صديقتي وانتخابات نقابة المحامين

Posted: الإثنين,29 مارس, 2010 by mon amie in اخرى

هذه قصة زميله وصديقه روت لي بان ظروفا جعلتها تهجر مهنتها المحاماة و هي ظروف اسريه وماديه مما جعلها لاتستطيع ان تجدد ترخيصها لسنوات خلال انتخابات النقابه اتصلت بها زميله من دهانيس المؤتمر الوطني ومتملقنه رغم انها من اسره معروفه بالخرطوم واصبحت تطاردها بالتلفون وتغريها بان كل السنوات التي لم تجدد فيها ترخيصها سيتم اعفائها منها وبالتلفون تحصلوا منها علي نمرة سجلها الذي ربما تم به تزوير والتصويت به وفي الاخر بقوا اتهربوا منها ويقلقوا تلفوناتهم وللان ما لمت في شئ ولكن سنقوم انا وهي بفضحهم علي نطاق النقابه لكنس المزورين المنتفعين

 

Advertisements
تعليقات
  1. نرحب بالعضوة مهوية – ونتمنى ان يطيب المقام لها بالموقع.

  2. ودالخلا كتب:

    سلام ياقبيلة،،
    نرحب بالأستاذة mahoia ،،،
    أنتو يا جماعة الخير الناس دي كوووولها دايرين الأعفاءات والتجاوزات حتي من القانونيين أنفسهم، واذا كان ناس المؤتمر مزورين ومنتفعين وكل البلاوي الشينة فيهم، لماذا لا يكون الناس أفضل منهم وأنزه منهم ويتصفون بالأمانة والصدق، لييييييييييه الناس تكون زيهم كده؟؟؟؟
    لماذا يقبل الأنسان في البداية أن يتعامل خطأ مع الشخص الخطأ لتمرير معاملة خطأ ويقبل لنفسه ان يستبيح حق الأخرين بغير حق وعندما يجد نفسه مخدوعا” يقوم بردت الفعل العكسية، والتي من المفروض أن تكون أبتدائية قبل الدخول في المساومة……
    علينا التمسك بالحق وأن نسلك الطريق الحق وأن لا نجاري المخطئين اوالمنتفعين ….
    هسي صديقتك دي لمن مالقت غرضها قالت أحسن تفضحهم، طيب ما كان الأولي أن يتم ذلك من البداية وخصوصا” وأنتم من ترعون حقوق الناس،،،،
    مالكم كيف تحكمون

  3. ابكرون كتب:

    بعد الترحيب
    لكن صديقتك تستاهل الحصل ليهاوالطمع علي حساب المبادئ كارثة…..يعني لو بروا بوعدهم كان الموضوع حيكون (ألسطا) تمام يعني …..موش……عجبي

  4. حاج أحمد السلاوى كتب:

    يا جماعة الخير كدى روقوا المنقة شوية ..
    الأخت / الإبنة مهوية قالت ليكم من البداية إنو صديقتها ما قدرت تجدد رخصتها ( رخصة المحاماة ) لعدة سنوات لأسباب لا نعلمها نحن بالضبط ..المهم إنها لم تستطع ذلك ..يلا قامو الجماعة الطيبين عرفوا مشكلتها وهم عندهم غرض ومحتاجين لأصوات الأعضاء لتزوير الإنتخابات ( إنتخابات المحامين طبعن )فحضروا إليها وأخدوا الدايرنو منها وفكوها عكس الهوا …يعنى ما مشت ليهم بكرعيها ..وكانت وعودهم زى وعود عرقوب ..والناس ديل ماشين بمبدأ الغاية تبرر الوسيلة ..عشان كدا أنا لا الوم الأخت المحامية بقدر ما اصب جام غضبى على المتاجرين بإسم الدين والدين منهم براء .والعملية كوووولها عملية نصب واحتيال..وما بُنى على باطل فهو باطل ..
    ومن حق هذه الأخت المحامية أن تفضح هؤلاء وتتقدم بشكوى لمجلس الأمن كمان ومحكمة لاهاى ويجب أن تقيم الدنيا ولا تقعدها حتى يعرف الناس كووووولهم الأساليب الملتوية التى يتبعها هؤلاء فى قضاء حوائجهم .
    والأخت المحامية لم تطىء فى شىء وإنما صدقت وعود الكاذبين..

