعنى بقينا نشتاق لشوفة الواطه بتاعت زمان وبين كل شجره وشجره شجرتين خضره وجمال يرد الروح ويجعل المقارنه منعدمه بين ايلا الانقاذى ومن سبقوهو …اما الساحل على امتداد المدينه كورنيشات باضاءه وكافتريات عالميه التصميم والخدمات تتمايل حسان دول الجوار بين المقاعد والترابيز لتقديم المشروبات الساخنه والبارده والشيشه . سطوع شاشات العرض الكبيره تنقل البرامج التلفزونيه والكوره تلقى الناس تشجع وتصفق متحلقه حولها..
    وقد عاصرنا هذه الانجازات وعودا منهم وحقيقة ماثله الان مما يجعلنا نصدق ما سياتى من وعود ونقول بالصوت العالى ايلا حديد وشجره قويه ليها اساس (رمز ايلا الانتخابى) والى حين يظهر من نثق بصدقه ينظر ويفاد

  20. ودالزبير كتب:

    أبو المنزر

    راح يجي زول يقول ليك ما مهمه الزلط وما مهمه الكورنيش وكافتريات شنو إنت زول فايق ساكت وشيشه شنو والناس عيانها ومالاقيها العلاج وبعدين الناس بتحب التراب والكتاحه ومادايره إنترلوك والأهم إنو الشركات العملت المشاريع دي بتتبع للمؤتمر الوطني وإستفاد بس ناس المؤتمر الوطني التقول نحن ما قاعدين في البلد دي وماعارفين أسياد الشركات منو ولا شايفين مظاره التطور الفي البلد
    ….

    يأخي إنت زول كوز وعميل لمؤتمر الوطني ومنتفع وآيلا أكيد قبضك حاجه يا ظلامي

  21. ياسين شمباتى كتب:

    ابكرون..
    حلوة منك,,انا ذاتى قلت كدة,,كمان معاهو واحد يكتب بطريقة برايل!!

    ابوالمنذر..
    هل السودان هو بورتسودان !!؟ وهل ايلا هو الانقاذ!!؟؟ رشح ايلا لولاية بورتسودان او حتى السودان,,لكن البشير لن نرشحه ولو لقيادة عربية درداقة..
    لقد رايت بورتسودان وحقيقة هى جميلة وتحس فيها بمجهودات الوالى والمسئولين,,لكن هل ايلا اعمى؟؟ ما تلخبطوا الكيمان يا عزيزى….

  22. ودالزبير كتب:

    خلاص ممكن ندي أصواتنا للولاده بتاعين المؤتمر الوطني في كل السودان وندي صوتنا هنا لعرمان عشان يبقي عمد من غير أطيان

  23. ياسين شمباتى كتب:

    ولادة!!؟؟ ولادة شنو!!؟؟ هم بولدوا ولا شنو؟؟ اخطأ ود الزبير كتابة وصدق معنى…
    اما عرمان فلم نعرف له سرقة او اكل اموال ناس بالباطل..عرمان كية فى الكيزان..

  24. ودالزبير كتب:

    هو بالتعلموا فيهو ده أقل من الولاده في شنو ؟؟ يأخي جرستكم فاقت المرأه في ساعه المخاض ؟؟؟

    المهم هل تريد حقاً أن تقنعنا إن هذا المأفون المتنكر لأصله وفصله والمرتمي في أحضان الحركه الصليبيه هو الأصلح لتولي الحكم أسأل الله أن لا يحضرني يوم يتولي فهو عرمان حكمنا حتى لا أرى البارات وقد أعيد فتحها وبيوت الدعاره وقد منحت الترخيص لمزواله نشاطها ..

    يأخي إنت يا شمباتي ما شايف خطوره تولي الحركه الجنوبيه النصرانيه لتولي الحكم في الشمال وهل تعتقد إهم حين يحكمون سوف ينظروا لك بإعتبارك ضد المؤتمر إنت في نظرهم جلابي إبن جلابي

  25. ياسين والحضور الكريم …… سلامات
    يا جماعة الموضوع هو ترشيح شخص أعمي (عافاه الله) وهل بهذه الصفة ممكن أن نطلق عليه القوي الأمين؟ يمكن أن يكون أمين ولكن هل هو القوي؟!!!!

    حكاية بورتسودان وعرمان دا موضوع تاني يمكن مناقشته في بوست منفصل حتى لا تتلخبت الكيمان.

    قبل كم سنة ذهبت لبورتسودان وشفت شوارع الظلط والكورنيش وهذا شئ جميل ومقدر ولكن الحقيقة لا توجد نظافة إلا في أماكن مختارة وبقية البلد غارقة في الأوساخ والنفايات كما كانت هناك كميات كبيرة من الذباب والناموس وبعدين البعوض تريان ورويان يعني ممكن ما يتفرز من الذباب من كبر حجمه.