  5. mahoia كتب:

    طبعا صديقتي ما تشنو عليها هجموم ساكت لان في الاول المحاميه ما عرضت ليها موضوع الانتخابات دي ودخلت ليها عن طريق انها دايره تساعدها فقط وانها عندها معارف لكن بعد عرفت بموضوع الانتخابات وحست المحاميه بان صديقتي سوف لا تؤدي لهم غرضهم فعلوا فعلتهم بطريقه اخري وطنشوها كيدا فيها لكن لو هي كان عندها علم ما كانت دخلت في الحته دى والله اعلم . ملحوظه: المحاميه من الغريب في الامر تبدو ما مؤتمر يعني غير محجبه

  6. ابكرون كتب:

    يعني هم ناس المؤتمر محجبين ؟؟؟

  7. mahoia كتب:

    ملحوظه ياشباب :مون امي هي مهويه بس معليش في الموقع الكتبت فيه المودوووع ابي اقبل لي مونامي بكدى دخلت باسم مختلف وبعتذر للربكه

  8. mahoia كتب:

    والله يا ابكرون هم ما محجبين لكن الحجاب بتاعهم ده تستر عن افعلهم القبيحه كما قيل ليس التكوزن عنوان عن الورع !

  9. ودالخلا كتب:

    يعني زي ما قال ليك أبكرون كان الجماعة عفوها من الرسوم وجددوليها من غير ما تدفع حاجة كانت سكتت وخلتهم يعملوا الدايرينو ونحن ما كنا عرفنا أن المؤتمرجية ديل مزوراتية!!
    بعد دين ياحاج السلاوي ما تدافع ساكت الكلام ده واضح وما داير شرح،،،،
    وبمعني تاني يا سلولو نحن من نصنع الفساد والطواغيت بمثل هذه التصرفات الميكافيللية، نحن من نصنع الفرعون، ،،
    يعني الواحد يفهم شنو من اللخبطة الحاصلة دي؟؟ الحجاب ده يا ربي حق المؤتمرجية المزوراتية ديل ولا الورع حق الكيزان..
    حقا” يا أبكرون أن أعجب معاك وعجبيييييييييي!!!!!!!!!!!!
     

  10. علي سنكل كتب:

    أيها الناس لماذا ندفن الرؤوس في الرمال ونطالب الناس بقضاء إمورهم في دواوين الحكومه بكل أمانه و إخلاص؟ أليس الأمر غير ذلك؟ من المعلوم أنك لن تقضى غرضاً في دواوين الحكومة من غير المعلوم ، لسد رمق المحروم. أرجو أن لا ينط علينا وعاظ الحكومه ليصفونا بالفساد ، الفساد في داخل ديوان الحكومه وليس في جلباب هذه المحاميه المسكينه. ما تعاينو لينا في الفيل و تصوبو سهامكم إلى ظله.
    نحن مش جماعة” قرفنا” ولكنا فترنا من الكلام معاكم بالمنطق.
    يا أهل “غير المنطق “.

  11. حاج أحمد السلاوى كتب:

    أخونا الكاشف ودالخلا الما بقودو زمام ..
    المحامية المسكينة دى عندها ظروف تعلمها هى شخصياً وصديقتها مهوية ولم تستطع بسببها تجديد عضويتها ورخصتها فى نقابة المحامين وما قالت بنتنا مهوية أن المحامية لم تكن تعلم بإن أخواننا فى نقابة المحامين سوف يستغلون إسمها ورخصتها فى تزوير تلك الإنتخابات ..ولنفرض أنها كانت تعلم ذلك فما هى المشكلة فى أن تجدد رخصتها دون فع الرسوم وهى كانت غير قادرة على دفع الرسوم ..وقد وعدوها بذلك وهم يعلمون ما هم مقدمون عليه من إستغلال وضعها الحرج ؟وحتى إن كانت مخطئة ومرتكبة لجريرة ما فإن جريرتها لا تُقارن بهؤلاء المزوراتية وهم ما كان احرى بهم التقيد بالقانون وتطبيقه على أنفسهم أولاً ..وأتمنى أن تقوم هذه المحامية بكشف هذه الحقائق حتى يعلم الناس جميعهم مستوى من يقودون البلاد حالياً ..
    وحقيقة لا اتعجب من فعلهم المشين فى إستغلال عضوية المحامية المسكينة ( نقابة المحامين التابعة للمؤتمر الوطنى ) وقد جاءت حكومة الإنقاذ التى هم مناصروها بأكبر كذبة فى التاريخ وهى أنها ثورة إنقاذ وما كانت إلا أداة لمن يدعون الإسلام والمتاجرين به .. أثروا من خلالها وأفقروا الأكثرية من شعبنا المغلوب على أمره وكلكم يعلم ذلك ..وجاء ذلك على لسان الكثيرين من قادة وزعماء ثورة الإنقاذ أنفسهم وليس لإفتراءاً عليهم أو من تاليف شخصى الضعيف .
    وكما قال أخونا الكاشف سنكل .. ما تعاينو للفيل وتصوبوا سهامكم إلى ظله ..
    – أخونا ودالخلا..المحامية هذه هى أحد الضحايا الكثيرين الذين لا نعلم عنهم وضاعوا فى الزحام ولم تسلط عليه الأضواء..فما المانع والضير أن ندافع عنها … وما اكثر المظاليم فى بلد ترفع فيه شعارات التوجه الحضارى ..ممن شُردوا وتم تعذيبهم ..وليس لهم إلا الله يوم يقف الجميع بين يديه لينال كل ظالم جزاء ما إقترفت يداه ..

  12. مشاكل كتب:

    سلامز

    الفاسد فاسد … و النضيف نضيف .. حتى لو أغروهو بي خزائن الدنيا كوووولها
    فإذا كان بعض من منتسبي المؤتمر الوطني فاسدين … فدا ما بخلي الناس تتنازل عن قيمها و مبادئها

    ولا موووو هييييييك

  13. مهويا أو مون آمي
    مبروك الباسويرد وألف مرحبتين علي وزن تلاته سريرين
    أهو برضو عرفنا إنك محاميه وإنك مش خيال
    مرحباً بك تانين
    وجاييك بي رواقه

  14. حاج أحمد السلاوى كتب:

    ولدنا مشاكل ..سلام
    أى مبادىء وأى قيم تتحدث عنها اليوم ..يا ابنى العزيز ؟
    وخلاص كل الفساد انتهى ولم يتبق إلا فساد هذه المحامية المسكينة المغلوب على أمرها التى تخلت عن مبادئها وأصحاب المبادىء الذين أنت تتحدث عنهم أخذوا رقم رخصتها المهنى وزوروا به إنتخاباتهم يرفلون فى سياراتهم الفارهة ويتحدثون بإسم النظام ..ماذا تسمى هذا النوع من الأفعال ؟

    – ضحكت كثيراً صباح اليوم عندما سمعت السيد وكيل وزارة الصحة وهو يتهكم بسخرية فاضحة عن نواب الأخصائيين وأطباء الإمتياز ..فقال فى معرض حديثه ..لا م إعتراض لدينا أن تقوم اللجنة المختصة ببحث مطالب الأطباء أن تعطى نائب الأخصائى خمسة مليون وطبيب الإمتياز ثلاثة مليون ..وأضاف أو حلاوة حربة !!!نعم بالحرف الواحد ..حلاوة حربة ..فهل يستخفف السيد الوكيل دمه مع مقدم البنامج أم هو تهكم على زملائه من الأطباء ؟ وادعوكم للرجوع إلى هذه المقابلة التى قدمت فى قناة الشروق مساء امس .