    أبو المنذر وود الزبير
    تعليقي عن بورتسودان نابع من حبي ليهاواتمنى أن تكون الآن مختلفة عن السابق وخاصة من ناحية صحة البيئة والنظافة ومحاربة الذباب والبعوض وأن لا ننسى إنها بوابتنا على العالم.

  26. حكاية كتب:

    يا جماعه الحكايه بالجد هو اعمى ولا كذبه ابريل على الابواب
    غايتو اذا بقى اعمى الناس ديل بقى ناس فاهمين دايرين يوروكم حتى الاعمى عنده مكانة اهو اعمى عارف البوقع شيك ولا برسل فاتورة منو ويستفيدو منه وباقى عمره يقضيه سايح فى السجن —هسع الزو ل ده ما مكلف يجيبو ليه جهاز كمبتتوتر خاص بكم وكم عكازه ويمكن عملية عيون لارجاع النظر الطشى ويقول داير يعرس وداير بيت وعربيه يتعلم السواقه وعييييييييييك المهم …..
    لكن لو فكرنا شويه الزول ده ليييييييه دايرينه يترشح دايرين يبيعوا شنو بهناك غايتو الله غالب
    الناس ديل غلبهم البسوهو
    ود الزبير قلت سير سير يامنو غايتو منى بقول ليه سير على جهنم الحمراء بخطى ثابته وواثقه ومقعدك محجوز انت وشلتك والداير يبدل ليه جوكر من جوكراته جوه النار يرفع فلان ولا ينزل علان على كيفكم كلها ليكم النار اديناها ليهم ملك حر لا ضرايب لا زكاه لا جبايات
    اضحك تضحك ليك الدنيا هم مافتروا من الضحك والهز وسطهم زاته تعب من الرقيص والعصى الفى سوق شكت من رفعها لفوق
    اعاده تسميه شارع محمد نجيب بشارع البشير والخضر قدر ما تعاين تلقى صوره التور عبد الرحمن الخضر فوق وتحتها صورة البشير مافهمنا النظريه ماعارفين نعاين وين زاته
    كرهتونا صوتك امانه وتمسك بالقوى الامين ههههههههههههههههههههههههههههه لا رضى الله عنهم واسكنهم فسيح النار
    الجعجاع يا ابكرون وصل وين بعد الهتاف حقه
    مون ميى
    قلتى لى منغولى جايين من منقوليا ولا منغوليين هبل —-فى منغوليين اكتر منهم هسع اشكالهم دى فرقها شنو من المنقوليين ولا تفكيرهم اخير ديك بحقه هم يودوهم وين
    شمباتى اطربتنا بالاعمى ده
    طيب على سمعك كده ما دايرين ليهم مجانين عندهم كم صامولة واقعه وكم سلك طاقى فيوز من سد مروى
    غايتو اذا عرفت كلمنا نخلى المجانين يترشحوا اهو فرصه مستشفيات المجانين تنتعش شويه ويلقوا نصيبهم مع العصابة وعصبة الامم
    كسرة:
    كل العالم انتخاباته بهدوء احنا زى بيت العرس جوطه وغلبه ودلوكه وبخور وزغاريد ورقيص وهتافات وفنانين وسبحان الله عرس جماعى بس الكل داير ينتحبوه للقبر …………………….
    يا جماعه فرصه سعيده نشوف المهابيل ديل على مقاليد حكم امازونيا وترمى تصويتك فى تلاته صناديق اقتراع لعدد تمانيه ورقات التقول ورقات فكى ابكرون –حقويا ابكرونا تنقص العدد شويه ممكن نرمى الورق فاضى وهم يملوه براهم مش احسن

  27. mon amie كتب:

    ابكرون سلام انت فكي جد جد ولا ارت فيشيل لو جد جد ما تكرب لينا الجماعه ديل و الا صوات كلها تطش وتجلي منهم حتي المزوره انشاءالله تتحول لفطومه ونخلص منهم وبالمره اعمل ليك عروق لاوكامبو اجر بيها بيشو للمحكمه و بالمره نخلص منو

  28. ودالزبير كتب:

    جنود الجيش الشعبي على الدوام يأتون بالليل بحثاً عن زوجاتنا وبناتنا لاغتصابهنّ»!!

    هذا ما قاله أحد مواطني محافظة تركاكا لصحيفة «سيتزن» الجنوبية الناطقة بالإنجليزية والتي يرأس هيئة تحريرها نيال بول المنتمي للحركة الشعبية لتحرير السودان!! ولم تورد الخبر صحيفة «الإنتباهة» وأرجو أن تستمروا في قراءة الخبر المتحدِّث عن ممارسات الجيش الشعبي الذي سيحكم السودان الشمالي عندما يُنصِّب شعبُ السودان الحركة الشعبية ممثلة في عرمان لرئاسة الجمهورية وعندما يُنصِّب القائد إدوارد لينو حاكماً على الخرطوم!!

    المواطن الذي تحدث مع آخرين لصحيفة «سيتزن» وصف سلوك قوات الجيش الشعبي بغير الإنساني وقال آخر: «لم يحدث أن تعرضنا لهذه الممارسات إلا بعد تجريدنا من السلاح قبل شهرين حيث أخذوا بعدها يغتصبون بناتنا وزوجاتنا فهم يعلمون أننا أضعف من أن نقاوم»!!

    وقالت الصحيفة معلقة على هذه الممارسات إن جنود الجيش الشعبي لا يكتفون باغتصاب النساء والفتيات وإنما يقومون بقتل المواطنين ويتسببون في انفراط عقد الأمن وأضافت أنها قامت بجولة يوم السبت الماضي «وشهدت وضعاً شبيهاً بحالة الحرب… كان الجنود يتحركون بأسلحتهم ويبدون في حالة أقرب ما تكون إلى من يوشك على إطلاق النار في أية لحظة» وقالت الصحيفة إنها حاولت أن تحاور قائد تركاكا إلا أن حُرّاسه رفضوا ذلك وأضافت أن «معظم من تحدثت إليهم من المواطنين أبدوا امتعاضهم من جنود الجيش الشعبي»!!

    امرأة مسنة قالت إن رجلين من الجيش الشعبي دخلوا (التكل) الخاص بها وطلبوا منها ممارسة الجنس معهم وإطعامهم لكنها نجحت في إجبارهم على الخروج بعد أن صرخت!!

    صحيفة «سيتزن» الصادرة بتاريخ 22/3/0102م والتي أوردت الخبر في صفحتها الأولى قالت إن محافظ تركاكا كليمنت مارينق اعترف لها بأن «ألفين من قوات الجيش الشعبي قد تم نشرهم في تركاكا بدون إخطار السلطات

    منقول للتعميم والفائده لعل وعسى من يقر هنا يفهم ويدرك ما يسعى إليه عرمان وصحبه

    اللهم أحفظ نسائنا وبناتنا وأعراضنا وأعراض المسلمين آمين يا رب العالمين

  29. بشّار أحمد بشّار (إبن برد) كتب:

    سلام يا أمم :عمكم رجب ده أكان فاز أنا أحييه لأنو أفضل من منافسه (على الأقل عشان مايبقوا عليكم إاتنين…….و……) وأكان بقى ضرير اليبقى إنتو دايرين أعضاء برلمان ولا قناصة؟؟؟؟ سير سير يا أبو الأرجاب
    عجائباً زعموا الأيام مجفلةً عنهن في صفر الأصفار يا رجب

  30. علي سنكل كتب:

    مساء النور ود الزبير :

    امرأة مسنة قالت إن رجلين من الجيش الشعبي دخلوا (التكل) الخاص بها وطلبوا منها ممارسة الجنس معهم وإطعامهم لكنها نجحت في إجبارهم على الخروج بعد أن صرخت!!

    ما فهمتها دي يا ود الزبير تقصد “ممارسة الجنس معهم؟ إمرأه مسنة؟ ” واللا أنا نظري كعب؟

    عين الرضى عن كل عيب كليلة
    وعين السخط تبدى ” الجنس دا “

  31. البشاوى كتب:

    عزيزى ود الزبير
    ياأخوى إنت مشتلك المليان شجر كبار دة فتحتو جنب سيدى بيه ولا فى فى محلية الشجرة – صفقة صفقة ياشجرابى – بالمناسبة انتو شجر مشروع الجزيرة نشف ولا لسة اخضر ؟

  32. غير معروف كتب:

    د.شمباتي:
    “”لقد ذكرت فى حديثى انى لا اقلل من شأن ذوى الاحتياجات الخاصة,كيف افعل ولدى منهم واحد فى البيت!!؟؟””…ايها الطبيب الرقيق المهذب نعلم انك لا تسخر من احد حتي لو لم يكن لك منهم في اهلك..ولكن نعلم من يسخر منا جميعا ..وقد صدق ود الزبير من حيث لا يدري ..” يا شباب ومن الآخر كده لو في عهد الديمقراطيه أو عهد الإنقاذ النواب أصلاً بيجوا البرلمان عشان التكييف والنوم يعني الزول العميان ده ماراح يجيب حاجه جديده لو ما شاف الناس …”..وامعانا في السخرية بنا يعني بالعربي كده ارادو ان يقولو لنا “تستاهلو يحكمون العميان!!!”…وهذه المنطقة مهمشة تنمويا و مستهدفة فهي تقع ضمن منطقة مشروع الجزيرة المنحل..فماذا يضيرها ان تحكم بالعميان..يعني عايرة و مدنها سوط…