  15. ودالخلا كتب:

    اخونا كبير القبيلة وعمدتها الهمام حاج احمد السلاوي، نحن ما اختلفنا معاك في ظروف الأستاذة وظروف المواطن السوداني ، ولكننا نختلف معاكم في أنهيارالأخلاق، وضياع المبادئ والمثل ونسبة كل هذه المخازي للحكومة كما تفضل بعض الأخوة ببيان ذلك بأن الفساد داخل جلباب الحكومة!!
    طيب ما الناس لبست جلباب الحكومة وسايرتها في غيها وضلالها!!
    أصر علي أننا من نصنع الفساد ونصنع الفرعون وأذا وقف الجميع وأمتنعوا عن أداء الرشوة والتسهيلات والرقعة والشنو والشنو … لأنقطع الفساد وتمت محاربته ونتساءل بدورنا عن دور المواطن السوداني العفيف ذو الأخلاق الرفيعة أين دوره في محاربة ومكافحة هذا الفساد والتدهور؟؟؟؟
    ولوكان هنالك مفسدون في المؤتمر أو في غيره من الأحزاب وهذا شيئ طبيعي يوجد في كل بقاع الدنيا فهؤلاء الناس هم بشر خطاؤون، لماذا ينجرف معهم بقية المجتمع ويسايرهم في فسادهم وأفسادهم،،،
    أليس هناك رجل رشيد؟؟؟؟؟؟؟؟؟

  16. مشاكل كتب:

    الله يديك العافية يا صديقي الحقيقي ود الخلا

    فلا طائل من وضع كل التهم على الحكومة .. فيجب أن يحاسب الناس أنفسهم .. قبل أن يحاسبوا

    فإذا سألهم رب العباد .. سيسألهم عن ماذا فعلوا هم و هم فقط ؟؟

    كما قلت .. الفاسد فاسد

  17. ودالزبير كتب:

    ياااااااااااا خلف الله ……..!!!…….. ماعذبتنا!!!!!!!!!!

  18. elturkey كتب:

    أحبائى السلام عليكم ….. ياحاج كنت متوقع سؤالك الصغنونى (هى المحامية دى عضويتها منتهية كيف قدرت تصوت أو فنقل يصوتو ليها ؟) ولا انا راكب غلط ؟
    طيب … بصفتها محامية فهى سلفا تعرف أن (القانون لا يحمى المغفلين) ماينط واحد ويتهمنى بأنى اسئت ىاليها بس أعتقد انو دى فقرة فى لغة المحاماة ….. لا أدافع عن طريقة استغلالها للفرصة والتى انقلبت ضدها انما أعجب لمن يتنازل عن شئ مقابل شئ آخر ثم يندب حظه مهما كانت الظروف … لماذا لم تفض أمرهم قبل أن تتورط معهم ؟ … يامونى آمور هناك اسئلة كثيرة يجب طرح اجاباتها من خلال موضوعك والا فكل الذى يكتب سيكون ناقصا … نورينا ولك علينا التعليق أوالتنظر (ان شئت)

  19. ودالخلا كتب:

    مش كدة يا مشاكل، ما قلنا ليهم كيفما تكونوا يولي عليكم ما رضيو!!

  20. حاج أحمد السلاوى كتب:

    أخى التركى ..وبقية صفوة الأخيار ..
    أخصائيو التزوير ممكن يعملوا كل حاجة .. ما عندهم حاجة صعبة ..
    وحسب فهمى للبوست هو أن الجماعة ديل وعدوها بتجديد رخصتها للمحاماة وأخذوا منها رقم سجلها المدون عندهم ( طبعن لم يجدد لعدة سنوات خلت ) وقاموا بعملية التصويت بإسمها ( ودى عملية ما فى أسهل منها ..ومش حتغلبهم ابداً ) وكبروا الكوم بتاعهم وفازوا فى الإنتخابات ( زى ما حيفوزوا فى الجاية برضو ) وبعد دااااك زاغوا من أختنا المسكينة وفكوها عكس الهوا ..وقفلوا جوالاتهم بعد ما أخدوا منها العاوزنو .. وبكل بساطة ..وغلطتها هى ( وغلطة الشاطر بعشرة زى ما بيقولوا ) إنها وثقت من كلام صاحبتها المحامية التانية والمؤمن صديق ..حتى يثبت العكس ..
    دا كل ما فى القضية .. يا جماعة الخير .. إنو حصل إستغلال ظرف معين لتمرير أجندة معينة لجهة معينة أخدت منها مكاسب معينة ..
    أما موضوع الحكومة وفسادها دا نحنا خليناهو على جنب لأنو الحكومة مرفوع عنها القلم ..والفى إيدو القلم ما بيكتب نفسه شقى ..ولا عتب على الحكومة ..لأنو ربنا هو اللى حيسالهم عن كل صغيرة وكبيرة يوم لا ينفع مال ولا بنون إلا من أتى الله بقلب سليم ..
    – سؤال لأخينا الما بيقودو زمام .. ودالخلا .. هل تستطيع اليوم أن تؤدى أو تقضى أى مهمة أو غرض من أى جهة حكومية دون أن تدفع المعلوم ..وعلى عينك يا تاجر دون خجل أو مواراة .. بل صار المعلوم حق مكتسب تدفعه وأنت صاغر ..وربنا يجازى الكان سبب !!

  21. حسن عبدالوهاب كتب:

    السلام عليكم كوووولكم وأنا عضو جديد لنج وتحياتى الى الجميع

  22. ودالزبير كتب:

    حاج السلاوي ( خليفه خلف خلف الله خلف خلاف ) المحامي حاضر عن المتهم

    أخونا حسن عبدالوهاب
    يأخي تاني حبابك ومرحب بيك أخوك رحب بيك في بوست عقد الجلاد لكن ما مشكله تاني نرحب بيك وتالت وألف زاتو

    يا خلف الله ما عذبتنا

  23. monamie كتب:

    الاخوه الكرام صباحكم زين
    طبعا انا قريت ردودكم كلها والهجوم علي صديقتي وكنت باتصل عليها وبوصل ليها رايكم يا اخواني المهاجمين الزوله دي كانت ساعيه بان تتقدم من قبل للنقابه بطلب لاعفاءها من الرسوم السابقه وبالفعل عملت الطلب فعندما قابلتها الاستاذه الغشاشه قالت ليها ماعندك مشكله وانا بعرف ناس ح اساعدوك في استعادت ترخيصك وبالفعل اعطتها عنوان شخص في النقابه.يا اخ ود الخلا صديقتي لم تشارك في هذه العمليه وهي انسانه نزيه واكتر زول بكره المؤتمرالاوطني وهي علمت مني بالصدفه موضوع انتخابات النقابه فلا تظلموها للمره الثانيه

  24. ودالخلا كتب:

    سلام ياقبيلة،،
    يا بت الشيخ نحن ما عندنا رأي في أنها تكره المؤتمر الوطني أو تحب الحركة الشعبية، فهذا رأيها الشخصي وهواها، ولكننا نتحدث عن أن الفساد الموجود هو في الحقيقة من صنعنا نحن من عند أنفسنا، فنحن من نمهد للفاسدين والمفسدين الطريق، ولو قمنا بفعل مضاد وكل حسب مقدرته وحيلته لأمكننا مكافحة الفساد وتحجيمه ولو الي حين،،،،
    وكلام عمك حاج أحمد السلاوي بأنك لن تستطيع عمل مصلحة تخصك أو تقضي غرضك الا أذا دفعت أو سهلت فهذا هو عين الفساد لأننا قمنا بتقنين الفساد ووضع المبررات الفاسدة لمسايرته وأعني الفساد!!
    بالنسبة لموضوع صديقتك وأنها محامية ومن نتوقع منها حماية القانون ومنع الأساليب الفاسدة، وجدناها بحسب ما أوردتيه في قصتها مع بتوع النقابة أنها قد تكون دخلت في مساومة بأن يتم تجديد السجل من غير رسوم علي أن تقوم هي بالتصويت لمصلحتهم (علما” بأنها تكرههم)، فلماذا فعلت هذا ؟؟؟ لقد داست علي مبادئها ومشاعرها ووافقت علي السير في طريقهم لتقضي مصلحتها الشخصية، وهذا هو جوهر الموضوع وبيت القصيد وهو أعتراضنا علي الميكافيللية كسلوك يرتضيه المسلم!!!!!!!!!