  33. نيام كتب:

    د.شمباتي:
    “”لقد ذكرت فى حديثى انى لا اقلل من شأن ذوى الاحتياجات الخاصة,كيف افعل ولدى منهم واحد فى البيت!!؟؟””…ايها الطبيب الرقيق المهذب حاشاك ان تسخر من احد حتي لو لم يكن لك منهم في اهلك..ولكن نعلم من يسخر منا جميعا ..وقد صدق ود الزبير من حيث لا يدري ..” يا شباب ومن الآخر كده لو في عهد الديمقراطيه أو عهد الإنقاذ النواب أصلاً بيجوا البرلمان عشان التكييف والنوم يعني الزول العميان ده ماراح يجيب حاجه جديده لو ما شاف الناس …”..وامعانا في السخرية بنا يعني بالعربي كده ارادو ان يقولو لنا “تستاهلو يحكمون العميان!!!”…وهذه المنطقة مهمشة تنمويا و مستهدفة فهي تقع ضمن منطقة مشروع الجزيرة المنحل..فماذا يضيرها ان تحكم بالعميان…
    وانا علي علم تام بان اهل هذه المنطقة من الحفظة و من الشعراء و من الادباء فمثلا منطقة (طابت) بعض الاسر تربطني بها علاقة جوار يعتبر اولادهم من العباقرة في شتي المجالات الاكاديمية و الادبية..(ديل يقرر مصيرهم عميان)..

  34. mon amie كتب:

    برنامج ما يطلبه المنخبون يهدي النشيد ده:
    اوعك تقطع صفق الشجره + عشان ما جينا جفاف تصحر
    شجره وشجره شجرتين + بتعمل غاااااااااااااااااااااااااااااابه
    نهديه لناس المؤتمر الوطني واصهارهم ومحبيهم ومطبلنهم وكل المنتفعين من وراءهم و ناس قرية ود البشير بتركيا ؟؟؟؟(يقال بان العبد لله يمتلك قريه في تركيا)

  35. حكاية كتب:

    مون امى
    كلام القريه ده زمان سمعنا بيهو لكن وبما انه جا منك ممعناها مؤكد
    قريه ود البشير ولا حوش بانقا 2 ههههههههههههههههههههههههههههههههههههههههه
    ود الزبير حقو بكرة ما يسوقوك الرحلة لانه حتحصل مشكلة بين مؤتمر وطنى وبين احزاب اخرى الزم بيتك
    سمعتو بالشجر القصاه ود عبد الفتاح اللفتاح قال داير يهذب الشجر تراهو برمى لقدام وكل يعمل باصله
    الشجرة بريئه براءة الذئب من دم ابن يعقوب
    الاستاذ واشاعر الفذ نيام
    نعتذر بشده لكن لم نقلل من شان احد ولكنه الترويح عن النفس بقصد المزح ليس الا …………….

  36. mon amie كتب:

    يا فولاني ايوه وفي زول في السودان ده ما ممقص من العصابه دى الا المنتفعين ومرطبين الانقاذ الماحاسين بالمعانه وانا ده رايي و المفروض اناس تحترم اراء الاخرين وبعدين انا ما قاعده اخرم بره موضوع النقاش للمعلوميه .

  37. ابكرون كتب:

    اذا الكلام عن الفساد الجنسي ليه الناس ماشه بعيد ما عندكم هنا في الخرطوم… فقط تلفت حولك وزي البحصل ده لم يكن معروفا في السودان او الخرطوم بهذه الدرجة والاباحية الا في هذا العهد المظلم والدليل ما تشاهده في الحدائق والشوارع ومرض الايدز (اكثر من الزكام) واللقطاء المالين الكوش وما المايقوما الا نقطة صغيرة في بحر وعمليات الاجهاض …ووووووو

    بما اني اختلف مع كاتب هذا الرابط ولا احب كتاباته لكن ما قاله في هذا الرابط فعلا تتناقله الالسن ليس في الخرطوم فحسب بل بره السودان ولا دخان بلا اوار نار تحته ولا رائحة نتنة بلا جيفة …..هاكم الرابط :

    http://www.sudaneseonline.com/cgi-bin/sdb/2bb.cgi?seq=msg&board=260&msg=1269440165

    مون : حكاية فكي دي اسالي منها حكاية( فعند حكاااية الخبر اليغين)…بالغين..وأسالي منها الزهراء (وينك يا زهور عسي الاختفاء قسري ؟)
    ناس الرحلة : امنياتنا برحلة سعيدة وحتكون سعيدة لو كانت خالية من ساس يسوس س س س س يا سوسو مش يا سلولو
    س س سامحني يا استاد الهلال عالجيني يا د. ناهد محمد الحسن يا ع س س س ل…….

  38. ياسين شمباتى كتب:

    ود الزبير..
    ياخ خليك من قصة البارات والحركات البعمل فيها المؤتمر الوطنى دى,,انحنا ينتكلم عن عدالة وعن حقوق,,يعنى اسه البارات والبيوت الحمراء ما موجودة!!؟؟ برج الفاتح دا ما بتتباع فيهو الخمر والممنوعات!!؟؟ فندق الساحة ما بيت دعارة عينى عينك!!؟؟ بعدين جلابى ما جلابى دى ما بتمنع اخذ الحقوق والواجبات..
    بعدين ما تجيب حوادث فردية للجيش الشعبى,,انت يا ود الزبير ما عارف ديمقراطية يعنى شنو!!؟؟ يعنى مافى زول بقدر يقلع حقك عنوة واقتدار..ولا ما سمعت بجنود الشرطة الاغتصبوا بنت فى عمر الزهور فى نقطة امتداد الدرجة الثاثلة قبل عدة سنوات؟؟ودا فى قلب الخرطوم!!؟؟ ولا ما سمعت عن تعذيب وقتل د.على فضل؟؟ سبحانك ربى..

    ودالباشا..
    مرحب بيك,,وكلامك منطقى..بعدين انا حكاية البوست انو عن تجاوز المؤتمر لقوانين صريحة ذكرتو فوق,لكن طبعا انت عارف الحاجات دى بتحصل كيف والغرض منها شنو!!

  39. ياسين شمباتى كتب:

    حكاية..
    النصيحة حااارة بس الناس بتاباها,,لكن بالجد غيروا اسم شارع محمد نجيب!!؟؟ لعنة الله على الظلم والفساد..

    سنكل..
    ولقد نجحت فى اخراجهم بعد ان صرخت!! وهم جنود وتبع الجيش الشعب,,معقولة دى يا مرسى!!!؟؟

    البشاوى..
    مرحب بالطلة..المشاتل كترت بس ان شاءالله تجيب دخل!!!

  40. ياسين شمباتى كتب:

    نيام..
    تسلم يا حبيب..وفعلا هم بستخفوا بعقولنا وعقول الطبقات المستنيرة المتعلمة,,وطاب تمشهود لها بالريادة فى العلم والتعليم والادب والشعر..اما مشروع الجزيرة فما تحرق قلبى زيادة على الحريق الفيهو..

    ابكرون..
    والله لقيتك صعب!! كايس العلاج عند اهل العلاج والنفسيات!!!

  41. mon amie كتب:

    اخواني صباحكم زي الورد والفل والياسمين
    اخ ابكرون اخ شمباتي والله صدقا لكلامكم الفساد والمواضيع دى ما استشرت وكثرت الا في ظل وفترة هذا النظام بل جاءت معه. زمان الكلام الفارغ ده كان مش مافي لكن ما بالشكل والانتشار الفظيع ده واغتصابات الاطفال دى ما كانت في بالمره الا في هذا العهد .ودى يعني حاجه شاهدتها بام عيني بنت جميله جدا ساكنه مع شاب من اسره معروفه في المجتمع ووالده ليه شان في المجتمع.سكنوا المنطقه التي نسكن فيها وكل ناس الحي فاكرنهم متزوجين وهم سكنوا جداد لكن لاندرى الا والشرطه تداهم شقتم متلبسين ووجدوا بالشقه خمور واشياء اخرى ربنا احفظ الجميع

  42. mon amie كتب:

    الساحه بس!! تعال شوف الحديقه الفي عفراء !! اخير منها البارات بتاعات عرمان

  43. ياسين شمباتى كتب:

    مون..
    امكن الشاب والشابة ديل حركة شعبية!! ما تلخبطى الكيمان ساكت..والله عارفين وهم عارفين لكنها غشاوة غطت اعينهم فقط..وطبعا دى حركات الكيزان,,الما بدوروهو بحدروا ليهو فى الضلام وبلبدوا ليهو,,ودونك ما حدث لدكتور عبدالهاد
    ى ابراهيم ودكتور عمر محمود خالد,,لا نقر ما اقترفوه لكن لماذا فى توقيت معين؟؟لان الخلاف استشرى مع احدى الجهات السياسية المؤتمرية طبعا..

  44. mon amie كتب:

    اخي شمباتي
    انا ما بتكلم عن الوان مرتكبي هذه الاخطاء السياسيه whatever it is لكن حبيت اوضح حجم الفساد وتغير الاخلاقيات في ظل حكومة المشروع الحضااااااااارى وتلسنهم علي الاخ عرمان والحكم علي حكمه قبل ان يحكم

  45. ياسين شمباتى كتب:

    مون..
    انا عارف لكن دا من باب المفاكهة والتهكم والرد على من يشنعون بالحركة الشعبية والمعارضة عموما..ركزى شوية..وكلنا فى الهم شرق..