  25. حاج أحمد السلاوى كتب:

    أخونا العزيز جداً ود الخلا ..وبقية صفوة الأخيار .. سلام .
    ما لى أراك مصراً أصراراً شديداً على أن أختنا / بنتنا المحامية قد شاركت فى إنتخابات المحامين المزورة.. وهى لم تفعل ذلك حسب ما فهمت ( على قدر عقلنا المحدود ) من مداخلة بنتنا مون آمى الأخيرة اعلاه .
    أما موضوع الفساد فإغننى آمل أن يأتى علينا ذلك اليوم الذى تذهب فيه لقضاء أو إنجاز مهمة ما دون أن تضطر إلى دفع المعلوم ( ويكون دائماً فى صور عدة ..ليس بالضرورة أن يكون نقداً )وأذكر أنه كانت أمام دارنا المتواضعة ماسورة ماء رئيسية مكسورة ..غتصلنا على الجهة المنوط بها القيام بإصلاح مثل هذه الأعمال .. تعال شوف المماطلة والأعذار الواهية ..وفى النهاية علمت من السيد رئيس الوردية أنه لابد من التعاون ابلصورة المعروفة لدى الجميع ..فحملناهم بسيارتنا الخاصة واكرمناهم بالفطور والشاى وقليل من النثريات فقاموا بإصلاح العطب ..وبعده بأسبوع عادت المياه تنضح من جديد ..وعليك إعادة مسلسل الحلقات من جديد ..وهكذا دواليك ..
    وأضيف أن كل اسباب ذلك هو غياب الوازع الدينى عند البعض ( لا مجال للتعميم إطلاقاً ) مما ادى إلى ظهور مثل هذه الفئات … ولا أخالك ببعيد عن ممارسات البعض من رجال المرور فى الطرقات ..
    ختاماً أود أن أقول والله على ما اقول شهيد أننى لا أعرف هذه المحامية الضحية ولا اعرف الإبنة مون آمى إلا من خلال هذا المنتدى حتى لا يتبادر إلى أذهان البعض أن دفاعى ومناصرتى للأخت المحامية نابع من معرفة أو صلة قربى ..
    والسؤال القديم الجديد دائماً هو كما سال أديبنا الراحل الطيب صالح ..من اين اتى هؤلاء القوم ؟
    مع خالص محبتى ومودتى لك أيها الصديق اللدود ..
    وما تقطع الجوابات .

  26. ودالزبير كتب:

    خليفه خلف خلف الله خلف خلاف المحامي حاضر عن المتهم

    يااااااااا خلف الله……….. ما عذبتنا

  27. monamie كتب:

    طيب يا اخي لوهي مقابل تسوط اعفو ليها الرسوم فما الداعي لاخذ نمرة سجلها والتزوير به فمن الافضل لهم التجديد لها وتسويطها لهم اصلا ولا منشاف ولا من درى ودى ما دايره فهامه والذكي بفهما براهو وانا ولا الحاج بندافع عنها لكن اقول ليك هم ما قدروا اعرضوا عليها البيع مقابل الشراء عشان ما ضامننها هل تقبل ام ترفض وبالتالي تجيب ليهم هوا فدخلوا ليها من باب المساعده وكتابة استرحام وكدى و بعد داك اكبوا الزوقا واقولوا ليها طلبك رفض وفعلا هذا ما قالهو لها الشريك في اللعبه عندما اتصلت عليه قبل 10يوم

  28. monamie كتب:

    انتوا عارفين خلف الله العذاب ده منو؟ ده ما هههههههههههههههى البشير

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s