  46. mon amie كتب:

    slam shambati
    شمباتي صباحك خير هل كتبت اسمك صاح فوق المهم نحن يااخي لولا الفكاهه والتهكم ده ما كان طرشقنا زمان ولحقنا امات طه سؤال صغيرونيييييي هن امات طه ديل حصل ليهن شنو انا بسمع بضرب المثل بس ما عرفت الحادث الحصل ليهن هو حصل ليهن شنو ؟

  47. ودالزبير كتب:

    حديث السياسه في الرحله

    أوضحنا رأينا هناك ونكتبه هنا ولو كره الفاقد التربوي ذلك !!!!!! لن نرضى أن تحكمنا الحركه الشعيه نحن أبناء الشمال هكذا وبلا مساحيق وبلارتوش الصفوف تمايزت بالنسبه لنا نحن من نرى إن الصراع الآن ليس بين الوطني وبقيه الأحزاب هو صراع هويه وقبيله وما الماعاجبو الكلام ده فالينتظر ناس السودان الجديد الذين يحلمون بشرب الجبنه في المتمه والزواج أو حتى التمتع بالقرب من بنات الشمال هكذه هي الحقيقه وأصحوا يا ناس الشمال من الخطر القادم

    كل عرقيه أو جهويه تكتلت مع بعضها وأنتم هنا تبشرون بياسر قرمان

    حقيقه الواحد ماعارف يقول ليكم شنو ؟؟

    الجيد في الأمر إن مصير السودان لا يقرر بالكتابه الإسفيريه وإن هناك من يسهر على أن لايتم هذا الأمر

    وإبريل ليس ببعيد !!

    لو تولت الحركه الشعبيه الحكم فنحن من سيلحق أمات طه

  48. ابوالمنذر كتب:

    ودالزبير
    اطمئن الحركه فشلت فى ان تلحق امات طه شوية مسيريه مضوقنهم الحنضل والجنوبى تقولو خش النار ولا تمشى على جيهة الجنجويد وكل الجعجعه هراطين ولا يستاسدو الا ان بقيت اعزل او ضعيف او جبان واعتقد ان هذه الصفات غير موجوده فى الانقاذ وجيشها وامنها ودبابينها ودفاعها الشعبى ولو لا الحرص على مباصرة الاطماع والاهداف الدوليه ومراوغتها لما غرد باقان وعرمان فى جوبا ناهيك عن الخرطوم…
    اما عن موضوع الفساد فلا اعتقد ان يوم الحساب سوف تحاسب الحيكومه بدلا عن الزانين والزانيات والمفسدين والمفسدات وكل نفس بما كسبت رهينه والحلال بين والحرام بين وعلى الدوله ان تعلن فقط الشريعه كقانون والتطبيق مسئوليه فرديه ورقابه شخصيه لاوامر الله والامر بالمعروف فى ظل دوله تطبق الشريعه يكون مسئولية المجتمع واذا اى فرد بلغ فور ا عن الشقه والبيت الجمبو افتكر ناس النظام ما حا يقصرو واذا راعى كل فرد قيم الدين فى نفسه وبيته ونصح صديقه وقاطعه وغضب منه وعليه فى الله ودينه لن نحتاج لدوله ونظام عام لان التكليف بحمل الامانه شخصى وقد نهى الاسلام عن التجسس وشدد فى قبول شهادة حد الزنا لحكمة ان تكون الرقابه شخصية وحتى لا تكون هناك مبررات مثل ما نسمع الان من شماعة الظروف الاقتصاديه والقهر وانشاء الله هذه المبررات تشفع لهم يوم القيامه
    ولا ننسى ان الفساد والجريمه موجود فى كل العصور ولماذا لايكون تتطور وسائل الاتصال والوسائط المتعدده فى هذا السودان اظهرتها بوضوح والنقله الحضاريه ليها اثرها على مستوى العالم الاسلامى وهناك حرب ليها ادواتها وامكاناتها المهوله لتحطيم القيم الاسلاميه وتحميل الحيكومات المسئوليه جزء اصيل من ادوات هذه الحملات اما تستجيب لضغوط ناس عرمان وتلاحق من يدعو للدين وتنكل بهم كما نسمع ونرى من حولنا حتى اصبح ارخاء اللحيه او التردد للجامع تلات مرات فى اليوم جريمه ..او محاولة التصدى لهذه الحملات فتصبح المحافظه على الحد الادنى من الاسلام محل محاربه شرسه وتهكم وسخريه من دعاة السودان الجديد ومن انخدع بدعواهم …
    الامن ارخص واسهل واوفر عنصر فى السودان اذن الفقر لا يبرر الفساد ومن خاف على دينه فقد جوز الاسلام الفرار فقط لحفظ الدين اذا خفت عليه وخفت الفتنه وليس الهرب الى بلاد الفسوق والكفر ثم القدح فى الاخلاق فى السودان والسبب الحيكومه

  49. هجار كتب:

    الاخوة الكرام جميعا
    السلام عليكم ورحمة الله وبركاته
    احب اطمنكم ان السودان لا يمكن ان يحكم بواسطة الحركة ، الجماعة العايزين يتنفسوا خلوهم يتنفسوا قبل الانتخابات .. لكن المرا دي ماعندها والي ولا شنو الكلام البتقول فيه دا كان صح كان كضب ما صاح منها ولا شنو ياجماعة … اظنها دي توافقونا عليها

  50. هجار كتب:

    بعدين الساكن مع بت جميلة وداهمتو الشرطة هي شاهد عليهو والعامل علاقة غير شرعية هي عارفاهو … الحكاية شنو

  51. اواصر كتب:

    السلام عليكم الزوار الكرام
    الأخ/ ابو المنذر سلام
    والله حيرتني لمن بوصلتي طشت ومالقت اتجاه تركز عليهو !!!!!!!!!!!!!!!
    ما كنت عارفة انو الحكومة بريئة للدرجة دى؟ يعني برئية من الفساد والمفسدين وتطبيق الشريعة والنظام والقانون ما من مسؤليتها والظروف الاقتصادية الطاحنة والقهر برضو ما مسؤولة منو والجريمة كذلك( لانو الجريمة ما حاجة جديدة ) وحتي الامن متوفر وهي ما تعبانة فيهو ؟ السؤال الحكومة من وجهة نظرك المفروض تعمل شنو بس اوعي يكون الشعب الفضل دا تقل عليها ولاحاجه كلمنا عشان نعتذر سريع ؟
    اوضحت الآتي يأخي:
    (جبهة الجنجويد وكل الجعجعه هراطين ولا يستاسدو الا ان بقيت اعزل او ضعيف او جبان واعتقد ان هذه الصفات غير موجوده فى الانقاذ وجيشها وامنها ودبابينها ودفاعها الشعبى ولو لا الحرص على مباصرة الاطماع والاهداف الدوليه ومراوغتها لما غرد باقان وعرمان فى جوبا) الجنجويد الهراطين ديل وعموم الحركات المتمردة الصغيرة اذلوا الحكومة ولفتوا انظار المجتمع الدولي كلو علي الحكومة وليها كم سنة ماقادرة عليهم الإ بإغرائهم بالمناصب والدعة والآكل من مال الشعب الغلبان والحكومة قايمة وقاعدة معاهم في الدوحة وآخرهم تجمع حركات صغيرة حتي اصبحنا مدعاة للضحك والسخرية بين العرب، والهراطين القلت عليهم وأشباههم ديل دخلوا ام درمان نهاراً ووقفوا علي امتار من بنك السودان والقصر الجمهوري . وعن اي دفاع شعبي تتحدث !!! دا حتي الحكومة نستو وزي ما بقولوا الكيزان كان ضرورية مرحلة التمكين وعدت خلاص ، (ولو لا الحرص على مباصرة الاطماع والاهداف الدوليه ومراوغتها لما غرد باقان وعرمان فى جوبا) طيب الناس دي فى رأيك كان المفروض تحارب لي كم سنة جاية كدا؟ والشباب يرحوا شمار في مرقة بدعوى الاستشهاد والحور العين عشان باقان وعرمان مايجوا الخرطوم والله التحية ليهم (رغم اختلافي الشخصى معهم) عشان هم ناس متمسكين بقضيتهم وما باعوا ضمائرهم للحكمومة عشان مناصب وجاه !
    (الانقاذ وجيشها وامنها ودبابينها ودفاعها) لاتعليق عندي سوى انها قوة الظلم وفرعون كمان كان قوى !
    (اما عن موضوع الفساد فلا اعتقد ان يوم الحساب سوف تحاسب الحيكومه بدلا عن الزانين والزانيات والمفسدين والمفسدات وكل نفس بما كسبت رهينه والحلال بين والحرام بين) دعنا بمعرفتي الضئيلة وضيق افقي (دا شخصي ما للحكومة) نعرف الحكومة هي كيان مكون من مجموعة افراد بغض النظر عن نوع الحكومة عسكرية ام حزبية آل عليها حكم البلاد بشعبها ومواردها وعليه فهؤلاء الافراد هم مسؤولون مسؤلية كاملة امام الله ثم الشعب الفضل عن اي صغيرو وكبيرة مع مسبباتها. يقول الفاروق رضي الله عنه والله لو زلت بغلة فى العراق لسألني الله لماذا لم اسوى لها الطريق .(ا خ نقول شنو بس) دي بغلة فمابالك ببني آدم الذي كرمة الله ووهب له نعمة العقل. والحتة دي حتودينا لجدلية القانون اولاً ام الأخلاق ودا موضوع طويل جدا.
    (واذا راعى كل فرد قيم الدين فى نفسه وبيته ونصح صديقه وقاطعه وغضب منه وعليه فى الله ودينه لن نحتاج لدوله) والكلام دا وين انشاء الله فى المدينة الفاضلة ولاوين ؟ تتدرج الممسؤليات والرعاية كما اوضح الحبيب صلى الله عليه وسلم بداءً من الخادم في مال سيده وهو مسؤل عنة مرورا بالآمة في بيتها والرجل في بيته وختم كلكم راعٍ وكلكم مسؤل عن رعيته .
    (الامن ارخص واسهل واوفر عنصر فى السودان اذن الفقر لا يبرر الفساد) أرخص واوفر كيف ؟ والظواهر الغربية المتفشية من قتل ومخدرات وحتي اغتصاب الاطفال و الكلاب المتوحشة التي هاجمت الاطفال والذاهبين لصلاة الفجر والتي تبرأت منها الحكومة وماخفي اعظم. وراجعين
    الأخ/شمباتي
    كل العذر الظاهر طشيت من موضوع البوست الاصلي لكن زي مابقولوا الكلام جاب الكلام وفي كلام مابقدر استحملوا يعني الضغط يعلي علي لو سكتا .

  52. mon amie كتب:

    ايوه يا هجار عندك مانع ومافي داعي للمطاعنات دى لانها من سمات الخ … تمها!و الموضوع مش جبتو اعتباط لكن بمناسبه وحاسب علي كلامك او اسكت

  53. mon amie كتب:

    وبعدي مع قلة الادب دي و عدم الاحترام ده انت زول ما محترم وباين من كلامك انت الماعندك وامشي ربي اخواتك ولا بناتك ومش تتشطر علي لاني متربيه و متعلمه احسن منك

  54. تاااااااااااااااني يا مون؟؟؟؟؟؟!!!!!!
    وبعدين؟؟؟!!!!

  55. هجاااااااااار شنو الحكايه ياخ؟؟؟؟؟!!!!

  56. mon amie كتب:

    الاخوه بالبوست بعتزر لكم لكن انا ماكنت فاكره بان بهذا المكان اليكاد ان يكون اسرى يوجد فيه مثل هذا التافه الذى يدعي هجار فهو اساء لي في شخصي دون وجه حق فبعتزر لكم وانا لا احب ان اسئ لشخص من القروب لكن البمسني بالمويه برد عليه بالمثل

  57. mon amie كتب:

    الاخ عبد الرحمن
    البادى اظلم انا ما اسات لهجار فما في داعي لقلة الادب والشتايم بتاعة المشاطات دى

  58. ياسين شمباتى كتب:

    مون آمى..
    حقيقة لقد افلستى وفقدتى لغة الحوار وصراحة اسلوبك سيئ جدا ودا شئ غير مقبول تماما..

    ود الزبير..
    لعن الله العنصرية البغيضة,,ولا تنسى ان لا فرق لعربى على اعجمى الا بالتقوى,,وقس على ذلك..
    بعدين ما عرفت الفاقد التربوى ديل منو !!؟

    ابوالمنذر..
    طيب يوم القيامة حيسألوهم عن شنو!!؟؟ حتى الدين دايرين تغيروا فيهو!!؟؟ وين لو عثرت بغلة ووين كلكم راع ووين سلطان جائر…..والخ…اتق الله فى قولك..

    هجار..
    ارجو التزام اخلاقيات الحوار مع اى طرف فى المننتدى والا الحكابة حتصبح فوضى..

  59. ياسين شمباتى كتب:

    اواصر..
    ما عليك,,وياريت الناس كلها تعرف ترد باسلوبك الواعى المحترم..شكرا كثيرا..

    الادمن استرايكر..
    القانون الاخلاقى اللى بيحكم المدونة شكلو ما عاجب ناس ولا قصدهم شنو ما عرفنا,,ارجو اتخاذ اجراءات حاسمة لكل من يسيئ للآخرين فى شخصهم او يستخدم كلمات نابية..مع وافر احترامى وتقديرى..

  60. monamie كتب:

    الاخ ياسين مع احترامي لك انا انسانه محترمه والما بعرفك بجهلك وما بحب اغلط مع انسان لكن البغلط في حقي ما بسمح له وبرد عليه بما يستحقه انا ما زوله شرانيه بالعكس ودوده جدا وحساسه جدا بشهادة من كل من يعرفني واكرر ما اسمح بالحقاره والتجريح في حقي وانت ادرى بمن بدا وراجع التعاليق لو سمحت قبل ان تصدر حكمك وارجو ان تكون عادل !

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s